الله..أكبـــــر..
الله أكبر.. من كل إشي..!

الله أكبر من كل همومي !
الله أكبر من كل لحظة ألم تسللت لقلبي..
أكبر من كل مصيبة استنزفت عمري..
أكبر من خذلان أقرب الناس إلي..
أكبر من كل ذنب كان حاجز بيني وبينه..
أكبر من كل لحظات الضياع والوجع اللي بتعصف بحياتي..
الله أكبر من دنيا ربطت فيها سعادتي..
أكبر من اهتمام كنت بنتظره من أقرب الناس إلي..
أكبر من ناس رفضت تسمعني..
وأكبر من كره وكِبر وظلم وحقد عشعش بقلوبهم..
.
.
الله أكبر من كل إشي بحول بيني وبين أحلامي وأهدافي..
أكبر من كل خطوات استصعبت أكملها..
وأحلام قررت أتنازل عنها..
وصراعات ياما فكرت أنسحب من مواجهتها..
.
.
الله أكبر من كل لحظة فتور حرمتني من قربه..
من كل مرة حرمت فيها حظ روحي من كلامه..
من كل لحظة كسل كانت حاجز من السجود فيها بين ايديه ومناجاته..
من كل إشي شغلني عن فكرة ذكره واستحضار رحمته ومعيته..
.
.
الله أكبر من كل إشي..
الله أكبر من كل إشي!

وَقُلِ الْحَمْدُ لِلّهِ الَّذِي لَمْ يَتَّخِذْ وَلَداً وَلَم يَكُن لَّهُ شَرِيكٌ فِي الْمُلْكِ وَلَمْ يَكُن لَّهُ وَلِيٌّ مِّنَ الذُّلَّ وَكَبِّرْهُ تَكْبِيراً ❤

#القرآن_الجميل
#ARK

من أكم يوم دخلت على أحد شركات الإتصالات وكان المكان كثير أزمة والدور طويييل جدا..

مباشرة دخلت وراي بنت وكانت حاملة أكثر من كيس وواضح عليها علامات التعب والإرهاق..

ما في مكان نقعد فيه والكراسي كلها مليانة، وأقل شيء الواحد بدو يستنى نص ساعة حتى ييجي دوره..

وأخيرا وبعد طول انتظار قرّب دوري ودور البنت اللي فاتت وراي..

وفي هديك اللحظة صار موقف أدهشني!
ما ببالغ إنه هالموقف ترك أثر رهيب جواتي، وأنقذني من لحظات فتور وتعب كنت بمر فيها..

لحظتها دخلت حجة كبيرة بالعمر..
كانت بتمشي شوي شوي ومش قادرة تحمل حالها..
قامت البنت "اللي دخلت وراي واللي صارلها أكثر من نص ساعة بتستنى دورها" وقالت للحجة:
أشوف ورقة الدور اللي معك!
وقامت أخذت ورقة دورها وأعطتها ورقتها!!

وقالت إلها:
ما في داعي تستني، هيّ شوي وبيجي دورك.. !!!

ابتسمت الحجة وصارت تدعي إلها بدعوات من قلبها..
ورجعت البنت لمكانها بكل عفوية وهي ممكن غير مدركة إنه هالموقف البسيط ممكن يكون السبب في نجاتها!
وإنه هالموقف دَفع أقدار سيئة كانت رح تصيبها..
ممكن ما بتعرف إنه دعوات الحجة أمّن عليها ملائكة..
ولا بتعرف إنه في اللحظة اللي أعطت فيها دورها للحجة كانوا الملائكة في الملأ الأعلى بنادوا بإسمها!!
.
.
.
طلعت من المكان وأنا مدهوش من حجم الخير الساكن بقلب هالبنت!
وكيف إنه الدنيا مثل ما بتصدمنا بناس سيئة كمان بتصدمنا بناس ما بنقدر لما نشوفهم إلا ندعيلهم ونقول: الدنيا لسه بخير..
.
.
للبنت اللي قالت للحجة: ما في داعي تستني، هيّ شوي وبيجي دورك.. !!!

شكرًا!
وأرجوك خليك مثل ما إنت..
وما تسمحي للدنيا تغيرك..

وإلهي مثل ما جبرتي خاطر هالحجة إنّه يجبر خاطرك!
#ARK

هل سبق وخطرلك تعمل خطتك السنوية بالتاريخ الهجري؟!
ممكن إنت دائما بتعمل خطتك بالتقويم الميلادي اللي وضعه البابا غريغور الثالث عشر، واللي غالبا أول مرة بتسمع فيه بحياتك! ")
لكـــــن ليه هالمرة ما تجرب تعمل خطتك بالتقويم الهجري اللي وضعه "عمر بن الخطاب"!

الجميل في التاريخ الهجري إنه ما انطلق من ولادة أحدهم أو موته..
تواريخ الميلاد والوفاة غالبا مش ثابتة..
وموت وولادة أحدهم ما بعني إلنا هالشيء..
معظم تواريخنا الإسلامية مرتبطة (بالعمل والإنجاز)!
إحنا ما بنعرف بالضبط ميلاد رسولنا وصحابته، لكن بنعرف بالضبط تواريخ هجرتهم وجهادهم ومعاركهم وفتوحاتهم..!
ما بهمنا جدا تواريخ ميلادهم...لكن بهمنا تواريخ ميلاد قلوبهم لمّا لامسها الوحي..!
بهمنا تواريخ هجرتهم وجهادهم وإنجازهم وتضحيتهم..

