لأ لأ استنوا!
ليه بديتوا من سورة البقرة؟ طيب والفاتحة؟!

كنت بسأل أطفال في المسجد فتحوا المصحف بين التراويح وبدأوا بسورة البقرة.
حكولي طيّب إحنا حافظينها وكل يوم بنقرأها..

بعرف إنكم حافظينها بس لازم تبدأوا فيها لإنه هي المفتاح، هي كلمة السر..
مش إنتوا لما بدكم تفتحوا التابلت بتحطوا كلمة سرّ؟
نفس الشيء القرآن، بدكم حتى تقدروا تدخلوا عليه تحطوا 7 أرقام كلمة السر!
سألوني ليه 7؟؟ لإنها عدد آيات سورة الفاتحة..^^
-------
بس هاي كلمة السر غريبة، إنت مش مطلوب منك بس تحفظها، مطلوب منك تفهمها..!

صاروا يضحكوا.. وحكولي كيف نفهم كلمة السر.. كلمة السر بنحفظها مش بنفهمها!! آه آه صح كلامكم بس هاد بالتابلت، هون بدكم تفهموا وتحفظوا حتى يفتح معكم المصحف!!

طلبوا مني أفهمهم كلمة السرّ..

1- بِسْمِ اللَّهِ الرَّحْمَنِ الرَّحِيمِ = يعني إنك تستعين بالله، بتطلب منّه يعينك بكل شيء بحياتك، سواء دراستك، أو بلعبة كرة، أو بشغلة طلبها منك أبوك، أو حتى بلقمة قطايف بقشطة..! كل إشي بحياتك...بسم الله!
----------
2- الْحَمْدُ لِلَّهِ رَبِّ الْعَالَمِينَ = يعني إنك تكون إيجابي! سألوني شو يعني إيجابي؟
قلتلهم إنك بدك تشكر ربنا عكل إشي، حتى لو إشي سيء صار معك، حتى لو رسبت بامتحان، أو خسرت بلعبة كرة، أو أهلك زعلوك، أو صاحبك خاصمك، وأكيد كمان مع كل إشي خير... بدك تشكر ربنا عليه، وهيك إنت بتكون شخص إيجابي، إنك دايما راضي وبتشكر ربنا عكل إشي..!

سألوني طيب رب العالمين؟ ممم يعني رب كل إشي.. رب الفقراء والأغنياء والمرضى والأصحاء والمتعلمين والجهلاء، رب الكبار والأطفال والنساء والرجال، رب كل إشي كل إشي..

انصدمت لما طفل منهم قلي: يعني رب كل إشي، بدنا نشكره عكل إشي!
---------
3- الرَّحْمَنِ الرَّحِيمِ = تتذكروا آخر مرة لما مرضتوا؟ لما إمكم ضلت جنبكم طول الليل؟ لما كنتوا تصحوا تلاقوها غفيت جنبكم من التعب؟ لما كانت تبكي عليكم؟ الله أرحم فيكم من إمكم!!

بس لا تنسوا إنه رحمة ربنا مش شرط تقدروا تشوفوها بعيونكم! لإنه الحياة فيها صعوبات وفيها أمراض وأوجاع، فيها زلازل وحروب.. لكن الرحمة ممكن تكون مخبية، ممكن تكون غامضة غير مفهومة، بس ضروري تعرفوا إنها موجودة!
مرات بتكون متنكرة بأشكال كثيرة.. لهيك لا تتسرعوا وتقولوا انها مش موجودة ...لا موجودة دايما موجودة!

-------
4- مَالِكِ يَوْمِ الدِّينِ = يعني ربنا مالك يوم الحساب، يوم العدل!
مش قلت إلكم الدنيا فيها أمراض وأوجاع وحروب وزلازل؟؟ ربنا بطمنّا إنه هو مالك يوم الحساب واللي رح يعوض كل حد عن كل إشي صعب مرّ فيه..
عن كل ألم ومرض وفقد وخوف، حتى عن كل غزّة شوكة!!

هون الرحمة رح تكون واضحة جدا ..ما رح تكون متنكرة ومتخبية زي الدنيا !
----------

طيب قبل ما أكمل؟ لما أحكيلكم عن رب رحيم، أرحم فيكم من إمكم وعادل عن كل إشي رح يعوضكم... وكثير أنعم عليكم....شو الأصل تتصرفوا؟؟

جاوبوني نعبده!

ممتاز!!

شوفوا كلمة السر رقم 5.

5- إِيَّاكَ نَعْبُدُ وَإِيَّاكَ نَسْتَعِينُ!

إياك نعبد لخّصت أرقام السر (1-2-3-4).
وإياك نستعين مقدمة أرقام السر (6-7) !!

-------
6- اهدِنَا الصِّرَاطَ الْمُسْتَقِيمَ 7- صِرَاطَ الَّذِينَ أَنْعَمْتَ عَلَيْهِمْ غَيْرِ الْمَغْضُوبِ عَلَيْهِمْ وَلاَ الضَّالِّينَ.

مش خبرتكم إنه بدنا نسعين بربنا بكل إشي؟
لهيك هون إحنا بندعي ربنا إنه يعينّا ويهدينا للصراط المستقيم...
طريق الحق، والخير، والحب، والعطاء، الطريق اللي بنكون فيه مناح مع الناس، مع أهلنا، وأصدقائنا، لما نساعد طفل، أو عمو كبير بالشارع، لما نعمل خير، لما نصلي ونكون مناح مع الله!

مش نكون سيئين زي بعض الناس اللي نسيوا الله، اللي ما كانوا مناح مع الناس، اللي ما كانوا مناح مع الله...!!

بس لا تنسوا هاد طريق صعب، بس حلو!!
لهيك لازم بكل مرة نحكي كلمة السر ندعي ربنا يعينا ويساعدنا ويهدينا وإنه لما نبعد عن الطريق المستقيم يردنا إله وما يتركنا..

بصوت عالي وعفوي قالوا:

آآآآآآآمين!!!

#القرآن_الجميل
#ARK

صاحبي بحكيلي يلا نلحق التروايح، مش حلوة النسوان يكونوا قبلنا بالمسجد "") !!

لما شفته قلتله ليه مستغرب إنه النساء يكونوا قبل الرجال في المسجد؟
بتعرف كثير دراسات أشارت إلى إنه النساء أكثر تدينا من الرجال!!!

والدراسات ما بتحكي فقط عن البلاد الإسلامية، بل حتى بكل الديانات المرأة أكثر تدينا، وأكثر إلتزاما بالطقوس الدينية، وأكثر إحساسا بأهمية العبادة، والأكثر مشاركة في البرامج الدينية، والأكثر عطفا اتجاه الفقراء والمحتاجين!!

صاحبي استغرب، خصوصا إنه وريته دراسة لمركز بيو للدراسات الإحصائية، وكثير في دراسات ثانية بتأكد نفس النقطة..
وإن كانت في دراسات بتشير إلى إنه معيار التدين متقارب جدا بين الجنسين والفروق بينهم طفيفة جدا...
على عكس الشائع في أذهانا إنه الرجال احسن بكثير ومتفوقين دينيا !!
----------
----------
آسف إني أحكي إنه الخطاب الديني والوعظي حاليا في مجمله متحيّز لصالح الرجال، ومركّز خطابه اتجاه النساء وسلوكياتهم الخاطئة!

وبتشعر إنه الخطاب الوعظي حاليا بشتغل بمبدأ رد الفعل اتجاه الخطاب النسوي المتطرف، وبرأيي هذا خطأ..
لإنه الخطاب اللي بحكي باسم ربنا ورسوله الأصل يكون خطاب متزن، خطاب بقرب الناس لربنا، خطاب منصف وغير متحيز، وإنه يبتعد عن السخرية والاستهزاء حتى لو كان الطرف الآخر بمارسها..

