ارد انشد ارض الطف من دمعة العين
شنهو السـبب مذبوح من الكفه حسين
بهذاالعتاب شنهوالجواب عن ذبحة حسين
--------------------------------------------
اعتنيت الغاضريه اليوم ابدمع عيني واجر ونه
اوصلت يم مذبح المظلوم اوتراب الطف انشدنه
واسـألــه وانـتـظـر مـنه جـواب ايرد واسمعنه
يـسـمـعـنـي خـبـر لـمـن الـشـمـر لحـسين يتعنه
انشد واريد اجواب يشرح ذبحته
حين اعتنه الذباح بيا حاله شفته
وصَّف المصاب شنهو الجواب عن ذبحة حسين
--------------------------------------------
يجاوبني التراب حسين نايـــم عالارض جسمه
تـعـنـاه الشـمـر وسّــط سـيفه ابـنحر ابو اليمه
رجف سيف الشمر لـمن عرف جده وعرف امـه
شلون ايحز وريد الجان طــه أيـقـبـلـه و يـلـثـمـه
سيف الشمر ما صار حده اعله نحره
وجه ابوجه ما أظـن يـكـدر يـنحــــره
من نحره هاب شنهو الجواب عن ذبحة حسين
-------------------------------------------
التراب ايردعليه اجواب وحال المصرع ايعرضه
الشمروجـه ابـوجـه قـرر يـذبحه وسـيـفـه مايرضه
السـيـف امن النحر يـنـفـر يرد شمر الخنا أيـفـرظه
يكله حـسـيـن هذا السيـف حـظـك مـو مـثـل حـظــه
مايرضه هذا اسيف من نحري ينحد
جـي بـي اثـر لـشفاه جــدي مـحـمـد
ترد الحراب شنهو الجواب عن ذبحة حسين
----------------------------------------
سمع شمر الخنـا وما كف عامد ذبح ابـو الاكـبـر
عله وجها يكلـبـه وكـام ابـسـيـفه ايطبر المنحر
اثنعش طبـره طبر نحره ابجف الجــور و المنكر
ويكله اعرفها امك زين واعرف والدك حـيــدر
حقده اعله حامي الجار جمره ابدليله
وبـذبـحـتـك يـحـسـين يشفـي غليله
بهذا النصاب شنهو الجواب عن ذبحة حسين
------------------------------------------
اعرفت امن الطفوف الحال واخذت الحكمه والعبره
اعرفت جي لن محمد جان يقبل حسين من نحره
جـي لـن البـتـول حـسـيـن دوم اتـقبله من صدره
انهشم صدرالحسين وبيه فجعـوا فـاطـمه الزهره
بـنـت الـنـبـي المختار هـيـج كـسرها
ورض الصدرهاليوم يشبه صدرها
نفس الصواب شنهو الجواب عن ذبحة حسين
------------------------------------------

خادم اهل البيت عليهم السلام
عمار العيساوي الكربلائي

اعـظـم فـجـيعه يـم الشـريـعــه يــاعـبـاس
--------------------------------------------
تعـنه المصرع العـباس بالدمعـات اخـوه حـسـيـن
يخط جدم الحزن والاه ويتخطه اعله راس البين
وصل شاف البدرمخسوف ومن عزمــه انهدم ركنين
ركـن من سهم البعـينه وركـن طـأيـح عـلـه الـجـفين
جـفوفـه كَـطـيعه يـم الـشــريـعــه يــاعــبـاس
--------------------------------------------
لمّـن حـس ابـوالغـيـره شـخـص متـعني كَرب له
يـكَـلـه اقـسـم آنه عـلـيـك بـالـرّب اللـي تـسـجدله
تـمـهـلـنـي اودع حـسـيـن يالتـسـمـعـني هالمهله
اشمن بـيـها ابوالسجاد وتـلـثـمـه اشفـافي وتقبله
شـبـل الـوديـعـه يـم الشـريــعــه يــاعـبــاس
--------------------------------------------
كَـَعــد يـمّـه ابــوالاكـبـر وبحّـجـره وضـع راســه
يـكَـلـه امـصـيـبـتـك كَـطـعت كَلبي وفاكَد احساسه
يـعـبـاس العـمـر أنتـه يخـويـه وانـتـه نـبـــــراسه
يخويه انـتـه شريك الروح والكَــلـبـــي اعزناسه
وجثتك صريـعـه يـم الـشـريـعــه يـاعـبــــاس
--------------------------------------------
ردعباس ابوالـغــــيـره وحـط راسـه عـالـتـربـان
يـكَـلـه خـويـه خـلـيـنـي ولـتـرجـعـنـــي للصيوان
بالمّي واعدت سكـنـه يخـويـه وامّـلـت رضـعـان
عطاشه والعطش جمره اشيخمـدجمرة العطشان
نــاره لـذيــعــه يــم الشـــريــعــه يــاعــبـــاس
--------------------------------------------
كَـام حــسـيـن مـن يـمـه وتـعـنـه الخـيـمـة الحــره
تعايـن زيـنـب ابحـسـره تـشـوفـه مـنكـسر ضهره
يـكلـلـهـا يـبـت حـيـدر عـبـاس انـطـفـه بــــــدره
يختي امكَطعه اجفوفه ولـواه وجـربـتـه ابـكـتـره
ودامي ابنجيعه يــم الشــريــعــه يـاعــبــاس
--------------------------------------------
صاحت صـوت يـاويـلـــي تـهـدم عـمـد صـيـواني
مــنـهــواللي يـراعـيـنـــي عـكَـب الـجان يرعاني
ابفكَد عباس ابو الشـيـمـه بـعـد مـاتـطـفـه نـيراني
وبـعـد جـرح انجـرح لمـن اشـاهـد روس خـواني
بروحي الفزيعه يم الشـريــعــه يــاعــبـــاس

. . . . . . . . . . . . . . .