كان ممكن لسبدنا عمر إنه يختار تاريخ ميلاد رسولنا، أو تاريخ معركة بدر لما انتصروا فيها..
أو تاريخ فتح مكة مثلا..
لكنه اختار (الهــــجرة)!
اختار اللحظة الحاسمة والخطوة المهمة واللي ترتب عليها بالرغم من صعوبتها كل الإنتصارات والفتوحات اللاحقة..
.
.
----------------
يوم الثلاثاء 1/ محرّم.
أول أيام السنة الهجرية الجديدة.
.
.
لا بدّ أن تهاجر إلى الله يا فتى.
لا فتح من غير هجرة
لا (فتح لك) من غير (هجرة)..!

#ARK

اليوم بسأل إمي:
هسا لو إنت أدركتي لحظة الهجرة، كنتِ رح تهاجري مع النبي -صلى الله عليه وسلم - وتتركي بيتك وحياتك في مكة؟؟!!

فقالت: طبـــــــــعا آه بهاجر وأول وحدة كمان..
وسرحت بخيالها وصارت تقول: أنا أصلا كنت رح أكون مع أسماء بنت أبو بكر وهي رايحة توصّل إلهم أكل..
أنا اللي رح أطبخ أصلا "))))

وكنت رح اضرب أبو جهل عشان مدّ إيده على أسماء "الله يكسّر إيديه" لما سألها وين أبوك أبو بكر؟!

وفجأة قالت: يييي والله يا خوفي إنت اللي ما تهاجر! ")))
.
.
صدقا كان من أجمل الحوارات اللي خضتها بحياتي مع إمي..
كان نقاش جدا عفوي وجميل خصوصا لما أقنعتها وارتاحت إنه والله العظيم كنت رح أهاجر يمّة! ")))

انتهى نقاشنا لما حكيت لإمي قصة صحابي منعته ظروفه وكبر عمره يهاجر مع الرسول وأصحابه..
لكن هالصحابي ما تحمّل برودة الكفر في مكة..
وما تحمل فكرة إنه الصحابة بصافحوا وجه النبي صلى الله عليه وسلم وهو لأ..

فقرر يهاجر..
وللأسف وهو في الطريق أدركه الموت..
وفي لحظات احتضاره ضرب كف بكف وقال: اللهم هذه بيعتي لك.
وضرب كف بكف وقال: اللهم هذه بيعتي لرسولك.

ومات!

فنزلت فيه آية:
وَمَن يُهَاجِرْ فِي سَبِيلِ اللَّهِ يَجِدْ فِي الْأَرْضِ مُرَاغَمًا كَثِيرًا وَسَعَةً ۚ وَمَن يَخْرُجْ مِن بَيْتِهِ مُهَاجِرًا إِلَى اللَّهِ وَرَسُولِهِ ثُمَّ يُدْرِكْهُ الْمَوْتُ فَقَدْ وَقَعَ أَجْرُهُ عَلَى اللَّهِ ۗ وَكَانَ اللَّهُ غَفُورًا رَّحِيمًا.
.
.
.
إمي شعرت إنها بتشبه هالصحابي!
هي كمان كانت حابة تهاجر مع الرسول وأصحابه..
كانت حابة تمشي مع أسماء عالغار وتخاطر بحياتها..
كانت حابة تقدم أي شيء....
حتى لو طبخة تطبخها لرسول الله حتى يدعيلها..!
.
.
بعفوية لقيت إمي بعد هالقصة بتضرب كف بكف وبتقول:
اللهم هذه بيعتي لك!
وضربت كف بكف مرة ثانية وقالت:
اللهم هذه بيعتي لرسولك!

#القرآن_الجميل
#ARK

- كان عنّا بنت في الكلية جننتنا حرفيّا إنه يلا بدنا نجمع مصاري عشان نكفل أيتام..!

- ومرة كنا بنلعب كرة قدم وأجينا نريّح شوي ونشرب مي، ولما أجيت أعطي مطرة الميّ لأحد الشباب، قلي شكرا بس أنا صايم!
وقتها قلتله يا رجل ما إنت عارف عنّا لعبة كرة؟!
قلي آه بس أنا الصيام عندي إشي عادي وجدا سهل..

- صديق إلي عنده خواته كل إشي بحياته، مش طبيعي شو بهتم فيهم، ونص راتبه بروح بس هدايا إلهم..

- عنّا بنت في الحارة بآخر كل أسبوع بتلم أطفال الحارة وبتوزع عليهم أشياء زاكية وبتحكيلهم قصص يستفيدوا منها..

- أختي طبيبة أطفال، يا الله شو ساعدت أطفال بدون أي مقابل!

- بعرف شب عادي جدا جدا، لكن في 5 عائلات عفيفة بصرف عليهم!

- وفي بنت عايشة حياتها تمشي بحوائج الناس وتجبر خاطرهم..

-----------
المشترك بين كل هالأشخاص إنهم اهتدوا لباب طاعة ميسّر إلهم..
باب بتقربوا من خلاله لربنا بجهد خفيف ومن غير أي تكلّف..

كل بشر فينا عنده طاعات بستثقلها شوي، لكن في نفس الوقت في طاعات بألفها وبتكون خفيفة جدا عليه..

أرجوك ما تنام الليلة قبل ما تكتشف هالباب الميسّر إلك، هالباب اللي بتعمل من خلاله خير من غير أي تكلف أو مشقة..

وأرجوك إلزم هالباب طول حياتك..
وخليك مواصل فيه حتى لحظة وفاتك..!

#ARK

مرة من المرات رحت تصدقت بنيّة إنه ربنا يحفظني وما يفتني..
بتذكر ليلتها وقفت بين إيدين ربنا ودعيته بكل صدق يارب أرجوك ثبتني..
بس الله ما استجاب!

