تفاقم الأمر واستفحل!
دبّت في ممرات المدينة حياة جديد..يسير فيه النعش وراء النعش..يكتظ بالمشيعين!
وأحيانًا تتابع النعوش كالطابور.
في كل بيت نواح!
وبين ساعة وساعة يُعلن عن ميّت جديد.
لا يفرق هذا الموت الكاسح بين غني وفقير، قوي وضعيف، امرأة ورجل، عجوز وطفل.
إنه يطارد الخلق بهراوة الفناء!

************
************

تفاقم الأمر واستفحل!
طاردوا الموت بهراوة البقاء!
فالموت حق والمقاومة حق..
فرّوا من قدر الله إلى قدر الله..
لزموا بيوتهم..
ودعوا الله مخلصين له الدين لئن أنجيتنا لنكونن من الشاكرين..
.
.
يا للطف الله!

أنجاهم..

وكانوا من الشاكرين <3 !

#ARK

فتر حماسه..
انطفأ إلهامه..
جلّله الخجل!
عاتب نفسه..
عنّف ذاته..
كره ضعفه..
حزن عحاله..
ومات قلبه!!!
.
.
ممكن هالشعور توّلد في داخله لما شعر نفسه ضعيف ومقصّر حتى زمن البلاء!
قرأ بوست إنه الإنسان لو ما رجع لربنا بهذا الوقت فمتى ممكن يرجع؟
وإنه المعصية في زمن الجائحة بتعكس موت قلب مرتكبها!!!
.
.
بس ليه أرضى لبوست يحط حدود بيني وبين ربنا؟
وعلى أي أساس حكموا بموت قلبي؟
أنا صح قصّرت وضعفت، بس لسه بحب الله!!
لسه بطلب منه يهديني ويساعدني وياخذ بإيدي..
لسه بعد كل غلط بندم وبقول يا رب اجعلها آخر مرة..
لساتني بصحى من النوم وبنوي أعمل خير أزاحم فيه كل غلط صدر مني..
.
.
ما رح أسمح لبوست يهزّني ويحبطني..
ولا لأي شخص يحط حواجز بيني وبين ربي..

وقرر يرد عليهم كلهم: بسجــــــدة!
سجدة صادقة..
مع دمعتين نزلوا من قلبه..
فضفض فيها لربنا ضعفه وحبه وصدقه..

كانت هالسجدة كفيلة باسترداد حماسه..
وحياة قلبه!

--------------
بينّا وبين السما مسافات ما بتنّعد !
وبينّا وبين الله سجـــــدة ^^ <3

وَإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَانِ

#القرآن_الجميل
#ARK

البنت اللي كانت بتصرّخ أثناء ولادتها..
ما قدرت الطبيبة تهدّيها غير لما حكتلها: اذكري الله..اذكري الله..

والممرضة بعد سنوات من شغلها بتحكي:
ما كنت قادرة أعمل إشي للناس اللي بموتوا وبحتضروا قدامي غير أقلهم:
احكوا لا إله إلا الله..

حتى لما تشوف طوشة في الشارع، بقوم واحد من الناس وبقلهم:
يخوان..وحدوا الله!
في الحقيقة هالكلمة كفيلة بإخماد مشاعرهم المضطربة وقتها..

لما تعصب وما تعرف شو تحكي..بشكل عفوي جدًا بتقول:
لا إله إلا الله بــــــس..!

وغالبًا لما يدهشك شيء:
ياااااا الله !

لما يصير معك إشي حلو.. أو حتى إشي سيء..
ما برتاح قلبك إلا لما يتنفس بكلمة: الحمدلله..

في لحظات تعبك وقلقك وضياعك وهوانك..
مش بتحكي: يا رب ؟!

لو سألتك شو بتحب تكون آخر كلمة بحياتك؟؟
رح تجاوبني من غير تردد: لا إله إلا الله..

---------------
(الله)
في كل أزمة!
في كل فرحة ودهشة..
في اللحظة اللي بهددك فيها العالم باجتياحك..
أو فايروس بهدد حياتك وحياة أحبابك..
(الله) في كل أحوالك وظروفك..
حتى بلحظة لما الموت ينزع روحك..

.
.
.
(الله) الجواب النهائي لكل أفكارك وأسئلتك!

ذَلِكَ بِأَنَّ اللَّهَ هُوَ الْحَقُّ وَأَنَّ مَا يَدْعُونَ مِنْ دُونِهِ الْبَاطِلُ وَأَنَّ اللَّهَ هُوَ الْعَلِيُّ الْكَبِيرُ

#القرآن_الجميل
#ARK

لقد مات الإله!

الإنسان الآن هو الإله..
هو صانع قدره ومصيره..
وكل أدوات العلم والحضارة بيديه..

لا سلطان إلا الطبيعة، ولا منهاج غير العلم..
ولّى زمن الصلاة والدعاء لقوة فوق الطبيعة..
الإنسان وصي على نفسه..
يجب أن يعود لنفسه، وأن لا يغترب عنها بالخضوع لما وراء الكون..

لا شيء ورا هذا الكون..
مات الإله..

لقد قتلناه!
----------------
صاحب عبارة (موت الإله) كان ملحد بطبيعة الحال^^
وبالتالي هو ما بعترف أصلاً بوجود إله حتى يعترف بموته..
كان بقصد: فكرتنا عن الإله ماتت!

وفي الحقيقة هالعبارة تكاد تكون مطبّقة في معظم الدول الغربية.
فسياسات الدول ونظرتها للحياة والكون منبثقة من منطلق أرضي بحت، وبتستبعد وجود قوة عظيمة وراء هذا الكون.