أحيانا بنصدم من شخصيات دينية بتكون منزلة بوستات بشكل مبتذل وساخر عن سلوكيات البنات، في غياب واضح عن ذكر سلوكيات الشباب واللي في كثير من الأحيان بتكون أكثر جرأة وفظاعة وقبح!!

أنا مع الأمر بالمعروف والنهي عن المنكر، لكن مع إنه الخطاب يكون حريص يكسب الطرف الآخر للهداية، مش يكون هدفه يفحمه وينتصر عليه ويظهر ضلاله وضياعه وانحلاله وفقط!
ومع إنه الخطاب يكون متزّن ومنصف ويناقش الخطأ والصواب بذاتهم بعيدا عن جنس مرتكبهم..

فمثلا، بدك تحكي عن عمل المرأة؟ ممتاز موضوع مهم، لكن إحكي بطريقك عن سلوكيات الرجال في بيئة العمل!!!

بدك تحكي عن لبس البنات في الشوارع؟ حلو كثير، لكن كمان إحكي عن الشباب المتحرشين في الشوارع!!

بدك تحكي عن شلة بنات فقدوا حيائهم وبرقصوا آخر الليل؟ لا تنسى كمان تحكي عن الشباب السكرانين آخر الليل!!

بدك تنتقد بنات لجأوا لجهات برأيك مندسة وتابعة للغرب، ممكن بتفق معك إنه فعلا كثير من هالجهات عليها علامات استفهام، لكن هل وفرنا بديل؟ هل أسسنا جميعات ومنظمات تدافع عن حقوق النساء المضطهدات والمعنفات؟
.
.
مؤسف إنه الخطاب اللي بزعم دفاعة عن الأسرة الإسلامية، بهدم قيم الإسلام ذاته، بخطابه المنفر والمتعالي والساخر والبعيد عن الواقع..

مؤسف إنه الخطاب اللي بحكي باسم ربنا ورسوله ينجر من خانة الفعل لخانة رد الفعل فقط..

مؤسف إنه بناتنا وخواتنا بلجأوا لجهات فعلا ممكن تستغل مظلمتهم وحاجتهم واحنا قاعدين من ورا شاشات بنّظر!!

-------
بتمنى ما ينفهم كلامي إني بعمم، أكيد في خطابات مشرقة ومنصفة وتدور مع الحق..
وبتمنى ما ينفهم كلامي إني متحيّز لصالح طرف على آخر، أنا مع الحق والصواب وضد الظلم العدوان سواء كان مرتكبه ذكر أو أنثى..
.
.

ورجائي من كل بنت صادفت خطاب ديني مُنفر.. وقادها هالشيء لمشكلة مع الدين نفسه ..إنها تراجع نفسها وتسأل أهل العلم المتخصصين بعيدا عن بعض الوعاظ الجاهلين..

وأرجوك لا تسمحي لأي خطاب قهرك ونسي حقك إنه يقودك لتنسي الله !!
.
.

ونيابة عن الجميع..

أنا آسف !

#ARK

مرة بنت أختي جابتلي مفتاح السيارة وحكتلي:
يلا وديني عالمول!
طبعًا هي أحلى إشي عندها في الحياة لما تروح عالمول عقسم الألعاب..
لو تشوفوا دموع الفرح بعيونها وهي صافنة بكمّ الألعاب المهول قدامها!
وكنا لما نشتري إلها لعبة تقعد معها يومين بعدين نلاقيها (محطمة) ومكسّرة أو ضايعة تحت التخت والكنباي..
كبرت بنت أختي شوي وبطلّت الألعاب كثير تستهويها، وصارت تميل أكثر لألعاب التلفون، وكل ما تيجي عنا بتحكيلي بكل براءة: خالو عادي تعطيني تلفونك ألعب شوي..
لكن شو ما كانت اللعبة حلوة آخريتها تختمها أو تزهق منها..
رح تكبر بنت أختي إن شاء الله وحتصير صبية..
وممكن وقتها رح تهتم بحالها ومظهرها وشكلها ولبسها أكثر..
وما رح تسمح لأختي تلبّسها ألف لون بنفس اللبسة ^^
رح تدخل بمرحلة (الزينة) المباحة إن شاء الله وهذا شيء فطري فينا كبشر..
ولما تتخرج من الجامعة إن شاء الله..
رح تفكر بحياتها بشكل جدي اكثر، ورح تفكر كيف تبني حياتها وتكوّن نفسها وتبني أسرتها..
---------
ما سبق بتحكي عنه هالآية:
اعْلَمُوا أَنَّمَا الْحَيَاةُ الدُّنْيَا
1- لَعِبٌ
2- وَلَهْوٌ
3- وَزِينَةٌ
4- وَتَفَاخُرٌ بَيْنَكُمْ وَتَكَاثُرٌ فِي الْأَمْوَالِ وَالْأَوْلَادِ ۖ
الآية ما انتهت..
وتكملة الآية بتحكيلنا:
كَمَثَلِ غَيْثٍ أَعْجَبَ الْكُفَّارَ نَبَاتُهُ ثُمَّ يَهِيجُ فَتَرَاهُ مُصْفَرًّا ثُمَّ يَكُونُ حُطَامًا ۖ
يعني..
مثل مزارع زرع البذور وطار من الفرحة لما نزل عليها مطر من السما..
لو تشوفوا دموع فرحته وهو بشوف النبات أخضر بنمو وبكبر شوي شوي عالأرض..
كان هالمزراع معجب بالزرع ومدهوش فيه والدنيا كلها مش واسعه فرحته..
لكن هالنبات كبر وكبر حتى اختفت دهشة المزراع فيه..
صار لونه أصفر وبعدها يِبِس وجَف وصار
(حُطام) !
-------
ختام الآية:
وَفِي الْآخِرَةِ عَذَابٌ شَدِيدٌ وَمَغْفِرَةٌ مِّنَ اللَّهِ وَرِضْوَانٌ ۚ وَمَا الْحَيَاةُ الدُّنْيَا إِلَّا مَتَاعُ الْغُرُورِ
.
.
ديروا بالكم تشغلكم الحياة بألعابها ولهوها وزينتها عن الآخرة..
ديروا بالكم تتحول حياتكم لمظاهر وتفاخر بينكم..
وما تنسوا إنه الحياة متاعها زائل ومؤقت ولحظي وما بدوم لحد..
ومهما بلغتوا فيها من المتع والسعادة والمرح واللهو واللعب آخريتها تصير حُطام تحت رجليكم..
بالضبط مثل نبات المزارع..
ومثل ألعاب (لانا) بنت أختي!

#القرآن_الجميل
#ARK

فَبِمَا رَحْمَةٍ مِّنَ اللَّهِ لِنتَ لَهُمْ ۖ وَلَوْ كُنتَ فَظًّا غَلِيظَ الْقَلْبِ

لَا نــــ
فَــــ ضّـــــ
و ا

مِنْ حَوْلِكَ ۖ فَاعْفُ عَنْهُمْ وَاسْتَغْفِرْ لَهُمْ وَشَاوِرْهُمْ فِي الْأَمْرِ ۖ فَإِذَا عَزَمْتَ فَتَوَكَّلْ عَلَى اللَّهِ ۚ إِنَّ اللَّهَ يُحِبُّ الْمُتَوَكِّلِينَ (159)

#القرآن_الجميل
#ARK

إذا صادفت واحد دارس علم نفس، أول إشي بخطرلك تحكيله: حلّلي شخصيتي!!
أو ممكن تحكيله عن مشاكلك النفسية، وغالبا رح تحكيله: بتعرف إني مهتم وبحب علم النفس!

للأسف صعب حد يحللّ شخصيتك بلقاء عابر، شخصيتك شيء معقد ومركب من عوامل عديدة، البيئة، وخبرات الطفولة، وتجاربك الشخصية، ونمط تربية أهلك، وفلسفتك ومعتقداتك، وطرق تفكيرك، وكل إشي عشته ومريت فيه..