أيام معدودة ووقعت بغلط ما كنت متوقع إني ممكن أوقع فيه..
ممكن غرّتني صدقاتي ودعواتي وظنيت إنها شيء كافي..
بعدها..
خاطبت ربنا بأسلوب مش لائق للأسف...
كان كلامي بحمل في طيّاته عتب!
طيّب يا رب أنا تصدقت ودعيتك وبكيت بين إيديك...ليه ما حفظتني؟
أنا ما طلبت منك شيء دنيوي...أنا بس بدي ما أعصيك...ليه ما استجبتلي؟؟!
انتهى العتاب بـــ آسف يارب!
وطلبت منه يسامحني على أسلوبي وكلامي..
.
.
تبت من غلطي وما رجعت إله أبدا لكنّه ظل حمل ثقيل جوا روحي..
حسيته غلط كسرني وغيّر نظرتي اتجاه نفسي..
صرت أحسد كل شخص ما غلط زيي..
صرت أقارن حالي مع غيري وأقول لا همّه ما غلطوا غلطي..
والله تعبت واكتئبت وفقدت شغفي وحماسي..
كنت متأكد إنه ربنا سامحني..لكن أنا ما سامحت حالي..
وضل هالغلط مثل ندبة...
زال وجعها لكن ظل أثرها محفور جواتي!
.
.
مع الأيام اكتشفت إنه محور حياتي صار هالغلط..
حتى لو ربنا غفرلي.. بس كنت حريص أغفر لنفسي..
اكتشفت إنه هالغلط غيّرلي كثير أشياء في حياتي..
صرت اكثر حذر بعده...صرت أفضل بعده..
قلبي صار ألّيَن...ودموعي اللي كنت بتغلّب أنزلها صارت مع كلمة يا رب تنسال لحالها ع خدي..
صلاتي صارت أحسن...وحتى صدقاتي وتعاملي مع أهلي..
وقدرت الحمدلله أساعد كثير ناس وقعوا بنفس غلطي لإني فاهمهم..
وقدرت أمنع كثير ناس قبل ما يوقعوا وأحذرهم..
.
.
ورحمة ربنا شاءت إنه يتحول العتاب من ليه يارب؟ للحمد لله يارب..
أنا فعلا إنسان جديد بعد هالغلط..!
--------------

أحيانا الخير إلك بغلط يصحيك ويحذرك ويعلمك..
أحيانا الخير إلك بغلط وذنب يكسرك!

﴿ وَآخَرُونَ اعْتَرَفُوا بِذُنُوبِهِمْ خَلَطُوا عَمَلًا صَالِحًا وَآخَرَ سَيِّئًا عَسَى اللَّهُ أَنْ يَتُوبَ عَلَيْهِمْ إِنَّ اللَّهَ غَفُورٌ رَحِيمٌ * خُذْ مِنْ أَمْوَالِهِمْ صَدَقَةً تُطَهِّرُهُمْ وَتُزَكِّيهِمْ بِهَا وَصَلِّ عَلَيْهِمْ إِنَّ صَلَاتَكَ سَكَنٌ لَهُمْ وَاللَّهُ سَمِيعٌ عَلِيمٌ * أَلَمْ يَعْلَمُوا أَنَّ اللَّهَ هُوَ يَقْبَلُ التَّوْبَةَ عَنْ عِبَادِهِ وَيَأْخُذُ الصَّدَقَاتِ وَأَنَّ اللَّهَ هُوَ التَّوَّابُ الرَّحِيمُ ﴾

#القرآن_الجميل
#ARK

كتاب #شبهة و #شهوة متوفر في #معرض_عمان_الدولي_للكتاب 📚
# جناح رقم: B 23 ( مركز الفرسان).

# المكان: معرض عمان الدولي للسيارات "طريق المطار".
من تاريخ 23 سبتمبر وحتى 2 اكتوبر 2021.

يا أهلا وسهلا ")
#ARK
#حسن_باشا 😉

في الوقت اللي بتتفقدوا فيه أموركم لدوام بكرا..
جدولكم ولبسكم ومواصلاتكم ومتى رح تتحركوا وبمين رح تلتقوا...

أمانة ما تنسوا تفتحوا عيونكم..
وما تنسوا تطلبوا من ربنا يعينكم ويثبتكم..
يمموا وجوهكم شطر المستقبل..
حضروا قلوبكم لاحتضان تجارب جديدة أجمل، أنضج وأدوم..
تجنبوا العزلة والوحدة واشغلوا حالكم جدا جدا..
اعطوا صورة حلوة بأي مكان بتكونوا فيه..
خلي اللي يشوفكم يدعي للي رباكم..
امنحوا الآخرين سعادة وصدقوني رح ترجع إلكم..
اجبروا خاطرهم وربنا رح يجبر خاطركم..
استروا عليهم وربنا رح يستركم..
وادعولهم حتى الملائكة بالمثل تدعيلكم..
.
.
وما تنسوا إنه السير إلى الله سير قلوب لا سير أبدان!
فأمانة وإنتوا بتتفقدوا لبسكم ومواصلاتكم وجدولكم..
ما تنسوا تتفقدوا قلبكم..!! <3

#ARK

الدنيا مطر!
وفي سورة في القرآن اسمها (الحديد)..
فيها آية بتحكيلنا عن أراضي ميتة، جافة، صلبة، عانت من ظمأ طويــــــل وكانت فاقدة الأمل من أي فرصة للحياة..
وفجأة نزل عليها المطر فأحياها..

