.

البـارت 63 ••


أنـتِ حـبـي ❤️




عائشه: لا تصدقي لكلامه بيلعب بعقلش كم قد لش هانا ولا حتى اتصل يسأل عليش لكن لما قلنا يطلق قال مع وانو بيحبش ومدري ايش مسرع نبض الحب بقلبه

وانا اقولك يا احمد الرجال مستحيل يعيش بدون جهال وبالذات اذا العيب بالمره حتى وان هو مابيحبش الجهال لاتصدقيه عيصبر سنتين ثلاث ورجع يدي بدلش مره تخلف له

لميس محتاره بين كلام امها وابوها

احمد: المفروض تعقلي بنتش مش تخربي بيتها لكن هذا رأيش
ماقلتي يا لميس؟

لميس: مدري مترددة

عائشه: فكري بعقلش مش بقلبش صدقيني يابنتي هو رجال ولو كان يحبش من هانا للسماء ومابتخلفي ليتزوج عليش وانا مااشتيش تجربي الطبان شوعه وانا اعرف بنتي ترحم

احمد: حتى وان قرر يتزوج فهذا من حقه بس والله انو بيحبش وقد اتصلت له وحاكيته وحاكيت ابوه ولا رضي يطلق وجاء لوسط بيتي ورجعته عاسبش
يابنتي الولد شاريش

لميس: انا داريه انو بيحبني ويشتيني لكن مترددة مااشتيش احرمه من ابسط حقوقه
وكلام امي صح انا مااقدرش اعيش مع واحده تشاركني بزوجي

احمد: مسرع حكمتين عليه انو عيتزوج

عائشه: كلكم رجال من عيصبر على مره ماتخلف

احمد: بين اقول لش بيحبها وشاريها

عائشه: وما عيفعل لها الحب لاقد به طبينه جنبها ومن اي حين قد لها سته اشهر ماقال كيف هي مرتي لما قلنا طلق نزل الحب سبحان الله

احمد ضبح: انا قلت كلمتي وانتي قلتي كلمتش وزيادة والآن القرار عندش يا لميس

لميس محتاره: اقوم اصلي استخارة اول

احمد: غدوه تطرحي لي كلمه عيب قد رجعناهم من وسط البيت

عائشه: وايش ماكان قرارش احنا معش؟

لميس: واذا رفضته يطلق بدون مماطله

احمد: اذا ماوافقتي ترجعي وما طلق بنفس اليوم شارفع عليه قضيه خلع اليوم الثاني وعد بس استخيري والله يوفقش

لميس ابتسمت وسارت تصلي
.
.

عماد روح البيت وتوضى وصلى ودعى ان لميس ترجع له وتكون جنبه بقية عمره وكان يدعي من داخل قلبه

لميس صلت استخاره وغمضت عيونها ورقدت
.
.
ظ
الصبح
عماد وعلي بالصاله

علي: عمك احمد عيرجع لنا كلمه اليوم والا غدوه واذا مارضيت ترجع تطلقها هذك الساع

عماد: بس ياباه

علي قاطعه: لا بس ولاشي قد سرنا لعندهم وردونا مااشتيش اي اعذار اذا رجعت حيا لها فوق العين والرأس ماشي طلقتها وخلاص

عماد بحزن: حاضر

علي: الله يرضى عليك
.
.

اليوم الثاني الصباح

لميس بالعاني تأخرت بنومها لما يسير ابوها العمل عشان تتهرب من سؤاله وهي مازالت مترددة
.
.

بالعمل عماد سارح وبيفكر بها وبيدعي انها ترجع له

الموظف: يا استاذ عماد

عماد نكز: عفوا كنت سارح ماتشتي؟

الموظف: هذه الاوراق اللي طلبتهن

عماد: شكرا

الموظف: العفو 
.
.

ببيت علي

ليان بالمطبخ

كنان دخل المطبخ ابسرها وبفضاوه بيتليقن عليها: انتي الشغاله الجديده حقنا هيا افعلي لي عصير

ليان: احترم نفسك واعرف اني اكبر منك

كنان: وانا رجال وكلمتي تمشي عليش

ليان: لا والله

كنان: ادي لي قلص ماء يله

ليان: او انت مكسر

كنان بصياح: ادي لي ماء احسن مااكسر رأسش

ليان شلت قلص الماء ونزفته وهربت

كنان يشتي يلحقها طحس بالماء ونكع على يده وبيصيح ملان البيت

امه افتجعت لما ابسرته بيبكي ويصيح من يده بسرعه اتصلت لعلي

علي بنهاية الدوام بيحول رواتب الموظفين  لحسابتهم ورفع راتب عماد

عماد ابسر الحوالة وانصدم كان متوقع ان ابوه يزيد له الراتب بس مش لهذه الدرجه انبسط قوي لان ابوه بدأ يحس بقيمته

علي: الو

مرته وهي بتبكي: وين انت روح بسرعة كنان اكتسرت يده

علي افتجع: كيف كسرها؟ ما وقع؟

مرته: عادهم  روحوا من المدرسه قبل شويه وطحس بالمطبخ تعال بسرعة

علي خرج من مكتبه وهو مسرع عماد ابسر ابوه ولحق بعده

عماد: مابه خير ليش انتوا مستعجلين؟

علي وهو خايف: كنان طحس بالمطبخ واكتسرت يده

عماد: تعالوا اوصلكم بسيارتي اسرع

علي: هيا


بعد نص ساعه شلوه المستشفى وطلع عنده التواء بسيط ربطوا يده وروحوا وهم مجموعين بالصاله كلهم من فتره طويله ما اجتمعت العائلتين

اكرم: سلامتك ياكنان

كنان: الله يسلمك

الجده انيسه: فجعتينا ومابه شي

مرة علي: ابني كيف ما افتجع عليه

علي: قوموا قربوا لنا غداء قد اذن عصر وما تغدينا


طبعا مع الحشره اللي وقعت نسيوا انهم منتظرين اتصال احمد الا عماد ذاكر وساكت لان ابوه مستحيل يسكت واحتمال يخليه يطلقها لانهم تأخروا بالرد

احمد روح من العمل لبيته الثاني واتصل للميس

احمد: هاه يابنتي ماقررتي؟

لميس: محتارة ياباه ما رأيكم؟

احمد: انا قد قلت لش رأيي وامش قالت رأيها وانتي اخبر هذه حياتش

لميس: ازيد افكر لغدوه الصبح بس وانا شاقرر وعد غدوه الصبح اخر مهلة لي

احمد تنهد بقلة حيلة: الله يرضى عليش يا بنتي الناس مراعيين لي لو اتصلوا ما اقلهم

لميس: ...

.

البـارت 64 ••


أنـتِ حـبـي ❤️




احمد تنهد بقلة حيلة: الله يرضى عليش يا بنتي الناس مراعيين لي لو اتصلوا ما اقلهم

لميس: غلق تلفونك او قل شسألها ودعمم مثلهم قد لنا شهر نقول لهم يدوا ورقه الطلاق يقولوا تمام ويدعمموا

احمد ضحك: الله يهديش بس خلاص تمام غدوه الصبح تقرري وانا ماشسير العمل شابكر لعندش تقولي لي قرارش واذا هداش الله وتشتي ترجعي شاوصلش بنفسي لباب البيت واذا قلتي لا شاسير لعندهم واخليه يطلقش ونفتك

لميس: حاضر غدوه الصبح وقد اتخذت قراري ان شاء الله 

احمد: ان شاء الله


لميس غلقت وجلست تفكر بعماد وحست بتغيره وبتفكر ترجع له او لا
.
.
العشي ببيت علي

علي نسي الموضوع تماما مع ربشة كنان ونام بدري لانو ماخزنش

وعماد طول الليل بيدعي انها ترجع ومتندم على كل لحظه ماقدر حبها له

لميس قد عترقد بعد ما اتخذت قرارها وعتكلم ابوها الصبح
.
.

الصبح بدري عماد قام على غير عادته لبس وسار العمل لانه ماكملش عمله امس ومنتظر لاتصال من عمه احمد وهو متوتر وعنده يقين بأن الله عيختار له الخير وراضي بأيش ماقالت لميس
.
.

احمد قام ولبس وسار بيته عند لميس وعائشة

احمد: صباح الخير

عائشه: صباح النور هيا جي اصطبح قدو مقرب

احمد: وين لميس اول تقلي ايش قررت

عائشه: نصطبح وبعدين نسمعها

احمد: خلاص هيا
.
.

ببيت علي وقت الصبوح

علي: وين عماد؟ قوموه يجي يصطبح

أروى: قد سار العمل

محمد: مسرع كيف له؟

اكرم: اصلا امس خرجنا قبل مايتم الدوام اكيد سار يكمل عمله

علي: الله يهديه مانكره يقوم بدري ويسير يطلب الله بدون رفاس

الجده انيسه: ماعد فعلتوا من بنت احمد ؟

علي: قد نسيت مع حشرة كنان امس
على أساس عيتصل لنا امس يرجع خبر وللآن ماقد رن

الجده انيسه: اتصله انت والا يطلقها ايش معه منها وهذا وقد سرتم لبيته وردوكم

محمد: لبعد الصبوح واتصلت
واظن انو امر الطلاق عيكون اختيار عماد ومرته

اكرم: كلامك صح 
.
.

