مرّت سنة على أول لقاء بينا..
ما كنت بتصور إنه حياة الإنسان ممكن تنقلب بلحظة !
أنا حياتي انقلبت لحظة ما شفتك فيها..

كنت أشوف فيك شخصين..
شخص مُتّقد مفعم بالنشاط في عيونه مرح ولهو ومغامرة..
بنفس الوقت شخص حازم،صارم، وراكز ومثقف ومؤدب..
كإنك بتعيش حياة مزدوجة وكل جانب فيهم مبهر بحد ذاته..
يومها لما روحت صرفت ساعات بس أعرف عنك وأشوف بوستاتك وشو بكتبولك صحابك واستولت عليّ ولأول مرة مشاعر من نوع غريب..!

حاولت أصرف النظر عنها في البداية وكإنه إشي ما صار..
لكن بكل مرة كنت أشوفك فيها كان يتحرك إشي جواتي..
ولما القدر جمعنا في فريق تطوعي واحد استحالت حياتي لمغامرة نفسيّة ما بعرف شو نهايتها..

كان يستفزني إنك محطّ أنظار بنات كثير غيري..
نفس البنات اللي كنت أسخر منهم لما يجيبوا سيرة شب ثاني، هيني الآن متلبسة معهم بنفس السخف اللي كنت أشوفه فيهم..
بس أنا والله غير عنهم..
أنا مش بنت سخيفة وخفيفة وممكن إشي زي هيك يأثر عليّ أبدا..
عشان هيك بقدر أحكيلك وبكل ثقة إني جد غير عنهم..
أنا كنت أحتفظ بمشاعري لنفسي وما أبعثرها زيهم..ولا أنتهكها بالكلام فيها..
ما كنت ألهو فيها زي ما بنت صغيرة بتلهو بلعبتها..
لإني مؤمنة إني صادقة اتجاهك..
وهذا الصدق بحتّم عليّ ما أبوح فيه لحد..
غير ربنا !
.
.
مرة صادفتك عالباب وفتحتلي إياه وابتسمت وتفرجت بعيوني وحكيتلي:
تفضلي..!
موقف ما تجاوز ثواني شفت فيه ابتسامتك الرقيقة ونظرتك الوديعة وصوتك الذابل لحظتها..
وقلبي اللي كان حيطير من مكانه!
.............................
*************
مرّت سنة على أول خدعة بحياتي!
على أكبر وهم وأسخف لقاء..
ما بعرف كيف سمحت لنفسي أضيّع سنة بكل تفاصيلها عشان "وهم" !
عشان ابتسامة متكلفة منك..
ونظرات من بعيد أشعرتني إنك بتبادلني الإشي اللي جواتي..
يا الله كيف ممكن تخدعنا المظاهر!
كيف ممكن تغرّنا الكلمات والنظرات..

إنت خدعتني..!
وخدعت كثير غيري بزيفك وتملقك..
خليك عايش على نظرات الإعجاب حتى ترضي غرورك..
وبتدّعي التعفف حتى يبالغوا في تقديرك..
ابتسامتك الرقيقة اللي بتجود فيها على كل بنت بتمر جنبك..
ولطفك المبالغ فيه واهتمامك..
ومراسلاتك الخاصة آخر الليل اللي بتعشّم فيهم ألف بنت..
ترى إشي ما بعكس إلا مرضك..!

الحمدلله صحيت على حالي..
صحيت لما أدركت إنه ربنا بدو يخفف عنا وإحنا بنختار الوجع بإيدينا..
وربنا بدو يتوب علينا وإحنا بنركض للفتنة برجلينا..
صحيت لما عرفت إنه المؤمن عزيز بالاستغناء عن الناس..
وقلبه أطهر من إنه يصرفه على مشاعر ساذجة..
ووقته أثمن من إنه يضيع على شخص ماكله الغرور أكل!
.
.
**
مرّت سنة على أول لقاء بينا..
تعمدت أبدأ رسالتي بإشي ينفخ غرورك..
وأنهيها بإشي يفضح حقيقتك..

مع ذلك..
يا رب تصحى عحالك..!

#ARK

كنت زمان أفكر إنه إذا الواحد خلى مخافة ربنا بين عيونه وبعّد عن الحرام ربنا راح يرزقه مباشرة ويفتحها عليه من أوسع أبوابه .. هيك كنت بفكر؟؟

عبين ما تخرجت وصحلّي أكثر من شغل بس المشكلة فيهم حرام..فما قبلت ولا بوظيفة عشان من "ترك شيئا لله عوضه الله خيرا منه"..!!
بس صارلي سنتين وانا يلا يلا أطلع مصروفي..
وصحابي اللي قبلوا بهديك الوظائف هيهم مبسوطين ونزّلوا سيارات وأغلبهم تزوجوا وأنا قاعد مكاني..!!
.
.
طيب بلاش أنا .. هي أختي..
أحسن بنت بالكوكب..
بنت متمسكة بدينها وحجابها..
بحياتها ما فرطت بإشي من مبادئها..
طول حياتها معتزة بدينها وأخلاقها..
ما سمحت لأي حد يعبث بقلبها ..
وكانت مخافة ربنا بين عيونها..
ومع ذلك ..
معظم صاحباتها خطبوا واتزوجوا وهي لسه !!
علما إنه صاحباتها ما كانوا على هذا القدر من الإلتزام وجزء كبير منهم عاش حياة عادية بدون ضوابط.. بس هيهم هلأ معظمهم مبسوطين وأحلى من هيك ما في !!
.
.
بلاش أنا وأختي.. هيّ كثير ناس غيرنا ماشيين صح بحياتهم..
وملتزمين بكل أوامر ربنا إلهم..
بس حياتهم مش ماشية..وعايشين في ابتلاء ورا ابتلاء..
==
.
.
بحكي مرة لأختي وإحنا طالعين..
إنه وين "من ترك شيئا لله عوضه الله خيرا منه ؟"
وينها...؟؟؟
كنت بتصور لحظتها إنه اختي راح تأيدني بكلامي أو تفضفضلي شو بقلبها ؟
أو تشكيلي من ظروفها..
سكتت ثواني وطلبت مني ما أقاطعها بالكلام اللي بدها تحكيه:
.
.
اسمع..
ما بحب هاي الطريقة الساذجة بالتفكير..
وما بحب الواحد يتعامل مع ربنا بمنطق (الصفقات)!
إنه يلا يا رب هيّ عبدتك وفقني !!
ما بحب حد ينظر لعلاقته مع ربنا بهاي السطحية..
وحابة أذكرك إنه ربنا غني عنك وعن صلاتك وعبادتك!
غني عني وعن حجابي وجلبابي..
بس إحنا الفقراء إله...إحنا اللي ولا إشي بدونه..
وإذا إنت بتعبد ربنا عشان تنزّل سيارة أو تتزوج البنت اللي بتحبها أو تشتغل شغل أحسن..
فحابة أحكيلك عيد النظر بالاشي اللي إنت عليه..
وإذا إنت عايش حياتك بتقلّب نظرك في الناس اللي ربنا انعم عليها وحرمك..
فبنصحك تعيد النظر في طريقة تفكيرك!
ممكن أعرف وين مفهوم "الآخرة " بحياتك إذا كل إشي بدك ثوابه هلأ ؟؟
.
.
عفكرة ممكن ما تقاطعني؟ خليني أكمل فكرتني..
ما تفكرني بحكيلك ما تسعى وتآخذ بالأسباب..
وما بحكيلك إنه ربنا مش ممكن يعوضك بالدنيا..
بس بحكيلك ما تتعامل مع ربنا هيك..

(إحنا انخلقنا ليختبرنا مش لنختبره) !
.
.
وَلَا تَمُدَّنَّ عَيْنَيْكَ إِلَىٰ مَا مَتَّعْنَا بِهِ أَزْوَاجًا مِّنْهُمْ زَهْرَةَ الْحَيَاةِ الدُّنْيَا لِنَفْتِنَهُمْ فِيهِ ۚ وَرِزْقُ رَبِّكَ خَيْرٌ وَأَبْقَىٰ
#القرآن_الجميل
#ARK
#كتاب_شبهة

للأسف لو شو ما عملنا ما رح ترجع عيون صالح الحلوة!
ومهما كانت العقوبة قاسية فما رح تعوضه عن إيديه اللي كان حامل فيهم ربطة الخبز لإمه..!