اعْلَمُوا أَنَّ اللَّهَ يُحْيِي الْأَرْضَ بَعْدَ مَوْتِهَا ۚ قَدْ بَيَّنَّا لَكُمُ الْآيَاتِ لَعَلَّكُمْ تَعْقِلُونَ.(17)
.
.
لكــــــن الدهشة إنه آية الحديد ما كانت بتحكيلك عن إحياء الأرض الميتة فقط..
لإنه الآية السابقة إلها مباشرة كانت بتحكي عن قلبـــــــــــــــك!

أَلَمْ يَأْنِ لِلَّذِينَ آمَنُوا أَن تَخْشَعَ قُلُوبُهُمْ لِذِكْرِ اللَّهِ وَمَا نَزَلَ مِنَ الْحَقِّ وَلَا يَكُونُوا كَالَّذِينَ أُوتُوا الْكِتَابَ مِن قَبْلُ فَطَالَ عَلَيْهِمُ الْأَمَدُ فَقَسَتْ قُلُوبُهُمْ ۖ وَكَثِيرٌ مِّنْهُمْ فَاسِقُونَ (16)
.
.
اللي قدر يروي الأرض ويحييها بعد موتها ..
قادر إنه يحيي قلبـــــــــــك..!
❤
#القرآن_الجميل
#ARK

ليه ساكت؟!
طيب ممكن تحكي أي إشي حتى أفهم مالك؟
مش قادر تحس برمضان..صح؟!
ولّا مثلا بتشعر إنك فقدت الأمل من نفسك بعد شهور من الغفلة؟!
عملت ذنب كبير؟!
طيّب مثلا حاس إنه قلبك ميّت؟؟!
بتتخيل إنه ربنا مش ممكن يقبلك؟ ولا يحيي قلبك؟!

يا الله.. ليه ساكت!! طيب احكيلي آه ولا لأ..
بس فهمني مالك؟!
.
.
ممم كيف؟؟ كيف يحيي قلبي؟! جد كيف بعد كل إشي عملته وخبصته؟
.
.
وأخيرا حكيت ")!
هاد مرّة شخص مرّ على قرية خاوية على عروشها تماما..
صفن في هالقرية وسأل سؤال بشبه سؤالك: كيف الله رح يحييها؟
فربنا موّته 100 سنة، وبعدها بعثه وخلاه يشهد على قدرة ربنا كيف ممكن يحيي هالأرض بعد موتها!
وما كان من هالشخص إلا إنه يعترف بقدرة ربنا..
فكانت خلاصة القصة لما اعترف وقال: أعلم أن الله على شيء قدير..!

أَوْ كَالَّذِي مَرَّ عَلَىٰ قَرْيَةٍ وَهِيَ خَاوِيَةٌ عَلَىٰ عُرُوشِهَا قَالَ أَنَّىٰ يُحْيِي هَٰذِهِ اللَّهُ بَعْدَ مَوْتِهَا ۖ فَأَمَاتَهُ اللَّهُ مِائَةَ عَامٍ ثُمَّ بَعَثَهُ ۖ قَالَ كَمْ لَبِثْتَ ۖ قَالَ لَبِثْتُ يَوْمًا أَوْ بَعْضَ يَوْمٍ ۖ قَالَ بَل لَّبِثْتَ مِائَةَ عَامٍ فَانظُرْ إِلَىٰ طَعَامِكَ وَشَرَابِكَ لَمْ يَتَسَنَّهْ ۖ وَانظُرْ إِلَىٰ حِمَارِكَ وَلِنَجْعَلَكَ آيَةً لِّلنَّاسِ ۖ وَانظُرْ إِلَى الْعِظَامِ كَيْفَ نُنشِزُهَا ثُمَّ نَكْسُوهَا لَحْمًا ۚ فَلَمَّا تَبَيَّنَ لَهُ قَالَ أَعْلَمُ أَنَّ اللَّهَ عَلَىٰ كُلِّ شَيْءٍ قَدِيرٌ.
.
.

هالشخص كثير بشبهك لما هو تساءل عن قرية كبيرة، وإنت تساءلت عن قلبك!
وربنّا خلّد قصته حتى بكل مرة لما نتساءل عن (كيف؟) يجاوبنا..
ونقل إلنا ردّه حتى نستأنس فيه بكل مرة بنسأل (كيف؟) بنبرة يأس تملّكت من قلوبنا..

إنت.. مش مضطر تموت 100 سنة حتى تدرك الجواب!
إنت مش مطلوب منك غير لحظة صدق، تعترف فيها لربنا من قلبك إنه قادر على كل شيء!
وقلبك شيء!

ومجرد ما ربنا اطلع على حسن ظنك فيه وإيمانك بقدرته..
وقتها رح تلاقي إجابة سؤالك:

كيف ربنا رح يحيي قلبك!

#القرآن_الجميل
#ARK

من فترة كنت بلعب مع بنت أختي..
كانت اللعبة إنها تتخبى وأنا بكون ماشي فهي فجأة بتنط قدامي وبتصرخ..
فأنا بخـــــــــاف وبنقز وهي بتصير تضحك إنها خوفتني..

وفي أحد أشواط اللعبة بالغت بردة فعلي إني فعلا خفت منها، فهي ضحكت كثير عليّ، وبعدها أجتني وسألتني:

إنت عنجد خفت؟ ولا بس عشان اللعبة..
فقلت إلها لاااا جد كتيييير خفت..

فحكتلي: مرة المس حكتلنا لما نخاف نقرأ آية الكرسي..
يلا اقرأ آية الكرسي عبين ما أنا رايحة اتخبى! ")
.
.
طيّب، عمره خطر ببالكم ليه آية الكرسي تحديدا بنقرأها بأغلب أوقات يومنا؟
الصبح والمسا وقبل النوم ولما نصحى ولما نمرض ونخاف ونحس بوحشة ولما نمشي بطريق عتمة بالليل لحالنا!

