رد ظهره منكسر ... من حفرت الكبر
ودع علي ... بنت النبي  ... بين اللحد وترابه
.......
كوه يمشي اعله الجدم ... رد علي منهه
اعليهه يسجب دمعته ... من مشه عنهه
حار بامره  المرتضى ... من سمع ونهه
رد عليهه للكبر .... راد يحضنهه

اتذكر بيده دافنهه ... بالترابه
مدد عالكبر طوله ...  يا عاذبه
وزع دمعة اعيونه ... في ثوابه
قصة فاطمه اخذت ... كل شبابه

شيب علي قهر .... رد منحني الظهر
لم الحسن ... شيد وطن .... دمعت حزن سجابه

.......
تخوصر اكبال الكبر ... منكسر ظهره
مثل المضيع وطن ... حاير أبامره
صاح بدموعه التصب ... كومي يازهره
علي بعدج مو علي .... سنينه مطشره

كومي وعايني الحالي ... يالحبيبه
جرحي ابفركتج نازف ... يا طبيبه
هاذي صيحته الجانت ... بالمصيبه
حيدر ذبلت ارسومه ... من نحيبه

كالساعه يلتفت .... يحجي منو ادفنت
وسط الكبر ... دافن عمر ... اغله واعز احبابه 
.......

جرحه اكبر كل جرح .... سولفت ناسه
من دفن ام الحسن ... شيب اكل راسه
كُبر ما جنه علي .... حزنه هد ساسه
كَوه صار امن البجي ... ياخذ انفاسه

ما جنه القلع خيبر .... يمشي كَوه
واحد يسأل الثاني .... اعليه منوه
كلشي اتغير بحيدر ... حتى هوه
غابت ضحكته الجانت ... عنده حلوه

متعوبه مشيته .... مذبوحه ضحكته
دافن ورد ... وسط اللحد ... مكتوبه اله بكتابه

......
البيده دافن ضحكته ... تخلص اسنينه
الفرحه متمر خاطره ... ولا تمر  عينه
هيج كظاهه علي ... بحزنه واونينه
ناره تسعر بالكلب ... شاهد أحسينه

من يوم المشت عنه ... ام جهاله
ولون السهر ظل ياخذ ....من خياله
ويه ام الحسن ودع ... ما حلاله
ما واحد علي يلومه ... ايبجي حاله

كلشي ابعلي ذبل .... ومتاني للّاجل
الفارك شمس ... بيته يحس .. ما واحد ايدك بابه
......
سلوته بالمكبره ... اليفكد ام بيته
تخلص ايامه قهر ... وتروح عافيته
الزهره جانت عد علي ... هيه غاليته
حقه حيدر يختنك ... كل هوه بريته

اغله امن النفس عنده ... هي جانت
بموتت فاطمه الزهره .... روحه ماتت
ظلمت دنيته بعينه ... وحشه صارت
كل أحلامه وافراحه ... اوياهه راحت

من فارك ام حسن ... بالمكبره سكن
ليل وصبح ... نازف جرح ... حيدر غميج اصوابه

..........
كلمات
موسى الخادم

شور

اه ييمه ...اه ييمه ... اه ييمه
.....
يمه لا تمشين عني ... ابقى مثل امضيعه ايه
باجر احتاجج ييمه ... بلمت أطفال وسبايه

لمن اظل ابلايه حماي
وبسياطهم تتورم اكفاي
وحدي اظلن محد اوياي
وياناظري لا وين اديره

يمه العين فتحي وعايني اعليه
وحشه ابدونج اكظي سنيني مسبيه

من هسه صرت انه  احس غريبه
مو هينه كلش توجع المصيبه
افراكج ييمه يذبح امنياتي
وين انطي بعدج وجهي يالحبيبه


.....

يمه ما شبعانه منج .. شوف عيني يالحنينه
كلمة اليمه تلجمه ... الماتت امه الله يعينه

يايمه لتخليني للنوح
اوياج روحي رايده اتروح
صرت اشوف حسين مذبوح
من كبل عاشر من محرم

صرت انظر اخيام كبالي محتركه
وجثة ابو اليمه ابخيل منسحكه

ابكثره الحوافر ساحكه اعله صدره
ماينعرف صاير وذر يزهره
والرمح نابت بالكلب اشوفه
وسكنه ورقيه طاحن اعله نحره
..........