بيوم قطعت عهد عنفسي إني أساعد بنت تعرضت لإبتزاز من شخص هدد حياتها وسمعتها..
وقتها أخذت بكل الأسباب الممكنة، وما لحق هالشخص يدخل السجن حتى طلع بكفالة وكمّل حياته عادي!
في الوقت اللي خسرت فيه البنت حياتها..!
.
.
مش دائمًا للأسف بكون بإيدنا ننتقم وناخد حقنا من كل حد ظلمنا وتعدى على حقوقنا ..!
صعب ننتقم لأطفال سوريا وغزة..
وما قدرنا نعمل إشي لإسراء وأحلام..
واللي قلعوا عيون "صالح" وقطعوا إيديه هيهم بشوفوا منيح بعيونهم وباكلوا بإيديهم 3 وجبات في اليوم!

مش دائما بنقدر ننتقم..
وحتى لو انتقمنا فما رح يشفي الإنتقام غليلنا..
ورح يضل الألم والحسرة والوجع جوا قلوبنا..
.
.
بس عفكرة..
مش شرط الظالم ينال عقابه في الدنيا..
هي (ستالين) قتل ملايين ومات على فراشه، وزجاجات الفودكا جنبه وشيّـعه ملايين بعيون دامعة وورود حمرا على قبره !
وماو تسي تونج وجنكيز خان وهولاكو ونيرون ولينين وكثير غيرهم !
عادي هي (بيريز) نسيوا العالم الكيماوي اللي رماه على أهل غزة.. ولما مات صارتله جنازة حضرها كل العالم !
وعادي ترى ممكن (بشار الأسد) يموت بين أهله وولاده موتة عادية!

ما تستبعدوا بعد سنوات تشوفوا المجرم اللي عذّب صالح ماشي بالشارع، وأبو أحلام رجع عبيته...
وبالمناسبة أبو بتول اللي قتلها بصخرة قربّت تخلص مدة محكوميته !
.
.
الدنيا بشعة !
وأبشع ما فيها عجزنا عن الإنتقام..
وضعفنا عن القصاص من الظالمين والمجرمين..
آخ من مرارة القهر..
ودموع الحسرة..
ووجع القلب ..
ونظرات العين المنكسرة في صمت بليغ !
**

استنى..
القرآن بقدملنا العزاء في ذلك (اليوم) !
وبروي جوعنا القارص وظمأنا القاتل في الإنتقام..
وبذكّـرنا إنه الله مش ناسي..

- وَلَا تَحْسَبَنَّ اللَّهَ غَافِلًا عَمَّا يَعْمَلُ الظَّالِمُونَ ۚ إِنَّمَا يُؤَخِّرُهُمْ (لِيَوْمٍ) تَشْخَصُ فِيهِ الْأَبْصَارُ

- (الْيَوْمَ) تُجْزَىٰ كُلُّ نَفْسٍ بِمَا كَسَبَتْ ۚ لَا ظُلْمَ (الْيَوْمَ ۚ) إِنَّ اللَّهَ سَرِيعُ الْحِسَابِ..
.
.
.
المهم إنت ما تنسى إنه مش شرط يصير الإنتقام في الدنيا..
لكن كون على يقين إنه حيصير في ذلك (اليوم) !
#القرآن_الجميل
#ARK

كنت أتابع قناة عاليوتيوب لأحد الملاحدة واللي كان من خلال قناته يستضيف أشخاص حتى يجهروا في إلحادهم ويحكوا للناس ليه تركوا دينهم..!

المهم بيوم من الأيام دخلت عقناته حتى أشوف لو في فيديوهات جديدة، وانصدمت بفيديو لأحد أصدقائه بحكي فيه إنه صاحب القناة أجت زوجته تصحيه من النوم ولقته ميّت !!

عادي كلنا رح نموت، وحتى الملاحدة عارفين إنهم رح يموتوا..
لكن بصراحة وقتها الفضول دفعني أعرف كيف الملاحدة رح يتعاملوا مع موضوع الموت؟؟!

أي شخص بقرر يترك دينه لإنه الدين ما قدمله أجوبة عكل تساؤلاته، بغفل وبتناسى وبجهل إنه الإلحاد كمان ما رح يجاوبه عكل تساؤلاته !
ورح يدخله بدوامه أسئلة من المستحيل يخرج منها !

مثلا: كيف نشأ الكون؟ من وين أجت الخلية الحيّة الأولى؟ هل إحنا بنمتلك حرية إرادة؟ إحنا مين؟ وشو مصيرنا بعد الموت؟ وشو مصير الظالم والمظلوم؟ وشو مصدر الأخلاق؟ ليه اغتصاب الأطفال والقتل غلط مثلا؟ مهو إحنا مجرد حثالات كيميائية فشو معنى حياتنا؟؟
كيف الصدفة انتجت النظام؟
واللامنطق أنتج المنطق؟
واللاوعي انتج الوعي؟
والصدفة أنتجت الدقة، والعشوائية أنتجت النظام؟؟

والسؤال المؤرق سؤال المــــــوت!
-------------------
نرجع لصاحبنا الملحد واللي حبيت أنقل إلكم جانب من جنازته..
وشوفوا أثناء الجنازة شو الكلمات اللي حكاها صاحبه!!!!

- ( هي دي الحياة، دورة حياة تبدأ ثم تنتهي) !!

شوفوا كيف عجزت كلماته على مواساة زوجة صاحبه..!

استخدم عبارة: (أتمنى أن يرقد في سلام دائم) !

بس سؤال: مين اللي يرقد؟ روحه؟؟ مهو فش روح !!
طيب جسده؟ شو جسده أصلا..؟؟
شوية لحم..وقطعة كبد..وكثير دهون..ومجموعة غضاريف !

- (أنا عايزكم تودعوه) !
--------------------
ما في إشي بستدعي العجب من عجز هالملحد عن تفسير الحياة و(الموت) !
وعجزه عن صياغة جملة مفيدة في هيك موقف..!
ما دام إحنا بنعيش حياة عدمية عبثية بلا معنى..
ما دام إنه الحياة مجرد عدم مبالاة قاسية كما عبّر دوكنز.

ما دام إحنا:
- نفايات نجمية (ساجان).
- مجرد أجساد بيلوجية (كريستوفر هيتشنز).
- وسخ كيميائي على كوكب متوسط الحجم ( ستيفن هوكنج).
- قرود أخرى (دوكنز).

في المقابل..
إحنا كمسلمين قدّم إلنا القرآن تصور واضح عن الموت والحياة بعده..
بننظر للموت نظرة إجلال ورهبة وخوف ورجاء..
بننظر للموت كمحطة بتنقلنا لعالم آخر أبدي..
عالم رح نشهد فيه رحمة ربنا..
عالم رح يقتص ربنا بعدله من كل حد ظلمنا..
رح يجمعنا بأحبابنا وأهلنا..
رح يغفر إلنا ذنوبنا وأخطائنا..
وما حد غيره رح يعوضنا وينصفنا ❤

اللَّهُ لَا إِلَٰهَ إِلَّا هُوَ ۚ لَيَجْمَعَنَّكُمْ إِلَىٰ يَوْمِ الْقِيَامَةِ لَا رَيْبَ فِيهِ ۗ
وَمَنْ أَصْدَقُ مِنَ اللَّهِ حَدِيثًا ؟!
.
.
.
المهم:
فلترقدوا في سلام ^^
والحمدلله على نعمة القرآن والإسلام. ❤
#القرآن_الجميل
#ARK

* كتبت كتاب بعنوان ( شبهة، تساؤلات الشباب عن الله والدين والشر)
رابطه في أول بوست في بيج Ark

انصدمت الإم لما دخلت عالمدرسة بعد ما طلب منها زوجها تروح تشكر هالمعلمة العظيمة اللي بتعلّم إبنهم كل هالشغلات..!

انصدمت ببنت عمرها بالعشرينات، مفعمة بالبراءة واللطف والسماحة...
وفي ابتسامة مزروعة على وجهها ما بتبخل فيها على أي طالب..

هالمعلمة حرفيّا ما بتقعد..
حتى بأوقات الفراغ بتعطي تقوية للطلاب وأحيانا بتتأخر لساعات بعد الدوام معهم..

