قناة الشاعر سيد فليح الموسوي

شور للقاسم عليه السلام

يجسام يجسام…شفتك حلم يوليدي
يجسام يجسام… عريس ازفك بيدي
""""""""""""""""""
كل ما طبگ عندي الجفن
عليك الگلب يمه يحن
وبمسمعي اسمك يرن
وطولك اشوفه اگبالي

جسام يا نور النظر
وجهك اشوفه بالگمر
وبهيده اشبگك وبحذر
خافـــــن افـــــز يالغالي

واتمنه كل يومي حلم
والليل البســـنه هدم
يمـبعثر افكاري شلم
وياك الحلم يحلالي

يجسام يجسام… والغاضريه انــساهه
يجسام يجسام… وانسه الحزن وياهه
""""""""""""""""""
من عطرك ايـغار الهوى
من وجنتك باگ الضوه
يايوسف وعيسى سوه
لون الســــــمه بعيونك
.
صافي مثل ماي العذب
يانسمه من جنــة تهب
جروح الزمن انت الها طب
مثل الدوه ايــــوصفــــونك

كل هذا ماشــافه العدا
سيفه اعله نحرك جرده
ياذنب من عنـــدك بده
من توگع ايـــــگطعونك

يجسام يجسام… من نومي افز مرعوبه
يجسام يجسام… سهم بچبد مصـــيوبه
""""""""""""""""""
يوليدي اشمــن بدلتك
شفت بخيالي زفتك
فرحانه ربعك هنتك
عريس تارس شوفي

هنتني نسوان السلف
فرحانه يوليدي بشغف
گلب امك ويــاهن هتف
شوف شحلات اطيوفي

كل العشيرة كيّيفت
يم بابي رايه علگت
. تهني عمامك كلهه اجت
تبارك تـــــريد وتــــوفي

يجسام يجسام… و حسين اجه بافكاري
يجسام يجسام… طش الورد يم داري
""""""""""""""""""
طال الحلم وانه بسعد
عمك حضر يوفي الوعد
وي والـــدك عنده عهد
وياك يحـــــضر يومك

شوف شكبرهه فرحتي
وبحلمي صارت منيتي
من عيني هلت دمعتي
شفت الفــرح برسومك

وي عمك انصاره اجت
بالفرحة هنت باركت
بسمك يجاسم هوست
سرتني هاي اعلومك

يجسام يجسام… ياريت اظل حلمانه
يجسام يجسام… والگلب يجلي احزانه

""""""""""""""""""
من نومي فزيت الصبح
لن راسك ايلوح برمح
وينك يبو وجه الـسمح
وين العـــرس واخباره

يافرحه مادامت الي
وين الولد ها يا هلي
صاح بشــماته عاذلي
مذبـــوح مالچ چاره

من دمــه صارت حنتي
بچفوفي ادگن وجنتي
يطلع جمر وي حسرتي
بالگلب شـــــــبت ناره

يجسام يجسام… ردتك الي عكــازه
يجسام يجسام… عون وذخر للعازه
""""""""""""""""""

الشاعر سيد فليح الموسوي
https://www.tg-me.com/AbuhassanAlmusawi2007