ازغيره مو مالت مكابر ... عمرج سنينه كصيره
وردة الله انتي مكانج .... جنة الله يالأميره

المنج حرمني ريته بالموت
ماخله عندي فرحه لا صوت
الأمه يمه هذا مبخوت
الله يساعد كل يتيمه

اودعج من زغر ما جانت ابالي
بعدج كل حزن كل نوح يحلالي

بعدج يزهره حالي يقهر حالي
حزني اعله طولي يمشي ويه اخيالي
كبل السبي مسبيه روحي اني
وجفوفي مشدوده بحبل جتالي

....
لا تموتين اعله بختج ... داخله ابدمعي الاسيله
من اطيح ابحيرة الطف .... ياهو اروحله اشتكيله

من اوكف اعله التل وحيده
حيلج اوياي اني اريده
حسين من ينحز وريده
ياهو اليصبرني ييمه

ما يبقالي حيل ابكطعت المنحر
اظل كلي اعله طولي ابمشيتي اتعثر

امن اركضله ياهو يكلي يمه تاني
خل امشي وياج العشك زماني
بذيج الفجيعه ياهو يعتنيني
وكل البقالي انحور من خواني
......
الهوه الما بيه عطرج ... خنكه ما اكدر اشمه
ظلي يمي سنيني وحشه ... وانه احب كلمة ييمه

فركاج يذبح منحري بسيف
مثل الرضيع العطشه الصيف
كربله باجر تذبح الضيف
وحبل السبي يموت رقيه

وبركبة عليل حسين انظرهه
ذيج الجامعه اليصعب اوخرهه

وكل الاحبهم عالترب أشاهد
مثل الذبايح واحد اعله واحد
وللشام اروح اميسره اويه غربه
ما واحد اليسال علي ويناشد

.......
كلمات
موسى الخادم

جريمةًُ لا تُغتَفرْ  .... تَبكيها عينُ المُنتظر

     .......
يا جريمه... المنهه تجري ... عيون مهدينه دمه
امصيبت الطف ... لو مصيبت ... أمه أمه فاطمه

انه اعتقادي يجري دمه اعله اثنين
مصيبت كسر ظلع الزجيه واحسين
يوميه عَصرت فاطمه اتشوف العين
ويوميه مقتل ينعرضله مرتين

جريمةًُ لا تُغتَفرْ  .... الموتُ فيها قد حَضر


......
ايساعد الله ... كَلبه كلبه ... أشكثر شايل هضم
ماكو مثله ... حزن شايل ... حزنه واصل للعظم

ليل ونهار المهدي عايش بمصاب
ما راحه شاف ابدنيته وصار اتراب
يبجي على الصار وجره للأحباب
ويوميه بيده للحزن فاتح باب

جريمةًُ لا تُغتَفرْ ... مَنّ أنكرَ الظلعِ كَفر

.......

كبر صبره ... كد سنينه ... يا كبرهه محنته
مدري يبجي ... الكسر امه ... مدري يبجي العمته

ألمثله ميت ما يعيش ابهل حال
حمله ثكيل وما تشيله الأجبال
وبعينه ظل امن الدمع بس اوشال
وعمر انتظاره للفرج بالهم طال

جريمةًُ لا تُغتَفرْ .... قد أورَثت حُزنَ القَدر

.......

ياهو عايش ... مثله غربه ... وشايل ابكَده محن
حقه يذبل .. غصن عوده .. نوحه دايم لام حسن

شاب ابعمر شاب ابسبب حركَ الدار
واكبر جروح ابداخله امن البسمار
وامتاني يايوم الفرج يوم الثار
بعيونه ينظر كل وكت ذاك الصار

جريمةًُ لا تُغتَفرْ .... للظالمينَ لا مَفر
.........
✍️ كلمات موسى الخادم

شيعتهه ... للمكَابر ... شيعتهه
وادفنتهه ... وانه حاير ... وادفنتهه
وظل سؤال ابداخلي
الزهره ماتت لو علي
.....
؛١
من بعد ما غسلتهه ابدمع الاعيون
بين اديه انه شلتهه مو عالمتون
غاليه عندي الزجيه وناسي يدرون
جنت اخاف اعليهه من الهوه البلكون

اغله مني ... عندي هيه ... اغله مني
فاركَتني ... للمنيه ... فاركَتني
يا عمر يحله الي
الزهره ماتت لو علي
......
؛؛٢
آنه قالع باب خيبر ذاكه الاثكَيل
وحيل ما ظلالي راح اوياهه كل حيل
من شفت كسر الظلع والدم الايسيل
شاب راسي الجان يشبه ظلمة الليل