مش بس هيك، حصصها ما بتخلى من كلام عن (الله) !
وعن كل خُلق منيح طلبه وبحبه منّا..
وهالإشي انعكس بشكل مدهش ورهيب على سلوك الأطفال وتعاملهم فيما بينهم ومع أهلهم..
.
.
.
لما خبرني الأب بقصة هالمعلمة، دفعني الفضول أدخل على بروفايلها..
كان بروفايل عادي جدا جدا...
شير لدعاء...صورة وردة..آية..وبس..!
وقليل لايكات ولا كأنه حد بعرفها..

توقعت ألاقي بروفايل مليان استعراض عن انجازاتها..
توقعت إنها ممكن تخبرنا إنها ما بتقعد وبتتأخر بالمدرسة عشان طلابها...
وإنها بتجيبهم السبت وبتعمل إلهم نشاطات على حسابها!

ما في ولا إشي من هالحكي!
.
.
بتعرفوا إشي..
هالبنت ممكن تموت ويخلص عمرها بدون ما حد ينتبه إلها..
بدون ما حد يشوف قلبها..
ممكن بدون ما تسمع كلمة حلوة..
ولا حد يقلها شكرا على جهودها..

ممكن تعيش عمرها بدون ما حد يعبرها..
وغالبا رح تتسمع حكي يجرحها من أقرب الناس إلها..
رح تتعاير بكثير من بنات جيلها..
وكثير ناس رح يستخفوا بشغلها..
ورح ينحكالها حكي يشككها بشخصيتها وحالها..
.
.
----------
بس بتعرفي يا مِس..
اسألي هالغيمة كم دعوة مرت فيها بتحمل اسمك؟
كم طفل جبرتي خاطره نام وهو بدعيلك..
في ملك غمرته السعادة لما اتوكل مهمة حراسة قلبك..
وملائكة بطوفوا بالعرش.. ومع كل نبضة قلب طفل بدعولك..

بتعرفي يا مس..
ربنا كريم جدا، وإن شاء الله رح يمنحك سعادة في الدنيا قبل الآخرة..
لكن لو انحرمتي منها في الدنيا..
والدنيا بخلت عليك بحب، بسعادة، بتقدير، بكلمة شكرا..

فعادي..
ما تزعلي يا مس..!

إذا كانت الدنيا تعب وقهر وقنوط، ففي الآخرة حُب ورجا..
وإذا ما انكتبلك سعادة وحب في الأرض..
فكله يا مِس مخبالك في السما <3
#ARK

أيام الجامعة كنت أسمع من الطلاب عن مادة كثير صعبة عنّا في التخصص، وكان الأغلب يخاف منها ويستصعبها ويأجلها..

وبيوم حكالي طالب ترى المادة عادية ومش لهدرجة صعبة...
طيّب إنت جربت تفتحها وتعرف عن شو بتحكي؟؟

قلتله لأ بديش...أنا عارف حالي ما رح أفهمها..!
حكالي طيب جرّب..؟
قلتله لأ..خلص بعدين..

لاحقا ولما اضطريت أنزّل المادة وفتحت أول صفحاتها استغربت إنه بداية المادة معلومات سهلة وبسيطة وسلسة وكان سهل عليّ أستوعبها.

والأجمل لما دكتور المادة كان لطيف وكريم جدا معنا، ووعدنا إنه يعلّمنا مثل ما علّم غيرنا، ورح ييسر المادة إلنا بحيث نفهمها ونستوعبها وكمان نعيشها!

وأكد إلنا على ضرورة إنه نوثق فيه، ونشيل من عقلنا إنه هالمادة أصعب من قدراتنا!!

---------------------------
ولله المثل الأعلى..
أول ما نزل من الوحي:

- اقْرَأْ بِاسْمِ رَبِّكَ الَّذِي خَلَقَ. (1)
يا محمد اقرأ وإنت مستعين بربك.
ربك المدبر واللطيف والخالق لكل شيء.
وكان الرد: ما أنا بقارئ!!

- خَلَقَ الْإِنْسَانَ مِنْ عَلَقٍ (2)
ما حكت الآية عن خلق السموات والأرض والأجرام السماوية مثلا..
تناولت شيء بسيط وصغير جدا كتمهيد..
وحكت عن "قطعة دم جامدة صغيرة"!
هالبداية حتى تظهر إلنا عظمة ربنا بشكل متدرج.
والتدرج في الفهم طريقنا للكمال.

- اقْرَأْ وَرَبُّكَ الْأَكْرَمُ (3)
كمان مرّة اقرأ...حتى ترد على فكرة "ما أنا بقارئ" !!

فبعد ما استقر في ذهنك يا محمد إنه هالرب مدبر وخالق كل شيء..
بعد ما خبرك كيف خلق الإنسان من علقة صغيرة..
معقول يعجزه يعلمك قراءة هذا القرآن وييسره إلك؟؟
وربك هو الأكرم وكرمه ما إله حدود أبدا أبدا..

- الَّذِي عَلَّمَ بِالْقَلَمِ (4) عَلَّمَ الْإِنْسَانَ مَا لَمْ يَعْلَمْ (5)
اللي "علّم آدم الأسماء كلها" رح يعلمك.
واللي أخرج الناس من بطون أمهاتهم ما بعلموا شيء وعلّمهم كمان رح يعلمك..
.
.
.
------------
قدرة الله في خلقه، لطفه، عنايته، تدبيره، علمه، جماله، كرمـــه....
آمن فيهم ثم آمن بنفسك ورح تدرك إنهم أكبر مــــن ضعفك وعجزك وقلّة قدراتك..

رح تدرك إنهم أكبر من:

ما أنا بقارئ!!

#القرآن_الجميل
#ARK

في يوم والنبي صلى الله عليه وسلم بصلّي في الناس..
أجاه بنتين صغار بينهم طوشة ومولعة بينهم! :)

وهو بصلي أجوا لعنده وجلسوا عند ركبته وصاروا يشدوا ببعض وكملوا طوشتهم..!!
فالنبي صلى الله عليه وسلم فرق بينهم وهو في صلاته. <3
-------------

«كَانَ رَسُولُ اللهِ صلى الله عليه وسلم يُصَلِّي بِالنَّاسِ، فَجَاءَتْ جَارِيَتَانِ مِنْ بَنِي عَبْدِ المُطَّلِبِ تَشْتَدَّانِ اقْتَتَلَتَا، فَأَخَذَهُمَا رَسُولُ اللهِ صلى الله عليه وسلم فَنَزَعَ إِحْدَاهُمَا مِنَ الْأُخْرَى، وَمَا بَالَى بِذَلِكَ»[5].

وفي ألفاظ أخرى عَنِ ابْنِ عَبَّاسٍ رضي الله عنهما أيضًا أَنَّهُ جَاءَتْ جَارِيَتَانِ مِنْ بَنِي عَبْدِ المُطَّلِبِ فَأَخَذَتَا بِرُكْبَتَيِ النَّبِيِّ صلى الله عليه وسلم فَفَرَّعَ بَيْنَهُمَا -أَوْ فَرَّقَ بَيْنَهُمَا- وَلَمْ يَنْصَرِفْ[6].

😁 <3

كان متعود قبل ما ينام يسرح بخياله ويتخيّل رسول الله قدامه..
كان يحب يحكيله عن تفاصيل يوم وحياته..
عن جامعته ودراسته، وعن خير عمله، وكان يشكيله من ذنب بضل يغلبه..

كل ما يتعب كان يلجأ إله بخياله..
وبكل مرة رسول الله يكفكف دمعه ويستحث همته ويلملم جراحه..
وما أكثر جراحه..!
.
.
وفي ليلة نام فيها وهو بشكي لرسول الله من تعبه..
ليلتها شلال من نور هبط عصدره..
دثار دافي أحاط بقلبه..
وميض من ضوء سافر بعروقه..
دمعة نقية نزلت عخده..
وملك من السما تسلل لروحه..

وكان رسول الله ضيفه !

----------
- وهل تحسب أن حياتي كانت طريقا قاصدا..؟ كلا، يا فتى..
لقد ساومني قومي، وحين أعيتهم مساومتهم إيّاي آذوني. هزأ بي صناديد قريش. فتنوني وأغروا بي الأوغاد. أما ثقيف فقد أرسلت إليّ بسفهائها يرمونني بالحجارة..!
أخرجوني من قريتي وتعقّبوني ليقتلونني.
نمت بالمدينة على الطوى، وأدمى بي الحصير، وهزأ بي الكفّار، وتآمر عليّ المنافقون وتكالب عليّ المشركون..
وأنا لا حول لي ولا قوة..!!
أي نعم، في جسمي ندوب جراح، وفي قلبي آهات وحسرات!