ببيت احمد

احمد: هيا ماقلتي يابنتي ؟

لميس: خلاص اتخذت قراري شارجع ونبدأ صفحة جديدة
لاني حسيت ان عماد صادق بحبه لي

احمد انبسط: الله يسعدش هيا جهزي ملابسش اوصلش

عائشه ما كانتش مقتنعة بس هذا قرار لميس ولازم تكون معاها دائما: الله يوفقش ويهدي لش زوجش ويسعدكم دنيا وآخرة

لميس فرحت: يارب اقوم البس وملابسي قدهن جاهزات

علي ابسر كنان بالصاله بيلعب بالايباد دخل الغرفه

علي: ليش ماسار كنان المدرسة؟

مرته: يده وجيعه 

علي: مابه الا العافيه ومن غدوه يسير

مرته: هو عور يده اليمنى مايقدرش يكتب

علي: هو انتي اللي بتزيدي له الغنج انا مايبن ادفعش رسوم المدرسة عشان يجلس بالبيت
واذا مايقدر يكتب يسير يفهم وانا شاحاكي المدير ان الواجبات عيكتبهن بعد مايتعافى

مرته: حاضر

علي نزل وبيدور رقم احمد يتصل له لكن تفاجأ ان لميس بالبيت وبتسلم على اروى وعلياء
كان الكل مصدوم وفرح بنفس الوقت

علي ابتسم: نور البيت يابنتي

لميس: النور نوركم

محمد: مابحد عماد والا كان عيطير من الفرحة

علي: هيا واحنا تأخرنا
.
.

عند عماد بالشركه منتظر اتصال من عمه او لميس تحاكيه انها رجعت وحس باليأس ومتأكد ان ابوه عيجبره يطلقها اول مايروحوا البيت


بعد الدوام روح بدون ماينتظر ابوه او اخوته
وصل البيت ودخل غرفته واول ماابسرها انصدم هذه لميس الا هي 

لميس ابتسمت له

عماد قرب منها وحضنها بقوة

لميس فرحت

عماد بعدها من حضنه وبعتاب: كيف سخيتي عليا ؟

لميس: خلاص ننسى الماضي ونفتح صفحة جديدة مع بعض

عماد: طيب
وابتسم: فقدت لش قوي

لميس: حتى انا كنت افكر فيك يوميا ولاقدرت انساك او حتى تغيب عن بالي

عماد مسك يدها وعيونه بعيونها: احبش

لميس دمعت كم تمنت تسمع هذه الكلمه منه كم اشتاقت له

لميس: وانا احبك اكثر من روحي يا روحي انت

عماد حضنها: الله يحفظش لي ولا يحرمني منش

قطع حديثهم دقة الباب لميس بعدت من حضنه وفتحت الباب

أروى: هيا غداء لنا ساعه مراعيين لكم

لميس انحرجت: يله البس ونجي

أروى: طيب لاتتأخروش

لميس: دقيقة بس
وغلقت الباب

عماد: من؟

لميس: أروى قالت نخرج نتغدى

عماد: يدو لنا غداء لهانا

لميس: ياسعم عادك حريو

عماد: ايوه عاد مرتي وصلت اليوم

عماد بعتاب: كم انتظرتش يا لميس كنت احس البيت سجن بدونش كم حاولت اتواصل معش او حتى اسمع خبر عليش

لميس: يكفي عتاب احنا قلنا ننسى الماضي 

عماد: طيب هيا نسير نتغدى

لميس لبست مقرمه: هيا

وهم بيتغدوا عماد مابعد عيونه منها جلس يتأملها وحس بسعادة كبيرة حس ان روحه رجعت له حمد الله وابتسم ورجع يأكل


بعد الغداء بالصالة

اكرم: اتصل لي عمي يوسف قال نسير نخزن عنده

علي: تمام اشتريتوا لنا قات؟

محمد: قد زكنت عليهن شويه واسير اديهن

عماد: ماشخزنش اليوم...

.

البـارت 65 ••


أنـتِ حـبـي ❤️



بعد الغداء بالصالة

اكرم: اتصل لي عمي يوسف قال نسير نخزن عنده

علي: تمام اشتريتوا لنا قات؟

محمد: قد زكنت عليهن شويه واسير اديهن

عماد: ماشخزنش اليوم
باقي معي عمل اشتي اتمه

اكرم: متى عيكمل العمل هذا؟

عماد: انتوا اخبر العمل متراكم من لما خرجت ولا احد عس شي

علي: ما نفعل لك عملك ومحد قدر يفهمه غيرك

عماد: عاسب تعرفوا قيمتي وان الشركة مستحيل تنجح بدوني

محمد: خف علينا شويه

اكرم: صدق روحه، ما احد يمدحك

عماد بعد ماابسر لميس شبعت وقامت قام: الحمد لله ، سلموا على عمي يوسف
وسار غرفته

ابسرها بتصلي امتد فوق السرير وجلس يتأملها  لما كملت

لميس: مالك؟

عماد: اشتي اكحل عيوني بش

لميس: قدهن مكحلات من الله

عماد: من علمش اللغاجه

لميس بدلع: انت

عماد قام: مش انتي حق رومانسية

لميس: على ماعودتني

عماد: هاذاك عماد القديم
اما الآن تغيرت وماعتلقي مني الا الحب و السعادة

لميس: وانا مارجعت الا لانك تغيرت

عماد: احبش

لميس استحت وسكتت

عماد: مااحلاش جلعني فدا للخدود الحالية

لميس: فداك الكون ياقلبي

و قامت ترتب ملابسها ابسرت دولاب عماد محشور انصدمت

لميس: ليش الدولاب هكذا؟

عماد: ما افعل مابش من يرتب لي غيرش

لميس: وانا ملابسي بدون ترتيب كل واحد يرتب ملابسه

عماد: معي عمل والا شساعدش

لميس جلست ترتب دولابه لبعد العشاء صلت وجلست جنبه

لميس: تعبت ملابسي شاخليهن  لغدوه

عماد قام: خلاص تميت عملي ارتبه لش انا

لميس فرحت: تمام وانا اشرف عليك من هانا

عماد ضحك: حاضر يا اميرة قلبي

فتح شنطتها وشمها عطر
عماد: كم فقدت لعطرش

لميس: ماذلحين مستحيل تزيد تفقد لي ولا شازيد افلتك

عماد: ان شاء الله
وخرج ملابسها وبدأ يعلق الفساتين والزنين ورجع جلس

لميس: تمهن

عماد: تميت ما اقدرش اعطف عطفيهن انتي

لميس قامت: كسل
وبتعلمه كيف يعطفهن

عماد: البسي هذا

لميس ابسرت فستان قصير: عجبك

عماد: اشتي ابسره فوقش

شلته ورجعت بقية ملابسها للشنطه
ودخلت الحمام بدلت ومشطت شعرها  وخرجت

عماد ابسرها واول مره يبسر جمالها الفتان جلس يبسرها

لميس: كيف؟

عماد: حالي مثلش

لميس ابتسمت: عيونك الحالية

عماد قام ومد يده: عترقصي معي؟

لميس مسكت يده: اكييد
.
.

الصبح قامت لميس وفعلت لها نسكافيه وعماد بن وبتصحيه

عماد قام على صوتها فتح عيونه ابسرها وابتسم

لميس: صباح الخير

عماد: صباح النور

لميس: هيا عتتأخر على العمل

عماد: هاتي البن حقي اشربه بعدين اقوم

لميس مكنته ورجعت تنشف شعرها بالمنشفه

وعماد بيبسرها بحب

لميس: مدري اين الاستشوار حقي يمكن نسيته في البيت

عماد: شاشتري لش جديد

لميس ابتسمت

عماد قام تحمم وخرج وقد لميس جهزت الصبوح

عماد جلس ياكل وبيتلذذ: اطعم اكل ذقته بحياتي و من يد ما انحرم منها

لميس: يهنا
قامت شلت المنشفه وطرحتها فوق راسه

لميس: ريح عتستبرد

عماد  انبسط: تعالي ااكلي

لميس جلست جنبه عماد بياكلها بيده

عماد: بوجودش حياتي عتكون سعيدة انتي اكثر واحده تفهمني

لميس: واكثر واحده تحبك

عماد ابتسم لها: وانا احبش اكثر من ماتحبيني

لميس: لا انا اكثر

عماد: انتي حبي وسعادتي

لميس: وانت نور دربي وسندي

كملوا ياكلوا ولميس جهزت لعماد ملابسه

عماد قبل مايخرج: تجهزي شاكمل عملي ونخرج نتغدى خارج

لميس انبسطت: تمام

عماد سار العمل وهو فرح وبيدعي ان سعادته تدوم معاها

عماد كمل عمله بسرعه وروح شلها وخرجوا تغدوا

لميس: ما رأيك نخرج حديقة نلعب؟

عماد ضحك: عادش جاهله تلعبي

لميس: او مابه ألعاب الا للجهال

عماد: حااااضر اشلش وين ماتشتي

لميس: ايوه قول هكذا من البدايه

ساروا الألعاب وكانوا مبسوطين ويضحكوا وبعد يوم طويل من السعادة

لميس: خلاص هيا نروح دوخت

عماد ضحك: لو تبسري شكلش خربت الكشخه

لميس ضحكت وبدلع: انا حاليه من الله

عماد وهو مبتسم: داري 

لميس كانت تشتي تمسك يده رجعت بعدت يدها وبتصلح البرقع

عماد فهمها رجع مسك بيده وقربها لجنبه

لميس استغربت وفرحت

عماد: اين عاد تشتي نسير؟

لميس: خاوره ايس كريم

عماد: من عيوني اشتري لش احلى ايس كريم وبالفراوله مثل مابيعجبش

لميس: ثانكيو بيبي

عماد ابتسم سار اشتري ايس كريم ورجع

عماد مكنها حقها: تفضلي

لميس: شكله لذيذ
ابسرت يد عماد وما بحد الدبله

لميس: وين الدبله؟

عماد: ...

