#تراث

مقتل مولاي القاسم صلوات الله عليه

طلع للكون والصمصام بیده
ابن اثنعش و الحرب عيده
مـن يـطـرد فـلا يسـلـم طـريده
يفر واعـلـيـه طـيـر المـوت حـوم
ــــــــــــــــــــــــــــــــــــــ
تلگاها او نحـرهـا اشـلـون مـنحر
فـل اجمـوعها او للخيل طشر
طليعة هـاشم او ظنوات حيدر
يحسب الموت يـوم الـكـون مـغنم
ــــــــــــــــــــــــــــــــــــــ
عـليه اشما يـزود الفـزع يشـتد
يدّب(أدب) شوسها او حط للحرب حد
ماظل بـالحرب حـران ينعد
الا او گـام مـن سـيفه ایتکتم
ــــــــــــــــــــــــــــــــــــــ
عگب ما يَدّب الفرسان فعله
گطع چـف المنيه اشراک نعله
و گف يلويه و الأسـدى گـصدله
طبر راسـه او عـليه العسكـر التم
ــــــــــــــــــــــــــــــــــــــ
هـذا يـشهر السيف او يضربه
او هـذا فـوگ اصـاویبه يصوبه
او هذا ينكث الزانـه اعـلى گـلبه
او هـذا لـلـرمي ابجسمه ايـتعلم
ــــــــــــــــــــــــــــــــــــــ
صـاح بـصوت ليـه اسرع يعمي
ترانی اتخضبت مـن فـيض دمـي
يعمي امن الطبر خدموا جسمى
او لا ظل عـظـم سـالم مـا تـهشم
ــــــــــــــــــــــــــــــــــــــ
لفـاه الحـومة الميدان عـمه
لگاه مطروح و امـعفر ابـدمه
حنه اظـلوعه عـليه او گعد يمه
يشمه او عـن جـبينه يمسح الدم
ــــــــــــــــــــــــــــــــــــــ
یگـله يا سـلوتي او بـدر لـيـلي
ينور العين شتهيس احچيلي
يعمي ونـتـك بــيدت حـيـلي
او طـود الصـبر لمصابک تهـدم
ــــــــــــــــــــــــــــــــــــــ
يعمي من شرگ هـامتك نصين
يبعد اهلي اصواب اليوجعك وين
يعمي اشلون اشيلك للصواويـن
و انته امن الطبر جسمک امخـدم
ــــــــــــــــــــــــــــــــــــــ
شـاله او للـمخيم بـيـه سـدّر
او حط جاسم يويلي ابصف الاكبر
گعد مـا بينهم و الدمـع فـجر
تشب ناره او علیه اتـراكـم الهـم
ــــــــــــــــــــــــــــــــــــــ
نوبه ينحني اعـلى ابـنه او يحـبه
او يمد ايده او يجس نـگـاد گلبه
او نـوبه دمـعه الجـاسم يصبه
او یگللهم اشبيدي اعلى المحـتم
ــــــــــــــــــــــــــــــــــــــ
يم جـاسم غـدت للـحـرم حـنه
لمـن شـافته ابـدمه تحـنه
امـه اتـصيح يـا جـاسم امـهنه
ابهـا الزفه يبعد الخـال و العـم
ــــــــــــــــــــــــــــــــــــــ
ربیتک او عـيـنـي اعـليك تـربي
او يحسب بیک ليـل انـهـار گـلبي
يجـاسم بیش او چـد بـعد دربي
او ضوه اعيوني طفاه الدهر و اظلم

السيد المرحوم عبدالحسين الشرع

#اللهم_عجل_لوليك_الفرج

#تراث

يريع الگلب يمدلل...يجاسم جاعده يمك
يبني گوم باصرني...عفتني ليش ماني أمك
ــــــــــــــــــــــــــــــــــــــ
يبني مو محل النوم...فك عينك إو حاچيني
وين أنطي الوجه عگبك...رايي تاه دليني
ما أوچد بعد دربي...منها سال مي عيني