* إنت؟؟ إنت يا رسول الله آذوك وجرحوك ووجعوك؟!
إنت يا حبيب الله؟؟!!

- نعم يا فتى، وهل تحسب الهجرة في الله سفرًا قاصدا؟ بل هي معاناة. بل هي كدح وجهاد.

* بس أنا ضعيف يا رسول الله..
ما عندي قوة أقارع الجبابرة، وما بقوى على حمل الامانة..
أنا أضعف من حملها..

- لن تحبني حقّا حتى أكون أحب إليك من نفسك ومما قد يدعو إليه هواك.

* بس أنا بحبك!

- ولكنك تحب الدنيا أيضا، وتحب نفسك أكثر مما تحبني، فأنت لا تريد أن تمسك بالجمرة..

* بس بتوجّع وبتحرق!

- ولكنها الجمرة التي حملها ويحملها ذوو العزم من الرجال والنساء لتنير يومًا، لتنير السبيل..

* رح أقدر أحملها؟ وأنا أنا؟؟
بكل أغلاطي وآثامي وذنوبي؟

- أوَلم تعِ ما قاله تعالى:
إِنَّ الْحَسَنَاتِ يُذْهِبْنَ السَّيِّئَاتِ ۚ ؟
وقوله تعالى: نَبِّئْ عِبَادِي أَنِّي أَنَا الْغَفُورُ الرَّحِيمُ ؟

اسمع..
لا تنظر إليّ كشخص من شخوص التاريخ. أريدك أن تنظر إليّ كنور ينبعث من فؤادك، وحينها ستحبني أكثر مما تحب نفسك، لإن حبك لي هو ارتقاء بك، هو انتشال لك من أوحال النفس والهوى، هو زجّ بك في بحار الفضل..

تجرّد من حطام الدنيا، لا بدّ أن تهاجر إلى الله يا فتى.
لا فتح من غير هجرة!
لا فتح (لك) من غير هجرة..
.
.

ومضى صلى الله عليه عليه وسلم..
وبكيت! <3
#ARK

الدنيا مطر !
وفي سورة في القرآن اسمها (الحديد)..

فيها آية بتحكيلنا عن أراضي ميتة، جافة، صلبة، عانت من ظمأ طويــــــل وكانت فاقدة الأمل من أي فرصة للحياة..

وفجأة نزل عليها المطر فأحياها..

اعْلَمُوا أَنَّ اللَّهَ يُحْيِي الْأَرْضَ بَعْدَ مَوْتِهَا ۚ قَدْ بَيَّنَّا لَكُمُ الْآيَاتِ لَعَلَّكُمْ تَعْقِلُونَ.(17)
.
.
لكــــــن الدهشة إنه آية الحديد ما كانت بتحكيلك عن إحياء الأرض الميتة فقط..
لإنه الآية السابقة إلها مباشرة كانت بتحكي عن قلبـــــــــــــــك !

أَلَمْ يَأْنِ لِلَّذِينَ آمَنُوا أَن تَخْشَعَ قُلُوبُهُمْ لِذِكْرِ اللَّهِ وَمَا نَزَلَ مِنَ الْحَقِّ وَلَا يَكُونُوا كَالَّذِينَ أُوتُوا الْكِتَابَ مِن قَبْلُ فَطَالَ عَلَيْهِمُ الْأَمَدُ فَقَسَتْ قُلُوبُهُمْ ۖ وَكَثِيرٌ مِّنْهُمْ فَاسِقُونَ (16)
.
.
اللي قدر يحيي الأرض ويرويها وينعشها بعد موتها ..
قادر إنه يحيي قلبـــــــــــك..!
<3

#القرآن_الجميل
#ARK

- بتتذكر لما استيأست وبكيت من كل قلبك..؟
وكنت تتمنى يكون هداك اليوم آخر يوم بحياتك..!
لما صرت تحكيلي معقول رح ييجي يوم أرجع أبتسم فيه عادي؟
لما رمقتني بنظرات تكذيب لما كنت أواسي فيك وأذكرك بلطف ربنا ورحمته..؟؟
هيها انتهت هديك الأيام يا صاحبي !
أوعدني ما تنسى..

-تتذكر لما مرة كنا بنحكي عن ستر ربنا؟
وإنه كيف ربنا ستر علينا كثير وكثير..
وكيف لو انكشف ستره عنا كانت رح تستحيل حياتنا لخجل وعار!
أوعدني ما تنسى..

- تتذكر لما كنت معصب عشان ما استجابلك ربنا هديك الدعوة..
وقتها لما صرت تتأسف وتستغفر عشانك حكيت بشكل عفوي:
معقول الله ما بسمعنا؟!
تتذكر بعدها بفترة لما أجيت عليّ تحكيلي: ربنا بسمعنا وبختار الخير إلنا كمان..الحمدلله ما استجابلي !
اوعدني ما تنسى..

- تتذكر لما الناس كانت بتركض علينا بعد الحادث..
كلهم فكرونا ميتين لما شافوا السيارة..
وكلهم انصدموا لما شافونا عايشين..
وقتها ربنا منحنا فرصة نحكيله فيها عن كثير شغلات: آسف..
اوعدني ما تنسى..
.
.
.
أوعدني تكون عادل ومنصف وشاكر وحافظ لجميل صنع ربنا فيك..
أوعدني ما تكون صاحب ذاكرة متحيزة ناقمة ما بِعلَق فيها إلا كل ألم وحزن في الوقت اللي بتطرد فيه كل إشي لطيف..!

أوعدني ما تنسى رحمة ربنا المختبئة بكل وجع ومصيبة.
أوعدني تسمع منيح لصوت العبرة المصاحب لأصوات عبراتنا..
ولصوت البشرى بعد دموعنا وآهاتنا..
.
.
وَإِذَا أَذَقْنَا النَّاسَ رَحْمَةً فَرِحُوا بِهَا وَإِنْ تُصِبْهُمْ سَيِّئَةٌ بِمَا قَدَّمَتْ أَيْدِيهِمْ إِذَا هُمْ يَقْنَطُونَ

اوعدني ما تقنط..
واوعدني ما تنسى..!

#القرآن_الجميل
#ARK

بتلاقي المتزوجة بتنكر عالبنات اللي خطبوا وبتقلهم: لأ..ليش تستعجلوا..!
والمتغرّب بنزّل بوستات عشان يقلنا ما نتغرّب..وإحتمال يبهدلنا لو شافنا بنسأل عن الغربة..
اللي مخلفه وعندها ولاد بتحذر بقية البنات إنهم يخلفوا!!
واللي بدرس تخصص بلوم الناس اللي رح تدرسه !

بنسوا إنه كل حد إله ظروفه الخاصة، وبحرمونا نعيش تفاصيل همه عاشوها...!

ولو أجاك صاحبك يشكيلك من ذنب إنت نفسك بتوقع فيه، رح ينزل من عينك وتتغير نظرتك إله علما إنك زيك زيه..
بس ممكن لإنك عرفت عنه إشي من عرفه عنك!

وإحنا عموما بننكر عالناس بشكل عنيف تصرفات وأفعال بالرغم من وقوعنا فيها..!!

وبالتالي السؤال:
عمركم صادفتوا شخص بُحكُم على الآخرين بنفس الأحكام اللي بحكمها على نفسه ؟؟!
يعني مثلاً شاف شخص وقع في غلط، بقوم بعطف وبشفق وبستر عليه وبقول مهو أنا بيوم من الأيام وقعت بنفس غلطه وربنا سترني..

أو شخص بحاول دايما يتأنى ويلتمس العذر للآخرين وبحط حاله مكانهم قبل ما يحكم عليهم..

أو بحاول يتأمل في تفاصيل حياته، قبل ما يتحكم بتفاصيل حياة الآخرين ويملي أفكاره وقناعاته عليهم..!
---------------------

في سورة الكهف دائما بلفتني حوار سيدنا موسى مع الخضر..
ومع فارق التشبيه بين الأمثلة فوق وأمثلة سيدنا موسى..
لكن الفكرة وحدة..

سيدنا موسى استعجل في إنكار أمور على الخضر وطلب معرفة الجواب والحكمة منها بالرغم من إنه حياته فيها قصص بتشبه تماما المواقف اللي انكرها وطلب معرفة الحكمة منها !!