آية الكرسي باختصار بتحكيلنا عن إله حيّ قيوم مستغني عن جميع خلقه، ما بنام ولا بنعس، إله بملك السموات والأرض، بعلم بأمور خلقه كلها سواء اللي صارت أو بدها تصير، وكرسيه وسع السموات والأرض..
والسموات والأرض على كبرهم واتساعهم (لَا يَئُودُهُ حِفْظُهُمَا) يعني ما بشق عليه ولا بعجزه إنه يحفظهم، وهو العليّ العظيم!!

فهمت ليه بنقرأ هالآية بكل لحظات يومنا؟!
إذا كان هالإله الحيّ والقيوم ما بعجزه ولا صعب عليه يحفظ السموات والأرض على كبرهم، فمن باب أولى ما بعجزه إنه يحفظك إنت!!
.
.
المهم..
خايفين من الحياة جد؟!!
طيّب اسمعوا نصيحة بنت أختي!

#ARK
#القرآن_الجميل

لو سألتك تكمل هالآية:
كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِن قَبْلِكُمْ لَعَلَّكُمْ (.....)؟!

برافو عليك، الجواب (تَتَّقُونَ)..

بنفس الوقت لو سألتك شو يعني تتقون؟ وقتها ممكن تصفن شوي أو تجاوبني جواب تقليدي مثل كتب الدين في المدرسة، لما كنا نحفظ تعريف التعاون والصدق والأمانة والتقوى ")

تمام.. أنا ما بدي آخد من وقتك كثير..
لكن، ضروري بداية تعرّف إنه الكلمات اللي بتيجي بعد كلمة (لعلّكم) في القرآن غالبا بتمثّل غايات وأهداف القرآن..
فمثلا: لعلكم تشكرون، تعقلون، تذكرون، ترحمون، تتقون..
إلخ من الغايات المدهشة..
.
.
المهم.. غاية التقوى، من الغايات المركزية والمهمة في القرآن..وحتى أسهّل عليك الجواب لفهم أحد أبرز معاني التقوى، شوف هالآية:

وَتَعَاوَنُواْ عَلَى الْبرِّ وَالتَّقْوَى وَلاَ تَعَاوَنُواْ عَلَى الإِثْمِ وَالْعُدْوَانِ.
يعني (البر) بقابله (الإثم)
و(التقوى) بقابلها (العدوان).

ببساطة..التقوى إنك ما تكون إنسان معتدي!
معتدي على نفسك وتهلكها بالآثام..
معتدي على أموال غيرك..
معتدي بلسانك وكلامك عن أعراض الناس وأخطائها!
معتدي بواسطتك على فرصة غيرك!
معتدي على حقوق خواتك وبناتك..!

التقوى إنك ما تظلم نفسك وتظلم غيرك!
.
.
وعدتك ما آخذ من وقتك، لكني بدعوك تبحث عن معادلات التقوى في رحلتك مع القرآن..
ولو بتحب افتح على سورة الأنعام عالآية 151 واقرأ لعند الآية 153..ايوا بالضبط لعند (لعلكم تتقون)..

ما بعرف لو رح تلاحظ إنه الآيات بتحكيلنا إنه ما نعتدي عالنفس البشرية بالقتل ولا على أنفسنا بارتكاب الفواحش ولا على مال الأيتام، ولا نعتدي بالكيل والميزان، ولا نعتدي بمخالفة عهودنا، ولا بأقوالنا وشهاداتنا...

كل هذا (لعلّــــكم تتقون)!
.
.
-----
وإنت صايم بتقدر عفكرة تشرب وتاكل بدون ما حد يشوفك، لكن ما رح تعمل هيك لأنك ببساطة مدرك إنه في رب عظيم شايفك..

ممتاز، هذا الهدف تحديدا اللي بطمح إله شهر رمضان..
إنك تستشعر مراقبة ربنا إلك مش فقط بالأكل والشرب، وكمان لما تقرر تعتدي على نفسك وتظلم غيرك!!

فهمت الآن ليه انكتب عليك الصيام؟!

#القرآن_الجميل
#ARK

أختي بتعشق ورق العنب، أو الدوالي، اليلنجي، اليبرق، أو الدولمة بالتركي ")
وبتطلب من إمي بالأسبوع 10 مرات تطبخها..
وحتى لما اختي تزوجت، صرت أشتغل طلبات عندها لأوصّل دوالي.. ")
.
.
عمره خطر ببالكم ليش الدوالي بتكون معروشة؟
ليه مثلا ما يتركوها عالأرض تمد لحالها؟؟
حتى في القرآن:
وَهُوَ الَّذِي أَنشَأَ جَنَّاتٍ مَّعْرُوشَاتٍ وَغَيْرَ مَعْرُوشَاتٍ وَالنَّخْلَ وَالزَّرْعَ مُخْتَلِفًا أُكُلُهُ..

ببساطة لإنه ورق العنب لو كان عالأرض رح يتمدد بلا اتجاه، ورح يستهلك أوراقه الحلزون واليرقات، وبالتالي فش دوالي.
.
.
طيّب، بتعرفوا إنه الإنسان بطبيعته كائن بتسلّق وبتمدد مثله مثل الدوالي؟!
ولو انترك حر بدون تقليم وتحديد رح يمتد ويخرّب ويصير مؤذي..ولو انترك عالأرض رح يتآكل تماما ويفنى!