وما أعتقد تتبره...ما هي إمناسبه منك
ــــــــــــــــــــــــــــــــــــــ
تسعه بالحمل شلتك...وأطلبك بالمنازع ذاك
وأطلبك بالحليب إللي...شربته وسهر ليلي إوياك
أبچي مثل ما تبچي...وأتسله الگلب برباك

ما خليتك إعله الگاع...تمشي إو شايله همك
ــــــــــــــــــــــــــــــــــــــ
ما هميت بس برباك...يبني وأحسب إسنينيك
وتوصل حد مواصيلك...وتنظر لمك إبعينك
وأعرسك وافرح إبعرسك...واخضب حنه چفينك

أبد ما چان بحسابي...حنه يصير إلك دمك
ــــــــــــــــــــــــــــــــــــــ
وإملبسك صار الزان...والنشاب يوليدي
وزفوك برماح وبيض...يا سعدي وبدر عيدي
ردت يومي گبل يومك...وإنت إتحضر توسيدي

حسابي طلع بالمگلوب...يالبيك إنفجع عمك
ــــــــــــــــــــــــــــــــــــــ
الولد مريود يالمهيوب...يبني المثل هالساعه
يالنارك إبلب إحشاي...يالغطريف لساعه
إجه عمك ابدمع العين...چوچه إعليك فك باعه

مسح دم وجهك إبچفه...وحسره جذب وإشتمك
ــــــــــــــــــــــــــــــــــــــ
ردت نادته رمله...كافي النوم يا جسام
عمك خلصت أنصاره...والعسكر عليه هالحام
گوم إنده علي ألأكبر...إشلون ينام وإنت تنام

منهو بالحمل ينهض...يمن عودك ضخر ضمك
ــــــــــــــــــــــــــــــــــــــ
لاچن يولدي معذور...أحشمك غصب يمنتب
أدري عتب ما تحمل...وأعتبنك يالمعتب
شلون تگوم وإمواصل...طبر يالشهم وإمهذب

بسيوف العده وسفه...وحيف الغبره إتضمك
ــــــــــــــــــــــــــــــــــــــ
يا سلوتي شلون تنام...من بعد شلون العين
يالما تمّت إسنينك...وحاتفني عليك البين
غبت والشهر ظل لمك...يا ضخر الحسن لحسين

يعريس الحرب يبني...إرماح إعداك زفنك



الشاعر المرحوم
الحاج كاظم السلامي الكربلائي


#اللهم_عجل_لوليك_الفرج

وين الفاجده الشبان وين الضايگه اللوعه
هاي ام جاسم العريس بالعريس مفجوعه
ـــــ
وين الفاجـــــده الشبــان خــل وياي تتعنه
لأم جاسم نريد نروح نساعــدها على الونه
ونرد الحوفة العريس ونجيم بحوفته حنه

ونلگه ام الشباب اتجـول
على بنها العگـل مذهـول
وتتنعه على الولد وتكول

يشمامة المن سباح هرش الچبد مگطوعه
ـــــ
لگينه ام الشباب اتجول وگمنه نجول وياها
ام وفاجــــده اعله النــوح مايحتاج ننخاها
اولگينه شمعت العـريس مطفيه او علگناها

وشــدينه الطم والنـــوح
ابحرگه والگلب مجــروح
ومن شفنه الولد مطروح

شفنه چثه العريس أسهام ونبل مزروعه
ـــــ
بين الطـــــم والصـايح وبين الدمـعـه والحسره
اجتهن عمت العــريس زينب شـــــابچه العشره
ولگت شمع العرس داوي وصاحت لاچن ابعبره

شنهي الشــمـع وي البين
احنه وعرس جاسم وين
لايسمع اخــــوي احسين

ومن يسمع يجي بهمه ويطفي الشمع بدموعه
ـــــ
بالله الشمع طفنه نريد اعله الولد نلطم
انه عمته وامــه وهـــــاي اموجله وتهم
للطف جيت ماظنيت اليه البين متـولم