مثلا: سيدنا موسى أنكر عالخضر خرق السفينة وخاف على أهلها من الغرق!
فانطَلَقَا حَتَّىٰ إِذَا رَكِبَا فِي السَّفِينَةِ خَرَقَهَا ۖ قَالَ أَخَرَقْتَهَا لِتُغْرِقَ أَهْلَهَا لَقَدْ جِئْتَ شَيْئًا إِمْرًا (71)

وهو نفسه إمه ألقته في البحر وهو طفل رضيع وربنا أنقذه من الغرق!
وَأَوْحَيْنَا إِلَىٰ أُمِّ مُوسَىٰ أَنْ أَرْضِعِيهِ ۖ فَإِذَا خِفْتِ عَلَيْهِ فَأَلْقِيهِ فِي الْيَمِّ وَلَا تَخَافِي وَلَا تَحْزَنِي ۖ إِنَّا رَادُّوهُ إِلَيْكِ وَجَاعِلُوهُ مِنَ الْمُرْسَلِينَ (7)

أنكر موسى على الخضر ترميم الجدار..
فَوَجَدَا فِيهَا جِدَارًا يُرِيدُ أَن يَنقَضَّ فَأَقَامَهُ ۖ قَالَ لَوْ شِئْتَ لَاتَّخَذْتَ عَلَيْهِ أَجْرًا (77)

وهو نفسه عليه السلام سقى للبنتين في مدين بلا أجر ومقابل !!
فَسَقَىٰ لَهُمَا ثُمَّ تَوَلَّىٰ إِلَى الظِّلِّ فَقَالَ رَبِّ إِنِّي لِمَا أَنزَلْتَ إِلَيَّ مِنْ خَيْرٍ فَقِيرٌ (24)

ولام الخضر على قتل غلام بحق..
فَانطَلَقَا حَتَّىٰ إِذَا لَقِيَا غُلَامًا فَقَتَلَهُ قَالَ أَقَتَلْتَ نَفْسًا زَكِيَّةً بِغَيْرِ نَفْسٍ لَّقَدْ جِئْتَ شَيْئًا نُّكْرًا (74)

ونفسه عليه السلام تسبب في قتل شخص بغير حق!
وَدَخَلَ الْمَدِينَةَ عَلَىٰ حِينِ غَفْلَةٍ مِّنْ أَهْلِهَا فَوَجَدَ فِيهَا رَجُلَيْنِ يَقْتَتِلَانِ هَٰذَا مِن شِيعَتِهِ وَهَٰذَا مِنْ عَدُوِّهِ ۖ فَاسْتَغَاثَهُ الَّذِي مِن شِيعَتِهِ عَلَى الَّذِي مِنْ عَدُوِّهِ فَوَكَزَهُ مُوسَىٰ فَقَضَىٰ عَلَيْهِ ۖ..

---------------------------
لما تحكموا وتنظروا وتقيموا وتحاسبوا وتعاملوا الآخرين بنفس الطريقة اللي بتتعاملوا فيها مع أنفسكم..

وقتها رح يكمل إيمانكم..
ورح نعيش بخير ") <3


#القرآن_الجميل
#ARK

قبل سنوات وصلتني رسالة من بنت!
كنت بتمنى أموت قبل ما اقرأها..
لإنها كانت بالنسبة إلي موجعة فوق الوصف..
وهيّ مضى على الرسالة سنوات وأنا لحد هاللحظة مش قادر أنساها..
ولا بحياتي رح أنساها..!

بس يا ريت أقدر ما أخليها حاضرة بكل تفاصيل يومي وحياتي..
يا ريت بقدر أرجع للإنسان اللي كنته قبل الرسالة..
لما كانت الحياة حلوة أو بالأحرى ما كانت بهديك القسوة والظلم اللي شفتهم بعد ما قرأت الرسالة..
.
.
**
"أنا بنت منيحة ومن بيت كتير منيح..
قبل الجامعة كنت بمراكز قرآن وكنت شاطرة بمدرستي وكل المعلمات بحبوني وكنت واعية بعرف الصح من الخطأ..
كنت على قدر من الوعي يخليني ما أنجر ورا أي غلط..

دخلت الجامعة وأنا واعية إنها بيئة مش سهلة والواحد بصادف فيها أشكال وألوان..
وكثير سمعت وقرأت قصص عن ناس غيّرتهم الجامعة، ناس فقدوا ثباتهم وخسروا دينهم ومشيوا ورا أهوائهم..!

بالرغم من وعيي وديني وتحفظي وقعت بحب شب !
مع ذلك كنت حريصة إنه حتى بعلاقتي معه يكون فيها حدود..
وهو أصلاً أكبر مني وبفصل تخرجه..
وكنت حريصة أوجه الموضوع للحلال لإنه هو حكالي بعد سنة رح يتقدم إلي وأنا بكون سنة ثانية، وأظن أهلي رح يوافقوا فيما لو كنت سنة ثالثة أتزوج..

تطورت علاقتنا بشكل رهيب..
ما كنت متصورة إنه الحب هالقد حلو!
وغضيت النظر عن كل ملاحظات البنات حول الشباب لإني كنت شايفته غير عنهم..

وكان بينّا ثقة عمياء..
وهالثقة العمياء كان أحد أكبر تجلياتها لما مرة بلحظة ضعف غاب صوت الوعي والضمير وغاب عن بالي نظر ربنا اللي ما بفوته شيء مهما صغر..

ما تفهم من كلامي إني غلطت ووقعت بكبيرة..
لكن صدرت مني أفعال وتصرفات فاضحة كان الأصل ما تصدر مني وما توقعت بيوم تصدر مني..!

والنقطة المهمة
"أوووووه حكيت كتير آسفة..خلص ركز بالجاي"
النقطة المهمة إنه الثقة العمياء تجلت إني أسمحله يصور الإشي اللي صار فيديو..

بعرف رح تحكيلي إني غبية والأصل ما أسمح بس زي ما بحكوا: الحب أعمى!
أولها رفضت يصور لكني استسلمت إله، وبصراحة ما بقدر أشك فيه ولا نتفة إنه هالشخص اللي رح يصير زوجي وأبو ولادي ممكن بيوم يستغلني ويبتزني !

خبرني لاحقاً وبعد إلحاح مستمر إنه حذف الفيديو ..
وأنا والله تبت لربنا وندمت وما رجعت أبدًا لهيك تصرفات..
وهو أصلاً تخرج وبطلت أشوفه زي زمان..
وما بدي أفصّل اكثر لكن انتهت علاقتنا !

تجاوزت الإشي..
واشتغلت على حالي ورجعت لربنا وهو أشعرني أكثر من مرة إنه قبل توبتي والدليل إنه فتحلي أبواب خير كثيرة، وبنفس الوقت كان الشب يحاول يرجع يتواصل معي وكنت أرفض تمامًا تمامًا حتى أثبت لربنا صدقي..
مع العلم كنت أحس حالي لسه بحبه وكنت ما رح أرفضه فيما لو تقدم إلي بالحلال..

مرت سنوات من الخير والعطاء والتطوع والإلتزام والصحبة الصالحة والقرآن واكتشفت إنه الحب ما طلع حلو هالقد..!
لإنه ما في أحلى من شعور الإنسان يكون قريب من ربنا..
والحب حلو هالقد لما يكون بالحلال وبرضى ربنا..
كنت كل ما أتذكر فصلي الأول أضحك عحالي كيف كنت هيك..
وأحكي الحمدلله..
.
.
تخرجت والشب هداك تقريباً من سنة بطّل يبعت إشي لإني كنت أعمله بلوك وهو أصلا يئس مني تماماً وعرف إني صرت إنسانة غير، مش زي البنت إم الـ 18 سنة اللي كان يعرفها..

تقدملي شب على قدر كبير من الأخلاق والدين ووافقت عليه وتزوجنا الحمدلله..
وعايشين حياة أسعد منها ما في!

أسعد منها ما في حتى لحظة ما وصلني بيوم مسج من "فييك أكاونت"!
ما كنت أتصور إنه الدنيا بشعة هالقد..
كان المسج من هداك الشب بسألني فيه سؤال واحد:
ذاكرة الفيديو؟؟؟؟!!