للأسف هالعبارة سببت للبشرية كوراث ومصائب لا تحصى..
ومثل ما بقول دوستويفسكي في الجريمة والعقاب على لسان أحد أبطاله:
«إذا لم يكن الله موجودًا فكل شيء مباح حتى الجريمة»!

فلسفة (موت الإله) سببت إلنا:
حروب، وفقر ومجاعات ودمار، وانتحار، وجرائم واغتصابات، وأزمات للإنسان في العصر الحديث، وأزمة ثمن التقدم، وتلوث بيئي، وهيمنة للنماذج المادية والكمية والآلية، وأزمة المعنى، وضمور الحس الخلقي، وهيمنة القيم النفعية، وغياب المركز، وتفشي النسبية المعرفية والأخلاقية، وسيادة العلاقات التعاقدية بدل التراحمية، وسيطرة الدول على الأفراد، وتآكل الأسرة، وبداية اختفاء ظاهرة الإنسان، وظهور فلسفات معادية للإنسان، والعدمية الفلسفية، والإحساس بالعبث، وتراجع الفردية والخصوصية، والتنميط، وسيطرة الإعلام على البشر، والتسلع (يعني تحويل الإنسان لسلعة) والتشيؤ (يعني تحويله لشيء).

وهذا كله يؤدي في الحقيقة
لموت الإنــســـان !

----------------
فايروس لا يُرى بالعين المجردة استطاع أن يظهر لهذا الإنسان "الإله" حقيقته وضعفه!

القرآن يخبرنا متعجبا:

قُتِلَ الْإِنسَانُ مَا أَكْفَرَهُ!!!
مِنْ أَيِّ شَيْءٍ خَلَقَهُ؟؟؟
مِن نُّطْفَةٍ خَلَقَهُ فَقَدَّرَهُ
ثُمَّ السَّبِيلَ يَسَّرَهُ
ثُمَّ أَمَاتَهُ فَأَقْبَرَهُ !!
.
.
.
لقد مات الإله!

يرد "جياني فتيمو" و "ديفيد كبوتو" بتعبير جميل جدًا على مقولة موت الإله بقولهم:
نحن الآن نعيش في زمن [موت "موت الإله"]
The death of the death of God !

#القرآن_الجميل
#Ark

لو سمحتوا
هسا أنا عندي سؤال أو مشكلة..

أنا شب بقرأ كثير وعندي اطلاع مرتب على كثير مجالات، وأحيانا بحضر أفلام وبحاول قدر الإمكان أستفيد منها، وعادي بشتغل زيي زي هالناس وبضطر بحكم شغلي أتعامل مع ناس بختلف معهم فكريَا..

يعني كثير صادفت بحياتي ناس صور بروفايلاتهم مع كتب، وبنزلوا بوستات عميقة، لكن مع أول نقاش كنت أكتشف إنهم فارغين تمامًا..
حتى كنت احيانا أشرح إلهم أو أصحح إلهم أفكار بدّعوا إنهم بآمنوا فيها..

مرة شب بحكيله كيف تبنيت هالفكرة بدون ما تقرأ ولا تعرف إشي؟؟!
جاوبني: المهم إنها إشي ضد الدين ^^
.
.
آسف استرسلت بالكلام..
هسا أنا سؤالي أو مشكلتي إني قد ما قرأت وحضرت أفلام وقد ما تعاملت مع ناس بختلف معهم..

إلا إني لسه بحب الدين!!
وبشوفه إشي صح..
لساتني بروح عالمسجد بكل شغف..
وبحمل المصاحف عن الختياريه حتى أنال دعواتهم..
وما بعرف أنام إلا عصوت المنشاوي..
وقد ما قرأت روايات بتظل قصص الصحابة المفضلة عندي..
ويا الله شو بشتاق لسيدنا مصعب بن عمير.. وشو بكيت لما مات سعد بن معاذ..!
وقد ما قرأت كتب بظل القرآن كتابي المفضل..
وآية وحدة كفيلة تصنع يومي وحتى حياتي..

ومشكلتي إنه ما عندي مشكلة مع البخاري ومسلم!
ولا عندي هالشبهات عن الدين..
ومقتنع بأحكام الدين بشكل لا يوصف..
بالعكس قلبي بحب يسمع ويستسلم لــ: قال الله وقال الرسول..

تخيلوا لما أعمل غلط..بعترف إنه أنا غلطان ومقصر وضعيف..
وما ببرر غلطي بالإنقلاب عالدين.!!

مشكلتي إني بحس حالي صعب أنهزم قدام الناس اللي بختلف معهم..
ولا فارقة عندي يتقبلوني، ومش مستعد أميّع الدين وأفصله على مقاسهم..
.
.
جد احكولي كيف أعمل فيها الحر والمتمرد واللي بفكر خارج الصندوق واللي قرر يِعمِل عقله وينقلب على الموروث البائد والمتخلف والرجعي!!

يعني لو صرت هيك ممكن أصير بنظركم شخص فهمان وواعي ومثقف؟
حصير هيك بنظركم..صح؟!

----------------
مرة حملت كرسي لحج في المسجد وجبتله مصحف..
وقتها دعالي: روح الله يثبتك!

وقلبي لحظتها قال آمين..

وَلَوْلاَ أَن ثَبَّتْنَاكَ لَقَدْ كِدتَّ تَرْكَنُ إِلَيْهِمْ شَيْئًا قَلِيلاً * إِذاً لَّأَذَقْنَاكَ ضِعْفَ الْحَيَاةِ وَضِعْفَ الْمَمَاتِ ثُمَّ لاَ تَجِدُ لَكَ عَلَيْنَا نَصِيرًا

#القرآن_الجميل
#ARK

‏«اللهم قد أصبح الصبح، وطفق الناس يغدون ويبتغون من فضلك، ولكل منهم حاجة، وحاجتي عندك أن تغفر لي».

