#نعي


آيبني شگـول اعليك آيبني
دولبني زماني بيك دوليني
ـــــــــــــــــــــــــــــــــــــ
دولبني زمان بيك ياسلوه
شلون انساك ونسه أيامنه الحلوه
اشهل بلوه المثلها ما جرت بلوه
آيبني العند الموزمه ذنبي
ــــــــــــــــــــــــــــــــــــــ
تذب البيك تسعه امن الشهر شالت
اونالت من ثجيل الحمل ما نالت
أمك جابتك يمدلل او حالت
اويوم البيه صرت ياشبل شيبني
ــــــــــــــــــــــــــــــــــــــ
شيبني اصيارك والهدم حيلي
هز مهدك يشمامه او سهر ليلي
منك حرمت امك ليش ياويلي
آخر ما گلت حقها او تطالبني
ــــــــــــــــــــــــــــــــــــــ
اطلبك سهر ليلي والمنازع ذاك
اطلبك باللبن من درَّتي الغذاك
نسيت ارباك يا جاسم نسيت ارباك
يمدلل سگمني ارباك وتعبني
ـــــــــــــــــــــــــــــــــــــ
تعبني وسگمني او غير اللوني
على صدري ربيت او مر على امتوني
حسبت احساب وحسابي طلع دوني
على راسي ابيوت امشيده تبني
ــــــــــــــــــــــــــــــــــــــ
تبني البيت لامك والجعيده امك
تصاحبني وتجيب الواجب ابصمك
ريت الگبر ضمني قبل ما ضمك
الموت الموت يبني اوياك يرغبني
ــــــــــــــــــــــــــــــــــــــ
يرغبني الكبر سني او شوفي ازهيد
حيلي راح مني والجريب ابعيد
يبني من تجي الشبان يوم العيد
صار النوح يوم العيد يطربني
ــــــــــــــــــــــــــــــــــــــ
يطربني العزه والنوح بالهجري
يفي الصيف يا عذب الهوه اليسري
اخذني الكبر منحيه الضهر تدري
ابذلة كبرتي يبني تسيبني
ــــــــــــــــــــــــــــــــــــــ
تسيب امك يجاسم من بعد عدها
عين الله على العريس واحدها
تريد اتناشدك تگعد او ناشدها
تگلك باليسر منهو اليرچبني
ــــــــــــــــــــــــــــــــــــــ
يبني الفاجدات اكثرهن امخلفات
ماتدري تموت ام الولد لو مات
يبني ارباي وينه او سهر ليلي الفات
يبني ليش ماتگعد تحاچيني


المرحوم
عبد الامير الفتلاوي

#اللهم_عجل_لوليك_الفرج
https://www.tg-me.com/AL_Nay_and_Alrthaa

#نعي

مشه للقاسم حسين وتعناه
وشافه امخضب اعله الكاع بدماه
جر حسره عليه وصاح ويلاه
باجر للحسن شعتذر منه


حط صدره اعله صدره وشال جسام
ورد مكسور ضهره فوگ الخيام
تلگنه الفواجد ها يضرغام
اشجرى وظهرك شبيه القوس چنه

شگل للحسن باجر من الاكيه
من يفگد اوليده وينشد اعليه
شرد اعتذر منه وشرد احاجيه
وشسولف للحسن لو نشد عنه


وگف بين الشباب وناده الحسين
يطيب الكم النوم وتغمض العين
يبطال الصفا وعج الميادين
العسكر يم خيم زينب تدنه


وين أم الشباب الـراح .وين العـدها أبن مفـگـود
خل تعلن حزنها الـيـوم. خل تلبس أثياب الســود
حگها الرايح ألها أولـيـد. الون أعلى الولد مريود
وهذا العاشته أم جسام. كل ساعه وحزنها يزود

السيد حسين الياسري

#اللهم_عجل_لوليك_الفرج
https://www.tg-me.com/AL_Nay_and_Alrthaa

نعي لمولاي الأكبر روحي فداه 👇

#نعي الى لمولاي الأكبر عليه السلام
***
دخلت خيمته ورفعت اديها
والاكبر سالم تريده يجيها
تدعي للولد وشصار بيها
ومن كثر البواجي انغمه اعليها

