الى عبد الله الرضيع ع
...............

يبني تعباني ارباك تعبني
لحظة وعني غايب ياعبد يبني
يوليدي...يعبد الله
يوليدي..يعبد الله
..................

يبني مالي غيرك بالعمر ثاني
حيل اذاني ذبحك يمة اذاني
شوف امك رباب ابمهدك اتاني
نايم عالترابة وعايف احضاني

رد لامك يعبد الله..شنهي غيبتك بلة
شيبني الزمن يوليدي شيبني
يبني تعباني ارباك تعبني
يوليدي...يعبد الله
....................

اگعد يمة يمي وخل الوليلك
چنت كل ساعة تضحك من اناغيلك
هسه الوحشة تكتل بيمن احچيلك
لو بيدي العمر من عمري انطيلك

صعبة فرگتك صعبة..بعدك ماي ماشربة
ذبحك ياعبد اي والله عذبني
يبني تعباني ارباك تعبني
يوليدي... يعبد الله
....................

خذك مني ابوك وگال يروونك
تاليهه ابسهم غادر يفطمونك
ليش ابنص رگبتك ذولة يرمونك
حسبالي نمت من غمضت اعيونك

چنك غارگ ابنومك...ثاري تنزف ادمومك
شربني الزمان اللوعة شربني
يبني تعباني ارباك تعبني
يوليدي....يعبد الله
.........................

شحچيلك ييمة عن تعب گلبي
مو ذنبي تركتك والله مو ذنبي
من ذبحوا وريدك فرهدوا تعبي
بعدك موتي اريدة ادعي من ربي

شلي ابعيشتي دونك...وانه امفارگة اعيونك
دولبني زماني اهواي دولبني
يبني تعباني ارباك تعبني
يوليدي...يعبد الله
.....................

لو ميتة ابدالك ادعي يايمة
ظلمة دنيتي لمن غبت ظلمة
بيدي اگماطك اني يابس ابدمة
ياماي أو تبدة الماي شيلمة

انظر مهدك الخالي...غالي وفارگ الغالي
صوبني صدگ حرملة صوبني
يبني تعباني ارباك تعبني
يوليدي...يعبد الله
......................

الخادم عمار الساعدي
ونسالكم الدعاء

زينب اخيتكم اسيرة
چا وين سادات العشيرة
.........................

چا وينكم اندب يخوتي
محد سمع منكم نخوتي
الله اكبر راح صوتي
وياكم اتمنيت موتي

َولا انسبي ابذيچ الظهيرة
چا وين سادات العشيرة
.......................

هالليلة وحشة وبيهه اذية
من بعد اخوتي الهاشمية
حرگوا ترة اخيامي علية
من وين اجتني الغاضرية

واجروحي ماتنعد چثيرة
چا وين سادات العشيرة
.........................

شفت الهضم انه وخواتي
أصعب حزن مر ابحياتي
بس يخسة واحد طخ عباتي
خيمة أصبحت انه البناتي

الحيرة العشتهه ماكو حيرة
چا وين سادات العشيرة
........................

اركض گمت وسط الصحاري
والشمس تكتل بالظهاري
شفتك طريح ومرمي عاري
ودم النحر ليهسة جاري

وامصيبة الفاگد چبيرة
چاوين سادات العشيرة
.............................

شاب الگلب وياه راسي
والله الزمن وياي قاسي
الله اكبر يااحساسي
يم النهر ممدود عباسي

ذاك الچنت وياه اميرة
چاوين سادات العشيرة
.....................

حگي انه من اعتب عليكم
والله چنت مهيوبة بيكم
هسة يوسفة امذبحيكم
فوگ الرماح امعلگيكم

يضحك علية الماله غيرة
چا وين سادات العشيرة
.............................

هم العلية الكم شكيتة
وسفة الذبحكم رافگيتة
گدامي يضحك عاينيتة
ماشاف دمعي النزليتة

يتمرجل البايع ضميرة
چا وين سادات العشيرة
.........................