- عامر التميمي [توفي في زمن معاوية]

لما ربنا بعد كل غلط ييسرلي أستغفره بشكل عفوي..
أو لما يصحيني فجأة قبل الفجر والاقي نفسي ساجد بين إيديه ببكي..

لو ما بدو يغفرلي معقول يحرك لساني لأستغفره؟
أو يصحيني قبل الفجر حتى أقله آسف وأطلب عفوه؟!
.
.
بكل مرة بغلط فيها بفقد الأمل من نفسي، خصوصا إنه بكل مرة بحكي آخر مرة وبرد برجع لنفس الغلط!

بتيجي رحمة ربنا بتدّاركني وبتنتشلني من لحظات اليأس لحسن الظن فيه وبنفسي..

ما قدرت أعد المرات اللي ربنا أعطاني فيها فرص..
تخيلوا إنه ما بين كل صلاة وصلاة كفارة لما بينهم..
وكمان ما بين الجمعة والجمعة
ومن رمضان لرمضان..

وبكل مرة بقرر فيها أوقف بين إيديه بسامحني..

شو بحب أصرّ عليه يغفرلي..
شو بحب شعور لما أقله مش إنت يا رب بتحكيلنا مين عنده ذنب أغفرله؟!
هي أنا عندي ذنوب كثيرة..
رح تغفرلي؟
حاشاك وإنت الكريم تردني وما تغفرلي..

وبكل مرة ومع أول دمعة بقذف في قلبي شعور إنه غفرلي!
.
.
-----------------------

تعلق شيخ من أعراب طيء بأستار الكعبة ودعا:

"اللهم إن استغفاري مع إصراري لؤم، وإن تركي الاستغفار مع علمي بسعة عفوك لعجز،
فكم تتحبَّب إليّ بالنعم مع غناك عني، وأتبغّض إليك بالمعاصي مع فقري إليك،
يا من إذا وعد وفى، وإذا توعّد تجاوز وعفى،
أدخل عظيم جُرمي في عظيم عفوك يا أرحم الراحمين.
<3

* هالمرة دوركم تختاروا آية من #القرآن_الجميل
#ARK

ممكن أغلبكم شاف فيديوهات (للجنازة الراقصة)^^
مجموعة من الأفارقة حاملين نعش وبرقصوا..

هالفرقة في غانا وهدفهم يخففوا عن أهل الميت حزنهم..
يعني خلص بكفي دراما ودموع وكآبة ونكد وعياط..خلينا نرقص ^^
والسؤال المهم: إذا هيك بعملوا في الجنائز، شو بعملوا في الأعراس؟ : ))

وعفكرة ^^
طقوس الموت والجنائز والحياة بعد الموت على مرّ التاريخ غريبة وعجيبة..
يعني عند قدماء الإغريق كانوا يحطوا قطعة معدنية بفم الميت، لإنهم كانوا يعتقدوا إنه "شارون" رح يطلب من الميت أجر على عمله.
"شارون" كانت وظيفته ينقل الموتى من نهر "ستيكس" لمملكة "هاديس" اللي فيها بمكثوا الموتى بانتظار الحكم على مصيرهم الأبدي!

والقدماء المصريين كانوا ينتزعوا أحشاء الميت ويتركوا قلبه، لانه القلب باعتقادهم هو الشيء الوحيد اللي رح يتم وزنه من قبل الآلهة بعد البعث.

والفايكنج كانوا يقتلوا خدّام السيد اللي مات حتى يخدموه بعد موته!

وعند بلاد الغال كانوا يدفنوا الموتى محمّلين برسائل لأحبابهم اللي ماتوا قبلهم..

وعند الهندوس والبوذيين وكثير من وثنيي إفريقيا بعتقدوا إنه الروح ما بتروح لعالم آخر، لكنها بتحل في جسم وليد جديد..
وحسب أعمالك الصالحة أو الطالحة يتم اختيار الحاضن الجديد لروحك..
يعني ممكن تكون في جسد رئيس قبيلة لو كنت منيح..
ولو كنت عاطل فممكن تكون في جسد صرصور شرير بخوّف البنات..
وممكن بأي لحظة واحد يدعس عليك ويفعصك بالغلط أو مش بالغلط ^^
.
.
.
وفي نموذج ما بقل سخرية عن النماذج السابقة!
نموذج بنظر للإنسان كمادة فقط، وسخ كيميائي، نفايات نجمية، لا شيء!
وما دام الإنسان حياته عبثية وبلا معنى، فموته أيضًا ما رح يقل عبثية!

هالنموذج بطلب منّك تغمض عيونك عسيرة الموت..
ما تفكر بأي حياة أخرى بعده..
نفس فكرة لما تغمض عيونك وإنت بالملاهي حتى ما تخاف..!
.
.
إحنا كمسلمين قدّم إلنا القرآن تصور واضح عن الموت والحياة بعده..
بننظر للموت نظرة إجلال ورهبة وخوف ورجاء..
بننظر للموت كمحطة بتنقلنا لعالم آخر أبدي..
عالم رح نشهد فيه رحمة ربنا..
عالم رح يقتص ربنا بعدله من كل حد ظلمنا..
رح يجمعنا بأحبابنا وأهلنا..
رح يغفر إلنا ذنوبنا وأخطائنا..
وما حد غيره رح يعوضنا وينصفنا <3
.
.
اللَّهُ لَا إِلَٰهَ إِلَّا هُوَ ۚ لَيَجْمَعَنَّكُمْ إِلَىٰ يَوْمِ الْقِيَامَةِ لَا رَيْبَ فِيهِ ۗ

وَمَنْ أَصْدَقُ مِنَ اللَّهِ حَدِيثًا ؟!