صاحت كلبي بفراكك تفطر
وعكبك ما نشف دمعي يالاكبر
وجه حسين اشوفنه تغير
وصحت اشلون بيه الله وكبر

ينساني ويروح ما ادري الولد ينساني ويروح
من كثر الجروح اجر كوه النفس من كثر الجروح

محد يعوضه يايمه الولد محد يعوضه
واشلون ترضه كلب امك تكسره اشلون ترضه

ما شايفه النوم. صايرلي اشكثر ما شايفه النوم
والحيل مهدوم انوح الفركتك والحيل مهدوم

ما يشفه ويطيب. تره جرح الولد ما يشفه ويطيب
راسي انترس شيب. ييمه بفركتك راسي انترس شيب

مابي محنه يثاري افراكم مابي محنه
شيريد منه يايمه الوكت شيريد منه

شيردها الايام راحت يالولد شيردها الايام
بليل ما نام. من يوم الرحت بليل ما نام

تعبني فركاك يبو طول الحلو تعبني فركاك
ما راح تنساك امك يالولد ما راح تنساك

ما لايك اعليك. يايمه الكبر ما لايك اعليك
وتراب غاطيك لكيتك يالحنين اتراب غاطيك
*
الشاعر
تحسين الخفاجي

#اللهم_عجل_لوليك_الفرج
https://www.tg-me.com/AL_Nay_and_Alrthaa

#أبوذيات

يعوف اوليده عل تربان ... يابى
يخط بجدامه صوب الخيم ... يابه
وايگله علي يا علي .......... يابه
اكسرت ظهري يبويه اشلون بيه ....

اكسرت ظهري يدهري الله ... واكبر
انه اشعندي فقط عباس ...... واكبر
انترس جسمه جروح ازغار ... واكبار
خلص دمه . او دمع ما خله بيه ...

مصابك غير ارسومي ... ولوني
علي واعداي من عگبك .. ولوني
لانه المتت من گبلك ..... ولاني
جبتلك ماي من گبل المنيه ....

ابو فاطمة الطائي

#اللهم_عجل_لوليك_الفرج

#تراث

مقتل مولاي القاسم صلوات الله عليه

طلع للكون والصمصام بیده
ابن اثنعش و الحرب عيده
مـن يـطـرد فـلا يسـلـم طـريده
يفر واعـلـيـه طـيـر المـوت حـوم
ــــــــــــــــــــــــــــــــــــــ
تلگاها او نحـرهـا اشـلـون مـنحر
فـل اجمـوعها او للخيل طشر
طليعة هـاشم او ظنوات حيدر
يحسب الموت يـوم الـكـون مـغنم
ــــــــــــــــــــــــــــــــــــــ
عـليه اشما يـزود الفـزع يشـتد
يدّب(أدب) شوسها او حط للحرب حد
ماظل بـالحرب حـران ينعد
الا او گـام مـن سـيفه ایتکتم
ــــــــــــــــــــــــــــــــــــــ
عگب ما يَدّب الفرسان فعله
گطع چـف المنيه اشراک نعله
و گف يلويه و الأسـدى گـصدله
طبر راسـه او عـليه العسكـر التم
ــــــــــــــــــــــــــــــــــــــ
هـذا يـشهر السيف او يضربه
او هـذا فـوگ اصـاویبه يصوبه
او هذا ينكث الزانـه اعـلى گـلبه
او هـذا لـلـرمي ابجسمه ايـتعلم
ــــــــــــــــــــــــــــــــــــــ
صـاح بـصوت ليـه اسرع يعمي
ترانی اتخضبت مـن فـيض دمـي
يعمي امن الطبر خدموا جسمى
او لا ظل عـظـم سـالم مـا تـهشم
ــــــــــــــــــــــــــــــــــــــ
لفـاه الحـومة الميدان عـمه
لگاه مطروح و امـعفر ابـدمه
حنه اظـلوعه عـليه او گعد يمه
يشمه او عـن جـبينه يمسح الدم
ــــــــــــــــــــــــــــــــــــــ
یگـله يا سـلوتي او بـدر لـيـلي
ينور العين شتهيس احچيلي
يعمي ونـتـك بــيدت حـيـلي
او طـود الصـبر لمصابک تهـدم
ــــــــــــــــــــــــــــــــــــــ
يعمي من شرگ هـامتك نصين
يبعد اهلي اصواب اليوجعك وين
يعمي اشلون اشيلك للصواويـن
و انته امن الطبر جسمک امخـدم
ــــــــــــــــــــــــــــــــــــــ
شـاله او للـمخيم بـيـه سـدّر
او حط جاسم يويلي ابصف الاكبر
گعد مـا بينهم و الدمـع فـجر
تشب ناره او علیه اتـراكـم الهـم
ــــــــــــــــــــــــــــــــــــــ
نوبه ينحني اعـلى ابـنه او يحـبه
او يمد ايده او يجس نـگـاد گلبه
او نـوبه دمـعه الجـاسم يصبه
او یگللهم اشبيدي اعلى المحـتم
ــــــــــــــــــــــــــــــــــــــ
يم جـاسم غـدت للـحـرم حـنه
لمـن شـافته ابـدمه تحـنه
امـه اتـصيح يـا جـاسم امـهنه
ابهـا الزفه يبعد الخـال و العـم
ــــــــــــــــــــــــــــــــــــــ
ربیتک او عـيـنـي اعـليك تـربي
او يحسب بیک ليـل انـهـار گـلبي
يجـاسم بیش او چـد بـعد دربي
او ضوه اعيوني طفاه الدهر و اظلم

