باچر انته اعله الرمح وانه ابسبي
لا علي يمنه ولا جدنه النبي
كلمن يسولف مصابه
وملتقانه بالخرابه
يخويه
ــــــــــــــــــــــــــــــــــــــ
الليله زينب لـمّت ادموع السنين
واجت لللخيمه تدور عالحنين
سد كتاب الله وگــاملهه الحسين
هلا ناده ابّت امير المؤمنين

اشعندج ابهالليل زينب طالعه
وليش من هسه احسچ ضايعه
ياهلي وكل الكرابه
وملتقانه بالخرابه
يخويه
ــــــــــــــــــــــــــــــــــــــ
گعدت وگالتله يالحبّك نجاة
ابالي گام اتدور ذيچ الذكريات
ابيت ابونه وامنه من چنه نبات
وعدنه حوض الكوثر اليسوه الفرات

طاسة المـَي باچر ابسعر النحر
وتشتعل چم خيمه من يطفه الگمر
واليسر ناخذ ثوابه
وملتقانه بالخرابه
يخويه
ــــــــــــــــــــــــــــــــــــــ
عالهزل باچر وانادي ياهلي
الحگولي النار حرگت محملي
احسين هسه انته تگلي اتدللي
وباچر اچم مره اصيحن ياعلي

من يعثرني الزمن يحسيني
اسم الله من فوگ الرمح حاچيني
من يذبحون المهابه
وملتقانه بالخرابه
يخويه
ــــــــــــــــــــــــــــــــــــــ
اشلون اودعك گلي ياستر النساء
كون المّ احساس كل الانبياء
وكون اجمع شكو قرآن ودعاء
وابچي وادموعي تغرّگ كربلاء

هيچ اودعك كون يبن امي وابوي
وخلني اشبع شوف من وجهك يخوي
والصبح گرّب عذابه
وملتقانه بالخرابه
يخويه
ــــــــــــــــــــــــــــــــــــــ
يختي اريد اوصيچ گاللهه اعله شيَّ
لو اظلّن بالشمس سويلي فَيّ
احسين گالتله افييلك بَديّ
انته من تموت تبقه ابعيني حَيّ

عميه كون اعيوني من گبل الصبح
ولا اشوفن رحمة الله اعله الرمح
واختك ابين العصابه
وملتقانه بالخرابه
يخويه
ــــــــــــــــــــــــــــــــــــــ
راح افييلك بديّه وبالعباه
واقره يمك طور ماواحد قراه
الزهره اصيحن يُمّه محّد شيّعاه
مات اخوي وماتت الخوه وراه

والحوافر وي صدره امعانده
رايحه اعله احسين يمه وراده
وسلّبو حته ثيابه
وملتقانه بالخرابه
يخويه

محمد الجماسي

#اللهم_عجل_لوليك_الفرج

خدر الفواطم
لنشر القصائد الحسينية (@Alfoatm3)

#اللهم_عجل_لوليك_الفرج

يابويه لا تـتنـطري الرساله
ارجـع الـچ يافاطمه محاله
مايرجع الراح يروح .. من هسه اگـلج مذبوح
وارجـع الـچ محاله ..

………………………

يابويه باچر لو رحت  وشفتي مكاني خالي
بـالبـاب لا تـتـنـطري  يرجـــع الـچ مـرسالي
يابويه اريـد احـچي الچ  هـم بدليلي وبالي
يافاطمه بطـف كربله  يذبحوها كلـها اگبالي

رايد الـچ اشكي يبـويه  هـمي
طـف كربله باچر يفيض بدمي
وبگـلبي يفـتحلي اجروح .. من هسه اگـلج مذبوح
وارجع الچ محاله ..
………………………

يابويـه ما ارجع  بعد  كلش عظيم امصابي
باچر الوج من العـطش  واتلوه فوگ اترابي
ودلالي ينطر بالسهم  وكلش غميج اصوابي
عريان يذبحني الشمر يسلبون حتى اثيابي

يابويه مـو بس تنگـطع رگـبـتي
الخيل بحوافرها تطشها جـثـتي
من تطـلـع لربـهـا الروح .. من هسه اگـلج مذبوح
وارجع الچ محاله ..
………………………

وعباس مايرجع بعد  ومـايرد حـتى الاكبر
عـبـاس باچـر عالـنـهـر مـن الحـرم يتـعـذر
ماي الخجل وي هامته  فوگ الترب يطشر
والاكـبر بسيـف العـدو باچر أجـمـعـه موذر

باچـر علي وعباسي عالوطيه
ابحضني اجمـعـهم وذر سويه
ودمعي عله خدي مسفوح .. من هسه اگـلج مذبوح
وارجع الچ محاله ..
………………………
وعبد الله هذا من العـطش  بلا رحمه ايذبحونه
نحـره التـرف هـذا بسـهم يـا فاطـمه يگـطـعـونه
وصـدره علـه غـبـرة نيـنوى  يافاطمه يسحگـونه
وراسـه على راس الرمـح  يهـوسـون ويرفـعـونه

