ابا الفضل .. قمرُ الحُسين
••
بِيَمِيْنِكَ سِرُّ الْفَضْلِ

وَيَسَارُكَ تَنْبَعُ نَبْضَا

فَحَيَاتي بَينَ يَدَيكَ

وَالْمَوتُ بِعِشْقِكَ حَضَّا

مَن عاشَ وفاءَكَ حتماً لا يخون

مِن بَعدِ ظِمائِكَ النفسُ تهون

ابا الفضل .. قمرُ الحُسين
•••
أَسِّرني بِرَحمَةِ جُرحِك

الْعَبدُ مُنَاهُ الرَّحمة

أُشدُدني بِحَبْلِ وصَالِك

زِدني غَرَامَاً في الْخِدمة

انتَ وِصالٌ، دونكَ اذهبُ لــ أين

بِكَ يبدأُ مَن طَلبَ جَمالَ الحُسين

ابا الفضل .. قمرُ الحُسين
•••
بِحِمَاكَ الْخَلْقُ تَلُوذُ

أَنْتَ ابنُ أَمِينِ الْخَالِق

تَهْمِسُ في الْكونِ أَمَاناً

يا صَوتَ اللهِ النَاطِق

وتجَلَّت فيكَ صِفاتُ ٱسمِ العَظيم

و الــ بسمِ اللهِ الرَّحمنِ الرَحيم

ابا الفضل .. قمرُ الحُسين
•••
اللَّيلُ طَغَى بِكِياني

وَضَمِيرُ الْحُزْنِ تَوَقَّد

لا يَسْطَعُ فِيَّه ثَاني

إِلَّا قَمَرِيْ الْأَوْحَد

يا مَن تُسقيَ ليلَ الأرواحِ يقين

و أنارت كفّاكَ الأكوانَ حنين

ابا الفضل .. قمرُ الحُسين
•••
فَلْسَفَةُ الْحُبِّ بِعَيْنِك

مِفْتَاحُ الْقَلْبِ بِبَابِك

عَانَقَتْ الرُّوحُ هَواكَ

والدَّمْعُ هَوى بِمُصَابِك

لولاك لَمَا صارَ بِـعينَيَّ طُفوف

وجعلت فؤاديَ بالأحزانِ شَغوف

ابا الفضل .. قمرُ الحُسين
•••
بِٱسمِكَ شَجَني يَتَوَسَّل

فيكَ وإِليكَ الغاية

وَلِكيْ أَختِمُ أَوْرادِي

رَتَّلْتُ حُرُوفَكَ آية

عينٌ باءٌ الفٌ سينُ السِقاء

قُلْ هوَ عينُ الزَّهراءِ وتجري ماء

ابا الفضل .. قمرُ الحُسين


#الخادم_علي_خيري_العبادي

2021/8/11 الأربعاء

https://www.tg-me.com/AliAliAlabady

غيره وشيم ، سَيْد الخَدَم حبيب
يا سيدي ، الأسدي المُهيب
••
استاذُ عابسَ في الجُنونِ وعالِمٌ

تلميذُ حيدرةٍ و شِبلٌ في الوغى

تُعطي دُروساً عِندَ اخذِكَ رُوحِهِم

ولزئرِكَ الأسديَّ الطفُّ صغى

صاعد عله ، روس المله خطيب
يا سيدي ، الأسدي المهيب
••
يا من بإخلاصِكَ حيّرتَ الورى

واحتارتِ الألبابُ في اسرارِكَ

سِرُ التفرُدِ في ضريحِكَ آيةٌ

تفسيرُها عند الذي بجوارِكَ

اسمك لغز ، حُب وحرز عجيب
يا سيدي ، الأسدي المهيب
••
تِيجَانُ مَمْلَكَةِ القُلُوبِ تَطأطأت

عِشْقاً لِخُصلَةِ شَيْبِكَ المُتَعاليا

وسِجِلَّ نـبْضِ العاشِقينَ ملكتَهُ

خُذ يا فَقيهَ الحُبِّ قَلبي البَاليا

شيخ العشگ ، انت الصدگ طبيب
يا سيدي ، الأسدي المهيب
••
مَن ذَا يُجاريكَ بصُحبَتِكَ وأنتْ

أفنيتَ عُمرَكَ خادماً أهلَ اليقين

يا أكبرَ الأصحابِ مِنزلةً وَ سِنْ

لكِنَّكَ تتصاغرُ قُربَ الحُسين

دينك أدب ، حائز لقب أديب
يا سيدي ، الأسدي المهيب
••
أفدي حبيباً رتَّلَ الثقلينِ، بلْ

هوَ يحفَظُ القُرآنَ كي يبقى الإبا

و أرادَ ان يحفَظَ آياتَ الخِبا

ضحّى وأضحى رأسُهُ عِندَ السِبا

فَــيْ للخدر ، رغم الستر غريب
يا سيدي ، الأسدي المهيب


#الخادم_علي_خيري_العبادي

2021/8/12 الخميس

https://www.tg-me.com/AliAliAlabady

اذا شِئتَ النجاةَ فزُر حُسينا

لكي تلقى الإلهَ قريرَ عينِ

فانَّ النارَ ليسَ تَمَسُ جِسماً

عليهِ غُبارَ زوارُ الحُسينِ

تراب المشايه سِر
نجاة وحُب و ستر
وجماله من ينثر، على الزاير
الوجوه الغيّرها حَر
مُحال اتروح لسقر
اليجي بذنوبه طهر، ويرد طاهر