خادم اهل البيت ع-
عمار العيساوي الكربلائي

اعلك اشموع اشموع واعـجـن الـحـنــه
بالدمع يـبـــن الحسن حـنـتك من تنعجن
بالدليل المفجوع اعجن الحنه
--------------------------------------------------------------
رمله بدموع التصب تحجي وي جسام والكَلب وجّـر
اتـكَـلـه ياريع الكَلب جـانـــت الاحــلام بشوفتك تكبر
ما حسبت ابهالحرب يـبـنـي هـالـظـلام تنتظر تـظـهـر
وما حسبتك عالترب مـنـطـبــر بـالـهـام وبدرك اتعفر
شاهدت شمع وياس حـــــرم جــــابـنــه
يبني وصواني الفـرح ناظري اعليهن شبح
دم يهل ويه ادموع واعجن الحنه
--------------------------------------------------------------
صاحت ابصوت الحزن و الجمــر لهاب من صدى النيبه
يـاثـمـــر جبد الحسن يبن داحي الباب هيـبـه من هيبه
يبني احس جبدي انسحن والكَلب من ذاب صابته الــريــبه
عالشموع اللـــي انطفن والعرس والشاب امصيبته مصيبه
معرس وبين اعداه ابــدمـــه يــتـحـنــــــه
وزفته حين انـذبـح بيه احس كَلبي انجرح
ابدم نحرك المكَطوع اعجن الحنه
--------------------------------------------------------------
يبني مو وكَت العرس جـــرد الــبـتــــــار واعتني العسكر
لقن العـسـكـــر درس يـبـنـــي خط تذكار الـوالـدك حـيـدر
يبني لتهاب الرجــس ذكـــــر الـكـفـــــار بالجره ابـخـيـبر
يبني ضحيها الـنـفـس لاجل ابو الاحــرار حسين ابو الاكبر
للحسن بحر الجــــود أبــدمــــك اتــــبـيـنـــه
يبني وافي المجتبى ابجثتك المـتـخـضـبـه
والنحر صب ينبوع واعجن الحنه
--------------------------------------------------------------
من اجل ابو اليمه الشهم مهجتك والــروح يـبـنـي ضحيها
بـالحـرب عنـــدك عـــلـــم يبني حين اتروح وتعتـنــي ليـها
اعليــك حيــلــي ينــهـــدم وبالنحب و النـوح روحي اسليـها
يبني نــــارك تـنـــظــــرم لوطحت مـذبـــوح مـن يـطـفـيـها
بالكَلب تـلـهـب نـار مـن تـــــــودعـنـــــه
امودع ابرب العرش يــامن الكَلبي هرش
ومن الكلب مكَطوع واعجن الحنه
--------------------------------------------------------------
ابني ضحه بمنحره من اجل هالــدين ولاجل ابو اليمه
وافه كلب الطاهره وافه ابو الحسنين من رخص دمه
من وكع فوك الثره ناده عم يحـسـين وانتخه ابـعـمــه
هالاعادي الكافـره اعليه من صوبـيـــن كلها مـلـتـمــــــه
جـالاسد راح حسين الـجـــــاسـم اتــعــــنـــه
ايكَله بـدمــوع الالم يـبـنــي كل حيلي انهدم
والكَلب بي مفزوع واعجن الحنه
--------------------------------------------------------------
جابه عمه للـخـيـــم والدمع هـمـــال دم دمــع عـينه
طلعت ابهمه الزلـــم وحطته الابطـال ابنص صواوينه
اتشوف راسه منجسم لاجــن الـجـتـال مارأف بـــيــنه
طلعت اتشوفه الحرم وطلعت الاطفال وياهم اسكينـه
وزينب اتعنت ليه ابــدمــــه تــتــحــنـــه
وبالوريد اتـقـبـلـه والـمـدامــع هـامـلــه
اسكينه أله اتحن وتلوع واعجن الحنه

. . . . . . . . . . . . . . . .
خادم اهل البيت – ع- عمار العيساوي الكربلائي
----------------------------------------------

نـاح الـقـلـم ناح اللوح نـاح العرش لمصابه
والـجـنـه تبجي بأحزان نــار الغـضـب لهابه
-----------------------------------------
كل الوجـود بـهـالـيـوم سالت عـلـيـك ادمـوعـه
والـقـلـم ويـاه الـلـوح يـجـري الـدمـع بـالـلوعه
وعرش الله ناح الفركاك وجنة عدن مفجــوعه
والـنـار شيـطـفـي النـار تـلـهـب جـمـر بغيابه
-----------------------------------------
اهل السمه اعليك اتنوح ماجـف دمـع عـيـنـاها
وللزهره اصبح يحسين يـبـجـي الـدمـع لبجاها
ولمصيبتك كل مرسول وكل نبي اتعنه الطاها
ايواسوه بدموع العـيـن يـدروك اعـز احـبـابـــه
-----------------------------------------
ينعه الكَمر يبجي الغيم وغابت شـمـس دنـيـانـه
والريح لمصابك صار يجري بـلـهـيـب احزانه
الماي اللي ماروه حسيـن قـرر يـجـف جريانه
عطشان كل ماي الكون ويشرب سعير اتــرابه
-----------------------------------------
اتنوح الصحف للمذبوح يبجي الزبـور الـفـكـده
التورات تنعه اباحزان جـيـف الخـيــول اتلكده
انجيل عـيـسى بـاهـات يجـري الدمع من عنده
والمصطفى نفس حسين ولاجله يـنــوح اكتابه
-----------------------------------------

القران يبجي اعله حسين وحسين روح القران
الراسه تنوح الايات وعن دمه يحجي الطوفان
هــو الـقـدر والـتـطهـيـر هـو الـفجـر والرحمن
وكل سوره ناحت لحسين وتـصوبـن بـصوابه
-----------------------------------------
حته التراب البالكَاع حته الجـبـل نـاح اعـلـيــه
كل ذره من هذا الكون ابدمع المصاب اتـناديه
وكل طير طاير يـنعـاه وبجـنـحه أيـظـلـل لـيـه
جـيـفـن تـغـسـل بـدمـوم وتـحـاوطـه السـلابــه
-----------------------------------------
رمح الذي شال الراس ظل يـنـتـحـب لمصابه
وسيف اللي حز الاوداج يتخضب امن اخضابه
والسهم من شاف الكَوم تنوي اعله سلب اثيابه
صاب الكلب حته ادماه
-----------------------------------------
يحسـيـن بس كَوم اعداك من حاطتك بارض الطف
لارحمه عدها ولا روح وبـحـالـتــك مـاتـرأف
خلوك جثه ابلا راس وخنصر فكدت امن الجف
وشيعه احنه طول الازمان الثارك نظل طلابه
-----------------------------------------

