#تراث

يحسين الخيم يحسين...گوم ولحگ عليهه
حرگوهه العده بنار...وأطفال وحرم بيهه
ــــــــــــــــــــــــــــــــــــــ
أجت نار وشرار النار صار اعل الخيم لهاب
أجت الخيل أجت يحسين تتراكض على الاطناب
أجت تسلب خدر و حجاب حرم عفه وخدر و حجاب
شگول اشكثر جم سلاب أجت سبعين الف سلاب

ولن بس العده ايسلبون
الخيم چان المصيبة اتهون
لچن هم گاموا ايحرگون

الخيم عل الحرم والايتام...ولا واحد يحاميهه
ــــــــــــــــــــــــــــــــــــــ
إذا عندك بعد يحسين بگت مهجة سليمة و روح
اعله زينب خل يحن گلبك وگلهه ابيا كتر مطروح
أخاف احجيلك ابيا حال والجم گلبك المجروح
بين الخيم والميدان مهضومة وترد واتروح

لاتگدر تجي يمك
وتعوف العيلة بخيمك
ولاتقبل يضل جسمك
يتگلب على التربان...بذاك الحر ياواليهه
ــــــــــــــــــــــــــــــــــــــ
أختك تدري بيك أختك أنت اعله الثرى ابيا حال
لجن غصبن عليهه اليوم تحشمك والدمع ينهال
وحيدة وخمسة ثمانين عدهه من حرم أطفال
الحرمة ابوليت السلاب وطفلهه ابسحگت الخيال

وخيمهه ابلهبت النيران
وأنت اموسد التربان
مو حگهه يهل العطشان

تگول الله يساعدهه وأنهض يلولي ليهه
ــــــــــــــــــــــــــــــــــــــ
أجت ليك ابگلب لهفان لچن ما أجت زينب ليك
تريد الحره تشجيلك هضمهه الي جره وتاذيك
أجت ليك الغريبة أتشوف أشصاير يا غريب اعليك
أجت تشوفك اليا حد حر العطش أثر بيك

وإذا تشجي العطش يحسين
تعصرلك أدموع العين
لجن بس أنت للمتنين

لتصد وتشوف أشلون أبسوط العده أموسميهه
ــــــــــــــــــــــــــــــــــــــ
تگدر تسمعلهه الصوت تگدر ما أظن تگدر
صوت الي تحشمك بيه والله أيفتر المرمر
أذا من العطش گلبك هو أمروع أمفطر
بعد يحمل أعتاب أشلون أشد من العطش والحر

اشرايك بعد يامظلوم
تگدر للغريبه اتگوم
لو تبگه اعله هذا النوم

بلحر والشمس وأختك مهظومة تخليهه
ــــــــــــــــــــــــــــــــــــــ
أخذ هاك أخذ هذا الصوت إجاك ابدافع الحسره
صوت وحسرة ويه الصوت كل حسرة أبلف جمره
وتحاچيك وحچيهه وياك كل چلمة تجي بعبره
تگلك ها يمن بجيت بهضمك أمك الزهره
العدة ايگلو لك أختك هاي علتل شابچه العشرة

اشتگلهم للعده ياويل
تگلهم مابگالي حيل
أگوملهه و أرد الخيل
وتضل صابر ولو يحسين يگلو لك أمسلبيهه
ــــــــــــــــــــــــــــــــــــــ
أخوي ومدري شحچي وياك أخوي وحرت بين أمرين
أشوف الأخت حگهه أتگوم تعتب عل الأخو يحسين
أشوف أنت عله التربان بعد وين أنت وأنه وين
أعذرك واسكت واصبر أموت من الصبر يحسين

عليك اعتب أخاف عليك
يبن أمي العتب ياذيك
وأنه أدري بعد ما بيك
نهضة وچبدتك يحسين بلمثلث أمصوبيهه
ــــــــــــــــــــــــــــــــــــــ
عله التل أوگفت يحسين واعاين گمت للحومة
نايم أرد اشوفك وين بطل حيلي عل هلنومة
وردت يحسين اگلك گوم عليك أمك المظلومة
خفت هذا القسم ياذيك اسكتت وابگيت مهضومة