#القرآن_الجميل
#ARK

هالميثاق عهد بينك وبين الله!

توقيع هالميثاق بكون من خلال كتابتك في التعليقات: #ميثاق.
أو من خلال بوست على صفحتك بحتوي صورة الميثاق.

ويُفضل من خلال التعليقات تشهِد مجموعة من معارفك على توقيعك لهذا الميثاق.
ومش غلط تطلب منهم كمان يوقعوا..
حتى دائمًا تذكّروا بعضكم البعض فيه..
وحتى ما تنسوا بيوم إنه كان في عهد بينكم وبين الله..

- ثمن هالميثاق إنك تتصدق بدنيار واحد متى ما قدرت.
.
.
بتمنى قلبك يكون حاضر لحظة توقيعه.
وبتمنى في اللحظة اللي بتضعف فيها وبتنقض أحد بنوده إنك من لحظتها تتوب وترجع لربنا وتجدد العهد بينك وبينه..
وأرجوك..ما تيأس بيوم من رحمة الله!
.
.
توقيعك لهذا الميثاق يعني إنك بتظهر لربنا حرصك وصدقك وأملك برحمته..
يعني إنك رغم ضعفك وتقصيرك إلا إنك لسه بتحبه..
وإنه صح الحياة صعبة وفيها فتن كثيرة..

لكنك محسن الظن فيه إنه ما يقبض روحك إلا وإنت على دينه.. <3

#ميثاق
#ARK

امبارح كان غدانا دوالي ^^
أو ورق عنب، يلنجي، بيرق، أو دولمة بالتركي..

اختلفت الأسماء والطعم واحد بجنن : ))

وإحنا عالغدا بحكي لأهلي: عمره خطر ببالكم ليش الدوالي بتكون معروشة؟
يعني ليه ينعمل إلها معرّش، ليه ما يتركوها عالأرض تمد لحالها؟؟
حتى في القرآن:
وَهُوَ الَّذِي أَنشَأَ جَنَّاتٍ مَّعْرُوشَاتٍ وَغَيْرَ مَعْرُوشَاتٍ وَالنَّخْلَ وَالزَّرْعَ مُخْتَلِفًا أُكُلُهُ..

ولا حد عبرني طبعا ^^

فأنا جاوبت حالي من حالي..
قلتلهم ببساطة لإنه ورق العنب لو كان عالأرض رح يتمدد بلا اتجاه، ورح يستهلك أوراقه الحلزون واليرقات، وبالتالي فش دوالي.. ^^
.
.
هالموقف العائلي البسيط على مائدة الطعام واللي كنت فيه بحكي مع حالي، خلاني أفكر بإشي عزيزي القارىء..
هل تعلم إنه الإنسان بطبيعته كائن متسلق و (متشعبط) ومتمدد زيّه زي الدوالي ^^
ولو انترك هيك حر بدون تقليم وتحديد رح يمتد ويخرّب ويصير مؤذي..
ولو انترك عالأرض رح يتآكل تماما ويفنى!

هون بيجي دور الوحي ^^
بقيدك وبحددك بإطار التشريعات حتى يحفظك ويحفظ غيرك..
وبرفعـــــك عن الأرض حتى ما تتآكل روحك!

القرآن بوضّح هالفكرة تمامًا وبضرب إلنا مثال بشخص ربنا رفعه بالوحي!
لكنه للأسف أبى إلا إنه يلازم الأرض..

وَاتْلُ عَلَيْهِمْ نَبَأَ الَّذِي آتَيْنَاهُ آيَاتِنَا فَانسَلَخَ مِنْهَا فَأَتْبَعَهُ الشَّيْطَانُ فَكَانَ مِنَ الْغَاوِينَ (175) وَلَوْ شِئْنَا لَرَفَعْنَاهُ بِهَا وَلَٰكِنَّهُ أَخْلَدَ إِلَى الْأَرْضِ وَاتَّبَعَ هَوَاهُ..
.
.
.
حتى القرآن لما يحكيلنا عن الهدى والضلال مثلا:

قُلْ مَن يَرْزُقُكُم مِّنَ السَّمَاوَاتِ وَالْأَرْضِ ۖ قُلِ اللَّهُ ۖ
وَإِنَّا أَوْ إِيَّاكُمْ (لَعَلَىٰ هُدًى) أَوْ (فِي ضَلَالٍ) مُّبِينٍ.

في الكلام عن الهــــدى استخدم "علـى" الدالة على الاستعلاء والإرتفاع..
في الكلام عن الضلال استخدم "فـــي" الدالة على الإنخفاض والإنغمار..
.
.
.
وشكرا ^^ : ))

#القرآن_الجميل
#ARK

آرك | ARK = "الفلك" .. فلك سيدنا نوح عليه السلام ..
وَاصْنَعْ الْفُلْك بِأَعْيُنِنَا وَوَحْينَا

اركب معنا = Embark With Us
وَهِيَ تَجْرِي بِهِمْ فِي مَوْجٍ كَالْجِبَالِ وَنَادَىٰ نُوحٌ ابْنَهُ وَكَانَ فِي مَعْزِلٍ يَا بُنَيَّ ارْكَب مَّعَنَا
------------------
إصدارات ARK (حسن باشا)
#كتاب_شهوة
كيف نخوض معارك الشهوات بطريقة أكثر وعيًا
https://cutt.us/chIzA

#كتاب_شبهة
تساؤلات الشباب عن الله والدين والشر
https://cutt.us/d4Waq

والكتب متوفرة لدى مركز الفرسان "العبدلي"
--------------------
*قناة التيلجرام:
https://www.tg-me.com/ArkEmbarkwithus