خادم اهل البيت عليهم السلام
عمار العيساوي الكربلائي

الغيره بالطفوف تطلب الجفوف
الغيره فوك الكصه كطره وما يمسها خوف
--------------------------------------------------
صاحب الغيره سمعها الغيره نادتله
خل نشوف اشجان رده وشنهو كالتله
خلّي جفك عالشـريـعـه للـوفــه قبله
ينبني ويصبح مزار وكلها تـوصله
عالنهر تصول وانته ابو الاصول
هيّه صوله عالشريعه منها للحتوف
------------------------------------------------
كال اصول ابزودي واذكر للنهر شاهد
كَنـطـره عسكر اسطّر واحــدٍ واحــد
مثل ريح الجيش يهجم طود اظل صامد
عالشريعه سيفي ويّه الموت متواعد
يحصد الركاب يعله عالصعاب
ما تكع سيفي زلمهم لا ولا السيوف
-------------------------------------------------
انتفضت الغيره ابعروكه وصعدت ابراسه
واحـنــه نعرف بالغـيــور وهـمّـتـه وبـاسـه
عـاشـك حـسـيـن وحـسـيـني حـتّـه بأنفاسه
حسين روحه حسين نبضه حسين باحساسه
راسه للجدام عاشك الامام
حتّه دمه من وريده بالعشك يطوف
---------------------------------------------

جنه حيدر بالحرايب لمن ايقاتل
حتّه بالظربه يقلده ابظربته عادل
غيرة الكرار هـيّــه ابغيرة الكافـل
ابحيدر العباس اوصفه لو طلع صايل
يسحك الجنود ايفرق الحشود
ما تهمه حشود بالطف حته لو الوف
-------------------------------------------
عالنهر وكفت كتايب والكمر وحده
لو يميل اتميل بـيـهـم ياهو اليصده
بس غدر صوبوا عينه وانكطع زنده
طاح متسنده جفوفه غيرته اتسنده
اجفوفه عالتراب بالنبل مصاب
عالرمح مرفوع راسه وغيرته تشوف
----------------------------------------------------
بالعمود انصاب راسه وجثته متوذره
غايه من الله اكطعوها اليمنه واليسره
بهالمصيبه الباري راد الوادم اتعذره
حتّه ما واحد يلومه وزينب اميسره
وتمشي عالهزيل وغايب الكفيل
عالترب بدر الهواشم صابه الخسوف
------------------------------------------------
خادم اهل البيت عليهم السلام
عمار العيساوي الكربلائي

صورتُكَ العيون .. يا مُبهِرَ الفنون
صورة جسد .. والكل شهد -- يا مُبهِرَ الفنون
----------------------------------------------------
عكلي الك يحسين يرسم صوره
جـثّــه وذر وامـن الكفه منحوره
جسمك كتاب الله و وريدك سوره
ودمك حروفه اعله الارض منشوره

آيــاتُــكَ الخِضاب .. يا مُحكَم الكتــاب
اترتل صبر .. فوك السمر -- يا مُبهِرَ الفنون
-----------------------------------------------------
مطبوعه بعيوني وفلا انــسـاهــا
مثل الجسد والروح عشت اوياها
صورة جسد والغاصب اتعناهـــا
وبـــلا ثياب اعله الترب خلاهــا

جسمُكَ بالهــجــيــر .. يا ايـــهـا الاميــر
ضنوة علي .. انته الولي -- يا مُبهِرَ الفنون
-------------------------------------------------

هالصوره عشاكك اذا تـــرسـمـهـا
صعبه اعله اصحاب الجهل تفهمها
نــرسـم سفـيـنـة نــوح ونـجـسـمـهـا
جثتـك سفينه والبــحـر مــن دمـهـا

سفينةُ النجـــاة .. شِراعُها الابـُــاة
تجري ابفخر .. وبلا نحر -- يا مُبهِرَ الفنون
------------------------------------------------

هالصوره مو ياهو اليجي ويرسمها
مخفيه واصحاب الفكر تـبـصرهــا
ســر مــن اله الكون جثتك سـرهـا
ومــن راد سلابــك اخــذ مأزرهـا

تمسكت يــداك .. بمأزرٍ هنــاك
صوتك هتف .. خصمك رجف -- يا مُبهِرَ الفنون
---------------------------------------------------

هالصوره ارباب العلم درستها
وبلا عقيده,, ؟ ما اظن فهمتها
صورة وريدك عالرمح دوختها
وناس التحبك بالعجل عرفتها

قُرآنُنا الجــريــح .. لسانُــكَ الفــصـيــح
وانته الشرح .. وانته الجرح -- يا مُبهِرَ الفنون
------------------------------------------------

ابعكلي ودليلي وبالنظر طبعتك
واعله الشفاه احله اســم كتبتك
وانته ابدماي امن الزغر وجدتك
وبروحي مــابـيـعـن ابــد محبتك

بنفسي لا ابيع .. خنصُركَ القطيع
انته الي .. روحي وهلي -- يا مُبهِرَ الفنون
. . . . . . . . . . . . . . . . . . . .

خادم اهل البيت عليهم السلام
عمار العيساوي الكربلائي

محسن طايح يم الباب
وعبدالله انصاب ابنشاب
وحسين الطايح عالغبره .. ما يختلفن كسري وكسره
------------------------------------------------------
آنه البتول الطاهره ووالدي طه المختار
زوجة علي حامي الحمه معروف عنه الكرار
عشت المحن وي دنيتي وصوبني دهري الغدار
وبلحدي حين اتوسدت ما ظهرت الكبري آثار

محتاره ومهمومه الروح
ودلالي صابوه اجروح
وابني البالطف حزّوا نحره .. ما يختلفن كسري وكسره
---------------------------------------------------------

محسن لون مني وكــع يـــم عتبة الباب انصاب
من لوعتي ابصوتي صحت ادركني يا داحي الباب
واليــوم ينعاد الوضع وصابوني بالطف اصواب
لمن شفت بيد السبط عـبــدالله صابــه النشاب

اطفال ابعمر الازهار
تحركهم نيران الثار
بالحقد ايتلفون الزهره .. ما يختلفن كسري وكسره
-------------------------------------------------------

هذا الزمن طبعه الغدر خلّف ابدلالي اجروح
من محسن اويانه بده والكربله اليوم ايروح
اطفال ما عدهم ذنب بالمهد سالبهم روح
بالباب واحــد ينكتل والثاني بالطف مذبوح

مو جرح ابكلبي وجرحين
عبدالله ومحسن وحسين
وكسر الخاطر منهو ايجبره .. ما يختلفن كسري وكسره
. . . . . . . . . . . . . . . . . . . . . . . .

