#في_الخدمة_المقدسة
#محرم_١٤٤٥
#شهادة_الامام_زين_العابدين ع
(وزن الطويل)

ألف وسفة على السّجاد.. مات وما خلص هَمّه
اشگد مشتاق لابوه حسين.. اعله باب الجنّه يضمّه

1) عليل ابكربلا مكتوف..وأبوه ضلاعه مطحونه
سنين من البكا يگضي.. چنّه يسدّد ديونه
قبل دفنه وسط التراب.. هموم بقلبه مدفونه
سموم بجسمة منتِشره..وباله بجسم أبو اليمّه

2) ما اتنّهى بشربة ماي..من يذكر ظما العطشان
كيف ينام على فراشه..وفراش الأبو تربان
ومن دِفنه بأرض الطّف..زادت علّته الأحزان
من بعدك يا روح الروح..كلّ الدنيا مغتمّه

3) نار ابقلبه ماتخمد..من شاهد حرق الخيام
وعينه تشوف عمّاته..مسبيّة لأرض الشّام
رغم كلّ الأسى ينهض.. ويدافع عن الإسلام
أنا ابن اللي انذبح مظلوم..وعبّاس البطل عمّه

#منال_بجيجي

قصيدة ( اول مره ) وكأني بزينب تندب ابا الفضل العباس عليه السلام في أيام السبي ودخول الشام


يا ابو فاضل            يــا ابو فاضل  
هاي أول مــره ضعنــي بلايـا كـــافل 

*  

خويه يا غيرة هلـي    
يا ذخر حيدر علي   
حيل صعبـه كافلي    امـشـي  أسيــره 

انــه تـربات الستر      
وانــه قبله للخـدر 
يحدي بضعوني الشمر     كـلفه  وچبيــره 

خويـه أول مــره ضعنـي يمشي بـس بــلا ضـوه
كــل شــي مـن بعـدك تغيــر حتى بالــريه الهوه
ياعطش گلبي أعلى طولك خويه ضامي وماروه
هــاي أول مـــره خـويه نمشــي لكـن مو سوه
يــا حســـافه                   يـــا حســــافه
ضعني يمشي والعدو يبره المحامل 


*   


خويه يا نبـض الگلـب      
بلا گمر وحشه الدرب
منين مـا اصدن غــرب      تبره لضعنه

لحالتي صعـب الشرح      
منين مــا اديرن ذبــح       
گبالي راسك عالــرمح     يا ابو المحنه

كلفه يــا عباس خويــه لضعني يبــره الأجنبي
مــن جبتني بعزه للطف ضعني بي هيبــة نبي
وسفه عــدوانك تنــادي للسبي گومي اركبــي
والله يــا عبــاس كلفــه  بــت محمــد تنســبي  
خويــه صعبه            خويـــه صعبه
يهوى عالشاطي الوفــه وي المراجل

** 

خويـه أظن هذا حلم      
ضعني خالي من الزلم
بــس عليل  وتنشــتم      بنت الوديعه

ريـت وافاني الأجل     
التفت ماكـو الأهـل       
صحت والمدمع نزل      آه يالشريعه

ضعني يــا عبــاس يطلع وانته مــا تبـره الضعـن
صعبه يــا ابو الغيــره خــدّر للغــرب مــن ينسبن
خـــويه عالنوگ الهزيله بعــد عينك هــل المشـن
أعيوني المضعيات طولك خويه حگهن لــو عمن
دمعــــي يجــــري         دمعـــي يجـــــري
خويه يا عباس دمع الحره سايل  

*

ركبتنــي    بنـــاگتي       
وتبره لضعوني إخوتي
هسـه حيــره حيرتــي      امـشي سبيه

خويـه محتاره أبحـرم     
مـن هـــوه ذاك العــلم
راسي ريته الي أنهشم      بالغـــاضـريه