وتالي واحد من أعداك
يزينب صاح اخيچ ذاك
بأخر نفس عفته اهناك

شربت ماي اذا عندچ لخوچ بساع وديهه
ــــــــــــــــــــــــــــــــــــــ
أنكسر گلبه عله حال أخته وثلث مرات گام وطاح
وتحسر وبضعيف الصوت يزينب هاه يزينب صاح
كسرتي ابنخوتج گلبي ودمع عيني ويدمي ساح
تجيني للحرب تردين وبعد لحظة يجي الذباح
واذا من السهم ثلثين من گلبي يزينب راح

اشلون اگدر اگوم اشلون
وصار أظلم بعيني الكون
يأختي راحو ايسلبون

اعيالي رديلي اعيالي امن السلابه خلصيهه
ــــــــــــــــــــــــــــــــــــــ
إلتوت مكسورة الخاطر وصفگت يمنه بليسره
وصاحت آه يخويه آه تظل نايم عله الغبرة
وتگلي رديلي أعيالي شرد أعيالك امطشرة
تگلي أخيامي حاميهه أخيامك گلهه مستعرة

تگلي هودي الأطفال
شوف أطفالك بيا حال
أجت سبعين الف خيال

وگامت تسحگ أطفالك بعد شلون أحاميهه

الشاعر المرحوم
الشيخ هادي القصاب


#اللهم_عجل_لوليك_الفرج

#نعي

يا من بگيتوا فوگ الرمال
نزلن اعلينا امصايب اثكال
ونريد نخبركم بمرسال
سمعوا الحچي والحچي چتال
نسوانكم ما بين الرجال
سمعوهن وشافوهن أنذال
ويردن غيارى إتهد الجبال
ضلن ترى بعازت الكفّال
عگب الگمر اظهورنا اهلال
فزعوا بصوارمكم يـَ أبطال
يهل الحمية عدكم عيال
دخلوهن السوگ اعلى الجمال
ودرب السبي عذّب الدلال
كشّر اوجوه وموّت أطفال
يا آل هاشم نكسر الحال
نتمايل ومشونا أميال
مو احنه ليگيدونه بحبال
احنه بنات الزهراء والآل

علي العابدي النجفي

#اللهم_عجل_لوليك_الفرج

(واحسيناه)

حـكـمِ الـدهــر يـبـن امـي  .. سره اعليك
طحت والشمـر لـلـحـومـه  .. سرع ليك
الخيـل الـداسـتـك لـزمـت  ..  سره اعليك

وخـذت مـن كـل كـتـر مـنـك اشـويـه

                  *-------------------*----------------*

✍خادم الحسين ع
الشاعر رعد الجريخي

قصيدة ( اعتذار ) وتحكي معاناة الامام الحسين عليه السلام وكيف للشاعر أن يوصف هذه المعاناة وهو لم يمر بلحظه مما عاناه الامام



العذر مــولاي لـــو عالمـــاي   
اكتــب وانـــه ما ضامي
ولا نســـوان    بـــالميـــدان     
ألي لــو حرگوا خيامي

يـا مــولاي        يالمظلـوم         
يـا مـــولاي       يالمظلوم

♠ـــــ♠ـــــ♠ـــــ♠

كون من أكتب أعلــى المـاي        
ضايگ لهــب جمراتــه
خـاطــر تحــــرگ الإسـمــاع        
تصير الشعــر چلماتـــه
وعندي طفــل ســت أشهـور       
أحــس ابحرگت آهــاتــه
جريب الماي بــس ممنـــوع        
يشــرب عــذب گطـراته

طفل ظامي ... ونحـــر دامي       
اصــد    أونظــر    الحالـه
صعب ادري ... انه أبشعري      
أوصــــف حالـــه أطفـــالــه
يـا مــولاي     يالمظلـوم           
يـا مـــولاي       يالمظلوم

♠ـــــ♠ـــــ♠ـــــ♠

كون من كتب أعلى السوط      
سوط أيــلاعـب أمتونــي
مــن أصرخ أحيــر انـــوب       
يــرد أكثـر يضــربونــي
وعنــدي أطفـال بين الخيل      
تنــادي بويـه سحگوني
حتى من أوصف أطفـــالك       
دمــه اجريهن أعيونــي