وامه الربـاب ويـه الحـرم سبيه
نظره عله ابنها ونظره نوبه اليه
ليا راس تمـشي وتـروح .. من هسه اگـلج مذبوح
وارجع الچ محاله ..
…………
وهـنــاك هـــاي بكـربـلـه يـافـاطـمـه رقــيه
تشبع ركـض فوگ الجمر بالطف تدور عليه
ومـا نـلـتـقي الا بسبـي  بالشام انـي وهـيه
يجيبولها راسي بطشت  وتالي تموت عليه

بالطشت راسي تشوفه بالخرابه
واخـر سوالـفـها اضربـوني بـابه
تموت عله الوجهي المجروح .. من هسه اگـلج مذبوح
وارجع الچ محاله ..
………………………

وزينب يبويه من ترد  عگب السبي اتـيـهـيـها
متـغـيره حـيل من التـعب  عمـتچ ولا تعرفيها
مـو هـاي زينب بـت علي  كـبرانه اتـشـوفـيـها
ركـضيلـها وشبگـيها الي  ولا تـلچـمـين ايديـها

لحـبـال بـيـديـهـا يضـل اثــرهـا
بكل حيله يا بويه الشمر يجرها
عله فراگي زيدن بالنوح .. من هسه اگـلج مذبوح
وارجع الچ محاله ..

الشاعر عقيل الحسناوي..

خدر الفواطم
لنشر القصائد الحسينية (@Alfoatm3)

#اللهم_عجل_لوليك_الفرج

اجيتك يابو كلب الصار يفحط من يشوف اخته
عـود اقـنع واكـولن طـاح شيقنع كلبي هاذه انته
جزيت العـثرني اعـليـك والـطـولك تـره عـزته
مو مـالـت بـعد واركـض عالتـل جـدمي تعبته

وره اختك
شجاهه الخيل شو تركض وره اختك
سمعتك
عـوفـن زيـنـب اتكـلـهن سـمـعـتك

هوه اشضال بيك وتحجي للخيل
هاذا انه وتكلـهن سحـكن وحيل
عـفه كلب ويشـيل اجـروح غيره
اذا جـنـك يخلصن عود بالليل ؟؟
=========================

اعدال الصعدن ابكلبك صعت انه اعله ذاك التل
شني ومن تالي ما ارتاح من الوادم اتعلعل
شحچيلك بعد يحسين مو زينه اذا تسئل
جبير الطف سلب حيلي تهت عنك واريد اندل

صحتلك
الحك الزينب وتاهت صحتلك
كلتلك
انحنيت وضهري محتاجك كلتلك

كوه اعليك مدري اعليه اعبرك
حرت ابجيك لو اشكي اعله نحرك
فوك اخيام زينب طاحت اخيام
وانته الخيل صعدت فوك صدرك

=========================
يبس ريجي وفحط عمري شجاهه الوادم اعليه
حكي ومن اطيحن چا مره اجبيره اتعرف بيه
يبو الاكبر كثر شيبي وزينب بيه ما هيه
علويه قبل نحرك وهسه ماني علويه

يالحسين
النار اخذت عبات اختك يالحسين
حرت وين
ارووح وكلهه بس غربه حرت وين

بعد لتكول زينب خويه زينه
عكبك والخدر راح امن ادينه
المن بيك مدري اعله الثمانين
اكض ارقيه راحتلي سكينه

=========================
امتانيتك واكول حسين هسه ايكوم يفزعلي
ما يقبل عليه الخيل يشوف ابعينه تركضلي
بالما بيهن المحبس ليش احسين تندهلي
اعرف اشبيك من صاحت ام ابنك يبعد اهلي

شبعنه
لطم من طاحت امتونك شبعنه
وركضنه
تهنه اوين ما نعرف ركضنه

خواتك فوك زينب خويه طلعن
واذا تسئل اكول اركاض شبعن
خوات الما گدر وايعين روحه
من الخيمه حدك حچي سمعن

=========================

من حيلي تعب وانته شفتك ما كمتلي ابساع
لهنانه وكلت يم عون خدرج ما بقالج ضاع
هاي التكتل ابروحي اخوي انه واريد اوداع
ما ترهم اودع اشلون صاير انته كبر الكاع


عالرماح
اودعك من ضهر هزله عالرماح
الخدراح
يطب ابشام والغربه الخدر راح

ولا حلوه يكلبي ايعوف كلبك
بس اعذرني راح ابهايه اتعبك
زينب طولهه ابديوان ينشاف
واهل شام بيه من تعذبك

=========================
سجاد ابراهيم الكعبي

خدر الفواطم
لنشر القصائد الحسينية (@Alfoatm3)

#اللهم_عجل_لوليك_الفرج

مولاتي ام البنين روحي فداها

من شفتك اتعدّ للسفر
ما بينت گلبي انكسر
اتبسم ابوجهك چنت
وابداخلي ميته قهر
......................
أدنگ عيني من تتلاگه بعيونك*
طلع بالگوه صوتي وگتلك اشلونك*