وثبت بالدلـيــل اســهــام
وهد حيلي بعرس جسام
آيا بـــــدر ســعــدي التام

راح وصورته ضلت وسط احشاي مطبوعه
ـــــ
من ايدي بن اخـويه راح راح الچــان الي ونسه
حسبت احساب ظني خاب عمته وتفرح بعرسه
راح العرس من جسام وضلت حــســرته بنفسه

ويا حسرت بني هــاشم
المفجرعه بعرس جاسم
مبــارك عــالــثــره نـايم

وعمك يبن اخوي عليك نار وسرت بضلوعه
ـــــ
يومك يبن اخوي يوم هد حيلي ولوه جيدي
وامــك بالخيام تصيح راح الــولــد من ايدي
اريــدن موتتي ويـــــاك ياعـــــريس يوليدي

يجاسم شوف حال امك
تــلــوج وجــاعــده يمك
تخضـب راسها بــدمــك

حكها ام الولد عنها حچاية العتب مرفوعه
ـــــ
هاي امك يجاسم هــاي بيك الدهر دوهنها
سهرت ربت اوتعبت وخاب من الربه ضنها
تصيح ارباي اريد ارباي گلي اشتعتذر منها

تصيح ارباي اريد ارباي
منـك يا ضـــــوه عيناي
يجاسم مو مروّه هـــاي

تروح وضلت اعله امك دواهي الحزن مجموعه

للشاعر المرحوم
الحاج معين السباك

#اللهم_عجل_لوليك_الفرج

#تراث

جسّام يا ضنوتي ... رايح ... رايح امن اعيوني
ما رحمني الدهر أنته نور البصر
رايح .. رايح من اعيوني
ــــــــــــــــــــــــــــــــــــــ
يوليدي تدري ابهذا گلبي انطعن
بمصاب أبوك الحسن عگب الحسن
أنت الأمل ظليت أتاني الزمن
لن اعله ثوب العرس تلبس چفن

تنيت الزمن و الأمل ... وينه ... يبني انخطف لوني
ودعتني اشبعد ... انتظر يا وعد
رايح .. رايح من اعيوني
ــــــــــــــــــــــــــــــــــــــ
يبني برباك اتعبت حيلي انضهد
محنيه چنت اعليك فوگ المهد
ينعدل ظهري فكرت يالولد
و فگدت گلت انته الرجه و الضُمد

عرسك ابفكري حلِم ... يمته ... ابعرسك يبشروني
هذا حلمي صبح ... شو حزن مو فرح
رايح .. رايح من اعيوني
ــــــــــــــــــــــــــــــــــــــ
جنت احسب اسنين العمر بالزغر
و افرح ابكل سنةِ الجديده التِمر
واثنعش يبني جمّعت لك عُمر
هاي السنين اتعبت بيها اشكثر

لن ساعة وحده العده ... اسنينك ... منها يحرموني
دهري يبني اشلعب ... يبني كل التعب
رايح ... رايح من اعيوني
ــــــــــــــــــــــــــــــــــــــ
يبني و لمن چنت بعدك طفل
كلما اشوفك دمع عيني هِمل
يبني يتيم اليتم ما ينحمل
حتى و لو عمك ابو ينجعل

و ربيت بين الأهل ... اهلك ... لجلك يحشموني
ما هويت الأهل ... و النجم لو أِفل
رايح .. رايح من اعيوني
ــــــــــــــــــــــــــــــــــــــ
و طلعت من بيتي على عزتي
گلت ابني اگبالي وهو رجوتي
و بكربله حين انصبت خيمتي
انته چنت يا ضنوتي شمعتي

بس انته يا بني صرت ... يمي ... وين اليودوني
سلوتي ابرجوتي ... يالترد وحشتي
رايح ... رايح من اعيوني
ــــــــــــــــــــــــــــــــــــــ
حسباتي خلتني بمصيبه احس
وردة شبابك خاف لن تنعفس
ابها الحالة و بحسبات هاي النفس
لن تنصب أهلك الك حوفة عرس