ومحتاريـن ... اه يـا حسين      
كـون أطفــالــي بالصحــره
صعبه أهواي ... يا مــولاي     
صعبــه حتــى لــــو فكـــره
يـا مــولاي     يالمظلـوم           
يـا مـــولاي      يالمظلوم

♠ ـــــ ♠ ـــــ ♠ـــــ ♠

من أكتب عالحــرم يــا ريت       
حرم عندي وتمر بالصار
وأشــوف شلون مـرعوبات      
طلعـن مــن اجتهــن نـــار
وأشـوف شلون اجتهن خيل     
وأهل مــا عدهن وأنصــار
حتــى  استشعــر المــأســاة      
وأحســه ابگلبك من احتـار

وخيّم تسعــر ... على الخـدر
وتنــادي بحيــره نســـواني
فــلا أتصــور... يبـو الأكبـــر       
تجــي لإحـــزانـك إحـــزاني
يـا مــولاي     يالمظلـوم            
يـا مـــولاي       يالمظلوم

♠ ـــــ ♠ ـــــ ♠ـــــ ♠

علــى صـــدرك لــوّن اكتـــب     
احيــرن سيـــدي بــأمــري
مـــا سحگتنــي مــره الخيــل     
ولا رضــت علــى صـدري
اشلـون اشعــر الــم جسمـــك      
صعبه لــو خلـص عمــري
ودمّه أجروحك صبغها الگاع      
ومنـي ولا دمــه اليجــري

وتحـت الخيـل ... دمـاك تسيـل        
هــاي اشلون أحـــس بيها
صعـب عالبـال ... هـذا الحــال
كلمـــه وصعبـــه احچيــها
يـا مــولاي    يالمظلـوم           
يـا مـــولاي       يالمظلوم

♠ ـــــ ♠ ـــــ ♠ـــــ ♠

الك صـوره بخيالــي تعيش        
صعب أوصفها مــا اگــدر
ولا ياليتنــي بهـــل الحـــال        
هـــــاي اويـــاي تـكــــرر
يريد أوليدي شـربــة مـــاي       
حتــى يـرد علــى العسكـر
أذن حيـــل اعتــــذر مولاي       
أوصف حـــالــة  الأكبــــر

حرت بالـراي ... صعبه أهواي     
أوليـدي للحـرب  يــرجــــع
يــرد عطشـان ...  للمــيـــدان      
وأشوفه أعلى الثره أموزع
يـــا مــولاي      يالمظلـوم         
يـا مـــولاي      يالمظلوم

♠ ـــــ ♠ ـــــ ♠ـــــ ♠

ردت اكتــب علـى أحـــوالك        
حتى أوصف عظم صبـرك
ساعـــة مــا هــوى العبـاس       
وعليه انته انكـسر ظهـرك
مثـلك مـــا حـــرت بأمــرين        
بيـــن الكــافـــل وخــــدرك
كون من أوصف انه الصـار      
عايش لحظــه مــن عمـرك

بيــن أخيام ... وبين أحــزام        
ظهـرك مـــن وگـــع چفـــه
أوصف هاي ...  يـا مــولاي       
صعــبــه سيــدي وكلــفـــه
يـــا مــولاي      يالمظلـوم        
يـــا مـــولاي     يالمظلوم

♠ ـــــ ♠ ـــــ ♠ـــــ ♠

الشاعر
موسى البديري

#تراث

ليلة الوداع

زينب تنشد امن احسين من طبت الصيوانه
باجر من عگب عيناك وين ايصير منوانه
ــــــــــــــــــــــــــــــــــــــ
لمن جن سواد الليل زينب لمت العيله
يله انودع الوليان عدنه اسواد هالليله
يرمله الجاسم اتعني اوللاكبر روحي (ياليله)

واخذت باجي النسوان
لحسين وگمر عدنان
لمن وصلت الصيوان

كامت تجذب الونه ومنها الروح ولهانه
ــــــــــــــــــــــــــــــــــــــ
طبت گعدت اگباله اوكل الحرم وياها
گامت تنشد ابن امها اوتجري ادموع عيناها
تگله هالحرم يحسين عگبك وين منواها