ضعني يمشي بلايا كافل خويه ما اصدگها هاي
حلم هــذا لــو حقيقه الســوط مطبــوع ابگفـاي
يــا عطش روحي لحنانك والله مـا يرويها مـاي
هيبه گبــل الناگه تمشـي هسـه اعــوفنك وراي
عالشـــريعـــــه              عالشــريعــــه  
طايحه الغيره يخويه وحملي مـــايــــل

**

خويه ضنوت حيدره      
انــه أروح أمـيســره
وبـالحــرم متـحيـره      وادخل دواوين

جرحي ما يشفه ابد     
يا محن انظــر بعــد
مــن بلد امشي لبلد      يا عملت البين

خويه عيـــد الشام وسفــه أوجـوهــم مستبشـره
وامشــي بالسوگ وشمــاته كلهه ضعنـي تنظره
دخلــت الديــوان زحمــه وتــدري انـــه أمخدره
ومن ضرب ثغــر الامامه صحت سبـع الگنطره
خــويه وينــك             خــويه وينــــك
وسفه خصمك يـــا كفيلــي بينه عايــل
 
ـــــــــــــــــــــــــــــــــــــــــــــــــــــــــ

الشاعر
موسى البديري

وابعينك اتشوف الشمر
گدامك ايحز بالنحر
واتكسّر اخيول الصدر
والدنيا من بعده اتخله



واشسوت ادروب اليسر
كلبك اشوفه منكسر
خلت لياليكم عسر
ماليله يا يمه انجله


غمض عيونك يمه نام
بردٍ على گلبك سلام
خنجر مصابك والسهام
لكل فرحه ليّه قاتله

تمت بحمد الله
بقلم:بنت الشمري

🏴نعي🏴
طور لفى عاشور


وقفت الزهراء عليها السلام تستقبل الامام زين العابدين وكاني بها تقول



اسم الله اعله الگلب يمه.  تعال ونام بحضيني
جرعت السم يابعد امك.  وبيك اتلوعت اسنيني
ما يكفي الجرى بالطف.   عماك  وهم عمى عيني
يالساجد ياگلب امك.  دمعتك يمه تاذيني
حسيبي ربي الجبار.   على اللي بيك لوعوني
بعد مر  الجرى لحسين   ييمه مرك اسقوني
جرعنا مره آنه اوياك.  تعال  وزيد اونيني

تمت بحمد الله تعالى
بقلم بنت الشمري

طور الفراق بلسان حال الامام السجاد (ع)*


ها ياعمتي .. جيتي ليه هالمسيه
ها يا عمتي .. قصدج اتنشدي عليه
ها ياعمتي .. بعد نزف الغاضريه

ها ياعمتي .. باسمي هالليله تنادي
ها ياعمتي .. شفتي كسره في فؤادي
ها ياعمتي .. ادري يمكم انه غادي

ها ياعمتي .. بعده سم الغاضريه
ها ياعمتي .. كمله سم المنيه
ها ياعمتي .. صار شفتي اشلون بيه
           
ها ياعمتي .. من اذكرنها رقيه
ها ياعمتي .. تحتمي وتلوذ بيه
ها ياعمتي .. ريت اخذتني المنيه

ها ياعمتي .. بالحبل من يشبقوجن
ها ياعمتي .. انفطر قلبي عليجن
ها ياعمتي .. اعليل تدرنه وليجن

ها ياعمتي .. من يضربوجن اموتن
ها ياعمتي .. ردته بيه مو بديجن
ها ياعمتي .. غاليات وعذبوجن

ها ياعمتي .. هذا امر الله ورضيته
ها ياعمتي .. والدي تفجع منيته
ها ياعمتي .. والسبي تجرح قضيته

ها ياعمتي .. اعليل ياعمه اتنوع 
ها ياعمتي .. بالحرم قلبي تلوع
ها ياعمتي .. والله ياعمه تروع

ها ياعمتي .. ماشفت بالدنيا راحه
ها ياعمتي .. قلبي ينزف من جراحه
ها ياعمتي .. لجرحي علوها المناحه

تمت
بقلم : بنت الشمري
.