.

البـارت 66 ••


أنـتِ حـبـي ❤️




عماد: اين عاد تشتي نسير؟

لميس: خاوره ايس كريم

عماد: من عيوني اشتري لش احلى ايس كريم وبالفراوله مثل مابيعجبش

لميس: ثانكيو بيبي

عماد ابتسم سار اشتري ايس كريم ورجع

عماد مكنها حقها: تفضلي

لميس: شكله لذيذ
ابسرت يد عماد وما بحد الدبله

لميس: وين الدبله؟

عماد: اشتري لي جديد على ذوقش

لميس: طيب قبل مانروح نشتري لك واحده

عماد: وانتي؟

لميس رفعت يدها: معايا

عماد: شاشتري لش على ذوقي

لميس: تمام

عماد: طعميني من حقش الايس كريم

لميس اكلته

عماد: زيدي وحده

لميس اكلته مره ثانيه

عماد: اي شي من يدش يوقع طعيم

لميس فرحت بكلامه وتغيره

ورجعوا محل ذهب وفضه اشترى عماد للميس دبله وهي اختارت له دبله غلفوهن وروحوا


بالبيت قبل مايرقدوا

لميس طرحت العلب حق الدبل جنب عماد و مدت يدها: لبسني انت

عماد لبسها ورجع باس يدها

لميس: كم كنت اتمنى انك تلبسني الدبله بالعقد

عماد: خلاص هوذا لبستش
وانتي لبسيني

لميس لبسته: اوعدني ماتزيد تخلسها

عماد: وعد

عماد ابسرها بحب: انتي عوضي بهذه الدنيا

لميس ابتسمت له: وانت حبيب قلبي


ومرت الايام وهم عايشين بسعادة وحب

وبكذا يكون انتهى الجزء الأول من الرواية 🤍

اڪملنا بارتات هذه الليله........


كما يسعدنا ارائكم وتعليقاتكم في تعليقات القناه
وشكرا علا متابعتكم لنا وانتضرو باقي الروايه 🤍

البارت الثـــاني

الجزء الخامس ⇣✭

.

البـارت 67 ••


أنـتِ حـبـي ❤️




وكنت اتمنى ان تنتهي روايتنا الى هنا لكن الحقيقة والواقع غير  لان الاهل وكلام الناس  مستحيل يخلوهم يعيشوا براحه اللي دائما يقولوا ليش ماتخلف لك جهال  وبالاخص ان لميس اللي ماتقدر تنجب فالجميع يبدأ ينصح عماد بالزواج والتدخل في الامور الخاصه ولميس تنزعج وتكتئب وعماد اول مايسمع كلامهم يجن جنونه ومايحب احد يتدخل بحياته وهو بيتمنى طفل بس ماكان يحاكي احد لانو خايف تزعل لميس، وجدته وابوه اللي مصرين يزوجوه عشان يبسروا عياله وصار الحال لايطاق

.
.

بعد مرور اربع سنوات تقريبا وتغيرت الكثير من الاحداث اهمها

علي فتح شركه بالخارج ومحمد مستلم العمل ومسافر هو واروى وقد معاهم جوليا وجواد وجاد

والدور الاول تقسم شقه لعماد ولميس وشقه لاكرم وعلياء وعيالهم يوسف ويارا

يوسف عمره خمس سنوات
يارا عمرها سنتين ونصف


والجده انيسه عايشه مع ابنها علي بالدور الثاني ومنكده عيشة مرته بس مستحمله لها عشان علي


واكيد به شخصيات جديده عنتعرف عليها مع قراءتنا للرواية
.
.

علياء سارت شقه لميس
لميس بالمطبخ بتفعل الغداء والشغاله بتنظف البيت

علياء: كيف انتي؟

لميس: الحمد لله وانتي

علياء: بخيره عتجي معانا اليوم ولاد بنت عمه شورى

لميس: قد دخلت مكان الولاد؟

علياء: عتدخله اليوم وقد اتصلت لجده وعزمونا عتجي؟

لميس: ان شاء الله شستأذن من عماد واحاكيش

علياء: طيب

لميس: وين يوسف ويارا؟ ماابسرتهمش اليوم

علياء: دخلتهم روضه يتعرفوا على الاطفال ويلعبوا معاهم ومنه ارتاح شويه

لميس ضحكت: الله يهديهم قدهم مشاغبين

علياء: قوووي

لميس: ما حاكاش يوسف ان عماد صيح فوقه 

علياء: ماشي ليش ماقد فعل؟

لميس: يوم سرتي العرس لعبنا غميضه وانا هبلاء كنت المغمضه وهو دخل يارا الدولاب وغلق على أساس بيخبيها وضيع الداير

علياء: يوووه وكيف فعلتوا؟

لميس: عماد كسر الباب حق الدولاب وماقد سبره لليوم

علياء: الله يهديه قد ادى لي الجنان لكن يستاهل وانا داريه به مايتحاكاش اذا هو الغلطان

لميس: انا فدا لهم كم احبهم

علياء: فداش الكون حبيبتي

لميس: تعالوا تغدوا عندنا اليوم

علياء: سهل مره ثانيه اشتي افعل لشعري مطاوي عاسب شلبس المصر

لميس: حالي اذا خلاني عماد اجي شلبس معش

علياء: تمام ونبيني بحينه اذا عتجي

لميس: ان شاء الله


شويه وصل عماد ودخل المطبخ بيفتش الطيسان

عماد: مافعلتي لنا اليوم؟

لميس: كبسة وبنت صحن 

عماد: ياسلام هيا قربي لنا قد شاموت جوع

لميس: الان قد صليت؟

عماد: قربي امد مااصلي

لميس: حاضر


وهم بيتغدوا

لميس: بنت عمه شورى والده وعزمونا اليوم اسير

عماد عشان ماتقتهر لما تبسر النونو: انا قلت لش ولاد ممنوع تسيري

لميس: قوا ياعماد عيب بولاد مرة ابنهم ماسرت وعادهم زاعلين مني لليوم

عماد سكت شويه: طيب سيري براحتش

لميس: ربي يحفظك لي

عماد: ويخليش لي ياااارب


بعد الغداء لميس حاكت علياء انها عتسير وقامت لبست وسارت معاهن وعماد رقد وقال عيخرج بعد العصر لان معه عمل
.

ببيت الولاد شورى جنب امها ولميس جنبهن بتسمع

شورى: ابسري يمه هذه البنت اللي لابسه فستان طويل

انيسه: ايوه مالها؟

شورى: هذه بنت سليفتي اللي حاكيتش عليها

انيسه: اللي تشتيها لعماد؟

شورى: ايوه ابسري على حلا فيها وعادها صغيرة

انيسه: قديه مزوجه والا لا وبعدين شكلها بتخزن وتشيش

شورى: قدي مطلقه ومعها بنت بس هي عند ابوها تزوجت السنه الاوله بس ما اتفقوش وكل واحد سار بطريقه وسهل اذا بتخزن عتكون تخزن مع عماد كم بيجلس يراشي لميس تخزن معه


انيسه: والله انها حالية بس تقولي عيوافقوا تتزوج على طبان


شورى: اكييد اصلا اين عيلقوا مثل ابن اخي والصدق قد لمحت لهم وشكلهم راضيين بس احنا من عماد ولا رضي يتزوج عيضيع عمره مع لميس  ومايلقى من يوبه له

انيسه: مش منه من مرته لاسمحت له يتزوج ولا هي قادرة تدي له جاهل يسلي حياته

لميس بتسمعهن واقتهرت وتفعل نفسها مابتسمعش

شورى: يا لميس

لميس ابسرت لعندها: ايوه

شورى: ليش ما تخلي عماد يتزوج؟ حرام عليش تحرميه من العيال

لميس: اذا هو راضي يتزوج

شورى: وكيف عيرضى وهو مايشتي يزعلش لو تقولي له تزوج بطيبة نفس ليتزوج قد نفسه عتخرج على جاهل

لميس وهي مقهوره: طيب انا شاحاكيه

انيسه: الله يعلم او قد سحرتيه

لميس زعلت قوي وسكتت

علياء جت تحاكيهن يروحين وابسرت لميس قد عتبكي لميس قامت تلبس

الجده انيسه: مسرع عادو حين

علياء: يوسف ويارا عند امي وقد الساعه ٨ وقت نومهم

شورى: روحين انتين امي عتمسي عندي اليوم

علياء: طيب

لميس بتلبس ونزلين دموعها ومسحتهن بسرعه قبل مااحد يبسرها وبسرعه لبست البرقع ووطت الخنه عشان ماتبسرها علياء

.

