Камчыбек Ташиев УКМК жаңы имаратка көчүп жатканын билдирди

Улуттук коопсуздук комитетинин (УКМК) төрагасы Камчыбек Ташиев атайын кызмат жаңы имаратка көчүп жатканын айтты. Ал бул тууралуу 31-майда “Регион” телеканалына курган маегинде билдирди.

Анда азыркы 1982-жылы курулган имарат тарыхый жай болгонун, жаңысы мындан бир канча эсе чоң экенин билдирди.

Убагында өлкө башчылары камалган учурлар да болгонуна токтолуп, жаңы имаратта андай окуялар болбосуна үмүт кылды.
Ташиев эски имаратты эмне кылуу керектигин эми президент Садыр Жапаров чечерин белгиледи.

Бишкектеги Чыңгыз Айтматов проспектисиндеги УКМКнын жаңы административдик имаратын куруу 2023-жылы 29-майда башталган.

Ал жерде ошол күнү атайын кызматтын Киберкоопсуздук боюнча координациялык борборунун жаңы имараты ачылып, пайдаланууга берилген.

https://www.azattyk.org/a/33430386.html

Садыр Жапаров коррупцияга каршы күрөштөн 200 млрд сом түшкөнүн билдирди

Президент Садыр Жапаров коррупцияга каршы күрөштүн алкагында өлкө казынасына 200 миллиард сомдон ашык акча, 1100дөн көп кыймылдуу жана кыймылсыз мүлк мамлекеттин карамагына өткөнүн билдирди.
Ал бул тууралуу 31-майда Бишкекте Улуттук коопсуздук комитетинин (УКМК) борбордук аппаратынын жаңы имаратынын ачылышында айтты.
Мунун алдында УКМКнын төрагасы Камчыбек Ташиев коррупцияга каршы күрөш уланып жатканын айткан. Жыл башында ал эки жылдын ичинде паракорчулукту толук жоюу ниети бар экенин билдирген.
https://www.azattyk.org/a/33430800.html

Жаңылыктар | 02.06.2025 | Украинанын дрондору ондогон орус учагын жок кылды

• Украинанын дрондору Орусияда аскердик аэродромдорго чабуул койду. Орусия муну теракт деп жарыялады. Эксперттер ондогон учактын жок кылынышын - орус авиациясынын башына түшкөн каран түн катары сыпаттап жатышат.
• Орусияда “Мекендештер” уюмун жетектеген Нура Курманбекова орус жарандыгынан ажыратылды. Анын жарандыгын алып, өлкөгө кирүүгө тыюу салынышына эмне себеп болду?
• Президент коррупцияга каршы күрөштөн 200 млрд сом түшкөнүн билдирди. Жемкорлордон өндүрүлгөн каражаттардын тагдыры жана зыяндын ордун толтургандарды жазадан бошотууга байланыштуу кайчы пикирлер арбын. https://youtu.be/unyiK89cDyU

Сот Атамбаевге 11,6 жыл чегерди, үч киши сот залынан камакка алынды

Бүгүн 3-июнда Бишкектин Биринчи май райондук сотунда мурдагы президент Алмазбек Атамбаевге жана бир нече кишиге каршы козголгон айрым кылмыш иштери боюнча өкүм чыкты.

Атамбаевге 11 жыл 6 айга камоо, мамлекеттик сыйлыктарынан ажыратуу, мүлкүн мамлекетке алуу түрүндөгү жаза чегерилди.

Мурдагы вице-премьер-министр, эл аралык издөө жарыяланган Аскарбек Шадиевге 15 жыл 6 ай берилди. Анын да мүлкү мамлекеттин пайдасына чегерилери белгиленди.

Атамбаевдин тушунда президенттик аппараттын башчысы болуп турган Фарид Ниязовду, Жогорку Кеңештин мурдагы депутаттары Равшан Жээнбековду 7 жыл 8 айдан жана Ирина Карамушкинаны 7 жыл 6 айга эркинен ажыратып, сот залынан камакка алуу өкүмү жарыяланды. Атамбаевдин тарапташы Фархад Баабиевге 5 жыл 6 ай чегерилди.

Канат Сагымбаев, Асель Кодуранова, Кундуз Жолдубаева, Мээрбек Мискенбаев, Канат Осмоналиев, Рысбек Карыпбек уулу, Нооруз Капарбек уулу, Марат Шаменов, Амангелди Какебаев 3-5 жылдык пробациялык көзөмөл түрүндөгү жаза алышты.