السيد المرحوم عبدالحسين الشرع

#اللهم_عجل_لوليك_الفرج

#تراث

يريع الگلب يمدلل...يجاسم جاعده يمك
يبني گوم باصرني...عفتني ليش ماني أمك
ــــــــــــــــــــــــــــــــــــــ
يبني مو محل النوم...فك عينك إو حاچيني
وين أنطي الوجه عگبك...رايي تاه دليني
ما أوچد بعد دربي...منها سال مي عيني

وما أعتقد تتبره...ما هي إمناسبه منك
ــــــــــــــــــــــــــــــــــــــ
تسعه بالحمل شلتك...وأطلبك بالمنازع ذاك
وأطلبك بالحليب إللي...شربته وسهر ليلي إوياك
أبچي مثل ما تبچي...وأتسله الگلب برباك

ما خليتك إعله الگاع...تمشي إو شايله همك
ــــــــــــــــــــــــــــــــــــــ
ما هميت بس برباك...يبني وأحسب إسنينيك
وتوصل حد مواصيلك...وتنظر لمك إبعينك
وأعرسك وافرح إبعرسك...واخضب حنه چفينك

أبد ما چان بحسابي...حنه يصير إلك دمك
ــــــــــــــــــــــــــــــــــــــ
وإملبسك صار الزان...والنشاب يوليدي
وزفوك برماح وبيض...يا سعدي وبدر عيدي
ردت يومي گبل يومك...وإنت إتحضر توسيدي

حسابي طلع بالمگلوب...يالبيك إنفجع عمك
ــــــــــــــــــــــــــــــــــــــ
الولد مريود يالمهيوب...يبني المثل هالساعه
يالنارك إبلب إحشاي...يالغطريف لساعه
إجه عمك ابدمع العين...چوچه إعليك فك باعه

مسح دم وجهك إبچفه...وحسره جذب وإشتمك
ــــــــــــــــــــــــــــــــــــــ
ردت نادته رمله...كافي النوم يا جسام
عمك خلصت أنصاره...والعسكر عليه هالحام
گوم إنده علي ألأكبر...إشلون ينام وإنت تنام

منهو بالحمل ينهض...يمن عودك ضخر ضمك
ــــــــــــــــــــــــــــــــــــــ
لاچن يولدي معذور...أحشمك غصب يمنتب
أدري عتب ما تحمل...وأعتبنك يالمعتب
شلون تگوم وإمواصل...طبر يالشهم وإمهذب

بسيوف العده وسفه...وحيف الغبره إتضمك
ــــــــــــــــــــــــــــــــــــــ
يا سلوتي شلون تنام...من بعد شلون العين
يالما تمّت إسنينك...وحاتفني عليك البين
غبت والشهر ظل لمك...يا ضخر الحسن لحسين

