الشاعر محمد الجماسي

حلوه النومه صارت يالولد يبني
حلوه النومه صارت لاتتعبني
نام والله يحلهه باجر
نام يالكاسر خواطر
يالولد يبني..يالولد يبني
...
عبدالله يانبض الكلب
ادري الدمع ماينشرب
واعصرلك اعيوني
يبني دلول الولد
تعبانه من هز المهد
وانهدلت امتوني
ابوجهك برائة فاطمه
باجر يصبغونه بدمه
ومنك يحرموني
ازغير انته مو مالت عطش
وكون آنه باجر بالنعش
كبلك يودوني

ربيتك ييمه والربه غالي
باجر من اشوفن مهدك الخالي
خوف يسكن بالمشاعر
نام يالكاسر خواطر
...
كل ام اذا تفكد ضنه
تبقه بحزن طول السنه
وتكثر نعاويهه
يحتل بواجيهه الحزن
واتكابل اهدومه وتون
والدمعه تجويهه
عبدالله جا وانه اشبدي
هيمه ورمل مابيهه في
وانكطع جاريهه
ايدي اعله كلبك مايدگ
وعينك ابد ماتنطبگ
جاشنهي تاليهه

من هسه وجوتني بالكلب جمره
من هسه واشوفن ركبتك حمره
وين جا نيتك تسافر
نام يالكاسر خواطر
يالولد يبني
....
ضليت افرك عالخيم
وديتك الراعي العلم
طوفتك الرايه
انطيتك الزينب عمتك
بلكت تبرد لهفتك
يوليدي بحجايه
طلعتك اتشم الهوه
وبنص صحاري نينوه
سمعتك اقرايه
وانته ولا جفنك غمض
چا شنهي رايك يالنبض
من كعدتك هايه

نومت النجوم وانته ما غافي
ترفس بالمهد وامتعب اجتافي
ليش ريجك خشبه صاير
نام يالكاسر خواطر
يالولد يبني
....
اتخايلك من تنذبح
راسك ازغير والرمح
يافوخك ايشلعه
كون الله لاينطي النهر
امعاند كضاهه اوي النحر
وبعينك الدمعه
وحفره تصير بركبتك
وتخرب ملامح ضحكتك
والذبح شيجرعه
وشيالك انظر مشيته
عد الله أشكل ذمته
لو راسك ايوكعه

ممكن كلشي ممكن باجر اتوقع
جسمك بالحوافر يبني يتكطع
ذول ماعدهم ضماير
نام يالكاسر خواطر
يالولد يبني
...
طلعت يعبدالله الشمس
ومانايم أنته من أمس
يالحيرت بالي
امك واخاف أمن الفكد
ياقل اعوذو أمن البعد
لاتمشي يالغالي
لبستك اهدوم الخضر
كمطتك ابرشة عطر
بس كون تصفالي
ساعة رحيلك قاتله
ولمن يذبحك حرمله
يبقه المهد خالي

وانه اوي السبايه ابنص خرابتنه
نلطم عالغوالي ونجري دمعتنه
روح يبني للمكابر
نام يالكاسر خواطر
يالولد يبني

محمد الجماسي

#اللهم_عجل_لوليك_الفرج

3.1K viewsأمِيري حُسينٌ ونِعمَ الأَمير, 22:15

الشاعر محمد الجماسي

ليلة الوداع

باچر بعد ماشوفن اهالیتي
يذبحون الحسين ويحترگ بیتي
ــــــــــــــــــــــــــــــــــــــ
باجر ديرة الطف تتنرس موته
واول واحد الاتلكه تابوته
شبيه  الهادي جدي بمشيته وصوته
يموت وينذبح كل الهوه بريتي
ــــــــــــــــــــــــــــــــــــــ
باجر فاتحه اتصير و عرس مذبوح
واشموعه مدامع والهلاهل نوح
امدلل عمته القاسم ياعزيز الروح
أضل انعاه لحد ماافني عافيتي
ــــــــــــــــــــــــــــــــــــــ
باجر حكهه زينب لوتدك عالراس
باجر ينذبح راعي العلم عباس
واتطيح المحامل والخدر ينداس
وابقه إبلا كفاله وينكسر صيتي
ــــــــــــــــــــــــــــــــــــــ
وعبدالله الطفوله اتموت بعيونه
واكماطه الحلو احمر يصبغونه
تتلولح ركبته وينخطف لونه
باجر بالتراب اتنام حنيتي
ــــــــــــــــــــــــــــــــــــــ
باجر من اشوف الفاجعه الكبره
اخوي احسين يوكع دامي من مهره
تتلكاه حوافر تسحك بصدره
وآنه بالشمر اترجه تاليتي
ــــــــــــــــــــــــــــــــــــــ
باجر من عله التل واصرخ بحزني
اذا بعدك عدل يحسين أدركني
جابولي الهزل ياهو اليركبني
وارقيه تصيح احاه يترجيتي
ــــــــــــــــــــــــــــــــــــــ
باجر حيرة الماعنده أهل احتار
الم اطفال تاهت مدري أطفي النار
يادنيه اشعلامج تطلبيني بثار
جم روح الفجعتي وعين بجيتي