عليه الحرم ملتمه
اوگلبي ذاب من همه
سولفلي يبو اليمه

ياهو الينجتل منكم اوياهو اليظل ويانه
ــــــــــــــــــــــــــــــــــــــ
لمن سمع حچي اخته جاوبها ابدمع هامي
يزينب خاطري اكسرتيه اوحچيچ نحل اعضامي
يختي من اسولفلج لاتبچين جدامي

دمع عينج علي غالي
امن اشوفه ايذوب دلالي
يختي اتجلدي اگبالي

تراهي ارويحتي ذابت اومن الهظم خلصانه
ــــــــــــــــــــــــــــــــــــــ
من نصبج يبت حيدر باجر تشب نار الكون
اول تحمل انصاري اوكلهم بالوغه ايخلصون
تگوم انوب اهل بيتي على اجموع العده ايحملون

يختي اويعمر الميدان
اوتخلص چتل هل شبان
وعضيدي گمر عدنان

يطيح اعله المسنايه اويمه اتطيح ذرعانه
ــــــــــــــــــــــــــــــــــــــ
واظل بين العده وحدي اوكلها دايرة اعليه
اخذ عاد (عبدالله) ومنهم اطلب اميه
يطلع حرمله الطفلي يطوگه ابسهم المنيه

واسدر بالطفل مذبوح
اودمه على ذراعي ايفوح
تظل امه عليه اتنوح

من تشوف عبد الله اودمه ايسيل جروانه
ــــــــــــــــــــــــــــــــــــــ
واظل اعلى اخوتي مهضوم واجذب عالطفل ونتي
ولوح ابظهر ميموني واطلع للحرب يختي
بيه اتدور عدواني اويصيبون ابحجر غرتي

اوبالدم شيبي يتخضب
اوچبدي ابسهم يتصوب
واظل محتار يازينب

واگع من ظهر ميموني اوعلي تفزع الخوانه
ــــــــــــــــــــــــــــــــــــــ
واظل مرمي او للمخيم يگصد يصهل احصاني
ابتخيله زلم بيهه اومن اعداي تحماني
تجيني للمعاره انتي واطفالي اونسواني

يمي (الشمر) تلگينه
اويسل السيف بيمينه
واخيچ يگطع اونيه

يازينب والمخيم تشب الگوم نيرانه
ــــــــــــــــــــــــــــــــــــــ
من سمعت حچي ابن امها غدت تلطم المظلومه
تگله اشلون اشوفنك طريح ابخطة الحومه
واشوف الاكبر اوجاسم واخوتي اعلى الارض نومه

اوعباس اشوفه اعلى الثره
نايم وجثته اموذره
واخلافه اتم امحيره
ــــــــــــــــــــــــــــــــــــــ
گبل چتل يبن امي هاي الحرم وديها
غرب بين الكفر عگبك يخويه لاتخليها
ماهي امعلمه اعله الضيم والذله يواليها

هلتن هله ابهل حرم
يهل المچارم والشيم
مابيهم اعداكم رحم
ـــــــــــــــــــــــــــــــــــــ
والله تحيرت يحسين بمصابك اوبعيالك
عله الفرگه اشيصبرني واشلون احفظ اطفالك
ماتحمل مذله اوضيم كلها امدلله ابجالك

لو ركبونه اعلى الهزل
ياطفله اباري اويا طفل
وزنودي مچتفوفه بحبل

يخويه ومن عگب عيناك ياهو بعد يحمانه

المرحوم السيد
عبد الحسين الشرع

#اللهم_عجل_لوليك_الفرج

اشلون  زينب  گالو  اميسرينهه
ما  نهض  عباس  ينشد  وينهه
***
ما فزع   عباس حامي اضعونهه
ايشوف زينب  بالمحن يسبونهه
الليل زينب  بس دمع  ابعيونهه

خاف  هاشم  باليسر  ناسينهه
***
حييهم   انده  بالعشيره  والعمام
وين هاشم  تفزع  وتبدي اهتمام
اتكون  جيتهم  گبل  طر  الظلام