طهارة النَفِس
بحرارة الشمس
والگلبه بي جمر
بممشه الخدر يحس
•••
جُفونٌ لا تَمَلُّ مِن الهُمولِ

وجِسمٌ لا يُفَكُّ من النُحولِ

وقلبٌ لا يُفيقُ من الرزايا

لتذكارِ القتيلِ ابنِ القتيلِ

وانه امشي واذكر هله
ومصابه ابطف كربله
و ركض اشرف عايله،ومشي الهيمه
اليتعبه الحب الصدگ
عليه اثار العشگ
نحيل وما يفترگ، اوي اهل ضيمه

لتغرّبو هله
تهضمهْ الهلا
ولو شاهد الدلال
يبچي لــ إمدلله
•••
وبُعدي عن مزارِ ثراكَ أضنى

فؤادي لا مُفارقةُ الخليلِ

وكيفَ يَلذُ بعدكَ طيبُ عيشٍ

لأربابِ البصائرِ والعقولِ

البُعد لا مو بالدرب
الدرب يختصره الگلب
لونّه بي يسري حُب، ومشه بصوبه
الحبيبه عاش الألم
ملذّة دنياه وهم
وسليب الراحه ويهم، بِــمَسْلوبَه

ريحانة الضوه
سلبوه بِــنَينَوى
وذابل على الرمل
ويلسعهْ الهوه
•••
الا مَن يدَّعي الإيمانَ فابذِلْ

حنيناً باختِراقٍ واكتئابِ

و عَزِّ المرتضى في السبطِ واذرف

من الأجفانِ دمعاً ذا انسكابِ

المواساة بلا دمع
طعم ما بيها ونفع
اليحب واجب ينفجع، اعله ليحبه
حبيب الزهره انشمر
اعله وجها من المهر
وسهام ورمح انكسر، بوسط كلبه

السيد على المله
وليت عدو انوله
متبدي ابن علي
ونسوانه بالفله


°° الأبيات الفصيح :
لشاعر اهل البيت المرحوم ابي الحسن الخُليعي الحلي (رض)

#الخادم_علي_خيري_العبادي

1443 هـ / 6 صفر المشاية المقدسة

https://www.tg-me.com/AliAliAlabady

محّد رحمنه بكربله
خويه حسين
رَكضو خواتك بالفله
خويه حسين
وردنه نجيلك والشمر
بسوطه عرض عالعايله

وشسوي للخيول
اذا منعت هواك
عجاجه وچن اشوف
بحوافرها دماك
ودريت انّك طريح وجاستك خيل
اجيت اشهگ واطيح
وركضت وگمت اصيح
شنو نفع الحياة
وبعد روحي ذبيح
والعطشان صعبه يجرع الويل

يبن امي وابوي
محبوبي واخوي
••
بدونك ولا متعلمه
خويه حسين
ولا ضل اخو لا ضل حمه
خويه حسين
بسوگ وقصر بين الزلم
ذريّة امنا فاطمة

مشينه اعله الجروح
وعلى ايدينه حبال
وسمعنه اشكد كلام
يلوّع بالدلال
وعلواه فقط چلمة خارجيات
عدونه مو غيور
شتم آل الرسول
وشمت بينا ويريد
لچم روح البتول
وهذا الحچي غير السوط والفات

يبن امي وابوي
محبوبي واخوي
••
يبن امي ما بيه بعد
خويه حسين
بالغربه ينراد السند
خويه حسين
وبالخفيه ابچي والدمع
عالخد كتب خويه مدد

المثل حالي تموت
وانه عشت بعذاب
حرت بيمن احير
وانه عندي مصاب
وبس ابچي اعذّب گلب الأطفال
وعيوني ما تنام
بخرابه مستحيل
غريبه وضيمي شام
وبقيت بلا كفيل
وصرت آنه كفيله لضيم العيال

يبن امي وابوي
محبوبي واخوي
••
حادي الضعن قاسي الگلب
خويه حسين
واشگد هظمنه بالدرب
خويه حسين
والينسبي لا بُدَّ أن
لو ينصدم لو ينرعب

نصدم جرحي بنحور
اصبَغَت لون الرماح
ومِنْ الْهزله اطيح
لَوَن اي راس طاح
واخاف الراس يوصل جوّه الجْمال
الرعب يعني بنات
تشوف الشام عيد
ويضربوهن حجار
او بيديهن حديد
وبالگوّه يشگفن والدمه سال

يبن امي وابوي
محبوبي واخوي

#الخادم_علي_خيري_العبادي

1443 هـ / 7 صفر المشاية المقدسة

https://www.tg-me.com/AliAliAlabady

عَزيزٌ عليَّ أنْ ارىٰ الخلْقَ ولا تُرى ..

