#موشح..
🚩
🏴

ظـل وحيـد و دمعـتـه ابجفونـه
من الظمى ما ظل تشوف عيونه

وا حسيناه وا غريباه وا وحيداه
...................................
١/
ظل وحيد ومنفجع واگليبـه ذاب
و الأهـل كلهـم علـى وجه التـراب
اعليهم ايصيح وأبد مامش جواب

امذبّحيـن ومـا تـرى ايسمـعـونـه

وا حسيناه وا غريباه وا وحيداه
...................................
٢/
ودّع الأطفال والكـون ارتجـف
لكـن ابتوديـعـه للحـرّه اختـلـف
دمـع عينــه عالعقيلـه ما نشـف

يـدري عگبـه كـل طفـل يسبونـه

وا حسيناه وا غريباه وا وحيداه
...................................
٣/
حاوطوه الگوم وهوه ابلا نصير
وظهره من المشرعه أصبح كسير
ايدير عينه وشنهو ينظر من يدير

فـقـط أرجـاس و دمـه يطلبونـه

وا حسيناه وا غريباه وا وحيداه
...................................
٤/
بيـن خيّـالـه و فوارس بالألـوف
فرقه برماح و نبل فرقه بسيوف
وترتعش من الظمى هاي الچفوف

و العــده اسهام وحجـر يرمونـه

وا حسيناه وا غريباه وا وحيداه
...................................
٥/
وا حسينـاً وا غريبـاً وا وحيــد
ما بقـالـه ناصـر ولا من عضيـد
وا جريحاً ضاهده ثگل الحديد

و غريـبـــاً و العــده ايشـتـمـونـه

وا حسيناه وا غريباه وا وحيداه
...................................
٦/
امن الظمى ونزف الدمه ماظلّه حيل
تـمـيــل ويّـاه الفـرس كـل ما يمـيــل
چنّـه يحسيـن أقترب وكت الرحيـل

و الخـدر عگبـك تـرى ايهـتكونـه

وا حسيناه وا غريباه وا وحيداه
...................................
٦/
ويلي برماح ونبل ترمي اللّئـام
و المثلـث طيّحـه دون السهـام
عالرمال اللّاهبه يطيح الإمام !!

و ابجبـيـنــه الطّاهــر ايضربونه

وا حسيناه وا غريباه وا وحيداه
...................................

✍🏼علي نوري الحلفي

وا زينباه
وابتدأت رزية زينب

#أبيات_نعي ..
الإمام السجاد عند دفن أبيه الحسين عليهما السلام

🏴
🚩

ما تخفى عليـك ادموعي وتهيـد
وصرت عگبك يبويه ساكن البيـد
يبويه انظر دمه يتسايل الجِيـد

واچفوفي زرگ من ضرب الأرجاس
...

تشوف شلون يل راسك بالرماح
وجسمـك گطّعتـه بيض الصفاح
بعد هيهات عگبـك يـوم ارتاح

فجيعه وساكنه بجروح الاحساس
...

اجيتك منحني وجروحي بالروح
و انوح اعليك يل تستاهل النوح
لا مجروح و انداويـهـا الجروح

صبح جسمك وذر بالخيل ينداس
...

نــار حشــاي مـا يخمــد لـهـبـهــا
وروحي اعليك ما يخلص ندبـهـا
لچــن هــاي الـذي الباري كتبـهـا

وما انساك بويه الگطع الأنفاس
...

يبويه وليلي من عگبك امسهّد
وحزن الروح ظل اعليك سرمد
وجـرح دلّالـي بالآهـات يمتـد

إلى يوم القيامة ومحشر الناس
...
✍🏼علي نوري الحلفي

عندما رأت رأس ابيها على رأس رمحٍ طويل..
فقالت:

انـزل يبويـه مـن الرمـح
عگبك صـرت كلّـي جـرح
حيلي اويه نحرك منذبح
       من فارگتني
...............................
١/
انشـد عليك بكـل فرض
وين ارتحل سيد الارض
يوم الظعن شال
مثل الزچيه بهل الوضع
باب الزمن طگلي الضلع
وبيه الوكت مال

حال الأسيره وبالغُرب لو راح ابوها
محّد يحن الها وحشى ما يرحموها

چنّـي حمامـه بـلا جنــح
عگبك صـرت كلّـي جـرح
حيلي اويه نحرك منذبح
       من فارگتني
...............................
٢/
انتـظـرك اشـگــد وتــرد
اي والله هد حيلي البُعد
وبروحي نارين
صرت انضرب وبلا ذنب
لن بت علـي انه انتسـب
و ابنيّة حسين

لمّن دروا بت فاطمه زادوا حقدهم
طفله انه و همّـه زلم شگدر اردهم

بجرحي الوكت ينثر ملح
عگبـك صرت كلّـي جـرح
حيلي اويه نحرك منذبح
       من فارگتني
...............................
٣/
اغفى إعلى چفك كل مسى
هسه اغفى بچفوف الأسى
وبيّه الزمن دار
كل طفلــه بويـه بهل البلد
للــدار  ابوهـــا  بيهـــا  رَد
وآنـه ابّـلا  دار !