الخادم عمار الساعدي
ونسالكم الدعاء

هاية آخر ليلة الي ودعوني
باچر امذبح ترة تشوفوني
هاية ليلة الآخرة.....هاية ليلة الاخرة
.................
هاية آخر ليلة وياكم سوه
بگت چم ساعة واموت بنينوه
باچر يحرموني حتى امن الهوه
والسهم باچر يطفي اعيوني
هاي آخر ليلة الي ودعوني
..................
خل اودعكم تره باچر عذاب
تنذبح وكت الصبح شيب وشباب
باچر تشوفون دخان أو تراب
وانة جثة اعلة الأرض تلگوني
هاية آخر ليلة الي ودعوني
..................
باچر تظلون بعدي ابلا حمة
وكربلة تمطر وراية بس دمة
هالارض تبچي الذبحتي والسمة
امي فاطم وي علي ينعوني
هاية آخر ليلة الي ودعوني
....................
باچر النسوان تبگة ابلا ولد
تنذبح كل الولد وبكل حقد
ارد اوصي كل مرة خل تستعد
لاتنزلن اي دمع سمعوني
هاية آخر ليلة الي ودعوني
..................
باچر الخيمات بالطف تشتعل
بس اصبرن مايمسچن اي نذل
استعدن باچر اللف الحبل
من ورة ما عالارض يرموني
هاية آخر ليلة الي ودعوني
...................
ياعيالي هذا اخر ليل الي
خلوا نتوادع سوية ياهلي
باچر ايذبحوني چيف ابن علي
حتى گطرة ماي ماينطوني
هاية آخر ليلة الي ودعوني
...................
بس اوصيكم يهل بيت النبي
لاتشوفن اي دمع للاجنبي
باچر تروحون كلكم للسبي
وبرمحهم باچر يعلگوني
هاية آخر ليلة الي ودعوني
....................
الخادم عمار الساعدي
ونسالكم الدعاء

قصيدة للتطبير

بالقامة يوم العاشر
عالهامة أصبح طابر
حيدر حيدر حيدر حيدر
.................
فدوة انه كلي لحسين
عالهامة اطبر والعين
مو طبرة اطبر الفين
وميهمني حچي الفاجر
عالهامة أصبح طابر
حيدر حيدر حيدر حيدر
...................

مااهتم الحچي الناس
بالقامة ادگن عالراس
لحسين ادگ والعباس
ليلية موبس باچر
عالهامة أصبح طابر
حيدر حيدر حيدر حيدر
....................
من العقيلة امعلم
بالينتحس مااهتم
من يطلع ابراسي الدم
اتذكر انه الحافر
عالهامة أصبح طابر
حيدر حيدر حيدر حيدر
.....................
للسلبوه هندامة
متكفي حتى القامة
كل جسمي اطگ اعظامة
وامقصر انه اشكاسر
عالهامة أصبح طابر
حيدر حيدر حيدر حيدر
.....................
متهمني طبرة راسي
لحسين اضحي انفاسي
لجروحة ابد ماناسي
لو يمة اموتن حاضر
عالهامة أصبح طابر
حيدر حيدر حيدر حيدر
........................
متهمني هاي اجروحي
لحسين اطبر روحي
للدوم أظل ابنوحي
ولمصيبتة ماناكر
عالهامة أصبح طابر
حيدر حيدر حيدر حيدر
........................
ونسالكم الدعاء
الخادم عمار الساعدي

عباس يعيوني عباس يعيوني
بالغربة اناديك وعلي عباس يعيوني
....................

يعباس الغرب ذلة... وابضعنك غرب تحدي
دونك ياابو فاضل...امشي بلا أخو الوحدي

تمنيت الغربتي هسه تلفيني
بيدك چا مسحت الدمعة من عيني
حال الموت وسفة بينك اوبيني
غيرك يابو فاضل من يباريني

لو ميتة خيعوني لو ميتة خيعوني
چا مامشيت الهاليسر لو ميتة خيعوني
.....................
يعباس الحچي يكتل...والسان العدو جارح
يگلولي الاخو وينة....تركنا عالنهر طايح

كتلنة كافلج كلهم يگلولي
واعيون الشماتة اتعاين الطولي
هذولة الچانوا ابجالك يدنگولي
هسة من غيابك ظهري كسرولي

الاسياط بمتوني الاسياط بمتوني
طول الدرب يابا الفضل الاسياط بمتوني
....................
يعباس الغرب بية...گامت كلهه تتشفة
بعنادچ يبت كرار....گطعنة كافلج چفة

يمن غايب علية بيش اشد حيلي
منو البعدك اذا اوگع يتچيلي
العمر ظلمة ابغيابك ياگمر ليلي
ترة امشيبة عليك ابكل تفاصيلي