وهون بيجي دور الوحي..
بقيدك وبحددك بإطار التشريعات حتى يحفظك ويحفظ غيرك..
وبرفعـــــك عن الأرض حتى ما تتآكل روحك!!
.
.
القرآن بوضّح هالفكرة تمامًا وبضرب إلنا مثال بشخص ربنا رفعه بالوحي..
لكنه للأسف أبى إلا إنّه يلازم الأرض..
وَاتْلُ عَلَيْهِمْ نَبَأَ الَّذِي آتَيْنَاهُ آيَاتِنَا فَانسَلَخَ مِنْهَا فَأَتْبَعَهُ الشَّيْطَانُ فَكَانَ مِنَ الْغَاوِينَ (175) وَلَوْ شِئْنَا (لَرَفَعْنَاهُ) بِهَا وَلَٰكِنَّهُ (أَخْلَدَ) إِلَى الْأَرْضِ وَاتَّبَعَ هَوَاهُ..
.
.
حتى القرآن لما يحكيلنا عن الهدى والضلال:
قُلْ مَن يَرْزُقُكُم مِّنَ السَّمَاوَاتِ وَالْأَرْضِ ۖ قُلِ اللَّهُ ۖ
وَإِنَّا أَوْ إِيَّاكُمْ (لَعَلَىٰ هُدًى) أَوْ (فِي ضَلَالٍ) مُّبِينٍ.

في الكلام عن الهــــدى استخدم "علـى" الدالة على الاستعلاء والإرتفاع..
وفي الكلام عن الضلال استخدم "فـــي" الدالة على الإنخفاض والإنغمار..
.
.
المهم..
القرار في النهاية قرارك..
ربنا يسّر إلك الوحي..
يا بترتفع فيه وبتحفظ روحك..
يا بتنسلخ عنه وبتخلُد للأرض وبتتآكل روحك!!

#ARK
#القرآن_الجميل

تواصل معي صديقي وخبرني إنه ضروري أترك كل إشي بإيدي وأجيه هسا هسا!!!

هو كان من فترة مخبرني عن بنت معجب فيها وبراقب فيها وناوي يتقدم إلها..وأول ما لمحته حسيت إنه كثير متوتر ومعجوق، بصراحة من ملامح وجهه تخيلت يقلي إنه البنت خطبت ")!!

فجأة قلي..
اسمع هي إمي حجزت موعد مع أهل البنت، والله متوتر وملخوم ومش عارف شو أعمل؟؟ طيب شو المفروض أحكي؟ عندك فكرة شو ألبس؟ طيّب الواحد بأول زيارة باخد معه إشي؟ عندك فكرة كيف أمشّط؟ طيب يا ترى أبوها شو ممكن يسألني؟؟

اسمع..تخيل حالك أبوها.. شو رح تسألني؟؟ ")

بصراحة وتّرني معه!! وممكن لأول مرة في حياتي بشعر إني مش قادر أساعد حد، وخيالي ما استوعب فكرة إني أتخيل حالي أب وحد يتقدم لبنتي وأفكر شو ممكن أسأله؟؟
لأنه المنطق بحكي قبل ما أفكر بعريس بنتي أفكر أول بإمها! ")
.
.
ومرة صديق ثاني جنّنا عشان عنده موعد في السفارة الأمريكية، وبدو إيانا نساعده شو يحكي ويتصرف ويعمل بالمقابلة..

وأنا مرة كان عندي مقابلة بمكان كثير كنت حاب أشتغل فيه، وقتها قعدت ساعة بزبط بحالي، ولبست من باب الأمانة بدلة مرتبة، حتى إمي وقتها حكتلي: بتجنن!!
-----------------

اللقاءات والمقابلات السابقة سواء كانت للزواج أو السفر أو الشغل، كانت بتحتوي على مشاعر عديدة..
أمل، خوف، رهبة، توتر، قلق، رجاء..وممكن حب!!

لإنه عموما مثل هاللقاءات بترتب عليها مستقبل الإنسان ومصيره..وبتلاقيه بجمع أكبر قدر من المعلومات عشان تعينه..وبكون عايش على أمل الموافقه عليه، أو خوف ورعب من رفضه..
وصحيح بكون متهيب منها..
لكن رغم مشاعره المتناقضة ببذل أقصى جهده يستعد نفسيّا وماديا إلها..
.
.
.
---------
وأنا بقرأ القرآن، لاحظت إنه القرآن كثير بذكّرنا بلقاء ومقابلة من نوع آخر..
والناس بتتفاوت في اسجابتها ونظرتها لهذا اللقاء..

ناس بترجوا هذا اللقاء:
الَّذِينَ يَظُنُّونَ أَنَّهُم مُّلَاقُو رَبِّهِمْ وَأَنَّهُمْ إِلَيْهِ رَاجِعُونَ

وناس غفلت عنه:
إِنَّ الَّذِينَ لاَ يَرْجُونَ لِقَاءَنَا وَرَضُواْ بِالْحَيَاةِ الدُّنْيَا وَاطْمَأَنُّواْ بِهَا وَالَّذِينَ هُمْ عَنْ آيَاتِنَا غَافِلُونَ
.
.
.
صح بيوم رح تقابل البنت اللي نفسك تخطبها..
أو مدير الشركة اللي حاب تشتغل فيها..
أو موظف السفارة للبلد اللي حاب تهاجر إلها..

لكن بيوم رح يكون اللقاء مع (الله)!
فما تنسى...!

#ARK
#القرآن_الجميل

كنت بقلّب ستوريات الوتساب، فلقيت ستوريات أختي كلها عن:
الحمدلله..وإنّه الشوكة يشاكها المؤمن فربنا بغفر خطاياه...وما يصيب المؤمن من هم ولا غم ولا حزن ولا أذى إلا وربنا غفرله...وإنه الحمدلله مصيبة الإنسان مش في دينه...الخ..