وين  زينب  تنشد امضيعنهه
***
شلون  هاشم  ما لفت  نسوانهه
اتشوف  زينب  حايره بأحزانهه
جروح.......باگت  كربله  وليانهه

ظلت  بونهه تنوح  احسينهه
***
وين  حماي  الدخل ينوي الرچاب
واسرج الخيل  وتشاهد بالسحاب
هاي  زينب حايره  بثگل المصاب

اتريد فزعه من الغري وتعينهه
***
عجل ابمسراك من  وادي السلام
اكتاب من زينب وصلك بي كلام
گوم  يا بوحسين  بس شد اللثام

عندك  الاخبار  دمعة عينهه
***
كون وي خيط الفجر يبدي الرحال
يشوف زينب بالغرب يبدي السؤال
يا  تره  ابيا حال زينب  بس خيال

ايشوف زينب ياتره امسلبينهه
***
اجروح زينب تنحچي بمجره الدمع
تشبه الزهره   واخذت تحني الظلع
ونهه........ عالعباس بس  ما ينسمع

هاي  مدرسة   الخدر  تبينهه
***
اجروح    زينب   بالعذاب   انشوفهه
نار     وخيام     وركض    ابطفوفهه
شبچت العشره عله اخوها اچفوفهه

صارت الدمعه فرض بونينهه
***
بيها   لهفه  وحسره  تل   الزينبي
هاي زينب  سولفت جرح  السبي
اشلون مهضومه تظل بنت النبي

عاشت  الحسره  ورجف كونينهه
***
تمت بعون الله تعالى
خادمكم.....يوسف الفتلاوي

لطمية لعلي الاكبر عليه السلام ( الفارگ عيونه )


سبعين الف خيال واكثر
كلهه اعله ابو السجاد تفتر
ويصيح يوليدي يالاكبر
مابيه الم جسمك توذر


     ( اللطمية )


اشلون ايشوف دربه الفارگ عيونه
حگه حسين يعتب لاتلومونه


حگه حسين يبچي امضيع اولاده
وگف بيناتهم وامهدمه افاده
يسباع الحرب يهل الشيم ناده
وبالميدان ناموا مايحاچونه
اشلون يشوف دربه الفارگ عيونه


نامو عالرمل كلمن بميدانه
والعدوان تتباشر وفرحانه
ابو اليمه انهضم ويحشم اخوانه
علي الاكبر تگطع ماتشيلونه
اشلون ايشوف دربه الفارگ عيونه


علي الاكبر يطيح امنين ماشيله
امگطع بالسيوف اشلون اتچيله
دمه يفور حاچوني شسويله
ماچنه علي ولاينعرف لونه
اشلون يشوف دربه الفارگ عيونه


بس جروح صاير مو علي چنه
والله احتار گلبي اشلون المنه
متنك وين اگله وماشفت متنه
كل وذره بنويه امعزله امتونه
اشلون يشوف دربه الفارگ عيونه


كل وذره بكتر وامتون ماعنده
خدك وين اگله ردت اشم خده
اشلون ارجع واعوفه بمصرعه الوحده
والكفار من ارجع يدوسونه
اشلون يشوف دربه الفارگ عيونه


من ارجع تطب الخيل بضلوعه
گلبي اليامصاب يصير يالوعه
ضل بس العليل يهلن ادموعه
ايس من اخيه وخابت اضنونه
اشلون يشوف دربه الفارگ عيونه


كلهه امذبحه وبس الحرم يمه
ايس من اخوته ومن ولد عمه
گومن للوداع ايصيح ابو اليمه
لو طر الفجر راسي يحزونه
اشلون يشوف دربه الفارگ عيونه


✍شاعرة اهل البيت
الملة ام هجران العمارچيه
غير مبري الذمه من يحذف اسم الشاعرة او ينسب الرثاء لشخص اخر