ياخوية اذوني ياخوية اذوني
اي والله من گد الحچي ياخوية اذوني
................
يالعشت العمر وياك....مامتعودة عالفرگة
ربيتك بدي عباس...بيك اهواية متعلگة

چنت ابرايتك اتغطة ليلية
يابلسم حياتي أو ياهوه الرية
يمن تارس سنيني كلهه حنية
هسه ابلا وجودك أنه مسبية

كلهم تولوني كلهم تولوني
بالغربة نسوان أو زلم كلهم تولوني
....................
تعبانة اشكثر عالنوگ...افرن ديرة وي ديرة
اطفال أو حرم وياي....والوادم بلا غيرة

نار البالگلب ياخوية حراگة
من ابعيد اصيحن وانه عالناگة
مشتاگة الك اي والله مشتاگة
يمتة اتفض غربتي حتى نتلاگة

بالغربة تعبوني بالغربة تعبوني
يمك اريدن اندفن بالغربة تعبوني
.....................

الخادم عمار الساعدي
ونسالكم الدعاء

امنية خادم يزينب كون أشاهد گبتچ
اوصل البابچ وابوسة واقرة ليچ ازيارتچ
ياحوراء... ياحوراء
...............
يالعقيلة...ارد ازورچ...ادعي الله تنكتبلي هالزيارة
ابگلبي حسرة...وامنياتي...گبل لاموتن اشوف انه المنارة
اه يزينب...كل محرم....مثل تسبيح ابلساني هالعبارة
ياغريبة....ياصبورة....مابرد گلبي المصابچ بي حرارة

كل محرم من اذكرچ مني تنزل دمعتي
بالمجالس لجلچ الطم على الهام اوگصتي
ياحوراء... ياحوراء
.................
مثلچ انتي...ماكو حرمة....تحمل أنواع المصابب من زغرهه
ماجزعتي...كل حياتچ....مانسيتي لوعة امچ لو كسرهه
للهواشم ...صرتي امهم....شفتي هامة والدچ والي طبرهه
شفتي اخيچ..ابو محمد...چبدته المسمومة لوعتهه اشكبرهه

ابدنيتچ ماشفتي راحة دنية ضدچ مايلة
من اخوچ حسين متي من وكع نص كربلة
ياحوراء.... ياحوراء
.....................
ارد اجيلچ...ابچي يمچ...وانعة لمصاپ الجرة بالغاضرية
يمچ الطم...هذا صدري...يم ضريحچ كون اورمهن ادية
حيل اصيحن...اه يزينب....الدم اخوتچ ارد اونن كل مسية
بية لوعة...عالجرالچ...گلبج الله يساعدة ابموتت رقية

بالغرب وحدچ يزينب والله يكسر خاطرچ
رغم ماچنتي وحيدة اهناك الله امصبرچ
ياحوراء.... ياحوراء
...................
ابگلبي لهفة...يم مقامچ....مثل طير وكون احطن يم ضريحچ
بعالي صوتي...اه يزينب...الا اخلي الدنية تسمعني امن اصيحچ
يالعقيلة...وفقيني...كون اخدمچ كل حياتي استميحچ
راح اظلن.... عمري كلة...ماابطل لحظة وحدة عن مديحچ

كون اظلن خادم اني تسجيلني ابدفترچ
راح اظلن عمري كلة العن الي اسرچ
ياحوراء.... ياحوراء
...................
الخادم عمار الساعدي
ونسالكم الدعاء

فارگتني يبن ابوية...ابلا أخو ظليت اعاني
شلون اشمن هوه بعدك ..خوب اموتن احسن اني
راحت الگعدة السوية
ياذبيح الغاضرية
................

يخوية من رحت عني
مثل ميتة وعلي چني
وحگك ياابو الأكبر
زماني اهواية دوهني

يبو گلب الصدگ ابيض
أخو مثلك ميتعوض
مكانك بالگلب والروح
عليك ادموعي ماتنفض

يالماخذ حياتي وياك...يبن امي ونضر عيني
ياهو ايعوضك يحسين....يالتمشي ابشرايني

كسرتك كلش چبيرة...يااخو أو خال الجهالي
لو آلية اولاد مية...هم مچانك يبقة خالي
فگدتك بانت علية
ياذبيح الغاضرية
..................
وسافة بهالشمس بايت
ابصدرك چم سهم فايت
اعاين جسمك المذبوح
عليه يضحك الشامت