لن أهلك اتباشرت ... يبني ... ابعرسك يهنوني
او لن عفت حوفتك ... قررت روحتك
رايح ... رايح من اعيوني
ــــــــــــــــــــــــــــــــــــــ
عمّك ابو فاضل اجه ابفرحته
و انصب لك الحوفه او نشر رايته
هذا علي الأكبر علگ شمعته
اينادي جبتها الجاسم او زفته

ناديت من فرحتي ... امبارك ... أهلك يسمعوني
تالي صوتي ابتدل ... حسره دمعه همل
رايح ... رايح من اعيوني


الشاعر المرحوم
عبد الحسين ابو شبع

#اللهم_عجل_لوليك_الفرج

ياصاحب الزمان ❤️💔😭

#تراث #ابوذيات
لمولاي الاكبر عليه السلام


سواد العين فـاض ونشف مايه
عله إللي نزل للميدان مايه
إسم ألله يا إوليدي عسن مايه
الكدر ليك وترد محروس إليه

يهل شايل عزيز الروح وانه
إودعنه وجر إعليه وانه
منه إسهرت الليالي إعليه وانه
الكسرني الدهر بأرض الغاضريه

إصبي العين متلولح وناراه
وذهب من ناظري ضيه وناراه
بگلبي ظلت الونه وناراه
إحمست چبدي وأجر ونه خفيه

جمـر العطش بگليبي شبابه
عله إللي منحرم لذة شبابه
يمدونه عله الغبره شبابه
إنگطع منه الوصل وإنگطع بيه

يالأكبر هاك إخذ گلبي وراعه
يبني وإدرع إبصبره وراعه
وإخذ الماي من چبدي وراعه
إتغذه إبمهجتي إو شد عالمنيه

الشاعر المرحوم
الحاج كاظم المنظور الكربلائي

#اللهم_عجل_لوليك_الفرج

#تراث

مقتل سيدي ومولاي علي الاكبر
صلوات الله وسلامه عليه


-تسايل بالدمع لوداع الأكبر
-ويگلبي ذوب لوداعه او تفطر

يويلي من تلاگوا عند الوداع
امشابگ طول لمن هووا للگاع
لاع ابنٍ لبيّه والأبو لاع
على ابنيّه يويلي اوداع الاگشر

يشم احسين خد ابنه او يحبه
او دمعه مثل دمع ابنه يصبه
والنار اللي ابگلب ابنه ابگلبه
يخفيها على ابنه او نوب تظهر

يگله والدمع بالعين دفاگ
ابعبره امكسره وابگلب خفاگ
يبويه اوداعة الله هذا الفراگ
يبويه اشبيدنه هذا المگدر

يبويه للسيوف اسدر او للزان
او لُوح ابغارتك واشلش الميدان
يبويه اليوم مرواحك لِلجْنان
او بالكوثر يبوي اليوم تِفطر

تحسر ويل گلبي وجذب ونّه
او منّ الماي آه انگطع ظنّه
عرف لنّ المنية دنت منّه
جره دمعه او للميدان سدّر
.
.

-شبل احسين للميدان سدّر
-او خلّه الخيل بالهامات تعثَر

سدر والكون شابچ زان واسيوف
نشّاب او نَبِل وارماح واحتوف
ما والله رجف گلبه امن الخوف
ولا وجهه من اشراگه تغيّر

هز غدارته او ذبّ العمامه
نِشر راسَه اسم الله اعله النشامه
خز اگلوبها او شرّگ الهامه
او لَف راياتها وللسّرب نشّر

عگب ما شرّگ الهامات والطاس
اجتّه ضربة العبدي على الراس
ضعف واتواردو بسيوفها الناس
شبگ عالمهر ويلي والمهر فر
.
.