البـارت 68 ••


أنـتِ حـبـي ❤️


علياء: مالش؟

لميس وصوتها متغير: ولا شي هيا نروح

علياء: البس وننزل قد اكرم مراعي


بالسيارة

لميس: وصلنا اول ورجع ليوسف ويارا تاعبه

اكرم: طيب

علياء: سلامتش

لميس: مابلا راسي بيوجعني مع الدخان حق الشيش والمدايع

علياء كانت جالسه جنبها حضنتها وهي داريه انها بتكذب

لميس طرحت راسها فوق كتف علياء بتحبها  قووي وتعتبرها اخت وتحب عيالها وتوبه لهم دائما ويوسف ويارا يداعوا للميس ماماه


وصلوا البيت ورجع اكرم يروح عياله

دخلت لميس الشقه ومابحد دخلت غرفتها وبكيت من داخل قلبها وواصلت البكاء لما تعبت ورجعت قامت جلست وبتمسح دموعها بالمنديل ابسرت نفسها بالمرايه وقد ساح المكياج من الدموع قامت مسحته ولبست بجامه ولفت شعرها وجلست تتذكر كلامهن وتبكي بقهر


عماد وصل وهي بتبكي افتجع عليها دخل الغرفه

عماد: مالش؟ من غثاش

لميس ببكاء: تزوج تزوج ياعماد سير ادي مرة تخلف لك جهال يوبهوا لك لما تكبر تزوج وخليني ارتاح من كلامهم  وبكيت

عماد: من قال لش هكذا ؟ من زعلش قولي لي؟

لميس بدون تردد وبقهر: عمه شورى وجده انيسه
قالين اني سحرتك وحرمتك من الجهال وانك تشتي جاهل بس خايف عليا لو ازعل وانهن لقيين لك واحده تدي لك جهال بس مريعات لموافقتك اذا انا سمحت لك تتزوج

عماد جن جنونه: ما دخلهن بي ألف مره اقول مااشتيش اي حاجه بالدنيا غيرش انتي وبس 

لميس بتتذكر كلامهن وتبكي

عماد شل تلفونه وخرج من الغرفه ضغط اتصال على رقم عمته

شورى: الو عماد كيف انته؟

عماد بضبح: ماقلتوا للميس؟

شورى: ايش قلنا لها ؟ مسرع قد جات تشتكي لك

عماد بصياح: انا كم حاكيتش لاتتدخلي بشي مايخصش وقلت لش لاتتكلمي بهذا الموضوع قبال لميس

شورى: الله المستعان بدل ماتتشكرني بين افكر براحتك تجي تصيح فوقي

عماد: راحتي وانا داري بها وانتي بطلي تتدخلي بأمور ماتخصش وهذه البنت اللي تشتي تزوجيني بها والله ما اتزوجها لو تنطبق السماء على الارض

شورى: تزوج والا ما شتيت عاد الجنان لك

عماد: هذه المره احذركم ما مره ثانية لاتوقع القاطعة وقفل لوجهها

شورى اقتهرت وسارت تحاكي امها


عماد دخل الغرفه وعاد لميس بتبكي

عماد: خلاص يا روحي جعلي الخير عليش كيف سخيوا يغثوش

لميس ابسرته بحب: ياليت والناس كلهم مثلك


باب الشقه بيدق عماد قام يفتح

يوسف: عاد ماماه لميس صاحية؟

عماد فرح بجية يوسف هو الوحيد اللي عتبسره وتسكت: ايوه مراعيه لك بالغرفه

يوسف دخل بسرعه وبيرويها اللعبة حقه

لميس اول ماابسرته سكتت وبتحاول تخبي دموعها

يوسف: من زعلش
وابسر لعند عماد: انت صح ليش زعلتها؟

عماد: ما سخاني ازعلها

يوسف: الا سمعتك وانت بتصيح

لميس: ماحد زعلني بس فقدت لباباه مسافر

يوسف مسح دموعها بيداته الصغار ورجع حضنها وبيطبطب عليها

يوسف: سهل هو عيرجع

عماد: قد قلت لها هكذا وبعدين انا جنبها ليش بتصدق وتقتهر

يوسف وهو حاضن لها: ايوه انا جنبش وعمو جنبش لاتكوني تبكي

عماد ضحك لما سبق نفسه عليه: ما ادى لي الله جهال اداك انته تشل قلب مرتي

لميس ضحكت: بتغار منه

عماد: اغار عليش من نسمة الهواء

لميس فرحت وسكتت

يوسف: انا احبش يا ماماه لاتكوني تبكي وانا جنبش

لميس حضنته: وانا احبك يا روح الماماه

عماد قرب جنبها: يله سير ارقد

يوسف: اولا ليش كنت تصيح؟

عماد: هكذا اخرج الطاقة السلبية

يوسف مافهم: لو تزيد تصيح فوق امي شاشلها عليك

عماد ضحك: اهاه عتشلها

يوسف بثقة: ايوه

عماد: بتبسري اللغجه هذا

لميس: عاد هو جاهل

يوسف سمع صوت ابوه وهو بيداعيه

يوسف بعد من حضن لميس: بااي وخرج بسرعة

عماد حضن لميس: لاتكوني تصدقي لكلامهن او تسمعي لهن مستحيل اتزوج عليش انتي حبي

يوسف رجع

لميس ابسرته وبعدت من حضن عماد 

عماد بنرفزه: مابه معك مقلع

يوسف شل لعبته وخرج 

لميس: ليش تقله هكذا عيزعل

عماد بغيرة: اسمعي ما معش الا انا لايوسف ولا غيره تهمي زعله اوتحضنيه وتحببيه ممنوع

لميس ضحكت بصوت عالي

عماد ابتسم من ضحكتها: ايوه هكذا اضحكي تضحك لي الدنيا
.
.

الجده روحت الخميس وبتشتكي لعلي ان عماد صيح فوق بنتها

الجده انيسه: ابنك هذا قليل ادب لايحترم صغير ولا كبير لاقد احد حاكاه من الزواجه يقتلب قلبة خادم

علي: سهل انا شاحاكيه واخليه يعتذر لها غدوه 

الجده انيسه: ماذاحين ماعترضى تجي عندنا قد راشيتها تجي معي اليوم ولا رضت

علي:  شاتصل لها واعزمها تجي تتغدى غدوه واخلي عماد يعتذر لها

الجده انيسه بكذب: بعد ايش يعتذر قد بكيت لوما شبعت وعلى قولة المثل
افعل خير تلقى شر

علي مل من نفس المجبر من حين ما وصلت امه: خلاص يمه مالكن الا الذي يرضيكن
.
.

بعد صلاة المغرب علي نزل لعند عماد...

.

البـارت 69 ••


أنـتِ حـبـي ❤️




بعد صلاة المغرب علي نزل لعند عماد

عماد فتح لابوه الباب وحب راسه: حيا تعالوا تعشوا معانا

لميس سمعت صوت عمها ودخلت لبست ورجعت سلمت عليه وقربت العشاء

علي جلس يتعشى معاهم: ما شاء الله عليش طباخة محترفة

لميس فرحت: يهنا


بعد العشاء لميس دخلت غرفتها

علي: ليش صيحت فوق عمتك؟

عماد: لانها بتدخل بأشياء خاصة

علي: وانت ليش ماتتزوج ايش ناقصك انا داري انك بتحب مرتك لكن تزوج وحده تدي لك جهال

عماد: قلتها انا احب مرتي ومااشتيش اظلم احد كيف مره تجي تدي لي جهال ياسعم بنات الناس لعبة

علي: عمتك تشتي مصلحتك وماغلطت بشي

عماد بضبح: الا غلطت
كيف تتحاكا قبال لميس ليش ماتفكر بمشاعرها ؟

علي: خلاص حصل خير  ذلحين قد اتصلت لها تجي غدوه تتغدى وانت اعتذر منها

عماد: تعتذر من لميس اول وانا اعتذر لها

علي: مابش كبير يعتذر لصغير وهي عمتها المفروض ما تتحسس منها

عماد: اللي يغلط يعتذر ايش دخل العمر

علي قام: انا قلت كلمتي وانت اخبر اختي واحترامها من احترامي

عماد: وانا ماقلت شي تعتذر للميس مثل ماقهرتها وانا اعتذر لها

علي ابسر عماد بنظرات ضبح ومشي

عماد سار عند لميس ومصمم على قراره عشان يكونوا يحسبوا لكلامهم ألف حساب وما يجرحوا لميس
.
.