نعي للقاسم بن الحسن عليهما السلام


انا لله وانا اليه راجعون .. ولاحول ولاقوة الا بالله العلي العظيم ..
عظم الله اجورنا واجوركم بمصاب القاسم بن الحسن عريس الطفوف ..
حبايب اليوم رمله ام القاسم حاضره وياكم بكل عزه وكل مجلس اتريد دمعه اتريد ونه اتگول وين الفاگده ولد وين الفاگده اخو وين الفاگده شباب خل تذكر مصاب وليدي لان ماتحس بألم ومعاناة الفاگده غير الفاگده واحنه هواي فگدنه شبان وشهداء وهاي رمله تگول عازيني واعازيچ وبعد شتگول ؟ ( تگول ) :


يالفاگده اتدني عليه
الونه الچ والونه اليه
نار الولد كلش سريه


نار الولد بيش اطفيهه
يالفاگده تحسين بيهه
طلعي الهدوم وگابليهه


طلعي الهدوم بليلة العيد
واشبعي هضم يالفاگده اوليد
وبطلي العتب والعتب شيفيد


عاتبت وعتابي شنفعني
باللحد نام وماسمعني
ورديت للبيت وفجعني


لو بيدي مارديت للبيت
واعزاز بالتربان خليت
بطرگ التعب والهضم ضليت


بطرگ الهضم ماجبت كلشي
واتوچه عالحيطان وامشي
الولد ردته يشيل نعشي


شيال للتابوت ردته
اشلون گليلي دفنته
وجوه التراب الولد عفته


خليته جوه الگاع مدفون
افراگ الولد چتال تدرون
مثل السهم ويبز العيون


مثل السهم بگلوبنه يبات
ويلاه يفراگ الشبابات
ونن والطمن يالمضيعات


ونن يالمضيعات كلچن
امنومين شيالت حملچن
بالمگبره وشيردهم الچن


شيعودهم ناموا بالگبور
كلهم شباب وچنهم بدور
ظلمه المباني وغرب النور


ظلمه المباني الگبل حلوه
نمشي جهد ونگوم گوه
وننشد عله البيهم امروه


ننشد عليكم وين صرتوا
توكم ازغار وماكبرتوا
ومن نومة المظلم خربتوا


گطعتوا وصلكم من وصلنه
اشگد حملنه اشگد سهرنه
والبين اخذ ثمرة تعبنه


البين اخذ ثمرة اربانه
وافراگكم حار وعمانه
وكله لهل زينب عزانه


✍شاعرة اهل البيت
الملة ام هجران العمارچيه
غير مبري الذمه من يحذف اسم الشاعرة او ينسب الرثاء لشخص اخر

لسان حال ليلى أم ألأكبر


أبنـي اليوم مـــــا مرلــي        وجاني
وخبر فگده شعــل گلبـي        وجاني
الگلب شمسوي يوليـدي        وجاني
أنتظر جيتك تمر لو هاي هيـه

**

أله أزغار الدهر ضــــدي       وأله أكبار
مصايب كافي يا دهري       ولك بـــــر
سيف الهـم طبـــر گلبـي       والأكبـــــر
تتطبر جسمـه بسيوف المنيه

***

السيف الحــــز وريدك ريت       حَـــزّنه
وعلى الدمعـــه يلب احشاي       حـــزّنه
دليلي أعليك شـوف اشلون        حـِــزنه
مثل يعگوب صار اضعاف ميه

***

تعال لحالــي يبنــي اشلــون         شــوفه
يمنْ مــن طــه جـــدك بيـــك       شــوفه
النظــــر بعــــدك عسنه راح         شـــوفه
وعسن گبلك توسدني المنيه


الشاعر / موسى البديري

▪️سؤالٌ إلى حرملة (لع)
في استشهاد المولى عبد الله الرضيع (ع)

أوَما رقَقْتَ بكربلا يا حرْملهْ؟
ولما جنيْتَ بكتْ عيونُ البسْمَلهْ

هذي سِهامُكَ صوَّبتْ كَبِدَ الْهُدَى
بَلْ سطَّرَتْ في العَرْشِ آي "الزلزلهْ"

عينُ الكفالةِ أنتَ مَنْ أطفأْتَها
فلها البتولةُ في الجَنَائنِ مُعْوِلهْ

ورميتَ بالسَّهْمِ المُثلَّثِ مُهْجةً
دمُها رقى في الخُلْدِ أعلى منزِلَهْ

حدِّثْ ففي قَلْـــبِ الربابِ تساؤلٌ
(أوَمَا رققْتَ بِكَرْبلا يا حرْملَهْ)؟!