ليش العزيز ايعز على العين !
وتشتاگله وما تدري بي وين
وتبچيله وحدك، ماكو ليعين
الْــ علَه گلبك تحْصَلَه منين ؟
الــ كُون بندبته يبچي مرتين؛
مرّه لغربته ومرّه لحسين.
يالطالب ابدم المطاعين
اگلبها حمره و رجّع الدَّين ؟
واحرگهم بنار الصواوين
لخاطر الباب وثار الجِنين
علّمهم الحگ ينوخذ زين
لحدمن تضل تنزف و لاوين ؟
إشگد بقالك سنة، سنتين ؟
رف راية اهلك وانشر الدِّين
يبن الأطايب والميامين
ليتَ الشِّعر وين انتَ ما وين ؟!
وليتَ الگلب لعيونك ايلين
وابروحي ريت اتعيش كل حِين
و لو حال بيني وبينك البين
ما اريدن ابقى مع الميتين
ٱمن الگبر فدوه اخرجني يــَحْنين

#الخادم_علي_خيري_العبادي

https://www.tg-me.com/AliAliAlabady

«عزيزٌ عليَّ أن أُجابَ دونَك وأُناغىٰ»

اليِعزّك مُفترض دونك يناغي الـ آه
•••
منو يناغي جروحك يا طريد الآل
وما ينساك لحظه وبالگلب تنشال
منو يحبك صدگ بالفعل مو باقوال
منو ايحس بيك ويحس البُعد كتّال

احنه ابعاد، وآحدنا التها ابدنياه
••
ياهو بحالتك يتأمل بحسرات
ياهو ينام وابخده أثر دمعات
ما فكّرنا بيك اشلون وين اتبات
كثر ما عايفينك صرنه چن اموات

وتعدَل روحه باسمك شكو واحد تاه
••
على أسمك منو يغفه ويصبّح بيك
وإيجدد عهد ويّاك من يدعيك
إليعرفك إمام المفترض يرضيك
بحيث شويه من اهمومك اينسيّك

مو فوگ اللي بيك إيچمّلك ويلاه
••
وين احنه، وشجانا حتى هيچ نصير
مو خبره بقضيتك، خبره بالتقصير
بسُوالفنا، بغربتك، حيره بيش اتحير
كسرنا اگليبك وما نِهِم بالتجبير

و رغم هذا تداوي ٱفئدة خلقِ الله
••
واحد وي الآخر نحچي احنه هواي
چا وانته منو ايْسامرك يا مولاي
منو يعينك ويبچي يا مَعين الماي
وايعز عالبچه خذلان ناسك هاي

و ينحز خاطره لخاطر ألم مولاه
••
لخاطر ثار ألله إظهر وجيب الثار
يا فلّاق هام الشرك والكفّار
بيت الحمد خله يشع بالفقار
لحدمن تبقى مخنوگ وعيونك نار

و نهار وليل تندب آه يا جداه

#الخادم_علي_خيري_العبادي

1443هــ / ‍26 ربيع 2 الخميس

https://www.tg-me.com/AliAliAlabady

#فقد_طال_الصدى

فارغ و طال الصدى بگاعه الفؤاد
وماكو غيرك يربط اگلوب العباد
يا حبل ألله، اليعوفك صوچ اديه
والگِصد منْهَلك ترويه بالوِداد
••
ما يَعَرف الذوق اليعوف الكمال
انْعمه احساسه اليعتبر غيرك جمال
حتى يوزرسيف خاضعلك هُيام
يوسف الزهره انتَ واحمد بالخصال
••
الما لگاك ابروحه ما حَبّك اكيد
والينول الحُب صبح مثلك شريد
يا ملاذ التايه وحُبّك دِليل
وفقط ليوالي جراحاتك سعيد
••
يمتى يتذلل ويبچي اللي عصاك
سهم ذنبه وتنزف انتَ وما رعاك
كون من باب الوفه ايرد الجميل
ابطاعتك يجتهد والغاية رضاك
••
الماسِك بدينه وفتن دنياه شِدَاد
صبَح كالخارط على شَوك القَتاد
الصبر مفتاح الفرج بالإنتظار
وانت باب ألله ولكُل قوم هاد
••
الْعُرَف أمرك ينطِره و ميّت عليك
ويبقى متلهّف مِته ايقبّل اديك
و لُو ظهرت اتزيد نار الشوگ بيهْ
ولَوْ حبواً عالثلج لازم يجيك
••
الدنيا مو دار الخُلد، دار الفناء
والبصير الشاف بس نورك بقاء
الْمُدن دونك تموت امن الظلام
والظلم بيدك يرد رحمة وضياء

{ السَّلامُ عَلَيْكَ يا نُورَ اللهِ الَّذي يَهْتَدي بِهِ الْمُهْتَدُونَ وَيُفَرَّجُ بِهِ عَنِ الْمُؤْمِنينَ }