اليوم الثاني بالظهر

علي بيفكر يقنع اخته شورى تعتذر للميس لانه لو يعرف احمد عتحصل مشاكل هو في غنى عنها ولانو شريك معه بالفرع اللي بالخارج


شورى: والله ان انا غاثيه من عماد وقد كنت حلفت مازيد ادخل لكم بيت وماجيت الا عاسب اخي

الجده انيسه:  مالش الا الذي يرضيش وهو عيجي يعتذر لش

علي: اشتي افهم الموضوع سوا قال عماد ان انتي تحاكيتي انش تشتي تزوجيه قبال لميس وهي زعلت رجع ضبح منش

شورى بتعذار: ماكنتش داريه انها جنبنا وانت داري بي مااعرف اغثي احد

علي: كان المفروض تركزي البنت حساسه بهذه المواضيع وانتي داريه علاقتنا بابوها قوية ومااشتيش مشاكل معاهم

شورى: ماهمك الا العمل حقك والا ما انا طز بي

علي: ذلحين انتي غلطتي عليها وعماد غلط عليش اعتذري لها وشاخلي عماد يحب على راسش

شورى: ماعد الا اعتذر لمدري من وانا اقول ليش عزمتني الله المستعان بس

علي: يا اختي مامعي الا انتي ومامعش الا انا فرجاء لاتعقدي الامور وهي سابرة والصح صح والغلط غلط

شورى حست ان مابش معاها حل ثاني وهي ماتشتي تخسر اخوها لانه بيوفر لها كل الذي تحتاجه

شورى: ولو اني ماغلطت وكانت نيتي صافية لكن شاعتذر لها عشانك

علي: الله يحفظش يا اختي

شورى: ولا شازيد اتدخل بابنك يتزوج والا يشلوه الجن

علي: طز به هو الخاسر

شورى قامت: هيا ننزل ونرجع نتغدى

علي قام معاها: هيا ومالش الا الذي يرضيش



عماد راقد ولميس بتفعل الغداء

الباب بيدق فتحت لهم الشغاله ودخلتهم المجلس

لميس سارت تبدل وقومت عماد

عماد كوداً قام ودخل الحمام يتحمم

لميس قدمت لهم ضيافه
وجلست معاهم

علي: وينو عماد؟

لميس: يلبس ويجي

شورى بنخفره: او عادو راقد لذلحين

لميس: ايوه اليوم اجازه

شورى عوجت لقفها

شويه عماد وصل

عماد: كيف انتوا؟ جمعة مباركة

علي: الحمد لله علينا وعليك

عماد ابسر لعمته شورى ماردت عليه

شورى بزنط: متأسفة يا لميس ماكنتش مركزة انش جنب امي لما حاكيتهم

لميس بتبسر لعنده وهي مستغربه، تكذب وعادها تعتذر بزنط سكتت

عماد: مرة ثانية ركزوا واحسبي لكلامش ألف حساب

شورى قلبت عيونها: ماعدبش مرة ثانية

عماد: احسن واصلا مايعجبني لميس تجي عندكم

شورى تضايقت وابسرت لعند علي

علي: وانت قوم حب راس عمتك واعتذر لها

عماد قام وقرب من راسها وحبه من الهواء وبتكبر: العفو منش يا عمه

شورى ضبحت من حركة عماد قامت: شاطلع اصلي واجلس مع امي

عماد: الله معش

وطلعوا

لميس: عيب ليش ماعزمتهم يجلسوا يتغدوا؟

عماد: معاهم غداء طالع مش هم مراعيين لش

لميس: عتسير تصلي

عماد قام: ايوه قدو وقت
.
.

بعد الغداء
خرج عماد يخزن مع اصحابه بعد ماتزوجوا وكل واحد معه جهال ونبيل وحمزه فتحوا مشروع دعايه واعلان

عماد ابسر نبيل ضابح: هيا يانبيل كيف الزواجة؟

نبيل ابسر لعند عماد وبضبح: قدك داري

عماد ضحك: مكنتنا اشتي اتزوج انتوا مرتاحين ومدري مه

نبيل ضحك عليه: الله يقلعك كنت ازبج معاكم

خلدون: كيف العمل معاكم؟

حمزه: والله تمام لو تجي تشتغل معانا؟

خلدون: اسلم قد انا عند حقي المحل

نبيل: كيف حال بنتك ياخالد ؟

خالد: الحمد لله قديه بخير وخرجناها امس من الحضانه

عماد: الله يجبرك

خالد: يجبر الجميع
وبيرويهم صورتها

خلدون: ما شاء الله عليها لكن صغيرة

خالد: عتكبر اهم شي ان هي بخير

حمزه: ماسميتوها؟

خالد: بيان

نبيل: الله يجبرك

.

البـارت 70 ••


أنـتِ حـبـي ❤️


@ghj10

ننتقل لبيت اول مرة نزوره بيت صالح ناس بسطاء ومع الازمة وانقطاع الرواتب حالتهم تتدهورت

صفيه: قومي غسولي

اميره بكسل: تغسول شذى

صفيه: عيب عليش اختش ضيفه عندنا

اميره: هي من اهل البيت تقوم ماعيقع بها

ابوها بضبح: قومي غسولي وافعلي لنا شاهي

اميره قامت وهي ضابحه بتغسول وترجم الطيسان

صفيه: كسرتيهن كسروا راسش

صالح بيحاكي مرته: عقلي هذه المجنونة

صفيه: سهل هي عتعقل

اميرة من المطبخ وهي ضابحه: تم السكر ماعدبش

صالح تنهد: اقوم اشتري لنا من البقاله اذا هو عيرضى يدينا

صفيه بحزن على حال زوجها: الله يفتحها علينا يارب
.
.

العشي عماد روح البيت وسامر مع لميس

لميس بعد ماسمعته من كلام الجده وشورى: ياعماد لو نسير عند دكتورة نساء يمكن اتعالج 

عماد: تمام

لميس: نسير غدوه وان شاء الله ان به امل

عماد مسك يدها: به او مابش اهم شي ماتزعليش وانا راضي بش وما اشتيش حاجة من الدنيا غيرش

لميس ابتسمت وبتدعي ان يكون ولو شويه امل انها تخلف

اليوم الثاني
ساروا عند الدكتورة

الدكتورة: والله ما اقدر اكذب عليش مابش علاج ولا اقدر افيدش بشي بس به احتمال 50% انش تحملي باطفال الانابيب

لميس زعلت قوي

عماد تضايق: شكرا
وخرجوا

عماد بيسوق السيارة: خلاص هذا قدرنا ومكتوب لنا ولازم نرضى به

لميس بكيت: انا اسفه ياعماد حرمتك من الجهال

عماد تضايق: لا ازيد اسمعش تقولي هكذا

لميس بتبكي

عماد: لو انا داري ماشليتش عند الدكتورة خلاص يا لميس يكفي بكاء

لميس سكتت وبتمسح دموعها بالمنديل

عماد: معي لش مفاجأة

لميس بصوت زاعل: ايش هي؟

عماد: عمي احمد قد جاء امس الليل واليوم نسير نتغدى عندهم ونجلس معه

لميس فرحت: صدق ، ليش ما حاكيتني انو جاء؟

عماد: هوذا قلت لش

لميس: كنت عتحاكيني امس
وبفرحة: كم فقدت له

عماد ضحك عليها: كيف انتين النسوان بالساعة تتغير نفسيتكن الف مره عد كنتي بتبكي

لميس سكتت وهي بتخبي زعلها عشان عماد وفرحه بجية ابوها من السفر
.
.

بالمدرسة

رنا: هيا يا اميره ننزل نصتبح

اميره: شابعه

رنا: والله مااصطبح الا معش من عيواشعني

اميره: اصلا ما معش احد الا انا

رنا مسكت يدها: امانة جي معي

اميره قامت معاها وماتشتي تسير لان مابش معاها مصروف ودائما تحاسب لها رنا
.
.

بعد عدة ايام ولميس بتحاول تقنع عماد بفكرة اطفال الانابيب وهو رافض الفكره تماما


ببيت علي بالمغرب

علي مخزن مع  اكرم

علي: وين الملف الازرق؟

اكرم: عند عماد

علي قام: شاسير اديه به اوراق مهمه اشتي اقراها

علي وصل باب الشقه وسمع كلامهم

عماد بصياح: انا قلت لش لا مابتفهميش

لميس: قوا يا عماد مش احنا اول ولا اخر ناس وقد العلم تتطور وهذه فرصتنا الوحيدة

عماد: قالت لش 50% بس يعني احتمال كبير ماتوحميش

لميس: تفاءل بالخير واغلب النسوان اللي مثلي  بيحملين بأطفال الانابيب

عماد صيح بصوت رافع: انا قلت لا مابلا بصياح وجنان وانتي داريه خصمي الدحس وبعدين اين نسير انتي بعقلش نفعل اطفال انابيب انا راضي بقدري وما اشتيش جهال وانتي لازم ترضي وابعدي هذه الفكرة من عقلش نهايه السطر نقطه

علي سمع كلامهم وانصدم ورجع يدق باب الشقه

عماد سار يفتح وهو ضابح ولميس دخلت الغرفه تبكي

علي: مساء الخير

عماد هدأ شويه: مساء النور ادخل ياباه

علي دخل وجلس بالصاله هو وعماد

علي: ليش ماخزنتش اليوم؟

عماد: نفتهن من القات شويه

علي بيحاول يسحب منه كلام: من ايش ضابح؟

عماد: من حق الدنيا

علي: الملف الازرق عندك؟

عماد: ايوه تشتوه؟

علي: ايوه اديه نراجع الاوراق

عماد دخل الغرفه وابسرها بتبكي تحت البطانيه شل الملف وخرج


جلس مع ابوه ربع ساعه راجعوا الاوراق ورجع علي طلع شقته وعماد دخل الغرفه ولميس بتتدهن

عماد: لميس

لميس وهي بتبسر المرايه: هاه

عماد بحزن: زعلتي مني؟

لميس ابسرته وابتسمت بتصنع: وليش ازعل

عماد قرب منها: الا زعلتي سمعتش وانتي بتبكي

لميس انفجرت بالبكاء وحضنته عماد حس بتأنيب ضمير وبيمسح شعرها

عماد: انا آسف ماكان اشتي اصيح فوقش بس ما اشتيش جهال وهذا قدرنا ولازم نرضى به

لميس بعدت من حضنه ومسحت دموعها: حاضر

عماد: هيا نخرج نتمشى

لميس: قدو ليل

عماد: انتي قلتي تعجبش خرجة العشي قومي البسي قبل ما اغير رأيي

لميس قامت تلبس وعماد لبس وخرجوا تعشوا ورجعوا يتمشوا بالسيارة اشتروا عصير ووقفوا بمكان هادئ

عماد وهو بيبسر للسماء: كم تحبيني؟

لميس: مابش مقياس او رقم يقدر حبي لك

عماد ابتسم وبانت غمازته

لميس: انا فدا للحالي حقي

عماد ضحك

لميس بدلع: وانا كم تحبني؟

عماد...