-على ابن احسين يا گلبي تفطر
-شبگ علمهر ويلي والمهر فر

شبگ عالمهر لبّاله يودّيه
لبوه احسين عنّ الگوم يحميه
أويلي المهر للعدوان فر بيه
وأوچب آه بِموسط العسكر

داروا بالسيوف عليه والزان
مثل چتال سبع المات فرحان
عسى ابعيد البلا وليته العدوان
أراذل بالمعايب دوم تفخر

هذا يگطع ابسيفه وريده
او هذا بالخناجر فصّل ايده
او هذا يغط من رمحه الحديده
ابخاصرته وهو يعالج او يفْغَر

ثگل بيه الطبر وتلوج روحه 😭
اومحد عرف غير الله اجروحه
دِمَاياته على احصانه سفوحه
لمَن خرّ ابهناديها اموذّر

نده يحسين هذا الساع جدي
سگاني الماي واروى عطش چبدي
يگول اسرع تراك اليوم عندي
أويلي احسين صاح: الله واكبر
.
.

-أويلي احسين صاح: الله واكبر
-يبوي ليش هالنومه ابهالحر

گعد عنده او شافه امغمض العين
ابدمّه سابح امترّب الخدين
متواصل طبُر والرّاس نصّين
حنه ظهره على ابنيّه او تحسّر

يبويه گول منهو الشرگ راسك
ينور العين من خمّد انفاسك
يعگلي من نهَب درعك او طاسك
يروحي اشلون اشوفنّك امطبّر

يبويه من عدل راسك او رِجليك
او من غمض اعيونك واسبَل ايديك
ينور العين كل سيف الوصل ليك
گطع گلبي او لعند احشاي سدّر

يبويه من سمع يمّك ونينك
من شبحت لعند الموت عينك
للعشرين ما وصلن اسنينك
او حاتفني عليك الدهر الاگشر

اريد امسح اجروحك واشم خدك
واحط صدري على صدرك ووسدك
ما راعوا يبويه حرم جدك
واجت زينب تصيح: الله واكبر

الشاعر المرحوم محمد بن نصار

#اللهم_عجل_لوليك_الفرج
https://www.tg-me.com/AL_Nay_and_Alrthaa

السلام على عريس الطفوف القاسم بن الامام الحسن المجتبى
لعن الله امة قتلتكم بالايدي والالسن

كأنِّي بِهِ يَلوِي شِرَاكَ نِعَالِهِ
بِمَيدَانِهَا لم يَخشَ تِلكَ العَسَاكِرا

فَلمَّا أن دَنَا المَحتُومُ مِنهُ وآنَ أن
يَحِلَّ بِدَارٍ لِلنَّبِيِّ مُجَاوِرَا

عَلَاهُ لَعِينٌ مِن قَفَاهُ بِضَربَةٍ
عَلى الرَّأسِ أدمَت للهُدَى مِنهُ نَاظِرَا

" بِعِمامةِ المَسمومِ عَمَّمَهُ الحُسَيْنُ
وَضَمَّهُ كَالشَّمْسِ تَحْضُنُ فَرْقَداً 💔🖤".

السّلامُ علىٰ من فدا عمَّهُ بدمائِه..
- بُنَي قاسِم، ڪيفَ تجِدُ طعم الموتِ عندك؟
- واللهِ يا عمُّ، في نُصرَتِكَ ؛ أحلىٰ مِنَ العسل.

#نعي

لمولاي علي الأكبر روحي فداه

ابـاب الـخـيـمـه ليـلـى اتـصـد لأبنـهــا
أوحـســبات الـمـفــــارگ خـــذنـــــهـا
تـخـــاف اعـلـى الـولــد ينـبـاگ منـهـا
الـكـل هــذا الـدهــر مـا غــاب عـنـهـا

تـعـبـت اعليك يبنـي وأحسـب أسنـين
وعلــيك مسـاهـره مـاغمـظـت الـعــين
حسبـالـي تــرد لأمـــــك ربـــى الــديـن
وكــل سـاعـه وگـلـت راح الـولـد ويـن
مـــا حـاسبـه أحســـــاب الـمـيــــاديـن