تجمدت بمكاني!
واضطريت أرد عليه شو بدك؟ مشان الله شو بدك ؟
خبرني وقتها إنه كان صادق معي لما طلبت منه يحذف الفيديو..
بس للأسف قدر يرجعه وكان ببتز فيي بشكل واضح وصريح إنه رح ينشره ويبعته لزوجي لو ما برد عليه بشو رح يطلب مني !
مع ذلك لو شو ما صار مستحيل أرد عليه..
بس أنا عايشة برعب !
والفيديو فعلاً لسه موجود عنده..
وحكالي رح يرفعه يوتيوب ويبعته لكل الناس اللي عندي..

وهو برا البلد حتى لو بدي أخبر الجرائم الإلكترونية رح يكون الإجراء صعب وانتربول وممكن تضيع القصة بين قصص ثانية كثيرة..

إحكيلي شو أعمل..مشان الله !
أنفصل عن زوجي وخلص قبل ما يعرف !
بس كيف أنفصل وما صارلنا 6 أشهر متزوجين وفش بينا مشكلة وحدة !
طيب أعترفله وأنا ما بضمن ردة فعله..وما أظن يستوعب إنه الغلط كان وأنا عمري 18 وكنت هبلة وغشيمةـ. وهل رح يصدقني لو قلتله إنه الفيديو كان دقيقة استثناء وضعف من عمري اللي كنت حريصة فيه على ديني وأخلاقي وعفتي وحيائي !
طيب أحكي لأهلي؟
بتعرف أبوي رح ينجلط متأكدة..
وأخوي الكبير متأكدة ممكن بفورة غضب يقلتني !
مشان الله..شو اعمل ؟؟
**************

جاوبتها جواب طويل جدًا..
وحكلتها رح نآخذ بالأسباب بخصوص الجرائم الإلكترونية..
وطلبت منها ما تتسرع بأي تصرف وحذرتها من أي خطوة غير مدروسة وأكدت عليها إني رح أربطها بناس يساعدوها..

ومع ذلك ولإنه بهيك قصص ال

واحد مهما أخذ بالأسباب فممكن تخونه..
انهيت رسالتي الطويلة بأسوء سيناريو -لا سمح الله- ممكن يصير:

يعني لا سمح الله فعلاً يبعت الفيديو وزوجك وأهلك يعرفوا..
زوجك ما يتقبل الإشي وتنفصلي عنه لا سمح الله..
أهلك وإخوانك يتصرفوا بشكل عنيف معك..
وتتشوه سمعتك بين دائرة معارفك..
قلتلها هذا أسوء سيناريو ممكن يصير وحله ببساطة : "الله" !

خلص مش إنت تبتي وهالغلط كان دقيقة وزلة بعمرك القريب منه..
مش إنت حكيتيلي إنه هو أشعرك إنه غفرلك وتاب عليك..
صدقيني هو المهم فقط..

ولو صار هالسيناريو فهذا بلاء كبير ما إلك خيار غير الصبر عليه، صح رح تخسري زوجك وأهلك وسمعتك لكن تذكري هالدنيا لفترة محدودة..
بعرف إنه الكلام سهل بس ما إلك خيار غير تصبري وتحتسبي..
وصبر على هيك خيار صدقيني ما بليق فيه إلا الفردوس الأعلى..
ومع أول قدم في الجنة إن شاء الله رح تقسمي بربنا إنك ما شفتي بحياتك أي بؤس أبدًا..

أنا شفت صدق كبير برسالتك بس ديري بالك تركيزك ينصب على معادلة الدنيا فقط..
ما تنسي "الآخرة"..
هي العزاء والأمل وربنا رح يعوضك فيها عن كل ألم..
ورح ينتقم من كل حد ظلمك !
**********
(الخاتمة)

هالبنت المظلومة !
غامدية هذا العصر..
واللي توبتها لو وزعت على أهل الأرض لوسعتهم..
ولعلها اليوم أقرب أهل الأرض إلى أهل السماء..
وصلني مسج منها من خلال صاحبتها:

أسوء سيناريو صار فعلًا..!!
بس أخوي ما قتلني ويا ريته قتلني وريحني من هالحياة !

ما رح أنسى كلامك عن معادلة الآخرة وإنه الدنيا لفترة محدودة..
وإنه ربنا هو المهم فقط..
وإنه مع أول قدم بالجنة رح أقّسِم بربنا إني ما شفت أي بؤس أو شقاء في الدنيا..

يا الله معقول جد أنسى كل هالجحيم اللي عايشته..؟
معقول أنسى نظرة زوجي إلي لما عرف..؟
ونظرة الناس اللي كنت أفكرهم أقرب الناس إلي؟
جد رح أنسى الوجع والألم اللي تعرضتله لما أخوي الكبير ضربني بكل قسوة !

متى الآخرة؟
متى رح يتبدد كل هالوجع؟
متى رح أحط إلي أول قدم بالجنة؟
بتعرف إني كثير كنت بفكر أنتحر بس تذكرت "الآخرة" اللي صارت بتمثل إلي العزاء والأمل..
هي هسا بالنسبة إلي كل الأشياء اللي بخلت عليّ فيها الدنيا..
.
.

آه ربنا بغفر وبرحم وبعفو وبتجاوز...بس الناس لأ!
حتى لو ادعوا بيوم إنهم جنبك وبحبوك..
مع زلة وحدة منك بصدروا أحكامهم عليك وبعايروك!!
---------

بدي اطلب منك آخر طلب..
ممكن تدعي ربنا يعجّل في قبض روحي..
لإني والله تعبت..

واشتقتله !

#ARK

مرة أختي بتخبرني عن وحدة من صاحباتها بسموها "شكرًا" من كثر ما بتحكي كلمة "شكرًا" في حياتها..

بتحكيلي:
ما في موقف في حياتها ما فيه كلمة "شكرًا"..
مع البياع والدكتور وعامل النظافة وفي المواصلات ولصاحبتها اللي زبطت إلها الشال، ولإمها وابوها ولكل حد في حياتها بتحكيله شكرًا..

لدرجة مثلا لو بعتت إلها: كيفك؟
بترد علي: منيحة الحمدلله، جد "شكرًا" لسؤالك..وإنتِ كيفك؟

وأحيانا بتشكرنا كصاحباتها بلا سبب، بس لإنه موجودين في حياتها..!
------
أختي كانت مبتسمة وهي بتحكيلي شوف شو كاتبة عالواتساب:
شكرًا يا الله !

وقتها قلت لأختي ما بستبعد أبدًا إنها تكتب هيك..
لإنه بنت مثلها بتشوف نفسها مدينة لكل حد موجود في حياتها، ومدينة لكل حدى أسدى إلها خدمة بيوم من أيامها..
فأكيد رح تشوف نفسها مدينة لـــ (الله) وهو الكريم والجميل والمنعم واللطيف معاها..

وقتها أختي حكتلي بتعرف شغلة؟
علما إنه هالبنت ظروفها صعبة، وفي كثير مشاكل في حياتها، وممكن محرومة من نعم موجودة عند أغلب صاحباتها، بس مع ذلك هي دايما بتشكر الله وبتحمده عكل إشي!
لو تشوف شو بتكتب شغلات عن (الله)!
وكيف إنه هو سبب كل إشي حلو في حياتها..
وكالعادة بتنهي كلامها بــــ ( شكرًا يا الله) !

----------
لحظتها صفنت بأختي وقلتلها بتعرفي هسا استوعبت حديث:
«مَنْ لمْ يشْكُر النَّاسَ لَمْ يشْكُر الله»

يعني الحديث مش فقط معناه إنه اللي ما بشكر الناس كأنه ما شكر ربنا..

الحديث كمان بحمل معنى: إنه اللي من طبعه يجحد الناس ويكفُر فضلهم وما يشكرهم كمان ما رح يشكر ربنا !

واللي شاف خيرهم وفضلهم وقلهم "شكرًا" عليه، من باب أولى رح يشكر (الله) !
.
.
-----------
بتعرف شغلة؟
مرة بعتت إلها كيفك؟
ردت عليّ: شكرا لسؤالك..الحمد والشكر لله..
انا غرقــــــــــانة بنعم الله ! <3

#ARK

وَمَنْ يُرِدْ ثَوَابَ الْآخِرَةِ نُؤْتِهِ مِنْهَا وَسَنَجْزِي (الشَّاكِرِينَ)

سلام~

كل إشي بين إيدك وبتحبه ومتعلق فيه وخايف تخسره، أو أي إشي نفسك فيه وبتشعر إنه حياتك ناقصه بلاه..فمصيره قطعًا إلى نفـــــــاد !