ابّاب الخرابــه وانطـرك ساجـر لهيبـي
وحتى بجفن عيني طلع يا بويه شيبي

اتنـطــرك ليــل و صبــح
عگبـك صرت كلّـي جـرح
حيلي اويه نحرك منذبح
       من فارگتني
...............................
٤/
ليـل  الغرب  ما  ينحمــل
صحت المدد يابو الفضل
عمي الوفي وين
بيــن الـوَلا يمـلك رحــم
منهو الكفيل بهل الحرم
جاوبني يحسين

شدّوا حبل من رگبتي الرگبه خواتي
شحچيلك وصوتي خفى من نايباتي

بمصيبتي ايطول الشـرح
عگبـك صرت كلّـي جـرح
حيلي اويه نحرك منذبح
       من فارگتني
...............................
٥/
ليـه چنـت مــاي و هــوى
و بغيبتــك عظمـي خِـوه 
ومنّي انتهى الحيل
طيفـك ولا غـاب و خِفـى
وجرحي تمادى وما شفى
و ايهيّجــه الليـــل

جرح السبي ياوالدي ما لحظه طايب
و عمّاتـي ربّـات الخـدر سكنن خرايب

وننطگ حجر من كل سطح
عگبـــك صـرت كلّــي جــرح
حيلــي اويه نحـرك منذبـح
       من فارگتني
...............................
٦/
عگبـك ولا ريد النظــر
بُعدك يطر المهجه طر
دلّالـــي مفتــوت
النحـرك اريـدن التجـي
اي لو ألف موتـه تجـي
ما همني هالموت

ما اگــدر اصبــر مـن تمــر  بيّــه طيوفـك
ما همني موتي والمهم بس كون اشوفك

سموم الزمن فوگي تفح
عگبـك صرت كلّـي جـرح
حيلي اويه نحرك منذبح
       من فارگتني
...............................

✍🏼 علي نوري الحلفي

عن الإمام الصادق عليه الصلاة والسلام
(من أتىٰ قبر الحسين عليه السلام ماشياً كتب الله له بكل خطوة وبكل قدم يرفعها ويضعها عتق رقبة من ولد اسماعيل عليه السلام)

لمولاتي زينب عليها الصلاة والسلام 🌹

بت حيدره ندريها
يا زلـمـه يگدر ليها
حتى الذي سابيها
داخ وتحيّر بيها

ستر.. خدر.. واعلى أميه تنتصر
شمر.. زجر.. لابد ذكرهم يندثر
،،،،،،،🏴🚩.....🏴🚩،،،،،،،
١/
سيدة عـزّه وشموخ .. كلفه واربات الشيوخ
اتدنگ اجبال الرواسي يم عُلاها
بالسبي وذاك المسير .. الجيش بيديها أسير
اتندم ايزيد الرجس لمّن سباها

سحگت اخشوم ال أميه بالسبي
وارغـمـت بالـگاع أنـف الناصبي
بـالشـمـوخ و بالجـلال الطالبي
عـلّـمـتـه شنهو ثورات العبي

كل خطوه من تمشيها
عفّـه و شرف تحيها
حتى الذي سابيها
داخ وتحيّر بيها
ستر.. خدر.. واعلى أميه تنتصر
شمر.. زجر.. لابد ذكرهم يندثر
،،،،،،،🏴🚩.....🏴🚩،،،،،،،
٢/
هيـبـة الباري الجليل .. لو مشت چنـهـا الكفيل
الگاع تتزلزل لمن تسحگ عليها
بالحچي تشبه علي .. الخطبه چن سيف الولي
وبجيوش أهل الكفر يشطر حچيها


مره لكـن لـيـهـا ذلّـت الادعيـاء
أرغمـت أنـف الظـلـم و الطلـقـاء
مو عجب عالسيف تنتصر الدماء
العجب عالطاغي تنتصر النساء !