حـين الشـــافـهـه حســين أوسمـعـهــا
تــون اعلـى الـولـــي ويـنـزل دمـعـــهـا
أوليلـى أمن البـچـي أتـغـيـر وظـعــــها
غــص بحـســـرة أو گــــــوه دفــعــهــا

گـاللـهــا الخـطــر يـالـيـلــى چـــنــه
جـريـب أوهـل بـرزلــه أنخـاف منـه
بلـكـت لـو دعـيـتـي الـخـطــر عـنــه
يـدفـــعـه الله يـلـيـلـه ويـرجــع النه

روحـت علــي طــولــت چــنـــهــــا
وكــل اخــبـار مـا وصلـتـنــي منــها
دعــاء الـوالــده البــاري لأبـــنــــــهـا
يلـيـلـه ايـسمـعـه ويــرده الحـظـنـها

وگـفـت ليـلـى يـم بـاب المـخــيــم
وصـاحـت يـلاهــي أبـحـالي تـعـلم
اريـد اولـيـدي كـون ابـهــاي يسـلـم
ويــرد لـيـه عــدل مــــن الـمـحــتـم


أستـجـاب اللـه الـدعـاء أورد علـيـهـا
علـي الأكبــــر وصـــار ابـيــن اديـهــا
وگـــــــام ايسـولـفـلـهـا ويحـاچـيـــها
وطـلـب شـربـت أميـه اليـگـوه بـيـها
علـى الـعـــدوان خـاطــر يــرد ليـهــا

خذت مـاعـونـهـا لـيلـى أومشت بيـه
تــدور مـــــــاي للأكـبـــــــر تــرويــــه
مــاخـلــت مـچـــان المـامشــت ليــه
أوردت خــالـيــه بـمــاعـونهـا اعليـــه
مـامـقـسـوم أبـنـهـا أمــيـه تسگـيــــه

لأبـيــــــك روح يـالاكـــبــر يــرويـــك
أوبلـكـت مـاي عـنـده وشربـه يسجيك
ثجـيله الحـرب خـاف أوتكـلـف اعليك
أوتـظـعـف هـمـتـك واعــداك تـوليـــك

فـگــد الـولــد مـحــد يـحـس بـيـــه
بـس اللـولـت أوسهـرت سنـه أعلـيــه
خـل شـوفـي يــروح أعلـيــه خـــلـيه
الـعـزيـز أمـه تـحـن طـول الـدهر ليـه

طـول أبطــول حـط وي الـمـشـكــر
أوشبــگ كــل منهم الثـانـي وتحسر
مـاي أمـنـيـن أجـيـبـلـك يـالاكــبـــر
يگــله أونــار جـمــر الـگـلب تســعـر
عمــت عيـنـي يـبـويـه مـذبلـك الحر

تــوادع وي علـي ورد يمشـي بهداي
بعـد چـلـمـت علي اباله العلى الماي
عـــود آنــه يـبـــويــه ردتــك اوياي
مـن تـهـجـم علـيـه اوتـلـتـم اعـداي

نسألكم الدعاء

السيد حسين الياسري

#اللهم_عجل_لوليك_الفرج

#نعي
كأني بأبو الفضل العباس
ينعى ابن أخيه علي الأكبر
عليهم السلام


كسرت گلوبنة يا بعد عمك
متگطع وذر مدري شيلمك
ابوك حسين هذا وانة يمك
راح ايموت اخيي فوكَ جسمك

طول بطول دومك انت وياي
نتشارك يعمي حتى بالماي
اجيتك يبن اخوي متيه الراي
ما تطري اعله بالي عملتك هاي

يعمي يا عزيز الروح ياكبر
عمت عيني شفت جسمك تطبر
بعد عمك متت عطشان بالحر
وجمسك يا عزيزي تارس البر

محتار بمصابك عمي بأمرين
مدري عليك اونن مدري لحسين
كسر گلبي اشوفه يديرلي العين
يبو فاضل يگلي راح الحنين


كأني بالامام الحسين يكلم ابا الفضل عليهما السلام
يگلة


يبو فاضل عزيزك راح عنك
شيل ابني يخويه ابين حضنك
لليسوه النياحه زيد ونك
ودم العين خلها اتسيل منك