#الخادم_علي_خيري_العبادي

1443 هــ / 3 جمادى 1 الاربعاء

https://www.tg-me.com/AliAliAlabady

متى يا قَلْبُ تُوقِفُكَ الرزايَا

وتُحرِقُكَ بأَروِقَةِ الخِباءِ

مَشَتْ مولاتُكَ عَطشىٰ بقَفْرٍ

يُقَلِّبُ ضَعنَها حـَـرُّ الهواءِ

فهٰذيْ أُخْتُ أقمارِ الفيافي

وتَلْفَحُ نُورَها شَمْسُ السَّماءِ

فوا لهفي بظُهْرٍ أظْهَرُوها

و ظَهْرُ النَّاقةِ دونَ الوِطاءِ

تجلَّى هـَمُّها دمعًا حَنينًا

فهَمْهَمْتِ العِجافُ بالبُكاءِ

جِبالُ الدَّمعِ بُركانٌ تفورُ

بداخلِها و لا تُطفى بماءِ

تُرى كم يَحمِلُ الصَّبرُ الجميلُ

فيَذبُلُ يَذبَلُ مِن ذا الْبلاءِ

لها لــُبٌّ تُجَمِّعُهُ بِــصَمْتٍ

فيُكسَرُ عِندَ إعوالِ النِّساءِ

عشيرَتُها قضَو صرعى بذِبحٍ

عظيمٍ فاقَ ذبحَ الأنبياءِ

تُكابِرُ والسِبا فيها تلظَّى

ومُهْجتُها تُفَتُّ بــكربلاءِ

جريحةُ غُربَةٍ وخُطاها نزفٌ

و جَهرًا تَعثُرُ لا بالخَفاءِ

وتُؤخَذُ عَنوةً مِن غيرِ وآلٍ

بأُمِّي وَ أَبي أُمَّ العَناءِ

#الخادم_علي_خيري_العبادي

https://www.tg-me.com/AliAliAlabady

يـَمَن اسمك
للسمه وللگاع أمان
ابيا نُويّة مِستقر ؟
عندك مكان ؟
بجبل رضوى ؟
بذي طوى ؟
عفت الجبال ؟
وين انتَ ؟
ماكو عنك اي بيان !
بالمطر والبرد والحَر انت وين ؟
شلون حالك وانتَ مجروح الكيان !
وين بيتك ؟
عايش اويامن ؟
وحيد ؟!
الْخضِر يصلَح أنيسك ؟
بيْ حنان ؟
يا أنيس لكل گلب
وانتَ غريب !
بلايه صاحب وانتَ صاحب الزمان
يا أهم من كل مُهم
ليتَ الكلام واهتمام الخَلق بيك
انسٌ وجان
ارزقني اعرفك
غايتي وكلشي بديك
ٱلجَهل حقّك
ما يشم ريح الجِنان
يا شمس
والغيم اعمال العباد
يا هوىٰ
چا ليش يردون الدُخان
چا منو الْطارِدَك حتى اسمك طريد
كون كل الكون يعتبرك ضمان
ماكو ضمآن وألك ذبلان موت
بْحيث گلبه صاير
من الحُب رَيان
يمتى نوْرِدها المناهل
باشتياق
يمتى ننظرلك
يبو عيون الحِسَان
يمتى تخزرهم أعداءك
بانتقام
عينه طلعت الْعدو
وتدريهْ جبان
شوكت يطلعله زئير ابن الإسود
اليخطف ارواح الزلم
قبل الطعان
احيي الدنيا بطلعتك
يا مُميت
الْغيوم الْكِدها اوجر العنان
بانتظارك
صار كلشي بلايه روح
التصبّر والشريعة والأذان
ليمتى احيرن بيك
يا سر الحياة
سيدي متىٰ أمَا آن الأوآن ؟!

#الخادم_علي_خيري_العبادي

الأحد 14 جمادي 1 // 1443 هــ

https://www.tg-me.com/AliAliAlabady

علويه ومتعلمه بس اعله الستر
محتاره شتسوي وبخيمها النار
وتشاهد نسوتها يدوسن عالجمر
والحرمه التبقه بلايه ولي تحتار

وتشوف وتشوف، زلمها عالثره
شتصير شتصير، وتتحمل الجره
ياناس ياناس، شيّبت هل مره
و اتعذّبت ..

بصعدت التل اتعذبت
شافت اخوها وشيبت وضلت تگول
يبن امي ان كنت عدل
ادركنا وادرك چم طفل من الخيول

طشرو هلك بالبر
يآبو علي الأكبر
••
المستوره مو هينه تمشي للأسر
جبروها وبالگوّه صعدت اعله النوگ
الما عدها لا كافل لا چتف لا ظهر
تتمايل عالهزله وطببوها السوگ

تنشاف تنشاف، وشافت بشر غرب
بنهار بنهار، طلعت لچن غصب
واتبات واتبات، مسبيه بالدرب
واتلوعَت ..