Калган айыпталуучуларга "мөөнөтү өттү" деген негизде жаза чегерилген жок. Толук окуңуз: ➡️ https://smarturl.click/20wkD

Айзиректин өлтүрүлүшү тууралуу талаштуу пост жазган блогердин агасы дагы сурак берди

Ошто бүтүрүүчүлөрдүн 20 жылдык кечесине баргандан кийин күйөөсү атып өлтүргөн Айзирек аттуу келин тууралуу талаштуу пост жазган блогер Айбек Улановдун байкеси дагы милицияда сурак берди. Бул тууралуу адвокат Шердор Абдыкапаров билдирди. Анын алдында адвокат Улановдун жоопко тартылышын талап кылып кол топтоп жатышканын, бирок блогердин өзүн милицияда иштейм деп тааныштырган агасы чалып аны опузалаганын айтып чыккан. Абдыкапаров анын кайрылуусунан кийин Улановдун агасы да милицияга жеткирилгенин билдирдип, колуна кишен салынып, камуфляжчан адамдардын коштоосунда турган адамдын видеосун жарыялады.

Бишкек шаардык ички иштер башкы башкармалыгы азырынча комментарий бере элек. https://www.azattyk.org/a/33433514.html

Садыр Жапаров Бакиевди Кыргызстанга алып келүүгө кызыкдар эместигин айтты

Президент Садыр Жапаров "Кабар" маалымат агенттигиндеги 4-июндагы маегинде мурдагы президент Курманбек Бакиевди Кыргызстанга кайтаруу тууралуу сөздөргө дагы жооп берди. Ал журналисттин мурдагы президент "Алмазбек Атамбаевдин баласы Кадыр Атамбаевдин Кой-Таш окуясына байланыштуу сот чечимин Бакиевди Кыргызстанга алып келүү үчүн соодалашууга пайдаланат”, - деп айтканы тууралуу суроосуна жооп берип жатып, Бакиевди алып келип соттоо деле кыйын болорун белгиледи. "Бакиевди алып келүүгө чынымды айтсам, мен кызыкдар эмесмин. Тескерисинче, өздөрү кызыкдар болуш керек эле. 2010-жылдан бери "Бакиевди алып келели десек, беларус тарап бербей жатат" деп элди алдап келишпеди беле. Ушул калптары элге ачыкталып калды. Биз сурасак, "макул берели, бирок ачык сот кылгыла" дешти. Ага да өздөрү каршы чыгып жатышпайбы. Соттун ачык болуусуна эч кимиси кызыкдар эмес. Эски жараны чукубай эле койбойсуңарбы деп атышат. Ошондуктан, Бакиевди алып келүү үчүн соодалашат деген сөз - жаш баланын сөзү. Алла күбө, Бакиевди алып келем деп бирөөлөр менен соодалашкыдай мен Бакиевге милдеттүү же карыз эмесмин. Мага эң негизгиси өлкөбүздө стабилдүүлүк болуп турса болду. Чындап эле эски жараны чукубай эле коелучу деп ойлодум. Ачык сот болгондо деле күнөөлүүлөрдү соттош кыйын болот. Анткени окуя 10 жылдан ашып, кылмыш ишинин мөөнөтү өтүп кетти",-деди Жапаров. Садыр Жапаров буга чейин Бакиевди Кыргызстанга кайтаруу тууралуу сүйлөшүү жүрүп жатканын, Беларус бийлиги эгер ал камалбаса өткөрүлүп берилерин билдирген. Быйыл апрель айында Кыргызстандын Конституциялык соту 2010-жылы бийликтен кулатылган Курманбек Бакиевдин адвокаты Икрамидин Айткуловдун өтүнүчүн канаатандырган. Анда сот кылмыш иши үчүн сыртынан соттолгон адам өз каалоосу менен же күч органдарынын аракетинин натыйжасында Кыргызстандын аймагына келгенден кийин соттук иши өзүнүн катышуусунда кайра каралышына реалдуу мүмкүнчүлүк алууга тийиш экени жазылган.
Бул чечим Бакиев Кыргызстанга келет деген сөздөрдү кайра жандандырган. Улуттук коопсуздук комитетинин төрагасы Камчыбек Ташиев мурдагы президент келсе камаларын эскерткен.