حتى لو أوهمك البعض إنه في اختبارات بتحلل شخصيتك، أكيد فيها جانب صواب، لكن صعب جدا تدخل بغمار شخصيتك..

-------
في القرآن في سورة نفسيّة بامتياز، بتحلل جانب مهم من شخصيتك، أو بالأحرى بتصارحك فيه، جانب إنت ما بتحب تحكي عنه، أو بتدّعي إنك مش هيك، لكنّك هيك!!
بس السورة ما رح تتركك، ورح تقدملك العلاج!!

في سورة المعارج:
۞ إِنَّ الْإِنسَانَ خُلِقَ هَلُوعًا (19) إِذَا مَسَّهُ الشَّرُّ جَزُوعًا (20) وَإِذَا مَسَّهُ الْخَيْرُ مَنُوعًا (21)

إنت هلوع، ما بتصبر! لما يمسّك شر بتجزع لوقوعه، وبتفكر إنه هالشر رح يكون دائم وسرمدي في حياتك، وبتحبس نفسك بأفكار سلبية وسوداوية، وبتظن إنه ما في فرج بعد هالشدة، بتحزن وبتكتئب، وبلتهمك الجزع، وبمزقك الهلع!!

ولما يصيبك خير بتبخل وبتمنع!! بتفكر إنه الخير صابك من كدّك وكسبك وتعبك، فمش سهل عليك تضحي فيه بسهولة، لهيك بتمنع الخير يوصل لغيرك.. وممكن تسخر من خطواتهم المبتدئة وتحبطهم بوصفك لصعوبة الطريق واستحالته، بدل ما تمد إيدك لتساعدهم..ورح تعيش كمان بأفكار سودواية إنك تخسر هالخير..!

وللأسف بتعيش حياتك ما بين خوف من شيء خايف إنك ما تحصّله، وما بين شيء بين إيديك لكنك خايف تفقده..

بتعيش بالخوف!!

---------
استنى!
في استثناء.. أو علاج..
أحد أشهر العلاجات النفسية شيء يسمى "العلاج المعرفي السلوكي" فكرته قائمة على علاج أفكار الشخص وسوداويته بالتفكير، بالإضافة لسلوكيات بدّرب عليها الشخص حتى يقدر يتجاوز مشكلته ويتكيّف مع واقعه من جديد ...

الاستثناء والعلاج المعرفي السلوكي (للتشبيه وتقريب الفكرة) بتخبرنا عنه سورة المعارج:

إِلَّا الْمُصَلِّينَ (22) الَّذِينَ هُمْ عَلَىٰ صَلَاتِهِمْ دَائِمُونَ (23) وَالَّذِينَ فِي أَمْوَالِهِمْ حَقٌّ مَّعْلُومٌ (24) لِّلسَّائِلِ وَالْمَحْرُومِ (25) وَالَّذِينَ يُصَدِّقُونَ بِيَوْمِ الدِّينِ (26)

الصلاة كسلوك وأفكار !
في ظل حياة فيها خوف من شيء خايف ما تحصله، وشيء بين إيديك خايف تخسره، بتيجي فكرة الصلاة 5 مرات باليوم..
لقاء خاص بينك وبين ربنا، بتفضفض فيه لربنا خوفك، وقلقك، وهلعك، وبتطلب منه يساعدك وما يتركك لحظوظ نفسك ومخاوفك..!
لقاء بتستحضر فيه إنك بيوم رح توقف بين إيدين ربنا، مجرد استشعارك لهالفكرة.. رح تدرك إنه كل هالدنيا ما كانت بتستحق خوفك !

وكسلوك رح يعافيك من هذا الخوف والهلع والمنع، بدك تتصدق! وتنتصر على نفسك، وتحب الخير لغيرك، وتزرع الإبتسامة على وجوههم وتجبر خاطرهم..
ما تكون بخيل ومنوع، وامنح الآخرين مثل ما ربنا منحك!

وكفكرة معرفية رح تعافيك، إنك تصدّق بيوم الدين والحساب، لإنه مجرد إيمانك وتصديقك بهاي الفكرة، رح تتحررك من كثير مخاوف حبست نفسك فيها..

إيمانك بيوم حساب رح توقف فيه بين إيدين ربنا، رح يخفف من حدة أفكارك، ورح يخفف من آلامك اتجاه أشياء ما كانت مستاهلة حزنك وخوفك..

رح تكتشف إنه (يوم الدين) هو الفكرة الوحيدة اللي كانت بتستحق خوفك!
-----------
----------

بدك تنصدم؟ شوف الآيات قبل (إن الإنسان خلق هلوعا)!!

#القرآن_الجميل
#ARK

مرة بصلاة التراويح بنتين صغار بجننو صارت بينهم طوشة في المسجد..^^
كل المسجد ضحك عليهم، وحتى آبائهم ما قدروا يمسكوا حالهم من الضحك..

حتى الشيخ أجلّ الصلاة دقائق لحتى يهدي النفوس.. "))
وقتها الشيخ قلنا حديث جميل، عن طفلتين اقتتلوا أمام رسول الله صلى الله عليه وسلم وهو بصلّي في الناس!!

«كَانَ رَسُولُ اللهِ صلى الله عليه وسلم يُصَلِّي بِالنَّاسِ، فَجَاءَتْ جَارِيَتَانِ مِنْ بَنِي عَبْدِ المُطَّلِبِ تَشْتَدَّانِ اقْتَتَلَتَا، فَأَخَذَهُمَا رَسُولُ اللهِ صلى الله عليه وسلم فَنَزَعَ إِحْدَاهُمَا مِنَ الْأُخْرَى، وَمَا بَالَى بِذَلِكَ»

وفي لفظ آخر عَنِ ابْنِ عَبَّاسٍ رضي الله عنهما: أَنَّهُ جَاءَتْ جَارِيَتَانِ مِنْ بَنِي عَبْدِ المُطَّلِبِ فَأَخَذَتَا بِرُكْبَتَيِ النَّبِيِّ صلى الله عليه وسلم فَفَرَّعَ بَيْنَهُمَا وَلَمْ يَنْصَرِفْ.
--------
يعني الطفلتين وصل الشجار بينهم لعند رسول الله وهو بصلّي في الناس، كانوا بالضبط أمامه، عند ركبه صلى الله عليه وسلم..
والنبي الرحيم فرّق بينهم وهو في صلاته وكملها!!
.
.
لما طلعنا من المسجد صاحبي بحكيلي:
بتخيل هالبنتين عاشوا عمرهم وكل ما وحدة منهم تشوف الثانية تحكيلها:

تتذكري لما اطاوشنا وإحنا صغار في المسجد ورسول الله صلى الله عليه وسلم فرّق بينا!!!

-------
{لَقَدْ جَاءَكُمْ رَسُولٌ مِنْ أَنْفُسِكُمْ عَزِيزٌ عَلَيْهِ مَا عَنِتُّمْ حَرِيصٌ عَلَيْكُمْ بِالْمُؤْمِنِينَ رَءُوفٌ رَحِيمٌ}

#القرآن_الجميل
#ARK

بقولوا إنه العشاق في بداية حبهم بتغزلوا بالقمر، ولاحقا لما ينضج حبهم بحبوا الشمس لإنه بستهويهم دفء المشاعر وطاقة الحنان فيها..

وبحكوا إنه "جولييت" رفضت إنه "روميو" يقسم إلها بالقمر!
كانت جولييت بتشوف القمر بارد، ومجرد تابع للشمس وبسرق نوره منها، ومخادع بتغيّر وجهه كل ليلة..!!

والليل أسود، ارتبط بالحزن، والدموع، والاكتئاب، وترافق معه كثير من ذنوبنا..