يبو فاضل علي راح من ادينه
شال بعيد ابو روح الحنينيه
يخويه الگوم ابد ما راحمينه
وذر خوية الاعادي مگطعينه

على الدنيا العفا من رحت يكبر
جرح گلبي بغيابك گام يكبر
انكسرت ولكن الدلال يكبر
ما اريد انكسر جدام امية

اسالكم الدعاء رائد الاسدي

#اللهم_عجل_لوليك_الفرج
https://www.tg-me.com/AL_Nay_and_Alrthaa

#تراث

اجت ليله العلي الاكبر يويلي و اوبجت عنده
تريد اتشوف اصاويبه وجرح الضـاهده تشده
ــــــــــــــــــــــــــــــــــــــ
تريد اتشوف اصاويبه واجـت ام الولد ليله
وصاحت وين زينب وين بالله وياي تچيله
وعن الشمس خل سكنه تجي ابهمه تفييله

يعماته تعالـــن جــاي
اجعدن هالولـد وياي
بالله وي علي بهداي

اجعدنه وخلني احط خدي على خده
ــــــــــــــــــــــــــــــــــــــ
عماته وخواته الكل صاحن يَم علي الاكبر
روح الولد خلصانه نجعده اشلون مانگـدر
يليله ينتبه خافن وجــروحــه عليه تسعر

گالت صدگ خلنه
نايم لا تجــعــدنه
خـافنچن تلچمنه

الشمس والعطش وجروحه عليه من ينتبه شده
ــــــــــــــــــــــــــــــــــــــ
بالله لا تجــعــدنه وبـعــد لا نايحــه اتنوحه
لما نشوف اصـاويبه او لما انجلب اجـروحه
بي ضنت رجه ويعيش يو لا كوضت روحه

بلچن بي رجه ويعيش
هده من الدهر چا ليش
وانخــاه ويــرد للجيش

الولد ما گالها الله يخلي والده وحده
ــــــــــــــــــــــــــــــــــــــ
حگها بلا فكر تحچي ام الولــد مذهــوله
وكلسا تنشد النسوان هذا ابني علي يولا
وين اهل الرحم تنده گطرة ماي جيبوله

وين البي رحم وينه
بگطرت ماي يلفينه
وليدي سـوربة عينه

وانه امه وصدن ليه عفيه ام الولد جلده
ــــــــــــــــــــــــــــــــــــــ
زينب تحچي وي ليله تگلها يَم علي بسچ
تره اصواب ابن اخوي مچيد ومسني مثل مامسچ
جــريبه الگــوم يا ليله لا لا ينسمع حسـچ

خل نجري الدمع سكته
هــذا يأم علــي الــردته
حــس ما ينسمــع حته

اخوي احسين مايقبل وبي ما يشتفي ضده
ــــــــــــــــــــــــــــــــــــــ
تگلها اشلون اتجلــد يبت المــرتضى ومــن گــال
زين وبعد بيه روح وشوف ابني اعله هذا الحال
شگولن غير هالــواحــد عندي وي الــزلــم رجال

ماني الدهر محني
كفـن يالتــلــومني
ويه الـولــد خلني

أون ولطم على وليدي الذاب من العطش چبده
ــــــــــــــــــــــــــــــــــــــ
وبعد ياعمته تدرين ماعنـدي ولد غيره
واحد ونفگد مني وضلت خاليه الديره
هـم وانه ويلومنّي والله حيرتي حيره

عساني الكربلا لا جيت
ولا بيها انبـنــالــي بيت
راح ابني علي وضليت

اصك الراح فوك الراح اكول الراح شيرده
ــــــــــــــــــــــــــــــــــــــ
زينب شافت الحاله وغدة چنهه اسعفه وبالريح
ولنها يابنات احسين يالله يا خــواتــه اتــصـيح
اريد الدمع من عدچن مثل دم بن اخوي يسيح