يعريس الحرب يبني...إرماح إعداك زفنك



الشاعر المرحوم
الحاج كاظم السلامي الكربلائي


#اللهم_عجل_لوليك_الفرج

وين الفاجده الشبان وين الضايگه اللوعه
هاي ام جاسم العريس بالعريس مفجوعه
ـــــ
وين الفاجـــــده الشبــان خــل وياي تتعنه
لأم جاسم نريد نروح نساعــدها على الونه
ونرد الحوفة العريس ونجيم بحوفته حنه

ونلگه ام الشباب اتجـول
على بنها العگـل مذهـول
وتتنعه على الولد وتكول

يشمامة المن سباح هرش الچبد مگطوعه
ـــــ
لگينه ام الشباب اتجول وگمنه نجول وياها
ام وفاجــــده اعله النــوح مايحتاج ننخاها
اولگينه شمعت العـريس مطفيه او علگناها

وشــدينه الطم والنـــوح
ابحرگه والگلب مجــروح
ومن شفنه الولد مطروح

شفنه چثه العريس أسهام ونبل مزروعه
ـــــ
بين الطـــــم والصـايح وبين الدمـعـه والحسره
اجتهن عمت العــريس زينب شـــــابچه العشره
ولگت شمع العرس داوي وصاحت لاچن ابعبره

شنهي الشــمـع وي البين
احنه وعرس جاسم وين
لايسمع اخــــوي احسين

ومن يسمع يجي بهمه ويطفي الشمع بدموعه
ـــــ
بالله الشمع طفنه نريد اعله الولد نلطم
انه عمته وامــه وهـــــاي اموجله وتهم
للطف جيت ماظنيت اليه البين متـولم

وثبت بالدلـيــل اســهــام
وهد حيلي بعرس جسام
آيا بـــــدر ســعــدي التام

راح وصورته ضلت وسط احشاي مطبوعه
ـــــ
من ايدي بن اخـويه راح راح الچــان الي ونسه
حسبت احساب ظني خاب عمته وتفرح بعرسه
راح العرس من جسام وضلت حــســرته بنفسه

ويا حسرت بني هــاشم
المفجرعه بعرس جاسم
مبــارك عــالــثــره نـايم

وعمك يبن اخوي عليك نار وسرت بضلوعه
ـــــ
يومك يبن اخوي يوم هد حيلي ولوه جيدي
وامــك بالخيام تصيح راح الــولــد من ايدي
اريــدن موتتي ويـــــاك ياعـــــريس يوليدي

يجاسم شوف حال امك
تــلــوج وجــاعــده يمك
تخضـب راسها بــدمــك

حكها ام الولد عنها حچاية العتب مرفوعه
ـــــ
هاي امك يجاسم هــاي بيك الدهر دوهنها
سهرت ربت اوتعبت وخاب من الربه ضنها
تصيح ارباي اريد ارباي گلي اشتعتذر منها

تصيح ارباي اريد ارباي
منـك يا ضـــــوه عيناي
يجاسم مو مروّه هـــاي

تروح وضلت اعله امك دواهي الحزن مجموعه

للشاعر المرحوم
الحاج معين السباك

#اللهم_عجل_لوليك_الفرج

#تراث

جسّام يا ضنوتي ... رايح ... رايح امن اعيوني
ما رحمني الدهر أنته نور البصر
رايح .. رايح من اعيوني
ــــــــــــــــــــــــــــــــــــــ
يوليدي تدري ابهذا گلبي انطعن
بمصاب أبوك الحسن عگب الحسن
أنت الأمل ظليت أتاني الزمن
لن اعله ثوب العرس تلبس چفن

تنيت الزمن و الأمل ... وينه ... يبني انخطف لوني
ودعتني اشبعد ... انتظر يا وعد
رايح .. رايح من اعيوني
ــــــــــــــــــــــــــــــــــــــ
يبني برباك اتعبت حيلي انضهد
محنيه چنت اعليك فوگ المهد
ينعدل ظهري فكرت يالولد
و فگدت گلت انته الرجه و الضُمد

عرسك ابفكري حلِم ... يمته ... ابعرسك يبشروني
هذا حلمي صبح ... شو حزن مو فرح
رايح .. رايح من اعيوني
ــــــــــــــــــــــــــــــــــــــ
جنت احسب اسنين العمر بالزغر
و افرح ابكل سنةِ الجديده التِمر
واثنعش يبني جمّعت لك عُمر
هاي السنين اتعبت بيها اشكثر