---------------------
*فيديو هذا النــــور:
https://cutt.us/jbChX

#ARK
#EmbarkWithUS
#القرآن_الجميل

في اليوم اللي أعلنوا فيه إنه بكرا حظر
رحت عالمكتبة أشتري كتب..
وأنا داخل عالمكتبة كان طالع منها شخص ما ركزت بملامحه..
ندمت لاحقا بعد ما عرفت قصته إني يا ريت لو سلمت عليه وطلبت منه يدعيلي!
.
.
دخلت عالمكتبة ورحّب فيي صاحبها اللي بتجمعني فيه صداقة قد ما بمر عليه وبجننه ^^
المهم دار بينا نقاش عام تقليدي، عن الكتب والحياة والدين والزواج ومتى بدنا نزوجك؟

حكالي شفت الزلمة اللي طلع من المكتبة وإنت داخل عليها؟
- آه شفته..
* اقعد اقعد أحكيلك قصته اللي ممكن ما تصدقها..!
.
.
هذا يا سيدي العزيز كل أولاده حافظين القرآن..
وكل يوم هو وزوجته براجعوا القرآن لولادهم..
فضلا عن همتهم في طلب العلم..
يعني لا أزكيه على الله لكن هالرجل من أولياء الله!!

في داخلي صفنت إنه آه حلو وما شاء الله...ربنا يثبتهم
بس يعني وين الإشي اللي ممكن ما أصدقه؟
.
.
الإشي اللي ممكن تشك فيه وما تصدقه، إنه هالشخص كان بيوم من الأيام سكرجي ما يطلع من الخمارة إلا آخر الليل!!
بس الغريب إنه ما يطلع من الخمارة لبيته..
كان يروح عالمسجد عشان يصلي الفجر!!

وألف مرة المصلين يحكوله يا عمي إصحى أول بعدين تعال عالمسجد!
وهو يرد عليهم: هذا بيت الله مش بيتكم..
وأنا بدي أصلي فيه خاوة عنكم..!!

حاولوا المصلين معاه أكثر من مرة لكن عالفاضي..وبكل مرة بزيد عناده وإصراره وبصلّي معهم الفجر
"خاوة عنهم" !

مع الوقت أدرك المصلين الخير جواته..وحاولوا مع الشيخ يشتغلوا عليه لعل وعسى يترك الشرب ويسلك طريق الخير والطهارة..

وسبحان الهادي ربنا هداه وتاب عليه..
ولما التزم طريق الخير شافوله بنت يخطبها..
ولما راح يشوفها حلم بنفس الليلة إنه نزلت سلّة من السما فيها نفس البنت اللي شافها..
كانت بمثابة هدية من الله إله..
وهي نفسها الآن اللي بتربي ولاده وبتسمعلهم قرآن..!
---------------
هالشخص رغم ذنوبه وأغلاطه سابقا، إلا إنه كان حريص ما ينسى الله..
صح ما قدر يترك الشرب، لكنّه كمان ما ترك ربنا..
وصح أغلاطه كبيرة، لكن رحمة ربنا بالنسبة إله كانت أكبر منها..
كان يصرّ عالغلط، بنفس الوقت يصرّ علقاء ربنا..

وبلحظة صدق!
شلال من نور هبط عصدره
دثار دافي أحاط بقلبه..
وميض من ضوء سافر بعروقه..
ملك من السما تسلل لروحه..
دمعة صدق نزلت من عيونه..

لحظة ما قرأ الشيخ عالفجر اللي قرر يصليها "خاوة عنهم":

قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِن رَّحْمَةِ اللَّهِ ۚ إِنَّ اللَّهَ يَغْفِرُ الذُّنُوبَ جَمِيعًا ۚ إِنَّهُ هُوَ الْغَفُورُ الرَّحِيمُ

#القرآن_الجميل
#ARK

سورة البقرة "ثقيلة"!
ما بتحب المجاملات..
ورح تبدأ معك بداية صريحة جدا..

بتحكيلك الحياة مش وردية^^
والناس مش شرط يكونوا مناح..
في منهم (خدّاعين) و (بقلوبهم مرض)..!
ناس (فاسدين) بالوقت اللي بدّعوا فيه (صلاحهم)!

في ناس (بتشتري بآيات الله ثمنا قليلا) وبتكذب عربنا..
عن ناس ظالمين تملّكت الحياة وماديتها (العجل) من قلوبهم..
واستولى عليهم الجشع والطمع وكفر النعمة..!
وبدل ما يحكوا الحمدلله تشرطوا عربنا بدهم نِعم ثانية على مزاجهم!

رح تحكيلك عن ناس قلوبهم أقسى من الحجارة!
وناس رح تفسد وتسفك دماء أبرياء ومساكين..

عن ناس ممكن يعجبك كلامهم، ويشهدوا الله عالإشي الموجود في قلبهم إنهم صادقين اتجاهك....وهمّه ألد الخصام!!

الحياة مش وردية..
فيها طلاق وألم وفراق وموت وأيتام وقتل وقصاص وقتال وأشياء كره إلكم!
فيها صراع مرّ..
فيها قسوة كالحجارة أو أشد قسوة!
.
.
في المقابل:
في ناس بتبحث عن (قبلة) ووجهة حتى تخفف من عناء صراعها..
فيها ناس صادقة بدها (قلبها يطمئن) من الأسئلة اللي شغلت بالها..
في ناس صلت وصامت ودعت وتصدقت وقالت يا رب من قلبها..