ليل السبي ما ينحچي
تتلاوه ويّاا بالبچي وتنعى الحسين
بان بملامحها الكسر
وشمس الصحاري البل ظهر چوّه الجبين
يا سادة الغيره
زينبكم ايسيره
••
بنت حيدر واخوتها سادات الخلق
تاليها يماشيها الأصله ما معروف
ويهضمها ويشتمها الماله شيمه وخُلق
ومن صوته ومن سوطه راوداها الخوف

واتخاف واتخاف، لو عتّو الحبل
واتصيح واتصيح، وينك يبو الفضل
عباس عباس، طحنه بعدو نذل
الحگ متت ..

درب اليسر فت المهج
وظهري احس بيه انعوج وگليبي ذاب
ياهيه مثلي بهل عمر
تحمل رزايا هل كثر وتشبع عذاب

زادت على فاطم
زينب يهل وادم
••
المتغرّب عن أهله يتمنى الگبر
والگبره بالغربه أمنياته تموت
والعاشت إلْموت بكل لحظه تمر
لا هيه عدله ولا تستحق تابوت

وتموت وتموت، من تذكر الگمر
والروح والروح، عافتها عالنهر
وتريد وتريد، اخوه لهل سفر
وما ضل شهم ..

شيصبّره الذبحو هله
والماله حامي بالفله جائز يموت
والدرب يجرح چم اذن
حچي الشماته شگد خشن لمّن يفوت

من رجعت لحيهم
ما سمعت الحيهم

#الخادم_علي_خيري_العبادي

الثلاثاء 13 رجب الأصب // 1443 هـ

https://www.tg-me.com/AliAliAlabady

يَــ أجمل ساجد وعابد
يل إمعلّم المخلوقات
وامْدلّيها عالواحد
النجم والشجر سمعن باسمك وسجدن
لذلك شكو واحد ما خذاك اسوة
وما جاسه لهب حبك اوي الخالق
يخلّص عمره وي معبوده لو غرگان لو بارد
يبن الخيرتين ادخيل
انت التصلح الفاسد
الطغت نفسه وظلمها لا يضل باعد
ولا من رحمتك شارد
خ يرجع يأدبّها بحچي احساسك
بحچي گلبك وي الباري
خ يشوف الإله بعين گلبه ويحس بانفاسك
يما تتوصف انفاسك
بكثر ذكرك .. كثر شكرك
ما تتوصف انفاسك
يَـ اروع شاكر وحامد
غشيم اليستلذ بسوالف الدنيا
وعاف الطمئنينة وهو ما داري
ثاري اللي يحب، لذّته من ينجاب اسم محبوبه بالطاري
ثاري الدين لو ما انت ما بي روح
لو ما رواياتك جا صبح جامد
بمناجاتك الدين اتشعشع بحُب وصبح راشد
زبورك دلّه المتيهين
زبورك ملجأ العاصين
لو ما كتاب الله چا صلح قرآن
زبورك دوه للوجدان
وانت دوه للكلشي رغم علتك
يبن حُبنا الچبير، شگد الك عطشان
شكد أتمنى ابچي بحظرتك لهفان
العبد ما عنده بس مولاه
وحلاته لو خضع اباب رحمت سيده وگاعد
گبرك سيدي غصّة بصدر كل سيد وماجد
يا وسفه لحد الآن وي الگاع
يا انتَ الذي البطحاء تعرف وطئتك قائد
دخيلك حتى وانت بالگبر زاهد

#السلام_على_مولانا_السجاد


#الخادم_علي_خيري_العبادي

https://www.tg-me.com/AliAliAlabady

#يا_صاحب_الزمان
#يا_ملجأ_العاصين
#يا_منور_القلوب

يمتى نفسي تظهر بمظهر انيق
لجلك وحبك يدلّيها الطريق
وين هيه شگد بعيده وانت وين
شگد قريب گليبك الها شگد شفيق
شكد قست لمّن مشت بين الظلام
وبقى يجذب بيها نورك الرقيق
تعْمه لو ما شافِتَك ليها رقيب
يمتى تبصر؟ كافي غفله خل تفيق !
يمتى تطَهّر بفيضك يا مَعين
يمتى تتعطّر بذكراك العتيق
وبلذيذ اسمك تصح لذّتها كون
مو بزخرف دنيا وبزينه و بريق
وتنتبهلك والينسّيها الوصال
لخاطرك تهجره لو اقرب صديق
انت والدها وصويحبها الحِنين
انت امها البّرة والأخ الشقيق
لا شريك وياك واليعشگ يغار
يا مُحب للماله محبوب ورفيق
باب فطرتها إفتحه بالدموع
يمفتاح الرب، وسد باب الحريق
كون مو بالشِدة بس تتنخه بيك
حبل وصلك شِدّه بيها شَد وثيق
يمتى يولد بيها جرحك للمشيب
وبهمومك تصفن وهمها عميق
تحظه بيك شلون؟ يمتى؟ مدري وين
تصبر ابلزمت جمرتك؟ ما تطيق؟
ادعي تثبت على دينك ما تزيغ
نفسي امّارة واخاف اصبح غريق
يامه غرگت وانت تنفخ بيها روح
وترد مكسورتلك تريد الشهيق
ريت تصبح مطمئنة باليقين
وتدخل بواسع رحمتك من تضيق
هيه محسوبه عليك، اتفشّل، آخ -
شلون بيها، وهيه اصلًا ما تليق
يمتى نفسي تظهر بمظهر يليق