فيجيبُ" لا أنسى حسيناً قادِماً
يَمْشِي وبيْنَ يديْهِ طِفلٌ ظلَّلَهْ

قالَ ارْحَمُوه وبَلِّلوا عطشَ الحشا
ما كانَ ينقصُ ماؤكمْ إِنْ بلَّلهْ

صوتٌ بهِ انفصَمتَ عُرى سُفْيانِهمْ
ما بينَ مدْبِرةٍ وأخرى مُقْبِلَهْ

سدَّدتُ سَهْمِيَ لا أرى منْ نَحْرِهِ
إلا بياضاً ناصعاً ما أجْملَهْ!

وثكَلتُ والدَهُ بقَطعِ وريدِهِ
إِذْ كانَ قَطْعَ نِزاعِهم أنْ أقْتُلَهْ

كالطَّيْرِ رَفَرفَ للحُسَينِ ببسمةٍ
ودنَا إليْهِ يضمُّهُ فرققتُ لَــهْ..."

الشاعر علي عسيلي العاملي

#الرضيع_عليه_السلام
#اللهم_عجل_لوليك_الفرج

اويلاه يكربلاء

ياكربله اشسويتي
مني العزيز اخذيتي
وشــبــان مـا خليتي
واعلى الحرم داريتي

ومـاچني اجيت امدلله
ــــــــــــــــــــــــــــــــــ

وحسين نايم عالترب
وزينـب تـنـادي بالغرب
ماترضى ياخويه انسلب
وجـمـرة مصـابك بالگلب

ومـحـتـار ضـعـن الـعـايلـه
ـــــــــــــــــــــــــــــــــــــــ

عباس گوم العيلتك
وانت الجبتها أبصايتك
طـايح وحـشـم غــيرتك
زينـب بـچـت مـن نادتك

مـفـجـوعة بيك البسـملة
ـــــــــــــــــــــــــــــــــــــ

وبنار حرگوها الخيم
گـوم الها يارعـي الشيم
مصيوب گلـبـك بالسهم
وياخويه فجعوها الحرم

ويـفــتـر عـلـينـا حـرمـلــة
ـــــــــــــــــــــــــــــــــــــــ

لاظل اخو ولاظل ولد
وذبحوا رضيع الـ بلمهد
ياكــربله شعـنـدي بـعـد
امشي اسـيرة الـيـا بلـد

بــديــارچ انـا امـعـلـعلـه
ـــــــــــــــــــــــــــــــــــــ

امشي غريبه بالضعن
وشيريد من عندي الزمن
شـيردني وحــدي للــوطن
انــواع واشـكال المحن

وتـرجـع غـريبـة القافلـه
ــــــــــــــــــــــــــــــــــــ

هاذي بداية قصتي
ياخويه حيرة حيرتي
ياهــو الينــشــف دمعتي
للـشـام صــارت طـلعـتـي

والدمــع بعـيـوني حـلـه
ــــــــــــــــــــــــــــــــــــ

غربة الحدو بضعوني
وين اخوتي يحضروني
ويـــم الــنــذل ودونــي
وبت حـيـدر يعـرفـونـي

اخت البخت والمرجله

الشاعر فاروق الغنامي

 ياليل  طوّل ساعاتك يا ليل  أحمل آهاتك
لـو ودّعـت الـولـيـان تـتـولانـي الـعـدوان
ــــــــــــــــــــــــــــــــــــــ
طول ياليل الوداع اشما تطول اوياك أساهر
ما  أمِل من البواجي حتى لو تعمه النواظر
حسين بس هالليله يمي ماتشوفه عيوني باجر

صـدگـنـي يا ليل القهر
يا  ريتك اطّول دهر
خايفه من أشباح القدر
وخاف اظل مكسورة خاطر

يا ليل ارحـم دلالي
يا ليل ضاعت آمالي
آه يا دهـري الـخوان
تـتـولانـي الـعـدوان
ــــــــــــــــــــــــــــــــــــــ
آنه ياليل العقيلة زينب المعروف خدري
طولي ماواحد الشافه اولاستر يوصل الستري
لچن يا ليل اشبديه سلمت للقدر أمري