للطف اجيت ابحسرتي وبـلـوعـتــي وآلامي
مذبوح ابني امن الكفه والجسم عاري ودامي
راسه ارتفع فوك الرمح ويبست اشفافه وضامي
وبكلبه نبلة حـرمــلـه شـتّـــت تــعـب ايامي

فوك الغبره الدم مسفوح
زيّدلي ابدلالي اجروح
وبسهمه الطالع من ظهره .. ما يختلفن كسري وكسره
-------------------------------------------------------

حسيت يلجمني الظلع صديت لظلوع حسين
شفت الظلوع امهشمه وبظلعي صارن كسرين
صبيت دمعات الجفن نار وجمر تجري العين
يحفر ابوجناتي ابكثر ما يجري فوك الخدين

صحت ابصوت الهم والويل
من شفته امهشم بالخيل
خيل الكوم اتهشم صدره .. ما يختلفن كسري وكسره
---------------------------------------------------------------

جم طفل نفكد جم شهم جم بدر ميتم نوره
جم شاب يتحنه شفت ابدم ركبته المنحوره
والباب ظلت تستعر وخيامنه المسجوره
واطفال فــرّت بالفله مثل النجم منثوره

وبدر اللي طايح مخسوف
طاحن من ازنوده اجفوف
جود ورايه وسيف ابكتره .. ما يختلفن كسري وكسره
------------------------------------------------------------

خادم اهل البيت عليهم السلام
عمار العيساوي الكربلائي

يا رايحين الكربله هاكم اعيوني
ما لحظه يلفيني الوسن من تتركوني
تلفيني الظنون . لمن تروحون . هاكم اعيوني
------------------------------------------------------------

من جهّز حسين الظعن ناوي عالطلعه
ام البنين الاربعه وكفت اتودعه
تدري الظعينه راحله ما بعد رجعه
واولادها ابهذا السفر كلها متكطعه

صاحت يناوين السفر ارد اناشدكم
لو نفترض طال الهجر من يرد منكم
يمته تعودون . لمن تروحون . هاكم اعيوني
---------------------------------------------------------

صاحت يولدي الاربعه ارد اوصّيكم
دون الحسـيــن الكربله راح اوديــكم
عشكَ ام عشكَته وقررت لاجله افديكم
يــم فاطمه بـاجــر اريــد افتخر بيكم

يا جعفر افديها النفس دون ابو اليمه
وعثمان كل دمك فده الكطره من دمه
لا لاتكصرون . لمن تروحون . هاكم اعيوني
----------------------------------------------------------

عبد الله يوليدي العمر زائل وفاني
وحسين واحد بالارض ما اله ثاني
لحسين ترخص مهجتك علي وصاني
و لحسين كل احـنــه فـده انـتـم وآني

عباس انته عزوتي وانته نوماسي
لمن تضحي ابكربله يرتفع راسي
وانته فلا اتهون . لمن تروحون . هاكم اعيوني
-------------------------------------------------------

صاحت يعباس وبجت نزلت العبره
كال الها اعرف غايتج وادري ياحره
ترديني اضحي ابكربله لضنوة الزهره
كالتله قـدمـتـك فـده نـحـرك ابـنـحـره

يوليدي لو زاد الخطر قدّم اجفوفك
ولو شفته يحتاج الامر لا تعز شوفك
ما تسوه العيون . لمن تروحون . هاكم اعيوني
-------------------------------------------------------

حب راسها ودك الصدر لمن اتبسّم
كَر عينها وسال العلم جفه الموزم
كال الها ابنج من علي جان يتعلم
لخلي وادي كربله يغركَ امن الدم

اطبكها يسره وميمنه وارجع اطويها
اخبطها بجفوفي وارد بسيفي اصفيها
اتكله يغدرون . لمن تروحون . هاكم اعيوني
--------------------------------------------------------

يوليدي ادري لو رحت توفي بوعودك
وادري تجيب العلكمي وجاريّه ابجودك
وادريك وي سبط النبي تلزم اعهودك
وعالماي يم المشرعه ترخص ازنودك

اخوه انتوا كلكم فد صلب علي والدكم
بس انتوا خدام ويظل حسين سيدكم
وكلكم تضحون . لمن تروحون . هاكم اعيوني
-------------------------------------------------------------

خادم اهل البيت عليهم السلام
عمار العيساوي الكربلائي

يا نائماً في العرى
مكفنٌ بالثرى
إنَّ عيوني ترى
بحراً من الدماء .. إني انا الزهراء
--------------------------------------------------------------

يبني اجيتك أنـــه من كبري متمحنه مــن اسمعت مذبوح
من اوصلت كربله شفت الجسم بالفله فوك الترب مطروح
وثـيـابــك امسلبــه شيباتــك امخضبه مــن دمــك المسفوح
من انظر المنحرك بالماضي اتذكرك سلوه وضمد للروح

خرجتُ من مضجعي
اتيتُ في مدمعي
يا ولدي قُم معي
كي ترتوي الاحشاء .. إني انا الزهراء
-------------------------------------------------------------------

يوليدي لمن طحت بصوت الظليمه صحت غدروني هالكفار
جبدك نبال ارتمه ونــاديــت يــا فـاطمه صابوني بالبسمار
يوليدي رضّ الصدر هيّــجـلـي ذاك الكسر كــســر الترك آثار
كسـريــن مـتـواصله وانجمعن ابــكربــلـه هالحاله بيها اسرار

اسرارُ رب العلى
قد شاءَ في كربلا
ان تنجلي للملا
في يومِ عاشوراء .. إني انا الزهراء
--------------------------------------------------------------------

يبني وينبض الكلب بعيوني منظر صعب واصعب بعد عالبال
يفجعني وتــألـمــت يوليدي من شاهدت دم النحر من سال
دمع المحاجر سفح واعليك شوفي شِبح من شاهدت هالحال
يبني وشسولف بعد اصعب عليه واشد راسك عله العسال

رأسُكَ فوقَ القنا
جسمُكَ هاوٍ هنا
ياليت جسمي انا
مُقطّعُ الاعضاء .. إني انا الزهراء
-------------------------------------------------------------

جسمك هوه ابمصرعه واعضائه متكطعه مـــن شـفـــرة البـتـار
عاري الجسم عالارض اكبال الشمس تنعرض ابلا رحمه هالاشرار
واللي كِطع خنصرك حاول سلب مأزرك وآنه اوكفتله استار
كَتله ابتـعد يــالــردي لا تـعـتـقـد وحّــدي مــن انــدب الكرار

انتُمْ عرفتُم علي
فيهِ الدُجى ينجلي
للهِ كــانَ الـولي
سيفٌ على الاعداء .. إني انا الزهراء
-------------------------------------------------------------------

يوليدي ضامي الثغر اشعر دليلي استعر يبني استكَي ابعيناي
ضامي الجبد منفطر من جمرك اشعر جمر يوليدي وسط احشاي
واعضيدك اعله النهر ضامي الكلب من ذكر مــن ايده ذب الماي
وكطعة ادين الكمر وسهم اللي صاب النظر صوبلي هرش اجلاي

انتَ سليبُ الردى
وهوَّ قطيعُ اليدى
ما بينَ تلكَ العدى
لم تستقوا بالماء .. إني انا الزهراء
-----------------------------------------------------------------

يبني من اشوف الخيم مــا بيها الحــرم واسمع صريخ ايتام
والـنــار مـتــلاهـبــه واطفالك الهاربه مـــن وجّروا الخيام
واببضعة المرتضى اتضيك الارض والفضه وتنادي ياضرغام
اطـفالك امــطـشـره يا فـــارس الكنطره عيونك وسافه اتنام

قُم يا اخي قُم لنا
لم يرحموا طفلنا
هاهم احاطوا بنا
جمعٌ من الاعداء .. إني انا الزهراء
. . . . . . . . . . . . . . . . . . . .