#الخادم_علي_خيري_العبادي

https://www.tg-me.com/AliAliAlabady

هل من مُدَّكِر شاف
انشق القمر نصفين
وضج الكون من طاح
عمود السمه والدين .. علي
•••
طاح اعله الوجه وامخضّب بدمّه
بمحرابه ويشدّ بجرحه ليلچمه
وصارت لحيته حمره وتأذّه الشيب
حَر الصواب مدري السّم بقه يألمه

و ذبلت شجرة النور
و دم حيدر سگاها
تغيّر لونه و اِصْفَر
و ردّلها ضواها .. علي
•
الحسن وحسين سمعو حادث المقتل
فزعو والدمع لخدودهم بلّل
وا ويلاه يبونه صاحو بحسرات
ليت الموت اعدمنا الحياة وحَل

اليتامى تروح لاوين
و اُهم عندك أمانه
شتسوه الدنيا دونك
يَــ لُطف الله وحنانه .. علي
•
بحظنه الحسن خلّه راسه ويشدّه
ويمسح دم ابوه بس النزف بعده
والتهضم علي تشوفه الخلگ مطروح
ورغم وضعه يصد لله ويوحده

وله عنده ابــ إلٰها
وكلمْته تبقى مسلك
لو أدخلتني النار
أگل للبيها احبك .. علي
•
جلوسًا صلى راحت قوّته الترهب
و راد يگوم ما بي حيل ابو زينب
صدگ ماتنعقل بس صدگ هذا الصار
گلهم احملوني لمنزلي نذهب

القالع خيبر شلون
روحه تثگل اعليه
چا إشگد نزف گول
واشكد جرحه ماذيه .. علي
•
الحسن سنّده لصدره وعصّباه حسين
والعباس لازم ايد من ليدين
وينادون وا سيداه وا مولاه
ننطي اوجوهنا بويه خلافك وين

حِمْلو من مُصلّاه
لعد بيته بمدامع
تشيّع واهوَ عايش
بصْريخ ومواجع .. علي
•
من وصلو لبيته گال نزلوني
الحسن گله لِمَ ؟ خلّك عله متوني
گله يا بُني زينب وراء الباب
وأخاف اتطيح لو شافتني حملوني

شافته اعله هل حال
ونادت يل مجبلين
هذا الشايلينه
اوياكم گولو امنين .. علي

{ ونّـــت ونـــادت يـالـمجبلين
هـالـشــايـليـنـه ويــاكـم مـنـــيـــن
أسـمـع هـضل وصـياح صـوبين 
خــوفي إنچتــل عودي يـطيبين
لـمّـن سـمـعها الـحسن وحـسين
صـاحـوا يـزينب زيـدي الـونين
أبــوچ انـطـبر والـراس نـصّين
صـاحـت و هـملـت دمـعة الـعين
عگبك يبويه اوجوهنه وين }

#الخادم_علي_خيري_العبادي

الأحد المصادف 8 من شهر رمضان المبارك // 1443 هــ

https://www.tg-me.com/AliAliAlabady

#السلام_على_كريم_المعصومين
#السلام_على_عصمة_المتقين

يا مَن جمالك شادهْ الْحور
يا حَسَن يل إحسانك ينور
رحمة وهداية للمْضيْعين
يا نجم ساطع يبن البدور
•
بالعرش ظلّك نوره وضّاح
المشكاة امّك وانتَ مصباح
ٱتْعَلْم الملائك على التسبيح
ويا عصمة الْمُتَّقي لو طاح
•
فاقت حكمتك حد الأزمان
تنطي الخضر وانطيت لُقمان
مو بس بشر تنطيها مولاي
انت كريم الإنس والجآن
•
بيك السمه انرفعت والهموم
والخير باسمك نازل اليوم
ما لَك وصف يــَ اوسع من الكُون
واللي يوصفك إلّا معصوم

#الخادم_علي_خيري_العبادي

السبت 14 رمضان المبارك 1443

https://www.tg-me.com/AliAliAlabady

#يا_أمير_المؤمنين


دخيله الحيّر اعقول البشر والجن والاملاك
محّد عرف شيگول و كلها اتگله بحماك

محّد ايوصفه، بس الله ومحمد
محّد ايعرفه، بس الله ومحمد

علي، وما ادراك ما الحيدر
علي، هوَ من كُلِّ شيء أكبر
علي، عِلَه اعلى العرش واكثر

هوَ نورُ الله، هوَ سورُ الله علي
•••
صفات الباري واسمائه تجلّت بيهْ بوْضوح
سيد عالم الإمكان وسيد عالم الروح

بعالم اسراره، بس الله ومحمد
والشاف أنواره، بس الله ومحمد

علي، الخلائق خضعت لنوره
علي، للخالق أجل صوره
علي، يزور الله ليزوره

والراد يشوف، وجه الله يطوف علي
•••
خل يشكر هلَه الحبّاه ويهنياله اليواليه
نطفته طاهرة وطاهر حليب امّه اليغذّيه