على عكس الصباح..اللي ارتبط في أذهانا إنه رباح !
.
.
مهما ادّعيت إنك بتحب الليل، فإنت بتحبه لما تكون آمن بغرفتك، وبأي لحظة بتقدر بكبسة تنير عتمتك..
لكن أكيد ما رح تتقبل الليل فيما لو كنت بتمشي بطريق موحش، أو ضعت بالصحراء، أو كنت تحت الأنقاض لما سمعت إنه فرق الإنقاذ توقفت عن عملها ..

بتلاحظوا إنه الإنسان كل ما كبر بالعمر، بنام بكير، وبصحى بكير حتى يلامس خيوط الشمس ويتنفس هوا الضحى؟!

وأكيد لما نضيع بالعتمة، بنذل كل جهدنا حتى نتلمّس أي نور...ينقذنا ويرشدنا..

وعينا بالليل والنهار بشكّل بكل مرة نفوسنا وتجاربنا وخبراتنا وصراعاتنا وطرق تفكيرنا..

----------
هذا الصراع الكوني ما بين الشمس والقمر، والليل والنهار، والنور والظلام، هو ذاته صراع موجود في نفسك!

لهيك عمره خطرلك ليه ربنا قبل ما يقسم بالنفس أقسم بالشمس والقمر والليل والنهار، والسماء والأرض!!!

وَالشَّمْسِ وَضُحَاهَا (1) وَالْقَمَرِ إِذَا تَلَاهَا (2) وَالنَّهَارِ إِذَا جَلَّاهَا (3) وَاللَّيْلِ إِذَا يَغْشَاهَا (4) وَالسَّمَاءِ وَمَا بَنَاهَا (5) وَالْأَرْضِ وَمَا طَحَاهَا (6) وَنَفْسٍ وَمَا سَوَّاهَا (7) فَأَلْهَمَهَا فُجُورَهَا وَتَقْوَاهَا (8) قَدْ أَفْلَحَ مَنْ زَكَّاهَا (9) وَقَدْ خَابَ مَنْ دَسَّاهَا

نفسك بتشبه الكون!
فيها نور مثل الشمس، وفيها عتمة مثل القمر..
فيها وضوح مثل النهار، وفيها غشاء مثل الليل..
فيها رقي مثل السماء، وانحطاط مثل الأرض..

فيها فجور، والفجور من الإنفجار والإندفاع، يعني إنك ما تتحكم بانفعالاتك..
وفيها تقوى، إنك تقدر تكبح جماح انفعالاتك وغرائزك وأهوائك..

فيها فلاح فيما لو انتصرت..
وفيها خيبة!

أفلح مين غذاها بنور بالشمس وارتقى فيها للسما..
وخاب مين غشّاها بالعتمة ونزل فيها للأرض !

.
.
بنفس سورة الشمس، في قصة ثمود (إِذِ انْبَعَثَ أَشْقَاهَا)..
وصفت السورة سلوكه بالإندفاع يعني الفجور!
ووصفت شخصه (بالشقي)..
طيّب مين النبي اللي بُعث إلى ثمود؟؟!! ... اسمه (صالح)!

بالضبط، مثلك..
نفسك فيها من هالشقي.... وفيها من نبي اسمه صالح !
.
.

المهم، إنك تحاول وتصارع وتقاتل..
وحتى لو كنت بتمر بأيام مظلمة ومعتمة وموحشة، وشقية..
بدك تلحق النور... تركض وراه، تتلمسه بأي شكل من الأشكال..

بالضبط مثل القمر مع الشمس..

والقمر إذا تلاها !!!!

#القرآن_الجميل
#ARK

حسيت أبوي زعل مني لما مزحت معه وقلتله:
خلص يخلف عليك، هسا أنا بشتغل وباخذ راتبي وما بدي منك مصاري..

أبوي قلي حتى لو استقليت ماديا وما بدك مني مصاري، ما بصير تقول هيك، وكأنك يعني جاي تقلي إنك مش بحاجتي، بعد ما كنت بحاجتي طول عمرك، من اللحظة اللي أجيت فيها عالدنيا!!

-------------
-------------
كنت بقرأ سورة الشعراء، سورة بتحكي عن الأنبياء وأقوامهم..
لاحظت عبارة كررها كل الأنبياء مع أقوامهم..

نوح، هود، صالح، لوط، شعيب.. كلهم قالوا لأقوامهم:

وَمَا أَسْأَلُكُمْ عَلَيْهِ مِنْ أَجْرٍ إِنْ أَجْرِيَ إِلاَّ عَلَى رَبِّ الْعَالَمِينَ.

كلهم قالوا لأقوامهم إحنا ما بدنا منكم أجر! ما بدنا منكم مقابل! إحنا فقط بدنا تآمنوا بربنا، وإحنا أجرنا على رب العالمين..!!
.
.
بصراحة لأ، مش كل الأنبياء كرروا هالعبارة بسورة الشعراء!!
كلهم باستثناء: موسى، وابراهيــــــــم!!

في حوارات موسى وابراهيم عليهم السلام، ما قالوا: وما نسألكم عليه من أجر!!

طيّب ليه؟!!

ببساطة، ابراهيم كان بخاطب أبوه، وموسى كان بخاطب فرعون اللي تربى في بيته!!

فما كان من الحكمة واللائق إنهم يقولوا لحد أنفق عليهم، وأطعمهم، وقدّم إلهم معروف، إحنا ما بدنا منك أجر!!

كان هالشيء رح يضعف موقفهم، أو يظهرهم إنهم أنكروا فضل مين أحسن إلهم، وإنهم مجرد ما استقلوا أظهروا استغنائهم وعدم حاجتهم..

ما بليق بأنبياء الله يتحدثوا بشكل يُفهم منه إنكارهم لفضل مين رباهم..
حتى لو كان الأول ربّاه اللي قال أنا ربكم الأعلى، والثاني ربّاه صانع أصنام!
.
.
--------
رجعت لأبوي، بس ما خبرته قصة الآيات، خفت يقلي شو قصدك؟؟
أنا فرعون، ولا أبوه لابراهيم!!! " )))))))

بس قلتله حقك عليّ، أنا آسف..
وجد أنا كنت بمزح، أنا ما بنسى خيرك ومعروفك..

طيّب أقلك؟.. خلص أنا بحاجتك..
هاتلك 100 دينار ^-^ "))

#القرآن_الجميل
#ARK

وصلتني هالرسالة من بنت.. وحبيت أشاركّم فيها بعد ما أخذت الإذن من صاحبة الرسالة..
والله يجبر قلوبكم جميعا ^^
----------------
قبل كم من سنة زي هلأ كنت بدوّر كيف أنتحر بس كنت خايفة أموت عاصية..!
ما بدي أقول إني كنت شيخة.. بس يعني على حد من الالتزام.. فترات بيزيد.. فترات بيقِل..
بس هديك السنة كانت كئيبة لدرجة أفقدتني ذاتي.. واليوم بعد 4 سنين بقدر أحكي إني عم بتشافى..
حالتين وفاة في بيتنا.. كركبة.. كورونا.. 365 ليلة من البكاء.. ما كانت أيام عاديّة.. فشل قصة ارتباط.. شغل سيء.. مشاكل مع أهلي.. صراخ كتير.. طبيب نفسي.. انهيارات نفسية..
بطلت عارفة مين أنا.. أسأل ربنا ليش؟
بعد مكنت ملتزمة بالسنن صرت أقطع بالفروض.. حالة من الطنين اللامتناهي في راسي..
وشعور بالفراغ والوحدة قاتلين..
...........
اليوم..
10 رمضان.. بقدر أحكي إني رجعت لحالي..
بعد 4 سنين انطفاء..
ليش عم بحكيلك هاد الحكي؟
كنت فاتحة تويتر وعم بكتب قديش ربنا دايماً بيعطيني كل اشي بدي اياه "حرفيًا" كل اشي..
مرات متأخر شوي عن صاحباتي.. بس دايماً بيرزقني بكل اشي بتمناه..
من مستوى الأكل، لحتى السفر بيجيني على شكل هدية، عزومة، جائزة، تيسير للإشي بتدبيره.. بس كله بيجي..
صفنت وأنا بكتب بالتويتة، إنه غريب ليش ما عمري شفت هاد الشعور طول السنين الي مرقت عليّ هاي؟
ربنا كان دايماً بيمن عليّ.. كنت ألمس إنه وهّاب.. رزّاق.. جبّار..بس من شدة يأسي ما التفتت..
.......
وهلأ في جواي شعور برسالة نفسي أوصلها تعبيرًا عن امتناني واعتذاراً عن تقصيري في حق ربنا لكل حد ممكن يكون وحيد في هاي اللحظة.. شاعر إنه في ضيق..