ناس الآن واقفين بين إيدين ربنا..
بواجهوا صراعات سورة البقرة بدعوات آخر البقرة:

لَا يُكَلِّفُ اللَّهُ نَفْسًا إِلَّا وُسْعَهَا ۚ لَهَا مَا كَسَبَتْ وَعَلَيْهَا مَا اكْتَسَبَتْ ۗ رَبَّنَا لَا تُؤَاخِذْنَا إِن نَّسِينَا أَوْ أَخْطَأْنَا ۚ رَبَّنَا وَلَا تَحْمِلْ عَلَيْنَا إِصْرًا كَمَا حَمَلْتَهُ عَلَى الَّذِينَ مِن قَبْلِنَا ۚ رَبَّنَا وَلَا تُحَمِّلْنَا مَا لَا طَاقَةَ لَنَا بِهِ ۖ وَاعْفُ عَنَّا وَاغْفِرْ لَنَا وَارْحَمْنَا ۚ أَنتَ مَوْلَانَا فَانصُرْنَا عَلَى الْقَوْمِ الْكَافِرِينَ

#القرآن_الجميل
#ARK

بتبدأ "آل عمران" بهمســـــة:
إِنَّ اللَّهَ لَا يَخْفَىٰ عَلَيْهِ شَيْءٌ فِي الْأَرْضِ وَلَا فِي السَّمَاءِ!

الله ما بخفى عليه شيء..ماشي؟!

بتطلب منك بعدها ما تتسرع في الحكم عالأشياء
عشان هيك رح تلاحظ إنها سورة (الموازنات)!
بتحكيلك ضروري تنظر للصورة بالكامل..
خلي عينك على "أم الكتاب" وما تمشي ورا "المتشابه" لأنه رح يشوش عليك..

بتخبرك السورة عن امرأة عمران اللي كانت بتطمح يكون الجنين ببطنها "ذكر" حتى يتمكن من حماية وخدمة بيت المقدس..
لحظة الولادة طلعت أنثى (وليس الذكر كالأنثى) يارب؟!!
امرأة عمران ما بتعرف إنه "مريم" مش أي أنثى..
لاحقا رح تدرك إنها كانت حامل بسيدة نساء العالمين!!

ولإنه ربنا ما بخفى عليه شيء ولا حتى دعوات زكريا..
جبر خاطره بيحيى..

وربنا ما بخفى عليه فرحتكم بنصر بدر..
ولإنها لحظة نصــــر بتوازن آل عمران مشاعرهم وبتحكيلهم:
وَلَقَدْ نَصَرَكُمُ اللَّهُ بِبَدْرٍ وَأَنتُمْ (أَذِلَّةٌ ۖ) فَاتَّقُوا اللَّهَ لَعَلَّكُمْ تَشْكُرُونَ.

لكن لما انهزموا في أحد، ربنا ما خفي عليه حزنهم وانكسارهم، فوازنت آل عمران ورفعت معنوايتهم:
وَلَا تَهِنُوا وَلَا تَحْزَنُوا وَأَنتُمُ (الْأَعْلَوْنَ) إِن كُنتُم مُّؤْمِنِينَ
.
.
آل عمران بتعرف إنك رح تمر بيوم (بدر) وممكن تمر بأيام (أحد)!
رح تتلقى فيها طعنات غادرة..
وهزائم موجعة متتالية..

فما تحزن!
وانظر للصورة بالكامل..
وما تنسى إنه ربنا ما بخفى عليه وجعك وحزنك وانكسارك..

ولا تنسى آخر وصية في آل عمران إلك:
يَا أَيُّهَا الَّذِينَ آمَنُواْ اصْبِرُواْ وَصَابِرُواْ وَرَابِطُواْ وَاتَّقُواْ اللَّهَ لَعَلَّكُمْ تُفْلِحُونَ

#القرآن_الجميل
#ARK

عكس ما بتتوقع..
سورة النساء لونها مش زهري!
ومش حريصة تستجدي فقط عواطفك ودموعك..
وشعاراتك الزائفة لانصاف المرأة مش من ضمن اهتمامها..!
.
.
سورة النساء سورة سياسية بامتياز..
سورة بتحكي عن النظام السياسي ودولة القانون..
سورة بتتناول العدل كركيزة..
سورة كل تركيزها على سنّ القوانين والأنظمة..
لإنه من خلال العدل والقوانين الصارمة مش فقط رح ننصف المرأة والضعفاء، وكمان رح نساهم في تغيير كل الأوضاع اللي ساهمت بداية في استضعافهم..!

سورة بتكرر فيها الحكم والعدل والقسط والتحذير من الظلم..
- وَإِذَا حَكَمْتُم بَيْنَ النَّاسِ أَن تَحْكُمُوا بِالْعَدْلِ
- يَا أَيُّهَا الَّذِينَ آمَنُوا كُونُوا قَوَّامِينَ بِالْقِسْطِ شُهَدَاءَ لِلَّهِ
.
.
السورة بتتناول مجموعة قوانين وأنظمة بتخص المرأة والأيتام..
فيما يتعلق بالنساء: معاشرتهم بالمعروف..حقهم بالميراث..العدل معهم..حقهم بالمهر..وبعض القضايا المتعلقة بشؤون أزواجهم..حفظ كرامتهم..وحتى طريقة التعامل معهم في حال ظلمهم!
.
.
العجيب إنه السورة كمان فيها قوانين تشريعية وقضايا سياسية بعيدة عن موضوع النساء والأيتام تماما!!
يعني مثلا بتحكي عن الجهاد والقتال ومعاملة الأعداء..
بتحكي عن بعض التشريعات المتعلقة بالقتل الخطأ والوضوء والتيمم وصلاة الخوف والقصر وتحريم الخمر..
فيها عن دور اليهود والمنافقين في المجتمع الإسلامي وطرق التعامل معهم..
فيها عن الهجرة إلى دار الإيمان..
فيها وفيها..