لن ساعة وحده العده ... اسنينك ... منها يحرموني
دهري يبني اشلعب ... يبني كل التعب
رايح ... رايح من اعيوني
ــــــــــــــــــــــــــــــــــــــ
يبني و لمن چنت بعدك طفل
كلما اشوفك دمع عيني هِمل
يبني يتيم اليتم ما ينحمل
حتى و لو عمك ابو ينجعل

و ربيت بين الأهل ... اهلك ... لجلك يحشموني
ما هويت الأهل ... و النجم لو أِفل
رايح .. رايح من اعيوني
ــــــــــــــــــــــــــــــــــــــ
و طلعت من بيتي على عزتي
گلت ابني اگبالي وهو رجوتي
و بكربله حين انصبت خيمتي
انته چنت يا ضنوتي شمعتي

بس انته يا بني صرت ... يمي ... وين اليودوني
سلوتي ابرجوتي ... يالترد وحشتي
رايح ... رايح من اعيوني
ــــــــــــــــــــــــــــــــــــــ
حسباتي خلتني بمصيبه احس
وردة شبابك خاف لن تنعفس
ابها الحالة و بحسبات هاي النفس
لن تنصب أهلك الك حوفة عرس

لن أهلك اتباشرت ... يبني ... ابعرسك يهنوني
او لن عفت حوفتك ... قررت روحتك
رايح ... رايح من اعيوني
ــــــــــــــــــــــــــــــــــــــ
عمّك ابو فاضل اجه ابفرحته
و انصب لك الحوفه او نشر رايته
هذا علي الأكبر علگ شمعته
اينادي جبتها الجاسم او زفته

ناديت من فرحتي ... امبارك ... أهلك يسمعوني
تالي صوتي ابتدل ... حسره دمعه همل
رايح ... رايح من اعيوني


الشاعر المرحوم
عبد الحسين ابو شبع

#اللهم_عجل_لوليك_الفرج

ياصاحب الزمان ❤️💔😭

#تراث #ابوذيات
لمولاي الاكبر عليه السلام


سواد العين فـاض ونشف مايه
عله إللي نزل للميدان مايه
إسم ألله يا إوليدي عسن مايه
الكدر ليك وترد محروس إليه

يهل شايل عزيز الروح وانه
إودعنه وجر إعليه وانه
منه إسهرت الليالي إعليه وانه
الكسرني الدهر بأرض الغاضريه

إصبي العين متلولح وناراه
وذهب من ناظري ضيه وناراه
بگلبي ظلت الونه وناراه
إحمست چبدي وأجر ونه خفيه

جمـر العطش بگليبي شبابه
عله إللي منحرم لذة شبابه
يمدونه عله الغبره شبابه
إنگطع منه الوصل وإنگطع بيه

يالأكبر هاك إخذ گلبي وراعه
يبني وإدرع إبصبره وراعه
وإخذ الماي من چبدي وراعه
إتغذه إبمهجتي إو شد عالمنيه

الشاعر المرحوم
الحاج كاظم المنظور الكربلائي

#اللهم_عجل_لوليك_الفرج

#تراث

مقتل سيدي ومولاي علي الاكبر
صلوات الله وسلامه عليه


-تسايل بالدمع لوداع الأكبر
-ويگلبي ذوب لوداعه او تفطر

يويلي من تلاگوا عند الوداع
امشابگ طول لمن هووا للگاع
لاع ابنٍ لبيّه والأبو لاع
على ابنيّه يويلي اوداع الاگشر

يشم احسين خد ابنه او يحبه
او دمعه مثل دمع ابنه يصبه
والنار اللي ابگلب ابنه ابگلبه
يخفيها على ابنه او نوب تظهر

يگله والدمع بالعين دفاگ
ابعبره امكسره وابگلب خفاگ
يبويه اوداعة الله هذا الفراگ
يبويه اشبيدنه هذا المگدر

يبويه للسيوف اسدر او للزان
او لُوح ابغارتك واشلش الميدان
يبويه اليوم مرواحك لِلجْنان
او بالكوثر يبوي اليوم تِفطر

تحسر ويل گلبي وجذب ونّه
او منّ الماي آه انگطع ظنّه
عرف لنّ المنية دنت منّه
جره دمعه او للميدان سدّر
.
.