كلشي بيه ... صاير ابيض ... كلشي بيه
عالزجيه ... كلي اختض ... عالزجيه
حقي بالهم مبتلي
الزهره ماتت لو علي
.....
؛؛؛٣
من وصلت المكَبره صرت انحب اهواي
أعرفت أم بيتي مترد بيتي وياي
حرت أرجع لو أتاني فرحة اصباي
وصرت بالدمعات يمهه رايح وجاي

عالي نوحي  .. ودعتهه ..  عالي نوحي
يمهه روحي ... ما جبتهه ... يمهه روحي
نوحي يمهه معتلي
الزهره ماتت لو علي
.....
؛؛؛؛٤
بيه ما بيه احفرت كَبر ام الحسين
مثل واحد ميت ويدفنله ميتين
اوموش ماي اللحد رشيته ابدمع عين
وخفت لا تنلجم وسعته اللحد زين

جاري  دمه ... شكَد ضلعهه ... جاري دمه
خاف الجمه ... وي رفعهه ... خاف الجمه
وتنوجع روحي وهلي
الزهره ماتت لو علي
......
؛؛؛؛؛٥
أشد موقف مر عليه وأبد ما راح
من عليهه بجفي اهيل الترب بصياح
اتذكرت من فوكَهه باب الخشب طاح
ساعه ظليت انه واكَف لازم اصفاح

هذا حالي ..  من بعدهه ... هذا حالي
داري خالي ... روحي عدهه ... داري خالي
والحزن واضح جلي
الزهره ماتت لو علي
................؛؛؛؛؛...................
✍️ كلمات موسى الخادم

الدافن عزيزت روحه ... يادوه اليشفي اجروحه
الله يعين الفاكَد   .... مثلي امه يكثر نوحه
......
؛١

الدافن بديه أمه يعرف اشجاي اسولف
عمره يصير ابلا طعم ما داعي احلف
لا ليله ليل ولا نهاره يصير يعرف
طاري امه من ينجاب يمه كله يرجف

كَلبه يلزمه ابسرعه ... ومن عينه ينزل دمعه
التنذكر امه اكَباله .... مايدري يبجي ينعه

......
؛؛٢

كلمة اليمه اشكَد أمل بيهه ومحنه
الله يعينه الفاركَ امه ومشت عنه
تخلص حياته ابلا فرح ونه اعله ونه
وكلشي يموت ابداخله وايروح منه 

كل حلم جان ايتاني ...  ويصير واحد ثاني
الما يشم شيلت امه ... كل عمره يبقى ايعاني
.......
؛؛؛٣

ألفاكَد امه اتصير اله المكَبره حلوه
كل ليله يتعناهه شايل نعي يسوه
ما يهوه كل عيشه بعدهه موته يهوه
بلوه يناس الميته امه يعيش بلوه

ما تبقه عنده الفرحه ... بس حزن يلجم جرحه
يشطب ايام اسنينه ... وسيف الفراكَ ايذبحه
.....
؛؛؛؛٤

ألبيت اذا من عنده شالت أم حنينه
وحشه يصير وظلمته اتغطي المدينه
معذور كلمن ماتت امه يبجي عينه
أيشيع وراهه ايام عمره وكل سنينه

الشيع بديه غاليته .... اتروح ابعجل عافيته
ويصير ذابل عوده .... والوحده تترس بيته

......
؛؛؛؛؛٥

احسين انه الجاي اسولف يالحبايب
من ماتت امي فاطمه عشت المصايب
ثوب اليتم ما فاركَاني وكَلبي ذايب
وكل حيل ما ظلي بعدهه وصرت شايب

من عندي راحت امي .... وبس القهر ظل يمي
كل ليله ارش ادموعي ... ابحجرتهه انه وهمي 

....؛؛؛؛؛؛؛.........
✍️ كلمات موسى الخادم

اتمنيت موتتنه سوه ...
مو واحد ايروح ويضل واحد
جنتي إلي ماي وهوه  ...
هسه اني ميت بس جسد كاعد
.........
من اول اليوم الدخلتي البيتي
ردت الي يا فاطمه عافيتي
عفتيني ليش الوحدي اويه احزاني
ياهوه الكل لحضه يطب الريتي

ضاع الهوه ... بعدج يمحبوبه
ضاع الهوه ... والريه مصيوبه
ضاع الهوه ... وانفاسي محسوبه

مخنوكَ بعدج يم حسن
وبحالي يعلم ربي اوشاهد

.....
جنت ادعي بسمج فاطمه الحنينه
واحد على الثاني يقسم اسنينه
موتته وحده جانت انه ابالي
ماكو اليعيش وثاني تغمض عينه