خادم اهل البيت عليهم السلام
عمار العيساوي الكربلائي

يكمرة حياتي
رحيلك مماتي
لفن نايباتي
اويه كطع الزنود
-------------------------------------------

كمـر وجهك يضوّي ابظلمة ايــامـي
وارسمك لوحه تزهي ابمرسم احلامي
واحــس فكدك جمر بكليــبي الضامي
انام اكعد اشــوفــك صــوره جـدامي

يروحي ودليلي
يذخري وكفيلي
انتظرتك تجيلي
ورجيتك تعود
-------------------------------------------

اصد واتــذكر الماضي يكفالي
جنت متنومسه من توكف اكبالي
تسد عين الشمس لا تِظهِر اخيالي
وتذل جف الارض لا يلمس اذيالي

امن اوجه خطابي
واسمّعَك عتابي
يفجعك مصابي
ومصابك يزود
------------------------------------------

جنت زهوة حياتي وبيك اتوسّم
امن اشوفك اشعرك فوك الثغر مبسم
ما ادري حقيقه لو جنت احلم
من شفتك ذبيح اموذر امخذم

اصد الجفوفك
واعيش ابطيوفك
سهم طفّه شوفك
يراعي العهود
------------------------------------------

يخويه اعله الرمح واتفكّر ارسومك
بدر بسماك ابد متحجبك اغيومك
اروح اعله الهزيله امحنّيه بدمومك
اسـيــره وانته مـحـد يكدر ايلومك

دحيت الكتايب
يليث الحرايب
وهون عالترايب
علم ويّــه جــود
---------------------------------------------

العلم شفته يبو فاضل هوه ابكترك
وماي الجود فايض ويّه دم نحرك
وسيفك عالترب ياخويه ينتظرك
نفذ صبر الحديد وما نفذ صبرك

حملت المصيبه
يكبش الكتيبه
وأنه امشي غريبه
وبـديّـه الكيـود
-------------------------------------------

راح امشي واعوفك عالنهر مطروح
واعوف اكليبي يمك ما اعوف الروح
لأن الروح ظلت بالمعاره اتـنـوح
يم جسم الحسين اعضيدك المذبوح

اجيت ابزعامه
وارد ابيتامه
سمعت الملامه
اعله فكد الاسود
-------------------------------------------------


خادم اهل البيت عليهم السلام
عمار العيساوي الكربلائي

روح 0 هاك اخذ الكلب هاك اخذ النظر 0 روح
روح 0 يالبُعدك صعب دلالي انكسر 0 روح
الله يعينه كلمن فارك الغالي بس الفاكد اعضيده ايعرف حالي
-----------------------------------
خويه ياعباس اخذ دمعي يبرد كَلبك
هاك اخذ روحي درع خافن سهم يصوبك
العلكمي ضامي وترد روحه اذا يشُربك
يروي كل الدنيه لو مايه يصير بكربك

مات 0 نهر العلكمي لو ما لامسك 0 مات
مات 0 كلمن شاهدك ما يتنفسك 0 مات
آنه حسينك اللي اسكنت دلالي بس الفاكد اعضيده ايعرف حالي
-----------------------------------
ياشريك الروح اخذ روحي فده بس ابكَه
تدري كبل السيف اموت اعليك حركَه بحركَه
خويه ظل اويه العطاشة الترتويك ابشبكَه
يا كمر زينب تموت اختك تره امن الفركَه

شوف 0 زينب تلتفت ما بين الخيم 0 شوف
شوف 0 حي انته وبدت تشعر بالالم 0 شوف
زينب نادتك وينك يكفالي بس الفاكد اعضيده ايعرف حالي
-----------------------------------
انته رايح وانه احس راح النظر من عيني
الزم اجفوفك واحس متكطـّعه جفيني
انظر ابعينك واشاهد حرمله يرميني
اليطفي عينك يطفي عيني اليالمك ياذيني

آه 0 من صوب النهر اسمع هالصدى 0 آه
آه 0 اكصد مصرعك مثل الفاجده 0 آه
يفجع منظرك خويه امدد اكبالي بس الفاكد اعضيده ايعرف حالي
-----------------------------------
روح واخذ الرايه بيد وجودك وفقّارك
عالنهر عندك مهمه الباري الها اختارك
ملحمه ابسيفك تخط والجف يظل تذكارك
وجودك ايظل يجري ماي وهذا سر اسرارك

ماي 0 جودك ما يجف يظل دومه يكت 0 ماي
ماي 0 والكل ترتوي بس كلب الاخت 0 ماي
كلب اختك يظل عطشان للتالي بس الفاكد اعضيده ايعرف حالي
-----------------------------------
امزاحم الحسرات الي حسره تدفع حسره
هذا حالي من تروح اهمومي تصبح كثره
خويه يا عباس اخيّك ينكسرلك ظهره
نظره اراقب عالشريعه وللخيم هم نظره

نار 0 تلهب بالضمه بكلوب الحرم 0 نار
نار 0 وعكبك انذبح وتشب بالخيم 0 نار
منهو اليطفي نار التحرك اعيالي بس الفاكد اعضيده ايعرف حالي
-----------------------------------
خادم اهل البيت عليهم السلام
عمار العيساوي الكربلائي

ريتك يحادي النوك وياهم خذتني
شعندب بعد بالدار والمن عفتني
ماردت الاخبار 0 واتلفت الانظار 0 محد رجع للدار 0 المن عفتني
-----------------------------

بكَيت الوحّدي وراحوا بنيني وكل اهل بيتي
وردت وياهم اني امشي وهذي جانت امنيتي
كَبالي من مشه الحادي واخذهم واخذ عافيتي
حسين ابني اللي ربيته وخدمته واكسبت صيتي

تمنيت اروح وياه وابكَه ابخدمته
اشعر دليلي ايذوب بلوعة فركَته
وبكلبي اشعر نار 0 واتلفت الانظار 0 محد رجع للدار 0 المن عفتني
-------------------------------