محمد الجماسي

#اللهم_عجل_لوليك_الفرج

2.3K viewsأمِيري حُسينٌ ونِعمَ الأَمير, edited  02:38

الشاعر محمد الجماسي

ودعيني.. من كبل سحگ الحوافر
سامحيني..خويه عنج راح اسافر
لاتجيني..لوصحت هل من مناصر..
لاتجيني..
ــــــــــــــــــــــــــــــــــــــ
ودعيني حانت سفرتي وانطيني كلمه
ومن بعدي خويه اتكفلي بهاي المهمه
عنج اخاف أمن الشمر ماعنده ذمه
اليذبح أمام أمن السهل يذبحله حرمه

خويه اصبري..لو فصل عن جسمي راسي
خويه احذري.. هذا ضالم كلبه قاسي
وابمكانج..ضلي يالمكسوره خاطر
لاتجيني..
ــــــــــــــــــــــــــــــــــــــ
ودعيني وابقي الوحدج هاي النهايه
خلص الليل و قل اعوذو أمن البلايه
باجر تروحن عالهزل كلجن سبايه
وروس الهواشم يمشن اوياجن حمايه

وآنه خدي..باجر اتحركه الترابه
أبقه وحدي..وانتي يوميه بخرابه
خلي بالج.. من توازيج المشاعر..
لاتجيني
ــــــــــــــــــــــــــــــــــــــ
خليني اسولفلج علي وشيجري بيه
باجر عطش باجر ذبح باجر رزيه
باجر السوط إبلا رحم يضرب رقيه
وانتي الركض مو زين الج يالهاشميه

زينب انتي..عمة الساده الاميره
ولو عثرتي..زحمه عالساده وجبيره
وال اميه..ذوله ماعدهم ضماير
لاتجيني
ــــــــــــــــــــــــــــــــــــــ
شميني من صدري وبعد بوسيلي نحري
وسلمي الأمر للباري وانه امسلم امري
لو شفتي ينطبكن سوه صدري اعله ضهري
من الخيمه شوفي ذبحتي خويه واصبري

خويه كلبج..مااريد أكثر اهظمه
يبدي رعبج..من تصير الدنيه ضلمه
ايعينج الله.. والضعن طشار صاير
لاتجيني
ــــــــــــــــــــــــــــــــــــــ
زينب عله التل وكفتج ذبحه جديده
شيكومه الامتعبه الطبر وانتي وحيده
والتشلع اضلوعه شلع غربة حميده
عالناكه مجتوفه وتحن مسلم تريده

واليتامه..باجر  اتلوذ بعباتج
بالسلامه.. الج ادعي والبناتج
وانه بيه..جم فرس ياخويه عاثر..لاتجيني
ــــــــــــــــــــــــــــــــــــــ
عبدالله باجر للخيم مذبوح اجيبه
وبحظني ينخبطن سوه دمه وحليبه
والمهدي تشلع كلبه واتبجي مصيبه
من يسمع بطاري السبي وزينب الغريبه

يالعقيله... في امان الله وحفظه
يالجليله..انتي كلبي وانته نبضه
يالدموعج..باجر ايخظرن مناير..
لاتجيني

محمد الجماسي

#اللهم_عجل_لوليك_الفرج

2.0K viewsأمِيري حُسينٌ ونِعمَ الأَمير, 05:58

الشاعر محمد الجماسي

هاي الليله هاي الليله
احسين انودعك هاي الليله
ــــــــــــــــــــــــــــــــــــــ
الله الحافض الله الساتر
كون ايطول ليل العاشر
نركض نعثر نتعب باجر
والسوط ايطكنه بكل حيله
ــــــــــــــــــــــــــــــــــــــ
هالليله اكبالك كعدتنه
باجر من بعدك ضيعتنه
بالهيمه اتطول ركضتنه
وسجادك منهو ايتجيله
ــــــــــــــــــــــــــــــــــــــ
باجر ذباحك يتدنه
وبالسيف يكص راس الجنه
وشيبك من دمك يتحنه
نسوان احنه وشنسويله
ــــــــــــــــــــــــــــــــــــــ
باجر من اتطيح اخيمنه
وايهوسون براسك يمنه
قصده ايحاول يحرك دمنه
وتوكع زينب يمه ادخيله
ــــــــــــــــــــــــــــــــــــــ
ارقيه ابجالك تلعب هسه
خليهه ابحظنك متونسه
نحرك خل بجفهه اتلمسه
باجر خاف السفره اطويله
ــــــــــــــــــــــــــــــــــــــ
وعبدالله المانامت عينه
ضامي وماكطره امشربينه
حطه بحجرك  ياوالينه
بلكت يغفه أمن اتلوليله
ــــــــــــــــــــــــــــــــــــــ
الله يحرسك يامولانه
ياخيمتنه وكل دنيانه
باجر راسك يمشي ويانه
وزينب عالناكه وتشكيله

محمد الجماسي

#اللهم_عجل_لوليك_الفرج

1.9K viewsأمِيري حُسينٌ ونِعمَ الأَمير, 07:04

HTML Embed Code:
<iframe width="100%" src="https://www.bootg.com/buyppe/web?embed=1" title="Telegram Web" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>