▪️متفرقات من النعي▪️
في مصاب السجاد عليه السلام
#جديد


▪️أبوذيات▪️

عطش دلالي من دمعي رويته(تروى وشرب)
وكلشي الشفته مَحْححيت وريته(روايه وقصه)
مصاب  الوالي بعيوني رويته(رأيته وشاهدته)
وعجايب شفت من آل أميه


جروحي غضه للمحشر ونادى (نديه)
وسبينه فرّح الكاره ونادى (الند)
ذبحني الصاح دخلوهن ونادى
على الديوان عروضهن عليه
———-
▪️مجردات+عاشوري▪️


ويلي عليل امحير بنسوان
و ابكربله مايمه الاحنان
يمشي يويلي ابجمع عدوان
لا فرشه عنده ولا وساده
اشلون بيه  ابن الحياده
وامذبحه اگباله الساده
درب اليسر هدملي حيلي
ودوّه كما الجمره دليلي
يا دمعتي من دمي سيلي

اعله العقيله گلبي ممرود
تروح وترد اعليه اردود
شاطت ومنها الحيل مهدود
ابعيني اشوف ويضربوهن
وكلساعه ويلي يشتموهن
واعله الهزيلات يركبوهن
وابحبل واحد ربطوهن
ولديار للغرب ايجرجروهن
————

▪️بحر طويل▪️

ماابطل ابد نوحي  ولا يهدا انين الروح
معلول واذوگ المر واجروحي تجر اجروح
شفت خدّرنه  مسبيه واعليه تون وتنوح
بسياط ويضربوهن وابولية خولي اتروح
امشي للغرب بالقيد وروس اهلي بعيوني اتلوح
شفت ابعيني الماينشاف وادموعي بأساها تبوح
————
▪️الجفيري▪️

بعيوني شفت امذبحه
اخواني واهلي امطرحه
فوگ الصعيد امصرعه
ونسواني تمشي للاسر

بخشن الحبال امقيده
وكل وحده منهن فاگده
فوگ الهزيله صاعده
بيهن ولا مية كسر

ابعيني اشوف امخدرات
بسوط العدو املوعات
من كل كتر امجرحات
بعد المعزه بالعسر

يدخلن دواوين العدا
ويلي الوجه منهن بدا
عزهن شفت راح وغدا
ولا حاله شفت الهن تسر

اعيوني شافت كل مصاب
وارويحتي شبعت  عذاب
شابت واهي ابعز الشباب
وعاشت بعدهم تحتسر
————-
تمت بحمد الله تعالى
✍️#بنت_الشمري

نعي الخبر
في احتضار الامام زين العابدين عليه السلام

▪️الجفيري▪️

حال السجاد عليه السلام عند الاحتضار

دار بعيونه الكربله
ودمعه على الخد هامله
ابحاله فجيعه وذابله
ومنه ارتفع صوت الونين

بالسم دليله منمرد
وفكره يروح الكم يرد
بعيونه واعليكم يصد
ومنه ارتفع صوت الونين

اينازع الموت وايصيح
گلبي على امصابك جريح
مثلك ولا شفنه ذبيح
ومنه ارتفع صوت الونين

دمعه على خده انحدر
ودلاله  من سمه انفطر
شاف الضبابي من نحر
ومنه ارتفع صوت الونين

دلاله ضامي ومارتوه
وحاله من اهمومه التوه
يا بويه وياكم سوه
ومنه ارتفع صوت الونين
————
تمت بحمد الله تعالى
بقلم : #بنت_الشمري

أرشيف / في شهادة الإمام علي السجاد عليه السلام

● طور : يمه أنا زينب
.
.

*آيا علي السجاد .. آيا علي السجاد*
*آيا علي السجاد .. آيا علي السجاد*

....