مشوا وعيوني تبراهم لما غابوا عن الانظار
واظل امـتـانـيـه ترجع اليه منهم الاخبار
كل يوم ابصحن داري وادور اشبقه من الآثار
واعيش ابذكريات حسين الجان امضوي كل الدار

كل ليله اكول حسين باجر يجيني
ويبقى الامل بالروح وما تغفه عيني
ما اغفه ليل انهار 0 واتلفت الانظار 0 محد رجع للدار 0 المن عفتني
-----------------------------

اشكثر ناديت يالحادي يالحادي فلا يسمع
واعوفه وارجع وكلبي يكلي ما اريد ارجع
اختنك بالعبره وعيوني مغمضه ويطفح المدمع
شصبّر عيني لو روحي لو كلبي الذي اتكطع

بس الجسد ظليت روحي ابظعنهم
واتنطر الاخبار ترجعلي منهم
حتى الدليل احتار 0 واتلفت الانظار 0 محد رجع للدار 0 المن عفتني
-----------------------------

اصلي وادعي لحسيني ابحنان الأم انه ادعيله
والف مره اسبّـحله صلاة اعله النبي اهديله
واغمض اعيوني واتخيل اكبالي وكاعد اشكيله
واكله الليله بغيابك تمر بيه الف ليله

اقره ابكتاب الله يهوّد عذابي
وبسورة الرحمن بين عذابي
وتوضح المشوار 0 واتلفت الانظار 0 محد رجع للدار 0 المن عفتني
-----------------------------

لو ماخذني حاديهم ماجان الكلب وجّر
ولا تتواله حسباتي واظل بظنوني اتحير
افكر سالم اوليدي لو منّه انكطع منحر
فدوه الاربعه ياريت ايظل سالم ابو الاكبر

اربع بنين انطيت ما همني دمهم
بس لا ابو السجاد يظل مرمي يمهم
واتولته الاشفار 0 واتلفت الانظار 0 محد رجع للدار 0 المن عفتني
-----------------------------

خادم اهل البيت عليهم السلام
عمار العيساوي الكربلائي

السلام عليكم ورحمة الله وبركاته

اخوتي أعزائي
تم نشر قصائد من الأرشيف
للفائدة العامة

وبعد يوم الغدير الاغر سيتم نشر قصائد محرم الجديدة
سائلين من المولى القدير قبول أعمالنا

فرسان . ظلت حايره بسوح الحرايب
فرسان . منهو المجبل اعليها تراقب
علي الاكبر اجاها .. لو حيدر ولاها
. . . . . . . . . . . . . . . . . . .

علي الاكبر برز للحومه غضبان
مثل حيدر علي استقبل الميدان
يمينه القارعه ويساره ميزان
رعد صوته عليها ثار بركان
احتاروا حيدرة لو كمر عدنان
منهو الفارس الجندل الفرسان

صولات . علي جنه علي بصولات خيبر
صولات . ونعادت حنين بعلي الاكبر
حرب شبت لضاها .. لو حيدر ولاها
. . . . . . . . . . . . . . . . . . .

خيل وعسكر وفرسان وسيوف
برز واتملك السبعين الف خوف
حيارى يا علي النازل بالطفوف
ندم قادتهم وتظرب بالجفوف
المنيه بجيشهم وي صارمه تحوف
بس روس اتطاير بالطف اتشوف

ضربات . جنها الزلزله وظلت شواهد
ضربات . ما يخطي ابد بالروس حاصد
بشر تيهت خطاها .. لو حيدر ولاها
. . . . . . . . . . . . . . . . . . .

برز بكر ابن غانم بعد ولده
كالوا بس بكر يكدر يصده
الاكبر جندله من ضربه وحده
احد من سيفه الهم جان رده
عرفهم ابنفسه ومنهو جده
ابن حسين هذا ومن يرده

من صال . عليهم رجعت العدوان خطوه
من صال . بعساكرهم مجازر علي سوه

بطرف سيفه سباها .. لو حيدر ولاها
. . . . . . . . . . . . . . . . . .

علي ابن الحسين ابن علي كال
انا . وعالجيش الاكبر بالغضب صال
كتب تاريخه وي تاريخ الابطال
يدك بالكاع رمحه جنه زلزال
هواشم بالبطوله أسياد الرجال
الهم بالحرب مشهوده الافعال

ابطال . و الأكبر فرع من الهواشم
ابطال . ترباية علي بضرب الصوارم

الشجاعه اهوه ضناها .. لو حيدر ولاها
. . . . . . . . . . . . . . . . . . .

ما كدروله كلهم لجن غدروه
طاح وداروا اعليه وتولوه
برماح وسيوف الجسمه وذروه
مكطع ضامي عالتربان خلوه
اول هاشمي بالطف يذبحوه
بوليده العزيز حسين فجعوه

من طاح . موذر بالهنادي وسن الرماح
من طاح . كلب حسين ويا عالارض طاح
الحرب صبت بلاها .. لو حيدر ولاها
. . . . . . . . . . . . . . . . . . .

خادم اهل البيت عليهم السلام
عمار العيساوي الكربلائي

ما رحت ويه الظعن مدري شجاني
وجم سهم خيبة امل دهري رماني
لا خبر ودولي .. بعد ما ردولي
. . . . . . . . . . . . . . . . . . 

سافروا عني وبكيت ابونه وبحسره
مارحت مدري شجاني بساعة المسره
مكابله الحيطان وحدي وبالكلب جمره
واحسب الهم ساعه ساعه ولسه منتظره

من مشوا لليوم ابد ماراسلوني
وعالدرب مشبوحه تتنطر عيوني
صبري ساند طولي .. بعد ما ردولي
. . . . . . . . . . . . . . . . . . . .

كل فرض ادعي إلهي ويثكل اعتابي
بسمك الأعظم يربي تردلي غيابي
كلبي ذايب وبدموعي ذابت اهدابي
بالعمر شلي يربي بلايه احبابي

ربي اخذ عمري بعد شلي بحياتي
حسين لو ماشفته خلي يحل مماتي
ياعمر كلولي .. بعد ما ردولي
. . . . . . . . . . . . . . . . . . . . . . .

بأمل جيتهم بقيت ايام اتنطر
الصبر من صبري يمل وابقى اتصبر
ما وصل طارش يطمن كلبي المفسر
مدري يايوم اليجوني وبيهم اتبشر

تبتشر روحي إذا ردوا اليه
والله يبعد عني شر الغاضريه
اندعي ويدعولي .. بعد ما ردولي
. . . . . . . . . . . . . . . . . . . . . .