(ستُجبَر.. والله ما كان الله ليتركنا في ظلمة وَحدتنا وهو النور..)!

صح اشتغلت بعد صاحباتي كلهم.. بس شغلي اليوم أحسن من ما بتمنى الحمدالله ودخلي جيد..
تأخرت بالتخرج.. بس كان لازم أعيش هداك الفصل لإنه كان لازم أوصل للنضج الي ناقصني..
ما ارتبطت بالشخص الي طالما دعيت إنه أرتبط فيه.. لإنه في الوقت الي تقدملي فيه اكتشفت إنه مش هو المناسب..
الي قدي صار عندهم أولاد.. بس متأكدة إنه رح يجي الوقت المناسب لأرتبط وأكون زوجة وأم بالطريقة الي بحلم فيها ومع الإنسان المُناسب..

ليش هالقد متأكدة؟
لإنه ربنا متولّيني.. الوليّ متوكل في أمري..
الي يسرلي عمرة بتدبيره وتيسيره...وفي الوقت المناسب لعندي إجاني الشغل الي بتمناه بعد تعب سنين..
وكل كبيرة وصغيرة بتمناها بيرزقني اياها..
أكيد ما رح يتركني..
ليش أظلم نفسي وأتركني لوساوس كئيبة.. وأشيل الهَم.. وأحزن.. وأنا فعلًا غرقانة بنعم ربنا..
.......
اليوم.. كل ما أحسها ضاقت.. بحب أدعي ربنا بأسماؤه.. لإنه كل وجع فينا وكل ألم ما بنقدر نحكيه.. فيه اسم وصفة ربنا حكالنا إنه فيه.. وحاشاه مش ليثبتلنا.. بس يمكن ليطمّنا..

الدنيا صعبة جد.. بس بدي أحكي إلي وإلكم إنه ما نحس حالنا لحالنا.. وتذكر أسماء ربنا في ضيقك.. تذكرهم وإنت واثق إنه ربنا ما بيهون عليه يضيعَك..
يا جبّار.. اجبر ضعفي
يا وليّ تولّ أمري ودبرني ودبرلي
يا وهّاب.. هب لي
يا فتّاح.. افتح لي أبواب رزقك
يا قهّار..
يا سميع.. يا صَمَد.. يا ودود.. ياحيّ.. يا قيّوم.. يا غفّار
حاشاك أن تردّني خائبة.. حاشاك وأنا ببابك وبلطفك.. وبجودك وكرمك متمسكة..

وبس..

#ARK

‏إن الله ليضحك إلى رجلٌ قامَ في ليلةٍ باردةٍ من فراشِه ولحافِه ودثارِه فتوضَّأَ ثمَّ قامَ إلى الصَّلاةِ.
فيقولُ اللَّهُ عزَّ وجلَّ لملائِكتِهِ: ما حملَ عبدي هذا على ما صنعَ؟
فيقولونَ: ربَّنا رجاءَ ما عندَك وشفقةً ممَّا عندَك.

فيقولُ: فإنِّي قد أعطيتُه ما رجا وأمَّنتُه ممَّا يخاف. ❤️

#ARK

عشت فترة من حياتي في تركيا، وكان معي بغرفتي بالسكن شب تركي اسمه (زاهد).

كان زاهد كل يوم قبل الفجر يصحى يصلي قيام ليل..
صراحة أنا كنت يلا يلا ألحق أصلي الفجر قبل ما تطلع الشمس!!
بس لما شفت زاهد بصحى، قررت أخجل على نفسي وأقوم أصلي كمان..

صرنا كل يوم نصحى قبل الفجر نصلي بعدها نروح للمسجد، وكانت فعلا أجمل أيام حياتي..

بيوم صحيت أنا عالقيام وزاهد ضل نايم، حاولت أصحيه لقيته مستغرق في نومه فقلت خلص بصحيه عالفجر..

لما قام زاهد عالفجر كان زعلان كثير إنه كيف راح عليه القيام!
وثاني يوم حكالي إشي غريب جدا!!

حكالي أجاني شيخي في المنام وكان زعلان مني ليه راح عليّ القيام!

أنا وقتها صفنت!! إنه معقول في هيك إشي في الحياة؟ معقول لسه في ناس هيك؟!

--------
بعد فترة حكالي زاهد تروح معي نزور شيخي؟
سألته نفسه اللي أجاك في المنام؟
حكالي آه!

رحنا أنا وزاهد وكان الشيخ اسمه (قاسم بابا)، عمره فوق الثمانين سنة..
كان بيته مليان طلاب وناس، وكان الكل بحترمه وبوقره بشكل رهيب..

كان بمجلس الشيخ قاسم بابا رجل قاعد جنب الشيخ، بساعده وبستقبل ضيوفه وبرتب كل أموره..

زاهد حكالي شايف هالرجل؟ ذكرني أقلك إشي عنه لما نطلع..

لما طلعنا حكالي:
هذا كان شخص عاصي ربنا، ما في ذنب إلا ارتكبه، دايما سكران وطافي، وشرّاني وبعمل مشاكل للناس..

وفجأة بليلة طرق بيت الشيخ قاسم، وحكاله بدي أتوب..ساعدني!!!
فالشيخ استقبله ورحبّ فيه، وطلب منه يقيم في بيته، لإنه خاف لو طلع من هون يرجع لبيئته السيئة..

وبعد أكم يوم أجت بنت كانت بتشتغل بمكان سيء، وطول حياتها غرقانة بالذنوب والفواحش وقالت للشيخ قاسم: بدي أتوب..ساعدني!!!

فالشيخ قاسم استقبلها ورحب فيها ونادى زوجته واستقبلتها وقلها كمان خليك عنا..

وبعد فترة زوجهم الشيخ قاسم من بعض!
وطلب منهم يقيموا بالقرب منه، ويشتغلوا معه..!

ومن وقتها هالرجل هو المسؤول عن ترتيبات الأخوة، وزوجته المسؤولة عن ترتيبات الأخوات!!!

------------
بحكيلي زاهد، دايما كان الشيخ قاسم يحكيلنا إياكم لما تشوفوا عاصي تدعوا عليه، لا بدكم تدعوله!
بدكم تاخدوا بإيده..
بدكم تحييوا الأمل بقلبه..
بدكم تتوسلوا ربنا لهدايته..
بدكم تهمسوا بذانه إنه الله بنتظره!
وإنه لو أقبل عليه حاشاه الكريم يرده..!

وقتها زاهد قرأ عليّ آية كنت سمعتها "فصيحة" مئات المرات في حياتي..
لكنها هالمرة دفعتني للبكاء بدهشة، لما خرجت من زاهد بلكنة أعجمية مكسرة:

قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِن رَّحْمَةِ اللَّهِ ۚ إِنَّ اللَّهَ يَغْفِرُ الذُّنُوبَ جَمِيعًا ۚ إِنَّهُ هُوَ الْغَفُورُ الرَّحِيمُ (53)

#القرآن_الجميل
#ARK

من شوي كنت بحلق في صالون حلاقة..