يا محنة المآلوم .. شاللي جری بحاله
شصاير يويلي اعليه .. من حانت آجاله
قلبه إلتهب نيران .. من ودع اعياله
يقلهم بأمان الله .. وادموعه سياله

بوداعة الله ايصيح .. وعينه تهل عبره
ومن ينظره الباقر .. بقلبه تشب جمره
....
بوداعة الله ايصيح .. رايح يهل بيتي
حان الأجل ليه .. وليه اقترب موتي
وللقبر هذا اليوم .. آنه ترى نيتي
يَهلي اسمعوني اليوم .. هاذي تری اوصيتي

كل ساعه هلوا ادموع .. للي انقطع نحره
لا تنسوا المظلوم .. وعيشوا علی ذكره
....
وابكل صباح وليل .. خلوا الدمع سايل
نوحوا لمصاب حسين .. وونوا لبو فاضل
وزينب بعد يَهلي .. الظلت بلا كافل
ما أنسى محنتها .. يوم الضعن شايل

نوحوا لبواچيها .. وذكروها متيسره
حرمه وتباري اطفال .. واتنادي يالزهره
....
تمت بحمد الله تعالی
✒ بقلم / فاطمہ كريم
*نسألكم الدعاء لتعجيل الفرج*
*اللهم عجل لوليـــــك الفـــرج*
*يــــــــــا أبا عبـــــــــــــــدالله*
الفاتحة مع الصلوات إلى روح والدي

🏴 حضور الإمام الحسين عليه السلام ساعة شهادة الإمام علي بن الحسين السجاد عليه السلام 🏴
#جديـــــــــــد

● طور : الفراق { مالي غيرك }


يبني جيتك .. ابلايه راسي او لا اديني
يبني جيتك .. امن النحر تسمع ونيني
يبني جيتك .. احضرك يا ماي عيني

باحتضارك .. آنه يمك ما اعوفك
باحتضارك .. تبچي لمصابي أشوفك
باحتضارك .. امن الألم قابض اچفوفك

يا حبيبي .. چم ألم شافت اعيونك
يا حبيبي .. وچم ضرب شافت امتونك
يا حبيبي .. يا علي الليله اشلونك

وابونينك .. چبدك المسموم ذايب
وابونينك .. تبچي لفراق الحبايب
وابونينك .. خَلَّصت عمرك مصايب

اعليّه دمعك .. من مرار الغاضريه
اعليّه دمعك .. ما نشف حتى المنيه
اعليّه دمعك .. كل صباح او كل مسيه
اعليّه دمعك .. وبالقبر تبچي عليه
__
تمت بحمد الله تعالى
بقلم : فاطمة كريم
نسألكم الدعاء لتعجيل الفرج
يــــــــــا أبا عبـــــــــــــــدالله
الفاتحة مع الصلوات إلى روح والدي

🏴غمض اعيونك🏴

لسان حال مولاتنا الزهراء عليها السلام عند حضورها الامام زين العابدين لحظات المنيه

طور الجفيري



غَمِض اعيونك يالولد
شنهو  اللي ماشفته بعد
هذا من الخالق وعد
اتشوف الرزايا ابكربله

اتشوف الغوالي امذبحه
عالرمضه يمه امطرحه
وتدري الحريم امجرحه
وتصبر على كل البله

استشهاد الامام السجاد عليه السلام

يــا سـادس نــور
يــا يــوم انـــزور
گبـــر المسمـــوم
يالغالي ــ يالغالي

مشتاگه عيوني تشوفك
آنــه ودمعاتي انطوفـك
انثر دمعي بكل خطـوه
للغالــي وابــن الصفـوه

    سالفتي اطويله
    وإلمن أشكيلـــه
    حنيـــت الليلــه

   شگـــد بيـّه عتاب
   وجرحي الماطاب
   ومنـــك محــروم
   يالغالي ــ يالغالي
ـــــــــــــــــــــــــــــــــ