Толук окуңуз: ➡️ https://smarturl.click/mBbYO

Жаңылыктар | 04.06.2025 | Айзиректин өлүмү мыйзамсыз курал маселесин козгоду

- Айзиректин күйөөсү мылтыкты кайдан алган? Беш балалуу келиндин өлүмү үй-бүлө зомбулугу эле эмес, мыйзамсыз сакталган курал маселесин да козгоду.
- Эркин журналист Канышай Мамыркулова айыпты четке кагууда. Сотто анын соцтармактагы жазган постторуна жасалган экспертиза талаш-тартыш жаратты.
- Президент Садыр Жапаров мурдагы президент Алмазбек Атамбаевге мунапыс береби? Ал Атамбаевге чыккан сот өкүмү жана Бакиев жөнүндө үн катты.
- Украина Крым көпүрөсүнө чабуул койду. Орусиянын мамлекеттик агенттиктери көпүрө авариялык абалда деген билдирүүнү четке какты. https://youtu.be/a01uX4YpcsE

Күйөөсүнүн колунан каза болгон келиндин аброюна шек келтирген блогер кармалды

Кара-Кулжа районунда бүтүрүүчүлөрдүн 20 жылдык жолугушуусунан кийин күйөөсүнүн колунан каза болгон Айзиректин аброюна шек келтирген блогер, активист Айбек Уланов кармалды. Бул тууралуу 5-июнда “Азаттыкка” Бишкек шаардык ички иштер башкармалыгынын басма сөз кызматы билдирди.

Айбек Уланов аттуу блогер Айзирек өлтүрүлгөндөн кийин ага байланыштуу талаш-тартыштуу пост жазган. Социалдык тармактарда аны маркум келинди мазактоого, анын атып өлтүрүлгөнүн актоого байланыштуу айыптап, жоопко тартылышын талап кылгандар чыккан.

Шаардык милиция Айбек Улановду 30-майда суракка алып, анын билдирүүсүнө байланыштуу териштирүү башталганын билдирген. Уланов өзү ката кетиргенин мойнуна алып, маркумдун жакындарынан, коомчулуктан кечирим сураган жана мыйзамдарда каралган жазага тартылууга даяр экенин билдирген.

“Бирок, У.А. кийинчерээк кайрадан түз эфирге чыгып, коомчулукка терс таасирин тийгизген билдирүүлөрдү жарыялап, кырдаалды курчуткан. Тиешелүү экспертизалардын жыйынтыгы менен Кылмыш-жаза кодексинин 330-беренесине (Расалык, этностук, улуттук, диний же региондор аралык кастыкты (араздашууну) козутуу) ылайык кылмыш иши козголгон. Милиция кызматкерлери ыкчам-издөө иш-чараларын жүргүзүп, 1994-жылы туулган шектүү У.А. Чүй облусунун Аламүдүн районунун С.Чокморов айылынан кармалып, борбордук милициянын Тергөө кызматына жеткирилген. Ал убактылуу кармоочу жайга камакка алынды”, – деп айтылат милициянын маалыматында.

Шектүү Республикалык наркология жана психиатрия борборуна жеткирилген. Милициядан такташкандай, медициналык экспертизанын жыйынтыгында анын баңги зат колдонуудан кийинки мас абалында болгону аныкталган.

Бишкек шаардык ички иштер башкармалыгынын басма сөз кызматы башка блогерлерди жана социалдык тармактардын активдүү колдонуучуларын жарандардын ар-намысына, кадыр-баркына шек келтирген маалыматтарды чыгарбоого чакырып, анын жоопкерчилигин эскертти. https://www.azattyk.org/a/33434536.html

Бишкекте аялды күч менен алып кетүүгө аракет кылган адам кармалды

Бишкек шаарында аялды күч менен машинеге салып, алып кетүүгө аракет кылган адам кармалды. Бул тууралуу 5-июнда шаардык милициянын Ленин райондук бөлүмүнүн басма сөз кызматы кабарлады.

Маалыматта айтылгандай, окуя 4-июнь, саат 17:40 чамасында Бишкек шаарынын "Жал" кичи районундагы Тыналиев көчөсүндө болгон. Ж.У. аттуу жаран өзү тааныш кызды күч менен Honda Fit үлгүсүндөгү унаага салып алып кетүүгө аракет кылган. Унаа жүрүп бара жаткан учурда жабырлануучу секирип түшүп кеткен, жигит ага карабай кызды кайра унаага отурууга мажбурлаган.

Жолдон өтүп бараткан адамдардын кийлигишүүсү менен жабырлануучу качып кутулган. Шектүү жаран жабырлануучунун денесине залал келтирген.