ردي علي ... يافاطمت حيلي
ردي علي ... يا صبحي ياليلي
ردي علي ... مو انتي كلتيلي

نعشين نطلع مو نعش
وروحي ويه روحج سوه تتشاهد


.....
يازهره ايام العمر حاجيني
ينطيج كَلبج وحدي اتخليني
احلامي طشرتيهه كلهه ابموتج
فتحيلي عينج يا ملاذ اسنيني

يافاطمه ...  اشلون اصبر ابدونج
يافاطمه ... فتحيلي اعيونج
يافاطمه ... ايتامي يردونج

زينب والحسين وحسن
عالخد دمعهم عيني اتشاهد
......
اتذكرين كعدتنه سوه ياروحي
جنت انسه بيهه اهمومي وانسه اجروحي
يا ذنب سويته وتركتي ادياري
عفتنيي ليش وعالي بعدج نوحي

ياسلوتي .... روحي اشيسليهه
ياسلوتي ....بعدج اهم بيهه
ياسلوتي .... ناري شيطفيهه

مهدود حيلي ابموتتج
بس نفس بعدج نازل وصاعد

......
يم عشرت الحلوه اشيصبر حالي
والدار من نورج يصبّح خالي
كلشي ابحياتي حاسب انه احسابه
بس مال ادفنج بيدي موش ابالي

كلشي انتهى ...بعدج يفاطمتي
كلشي انتهى ... من بالكَبر نمتي
كلشي انتهى ... مت انه من متي

من نزليتج للكَبر
كَالتلي روحي اوياك لا مارد
......
بعدج علي مو عمره موته ايتاني
شله ابحياته المات نصفه الثاني
ما دافنج والشيب اكل كل راسي
اتصدكَين ما اعرف صدك هذا اني

ماجن علي .... شايب صرت شُوفي
ماجن علي .... موتج اخذ شَوفي 
ماجن علي .... عوفي الكَبر عوفي

عايني الحالي يم حسن
كبرني موتج والفكر شارد
............
✍️ كلمات موسى الخادم

البجفوفه قالع خيبر .... ما يصعب اعليه عسكر
لومه الوصيه كَيدت جفينه
جا ماكو واحد يوصل ام حسينه
.......
؛١
مشهور حيدر بالمعارك أسمه
اليدناله يرجع على طوله امدمه
المن سيفه فر ربعه تحسبه زلمه
جا غير حيدر هوه ياهو ايلزمه

ما تنجرع سطراته .... الاول علي بصولاته
ما واحد ايردهه سَطرت ايمينه
لومه الوصيه كَيدت جفينه

......
؛؛٢
تتراجف اكَباله الزلم بالحومه
والشاهد ابن العاص ذب اهدومه
كل صوله يدخلهه علي محسومه
اليدخل نزال اوياه آخر يومه

حيدر جبيره اصروحه .... اليدناله بايع روحه
كبل المنيه ايشوف موته بعينه
لومه الوصيه كَيدت جفينه
......
؛؛؛٣
فارس عظيم اتهابه كل عدوانه
يا ويلهم لو سرفناهه اردانه
ماغيره بالكلفات يصرخ انه
وبركَاب خصمه ما خطه نيشانه

ضرباته ميثنيهه .... كلهه تسولف بيهه
متعجبه بيهه الدنيه كَبل اسنينه
لومه الوصيه كَيدت جفينه
.......
؛؛؛؛٤
حيدر مثل بركان تلهب ناره
مايسكت اعله العيله ياخذ ثاره
لومه الوصيه محد ايطب داره 
خيبر يعيده ابيمنته وبتاره

لو صاح حيدر اني ... لا أول ولا ثاني
يتجره يكسر ظلع ام حسينه
لومه الوصيه كَيدت جفينه
.......
؛؛؛؛؛٥
ينعد بلف فارس علي بصولاته
أتلثميه موش بعينه وي سطراته
لو ما نطه احجايته الصاحب ذاته
جا كَلب كون الله علي بحملاته

لو ما نطاهه اوعوده ... محد يصل لحدوده
زلمه كلف حيدر علي والينه
لومه الوصيه كَيدت جفينه
......
✍️ كلمات موسى الخادم

شمعت البيت ... طفت طفت طفت
وانه العيون ... عمت عمت عمت
الفاكد امه كل حياته ...  قهر
موحشه سنينه المماته .. قهر ... هذا حالي
......
الماتت امه ميت بمعنى الشعور
ظلمه تصبح دنيته ومابيهه نور
عمره يخلص نوح ما بين الكبور
بين ماي وشمعه ودموع وبخور