اجيت وصيحت عالتل
اگولن بي نفس ماظل
شفت صاعد شمر فوگاك
اموتن احسن ولا ظل

چاويك التراب هواي...حار ويلچم اجروحك
عالتل صيحتلك حيل...وانت تنازع ابروحك

امگطعة جسمك هالحوافر...ماعرفتك من اجيتك
چم حجر حافر جبينك....والدمة امغرگ لحيتك
طشروك اعله الوطية
ياذبيح الغاضرية
.................
الفرح بغيابك اتحرم
وحگك كلشي بيه اظلم
چنت اتمنى كون وياك
يخوية بهاللحد انطم

سوية نندفن حلمي
عفتني ويبست دمي
فقط جلد وعظم ظليت
عميت اعيوني يبن امي

ياخوية أو عمود البيت...ياشيخ العشيرتنة
الأيام انتهت وياك...خلصت ذيچة عشرتنة

مو بدية تدري بيه....جثتك بالطف عفتهه
لليسر مشوني گوة....ودفنتك ماحاضرتهه
عالترب عفتك رمية
ياذبيح الغاضرية
.................
وسافة لليسر اطلع
آلية ماكو أخو اليفزع
اذا اصيحن عليك حسين
علية اسياط تتگطع

وحگك هالغرب شدة
وحدة امچلبة ابوحدة
تعبنة من الضرب ياخوي
ننام أو احنة بالگعدة

گمنة اعلة التراب انام....من بعد الخيم كلهه
گدامي العدة يگولون...زينب وينه كافلهه

تالي ماتالي بخرابة....يابو الأكبر بيتونة
امدللاتك احنة چنة....والله بعدك موتونة
شفنة بالغربة المنية
ياذبيح الغاضرية
................
الخادم عمار الساعدي
ونسالكم الدعاء

لحبيب ابن مظاهر الاسدي


انه مجنون حسين...لجلة ميت مرتين
وأفتخر كل الفخر انه شيخ الانصار
................
من شبابي...حسين احبة
حسين جنني ابمحبتة والله يدري
شايل اسمة...وسط روحي
هو كلشي الي بحياتي هو عمري

حسين سودني ابغرامة...من الزغر حد ماكبر
حيل احب حسين اني....يشهد اعليه الدهر
لو الف موتة ابسبيلة....هم اموتن وابفخر

انطي كلشي للزين...لجلة ميت مرتين
................
چنت اتبعة...لمن يمشي
چنت اشم ريحة اهدومة واثر رجلة
ياعطورة...عطر جنة
كل اثر من يمشي هو اني اقبلة

چنت اتمنى اشوفة ...حتى لو مرة ابعمر
مدري شيصير ابحياتي....حيل اذوبن من يمر
وين مايمشي اتبعة....حتى لو دربة جمر

هو مصباح الدين...لجلة ميت مرتين
..................
من اجاني ...البيتي مرة
من السطح من عاينتله الموت اجاني
من لزمني...بيدة هو
انه ميت لكن ابچفة حياني

من بعد موتي الاجاني...أنه بچفوفة عشت
وجهه مثل الشمس يزهي...مثل وجهه ماشفت
من الزغر انه عشگتة...لحد ماني شيبت

انه وياه كل حين...لجلة ميت مرتين
...............
ابهذا كبري...واني اتبعه
ابكربلة وياه نصرتة وبيدي راية
شلون اعوفة....هذا امامي
من البداية تبعتة أو للنهاية

لجلة ضحيت ابحياتي...وانه منطيه الوعد
لو يگطعوني ابمحبتة....هم اردن ليه بعد
ابد ماعوف الاحبة...اي وحگ الله ابد

مثلة ماحاب اثنين.... لجلة ميت مرتين
............
الخادم عمار الساعدي
ونسالكم الدعاء

ثامن عجايب....هاي المواكب
............
متحضرة كل هاي الخدم
ترسوهه الدروب ابخيم.....حياهم

شيب وشباب امحزمة
كل خادم وكل خادمة......حياهم

والله عجيبة هالشعب
مايهتم ابحر أو تعب......حياهم

كل الدول متعجبة
زلم العراق امعزبة......حياهم

خدم...كلهه امشاركة
خدم... امن الله امباركة
خدم....تخدم ضاحكة

مثل الكواكب....هاي المواكب
.....................
ذي قار والبصرة ونجف
كل خادم ابموكب هتف....للزاير