رغـم الحـبـل بيديها
تمشي ومهابه اعليها
حتى الذي سابيها
داخ وتحيّر بيها
ستر.. خدر.. واعلى أميه تنتصر
شمر.. زجر.. لابد ذكرهم يندثر
،،،،،،،🏴🚩.....🏴🚩،،،،،،،
٣/
من العرش انتي شعاع .. إلـه كل يـوم اتساع
يا يزيد اليوگف ابوجه القداسه
مره مچتوفه ابحبال .. وخاضت بأشرس قتال
زلزلت قصر الضلاله من أساسه

بكربله ما مات صوت الثائرين
كملّتـه بت علـي ابعزّه ويقـيـن
رسمت النصر الحسيني المبين
وثبتت بالشام اسمك ياحسين

زود الوصي امربّيها
مـحّـد گـدر يثنـيـها
حتى الذي سابيها
داخ وتحيّر بيها
ستر.. خدر.. واعلى أميه تنتصر
شمر.. زجر.. لابد ذكرهم يندثر
،،،،،،،🏴🚩.....🏴🚩،،،،،،،
٤/
مرّات يصبح هالكلام .. مثل ضربات الحسام
الچلمه منها عن ألف فارس تعادل
وزينب بهذا النّزال .. هزمت اجيوش ورجال
وهي مشدودات ايديها بالسلاسل

اسعـى سعيـك كيـد كيـدك يا يزيـد
ما يـصيـر اللّـي نـويــتــه و التريـد
إنـتـظـر يومك يجـي وما ظن بعيد
وقصرك تخسفه دمه حسين الشهيد

فيض الدمه التجريها
كـل دولـتـك تفنـيـها
حتى الذي سابيها
داخ وتحيّر بيها
ستر.. خدر.. واعلى أميه تنتصر
شمر.. زجر.. لابد ذكرهم يندثر
،،،،،،،🏴🚩.....🏴🚩،،،،،،،
٥/
مو فقط دمعه ومصاب .. ثوره زينب للحجاب
وآل أميه شگد سـعـوا للجاهليـه
كـل مخططهم يـزول .. من اجت بنت البتول
انعلن فـرض الإراده الـزيـنـبـيـه

آل أميه شگد سعت ضد الحجاب
والغرب هاليوم يمشي بهل السراب
ايريد يحرف هاالنساء وهالشباب
لكن ابزينـب سعيهم كلّـه خاب

الـمـلّـه ابحفظ باريها
ووصّى العقيله اعليها
حتـى الـذي سابيها
داخ وتحيّر بيها
ستر.. خدر.. واعلى أميه تنتصر
شمر.. زجر.. لابد ذكرهم يندثر
،،،،،،،🏴🚩.....🏴🚩،،،،،،،
٦/
لوما موجود الإمام .. چا خذت هذا المقام
لأن هـيّـه ابمنـزلـه كلش عظيمه
بهالوضع بارينه راد .. تنسبـي ابكل البلاد
و شاء ربنه أن تظل بلايه خيمه

شاءت أقدار الإله بهل الأمر
أن تصير الحرّه زينب باليسر
ولابد تدوس بجدمها عالجمر
حتى لا عالقمه يصعد هالشمر

كل خطوه من تخطيها
تحفظ شرع هاديها
حتى الذي سابيها
داخ وتحيّر بيها
ستر.. خدر.. واعلى أميه تنتصر
شمر.. زجر.. لابد ذكرهم يندثر
،،،،،،،🏴🚩.....🏴🚩،،،،،،،
٧/
انتي مافوق الوصف .. يلّي ما مسّچ ضعف
رغم الاهوال ومصايبها الچبيره
للشريعـه انتـي نـور .. للعقيده صرتي سور
والأميره انتي ولو صرتي أسيره

للشريـعـه يالعقـيـلـه اصبحتي فَي
والنفـوس بنورچ أصبـح بيها ضَي
الديـن لـومـا تضحياتـچ مـاكـو شي
ذكرچ اويه حسين باقي ودومه حي

ثورة وعي تحيها
گلها السبط كمليها
حتى الذي سابيها
داخ وتحيّر بيها
ستر.. خدر.. واعلى أميه تنتصر
شمر.. زجر.. لابد ذكرهم يندثر
،،،،،،،🏴🚩.....🏴🚩،،،،،،،
٨/
هيّه زينب مدرسه .. و منهـج الكل النسـه
وشوف مصداق الكلامي بالزياره
خيم چنهن مو نساء .. وليهن يدنگ الإباء
الفاطـمـيـه لو مشـت چنها مناره

ما يهمهن لو حچي اعليهن يُثار
تظل وحدتهن نـهـج عفّـه اوقار
عدهن استقبال زينب مو شعار
و لذلك يـمـشـن ابليل و نهار

البنت النبي اتعزّيها
و الزينب اتواسيها
حتى الذي سابيها
داخ وتحيّر بيها
ستر.. خدر.. واعلى أميه تنتصر
شمر.. زجر.. لابد ذكرهم يندثر
،،،،،،،🏴🚩.....🏴🚩،،،،،،،

جائز لمن أراد الإختصار،، بالمستهل أو عدد النصوص.