مَا عِندَكُمْ يَنفَــدُ ۖ وَمَا عِندَ اللَّهِ بَـــاقٍ..
--------
يا ترى كيف رح تتعامل مع فكرة الزوال والفقد والنفاد؟؟

لو صبرت وعلّقت قلبك باللي عنده كل شيء بـــــــاق..
وما علّقته باللي بكل أحواله مصيره إلى نفــــــاد..

فهنيئا إلك تكملة الآية:

مَا عِندَكُمْ يَنفَدُ ۖ وَمَا عِندَ اللَّهِ بَاقٍ ۗ وَلَنَجْزِيَنَّ الَّذِينَ صَبَرُوا أَجْرَهُم بِأَحْسَنِ مَا كَانُوا يَعْمَلُونَ (96) <3

#القرآن_الجميل
#ARK

مرة لقيت حجة كبيرة بطريقي فوقفت السيارة وقلتلها بتحبي اوصلك "يمّة"!
تغيرت ملامح وجهها لما قلتلها "يمّة"..!
وقالت: الله يرضى عنك ياريت والله... صارلي ساعة بستنى تكسي..

خبرتني إنه عندها موعد في المستشفى، ومن ضمن الكلام بقلها: شو عندك ولاد يا حجة؟
قالت: أنا ما تزوجت! وعايشة لحالي بس ولاد إخواني وخواتي بتفقدوني من فترة لفترة، الله يرضى عنهم.

نزلت الحجة وهي بتدعيلي..
وأنا كملت طريقي صافن فيها..
وكيف إنها عاشت وحيدة بلا زوج يحن عليها وولاد تربيهم ويركضوا حوليها..!
----------
صفنت كم في ناس عاشوا وحيدين في هالدنيا من غير سند أو حب أو لحظة سعادة حقيقية..
كم في ناس انحرمت من نِعم بشوفوا غيرهم كل لحظة بتقلّب فيها..
كم في ناس أدركهم الموت وهمه بنص مشوارهم، وكم ناس حالت الظروف والآلام والمصائب والابتلاءات بينهم وبين أحلامهم..!

مثل طالب أدركه الموت قبل فرحة التخرج !
بنت ترمّلت بعد عرسها بأيام..
إم فقدت إبنها..
أب انحرم من كلمة "بابا"..
بنات تأخر أو فات نصيبهم..
شباب ظروف الحياة طلعت أكبر من طموحهم..
مجاهد استشهد قبل لحظة النصر..
مثل مصعب استشهد بمعركة أحد..!

ناس كثير ماتت قبل ما يتحقق حلمها بالصلاة في الأقصى..
مساجين وأسرى بنتظروا الموت لإنه أرحم فيهم من ظلم السجّان..
ومظلومين فارقت قلوبهم الحياة قبل أجسادهم من قهرها..

--------------
كالعادة.. بلجأ للقرآن لما نفسي تضيق من هيك أفكار وأسئلة..
وكالعادة القرآن ما بنسى يقدملنا (العــــزاء) من خلال فكرة (الآخرة):

- لِّلَّذِينَ أَحْسَنُوا فِي هَٰذِهِ الدُّنْيَا حَسَنَةٌ ۚ وَلَدَارُ الْآخِرَةِ خَيْرٌ ۚ وَلَنِعْمَ دَارُ الْمُتَّقِينَ.
- وَالْآخِرَةُ خَيْرٌ وَأَبْقَىٰ
- لَٰكِنِ الَّذِينَ اتَّقَوْا رَبَّهُمْ لَهُمْ جَنَّاتٌ تَجْرِي مِن تَحْتِهَا الْأَنْهَارُ خَالِدِينَ فِيهَا نُزُلًا مِّنْ عِندِ اللَّهِ ۗ وَمَا عِندَ اللَّهِ خَيْرٌ لِّلْأَبْرَارِ.
.
.
ومن العزاءات الرهيبة والمدهشة أيضاً فكرة (عدل الله) ..
ومن عدل الله ما يحاسب شخص تقلّب في النعم في هالدنيا مثل حسابه لشخص آخر انحرم منها..
بين بنت عاشت بين مع زوج بحبها وولاد مناح معها وبين بنت عاشت صابرة ووحيدة..
بين شخص ربنا متّعه بنعمة البصر، وبين طفل ضرير بسأل إمه توصفله شكله وشكلها!

بين ناس ثبتوا على دينهم ومبدأهم مع استبعاد فكرة النصر في حياتهم وبين ناس ثبتوا في زمن النصر..
بين مجاهدين غَنِموا بعد النصر وبين مجاهدين استشهدوا قبله..
بين ناس شاءت الأقدار يستعجلوا جزء من أجورهم في الدنيا وبين ناس انحرموا منها..فتمت اجورهم كامــــــلة في (الآخرة)...

وَاصْبِرْ فَإِنَّ اللَّهَ لَا يُضِيعُ أَجْرَ الْمُحْسِنِينَ
.
.
.
الخباب بحكيلنا:
هاجرنا مع رسول الله -صلى الله عليه وسلم- نبتغي وجه الله، فوقع أجرنا على الله، فمنا من مضى لم يأكل من أجره شيئاً، منهم (مصعب) قُتل يوم أحد..

مثل مصعب استشهد بمعركة أحد..!! <3

#القرآن_الجميل
#ARK

عشان شافني مرة في المصلى بقرأ قرآن فكرني شيخ زماني..
وصار كل فترة يسألني أسئلة بالدين..
كانت أسئلته بتظهرلي قديش هو إنسان عفوي وقلبه مليان خير..

مرة دخل عالمصلى وجايب معه أكل، فأنا بحكيله طيب كلّ برا مش هون!
رد بكل عفوية مش عأساس الصحابة كانوا يتباطحوا في المسجد!
وكمّل أكله وهو بحكيلي جايبلك اليوم سؤال فتل مخي يا رجل..
.
.
كان ببلع لقمته وهو بحكيلي هسا مش أنا قلتلك إني زمان كنت بقطّع في الصلاة؟
بس هسا الحمد لله بعجبك..بس أنا لازم أستوعب شغلة حتى هيك أحب الصلاة أكثر..
هسا مش بكل ركعة بنحكي: إهدنا الصراط المستقيم..
يا أخي شو الصراط المستقيم اللي أنا بسأل ربنا يهديني إله كل يوم؟
كيف بدي اعرف أنا وين من هالصراط المستقيم.. ؟

واستنى قبل ما تجاوب..
إصحك تحكيلي: هو الطريق المستقيم الذي لا اعوجاج فيه !
مش تفكرني راح أقتنع عشان حكيت اعوجاج وهيكا..
ترى كاشفكو إنتو الشيوخ ههه!
ورجع يكمل ساندويشته !
.
.
ما بتتصوروا قديش لفت انتباهي ببساطته وحرصه وصدقه حتى يعرف ويفهم دينه..
طيب هالشب اللي بشوفه وبشوف هيئته رح يصدق إنه لما يكون قاعد مع حاله بكون بفكر بالصراط المستقيم اللي لازم يمشي عليه؟
-----------
.
.
طيب أنا ما راح أجاوبك إنت لحالك اكتشف الجواب..
افتح القرآن على سورة الأنعام من آية 151 وأقرأ لعند آية 153:

قُلْ تَعَالَوْا أَتْلُ مَا حَرَّمَ رَبُّكُمْ عَلَيْكُمْ ۖ:
أَلَّا تُشْرِكُوا بِهِ شَيْئًا ۖ
وَبِالْوَالِدَيْنِ إِحْسَانًا ۖ
وَلَا تَقْتُلُوا أَوْلَادَكُم مِّنْ إِمْلَاقٍ ۖ نَّحْنُ نَرْزُقُكُمْ وَإِيَّاهُمْ ۖ
وَلَا تَقْرَبُوا الْفَوَاحِشَ مَا ظَهَرَ مِنْهَا وَمَا بَطَنَ ۖ
وَلَا تَقْتُلُوا النَّفْسَ الَّتِي حَرَّمَ اللَّهُ إِلَّا بِالْحَقِّ ۚ ذَٰلِكُمْ وَصَّاكُم بِهِ لَعَلَّكُمْ تَعْقِلُونَ (151)