وديالى والموصل سوه
كركوك اجوهم باللوه.....للزاير

حلة أو سماوة تنتظر
من بعيد تشتم العطر.....للزاير

بغداد حيل امعدلة
صرختهه تدوي ابياهلة....للزاير

هلة....بالزاير كربلة
هلة....البيرغ شايلة
هلة....جدمة نقبلة

صاحت مراحب....هاي المواكب
......................
كلمن يواسي ال النبي
ان چان عربي أو اجنبي.....خدامة

لاكردي عدنة أو اعجمي
كل الطوائف تنتمي.....خدامة

نخدمهم ابكل الطرق
من الغرب من الشرق .....خدامة

ماهمنة حر ولا شمس.
من نخدم الزاير نحس.....خدامة

شرف....حسين ابخدمتة
شرف....هاي ازيارتة
شرف....والله ابنصرتة

إخوة وحبايب ....هاي المواكب
......................
كل الشعوب اتوحدت
بالاربعين اتواجدت......مشاية

يم الضريح الكل سوة
والشيعة طلعوا فد لوة....مشاية

لو دهر نمشي بهالسفر
كل احنة عشرين بصفر ... مشاية


حتى السماء السابعة
حور أو ملائك طالعة .....مشاية


سوة....جن أويه الانس
سوة....سدوهه الشمس
سوة....يفدون النفس

ضد النواصب....هاي المواكب
................
الخادم عمار الساعدي
ونسالكم الدعاء

خوية بأربعينك جيت ياعباس حاچيني
من بعد اليسر رديت يم گبرك يضي عيني
ياعباس ياخوية ..ياعباس ياخوية
................
گظيت أربعين أيام خوية اعليك مشتاگة
اول ماوصلت اعليك گلت اوياك اتلاگة
من شفت الگبر عباس روحي عافت الناگة
صيحت اشكثر ياخوي ريجي نشفت ارياگة

جيت اعليك متعوبة
عندي اطفال مرعوبة
انه اختك يبعد الروح خافن كون ناسيني
من بعد اليسر رديت يم گبرك يضي عيني
ياعباس ياخوية...ياعباس ياخوية
............
قصتي باليسر عباس عندك خلگ تسمعهه
امدللتك وحگ عباس مانشفت مدامعهه
من لحظة طحت عالماي گوة الكلمة اطلعهه
واعيوني عليك اليوم كون هنانة اشلعهه

يمك موتتي إمبينة
عود انساك مو هينة
يم گبرك دعيت هواي ريت الموت يلفيني
من بعد اليسر رديت يم گبرك يضي عيني
ياعباس ياخوية.... ياعباس ياخوية
...................
شحچيلك قصص عباس ضعني ابدونك اشوضعه
طحنة ابناس موش اجواد حچي اهواي شيجرعه
شبعونة سياط الناس ناس تشتم البضعة
لو اشوفك عباتي اشلون فوگ امتوني متگطعة

حچي الشامت اسمعتة
چاوينة السلبنة اختة
بعد ايدك يبعد الروح بس احبال بأيديني
من بعد اليسر رديت يم گبرك يضي عيني
ياعباس ياخوية.... ياعباس ياخوية
..................
ابلا خيماتك الحلوات خوية اعلة الترب نمنة
نتستر من العدوان بيدينة وعلي گمنة
واطفال اتصارخ حيل بعدك ياهو الي يلمنة
وحدة تصيح ابوهه هناك وحدة تصيح ياعمنة

رمشي من البچي شيب
شحچيلك يخو زينب
بكل ديرة العدو عباس فر بيه أو يوديني
من بعد اليسر رديت يم گبرك يضي عيني
ياعباس ياخوية.... ياعباس ياخوية
...............
موش الأولية اليوم من رديتك اهنانة
كبرانة اخيتك حيل والعباس كبرانة
من الشام اه يالشام أنه اهواي تعبانة
جيتك بس جسد عباس بس الروح خلصانة

ضدي الدنية ملتمة
مثلم گلبي شيلمة
سهم الدنية يالعباس نص الروح راميني
من بعد اليسر رديت يم گبرك يضي عيني
ياعباس ياخوية.... ياعباس ياخوية
.................
الخادم عمار الساعدي
ونسالكم الدعاء

أهلا بالزوار....أنتم أهل الدار
يل جيتوا الكربله...بيكم مية هله
أهلا بالزوار
................
عالراس انخليكم
كل عام نتانيكم
كلنة نرحب بيكم....أهلا يالمشاية