كان في شب قاعد بالصالون ما بعرفه لكنه بحكي للشباب في الصالون عن تجربته مع الوشم وكيف إنه لما عمله اضطر يسكر كثير !!!!

تفرج علي وقلي آسف حاسس الموضوع ما عجبك ..
قلتله أكيد ما عجبني..

وقتها تذكرت شيخ مرة قال:
لو شفتوا عاصي وحسيتوا إنه صعب يترك أغلاطه..فما تتركوه إلا وانتوا دالينه على خير يعمله ..

أكيد في لقاء عابر في صالون حلاقة مش رح أقدر أقنعه يغيّر سلوكه وحياته بلحظة..

وفجأة قلتله: ناوي تصوم بكرا ؟
حكالي شو بكرا؟

قلتله عاشوراء...صيامه بكّفر ذنوب السنة السابقة!

وحححد الله!
قالها بعفوية واندهاش ...
وكمل كلامه: والله غير أصوم... بالكي الله غفرلي وهداني!

........
أنا مؤمن دايما إنه الخير اللي بقرر يقوم فيه شخص فجأة وسط ذنوبه وآثامه رح يقدر هالخير بيوم ينتشله منها..
.
.
طلعت من الصالون بعد ما سلمت عليه..
وناداني وقلي اسمع...لا تفكرني بجاملك...والله غير اصومه!

ابتسمت من قلبي..

وقلت يارب ..هالشب قرر بكرا يصوم بيوم حر....بسسس عشانك ! عشان تغفرله وتهديه ..

فيا رب كرمال هالقرار المفاجئ منه، إنك تفاجئه بمغفرتك وهدايتك..

.....

طيب إنت؟
مش حاب بكرا تتفاجئ بشعور إنه ربنا غفرلك !

#Ark

بتصير معك وإنت بتتصفح تلفونك عالفيسبوك أو انستغرام مثلا، وبعدها بتسكّر التطبيق، وفجأة بشكل عفوي بترجع تفتح نفس التطبيق خلال ثواني؟!

أو مثلا قررت تنام فسكرت تلفونك، وبعد دقائق من التقلّب قبل النوم قمت رجعت مسكت تلفونك..

بتلاحظ إنه الناس بتتصفح السوشال ميديا في كل الأوقات حرفيا......في المحاضرات والمواصلات والمولات والمناسبات وحتى بعد الصلاة مباشرة مباشرة!!!

حتى كبار السن، زمان كنت تلاقيهم قبل الفجر فاتحين مصاحفهم، هسا كثير منهم بكون فاتح عالسوشال ميديا أثناء انتظار إقامة الصلاة..!

حتى إمك وأبوك!!!
إمك ما تركت شيف ولا طباخة من غير ما تعلّق عنده..
وأبوك ختم الريلز كله كله!!
وبعمل شير لكل إشي!

--------
المشكلة كلنا متفقين إنه أغلب محتوى السوشال ميديا تافه، وإنه الناس فقدت عقلها، ورغم هذا ما بغيب عنّا شو بصير في السوشال ميديا، وما بنقدر نطلع مشوار ولو بسيط من غير تلفوناتنا!!!

طيّب ليش؟!

في كثير تفاسير قدمها علماء النفس، لكن في تفسير ومصطلح لفتني وهو: "FOMO" وهو اختصار "fear of Missing Out"
ويعني: الخوف أو القلق من أن يفوتك شيء ما!

وهي حالة من التوتر النفسي بتصيب الشخص لما يغيب عن السوشال ميديا، هذا التوتر بحفز الشخص إنه يضل متصل بالسوشال ميديا، لإنه بظن إنه هالشيء رح يخفض من حالة التوتر النفسي عنده.

علماء النفس بصنفوا هالظاهرة كحالة جديدة من التشبع النفسي للفرد ، فمثل ما بحتاج الشخص إنه ياكل ويشرب ويشعر بأمان، صار كمان بحتاح يكون على اطلاع ومعرفة بكل ما يحدث حوله!!
ومجرد معرفته واطلاعه على كل ما يدور حوله بمنحه شعور واهم بالسيطرة على واقعه، وهذا بخفض توتره ولو لحظيا..

لهيك بتلاقي الشخص كل شوي بفتح السوشال ميديا يشيّك شو صار، شو الجديد، شو الترند، ومين تخرج ومين تزوج ومين سافر..وشو عملوا مشاهير التيك توك
(رغم إنه ما بطيقهم ولا بحبهم وبشوفهم تافهين، مع ذلك بعرف كل أخبارهم !!!)

أو بتلاقي الشخص دخل على جروب متعود عليه ليشوف مين آخر حد سأل وشو سأل ويطمن إنه مطلع على استشارات الناس وتساؤلاتها أول بأول..

.
.
.
وهيك بعيشوا الناس، بشعور خوف من إنه يفوتها شيء..
لكن في الحقيقة..

صدقوني ما في شيء مهم، وما رح يفوتكم شيء!
بس رح يفوتكم (عمركم) في الوقت اللي خايفين فيه يفوتكم شيء!
.
.

أو بصراحة...ممكن يفوت إمكم وصفة جديدة بتشهي..

بس اطمنوا..
بكل الأحوال، والله العظيم ما كانت رح تطبخها!!!

#ARK

صاحبي بقلي إنه من وقت ما خطب وهو يوميا بوصّل خطيبته وبروحها..
ولما يكون كثير مشغول هو بطلب إلها "كريم أو أوبر" وبضل معها عالخط..
وذكرلي مواقف بتظهر حرصه المبالغ فيه عليها..

استغرب من كلامي لما سألته:
إنت بتعمل هيك لإنك بتحبها وبتخاف عليها، ولا لحتى ترضي غرورك؟!

سألني كيف يعني أرضي غروري؟!

قلتله في نوع من الرجال بتمنى في شريكة حياته إنها تكون دائما بحاجته، إنها ما بتقدر تعمل إشي بدونه، إنها دايما بحاجة حمايته وعطفه ومساعدته..
ومع الوقت بحسس البنت إنها لا شيء بدونه، وإنها من غيره كان ضاعت وما عرفت تتصرف بإشي..

ما في مشكلة إنه الرجل يحب البنت ويهتم فيها ويرعاها، لكن المشكلة لما يكون الشيء دافعه إنه يرضي غروره، ولحتى يثبت لنفسه إنه المنقذ والفارس في هالعلاقة..

فرق بين إنك توّصلها لإنك بتحب تشوفها، وبين إنك توصلها لحتى تعيش شعور إنه هالبنت ما كانت رح تعرف تتصرف من غيرك..

وهيك مع الوقت بتصير العلاقة قائمة على مقدار ضعف البنت وحاجتها، فكل ما أظهرت البنت ضعفها، كل ما الشب قدر يثبت ذاته ونفسه..
وفي الوقت اللي بتظهر فيه البنت قوتها أو استقلالها في مواقف، فالشيء بمثل تهديد وخوف حقيقي للشب وبفقد تقديره لذاته..

ممكن الكلام ما بنطبق عليك، لكني فقط حبيت أنبهك لطريقة تفكيرك، كونك مقبل على زواج..

ولازم تعرف إنك لو بتحبها جد، ما رح توصللها شعور إنها ضعيفة وضايعة ولا شيء بدونك، وغلط أصلا تحسسها إنها دائما وبكل ظرف هي بحاجتك..

لو بتحبها جد، رح تتفق معها إنه هاي علاقة مشتركة، بيوم رح تحتاجيني وبيوم رح أحتاجك، المهم بيوم ما نخذل بعض!!
--------

صفن كثير، وقلي يا أخي غريب كيف الإنسان لما يوعى لفكرة، كيف جد ممكن تغيّر حياته..