✍🏼علي نوري الحلفي

عند رجوع السيدة زينب لقبور أخوتها

ردّت اظعوني .. وداميه عيوني
من اليسر و اهل الحميه ما تلّگوني
....... ....... ....... .......
(١)
من وصلنه مفترق هاي الطريقين
افترگ دلّالي خويه و صار نصّين
للمدينه گلّـي لو لاهلـي الميامين
گتله يالسجّاد گلبي رايد حسين

جرحي ما يبرد .. ناري ما تخمد
والذي نشدوني حالي صدگ هضموني
....... ....... ....... .......
(٢)
ما أتاني الناگـه تبـرك هيّـه بيـه
ولا آنه بالهونه اجي لاهل الحميه
ارتـمــي من ناگـتـي لابـن الزچيه
مثل ما من مهره يوگع عالوطيه

و كون اتكسّر .. لاجل أبو الأكبر
و كون دونك آل أميه خويه داسوني
....... ....... ....... .......
(٣)
حين شفتك كفكفت برداني دمعـي
ومن گبر للثاني خويه بجرحي أسعي
چنت بحماك و صرت يم گبرك أنعي
حاشه تعرفنـي لونّك شفت وضعي

امغيّره ارسومي .. بكثرة همومي
مره و عالبلدان همّه خويه فرّوني
....... ....... ....... .......
(٤)
كربـلا و لمّـن شفـتـهـا ضكّت الحيل
صرت مثلك چن عليه ساحگه الخيل
ما بگالـي امن الأودهم طرگ العليل
و رگبته للشام ظلّت بالدمه اتسيل

بذمته العيله .. ومنهدم حيله
وآل أميه اگبال عينه حيل ضربوني
....... ....... ....... .......
(٥)
جيتك و راسك يخويه جبته ويّاي
الچان الي من الشمس والعيلته فياي
يقره آيـات الكهف و العجبه مو هاي
العجبه ضربوه بحجاره گبال عيناي

بالحجر ضربوه .. راسك و ادموه
گبال عيناي وگصدهم بس يفجعوني
....... ....... ....... .......
(٦)
كون اجيلك و الگلب مملي مواجع
وكون اودّر خويه عيني من المدامع
جيتك و ظهري انحنى من الفجايع 
مثل جيتك للأخو من شفته واگع

وانكسر ظهري .. واشتكي أمري
لا ابن أمي ولا كفيلي اشكي سمعوني !
....... ....... ....... .......
(٧)
ردت تتلگّانـي خويه يبن الأطياب
تـرى كـلّـش كدرتنـي رفگـة أجنـاب
ياهضيمه الحر يموت ويبقى الغراب
وعيلته سكنن براري وكلهن اتراب

وين كفّالي .. وينظر الحالي
العده بخلافه هضيمه الخصمه يهدوني
....... ....... ....... .......

✍🏼 علي نوري الحلفي

وا زينباه

نـوّخـت نـاگـتـهـا يم گبر الولي
تگلّه وينك يابعد روحي وهلي
.................
١/
نـوّخـت نـاگـتـهـا بالهـم والدمع
منها مكسور الله يعلم چم ضلع
جرعت امصايب أبد ما تنجرع

هاشمـيـه و بيـد اميـه تنـولـي
................. 
٢/
شبعت هموم وجراحات وشتم
و الّلي ما تفزعلـه أهـلـه ينلچم
فاجـده و الحيـل منـهـا منهدم

گوّه تنهض گوّه تمشي بت علي
................. 
٣/
گوّه توگف واعلى همها تستند
وهيّه بت الّي شطر عمر ابنَ ود
حـيـدره و المـوت مـنّـه يرتعد

بنته من عدوانه صارت تنولي
................. 
٤/
تنولي ومحّد حضرها من الأهل
تلتفت چـنـهـا تنادي إعلى الكفل
ترضى خويه لا ولي لاختك يظل

والغرب يا خويه حرگت بمحملي
................. 
٥/
محملي بس يعرف ايدك يا كفيل
و ارجعت هاليوم وحدي بلا دليل
عگب عزوتكم هلي بس ظل عليل