انتوا حسين انصاره
واحنة نحب خطارة
نخدم كل زوارة.....الخدمتكم شراية

يازوار حسين....شلناكم بالعين
كل زاير نص هله....بيكم مية هله
...............
شرفتونة اهواية
ابخدمتكم مشاية
ليكم هايه أو هاية.....يالجيتوا المولانه

اليخدمكم ماشابع
الخادم ليكم طالع
واگف نص الشارع....وايعزب بخوانة

اتفضل زاير جاي...اشرب ماي اوچاي
والماشي انقبلة....بيكم مية هله
................
موكب صف يم موكب
امعزب وي امعزب
بيكم كلهه اتچلب....والماشي يعزبونة

كل زاير بين اهلة
من اجدامة انقبلة
شايب شاب أو طفلة.....اليخدمكم خيعونة

من ابو السجاد....الخادم راد امراد
الطب لينة اندلله....بيكم مية هله
.................
ندعي الله اليرعاكم
مايوگف ممشاكم
حتى المهدي اوياكم....يحرسكم ليلية

ظل يحسب كل زاير
ابموكب موكب داير
زاير لتظل حاير.....حاجاتك مگظية

يم حسين الناس....يسگيهه العباس
والبيرغ شايلة....بيكم مية هله
................
هالثورة الشيعية
صارت مليونية
لم عون العلوية.....ملتمة اللطامة

وي زينب والعيلة
يم حسين الليلة
ادخيل حسين ادخيلة....مايترك خدامة

من كل البلدان.....يم حسين اخوان
كل خطوة امسجلة....بيكم مية هله
.............
الخادم عمار الساعدي
ونسالكم الدعاء

مثل الحج يوم المشاية
وانطوفك بيدينة الراية
...............
هاي الزيارة عدنة تعدل حجة
والي مشالك من جهنم ينجة
دمنة ودمائك سيدي ندمجة
ياحجة الله أو ياابو كل حجة

اجينة اعليك زوار...نجي لو نسحگ النار
اليحبك يگصد اعليك...فداك ازغار واكبار

الك ياسيدي حسين...مشت هاي الملايين
فداك الكل يروحون...الك ارواح منطين

صارولك انصار اهواية
مثل الحج يوم المشاية
..................
كل عام الك نتزايد ابعددنة
غيرك وسيلة سيدي ماعدنة
من كل دول اجينة واتحدنة
غير انته ابو الأكبر تظل سيدنة

الك هالناس يمشون...حسين الكل يصيحون
يالاسمك حاء وي سين...بعدهه الياء والنون

دربنة بدمعه جبناه...فقط دمعات وي اه
الشوارع تصرخ ابصوت...حسينأ وا حسيناه

بالشارع سوينة اقراية
مثل الحج يوم المشاية
..................
غصت مشي هاي الكرة الأرضية
يمك نجي وننسة شكو جنسية
نمشي سوة وتتعادل القومية
لافارسي لاكردي لا عربية

الأسامي يمك اطيح...تهب ابهبة الريح
نهر واحد يالحسين....دمعنة لجلك يسيح

الك نتعنة جوگات...فقط ليك الشعارات
ابضريحك مو فقط ناس...اجت حتى السماوات

ابشباچك گلناهه احچاية
مثل الحج يوم المشاية
...................
كل البشر يم حضرتك ملتمة
نعمة المشي محلاهه هاي النعمة
مانتعب احنة من المشي والخدمة
كل الفخر خدام الك نتسمة

الك يحسين خدام...خدمنة أعوام واعوام
يمحلة الخدمة وياك ...نحسهه اشوية الايام

وسافة الخدمة شهرين...الك مانوفي هالدين
محرم وي صفر كون....كبرهن كون مرتين

ابخدمتكم والكل شراية
مثل الحج يوم المشاية
....................
الخادم عمار الساعدي
ونسالكم الدعاء

يمة يمة يمة ..يازهرتي المظلومة
................
يم الحسين...يزهراء...كسرتي اجناحي
گلبي ملچوم...أنه اليوم...جبيرة اجراحي
بيدي الإثنين...على الصار...لزمت اصفاحي
مظلم البيت...ولا يعود...بعد مصباحي