.

البـارت 71 ••


أنـتِ حـبـي ❤️



لميس بدلع: وانا كم تحبني؟

عماد مسك يدها وباسها: اكثر مما تحبيني

شويه لميس طرحت العصير حقها وبتصلح البرقع

عماد شرب منه

لميس: حقي

عماد: اطعمه

لميس: نفس حقك ياسعم  ايش الفرق؟

عماد رجع شرب منه

لميس شلته: هور
وشربت بسرعة واشترغت ورجعت تضحك

عماد وهو بيضحك: تستاهلي
.
.
ببيت صالح

اميرة بتبسر كتب اخوها حق الجامعه وهو بيذاكر

اميره: بتذاكر هذا الكتاب كله وتحفظه

نزار: من طلب العلا سهر الليالي

اميره: ماعد الا اسهر للمذاكره ياسعم اين شاسير نهايتي للمطبخ

نزار: ليش بتقولي هكذا؟ يمكن تدرسي وتوقعي حاجة مهمة

اميره: قد ابسرنا اسماء اختك تعبت وذاكرت ونجحت واخر شي رجعت تزوجت وذلحين وسط البزا والهرم

نزار: كان نفسي ادرسكن يا اخواتي لكن قدش بتبسري الوضع

أميره: الله يحفظك ادرس انت واشتغل وعوضنا

نزار: ان شاء الله ادعين لي

اميره: مالا ننساك من الدعاء
.
.

ببيت علي

علي: من هي البنت اللي تشتوها لعماد؟

الجده انيسه: قد كنسلنا طز به

علي بجديه: دوري له وانا شاقنعه

الجده انيسه: كيف تقنعه اول مايسمعنا نتحاكا من الزواجه يجنن محد يقدر يتفاهم معه

علي: اشتي ازوجه وابسر عياله ماعيجلس طول عمره بدون جهال

الجده انيسه: ايش رأيك نخطب له ونرجع نحاكيه؟

علي: لا شاحاكيه اول واتفاهم معه يكفي بخطوبته الاوله كيف خزا بي وادى لي الجنان

الجده انيسه: مستحيل يوافق الا اذا وافقت مرته

علي فكر شويه: خلاص خليها عليا شاقنعهم وانتي دوري له بنت سوا

الجده انيسه: ما البنات ملان يقول ايوه وانا شاخطب له

علي: انا شاقنع لميس وهي تقنعه مابش معانا حل ثاني


بالسيارة

لميس: برد

عماد خلس الجاكت ولبسها

لميس شمت عطره وابتسمت

عماد: قد تشتي نروح

لميس طرحت راسها فوق كتفه: لا

عماد ابتسم وجلسوا يبسروا النجوم وهم مبسوطين
.
.

بعد عدة ايام بالصبح علي سار لشقه عماد وناوي يحاكي لميس وعماد مابحد

علي: صباح الخير

لميس: صباح النور

علي: كيف انتي يا بنتي؟

لميس: الحمدلله

علي: اجلسي اشتي احاكيش بموضوع

لميس جلست: خير

علي: اليوم الأول جيت عندكم وعماد كان بيصيح وسمعت كلامكم
وانو رافض فكرة اطفال الانابيب

وبجديه: اسمعيني صح انو كلامي قاسي عليش لكن هذا ولدي وما ارضى له الجعجعه يكفيه اللي فيه كم قد فعل فحوصات عشانش وهو بخير وانا اقول ماعد اتدخلش لكن تجي تقولي له اطفال انابيب لا ابني رجال وقادر يخلف عشرة وانتي مابتوحميش وهذا قضاء الله وقدره  فلو تقنعيه يتزوج انو احسن ماتقنعيه بخبر اخبل

لميس زعلت: بس قالت الدكتورة به احتمال كبير اوحم واطفال الانابيب لا حرام ولاعيب ليش تشتوا تزوجوه وتكسروا قلبي

علي: لا ازيد اسمعش تجنني ابني
وبعدين مشو حرام عليش تحرميه انو يبسر عياله لكن حرام علينا نزوجه ونكسر قلبش اذا انتي بتحبيه صدق فزوجيه قد نفسه عتخرج على جاهل

لميس ببكاء: يتزوج قد قلت له يتزوج مارضي

علي: لاتبكي ولا شي والله اني احبش واعزش مثل بنتي لكن ما ارضاش لابني البهذله بالمستشفيات ومن رأيي تقنعيه وهو عيقتنع وصدقيني شادور له مرة تخلف له بس لاتجي تشل بقعتش ولا حاجه وعماد بيحبش ومستحيل اي واحده تشله منش
فكري بكلامي وحاولي تقنعيه يتزوج

ومشي وترك وراه لميس مقهوره وبتبكي


لميس بتحاكي نفسها: كيف اقنعه يدي مره تشله عليا كيف اقنعه يتزوج ويكسر قلبي
كيف ورجعت تبكي
.
.

بالمدرسة

رنا: هيا عتروحي معانا؟

اميرة: لا انور مريع لي خارج

رنا: الحب
بدأت اشك انو بيرسب عاسبش عشان يكون يوصلش ويرجعش

اميره: منو نيوتن والله ماهو داري كيف يكتب اسمه بالانجليزي

رنا ضحكت: والله انو بيحبش صدقيني

اميره بخزا: داريه وانا احبه

رنا: بااااين و قد كل الناس دريوا

اميره: خاطرش شتأخر

مشيت لعند انور وهو مريع لها

انور: حرقت شمس وين انتي؟

اميره: كملت الحصه وجيت وبعدين ماحد قال لك تريع

انور: خلاص من الهدار هيا اخطي

اميره: عتنجح هذه السنه والا لا

انور: ان شاء الله ، وشاجي اليوم  نذاكر عند نزار

اميره: طيب واجعل لنا معك

انور ضحك: الضيافه من عندكم مش اديها معي

اميره: ماحد عزمك جيت من نفسك وادي ضيافتك معك

انور ضحك: حاضر ولا يهمش

وصلت البيت  

صفيه: من؟

اميرة وقد دخلت البيت: هو انا يمه

صفيه بتصبن الملابس بيدها

اميره: ليش ماتغسليهن بالغساله؟

صفيه: قد الكهرباء غاليه وكم جهد ابوش شقاء

اميره تنهدت

صفيه: الله يحفظش قومي افعلي الغداء عيجي اخوش وقدو جاوع

اميره: طيب وانور قال عيجي يذاكر اليوم عندنا

صفيه: روحتي معه؟

اميره: ايوه

صفيه: وليش ماقلتي له يدخل يتغدى وارجعوا ذاكروا

اميره: سهل مرة ثانية

صفيه: مابلا تعلمي الكرم يابنتي

اميره بضبح: ...

.

البـارت 72 ••


أنـتِ حـبـي ❤️




صفيه: مابلا تعلمي الكرم يابنتي

اميره بضبح: ان شاء الله
وقامت تفعل الغداء

لميس بتفعل الحلا وهي سارحة بكلام عمها علي

عماد وصل ودخل المطبخ فجأة
عماد: اغسلي لي القات

لميس بسرعة بتمسح دموعها عماد ابسرها وقرب جنبها

عماد بحنيه: مالش؟

لميس: ولا شي مابلا دخان من الطبيخ وعيوني دمعين

عماد مسك وجهها وعيونه بعيونها: من زعلش تحاكي

لميس ابتسمت: محد يقدر زعلني وانت معي

عماد باسها براسها وحضنها
لميس: قد تكون جاوع اقرب الغداء

عماد: ايوه
.
.

ببيت صالح وصل نزار وابسر اميره بالمطبخ

نزار: ما شاء لله على اختي الحميش

اميره بزنط: فعلت الغداء كله انا وحدي

نزار: هيا قربي لنا نطعم

قربت الغداء والتموا كلهم

نزار اكل ورجع تفل الاكل وبضبح: ايشو هذا؟

اميره: ايش به حرام تتفل الاكل

نزار بضبح: مافعلتي للرز ؟

صفيه طعمته: شلوش ايش فعلتي بدل الملح ؟

اميره بتتذكر: الملح اللي بالعلبه الخضراء؟

صفيه بصياح: لا هذاك ملح الليمون يابقرة

اميره قامت: احمدوا الله طبخت لكم
وبعدين ماحد معصوم من الخطأ

صفيه بضبح: سيري ولامنش فايدة ربي يشلش

اميرة زعلت ومشيت للغرفه وجلست تبكي ومقهوره لان اهلها دائما ينتقدوها ويدعوا عليها  ويقولوا لها ليش ماتوقع سع اخوتها
.
.