كيف إنه فكرة شاركتني فيها، ممكن تصحيني من غرور عايشه، ومن بنت كنت رح أضعفها وأحطمها وألغي شخصيتها بس لأرضي غروري..
.
.
ضحك بعدها وقلي:
بس صرت واعدها أروّحها اليوم..
بس جد جد هالمرة مش لأرضي غروري، ولا لأحسسها بضعفها بدوني..
بس لأقلها إني بحبها!

#ARK

في الغالب كل اللي تخرجوا الأسابيع الماضية من الجامعة أو التوجيهي بمروا الآن بمشاعر غريبة، مشاعر مختلفة تماما عن فرحتهم وهمّه بأشروا لأهلهم إنّه هينا هووون، شفتونا؟؟؟

وفي منهم الآن بتساءل: إنه معقول هالفرحة اللي كنت بنتظرها من سنوات..طلعت بس هيك؟؟
روب تخرج، وحفلة، ولمّة أهل، وصور..وبس؟!

في الحقيقة رح يصابوا بنوع من الخيبة لما يكتشفوا إنه تصورهم عن فرحة التخرج وهمّه على مقاعد الدراسة ما طلعت بتشبه أبدا فرحتهم لما تخرجوا فعلا!!
نفس فكرة عروسين بعد أيام من زواجهم، واللي ممكن يتساءلوا في سرهم: إنه معقول الموضوع طلع بس هيك؟!
أو مثل شخص نجح بشيء صارله بطمح وبسعى إله شهور وسنوات، ومجرد ما حققه بتنتابه مشاعر غريبة، وبتساءل يا ترى ليه أنا الآن مش كثير سعيد؟ وممكن يتساءل ليه أنا حزين؟!!
بالضبط نفس ما قال (جو) في فيلم الإنيميشن (Soul) لما وصل لشو كان بحلم، وقتها قال:
it is just I have been waiting on this day for my entire life I thought I'd feel different !
.
.
.
ما سبق بتشير إله بعض كتب علم النفس، بمصطلح:
( اكتئاب ما بعد النجاح | Post-success depression )
وهو مصطلح بتناول الناس اللي كانوا يطمحوا لهدف وحلم في حياتهم، ومجرد ما وصلوا إله صابتهم أعراض اكتئاب غير متوقعة وغير مفهومة!
وبالتالي ما شعروا بطعم النجاح، وما فرحوا مثل ما اتوقعوا إنهم يفرحوا..وبالعكس حزنوا وييأسوا وشعروا بسخافة رحلتهم وما شافوا أي معنى لتجربتهم..
بعض التفسيرات (لإكتئاب ما بعد النجاح) إنه الإنسان بعد ما يوصل لهدفه بشعر إنه ما كان هذا هدفه، وإنه الشيء ما كان بستحق أصلا، وممكن هذا برجع لطبيعة الإنسان غير القنوعة..
وفي تفسيرات بتحيل الموضوع لفجوة روحية داخل الإنسان، ومستحيل أي انجاز من إنجازات الدنيا يعبيها، وإنه الإنسان مهما سعى وحاول بضل في داخله ثُقب ما بملؤه إلا الله، وحتى البعض أطلق عليه (ثقــــــــب الله) !!
وفي تفسيرات بتحكيلنا إنه الموضوع برجع ببساطة لنسبية السعادة، وإنه ما في سعادة كاملة أبدا، وإنه كل أفراح الدنيا مؤقتة ولحظية وما في سعادة مطلقة..
وفي تفسيرات بتشير لفكرة (أصالة الحزن) فينا..وإنه الحزن شيء متجذر فينا عكس السعادة والفرح باعتبارها مجرد أشياء عابرة وطارئة ووقعها خفيف على نفوسنا..
وممكن هذا بفسر تأثرنا وتفاعلنا وتذكرنا للقصص والأفلام الحزينة أكثر من السعيدة.
.
.
المهم..
عمركم فكرتوا ليه يوم الخميس أحلى من يوم الجمعة؟
ليه فترة الخطبة أحلى من الزواج؟
ليه الناس الداخلين عالمطعم مبسوطين أكتر من الطالعين؟
ليه الطالب على مقاعد الدراسة، أسعد من الخريج؟
ببساطة إحنا بنستمتع برحلتنا نحو السعادة، أكثر من استمتاعنا بلحظة السعادة نفسها !!!
إحنا بدهشنا توقنا للحلم المجهول، أكثر من الحلم نفسه!
إحنا بنضحك من قلبنا وإحنا بطريق الرحلة، أكثر من الرحلة نفسها..!
.
.
ببساطة السعادة في الرحلة، مش في الوصول!
السعادة في السعي، مش في النتيجة!
لهيك كثير ناس للأسف بتنسى تعيش سعادة سعيها ورحلتها وطريقها..
وبتعيش بتوتر وخوف وقلق..
ولما توصل لحلمها بتكتشف إنه السعادة كانت بالرحلة، ويا ريت عشنا تفاصيلها !!
.
.
وأكيد يفترض ما ننسى إنه ما في سعادة مطلقة في الدنيا، ولا يعني هذا إنه ما نعيشها، لكن مجرد وعينا لهذا الشيء بجعلنا أكثر حكمة، وأكثر صدق وتواضع في لحظات سعادتنا...
القرآن ذكر السعادة الحقيقة مرتين:
- يَوْمَ يَأْتِ لا تَكَلَّمُ نَفْسٌ إِلا بِإِذْنِهِ فَمِنْهُمْ شَقِيٌّ وَسَعِيدٌ(105)
- وَأَمَّا الَّذِينَ سُعِدُوا فَفِي الْجَنَّةِ خَالِدِينَ فِيهَا مَا دَامَتِ السَّمَاوَاتُ وَالأَرْضُ إِلا مَا شَاءَ رَبُّكَ عَطَاءً غَيْرَ مَجْذُوذٍ(108)
الآية الأولى بيّنت زمن السعادة (يوم القيامة).
والآية الثانية بيّنت مكان السعادة (الجنة).
.
.
القرآن بطلب منا نكون أكثر هدوء وواقعية وحكمة..القرآن بحكيلنا بصراحة:
ما تبحثوا عن السعادة المطلقة في غير مكانها..
ولا تنتظروها في غير أوانها..!!

#ARK

وصلني من بنت سؤال واستشارة، بتحكيلي إنها بنت منيحة ومحافظة وملتزمة، انقادت لمغامرة فجائية ووجدت نفسها بتحب شب أبدا أبدا ما بشبهها..!

شب إله علاقات كثيرة مع بنات، ما بصلي، الحرام عنده عادي، بل حتى ما بعاملها منيح، وبتشعر نفسها هي اللي بتلحق وراه..!

والغريب إنه قبل ما تخوض هالعلاقة تقدّم إلها شاب كثيييير محترم وخلوق ومتدين لكنها رفضته...!!

ما رح أدخل بتفاصيل الاستشارة، لإنه قصة البنت كثيييير حزينة ومؤلمة وقاسية، ووصل الموضوع فيها لتهديد وفضيحة!!
.
.
لكن، حبيت أوضح إلكم (حسب الدراسات) ، ليه هالبنت وغيرها بكونوا بنات مناح، وعندهم مبادئ وقيم، لكنهم بنجروا لعلاقات مع (الباد بويز)، وليه بنجذبوا إلهم أصلا؟!!!
وكيف لبنت بتعرف إنه شب بحكي مع ألف بنت غيرها، وإنه بلف وبدور، وإنه مش صادق بكل شيء بقوله، مع ذلك بتتعلق فيه!!!

- الشخص السيء أو "الباد بوي" عموما بكون واثق بنفسه وجريء، وبعتقد إنه كل البنات بتحبه، لهيك بتزيد ثقته بنفسه وبكون جريء في طرح أفكاره من غير خجل أبدا، وهذا شيء محبب عند بعض البنات.