وهنه من الخيم هاجن
على ذاك الـولــد داجن
مثل لوجت علي لاجن

وأمه جالت وكالت ما راج الولد برده
ــــــــــــــــــــــــــــــــــــــ
شباب ابين عماته وخـواته وساعة الفرگه
وامــه فــوگهن تنــده انطـن للــولــد حگه
اريد اللطم بالهوسه واريد الصايح بحرگه

هــا يــلــلــه يعمـاته
الولد شم الهوه فاته
أيــا ورد وجــنــاتــه

يزهي چان بخدوده وهسا الخد ذبل ورده



للمرحوم الحاج
مُعين السباك

#اللهم_عجل_لوليك_الفرج

#تراث

نـار بـدلـيـلـي تـسـعـر ... مـاتـنـطـفـي يـالأكـبر
والـنـارشـيـطـفـيها ... تحرگ گلب راعيها ...ماتنطفي يالأكبر
ــــــــــــــــــــــــــــــــــــــ
نـام بـرغـد و تـهـنـه يـالـحققت آمالي ... ياثمر گلبي و عزمه
هـيـج الـولـد يـردونـه مـايعز دمه الغالي ... للدين يصخى بدمه
و ارفـعـت بـالـعـز راسي ادريك نعم الوالي ... و لگلبي تفرج همه

تـدري بـدلـيـلـي اشـصـابـه ... مـن الـفـراگ صـوابه
و لـمـهـجـتـي يـتـاليها ... و النار شيطفيها...ماتنطفي يالأكبر
ــــــــــــــــــــــــــــــــــــــ
يـومـك جـرح دلالي و ماشفت بعدك راحه ... و منين أجيب الراحه
و مـدوهـنـة خـلانـي و بـحربته الجرّاحه ... زيدت گلبي جراحه
و عـيـوني تربي و متشوف گلبي انطفه مصباحه ... يالشوفتك مصباحه

نــيــرانـك الـتـجـويـنـي ... و فـراگك الـمـاذيـنـي
و الـروح شـيـسـلـيـها ... و النار شيطفيها...ماتنطفي يالأكبر
ــــــــــــــــــــــــــــــــــــــ
يـبـنـي تـعبت بأيامك و اتلفت راحة ليلي ... لأجلك يا راحة ليلي
و الـمهد گلب أمك جان وكتي رهنته و حيلي ... يا عزم همتي و حيلي
و مـن طـالعك صفحة نور تنعكس و تضوّي لي ... بالعاطفة تضوي لي

سـهـم الـدهـر خـيّـبـنـي ... مـن صـوَّبـك صـوَّبـني
و الـجـبـدتـي مـاذيـهـا ... و النار شيطفيها ...ماتنطفي يالأكبر
ــــــــــــــــــــــــــــــــــــــ
يـالـمـرتـعـك دلالـي فـرگاك زيَّد نوحي ... و مساهرات عيوني
كَتَّت عليك دموعي و شلون شاغت روحي ... لأجلت يا صدگ ظنوني
ضـلـيـت أداوي جروحي يا بسمتي بجروحي ... و بضيعتك ضيعوني

صـابـت دلـيـلـي الـصـدمـه ... و يَـبِّـسـت دم بـجسمه
و جـروحـي شـيـداويـها ... و النار شيطفيها ...ماتنطفي يالأكبر
ــــــــــــــــــــــــــــــــــــــ
ردتـك ذخـر يـاولـيدي للعايزة ذاخرتك ... و ارسمت صورة حبي
لـوصـحت يبني النخواي بالعزم تشفي بهمتك ... عونج ياشوفة دربي
صـابـت دلـيـلـي الأيام و بكربله ضيعته ... و انطفت شمعة گلبي

أگضـي الـعـمـر بـالـحـسـره ... و دمـع الـعـيون اليجره
فـرگاك الـسـابـيـهـا ... و الـنار شيطفيها...ماتنطفي يالأكبر


الشاعر المرحوم
عزيز الگلگاوي الكربلائي


#اللهم_عجل_لوليك_الفرج