من الأبيات الجميلة للشاعر ايهاب المالكي...

انتَ ابالي احسك وين ماروح
واذا وياي تمشي شلون تبعد
شما تلتفت عيني الكاك موجود
ويتراوالي وجهك وين ماصد
اغمض والكه ظلك يمشي بالعين
بحيث من ارد اجيك برمشي تلبد
وانوط عن خيالك واقترب ليك
وتتلاحك روحي تصيرلك سد
حيرة وماعرفت شلون وياك
تصفه ويمشن احساسين بالضد
علية يصول شوكك وانا الاكيك
وعليك خيول ضعفي الجامحة ترد
جرحي وياك ما راويته للغير
مو قصة شماتة وخوف من ند
حلو جرحك واحس تعلقت بيه
واحسب لا تشوفه عيون تحسد
لو كل جرح يشبه جرحك يصير
الا احلف يمين جروح ماشد
اسد بابك بكلبي بغفلت الروح
وتفز مرعوبة روحي تصيح شتسد
انا بحالة تناقض وانقسامات
وصراع وفوضوية وموجد وجد
بحيث انشطر شخصيتين وياك
اكرهك واليحبك يمي يكعد
احط موعد لنسيانك واجي اردود
احط للموعد البيه ننسى موعد
باشد حالات زعلي اتصالح وياك
سماي نجوم بيها وغيم يرعد
واجيك وباعتقادك جابني الثار
وانا من ابعد عليك يجيبني الود
اثور بدمعتي ويتراجع الشوك
وطعم شفايفك بالريج يصمد
بُعدك وافتهمناه طيفك شبيه
كبل ماسامع انا بطيف يبعد
خفت عن لايمر وجفني مطبوك
كمت حتة من انام عيون ماسد
كانك شارد ودمعات العيون
عليك ابين اليمرون تنشد
ناس هواي اليدخلون بالروح
ولكن محد يظل كلها تشرد
وراك تصير وحشة موت بالروح
بس المايخاف بروحي يكعد
حلو وجه الفرح بس شفتي تكول
تبت وبطلت قمصان ماقد
تسالني منو الوياي بجفاك
على دمعتي لو ع الموت تقصد
اطمأن ماشوف وجهي عيون مابيه
على دربك عيوني متانيه ترد
حسبت اطول مسافة لزعل وياك
خطوة وجنا بيها شوية نبعد
كل مانشمي بيها أنفاسنا تضيك
ماتكمل الخطوة للهوى نرد
حجر صدك بماي الواهس يطيح
ثواني ويصفى خلكي وزعلي يركد
تعال الشوك هم بيه فزعة مرات
لهذا على اليموت دموعنا تهد
تعبنا الاصابع خلها ترتاح
كضينا الفركة كلها بيهن نعد
على سنبل اسراري وباجر يجوز
بيها جفوف اليشمتون تحصد
انا بلياك اوقت ساعة الموت
بس بيا لحظه اموتن ما محدد

ايهاب المالكي

تعال الشوك هم بيه فزعة مرات
لهذا على اليموت دموعنا تهد

منك خطوة مني ؟المهم خطوة أتصير
متهمني المسافة المهم نمشيهن
ولو محتار بس شاءت الصدفة أتصير
اشوفك والسنين الضايعة الگيهن
بس احتارمن لاحن بعيني دموع
ينتظرن شسوي احبسهن؟ ابچيهن ؟

ايهاب المالكي

الغيم مد ايده ع راسي والمطر شد حيله


الكاطع🤎🕊️

انا وي ملك الموت عندي زماط
جذابة الجنازة خل يعطلها

محسن الخياط 🤎🕊️

اسافر للمدن بس نقط تفتيش
وادور ع الصحابة ومامش اصحاب
جروح اعداي حاسبهن خراميش
لجن حيل آلمنّي جروح الاحباب

_جبار محيبس🤎🕊️

ونشتاگك..

نشتاگك.. لچم.. واصواب
ومناشغ دمع.. واعتاب
ومسامر.. وطفية ضوه.. وسدة باب

نشتاگك..
لحد ما تمل روح الطين اسامينه
ونصير اتراب

غيث الغزي