مع ذلك حافظت على اسمها (النساء) !
وكل ما السورة تستعرض بعض الجوانب السياسية والتشريعية بترجع لموضوع النساء وبتأكد عليه..

ببساطة..ما في نظام سياسي قوي وعادل بغفل وبتناسى حقوق النساء والضعفاء وما بساهم في حمايتهم والدفاع عنهم..

وَمَا لَكُمْ لَا تُقَاتِلُونَ فِي سَبِيلِ اللَّهِ وَالْمُسْتَضْعَفِينَ مِنَ الرِّجَالِ وَالنِّسَاءِ وَالْوِلْدَانِ..
.
.
النساء رمز للمستضعفين في الأرض..
كثير نالهم ظلم..وكثير ناس أكلت حقوقهم..
سورة النساء ما بطّالبك تذرف دموع عليهم..
ولا تردد وترفع شعارات تنصفهم..

السورة بتطلب منك تتقي ربنا وتعدل وتقسط وتحكم بالحق..
و"تقاتــــل" لرفع الظلم عنهم!

#القرآن_الجميل
#ARK

قبل ما نبدأ محاضرتنا لازم نتفق عبعض الأمور..
ممنوع العلكة أثناء المحاضرة..وممنوع الأكل والكلام الجانبي..
وأي حد بتجاوز الحد المسموح فيه بالغياب رح ينحرم من المادة..
بخصوص الإمتحانات أي حد بغش رح يتحول لمجلس ضبط واحتمال ينفصل من الجامعة كلها..!!
وعفكرة..في شعب سابقة إلكم ما التزمت بالقوانين ونالت عقابها!!
.
.
سورة المائدة ^^
بتبدأ معك بداية مشابه..
يَا أَيُّهَا الَّذِينَ آمَنُوا أَوْفُوا بِالْعُقُودِ ۚ أُحِلَّتْ لَكُم بَهِيمَةُ الْأَنْعَامِ إِلَّا مَا يُتْلَىٰ عَلَيْكُمْ غَيْرَ مُحِلِّي الصَّيْدِ وَأَنتُمْ حُرُمٌ ۗ إِنَّ اللَّهَ يَحْكُمُ مَا يُرِيدُ (1)

بتطلب منك الإلتزام بأمور ممكن تكون سهلة بنظرك..
إنك ما تاكل ميتة ودم ولحم خنزير ولا منخنقة وموقوذة ومتردية ونطيحة ولا ما أكل السبع..

سورة المائدة بترسّخ فكرة (العقد) بداية بأشياء بسيطة
لاحقا رح تنتقل معك لعقود أكبر مش بسيطة..

لكـــن قبل..
بتذكرك ببني اسرائيل والنصاري كيف نقضوا العقد والميثاق:
- فَبِمَا نَقْضِهِم مِّيثَاقَهُمْ لَعَنَّاهُمْ وَجَعَلْنَا قُلُوبَهُمْ قَاسِيَةً ۖ
- وَمِنَ الَّذِينَ قَالُوا إِنَّا نَصَارَىٰ أَخَذْنَا مِيثَاقَهُمْ فَنَسُوا حَظًّا مِّمَّا ذُكِّرُوا بِهِ فَأَغْرَيْنَا بَيْنَهُمُ الْعَدَاوَةَ وَالْبَغْضَاءَ إِلَىٰ يَوْمِ الْقِيَامَةِ
.
.
بعدها بتنقل إلك قصة حصلت أول التاريخ لما قابيل قتل هابيل..
فَطَوَّعَتْ لَهُ نَفْسُهُ قَتْلَ أَخِيهِ فَقَتَلَهُ فَأَصْبَحَ مِنَ الْخَاسِرِينَ!

هالقصة وبشكل مفاجئ رح تنقلك من عقد متعلق بطعامك..لعقد متعلق بالنفس البشرية وحرمتها وحرمة دمائها..
وبتحذرك من عاقبة دنيوية قبل الآخرة لأي نقض منك متعلق بدماء الناس وحقوقها..

مَن قَتَلَ نَفْسًا بِغَيْرِ نَفْسٍ أَوْ فَسَادٍ فِي الْأَرْضِ فَكَأَنَّمَا قَتَلَ النَّاسَ جَمِيعًا وَمَنْ أَحْيَاهَا فَكَأَنَّمَا أَحْيَا النَّاسَ جَمِيعًا ۚ وَلَقَدْ جَاءَتْهُمْ رُسُلُنَا بِالْبَيِّنَاتِ ثُمَّ إِنَّ كَثِيرًا مِّنْهُم بَعْدَ ذَٰلِكَ فِي الْأَرْضِ لَمُسْرِفُونَ (32) إِنَّمَا جَزَاءُ الَّذِينَ يُحَارِبُونَ اللَّهَ وَرَسُولَهُ وَيَسْعَوْنَ فِي الْأَرْضِ فَسَادًا أَن يُقَتَّلُوا أَوْ يُصَلَّبُوا أَوْ تُقَطَّعَ أَيْدِيهِمْ وَأَرْجُلُهُم مِّنْ خِلَافٍ أَوْ يُنفَوْا مِنَ الْأَرْضِ ۚ ذَٰلِكَ لَهُمْ خِزْيٌ فِي الدُّنْيَا ۖ وَلَهُمْ فِي الْآخِرَةِ عَذَابٌ عَظِيمٌ (33)

وأيضا عقد متعلق بحقوق الناس المادية..
وَالسَّارِقُ وَالسَّارِقَةُ فَاقْطَعُوا أَيْدِيَهُمَا جَزَاءً بِمَا كَسَبَا نَكَالًا مِّنَ اللَّهِ ۗ وَاللَّهُ عَزِيزٌ حَكِيمٌ!