صراحة خفت، وقلت أبصر شو صاير مع أختي..
وأنا بعرف أختي مش من النوع اللي بحب يستعرض آلامه وأحزانه ومشاعره، بحسها بتعيش كل شيء مع نفسها، بالرغم من وجود أشياء في حياتها بتستحق إنها تخبر الناس عنها وتتباهى فيها..

المهم..رنيت عليها، خير مالك؟

فقالت: ولا إشي، والستوريات حتى أذكر نفسي بعوض ربنا..
لإنه سيارتي انشخطت، وهسا صار بدها دهان من الجنب!!!!

صراحة ما مسكت حالي وفرطت ضحك، وقلت إلها والله لما شفت ستورياتك والأحاديث قلت هاي صاير معها مصيبة.. طلعت سيارتك مخدوشة؟؟

وقتها حكتلي: طيّب مش أنا هسا انقهرت وزعلت شوي؟
مش نكدت لإنه صار بدي أدهن السيارة وأنا ما عندي وقت وفوق راسي ألف قصة؟
مش هالموقف البسيط أثر على نفسيتي ولو حتى نتفة؟؟

طيّب..معناته إلي أجر يا شاطر..!!
.
.
صراحة كنت كثير مبتسم وأنا بسمع كلامها العفوي، وصفنت لحظتها إنه والله كلامها صح، وفعليا الأحاديث بتحكيلك إنه حتى لو كانت مصيبتك في شوكة وجعها ثواني فإنت مأجور على هذا الشيء..

لكن اللي صدمني أكثر صراحة وأنا ببحث عن الأحاديث اللي بتحكي عن نفس الفكرة، هو حديث ورد عن سيدتنا عائشة:

في يوم سيدتنا عائشة سألت رسول الله عن هالآية:
‏{‏مَنْ يَعْمَلْ سُوءًا يُجْزَ بِهِ‏}‏
فجاوبها صلى الله عليه وسلم:
(‏يا عائشة هذه مبايعة اللّه للعبد مما يصيبه من الحمى والنكبة والشوكة حتى البضاعة فيضعها في كمه فيفزع لها فيجدها في جيبه حتى إن المؤمن ليخرج من ذنوبه كما أن الذهب يخرج من الكير‏)‏.

للتوضيح:
عمرها صارت معك تكون مخبي شيء في جيبتك، وتمد إيدك عشان تطوله وما تلاقيه؟ وقتها بتحس بخوف وهلع إنك تكون ضيعت هالشيء؟؟
بعدها بثواني تمد إيدك على جيبتك التانية أو تفتح شنتتك وتلاقيه..

تمام.. شفت ثواني الهلع والخوف اللي عشتهم عشان فكرت حالك مضيع شيء؟؟

هذا أجر...وكفارة لذنوبك!!!!

-------------

إذا ربنا بغفرلك عشان لحظة نكد عابرة، أو غزة شوكة، أو شخطة السيارة، أو لحظة خوفك من إنك تكون مضيع محفظتك..

فما بالك مرضك وألمك ودموعك وخوفك وفراق أحبابك ولحظات انهيارك..
ما بالك وجعك لما حد يخذلك ويخدش قلبك!!

#القرآن_الجميل
#ARK

تخيّل أجت تستشيرك امرأة متزوجة..
وحكتلك أنا بدي أنفصل عن زوجي!

ولما سألتها عن السبب، كان جوابها:
هو شخص خلوق ومتدين..لكن مرة لمحته بين مجموعة رجال، فكان أقصر وأبشع واحد فيهم... وصراحة حاسة إني ما بحبه ولا بطيقه، وأنا خايفه كرهي إله يكون سبب إني اوقع بالحرام !!!!
.
.
ما تقنعني إنك ما رح تنظر نظرة سلبية اتجاه هالمرأة..
وممكن تحكي عنها مجنونة إنها قررت تنفصل لسبب سخيف مثل هيك..
لأ..وبتحكيلك لو بضل معه بخاف أوقع بالحرام!!
.
.
تمام..
هالموقف مش من نسج الخيال..
هالموقف لزوجة الصحابي الجليل (ثابت بن قيس بن شماس)!
وهي بتوصف قيس: "كنت أرفع الخباء فأراه مقبلًا في القوم أقصرهم قامة، وأقبحهم منظرًا"!!!

وأجت لرسول الله صلى الله عليه وسلم بتطلب الطلاق، وقالت:
يا رسول الله، ثابت بن قيس ما أعتب عليه في خلق ولا دين، ولكني أكره الكفر في الإسلام، فقال رسول الله صلى الله عليه وسلم: أتردين عليه حديقته، قالت: نعم، قال رسول الله صلى الله عليه وسلم: اقبل الحديقة وطلقها تطليقة.
.
.
جواب رسول الله كان جدا منطقي..
حتى لو كان طلبها مش مقنع ولا بعبّر عن سبب حقيقي..
هي خلص اتخذت قراراها..
وهي أدرى بحالها..
وممكن فعلا بقائها معه يكون سبب في ارتكابها لحرام يخزيها ويخزي زوجها..
أكيد ممكن نختلف معها، لكن في النهاية هي حرة وهذا قرارها...!

ممكن تحكيلي بس قرارها مش مقنع؟ وهي هيك دمّرت بيتها؟ طيب شو ذنب قيس؟

تمام..ورسول الله مدرك لهذا الكلام...وحق قيس كان إنه تتنازل عن حقوقها المادية...وبضل هذا قرارها ..
.
.
.
ذكرت هالقصة حتى أخبركم عن خطأ شائع جدا بصير معنا لما نقرر نستشير ناس، سواء كانوا أصدقاء أو مستشارين نفسيين أو تربويين.. أو لما ناس تقرر تستشيرنا..