Окуянын видеосу ушул эле күнү кечинде социалдык тармактардагы Black_list.kg баракчасына жарыяланып, коомчулукта резонанс жаратты. Анда машинеге күчтөп салынган кыз видео тартып жаткандарга кайрылып, милицияга чалып коюуну өтүнгөн. Видеодо кыз машинеден түшө качууга аракет кылып жатып жыгылып түшкөнү көрүнүп турат. https://www.azattyk.org/a/33434671.html

Айжигитовдун ордуна Муратбеков мандат алды

Шайлоо жана референдум өткөрүү боюнча борбордук комиссия (БШК) Султанбай Айжигитовдон мандат алынгандан кийин бош калган Жогорку Кеңештеги депутаттык орунду партиянын тизмесинде кийинки кезектеги Табылды Муратбековго өткөрүп берди. Чечим БШКнын 5-июндагы отурумунда кабыл алынды.
Депутатка белгиленген үлгүдөгү депутаттык күбөлүктү жана төш белгини комиссиянын төрагасы Тынчтык Шайназаров тапшырды.
Табылды Муратбеков 30 жашта. Баласагын атындагы Кыргыз улуттук университетин 2016-жылы аяктаган. 2020-2021-жылдары өкмөттүн Ысык-Көл облусундагы ыйгарым укуктуу өкүлүнүн жардамчысы болуп иштеген.

2021-жылкы парламенттик шайлоодо Табылды Муратбеков "Ыйман нуру" партиясында 5-орунда турган жана шайлоодо 2 миңдей добуш алган. Фракцияда жалпы 5 мандат бар.

67 жаштагы Султанбай Айжигитов быйыл 5-мартта Жогорку Кеңештин жыйынында кыргыз-тажик чек арасы боюнча билдирүү жасагандан кийин алгач “Ыйман нуру” фракциясынан чыгарылып, андан соң мандатынан ажыратылган. Ал мунун баарын “саясий куугунтук” деп атап келет.

https://smarturl.click/y65Md

Жаңылыктар | 05.06.2025 | Орусия: Мигранттын баласы мектепке кантип кирет?

• Күйөөсүнүн колунан каза болгон Айзиректин аброюна шек келтирген блогер, активист Айбек Уланов кармалды. Коомчулук маркум келинди мазактаган блогердин жоопко тартылышын талап кылууда.
• Эми дүйнөнүн 12 өлкөсүнүн жарандары Америкага кире албайт. Дональд Трамптын жарлыгын бир нече демократ саясатчылар кескин сындады.
• Мигранттардын балдары оруси тилин билбесе, мектепке кире албайт. Орусияда тил экзаменинин катаалдашы мекендештерди бушайман кылууда. https://youtu.be/TFKZimOAmu4

Кыргызстан Курман айтты майрамдоодо, президент жана муфтий куттуктоосун айтышты

Кыргызстанда бүгүн 6-июнда Курман айт майрамдалууда. Жума мечиттерде жана казыяттар уруксат берген мечиттерде эртең мененки саат 7:30да Айт намазы окулду, анын алдында Курман айттык баяндар айтылды.

Кыргызстан мусулмандарынын муфтийи Абдулазиз Закиров өз куттуктоосунда Курман айт "биримдик менен боорукердиктин, кайрымдуулук менен адилеттүүлүктүн майрамы экенин белгилеп, бул күнү курмандык чалынып, муктаждарга кол сунулуп, жүрөктөр бири-бирине жакындашарын" айтты. Кыргызстан көп улуттуу, көп конфессиялуу, ынтымактуу эл экенин белгилеген муфтий ушул ынтымакты ыйык аманаттай сактоого, элдин биримдиги, өлкөнүн өнүгүшү үчүн жоопкерчилик менен аракет кылууга чакырды.

Президент Садыр Жапаров акыркы жылдары Кыргызстанда улуттук-руханий баалуулуктарды өнүктүрүү жана жайылтуу, дин тутуу эркиндигин камсыздоо жаатында бир топ алгылыктуу иштер жүргүзүлүп жатканын белгиледи.


"Биз өлкөбүздөгү көп этностуу жана көп конфессиялуу элибиздин үмүт-тилегин ишке ашырууга, өлкөдөгү ар этностун маданиятын сактоого, Кыргызстанды “Ата Мекеним!” деп эсептеген ар бир кыргыз жаранынын бийик максаттарына жетүүсүнө өзгөчө көңүл бурабыз", - деди мамлекет башчы Курман айтка карата жолдогон куттуктоосунда.
https://www.azattyk.org/a/33435543.html

Басмачылык: Ташкент архивиндеги маалыматтар | "Куугунтук курмандыктары"

ХХ кылымдын 20-жылдарында Борбор Азияда кулач жайган басмачылык кыймыл тууралуу бүгүнкү күнгө чейин талаштуу пикирлер бар. Бул кыймыл тууралуу чындыкты канчалык айта алдык? Архив маалыматтар ачыкка чыктыбы? “Куугунтук курманыдктары” подкастында бул суроолорду чейрек кылымдан бери Өзбекстандын архивдерин казып, изилдеп жүргөн тарых илимдеринин кандидаты, Ош мамлекеттик университетинин доценти Талайбек Жаркынбаев менен талкуулайбыз. https://youtu.be/_02gCNHaXPs