- هالأشخاص بكونوا حاسمين، عكس الشخص المنيح اللي بتأنى وبفكر وبكون حذر أكثر، لكن السيئين بكونوا حاسمين في الإقدام على العلاقة من غير تردد وبمشوا بوتيرة متسارعة ليوصلوا لغايتهم..

- الباد بويز غير واضحين! صعب البنت تفهمهم تماما، وصعب تتوقع خطواتهم القادمة، وهالشيء بحد ذاته مثير للفضول.
فعادي ممكن ينسحب من المحادثة فجأة، ويرجع فجأة...وهالشيء بخلي البنت في حالة صراع إنها تثبت وجودها وحضورها معه وتلاحقه وين ما راح لحتى يعبرها!!

- هذا غير فكرة إنهم مهتمين بالموضة وآخر الصيحات وهذا بجعلهم محط أنظار واهتمام بعض البنات، وكمان إنهم عاشوا تجارب سابقة وهذا منحهم خبرة في التعامل مع البنات..

- هالأشخاص عموما حياتهم مخربطة وغير منظمة أبدا، وفيها كثير من الطيش واللامبالاة، وهون البنت بتفكر نفسها إنها رح تعيد ترتيب حياته وتنظيمها وتساعده بهذا الشيء، وهذا بشعرها بالمسؤولية والإنجاز وبأهمية وجودها!
وفي من البنات بتشوف إنه وجودها رح يساعد هالشخص يتوب ويترك المعاصي ويصير أحسن!! لكن في الاخير للأسف هو اللي بجرها للغلط!

بالضبط مثل قصة هالبنت، حكت معه لتكسبه وتهديه لإنها شافت فيه خير!!
وانتهت القصة بسؤال:

مشان الله...بهددني، شو أعمل؟!!

-------------

والخلاصة،
لا تسمحوا لشخص بضحك على نفسه إنّه يضحك عليكم!
واللي ما بخاف من الله، خافوا منه!

#ARK

بتعتقدوا إنه ربنا رح يحاسب بنت تزوجت من شخص لطيف وكريم وبحبها وكل ما يشوفها بتغزّل بعيونها، مثل حسابه لبنت ما حد التفت إلها ولا تغزّل بعيونها!!

أو رح يحاسب شب طويل ومرتب وملفت، مثل حسابه لشب عنده إعاقة؟

طيّب بنت أبوها أهداها يوم تخرجها سيارة، وبنت كانت تأجل فصول لإنها ما معها أقساط الجامعة..؟

في عروس طلعت شهر عسل بجنن، وعروس زوجها مات ليلة عرسه بطلقة طائشة.

طفل نشأ في بيئة سويّة، وطفل نشأ في بيئة سامّة.
وطفلة أبوها كل ما يشوفها بحضنها، وطفلة أبوها كان يضربها على أتفه سبب.

شب تيسّر إله شغل كثير ممتاز، وشب ثاني ظروف الحياة طلعت أكبر من طموحه وأحلامه.

بين ناس بتقلب بالنعم والصحة، وناس بتاخد كيماوي في المستشفيات.
بين ناس بتتقلب بالحريّة، وناس أمضت عمرها تحت ظلم السجّان.

في أم فرحت لزواج كل أولادها، وأم فقدت أعز إبن على قلبها بحادث سير.

--------------
بعرف إنكم بتعرفوا هالحكي، وبتعرفوا إنه ربنا عادل، وإنه في آخرة فيها كل العوض، وإنه الدنيا أصلا دار بلاء مش دار جزاء، وإنه مش كل شيء بنحلم فيه ضروري نحصله في الدنيا، وإنه في ناس شاءت الأقدار يستعجلوا جزء من أجورهم في الدنيا وفي ناس انحرموا منها ورح تتم اجورهم كامــــــلة في (الآخرة)..

بعرف إنكم بتعرفوا، لكن أحيانا مجرد المعرفة العابرة شيء غير كافي..!
هالمعرفة العابرة أحيانا صعب تستحضرها فيما لو كنت بتمر ببلاء قوي، ممكن لحظتها ما تسعفك أبدا فتسخط وتعترض على الأقدار..

بعرف إنكم بتعرفوا، لكن المهم إنكم تآمنوا من قلبكم!!
إيمان حقيقي تام، مش ممكن يتخلله لحظة شك أو سُخط..
إيمان مطلق بإنه في (آخرة)، وَالْآخِرَةُ خَيْرٌ وَأَبْقَىٰ!!
إيمان يقيني إنه في إله عادل، ما بفوته شيء مهما صغر أو دقّ!

إله عادل لدرجة إنه رح يعوض بنت عشان انحرمت من وردة توصلها فجأة من خطيبها، ومن زوج يتغزّل بعيونها!!!!!

#ARK

في رواية الحرب والسلم لـــ ليڤ تولستوي، في مقطع أخذ قلبي:

إنك تشكين من الغياب، فماذا يجب أن أقول أنا - إذا تجرأت فشكوت- أنا المحرومة من جميع الأعزة في قلبي؟

آه......لولا أن لنا الدين يعزّينا، لكانت الحياة حزينة جدّا.

عندي خبر حلو، كفيل يحيي الأمل فيكم ويخليكم تضحكوا من قلبكم!
بالضبط مثل ما ضحكت إمكم "عائشة" عليه!!

تقول عائشة رضي الله عنها في الحديث الصحيح:
لما رأيت من النبي صلى الله عليه وسلم طيب نفس قلت: يا رسول الله ادع الله لي.
فقال: اللهم اغفر لعائشة ما تقدم من ذنبها وما تأخر، وما أسرّت وما أعلنت.

فضحكت عائشة حتى سقط رأسها في حجرها من الضحك!
فقال لها رسول الله صلى الله عليه وسلم: أيسرّك دعائي؟
فقالت: وما لي لا يسرني دعاؤك!!

فقال صلى الله عليه وسلم:
والله إنها لدعائي لأمتي في كل صلاة. <3

#ARK

بعض علماء النفس في أمريكا سبكوا مصطلح ومتلازمة أطلقوا عليها اسم "متلازمة غزّة" لوصف "بهجة وسعادة" العرب لما يسمعوا عن أي عملية يقتل فيها اسرائيليين.

عرفوا (متلازمة غزة):
اضطراب ثقافي يَتمَحوَر حول الاحتفاء بالموت (the cultural pathology of death-admiration)، إذ لا يمكن تفسير سلوك هؤلاء العرب والفلسطينيين المحتفلين بالقتل إلا إذا كان لديهم إعلال كبير في صلب ثقافتهم البدائية.

يعني...
فيما لو شعرت بفرحة وسعادة أثناء مشاهدتك لمقطع يقتل فيه إسرائيلي...أو لو ابتسمت على منظر المجاهدين بالمظليات... أو أبهجك منظر الصواريخ وهي بتقصف إسرائيل..أو حتى ممكن لو عملت شير لعملية بطولية....
للأسف للأسف حسب الغربيين فإنت بدك علاج ؛))) !!!

لكن في رأي آخر ومخالف تماما ...
بقلك لو ما فرحت أصلا، راجع إيمانك !!!! ؛)

وَيَوْمَئِذٍ يَفْرَحُ الْمُؤْمِنُونَ بِنَصْرِ اللَّه!

#ARK

اليوم بحكي لصاحبي بعد صلاة الجمعة:
حاسس إنه أهل غزة صعبوا حياتنا !

يعني جد إحنا شو عملنا لنستاهل الجنة؟ شو قدمنا وضحينا مقارنة فيهم ؟؟

جاوبني جواب غريب كنّا نحكيه ونتداوله أيام الجامعة، قلي:

أهل غزة رفعوا الأفاريج !!!

#ARK