العشي ببيت علي

عماد ممدد فوق السرير بيبسر تلفونه ولميس جالسه جنبه

عماد: ابسري هذا ابن صاحبي خلدون
سبحان الله كيف يشبه ابوه

لميس تذكرت كلام علي لما قال اذا انتي بتحبيه صدق فزوجيه قد نفسه عتخرج على جاهل

لميس: ليش ماتتزوج ياعماد؟

عماد استغرب وابسر لعندها: ماصنف لش ؟

لميس: تزوج عشان توقع اب

عماد: حين قد تحيليت لابن صاحبي قد اشتي جهال

لميس: ممكن تطرح التلفون ونتكلم بجديه

عماد طرح التلفون وعدل جلسته: قد معش اليوم مجبر جديد

لميس: من حبي لك اشتي ابسر عيالك

عماد: ايش من حب هذا؟

لميس: قوا ياعماد تزوج ليش ماتتزوج وتدي لك جاهل؟

عماد: مااشتيش لو اشتي كان قد تزوجت

لميس: انا داريه انك تشتي جهال لكن خايف عليا لو ازعل

عماد سكت

لميس وهي بتحاول تقوي نفسها عشان لاتبكي: انا مااشتيش اكون السبب انك ما تبسر عيالك ولا انا راضيه من ما ابسرني يقول لي انتي السبب
لهذا معك خيارين
اما تتزوج وتخلف ونعيش كلنا جمعه
او افلتك وننهي علاقتنا

عماد انصدم: مالش يا لميس اليوم؟
من حاكاش ليش بتفاولي علينا نفترق؟ انتي دارية ان انا مااقدرش اعيش بدونش

لميس نزلين دموعها: ولا انا

عماد حضنها: انتي حبي وروحي ومستحيل افلتش

لميس ببكاء: خلاص تزوج اشتي ابسر عيالك

عماد بيهديها: خلاص اوصص
هيا نرقد شكلها تخاريف النوم
.
.

بعد اسبوع بدون احداث مهمة

عماد ولميس سامرين

عماد: اتصل عمي احمد اليوم

لميس وهي بتبسر التلفزيون: هاه

عماد: قال عيسافروا الحديده اذا احنا نشتي نسافر معاهم

لميس بفرحه: هيا نسير معاهم نغير جو

عماد: ما اقدرش معي عمل والتزامات

لميس زعلت
عماد: لكن اذا تشتي سافري معاهم سافري قالوا عيجلسوا ثلاث ايام

لميس: ومن عيوبه لك؟

عماد ضحك: او انا جاهل تهميني سيري افتهني بس واذا قدرت شالحقكم

لميس فرحت: تمام
.
.

اليوم الثاني يوم سفرهم لميس جهزت شنطتها

عماد: عتوحشيني قووي

لميس: هن ثلاث ايام بس

عماد: ولو يوم
خلاص لاتسيريش اجلسي عندي

لميس: حس بي لما تسافر وتفلتني

عماد: هو عمل والا ماانتي تفرطه مش ضروري
قوا اجلسي

لميس: يووه من جدك اجلس قد ابي بالطريق

عماد ضحك: طز بش سيري لكن لو ترجعي وقد معي مرة لاتحنقيش

لميس بزعل: ياليت اجي وقد تزوجت صدق

عماد : صدقت ، انتي مرتي ومامعي الا انتي وما معش الا انا

لميس رن تلفونها: مع السلامة قد ابي خارج

عماد: فارحه عتفلتيني

لميس: يووه منك انت اللي اقنعتني اسير

عماد شل الشنطه: عيب عمي مراعي لش مقلع

لميس: وقف اودعك اول
حضنته وبتمسح عيونه
لميس: لاتبكيش بعدي تمام

عماد: كيف قد انتي لغجه

لميس ضحكت: من عاشر قوما اربعين يوما صار منهم

عماد مسك خدودها: شافقد لش يا لولي

لميس ابتسمت ومشيوا

عماد ودعها وكان زعلان دخل البيت وهو هدوء جلس نص ساعه حس بملل ورجع دخل يرقد

قام وقد هو مغرب والبيت مطفى سرج النور وجلس بالصاله حس بوحدة وملل وهدوء قاتل

عماد بيحاكي روحه: هذا على نص يوم كيف شفعل بثلاث ايام لاغيبش يا روحي كم فقدت لش

علي نزل لعند عماد عشان يحاول يقنعه يتزوج

عماد فتح الباب لابوه الباب

علي دخل: كيف بيتك هادئ

عماد مافهم قصد ابوه: ايوه مابحد لميس

علي جلس: مقصدي مابش جاهل يملي بيتك فرح ومشاغبة وصياح

عماد سكتت

علي: ليش ماتتزوج ياعماد؟

عماد: لو سمحت ياباه مااشتيش نتصايح

علي: اذا هو عشان لميس فهي راضيه

عماد: وهو انت...

.

البـارت 73 ••


أنـتِ حـبـي ❤️




علي: ليش ماتتزوج ياعماد؟

عماد: لو سمحت ياباه مااشتيش نتصايح

علي: اذا هو عشان لميس فهي راضيه

عماد: وهو انت اللي بتجننها اتزوج؟

علي: اشتي اعرف ليش ماتشتي تتزوج اذا قصدك انها عتجي تشارك لميس حياتها فانت غلطان وانت اكثر واحد يعرف معزة لميس عندي وانا مااشتي الا ابسر عيالك

عماد: ذلحين تشتي تقنعني انك عتزوجني بمرة تخلف لي بس

علي: بالضبط

عماد: ومن هي هذه البنت اللي عترضى تتزوج وتعيش كاآله للحمل والولادة

علي: البنات ملان ويتمنين يعيشين هذه العيشة

عماد: تغريهن بالزلط

علي: انت ماعليك شي غير قول ايوه وقصدك من بنت ناس تتزوجك وتدي لك جهال ولاتقول ليش ما لميس او افعلي مثل لميس

عماد: حرام عليك تستعبد الناس بفلوسك

علي ضبح: تشتي ازوجك والا لا

عماد: لا

علي قام: طز فيك

عماد: اجلس نتعشى جمعه

علي بضبح: شابع
وخرج

عماد: عاد الحنق له
.
.

اليوم الثاني الصباح علي اتصل للميس

لميس: الو ياعم

علي: كيف انتي؟

لميس: الحمد لله وانت

علي: بخير ، حاكيتي عماد؟

لميس زعلت فكرت انو اتصل يطمن عليها: ايوه بس رافض

علي: خلاص اسمعيني وافهمي لاترجعي الا لما يرضى يتزوج

لميس: بس ما اقدرش مش انا لوحدي

علي: ابوش واعرفه ومستحيل يرفض لش طلب

لميس: لكن ياعم

علي قاطعها: انا قلت كلمتي ومستحيل اسامحش حرمتي ابني من الخلفه نزلت امس عنده وهو مثل اليتيم وحده ولابه احد عنده
هذا وعاد هو شباب وبروحه ولوما يشيب ويمرض من عيوبه له ويخرجه ويدخله ويسعفه

لميس حست انو كلامه صح واقتهرت: ان شاء الله شاحاول

علي: انتي اخبر وذنبش على جنبش

لميس بكيت: ايش هو ذنبي اني مااقدر اخلف

علي: انش حرمتي ابني من الجهال

لميس ببكاء: قد قلت له يتزوج ما رضي ما ازيد افعل له

علي: تجلسي عندش لوما يرضى انا داري به مستحيل يقدر يفلتش
وانا شامنعه من السفر بطريقتي لما يقولي زوجني وبعدين ارجعي له

لميس وهي بتبكي: تمام

علي: الله معش واوبهي تحاكي احد

لميس: انت داري ان انا ماقدرش احاكي احد والا ما تجي تقهرني وتذلني بمرضي

علي: الله المستعان يابنتي هذا لمصلحتكم انا بين اهم لما تكبروا من عيوبه لكم

لميس ضحكت بسخريه: تمام مع السلامة

علي: الله معش
.
.

بعد ثلاثة ايام وعماد فاقد للميس وبيحسب الثواني متى عتجي

لميس: ليش عنروح غدوه

عائشه: عد اشتيش تجلسي؟

لميس: ايوه نزيد نجلس يومين

احمد ضحك: قد عماد عيجنن عليش وانتي تشتي تجلسي

لميس زعلت عليه: اصلا هو مشغول بالعمل  والجو هانا حالي

عائشه: والله انو صدق الجو حالي ومابه علينا شي

احمد: على راحتكن انا جيت عاسبكن

عائشه: خلاص خلينا زد اسبوع وقد بسمنا جينا

احمد: تمام

لميس: وغدوه نخرج رحلة بالقارب

احمد: حااااضر اخرج افسحكن بكل بقعه معاكن هذا الاسبوع

لميس حضنت ابوها: الله يحفظكم لي

احمد: ويخليكن لي
.
.