يمة يمة يمة. ...من شوفتج محرومة
يمة يمة يمة....يازهرتي المظلومة
............
يمة زهراء...بالدموع...تركتي اولادچ
صحنة فد صوت...اجه الموت..گبل ميعادچ
ابكسر الضلوع...ورة الباب...صفه استشهادچ
الله مشتاگ...الچ حيل...لذلك رادچ

يمة يمة يمة....يومچ ترة مو يومة
يمة يمة يمة....يازهرتي المظلومة
...............
حتى جبريل..اجه ينوح ..على تابوتچ
حيدر وياه...بالدموع...صبح زاتوتچ
وحدي بالبيت...يزهراء...دردي امروتچ
موحش البيت...وانه وياه...نحن الصوتج

يمة يمة يمة....دارچ تون مالومة
يمة يمة يمة....يازهرتي المظلومة
.................
يمة للضيم...والالام....صدگ عفتيني
اسهر الليل..والدموع....تبات ابعيني
امشيب الراس... من الاه...اشيگضي اسنيني
بلكي بالنوم...بالاحلام....الي تزوريني

يمة يمة يمة.....لا مو الچ هالنومة
يمة يمة يمة.....يازهرتي المظلومة
................
يمة بهموم...والاهات...اخلص يومي
حتى بالليل...اناديج...افز من نومي
كل الهموم...والدموع ....عليه اتحومي
الگبرج انروح....واناديچ....يزهرة گومي

يمة يمة يمة.....نصين أنه مجسومة
يمة يمة يمة....يازهرتي المظلومة
............
ونسالكم الدعاء
الخادم عمار الساعدي

ياخوية عباس.. ماتت اختنة
من گبرك اطلع.. زينب نختنة
ياخوية حظر الواك خل نمشي الهه
زينب وصل ليهه الموت غير احنة اهلهه
ماتت اختنة.. ماتت اختنة
.........

گوم ياعباس خوية للاميرة
حانت اوي مو عون ساعتهه الاخيرة
شلون نتركهه وحيدة لا چبيرة
ظل نظرهه اعلينة خوية بس تديرة
تانتنة ايام...دامع جفنهه
خل نگصد الشام.. نحظر دفنهه
تدريهه اختنة وتريد احنة نصلهه
زينب وصل ليهه الموت غير احنة اهلهه
ماتت اختنة.. ماتت اختنة
...........
خوية هاي ام عون جيتنة تتاني
گوم خل نگصد عليهه انت واني
بغربة خاف تگول محد مااجاني
من بعيد تصيح اريدة الدللاني
تتنطر ام عون.. خل نمشي ليهه
غير أنه وياك.. المدللليهه
تدريهه من سبي الشام زايد حملهه
زينب وصل ليهه لموت غير احنة اهلهه
ماتت اختنة.. ماتت اختنة
..........
خوية جيتنة تتاني لحظة لحظة
والأخت تدري باخوهه من يعوضة
غير چفك جفن اختنة مايغمظة
وغير واحد نعش زينب مايكظة
نعش الأخت لا... محد يشيلة
بس انه وياك.. نشيع العقيلة
ياخوية من جودك جيب مي الغسلهه
قطعة من الواك خوية جيبة ليهه

...............
قطعة من الواك خوية جيبة ليهه
وبيدك تچفنهه رادت ياوليهه
وبالگبر نزل نعشهه وبوس اديهه
حتى عطرك يابو فاضل يبقى بيهه
بنص الگبر ذاك..عطرك تشمة
ومن تشتم الواك.. تگعد تكلمة
بنص الگبر فد ترتاح ها يالكفلهه
زينب وصل ليهه الموت غير احنة اهلهه
زينب وصل ليهه الموت غير احنة اهلهه
............

الفاتحة اقراهه الهه يم گبرهه
تدري من صوتك تسمعة اشگد يسرهه
نور ينزل نص گبرهه ياگمرهه
هذا ابونة َويانة گاعد هم حظرهه
حتى امي وياه.. بالدفنة گعدت
تقره الهه ياسين.. والوحشة صلت
بالجنة هاشم عباس يلتم شملهه
زينب وصل ليهه الموت غير احنة اهلهه
..............
خادم زينب عمار الساعدي

يامسموم هالجينة
يم بابك تعنينة
.............
ياشبل النبي السابع
مثلك والله ماسامع
ساجد عمرك وراكع...ياموسى ابن جعفر

انفاس الظلم كاطع
وانت بسجنك تدافع
يمك يشبع الجايع..... ياموسى ابن جعفر

بسمك حيل نادينة
يامسموم هالجينة
.................