مصابك مافارگ بالـي
وگبـرك مهـدوم گبالي
كــون انوديلك فزعـه
وانهشم روس البدعه

   ونرفــع رايتنـه
   ننصـــر سادتنه
   وتشبه صولتنه

صـولـــة عبــــاس
من عــزم او بـاس
ذاك الجيـــــــدوم
يالغالي ــ  يالغالي
ـــــــــــــــــــــــــــــــــ

بمصابك مثل الشمعه
ذوبتنـي نـــار الدمعه
كــون الگبرك مشايـه
نگصــد واترف الرايه

   بصبـرك نتحزم
   وننصبلك مأتم
   يـم گبرك نلتـم

  نلطـــم و انّــــوح
  يبـــن المذبــــوح
  حسيــن المظلوم
  يالغالي ــ يالغالي
ـــــــــــــــــــــــــــــــــ

هاك انشد گلبي الذايب
عن حبــك لتظـن تايب
لـو حــزو لجلـك نحري
تستاهــل دمي اليجري

    أفديــگ انفاسي
    واحبابي وناسي
    بيك ارفع راسي

   عنــــدي السجــاد
   رمـــــز العُبـــــــاد
   وسِــــر القيـــــوم
   يالغالي ــ يالغالي
ـــــــــــــــــــــــــــــــــ

فاضــن دمعــات اونيني
مــا تنشف طول سنيني
صوت امصابــك ترتيلي
سمّــو چبــــدك وا ويلي

   واتسامت روحك
   خالــد بجـروحك
   والكـــل اينوحـك

    ســـم العـــــدوان
   خَيــَّــط أچفــــان
   عمـــرك هاليـــوم
   يالغالي ــ يالغالي
ـــــــــــــــــــــــــــــــــ

ننشد مهدينـــه الغايــب
بثارك يا يــوم ايطالـــب
ويا يوم اليبني الحضره
وايفَــرِح گلـــب الزهـره

    صاحب ازمانــي
    يجبـــر احزانــي
    وميظل سفياني

    وكـل احنه جنود
    ابجيش الموعود
    للثــــار انگــــوم
    يالغالي ــ يالغالي


عمار الراشدي

هل تحب التأملات و الاسئلة القرآنية؟

#أبوذية

اسهام اليسر بالدلال فتن
ومصايبجن لعد احشاي فاتن
يربات العفاف شلون فتن
بين اجناب مابيهم حميه

لأحد خدام الحسين عليه السلام


#اللهم_عجل_لوليك_الفرج

ليـتني عِندّ إبَاعَبدَللّٰـه لإشكَوَ لـهُ ما في قلبَّي ..

من اين تتابع قناتي.، من افضلك اضعط هنا للاجابة 👇🏻👇🏻

🏴عن الامام الرضا عليه السلام يَا ابْنَ شَبِيبٍ إِنْ سَرَّكَ أَنْ تَسْكُنَ الْغُرَفَ الْمَبْنِيَّةَ فِي الْجَنَّةِ مَعَ النَّبِيِّ وَ آلِهِ (صلى الله عليه وآله ) فَالْعَنْ قَتَلَةَ الْحُسَيْن.
اللهم العن قتلة الإمام الحسين (عليه السلام )

اللَّهُمَّ الْعَنْ أَوَّلَ ظَالِم ظَلَمَ حَقٌّ مُحَمَّد وَآلِ مُحَمَّد وَآخِرَ تابع لهُ عَلى ذلِكَ، اللَّهُمَّ الْعَنِ الْعِصابَةَ الَّتِي جَاهَدَتِ الْحُسَيْنَ ( عليه السلام) وَشَايَعَتْ وَبايَعَتْ وَتَابَعَتْ عَلَى قَتْلِهِ، اللَّهُمَّ الْعَنْهُمْ جَمِيعاً

#_العن_تؤجر


- https://www.tg-me.com/+xSDK-Kfs29IzMmFi

- @darMahd313