وَلَا تَقْرَبُوا مَالَ الْيَتِيمِ إِلَّا بِالَّتِي هِيَ أَحْسَنُ حَتَّىٰ يَبْلُغَ أَشُدَّهُ ۖ
وَأَوْفُوا الْكَيْلَ وَالْمِيزَانَ بِالْقِسْطِ ۖ لَا نُكَلِّفُ نَفْسًا إِلَّا وُسْعَهَا ۖ
وَإِذَا قُلْتُمْ فَاعْدِلُوا وَلَوْ كَانَ ذَا قُرْبَىٰ ۖ
وَبِعَهْدِ اللَّهِ أَوْفُوا ۚ ذَٰلِكُمْ وَصَّاكُم بِهِ لَعَلَّكُمْ تَذَكَّرُونَ (152)

وَأَنَّ هَٰذَا ((صِرَاطِــــي مُسْتَقِيــــــــــمًا)) فَاتَّبِعُوهُ ۖ وَلَا تَتَّبِعُوا السُّبُلَ فَتَفَرَّقَ بِكُمْ عَن سَبِيلِهِ ۚ ذَٰلِكُمْ وَصَّاكُم بِهِ لَعَلَّكُمْ تَتَّقُونَ (153)

شفت شو الصراط المستقيم؟؟
.
.
سألت ربنا يرزقني قلب زي قلبه..
لما شفته وبكل إهتمام وحرص وعفوية قاعد بِعدّ على أصابعه الوصايا العشرة في الآيات..
كان وقتها بحكي مع حاله:
هاي الحمد لله مش عندي، دايمًا كلمة لا إله إلا الله علساني..
وهاي لا والله لازمني أكون أحسن شوي مع أهلي..
وولادي بس ألاقي إمهم بالأول.. ")
والفواحش ربنا يجيرنا منها بس والله بدها ديرة بال..
وهاي ..........
...........

#القرآن_الجميل
#ARK

عندي امتحانات هالفترة، وبدل ما أدرس قررت أفكر شو رح أسمّي بناتي مستقبلا إن شاء الله.. ")
لحد هاللحظة ( قدر، شام، جلنار، هاجر...)
والأولاد ( عيّاش، علي، عبدالرحمن)
والباقي على إمهم ^^

وبعدها من الملل فتحت كتاب بحكي داغستان ")
وسبحان الله صادفت فقرة عن كيف الداغستانيين بسموا أولادهم:
"اسم البنت يجب أن يشبه بريق النجمة أو لطف الزهرة، واسم الرجل يجب أن يتجسد في صليل السيوف وحكمة الكتب".

فقررت أعيد النظر في الأسماء اللي اخترتها ").
------------
الناس بفترة الإمتحانات بتتحول لكائنات أخرى!
بصير الواحد فجأة مهتم بأشياء عمره ما اهتم فيها..
وبتشغل باله أسئلة عمره ما فكر فيها..
وهو مستعد يعمل أي إشي في الحياة إلا إنه يدرس ويركز في امتحانه..

لما فجأة أحب أقرأ مسجات إمي اللي بتوصلها من الجارات عالوتساب..
وفجأة بكتشف إني زمان ما حكيت مع اختي..
ويضيق صدري من غير سابق انذار على أحوال الأمة والناس..

وهذا شيء تقريبا كلنا متلبسين فيه أوقات الإمتحانات أو لما يكون فوق راسنا شغل لازم نسلمه..

كلنا (بنهرب نفسيّا) من كل إلتزام علينا..
وبنشغل حالنا بأي شيء يلهينا وينسينا..
-----------------------------
.
.
هالدنيا اللي عايشين فيها عبارة عن امتحان..
من لحظة ما نصير مكلّفين وحتى لحظة وفاتنا..
معقول إحنا بنتعامل مع هالإمتحان زي ما بنتعامل مع امتحانات الجامعة!
لما نحاول نشغل حالنا بأي إشي حتى نلتهي عنها..
أي إشي مهما كان فارغ أو تافه أو ساذج بس المهم ننسى..

ليه دائما بنتغافل وبنتناسى حقيقة إنه حياتنا كلها امتحان..؟
امتحان بين الخير والشر..العدل والظلم..الحق والباطل ..
وإنه رح تيجي لحظة رح تنسحب فجأة ورقة الإمتحان من بين إيدينا..
وقتها ما في مجال نضيف حرف واحد عليها..
وما في لجنة استرحام نقدم إلها توسلاتنا واعذارنا..
.
.
.
**ملاحظة:
الورقة لسه بين إيديكم..!

{يَا أَيُّهَا الَّذِينَ آمَنُوا لَا تُلْهِكُمْ أَمْوَالُكُمْ وَلَا أَوْلَادُكُمْ عَن ذِكْرِ اللَّهِ وَمَن يَفْعَلْ ذَلِكَ فَأُوْلَئِكَ هُمُ الْخَاسِرُونَ . وَأَنفِقُوا مِن مَّا رَزَقْنَاكُم مِّن قَبْلِ أَن يَأْتِيَ أَحَدَكُمُ الْمَوْتُ فَيَقُولَ رَبِّ لَوْلَا أَخَّرْتَنِي إِلَى أَجَلٍ قَرِيبٍ فَأَصَّدَّقَ وَأَكُن مِّنَ الصَّالِحِينَ . وَلَن يُؤَخِّرَ اللَّهُ نَفْساً إِذَا جَاء أَجَلُهَا وَاللَّهُ خَبِيرٌ بِمَا تَعْمَلُونَ}
#القرآن_الجميل
#ARK

ما عمري في حياتي خضت صراع (أغش أو ما أغش) في الإمتحانات لإنه الموضوع ببساطة كان صعب على أرض الواقع.

لكن لما أجت امتحانات الأونلاين وجدت نفسي ولأول مرة بخوض هالصراع!
إنه تقدم إمتحان والمادة جنبك، وإنه يكون بينك وبين الأجوبة كبسة join على جروب حل للأسئلة.

وهذا شيء بعلم النفس يُطلق عليه (تأثير الموقف)!
يعني إحنا بنمتلك مبادئ وقناعات وبنعيش عليها، لكن هالمبادئ رح تتعرض لاختبار لما تنحط (بموقف)!
والموقف بحدد صدقنا من ادّعائنا..

مثلا: إنت كمبدأ بترفض الغش، لكن امتحانات الأونلاين وضعتك في (موقف) بختبر هالمبدأ.

والموقف عادة بكون إله سطوة وقوة وبعمينا عن كل مبادئنا..
وبنلاقي حالنا صرنا نبرر استسلامنا لهذا الموقف..
إنه الكل بغش! أصلا التعليم الأونلاين مش منصف..! والدنيا كورونا والواحد نفسيته في الحضيض!
رح أغش هالمرة بس وبعدين ما رح أغش أبدا أبدا!
.
.
.
صراع صعب..
وموقف قوي بختبر مبادئي..

مع ذلك ما قدرت أغش!
مش لإني منيح أبدا، بالعكس عندي أغلاط ثانية كثيرة..
بس ما بعرف ليه شعرت إنه هالخطأ تحديدا رح يترك أثر رهيب جواتي..
رح يغير نظرتي لنفسي..
رح أشعر نفسي ظالم لكل حدا تعب ودرس واجتهد وما نام الليل وأنا بكل بساطة جبت أعلى منه!

طيب شو بضمني خطوة الغش حاليا ما تقودني لخطوات أكبر مستقبلا في حياتي وشغلي وعيلتي؟
طيب مش ممكن مستقبلا لما أتعرض لــ (موقف) كمان أبرر لنفسي أغلاطي واستسلامي؟
-------
.
.
وصلني مسج على آرك من بنت بتحكي عن ندمها بعد ما غشت، وإنه هل ربنا رح يقبل توبتها؟

جاوبتها أكيد ")
الندم توبة، ومجرد إنك ما رجعتي فهذا دليل صدقك وحرصك..

بعد فترة بعتت: قدمت امتحان وكنت بقدر أغش فيه..
لكني ما غشيت!
وخسرت علامات والأغلب جاب أعلى مني..

بس ما بتتصور سعادتي لما كنت بقدر أغش وما غشيت!
شعرت نفسي قوية وعندي إرادة وصاحبة مبدأ..

وهالشعور ما بستبدله أبدا أبدا بالدنيا كلها..
فما بالك بشعور سعادة غير حقيقي بضحك فيه عنفسي إني جبت علامة عالية مش بجهدي..!
----------

بيني وبين حالي صرت أقول: نيالها..!
خسرت علامات، لكنها انتصرت بالــ (الموقف) الصعب..

انتصرت بالــ (مبدأ) ! <3

#ARK