والدلّو دربه، بس الله ومحمد
اوّل من حَبّه، بس الله ومحمد

علي، وسيلة اتريده او مطلب
علي، ممسوس بجلال الرب
علي، اسدُ الله من يغضب

قوّة لاهوت، وسر الملكوت علي
•••
بعد يا آصف! وحيدر عنده علم الكتاب
و إرادة الله تهبطله ويسببها الأسباب

والراده ايريده، بس الله ومحمد
واليدري ابأيده، بس الله ومحمد

علي، لا هيهات مو إنسان
علي، باسمه اترتل الأكوان
علي، عبادة ذكره واطمئنان

ميثم من هام، لا ما ينلام علِيٓ
•••
مقاليد المجرّات بچفّة من الف للياء
عنده اولاية عالكون وكن فيكون اذا شاء

واليوصل فضله، بس الله ومحمد
الأول اوقبله، بس الله ومحمد

علي، النقطة ومنتهى القدرة
علي، البذر والثُمَر والشجرة
علي، ما قدروا حق قدره

كل هذا الشآن، وعبدُ الرحمن علي

#الخادم_علي_خيري_العبادي

الخميس 19 رمضان 1443

https://www.tg-me.com/AliAliAlabady

انتَ انتَ انتَ، الكاسر وجداني
انتَ انتَ انتَ، وما ٱريدن ثاني
انتَ انتَ انتَ، حبّك ربّاني

رحمة رحمة رحمة، شفت الحب يمها
رحمة رحمة رحمة، لا يُقنط منها
رحمة رحمة رحمة، لا مُمسك الها

انتَ رحمةُ اللهِ الكبرى
وتكفي عنّك انتَ ابن الزهرة
كلمن انشغل بيك اتْهيْمه
واللي تنظر لگلبه تْعَمرَه

گلبي خراب ، يبن ابو تْراب دخيلك
••
يمتى يمتى يمتى، تاخذني جروحي
يمتى يمتى يمتى، أهلك من نوحي
يمتى يمتى يمتى، تطلعلك روحي

روحي روحي روحي، تضِيع وأنساها
روحي روحي روحي، يمّك ألگاها
روحي روحي روحي، يا مهجة طه

يمتى روحي تطلع وتشوفك
وتنحني و تِقبّلها چفوفك
وتبچي مدري تبتسم لنورك
وللأبد تبقى متعوفك

دربك حياة ، وبابك نجاة دخيلك
••
عمري عمري عمري، لجلك يا مذبوح
عمري عمري عمري، لو يصبح گد نُوح
عمري عمري عمري، أذبحلكياه نَوح

دمعة دمعة دمعة، غيْرت ايّامي
دمعة دمعة دمعة، تحقق احلامي
دمعة دمعة دمعة، لجلك يا ضامي

عمري دمعة لعيونك فدوه
بلا دموعي كلشي ما أسوه
هنّه الك و رازقنيّاهن
ولو هُوَيتك بفضلك أهوه

منطيني روح ، لجلك تنوح دخيلك
••
آيه آيه آيه، يحسين مصابك
آيه آيه آيه، ويرتله عذابك
آيه آيه آيه، خيامك واطنابك

خيمه خيمه خيمه، حرگوها بقسوه
خيمه خيمه خيمه، تحتاج النسوه
خيمه خيمه خيمه، اعله اطفالك تهوه

آيه خيمه! إشمالچ طحتي؟
ما دريتي بيهم، ما شفتي
ذوله بيهم الزرگه انرفعت
إبچي عادك! شبيچ إحْرَگتي

ضيمك خيام ، ونارك غرام دخيلك
••
ديني ديني ديني، بجْروحك شفته
ديني ديني ديني، بمْحبتك عشته
ديني ديني ديني، ميّت لوما انْتَ

انتَ انتَ انتَ، الطيحوله اكباره
انتَ انتَ انتَ، الذبحوله اصغاره
انتَ انتَ انتَ، جرح ألله وثآره

ديني انتَ والجرح البيّه
وانْدبك اضل صبح ومسيّه
وابْقه اوآسي ابنك التحبّه
إللّي ياخذ بثار السبيّه

بيد الأخير ، ثارك يصير دخيله ودخيلك

[اين الطالب بدم المقتول بكربلاء]


#الخادم_علي_خيري_العبادي

الأربعاء 25 رمضان 1443

https://www.tg-me.com/AliAliAlabady

أبا عبد الله ، آه وآ جدّاه ، حُسين
••
صلّى اللهُ عاللي سمحت نفسه بمهجته بطف نينوى
صلّى اللهُ عالمُرمّل بالدم واحسّن جرحه نچوه
صلّى اللهُ عاللي هتكَو خِباءه واهله هجَّو سوه

خيامك تحترگ
واتصد من ابعيد إلهن
وگلبك يحترگ
طلعن المنشاف ظلهن
واخيول و عدو
وعثرن إبأجساد أهلهن ، آه واويلاه
••
صح آنه بغربه لچنّك انتَ الغريب المالَك مَثَل
اتلاثين السدّو وحشتي وجرحك أنيسي و انتَ تضل
ضليت لوحدك تنادي هل من مُغيث وماكو أمل