لو شفت ظعن الغوالي لاح لعيوني
حسين و أولادي ويه زينب كلهم ايجوني
فرحتي تكبر و افند فكرة اظنوني
فكره . ماشوف الحبايب لا يشوفوني

بين فكرة ظنتي وحسبت دليلي
يخلص انهاري واظل سهرانه ليلي
بالذبح يدنولي .. بعد ما ردولي
. . . . .   . . . . . . . . . . . . . . . . . .

واسمعت صوت المنادي وهيج آلامي
يا أهل يثرب يصيح انجمعوا كدامي
الخبر لمن ذاعه هدني وطشر احلامي
حسين بارض الطف يكلهم منذبح ضامي

جسمه عاري اعله الترب بين الحوافر
وراسه فوك الرمح بيدين العساكر
بهالخبر يسعولي .. بعد ما ردولي
. . . . . . . . . . . . . . . . . . .        

 
خادم اهل البيت عليهم السلام
عمار العيساوي الكربلائي

تارك مكه والطف كربله عازم
وبنحره الشريف ايقارع الصارم
ينقذ دين ابو القاسم
لا ميصافح الظالم
. . . . . . . . . . . . . . . . . . . . .

سبط المصطفى من شاف الخطر يكبر
ودين الهادي بيد اهل الكفر والشر
طلع من مكه والطف كربله قرر
ينصر دينه لو كلف كطع منحر

مكه اعليه تبجي وكلشي بيها يون
وحتى الحجر الأسود للحسين ايحن
لحسين الدمع ساجم
لا ميصافح الظالم
. . . . . . . . . . . . . . . . . . . . . .

طلع والدنيا كلها تودعه ابحركه
الصفا والمروه ضاكت رادت اتشبكه
زمزم فاض يدري مطوله الفركه
بعد ما راح . كلشي امناطر الملكه

ون بيت الله يدري حسين ما يرجع
ويدري اعله الترايب جسمه يتوزع
عاري اعله الترب نايم
لا ميصافح الظالم
. . . . . . . . . . . . . . . . . . . . . . .

يوم التروية شد الرحال حسين
ويا كل إخوته وأهله بظعن ماشين
كاصد للعراق وناوي نصر الدين
الكوفه بايعت وانصار اله امجهزين

الكتبوله العهد انقضوا بيعتهم
ومسلم بن عقيل اصبح ضحيتهم
حسين بهالغدر عالم
لا ميصافح الظالم
. . . . . . . . . . . . . . . . . . . . . . . .

ما خلوا يطب للكوفه هالاوغاد
وظعنه الكربله قهرا صبح ينكاد
الأمير الطاغي ابن اكّالة الاكباد
أمر .. والنفذ الملعون ابن زياد

طب الكربلة وداروا عليه صوبين
وعلى قتل الحسين ابهالحرب ناوين
بأمر الخالق الحاكم
لا ميصافح الظالم
. . . . . . . . . . . . . . . . . . . . . . . .

ترك مكه وترك أرض المدينة وشال
وقدس كربلا من دم وريده السال
جسمه اعله الترب صاير وذر و واوصال
مسلب . ضامي كلبه وراسه عالعسال

أطفاله عطاشه وبالفله طشار
بلا والي ولا مؤى . الخيم بالنار
وجم طفل انفكد هايم
لا ميصافح الظالم
. . . . . . . . . . . . . . . . . . . . . . . .


خادم اهل البيت عليهم السلام
عمار العيساوي الكربلائي

عباس اجيتك للنهر
عايني مكسور الظهر
ياخويه قلت حيلتي
ومتهيأ الكطع النحر
. . . . . . . . . . . . . . . . .

عباس اجيتك منهظم جفوفك شفتهن عالدرب
ايد اليقبلها علي بالسيف بغضا تنظرب
يحزامي من بعدك ضعت جيت والك دمعي يصب
مخسوف بعيوني الكمر لكن خسوفه اعله الترب

ياخويه لمن اوصلك
روحي أقدمها الك
يالساكن انته بمهجتي
واعليه أغلى من النظر
. . . . . . . . . . . . . . . . .

اتعنيتك وجدمي يخط بالاه والحسره والم
يابا الفضل يا مسندي انهض يشيال العلم
ياريت افكد ناظري ولاشوف بعيونك سهم
وتشمتت بيه العده كلمن اصد ليه ابتسم

مضروب راسك بالعمد
وخليت اخوك ابلا سند
اكعد يمهجة خاطري
لمصيبتك ظهري انكسر
. . . . . . . . . . . . . . . . . . .

حط راسك ابحجري تره حار التراب البالارض
خلينه نتشارك سوه جرحي ونزيفك والنبض
خافن تجي غارة عده وفوكك يصير الهم ركض
انه الذي بعدك تجي خياله وبصدري ترض

بعد وحيد أصبح تره
ومني الضلوع امكسره
مو يمي من يلفي الشمر
يكطع ركبتي من الظهر
. . . . . . . . . . . . . . . . . . .

يالوجهك يضاهي الكمر منك خجل وجه الشمس
انظر شفاهك ذابله عن العطش منطي درس
متملك اجروف النهر والماي بيدك يلتمس
ذبيت جفك جي بقه بالماي لحظه منغمس

يا منجم حروف الوفه
والفخر بجفوفك صفه
عينك يقبلها السهم
والراس بسيوف انطبر
. . . . . . . . . . . . . . . . . . . .

راح ارجع الزينب انه لاجن شكلها اعله الجره
تفهم اذا محني ارجعت وايدي انتجت عالخاصره
من لون وجهي تفتهم مفكود سبع الكنطره
من يغرك بعيني الدمع تفهم ترد اميسره

يا كافل العيله اشتظن
يتحملن ضرب المتن
حفاي باجر بالعره
بذاك الهجير وبالقهر
. . . . . . . . . . . . . . . . . . . .

خادم اهل البيت عليهم السلام
عمار العيساوي الكربلائي

دمع العيون يسيل دماء
لمصيبة في كربلاء
رزية الارزاء


سافرت روحي الكربله بهذا اليوم .. من لهفتي اعله حسيني
فاركني وأنه اسهرت جافيت النوم .. ناطرته كون ايجيني
وما بين ها يرجع وما يرجع دوم .. بالدرب تشبح عيني
وكل يوم عام اعله الدليل المهموم .. والشوك هد اسنيني

للشوق صار فؤادي اسير
اريد رؤيا ه الأمير
غدا بلا تفسير

. . . . . . . . . . . . . . . . . . . . .