او لما تكتب مشكلتك على جروب والناس تصير ترد عليك وتحكيلك شو تقرر !!

المستشار مش من وظيفته أبدا يقرر عنك، وأكبر خطأ لما تسأل المستشار أتزوج فلانة أو لا؟ أقبل بفلان ولا لا؟ أسافر ولا أضل بالبلد؟؟ أدرس كذا ولا كذا؟

لإنه المستشار مهما حكيتله تفاصيل رح يضل في تفاصيل غامضة عنه، غير إنه مش قاعد جواتك ولا بعرف رغباتك ومخاوفك وميولاتك وطبيعة شخصيتك وظروفك..
وأكيد ما بعرف الأشياء اللي إنت قررت تخفيها بقصتك!!!

لهيك أكبر خطأ لما المستشار يقرر عن شخص أجى يستشيره..
المستشار وظيفته يفكر مع الشخص بصوت عالي، يضوّي الأماكن المعتمة بتفكيره، يكتب معه إيجابيات وسلبيات كل قرار، يلفت انتباهه لأمور غايبة عنه...وآخر شيء يقله إنت قرر لحالك وتحمّل نتيجة اختيارك!

وفيما لو أجى للمستشار شخص مقرر ومنهي أموره، وهالقرار ما بشكل خطر حقيقي على حياته....فالأصل يتركه براحته..
.
.
.
وأكيد سمعتوا كثير قصص، وياما نساء ورجال انفصلوا مثلا بسبب إنهم سمحوا للناس تقرر عنهم...ولاحقا أدركوا إنه هالقرار دمّر حياتهم..!

لهيك لو أجاك شخص يستشيرك..
اسمعه واسمعه واسمعه..
اسأله عن كل نقطة..
فكر معه بصوت عالي..
وجّه طريقة تفكيره..
حاول تكون صوت عقله لو كان بحكي بعاطفه..
وتكون عاطفته لما يغيب حكم عقله..
اكتب معه سلبيات وإيجابيات قراراته..
احكيله عن الأمور اللي غابت عن باله..

وآخر إشي..
اتركه يقرر لحاله ^^

#ARK

وَمَن يَقْتُلْ مُؤْمِنًا مُّتَعَمِّدًا فَجَزَاؤُهُ جَهَنَّمُ خَالِدًا فِيهَا وَغَضِبَ اللَّهُ عَلَيْهِ وَلَعَنَهُ وَأَعَدَّ لَهُ عَذَابًا عَظِيمًا (93)

#سورة_النساء

ملاحظات حول #جريمة_التطبيقية:

- الله يرحم إيمان وينتقم من قاتلها.

- أي شخص بشكل مباشر أو غير مباشر برر للمجرم جريمته، أو اتهم البنت وحمّلها جزء من المسؤولية، أو قال أي عبارة بتعرّض بالبنت وبتعطي سبب للمجرم....فيا ويله..يا ويله.. يا ويله من رب العالمين!!!

إِذْ تَلَقَّوْنَهُ بِأَلْسِنَتِكُمْ وَتَقُولُونَ بِأَفْوَاهِكُم مَّا لَيْسَ لَكُم بِهِ عِلْمٌ وَتَحْسَبُونَهُ هَيِّنًا وَهُوَ عِندَ اللَّهِ عَظِيـــــــــــــــــمٌ !!!!!

وَقَدْ خَابَ مَنْ حَمَلَ ظُلْمًا!!!!

- أي بنت أو شب بتعرض لأي نوع من التهديد أو الإزعاج أو الإبتزاز ضروري ما يسكت، وفي مليون خيار ممكن الشخص يلجأ إله ويطلب مساعدة، في شرطة، في أهل، في أشخاص أصحاب خبرة في مثل هالقضايا، في ناس أصحاب نفوذ، في دكتور جامعة ممكن يحتوي الموضوع، في أستاذ مدرسة قادر يحكيلك شو تعمل..

شوف الخيار الأنسب إلك، وما تسكت!!!

- أي جهة بتحوّل مثل هيك قضايا لمعارك جانبية، وبتحول الموضوع لصراع ذكر وأنثى، وبتسيء للمجتمع كله من خلال تعميماتها العاطفية، وبتصرفنا عن القضية الرئيسية فهي جهة شريكة بالسوء اللي بننحدر إله...

- أي خطاب ديني بتناسى مثل هيك قضايا وبحكي عنها بشكل عابر وسطحي وعلى استحياء، في الوقت اللي ممكن ياكلوا راسنا أكل عن حق زواج القاصرات!!! فهذا خطاب خائن لله ورسوله!!

- القائمين على القوانين المخزية والمتأثرة بالمنظمات الحقوقية الغربية اللي بترفض القصاص ... دم إيمان وكل ضحية برقبتكم!!

وَلَكُمْ فِي الْقِصَاصِ حَيَاةٌ يَا أُولِي الْأَلْبَابِ لَعَلَّكُمْ تَتَّقُونَ.

- إياكم ننسى دم إيمان مثل ما نسينا دماء اللي سبقوها، وإياكم ننجر لمعارك جانبية تنسينا القضية الأصلية والمتعلقة بحساب المجرمين وتطبيق القصاص وبذل الجهود حتى نحافظ على أرواح الناس بمجتمعنا..

- ما تنسوا إيمان من دعواتكم، وما تنسوا تدعوا لأهلها إنه ربنا يصبرهم..

ولا حول ولا قوة إلا بالله..

#ARK

حين تذهب الجريمة بلا عقاب، فإن العالم يختل، وحين يمضي الظلم بلا ثأر فإن السماء ترمقنا بعين الخزي!

#إعدام_قاتل_التطبيقية