اليوم الثاني

ببيت صالح
مجتمعات الاخوات وبيفعلين غداء الا اميرة بتبسر التلفزيون

صالح دخل البيت وابسر اميره: قومي ساعدي اخواتش هن ضيوف عندنا

اميره: قدهن الثلاث بالمطبخ مايحتاجين لي وبعدين طبخي مابيعجبكم

صالح: خلاص قومي ذاكري

اميره قامت: اوووف مابيعجبكم لاحد مفتهن

صالح: انا اشتي مصلحتش
واشتي بناتي يوقعين احسن بنات تعلمي من اخواتش لاعرف اسمع لهن صوت ولاقد احد اشتكى منهم

اميره: زوجوني واسكهوا مني

صفيه: لاقد جاء النصيب مانكره

صالح بضبح: الله يهديش انقلعي من قبال وشي يله

اميره ضبحت وسارت الغرفه وجلست بالطاقه تتبسر الشارع والناس وتتمنى تتغير حياتها وتعيش حياة مرفهة
.
.

عند عماد وصل من العمل ومابحد استغرب ليش ماقد وصلت خاف واتصل لها

لميس: الو عماد

عماد: وين انتي؟ ماقد وصلتوا؟

لميس: اصلا ماروحناش عاد احنا متأخرين

عماد زعل: ليش ماروحتوا؟
قدانا فاقد لش قد روحي عتخرج عليش

لميس بكيت

عماد افتجع: مالش ليش بتبكي؟

لميس: انساني ياعماد او تزوج

عماد: ورجعنا او سافرتي عاسب هذا الخبر

لميس: لا

عماد: ان روحتي غدوه والا انا  شاجي اشلش

لميس ببكاء: قوا ياعماد مااقدرش اروح 

عماد: طيب ليش؟

لميس: اذا تزوجت شاجي ماشي انساني وقفلت التلفون وهي بتبكي

عماد انصدم وزعل منها قووي
وقرر يسافر هو لعندها
.
.

اليوم الثاني

عماد قرر يرتب عمله ويسافر وسار العمل من بدري بس انصدم بكمية العمل والالتزامات اللي عليه وكوده يكملهن لنهايه الشهر

عماد حاول يتصل للميس وهي مابترد ومش قادر يسافر هو لعندها

العشي عماد رسل لها رسالة

عماد: ليش بتعذبيني؟ ليش بتفعلي بي هكذا؟ انا مااقدرش اعيش بدونش

لميس قريتها وبكيت: غصب عني ياعماد والله ما اشتي ابتعد عنك لحظة

عماد: ...

.

البـارت 74 ••


أنـتِ حـبـي ❤️




عماد: ليش بتعذبيني؟ ليش بتفعلي بي هكذا؟ انا مااقدرش اعيش بدونش

لميس قريتها وبكيت: غصب عني ياعماد والله ما اشتي ابتعد عنك لحظة

عماد: كيف غصب عنش؟ انتي داريه ان عليا التزامات مااقدرش اجي لعندش انا

لميس اتصلت له

عماد وهو مقهور: وتسخي عليا وتقهريني هكذا وانا احبش

لميس بكيت بحرقة

عماد: ليش ما ترجعي بدل البكاء؟ 

لميس ببكاء: قلت لك ما اقدرش ياعماد افهمني

عماد: كيف ماتقدريش؟

لميس بتقوي نفسها وسكتت من البكاء: اذا رضيت تتزوج وتخلف عد ارجع ماشي ننفصل

عماد والغصه بحلقه: مااشتيش اتزوج
لكن خلاص انا راضي بأطفال الانابيب ونسافر وتوحمي بس انتي ارجعي لي والله ان انا راضي

لميس بكيت: مابلا ترضى تتزوج

عماد: ليش تشتي تزوجيني تشتي مرة تشاركش بي

لميس ببكاء: لا

عماد بحزن: خلاص ارجعي فاقد لش

لميس: حاول تفهمني انا ما اقدر ارجع الا اذا قلت لعمي يزوجك

عماد صمت لثواني ايش معنى العمل المتراكم هذا الشهر وان لميس مش راضيه يتزوج ولكن تشتيه يتزوج وماهي قادرة تروح الا لما يقله لابوه يزوجه وكلام ابوه قبل ايام

عماد استوعب كل شي: ابي منعش تجي الا لما ارضى اتزوج 

لميس بتبكي

عماد بصياح: هو ابي والا لا

لميس ببكاء: ايوه

عماد قفل التلفون وجن جنونه وبسرعه طلع لعند ابوه وهو مخزن

عماد دخل المجلس عند ابوه وجدته

عماد بنرفزه: ليش تفعل بي هكذا ؟

ابوه فهمه: لمصلحتك

عماد بصوت رافع: مادخلك مني انا ادرى بمصلحتي

الجده انيسه: عتستحي على وجهك وتحترم ابوك

عماد بصياح: انتي مالش دخل

علي بياشر لامه بيده تهدأ

علي: مامعنا للجنان اليوم

عماد: ليش تمنع لميس ترجع؟

علي: لما تتزوج شارجعها لك ماشي الله يفتح عليها

عماد: ليش يعجبك تقهرني وتزوجني غصب؟

علي ببرود: انا داري بمصلحتك وبعدين ابسر كيف بتجنن عليها وانا زوجتك غصب وصدقني لوما تبسر ابنك عتنسى كل شي 

عماد بضبح : لو سمحت ياباه يكفي تتدخل بحياتي وخلي لي حالي

علي: تزوج وخلف ووعد ما ازيد اتدخل بشي

عماد تنرفز: حرام نظلم بنت الناس عشان انهم محتاجين

علي: هي عتتزوج برضاها قل ايوه وماعليك من شي

عماد فلت ابوه ونزل جلس يفكر ويفكر لما طلع الصبح ورجع غلق الشقه وقفل تلفونه ورقد

لميس قلقت عليه اخر ظهور له امس وتلفونه مغلق

عائشه: ماقد لبستيش عنتأخر

لميس: مابش نفس للخرجة اخرجوا انتوا

عائشه: او انتي تاعبة؟

لميس: ماشي بس اشتي امتد

عائشه: خلاص عنخرج ونرجع نتغدى جمعه

لميس: طيب

وجلست قلقه على عماد وتحاول تتصله

عماد قام على صوت اذان الظهر تحمم وفتح تلفونه ورجع صلى
تلفونه بيرن ويرن

عماد كمل يصلي وابسر ٢٠ مكالمات فائته من حبي طنشها وسار للمطبخ
.
.

بالمدرسة

عند اميره اللي تضاربت مع زميلتها بالصف واستدعوا ولي الامر

المشرفة مكنت صالح الملف حق اميرة

صالح: خير ليش عتفصلوها قد احنا بنص السنه محد عيقبل نسجلها

المشرفه: دبروا انفسكم

صالح: مابه ايش المشكله؟

المشرفه ابسرت لعند اميره: بنتك البلطجيه ضربت صاحبتها

اميره بضبح: مش هي صاحبتي

صالح بصياح: اووووص لاسمع لش صوت

صالح رجع يحاكي المديره: امسحيها في وشي اخر مرة لها

المديرة: تعتذر من زميلتها وعنخليها بالمدرسة

صالح: طيب وينه وهي عتعتذر لها

المشرفة قامت: اسير ادعيها

اميره ساكته ومقهوره

صالح بيهدد اميره: تعتذري لها وارجعي حصتش وشغلش بالبيت

الطالبه جت واميره اعتذرت لها وحست بذل وكوداً زميلتها قبلت الاعتذار 

المشرفه: هذا اخر تحذير لش مره ثانيه عنفصلش

صالح: ماعدبش مرة ثانية

اميره ضبحت ومشيت للفصل

عند لميس اللي اتصلت لعماد الف مره واخيرا جاوب

لميس ببكاء: كيف انت ياروحي ليش ماترد عليا؟

عماد بصوت مرهق: تاعب

لميس: مالك تاعب فيني ولافيك

عماد: تعبت من الحياة

لميس: لا تتحاكاش هكذا الله يحفظك لي

عماد: ليش عادش عترجعي؟

لميس ببكاء: هذا الشي بيدك انت

عماد: ليش بتفعلوا بي هكذا ليش بتقهروني

لميس: والله ماهو انا ولا بيدي

عماد: انتي راضيه وماشيه بعد ابي والا اذا رجعتي ايش عيوقع مشو قادر يفعل شي

لميس: كلام عمي صح ولازم توافق

عماد: طز بش انتي وابي انا شاعيش حياتي وحيد لوما اموت وانسوا احد باسم عماد

لميس كانت تبكي والدموع ملان وجهها: لا ياعماد قوا لاتفلتني مامعي احد غيرك

عماد زعل عليها قوي
عماد والغصة بحلقه: لاتبكيش بتوجعي قلبي

لميس: فقدت لك ولريحتك ولضحكتك اشتي ابسرك واحضنك قوا وافق ياعماد

عماد: ليش انا مافقدت لش وفقدت لصوتش وبسمتش
يا لميس حياتي مظلمه بدونش

لميس بكيت: احبك ياعماد احبك اكثر من نفسي وروحي

عماد: وانا احبش

لميس: ...