فكد الاعزاز ... صعب صعب صعب
يترك العين ... تصب تصب تصب
دمعه عالخد يبقى جاري ... عمر
المثلي فاكد بيه داري ... عمر

......
ابلاية ام الدار مهجورة تصير
لا تشوف الفرح لا يدخلها خير
الكعده وي امي اشلاحهه اعله الحصير
تسوه هذا الكون وافلاكه التدير

امي ياناس ... شمس شمس شمس
ضاوية الكون ... احس احس احس
كلشي ليل اصبح بعدهه ... سهر
وانه واحد من ولدهه ... سهر
......
لا تلومه الماتت امه يعيش نوح
جرح فكد الام اشد كل الجروح
الراحت امه كلشي وياهه يروح
بس جسد عايش يضل ابلايه روح

بس نفس بي ... يضل يضل يضل
منتظر يوم ...  أجل . أجل . أجل
عايش الموت بعذابه ... جمر
الدافن امه بالترابه ... جمر

.......
البيده دافن امه يعرف شنهو اكول
يحس بية  من اسولف عالبتول
حسين انه ابن علي وجدي الرسول
موتت امي اذتني اشد من الخيول

موتت امي  .... اشد اشد اشد
من سحكتي ... بعد بعد بعد
اضلوعي كلهن يم ضلعهه ... كسر
ودمعي نازل وي دمعهه ... كسر
......
الامه عدله خل يضل يرعاها دوم
أيحبهه من يكعد ايحبها من يكوم
هالنصيحه مني اخذهه يالخدوم
بس حنان امك ينسيك الهموم

منهه هيهات ... يصح يصح يصح
يمها الانهار ... تشح تشح تشح
يا حلات الكعده يمها ... تسر
البين اديه امه يضمها ... تسر

.......
رضا الباري من رضاء الوالدين
الامه ما ترضى عليه ما عنده دين
عيش لمك موت لمك يالحنين
الجنه تحت اقدامهه كال الامين

رحمت الله .. الك الك الك
هي امك ... هلك هلك هلك
عبد صير الهه بحياتك ... ذكر
بيها مقبوله صلاتك ... ذكر
.......
الكلمات
موسى الخادم

لِكُل فعل ردت فعل
هذا السؤال الينسئل
حيدر علي يم فاطمه
اشلون وابنهه ينقتل
/////////////////////////////////
[١
هالسؤال ابكل ليالي فاطميه ينذكر
علي حاضر جان يمهه اشلون فاطم تنعصر
ليش ما دافع عليهه وقِبل خدهه ينسطر
علي الرد الشمس بيده ليش ما رد الكفر

أشلون ما رد الصفع
الفاطمه الزهره ودفع
والعلى الحايط تنعصر
معقوله شاف وما فزع

//////////////////////////////////////////
[[٢
لليدور عالإجابه واضحه اوضوح الشمس
علي متكَـيد ابوصيت النبي الوصاهه همس
علي الرد اجيوش جفه وقلع خيبر بالأمس   
لوما متوصي ابوصيه ما كَـرب داره الرجس

يدرون حيدر بالصدكَـ
الدنيه يحركَـهه حركَـ
معقوله فاطم تنضرب 
وعركَـ الغضب بي ما يطكَـ

//////////////////////////////////////////////
[[[٣
قصة الباب وحركَـته بكل ليالي نستمع
من اليوالي السقيفه وراضي بفعال الربع
اشلون حيدر علي ساكت بقى من كسرو ظلع
واليسولفهه يشكك بالكسر ما مقتنع

ايحاول يبرر ما جره
وينفي الضلع والكاسره
فاطمه بعمر اثمنطعش
سكنت اشلون المكَـبره

//////////////////////////////////////////////
[[[[٤
مو علي الينوكل حقه وساكت يضل مو علي
يكَـلب الدنيا ابكبرهه الخاطر الزهره وعلي
يخطف الأرواح سيفه وثاره ميعوف الولي  
بس امر محتوم يصبر والأمر من العلي

لوما الوصيه ابركَـبته
جا دفن جيش ابعتبته
يا أخو خيته اليقترب
من علي وسيفه بيمنته

///////////////////////////////////////////////
[[[[[٥
كلنه نعرف علي حيدر غيره وايمان وعزم 
بالمعارك اسمه اول يجي مو آخر أسم 
سيد الحملات كلهه ترهبه أشباه الزلم
اليصدكَـ القصه هايه كلشي اضن ما يفتهم