هل من ناصرٍ
مِلْئت بوادي العاشر
هَول المُطّلع
صُم الصياخيد كاسر
وجاك الجن يگول
انتَ الحسين وحاير ! آه واويلاه
••
تُقتل ضامي وانتَ بن زمزم ومَهر فاطمة نهر
و في كُلْ عضوٍ من أنامل جسمك يجدّي يجري بحر
لا مو انتَ اللي تنام بصحره ثلاثه ومو عالظهَر

نايم عالوجه
وراسك على اسنان صاعد
ما عندك چفن
يسترك ولا جاك واحد
ذبحوك ومشو
ودمك بقه عليك جامد ، آه واويلاه
••
انتَ ابن الزهره يجدّي ومو هيّنه ليقتلك دَعي
ويسبي أهلك كالعبيد و ثِقلُ الحديدِ في الأذرُعِ
طافوهم بالبر وساقوهم في الاسواقِ كالخُضَّعِ

وبعد العِز وُسَف
مُذلالات يصيرن
ما عدهن زلم
بالغربه حگهن يحيرن
ويأذّي الدرب
وگوّه عليهن يسيرن ، آه واويلاه
••
عاشورك عشته بهضيمه وصارت حياتي چن مظلمه
من گد ما كاسرلي ظهري و شالعلي گلبي دمعي دمه
يوميه صبح ومسيه أبچي واندبك وي فاطمه

وندعي وننتظر
ثارك وثارات اهلنا
رايد انتقم
من اللي ما راعى حگنا
يا ربي العجل
عجّل ظهوري لأجلنا ، آه واويلاه

[العجل يا مهدي . العجل يا مهدي]

#الخادم_علي_خيري_العبادي

الجمعة 27 رمضان 1443

https://www.tg-me.com/AliAliAlabady

(( مولاتي سيدة نساء العالمين تخاطب مولاي صاحب العصر والزمان صلوات الله عليهم ))


حبيبي ، يمهدي
كسرو غصن امك بلايه رحمه
وتناثر ، وَرَگها
وطاح الضوه وينزف عليه دمه
وانادي ، ييمه
مات الولد مگدر بعد الولي
شسوي ، نحيله
وآنه مره وهمه زلم اجولي

بيت الرسالة تحترگ حروفه
طايح ابشده ودخّنت ظروفه
والما فزع، ضدنه وگف اشوفه
اشوفه
الماعنده غيره ولا حمه
يتشمت باهل السمه
يا عالم اني فاطمه
سر الإلٰه

يوليدي منتظره الفرج
•••
جريمه ، اعله بيتي
هجمت رذاله وانكرو مقامي
واگلهم ، تره آنه
إلزهره بس محد فهم كلامي
اعصروني ، اضربوني
ام السباع استسبعو عليه
ولوني ، بالسياط
قطب الولاية تنولي اديه

شمسويه حتى تنرفع اديهم
والصوت رفعوه وخشن حچيهم
چان استحو آنه بنِت نبيهم
نبيهم
بيه يوصي اشكد امس
والليله بابي ينرفس
وابطني مذبوحه نَفِس
واا محسناه

يوليدي منتظره الفرج
•••
هضيمه ، چبيره
جدك علي من انچتف اشوفه
رحتله ، ابكسرتي
لملمت جرحي وگتله لا تعوفه
برحيلي ، تغرّب
ماضل بعد عنده سند يعشگه
يسولف ، جروحه
بالبير ضل ايفرغ اليخنگه

البيده الهوى صار الهوى يألمه
المابي عطر فاطم ولا يشمه
وباب الجرح خلصت حياته لچمه
تلچمه
بگلبه بقت چلمة وَإن
ويتذكر احساسي ويون
البچّه الزلم يبچي ويحن
إلــ فاطماه

يوليدي منتظره الفرج
•••
ندبتك ، لأنّك
تآخذلي حيف اكثر ضلع تعذب
اضلموني ، ويتيمه
واشچم ابن من بين ادي تسلب
شجاها ، الاوادم
خاطر تضل تذبح اعز عيالي
قضية ، مصابي
بيدك بقت يآخر امل بقالي

امن الجبت والطاغوت حگي انطره
طلّعهم واصلبهم اعله شجره
ذوله اكسرو ضلعي وبديك اجبره
اجبره
كسر الضلع لا ينجبر
الا بسيفِ المُقتدر
وصيح آنه امي التنعصر
وكتلتها آه
يوليدي منتظره الفرج


#الخادم_علي_خيري_العبادي

2021/1/4 الاثنين

https://www.tg-me.com/AliAliAlabady

يَـمَّــكْ مــَوَازيــن الطَّـبــيـعــة تــِنْـگــلُـب

سِرَّك صعب والْيِعْرفَه بس الْگلُب

يَمْـجَنْنِنْ الوادم كِثِر مـا تنطي حُــب

حــــــُــــــــــــســَــــــــــــــــيــــــْــــــــــــن 💔🙏