-شبل احسين للميدان سدّر
-او خلّه الخيل بالهامات تعثَر

سدر والكون شابچ زان واسيوف
نشّاب او نَبِل وارماح واحتوف
ما والله رجف گلبه امن الخوف
ولا وجهه من اشراگه تغيّر

هز غدارته او ذبّ العمامه
نِشر راسَه اسم الله اعله النشامه
خز اگلوبها او شرّگ الهامه
او لَف راياتها وللسّرب نشّر

عگب ما شرّگ الهامات والطاس
اجتّه ضربة العبدي على الراس
ضعف واتواردو بسيوفها الناس
شبگ عالمهر ويلي والمهر فر
.
.

-على ابن احسين يا گلبي تفطر
-شبگ علمهر ويلي والمهر فر

شبگ عالمهر لبّاله يودّيه
لبوه احسين عنّ الگوم يحميه
أويلي المهر للعدوان فر بيه
وأوچب آه بِموسط العسكر

داروا بالسيوف عليه والزان
مثل چتال سبع المات فرحان
عسى ابعيد البلا وليته العدوان
أراذل بالمعايب دوم تفخر

هذا يگطع ابسيفه وريده
او هذا بالخناجر فصّل ايده
او هذا يغط من رمحه الحديده
ابخاصرته وهو يعالج او يفْغَر

ثگل بيه الطبر وتلوج روحه 😭
اومحد عرف غير الله اجروحه
دِمَاياته على احصانه سفوحه
لمَن خرّ ابهناديها اموذّر

نده يحسين هذا الساع جدي
سگاني الماي واروى عطش چبدي
يگول اسرع تراك اليوم عندي
أويلي احسين صاح: الله واكبر
.
.

-أويلي احسين صاح: الله واكبر
-يبوي ليش هالنومه ابهالحر

گعد عنده او شافه امغمض العين
ابدمّه سابح امترّب الخدين
متواصل طبُر والرّاس نصّين
حنه ظهره على ابنيّه او تحسّر

يبويه گول منهو الشرگ راسك
ينور العين من خمّد انفاسك
يعگلي من نهَب درعك او طاسك
يروحي اشلون اشوفنّك امطبّر

يبويه من عدل راسك او رِجليك
او من غمض اعيونك واسبَل ايديك
ينور العين كل سيف الوصل ليك
گطع گلبي او لعند احشاي سدّر

يبويه من سمع يمّك ونينك
من شبحت لعند الموت عينك
للعشرين ما وصلن اسنينك
او حاتفني عليك الدهر الاگشر

اريد امسح اجروحك واشم خدك
واحط صدري على صدرك ووسدك
ما راعوا يبويه حرم جدك
واجت زينب تصيح: الله واكبر

الشاعر المرحوم محمد بن نصار

#اللهم_عجل_لوليك_الفرج
https://www.tg-me.com/AL_Nay_and_Alrthaa

السلام على عريس الطفوف القاسم بن الامام الحسن المجتبى
لعن الله امة قتلتكم بالايدي والالسن

كأنِّي بِهِ يَلوِي شِرَاكَ نِعَالِهِ
بِمَيدَانِهَا لم يَخشَ تِلكَ العَسَاكِرا

فَلمَّا أن دَنَا المَحتُومُ مِنهُ وآنَ أن
يَحِلَّ بِدَارٍ لِلنَّبِيِّ مُجَاوِرَا

عَلَاهُ لَعِينٌ مِن قَفَاهُ بِضَربَةٍ
عَلى الرَّأسِ أدمَت للهُدَى مِنهُ نَاظِرَا

" بِعِمامةِ المَسمومِ عَمَّمَهُ الحُسَيْنُ
وَضَمَّهُ كَالشَّمْسِ تَحْضُنُ فَرْقَداً 💔🖤".

السّلامُ علىٰ من فدا عمَّهُ بدمائِه..
- بُنَي قاسِم، ڪيفَ تجِدُ طعم الموتِ عندك؟
- واللهِ يا عمُّ، في نُصرَتِكَ ؛ أحلىٰ مِنَ العسل.