فارس عظيم ابا الحسن
بعزمه المعارك سولفن
وابلا عقل من يعتقد
طخ راسه لاصحاب الفتن

++++++++++++++++++++++++++++
✍️🏻 كلمات #موسى_الخادم ٢٠٢٥

لكل فعل ردت فعل

أُمّاه كَلِميني /// أنا حَبيبُكِ الحُسين
//////////////١
الدنيه من دونج طعم ما بيهه يمه
راح اخلصهه بجي وهضمه اعله هضمه
يالمشيتي وعفتي هاي اسنيني ضلمه
بعد ياهو اشكيله همي وياهو اكلمه

أُمّاه كَلِميني /// قَلبي لكِ دامٍ حَزين 
أُمّاه كَلِميني /// أنا حَبيبُكِ الحُسين

/////////////////٢
يمه فتحي العين اليه وهودي نوحي
جرح فكَـدج عندي اشد من كل جروحي
اصغير عمري وفاركَـيتج بعد روحي
بيدي لو صح جان كَـتلج لا تروحي

أُمّاه كَلِميني /// لا ترحلي لا ترحلين
أُمّاه كَلِميني /// أنا حَبيبُكِ الحُسين

///////////////////٣
لا تعوفيني اعله بختج يالزجيه
عمري بعدج يخلص ابدمعه جريه
كلشي بيه ايريدج اتضلين اليه 
روحي متعوده اعله شوفج مو بديه

أُمّاه كَلِميني /// يبّقى نِداءُ الفَاقِدين
أُمّاه كَلِميني /// أنا حَبيبُكِ الحُسين

///////////////٤
لليتم عفتيني يا زهرة زماني  
وشوف منج يمه ما شبعان أني
اشلون اصبر العين يالفكَـدج عماني  
ياهو اليعوض مكانج يا حناني

أُمّاه كَلِميني /// لِفقّدكِ يعلو الأنين
أُمّاه كَلِميني /// أنا حَبيبُكِ الحُسين

///////////////////٥
التموت امه بعد شله بحياته
سنينه يكَـضيهه سهر وي نايباته
كلشي منه ما يضل بس ذكرياته
الماتت امه ايموت كل يوم بصلاته

أُمّاه كَلِميني /// يا قِبلةً للعاشقين
أُمّاه كَلِميني /// أنا حَبيبُكِ الحُسين

////////////////٦
حسينج انه ابعازتج يا يمه باجر
من اضل الوحّدي من غير ناصر 
رايد اتحضريني بدموع النواضر
اتلملمين اضلوعي من تحت الحوافر

أُمّاه كَلِميني//// لِجمّعَتي هلّ تحّضرين
أُمّاه كَلِميني /// أنا حَبيبُكِ الحُسين
=========____=========
✍️🏻 كلمات #موسى_الخادم ٢٠٢٥

اماه كلميني

أللهم ..... بِفاطِمه وأبيها
أللهم ..... بِبعلِها وَبنيها
أدِم عَلينا مجالس فاطمه
+++++++++++++++++++++++++++
1
المجلس فاطمه وفقنه كل يوم
يا ربنه نحضره
لا تحرمنه منة الآخر سنين
ابلا مجلسهه فقره

نحلفك بالكطيع ايساره ويمين
خلنه ابكل وكت نبجيلها العين
ومأتمهه نجيَّ عدلين ميتين
تستاهل الزهره ام الاحسين

اللهم …. بكُلِ ما حل فيها
اللهم …. ببعلِها وبنيها
أدِم علينا مجالس فاطمه
/////
مو بس مره وحده نفدي هالروح
نفديهه الف مره
منوافي كسر ضلع ام الاحسين
وابنهه العله الغبره


يا لطمه التعوض كسر الاضلوع
يا دمعه التهود كلب مفجوع
الروايه ادكول ماتت ونهه مسموع
بعمر اثمنطعش تندفن موضوع

اللهم …. بِحبُيها لعليها
اللهم … ببعلِها وبنيها
أدِم علينا مجالس فاطمه

++++++++++++++++++++++++++
٣
من هالدنيه والله كلشي منريد
بس ردنه رضاهه
لا همنه الغنه ولا سمعه لا جاه
وحق محسن ضناهه

ما واحد البينه الهم بالقصور
كل همنه اعله فاطم ندمي الاصدور
كل لطمه نعدهه بيوم عاشور
وهنياله الخدمهه انكَـله مأجور