بـعـلّـتـه وبظعوني أصبح مبتلي
................. 
٦/
گوم يا كفّالي و اتلگّه الظعون
لا دمـع ظـلّ الخواتك لا عيون
تقبل الغربه بظعن أهلك يجون

شلون روحي بالألم ما تمتلي
................. 
٧/
گوم يا من بيدك اقطاب الفلك
ردّت امـن اللّوعـه علويّات الك
الحادي مابين الزلم بيهن سلك

عمداً ابكل سوگ مرنه عاذلي
................. 
٨/
بالسواگه عاذلـي حين اليطـر
تصبح اسهام النظر من كل كتر
گلّي بعد اشلون گلبي ينجبر

وادري ياذيك الحچي يا كافلي
................. 
٩/
من عگب شتم النواصب والجروح
النـار اشمروها علينه من السطوح
تنزف اجروحي عتب والمن أبوح

التـفـت مـحّـد فـزعـلـي من هـلـي
................. 

✍🏼علي نوري الحلفي

رجوع السبايا لا يخلفُ حالاً عن خروجهم من الطف الفجيع

🏴🚩
🏴🚩
قصيدة #موشح ... لمولاتي السيدة #زينب عليها السلام عندما عادت بمصائبها وآلامها وشجونها من الشام الى كربلاء..

كربله  تموج  بمصاب  أحزانها
اليوم   ردّت  زينب   الخوانها
،،،،،،،،،،،،،،،،،،،،،،،،،،،،،،،،،،،،،،،،،،
١/
ردّت   بيا   حاله   ردّت    للأهل
امن الرزايا والسبي بيها شحصل 
ردّت  و هالمرّه  من  دون  الكفل

ترادفت من هالمصاب أشجانها
،،،،،،،،،،،،،،،،،،،،،،،،،،،،،،،،،،،،،،،،،،
٢/
ردّت ومن شاهدت وادي الطفوف
اتمنت الكافلها يحضرها و يشوف
بلا چفوف شلون يتلگّه الضيوف

و دم جرت زينب دموع أجفانها
،،،،،،،،،،،،،،،،،،،،،،،،،،،،،،،،،،،،،،،،،،
٣/
بحسرة   الآهات   من  اتكلّمه
ظلّن  ابنات  الرسول ابلا حمه
منهو   يتلگّه   حراير   فاطمه

و الأهل  صرعى  بوسط  تربانها
،،،،،،،،،،،،،،،،،،،،،،،،،،،،،،،،،،،،،،،،،،
٤/
گوم  و  اتلگّه   عيالات   النبي
گوم وانفض عنهن تراب السبي
غيرتك ما ترضى ياذيها أجنبي

وانت ابن سيف الحصد عدوانها
،،،،،،،،،،،،،،،،،،،،،،،،،،،،،،،،،،،،،،،،،،
٥/
ذابلات امن الجرى و بيهن سِده
ناحلات من المشي وسوط العده
أمهات  اخدور  بين  أهل  الرده !

وسط  وادم  فاگده  الوجدانها
،،،،،،،،،،،،،،،،،،،،،،،،،،،،،،،،،،،،،،،،،،
٦/
گوم خويه وانفض اتراب الگبر
اتلگّه زينب هل اجت من اليسر
والعقيله من الجرى ابهمها اتعثر

هذا  حال   الضيّعت   وليانها
،،،،،،،،،،،،،،،،،،،،،،،،،،،،،،،،،،،،،،،،،،
٧/
آه  من  أذكر  مصابي  ابكربله
هنا فجعني بسهم حقده حرمله
هنا شفت عبد الله ساعة مقتله

بدمّه  فاضت  كربله  بطوفانها
،،،،،،،،،،،،،،،،،،،،،،،،،،،،،،،،،،،،،،،،،،
٨/
هنانه شبّوا خيمتي وي محملي
هنا  وگع  جسّام  و الأكبر  علي
هنا عشر خياله سحگت عالولي

تروح وترجع ع الجسد فرسانها
،،،،،،،،،،،،،،،،،،،،،،،،،،،،،،،،،،،،،،،،،،
٩/
هنا   توجّر   نار  كل   امخيّمي
و آنه لا والي و أخو بيه احتمي
اعليه چم طفل ويتيمه ترتمي

و چلّبت  نار  العده  ابصيوانها
،،،،،،،،،،،،،،،،،،،،،،،،،،،،،،،،،،،،،،،،،،

✍🏻 علي نوري الحلفي