واذا تغفل اشم هدمك*
صدگ رايح يبعد امك*
چنت اتمنى اضل يمك*

شبوسن بيك وانه اعرف يگطعونك*
تجيب الماي بس اعرف يبدّونك*

يمك واحس ابغربتك
وابعينك ارسم نبلتك
واتخيلك تنزف دمه
والشمس تحرگ وجنتك
....................
اروح العالم الطف وظهر عاشر*
اشوغ وارسمك فوگ المهر حاير*

واشوف اچفوفك واشهگ*
تحير وگصتك تعرگ*
وگفت وجسمك امشگگ*

تضل لو ترجع الاختك وذر صاير*
وسهم من صدرك الظهرك گبل عابر*


خجلان حاير بالدرب
من جودك اتبده الشرب
للخيمه ترجع لو تضل
والسكنه يا صورة تطب
.................
گلب الام يحس يا بعد گلب امك*
تطيح وكل نفس بيه تشرگ ابدمك*

سهم يذبح نظر عينك*
طحت كلهم امحوطينك*
عله الوگفه منو ايعينك*

انترست اسهام بس ما تعرف اليمك*
ملح ياكل اجروحك يبني وايلچمك*

يا بزري حيلي ينهدم
امن اتخيلك تشبع لچم
وما تگدر اترد الهلك
جرحك يضل ما يلتئم
......................
ألهي ابروحي بلكت هالحلم انسه*
بدويه واحس بوليدي من هسه*

ما متعوده عالفرگه*
تزيد احرورتي الشبگه*
وداعك يالگمر خنگه*

اسد اعيوني يرجعلي الحلم نفسه*
واصّبر روحي اگولن ما رحل لسه*

واعيوني تحبس بالبچي
بيه رجفه صوتي بالحچي
بالگوه اگوم امن الحزن
عالحايط امشي وانتچي
...................
وداعآ باچر ايسافر ضعن اهلي*
يعيني امن البچي ما اضنچ اتملي*

ضعنهم ينحر البيده*
وانوح ابسكته وابهيده*
عمر من عگبه ما اريده*

يكسرة خاطري هنا ابقي لو گلي*
يوحشة داري لوما ولدي ترجعلي*

مودعين بالله للذبح
تلچمون لو رحتو الجرح
آخر وداع السادتي
يرشون بجروحي ملح


علاء المياحي
الفاتحه لروح والدي

خدر الفواطم
لنشر القصائد الحسينية (@Alfoatm3)

#اللهم_عجل_لوليك_الفرج

#تراث موشح

الخيل يهل الخيل يا فرسانها
الحرب ساعه اوتشب نيرانهـا
ــــــــــــــــــــــــــــــــــــــ
الخيل يهل الخيل يا مردم الخيل
الحيل المن ينضخر منكم الحيل
هله هله تصيح بت حامي الدخيل
وعينها على الوجن كت جروانهـا
ــــــــــــــــــــــــــــــــــــــ
يا انصار حسين يا روس الحزم
بيكم وبسيوفكم يگوه العزم
بت علي ترضون ما بين الزلم
توكف وليهـا تصد عدوانها
ــــــــــــــــــــــــــــــــــــــ
يا انصار حسين يسباع الرجال
يا ليوث الحرب يا موت الأبطال
هاي زينب بت علي خير الأعمال
جاعده وتتناكم بصیوانها
ــــــــــــــــــــــــــــــــــــــ
يا أنصار حسين هاي أخت الحسين
زينب الما حصلت غير الونين
هاي زينب بت أمير المؤمنين
تحجي وياكم غدت بالسانها
ــــــــــــــــــــــــــــــــــــــ
يا أنصار حسين بت حيدر تگول
عالخيم خيل العده تحوم وتجول
والله يكرام العذر ماهو امقبول
منكم ولا اگول من خوانها
ــــــــــــــــــــــــــــــــــــــ
اشلون عن خدر الحرم تتعذرون
وغدت من عين الحرم تنبع عيون
لا وحك الله عليكم مايهون
الحرم تنضام يا وليانها
ــــــــــــــــــــــــــــــــــــــ
يا أنصار حسين يا ليوث الحرب
زين يصحاب الوفه عدكم كلب
تخلون الحرم بديار الغرب
خدّر وبعدت عليها اوطانها
ــــــــــــــــــــــــــــــــــــــ
لن حبيب يصيح ويهز صارمه
لا على بختج يبت حامي الحمه
اليوم دون الخدر نسبح بالدمه
ليوم اكر عيوج بميدانها
ــــــــــــــــــــــــــــــــــــــ
لا تخافين أيغدي عنج الخوف
والأنصار امجرّده بيض السيوف
اليوم يم الخدر خل عينج تشـوف
نسلب ارواح العده من ابدانها

الشاعر المرحوم
الحاج مُعين السباك

(180)
#اللهم_عجل_لوليك_الفرج

خدر الفواطم
لنشر القصائد الحسينية (@Alfoatm3)

#اللهم_عجل_لوليك_الفرج