دمعاتي يبسن بالجفن
من يطر مصباح الحزن
بطفال  و بعيله امتحن
و  الله  ما ينحمل صبري

يا ليل كافي اتروعني
يا ليل صبحك يفجعني
لـو  نزلوا للميدان
تـتولاني العدوان
ــــــــــــــــــــــــــــــــــــــ
والله خنگتني العبره اشلون اوّصف هالمسيه
مثل سرب الگطه طلعت للوداع الفاطميه
ريتك اتشاهد بناتك علي يا حامي الحميه

يندبهن  احسين  اسمعن
كلهن فرد فزعه افزعن
ويّ الولي يتوادعن
هاي  روحه ابلايه جيه

نـسوان يا  هو اليحميهن
لـو  راح عـنهن و اليهن
يـقـبـل داحـي البيبان
تـتـولانـي الـعـدوان
ــــــــــــــــــــــــــــــــــــــ
كلمن اتعنت وليها تـهل دمع الحزن يمه
سكنه لحسين ابو اليمه راحت بلهفه تشمه
اوليله للأكبر ولدها هوت فوگه اتصيح ُيمه

او رمله اوي جاسم جاعده
تـظفر  اجعوده اتناشده
ارحم  دليل  الوالده
و للصدر گامت تضمه

چاوين يوليدي الشمعه
جـسام  شو صارت دمعه
فقدك  مو بالحسبان
تـتـولانـي العدوان
ــــــــــــــــــــــــــــــــــــــ
آه يا حال الرباب الحنّت النوگ البجيها
اتعاين العبدالله طير الجنة نايم فوگ ايديها
يفز لو رادت ترضعه من يروح ايدر ثديها

متهني ابنها بنومته
خافت  يفز  لو رضعته
گـامت  تصد  الرقبته
طاحت  او فگدت وعيها

چـا  ليش  يبني ايذبحونك
سـبّـاح  گلبي  يگطعونك
چـيّ  گـلتلهم  عطشان
تـتـولاني الـعدوان
ــــــــــــــــــــــــــــــــــــــ
زينب العباس اخوها اتعنت  و گامت تنشده
خويه  بيّ اشلون باجر گلي يا راعي الموده
يا  كفيل  الظعن ظعني للوطن  يا هو اليرده

عـبـاس  انت اللي گلت
ويـاي گـومـي و أمنّت
يـا  الأخـو  بيه اتكفلت
اشـلون  لو  اوگع بشده

عباس دگعد حاجيني
عـباس ويـن تـخليني
اخـتك يـا عالي الشان
تـتـولانـي الـعـدوان


السيد سعيد الصافي

#اللهم_عجل_لوليك_الفرج

ياأكبر جبل
باسم الكربلائي

مـد  طوله ويا طولك حتى صبره يعيش

باسم الكربلائي

يبني ملامح حسنك تغيرت

محمد باقر الخاقاني

أنا عليُّ بنُ الحســينِ بـــنِ علــي  
نحنُ وبيـتِ اللهِ أوْلـى بالنبي
تاللهِ لا يَحْكُمُ فينا بـــنُ الدَّعِــي  
أَطـعنُكم بالرُمـحِ حتَّى يَنْثَـني
أَضرِبُكُمْ بالسيفِ أَحْمي عن أبي 
ضَـرْبَ غُـلامٍ هاشــميٍّ عَلَـوي
قَتَلَ اللهُ قوماً قتلوك يا بُنَي، ما أجرأهُم على الرحمن، وعلى انتهاك حرمة الرسول

مِن شدّةِ حُزنِ الحُسَيّنِ عَلَى أبنِهِ الأكبر، لَمْ يترّجلْ مِنْ عَلَى جوادِهِ، بَلْ رَمَى بِنفسِه وهُو يصيحُ وَيُنادِي: وَلَدِي عَلِيِّ عَلَىٰ الدُّنيا بعدكَ العَفا
سـاعدَ الله قلب الٲبِ الحَنين الَحزين
بَفقد ولدهِ شَبيه سَيد المُرسلين 💔