ولاحقا عقد متعلق بالخمر:
يَا أَيُّهَا الَّذِينَ آمَنُوا إِنَّمَا الْخَمْرُ وَالْمَيْسِرُ وَالْأَنصَابُ وَالْأَزْلَامُ رِجْسٌ مِّنْ عَمَلِ الشَّيْطَانِ فَاجْتَنِبُوهُ لَعَلَّكُمْ تُفْلِحُونَ

العقوبات لا شك قاسية..
لكنها ضرورية لوضع حد للمجرمين ولردع مجرمين آخرين من ارتكاب جرائمهم..
.
.
العقود مهمة..
والنفس البشرية بلا حدود وقيود ورادع رح تتمادى..
والحياة بلا عقود وحدود حياة جاهلية!!
أَفَحُكْمَ الْجَاهِلِيَّةِ يَبْغُونَ ۚ وَمَنْ أَحْسَنُ مِنَ اللَّهِ حُكْمًا ؟!
--------------
.
.
من ممنوع تاكل علكة...لــــممنوع تغش في الإمتحان!
كذلك المائدة..
من ممنوع تاكل ميتة ودم.....لممنوع تسرق وتشرب خمر وتسفك دم!

#القرآن_الجميل
#ARK

في ناس ما بصادفوا آية إلا وكانوا عنها معرضين!
وناس كذّبوا بآيات ربنا وافتروا عليه الكذب وكانوا مستهزئين..
وبحكوا: إِنْ هِيَ إِلَّا حَيَاتُنَا الدُّنْيَا نَمُوتُ وَنَحْيَا وَمَا نَحْنُ بِمَبْعُوثِينَ!
موتى..صم..بكم..عايشين بظلام..حادوا عن الصراط المستقيم..
الله ببتليهم لعل وعسى يرجعوا ويتضرعوا..وَلَٰكِن قَسَتْ قُلُوبُهُمْ وَزَيَّنَ لَهُمُ الشَّيْطَانُ مَا كَانُوا يَعْمَلُونَ.

طيّب سؤال: شو رح تعملوا لو أجاكم عذاب الله بغتة وجهرة؟
وكيف نسيتوا لما ربنا نجّاكم من ظلمات البر والبحر لما دعيتوه تضرعا وخفية؟

طيّب خلص بنآمن بشرط: بدنا كتاب نلمسه بإيدينا! وبدنا نشوف ملك بعيونّا..وبدنا نحكي مع الموتى..وقسما بالله رح نآمن لو ربنا أرسل آية حسب طلبنا.

وسورة الأنعام ترد:
قُلْ إِنَّمَا الْآيَاتُ عِندَ اللَّهِ ۖ وَمَا يُشْعِرُكُمْ أَنَّهَا إِذَا جَاءَتْ لَا يُؤْمِنُونَ (109) وَنُقَلِّبُ أَفْئِدَتَهُمْ وَأَبْصَارَهُمْ كَمَا لَمْ يُؤْمِنُوا بِهِ أَوَّلَ مَرَّةٍ وَنَذَرُهُمْ فِي طُغْيَانِهِمْ يَعْمَهُونَ (110)وَلَوْ أَنَّنَا نَزَّلْنَا إِلَيْهِمُ الْمَلَائِكَةَ وَكَلَّمَهُمُ الْمَوْتَىٰ وَحَشَرْنَا عَلَيْهِمْ كُلَّ شَيْءٍ قُبُلًا مَّا كَانُوا لِيُؤْمِنُوا إِلَّا أَن يَشَاءَ اللَّهُ وَلَٰكِنَّ أَكْثَرَهُمْ يَجْهَلُونَ (111)
.
.
في المقابــــــل..
في ناس رفعوا روسهم للسما..بالضبط زي ما عمل أبوهم ابراهيم..
شافوا ملكوت السموات والأرض.. فكانوا موقنين..
قدروا يشوفوا بكل شيء آية من آيات ربنا وارتسمت عقلوبهم ابتسامة رضا مع الحمدلله رب العالمين..

يا الله قلوبهم اللي سكنت فيها محبة الله..!
الله العظيم..اللي بتحكيلهم عنه سورة الأنعام..
فَالِقُ الْحَبِّ وَالنَّوَىٰ
فَالِقُ الْإِصْبَاحِ
بَدِيعُ السَّمَاوَاتِ وَالْأَرْضِ
خَالِقُ كُلِّ شَيْءٍ ۖ
الْغَنِيُّ ذُو الرَّحْمَةِ
وَهُوَ الْقَاهِرُ فَوْقَ عِبَادِهِ ۚ وَهُوَ الْحَكِيمُ الْخَبِيرُ...
.
.
ناس بخافوا لما يعصوا ربنا عذاب يوم عظيم..
لكنها رحمة ربنا بتداركهم بكل مرة بعصوا فيها..
والأنعام بطبطب عليهم وبتواسيهم وبتحكيلهم:
سَلَامٌ عَلَيْكُمْ ۖ كَتَبَ رَبُّكُمْ عَلَىٰ نَفْسِهِ الرَّحْمَةَ ۖ أَنَّهُ مَنْ عَمِلَ مِنكُمْ سُوءًا بِجَهَالَةٍ ثُمَّ تَابَ مِن بَعْدِهِ وَأَصْلَحَ فَأَنَّهُ غَفُورٌ رَّحِيمٌ <3 !
.
.
ناس قرروا تكون صلاتهم ونسكهم ومحياهم ومماتهم لرب العالمين..

ناس آثرت حياة فيها الله..
على حياة لحظية عبثية عدمية

كالأنعام!

#القرآن_الجميل
#ARK