الكون بطيحتك مغبر
كل الأنبياء تحضر
يحدي القافلة حيدر.... ياموسى ابن جعفر

الوحي من السمة كبر
سموا موسى بن جعفر
ينحب والد الكوثر.... ياموسى ابن جعفر

حزن حسين رد بينة
يامسموم هالجينة
................
كل الكون مشاية
بسمك نرفع الراية
يمك كلهه عناية.... ياموسى ابن جعفر

الشيعة قسموا ابهاية
كل الجوك وفاية
ماناسيك مولاية...... ياموسى ابن جعفر

دربك هاذ ماشينة
يامسموم هالجينة
................
الشوارع كلهه متروسه
جينة اعليك ياموسه
شباچك سوة انبوسه... ياموسى ابن جعفر

عين اعداك مفگوسه
هوسنة ابفرد هوسه
هالطاغين مخلوسه.... ياموسى ابن جعفر

رغمأ عاليعادينة
يامسموم هالجينة
..................
يكتل سيدي امصابك
جينة الليلة بعتابك
نشتم جينة بترابك... ياموسى ابن جعفر

احنة سيدي احبابك
جينة نطرق ابابك
لعنة اعله الذي صابك.... ياموسى ابن جعفر

من نورك تضوينة
يامسموم هالجينة
............
ونسالكم الدعاء
الخادم عمار الساعدي

رايح بعيد ...يبوية رايح بعيد
كوم اجه العيد. يبوية گوم اجه العيد
ياعلي امتانيتك...فدوة رد البيتك
رايح بعيد
.............
بوية عشت أوياك انه ابذيچ الاسنين
محلة گعدتنة سوية ياضوة العين
أنه وياك واخوتي اجمل اثنين
وابو فاضل يمي گاعد ذاك الحنين

اجمل أيام... عشتهه ..اجمل أيام
دنيتي مني ..خذتهه...اجمل أيام
ماكو من حنيتك.... فدوة رد البيتك
رايح بعيد
..............
بوية اسولف وي روحي والحچي هواي
ماعرفت الدمعة والله وانت وياي
أنه شجرة وانت لية ياعلي الماي
عيني ذبلت من غيابك هاية وي هاي

عيني الاثنين...خذتهن..عيني الاثنين
من رحت...مانشفتهن...عيني الاثنين
ابطبرتك حبيتك... فدوة رد البيتك
رايح بعيد
..............
موتك برمضان وسفة ياعلي حان
جنت ارتاح من اسمعك تقرة قراءن
ابصوتك الخاشع يهيد كل الاحزان
هسة من طبروك حيدر يبجي الاذان

وسفة طبروك ...ابصلاتك..وسفة طبروك
بالفجر حانت...وفاتك...وسفة طبروك
والدمة ابخاچيتك... فدوة رد البيتك
رايح بعيد
.............
منكسر خاطرهه زينب من الأيام
صرنة من دونك يحيدر كلنه ايتام
وانت مثلك ماكو واحد صلة لو صام
مو فقط يتمت ولدك كل الاسلام

كل الاسلام...ابنوايح...كل الاسلام
ياعلي هالليله..طايح...كل الاسلام
تگعد اترجيتك... فدوة رد البيتك
رايح بعيد
................
ياعلي والله المصابك مظلم الكون
مااصدك بوية رايح فوگ المتون
كون أموت ولاتشوفك ذني العيون
بوية ماتت من غيابك بنتك ام عون

زينب اتنوح ...اوهضيمة...زينب اتنوح
صايرة بدونك..يتيمة...زينب اتنوح
بالگلب ضميتك...فدوة رد البيتك
رايح بعيد
..............
الخادم عمار الساعدي

ليسـتة #مؤسسة منبريون الحسينية🌻.
#التثبــيت_سـاعـه
#الحــــــــــذف
بـعـــد نشر اللسـتـةّ بـ4  سـا؏ـات
� غَـير مبري الـذمـةّ ٲمـام الله ڪـل من يـحذف البــوت دون ؏ـلمنا
استقبل 300 عضو
━━━━━━━━━━━━━━━━━━
للإشـــتِـراك 👇🏻.

وإرسل قناتك هُنا : @ahmed_alziwar0

--------------------------------------------------

قناة تعليم الرواديد الالحان
https://www.tg-me.com/ahmed_alziwar1