أللهم ..... بِفقدِها لِنبيها
أللهم .....  بِبعلِها وَبنيها
أدِم عَلينا مجالس فاطمه
+++++++++++++++++++++++++++
٤
لو جانه الاجل يا ربنه ندعيك
بسم امنه الوديعه 
نحي نظل  عزاهه وسط الاكبور
وانعيش الفجيعه

طاري الموت من نذكر يمعبود
نحس بهاي ادينه اتلفهه الاقيود
راح انوصي اهلنه اتوسع الالحود 
اوتلبسنه الاجفان اثيابنه السود 

أللهم ..... أرواحُنا تَفتديها
أللهم .....  بِبعلِها وَبنيها
أدِم عَلينا مجالس فاطمه
+++++++++++++++++++++++++++
٥
ما يكيفينه بس اتلث روايات
نبجي اعله الزحيه
يا ريت الليالي كلهه تندار
ليالي فاطميه 

ما يكفي شهر شهرين والله
نبجي اعله ام حسن وانصيح ويلاه
سنه يادوب تكفي الصيحت الآه
وحركَـ الباب ابد ما يوم ننساه

أللهم ..... وزينبًٌ في سبيها 
أللهم .....  بِبعلِها وَبنيها
أدِم عَلينا مجالس فاطمه
<<<<<<<<<<<<<<<<<>>>>>>>>>>>>>>
✍️🏻 كلمات #موسى_الخادم ٢٠٢٥

اللهم /// بفاطمه وابيها

يل وياهه ما قصرتو بالمره
ما تنسه الخدمهه فاطمه الزهره
1////////////////////
بنت المصطفى الطيب اصلهه
بيكم باهت الأملاك كلهه
هنياله الخدمهه والوصلهه
أكبر مشكله الزهره تحلهه

كل شدات تكَـضي خيمة العتره
ما تنسه الخدمهه فاطمه الزهره
2///////////////
يل قمتو المجالس للزجيه
واحيتو الليالي الفاطميه
ما تنسى تعبكم بالمنيه
يمكم تحضر ابدمعه جريه

الحاضر تعزيتهه تحضر الكبره  
ما تنسه الخدمهه فاطمه الزهره
3/////////////////////
الكَـال الفاطمه سمعاً وطاعه
نال المكرمه ونال الشفاعه
اليخدم فاطمه وباجي الهه ساعه
من دنياه طلع بجمل بضاعه

ما خاب التمسك بيهه كل عمره
ما تنسه الخدمهه فاطمه الزهره
4//////////////////
كل واحد البيكم تعرف اسمه
وشنهو ايفرحَّه وشنهو اليهضمه
ما تنسه الخدمهه بأقل خدمه
تعرف حتى من يا صنف دمه

حاشا يضيع خادم يمهه وتنكره
ما تنسه الخدمهه فاطمه الزهره
5////////////////
يا خدام هاي الكم بشاره
خدمة فاطمه أعظم تجاره
مضمون الربح ماكو اي خساره
وحق الضحه بيمينه ويساره

وحق المن كَـفه حز الشمر نحره
ما تنسه الخدمهه فاطمه الزهره
6///////////////////////
باجر فاطمه تشكُر سعيكم 
يامن عالصدر لطمت اديكم
حاشا اتعوفكم حتماً تجيكم
وللجنه تزفكم ما عليكم

هنياله الخدمهه بالعمر مره
ما تنسه الخدمهه فاطمه الزهره
==========================
✍️🏻 كلمات #موسى_الخادم ٢٠٢٥

ما تنسه الخدمه

وداعاً ///  وداعاً
يا يمه فاطمه
[][][][][][][][][][][][][][][][][][][][][][][][]
1/
صحنه بصوت ساعت ودعيناج
عشرتنه ابعجل خلَّصت وياج
بعد ما نصحه يا يمه اعله ملكَـاج
تصحينه البواجي وصور  فركَـاج

وداعاً /// وداعاً
دنيانه مضلمه
[][][][][][][][][][][][][][][][][][][][][][][][]
2//
منج يمه ما شبعانه هالعين
بعدج وين ننطي الوجه لا وين
تعاي وشوفي حالي وحال الحسين 
الج يومين ميته ومتنه مرتين

وداعاً /// وداعاً
يا قصه مؤلمه 
[][][][][][][][][][][][][][][][][][][][][][][][]
3///
بعدنه صغار يمه بحاجتج حيل
وحمل فركَـاج ما نتحمل انشيل
حزَّنه اعليج ما يكفيه سهر ليل
تعاي وشوفي حالت هالمداليل