واوصلت للطف والدمع عالخدين .. من كلبي تجري ادموعه
مو عالبنين اسأل فقط عن حسين .. اسأل مثل مفجوعه
بشوفت جبين اوليدي تتشافه العين .. وتخمد بروحي اللوعه
ما صدك ابني اتولته سيوف البين .. وخيل اسحكت بضلوعه

لا لم يمر ببالي خيلاء
وكأنني في كربلاء
انظر إلى الاشلاء
. . . . . . . . . . . . . . . . . . . . . .

جمر انتظاري ولهفتي صار يهون .. عن خبر ذبح اوليدي
بشر ابن حذلم من نعه فقده شلون .. طاح الطفل من ايدي
جني اطوف ابكربله وي ام عون .. ما شفت جسم اوحيدي
ثاري ابني متكطع غده واندب كون .. انحز كبله ريت اوريدي

ياليت رأسي قطيع السيوف
جسمي توزع بالطفوف

. . . . . . . . . . . . . . . . . . . . . .

جنت احسب يعود واتاني اعله الباب .. يرد ويكف كدامي
كل انتظاري الرجعته والظن خاب .. واتطشرت احلامي
بعالم خيالي من شفت بالطف غاب .. بدر الغوالب دامي
راس ابرمح والجسم مرمي اعله اتراب .. مذبوح بالطف ضامي

ابكي لمن ذبحوه وحيد
ضامي الي الله شهيد
قلبي له تنهيد
. . . . . . . . . . . . . . . . . . . . . . .

مابين حسبه وحسبه شفتك مذبوح .. كلبي انمرد وتكطع
وبين الحوافر طاح جسمك مجروح .. بسحك الخيول اتوزع
بالطف جنت وياك احومن بس روح .. وكبلك طحت بالمصرع
يبني ابكرامه منحرك ظل ايفوح .. وللعز وريدك منبع

لما أراد اله العباد
لك ان تكون المداد
للدين والامجاد



. . . . . . . . . . . . . . .

خادم اهل البيت عليهم السلام
عمار العيساوي الكربلائي

رباي وسنين التعب جا وينها
تالي جثتك اعله الثره اموذرينها
. . . . . . . . . . . . . . . . . .

رباي وليالي السهر فوك المهد
جنت اتأمل اشوفك يالولد
شاب معرس . يمن لكليبي ضمد
يا شمعتي البالحرب طافينها
. . . . . . . . . . . . . . . . .

شمعتي المطفيه وعيوني انطفن
من البواجي اعليك يا شبل الحسن
بس طحت يوليدي شيبني الزمن
ودنيتي افترت عليه اسنينها
. . . . . . . . . . . . . . . . . .

يبني يا جاسم يمصباح الفرح
ويه نحرك يمه احس نحري انذبح
يبني حزنك ساكن ابكلبي صبح
ودارت اعليه النوايب عينها
. . . . . . . . . . . . . . . . .

وين جانت لي يجاسم كربلاء
نيبه . وارضينه بحكم رب السماء
يا شهيد الدين والعز والاباء
ابجتلك الامه أخرجت عن دينها
. . . . . . . . . . . . . . . . .

يلي نايم عالارض والترب حار
امك اتنوحك غدت ليل ونهار
يا ذخر عمك يسيف الانتصار
الطشرت فرسان بميادينها
. . . . . . . . . . . . . . . . .

ايست من دنيتي لمن رحت
وكون يبني وياك يا جاسم طحت
مثل نار اشموع عرسك فرفحت
يمن لأمك يبني موفي بدينها
. . . . . . . . . . . . . . . . . .

اوفيتني من انصرت عمك حسين
عالعده جنك امير المؤمنين
روح يا جاسم الرب العالمين
وانته بجثتك بالدمه امغسلينها
. . . . . . . . . . . . . . . . . . .

خادم اهل البيت عليهم السلام
عمار العيساوي الكربلائي

ربيتك ابماي العين يبني يالاكبر
ردت ذخر للايام كدامي تكبر
ردت استند بيك .. يبني .. ردت استند بيك
. . . . . . . . . . . . . . . . . . . . . .

غصن واسكيتك بعيناي يمن شاتلتك بروحي
بلسم جنت للايام اذا ما هاجت اجروحي
جبل بحماك ما فد يوم سيل ايمر على اسفوحي
لكن من وصلنا الطف علامات الحرب توحي

توحي الحرب يا ريحان كرب المنيه
وتشائمت من الفيت للغاضريه
فجعت دليلي .. يبني .. فجعت دليلي
. . .  . . . . . . . . . . . . . . . . . . . .

اصدلك والهموم اثكال هدن حيلي يوليدي
واذكر عالمهد اوكف من تناغيني يا عيدي
لا تنشدني عالدمعات وتكلي ابصبر هيدي
واني ادري بعد ساعات يبني اتروح من ايدي

يوليدي من جنت ازغير فرحة زماني
تكبر وتكبر وياك كل الأماني
جنت انته عيدي .. يبني .. جنت انته عيدي
. . . . . . . . . . . . . . . . . . . . . . . . .

تكبر يبني كدامي وتحله بعيني كل ساعه
لحد ما صرت ذاك الشاب طباع المصطفى أطباعه
اهيم ابحر حسباتي وظني ايمزك اشراعه
وارجع غاركه بهمي وتعصر كلبي اضلاعه

بين الامس بين اليوم كلبي ايتكطع
بين المهد بين الجيش جن روحي تطلع
وابجي المصابك .. يبني .. وابجي المصابك
. . . . . . . . . . . . . . . . . . . . . . . . . .

حانت ساعة التوديع الله بحالتي عالم
أودع مدري أودع الروح يالبيك العكل هايم
اقدمنك فده لحسين يبني اتعينه عالظالم
فدوه التعب فدوه ارباي بس كون ويظل سالم

لحسين اقدمك قربان بس كونه يسلم
والدك ضحيله الروح وتنصره بالدم
افديه مهجتك .. يبني.. افديه مهجتك
. . . . . . . . . . . . . . . . . . . . . . . . . . .

من ترجعلي متحني بدم وجسمك اموذر
اغسلك بالدمع يبني واقبل فوهة المنحر
و اواسي فاطمه بحسين واقدمك الها وتعذر
لاني ما طحت وياك فدائيه لابو الاكبر

انته أغلى من لب الروح بعيوني تحله
بس أغلى من عدنا حسين يوليدي واغلى
فدوه الحياته .. يبني .. فدوه الحياته
. . . . . . . . . . . . . . . . . . .   .   


خادم اهل البيت عليهم السلام
عمار العيساوي الكربلائي