وداعاً /// وداعاً
  يا نازفه الدمه 
[][][][][][][][][][][][][][][][][][][][][][][][]
4////
ييمه المكَـبره هنيالهه اعليج
ابعمر اثمنطعش حصدت معانيج
لو صح أبإدينه الروح ننطيج
الكَـبر ما لايكَـ الطولج نحاجيج

وداعاً /// وداعاً
تبجيلج  السمه
[][][][][][][][][][][][][][][][][][][][][][][][]
5/////
بينه ايحس ييمه الفاكَـد اعزاز
الماشي المكَـبره ويه امه جناز
الحضن امه يضل  للموت معتاز
وحسراته تصير الطوله عكاز 

وداعاً //// وداعاً
يلي متي عالمه
[][][][][][][][][][][][][][][][][][][][][][][][]
6//////
اَنه أم عون يمه بحاجه للعون
منو باجر الي امنهلي يموتون
يركبوني الهزيله الما يرحمون 
وبحبال اليسر جفي يشدون

وداعاً //// وداعاً
حد عاشر الدمه
[][][][][][]=====][][][][][]=====[][][][][][]
✍️🏻 كلمات #موسى_الخادم ٢٠٢٥

وداعاً /// يا يمه فاطمه

كل ما عاين للباب
ينعاد اعليه امصاب
كسر الظلع الماطاب .... وتزيد آلامي

......
١؛؛؛؛؛؛؛
من وصلناهه .... الشام شفناهه
ناسهه امعيده .... الذبح الحسين

كلهه فرحانه ... وانه تعبانه
حيل مابيه ....  وتدمع العين

مكسوره خاطر والدمع ما ظل بعد بعيوني
لا حيل ظلي ولا أهل والسوط أذه امتوني
كَـوه النفس اشهكَـ صرت من كثر ما تعبوني

بس روس اخواني اوياي
جابوهه اشلون بهاي
هاي الوحده امن اهواي .... صارت كَـدامي
......
٢؛؛؛؛؛؛؛؛

بديرت الظالم .... يمه يافاطم
واذكرت كسرج ... يمه بالباب

طحت مدميه .... جثه مرميه
ومحسنج شفته ... شابع اتراب

هاي الصور عرضت الي يايمه من وكَـفونه
يم باب ساعات الغدر جوه الشمس خلونه
المارحمو ابحالج أمس يحبيبه ما رحمونه

دخلونه ابذيج النوكَـ
وافترو بينه السوكَـ
وطلعت للناس احلوكَـ ... من بعد الحامي
......
٣؛؛؛؛؛؛؛؛

الحركَـ بابج .... رد على احبابج
يمه بالعاشر .... يحركَـ اخيام

والسطر عينج ...  رد على احسينج
يكَـطع ابنحره .... اكَـبال الايتام

لو حاضره أوشفتي الجره جا ما بقتلج دمعه
الباب كاسرلج ظلع والخيل كسرت ضلعه
مره عليج انعه واون مره عله اخواني انعه

بينج ما بين حسين
محتاره اتوجه وين
والشاهد دمع العين .... مذبوحه احلامي
.......
٤؛؛؛؛؛؛؛

قصتج وقصتي ... من كَـبل شفتي
انتي مكسوره ..... واَنه بحبال

دفنج ابظلمه .... وانه يا يمه
للسبي اطلع ..... حالي يا حال

إنتي وأنه قصت حزن ما منهه صعبه صعبه
إنتي اندفنتي ابوحشتج وانه اندفن بالغربه
للشام ارد بعد السبي وتضم سنيني التربه

ما تحضرني الخوان
ضمهم وسفه الدفان
والشامت يضحك جان .... عالنحر الدامي
......
٥؛؛؛؛؛؛؛؛؛

باجر انه امشي ..... وحدي ابنعشي
ناس مو ناسي .... ألّيشيعون

إخوه ما عندي .... ابموتتي الوحدي
امحسبه كفالي ..... يدفن ام عون

شيجيبه الي راعي الشيم عفته اعله طوله مدمه
السهم بايكَـله النظر والسيف بايك جسمه
وجفينه طاحن عالنهر بيدي شلتهن يمه

الماعنده اجفوف اشلون
يحمل تابوت ام عون
باجر غربه يشيعون .... تابوت ايامي
.........؛؛؛؛؛؛؛؛؛.........
✍️🏻💔 كلمات موسى الخادم

كلما عاين للباب