#Murojaat

Chirchiq shahar prokurori Ummatbek Ablabekovning huquqbuzarlik va jinoyatchilikning oldini olish borasida shahar aholisiga yo‘llagan
MUROJAATI
 
Hurmatli Chirchiq shahar aholisi, aziz vatandoshlar!
 
Chirchiq shahrida jinoyatlarni jilovlash, xavfsiz muhitni yaratish, kriminogen vaziyatni yaxshilash borasida chora-tadbirlar amalga oshirilayotganligiga qaramasdan ayrim turdagi jinoyatlar hamon oshmoqda.
 

2025-yil 6 oyida Chirchiq shahar hududida sodir etilgan jami 406 ta jinoyatlarning 169tasi plastik kartochkadagi pul mablag‘larini o‘g‘irlash va firibgarlik bilan bog‘liq bo‘lib, o‘tgan yilning shu davriga nisbatan 160 taga oshganligi ayni haqiqatdir.

 
Plastik kartochkadagi pul mablag‘larini o‘g‘irlash va firibgarlik holatlari bo‘yicha jinoyat ishi qo‘zg‘atilib, jinoiy javobgarlikning muqarrarligi ta’minlanmoqda.
 
Ushbu turdagi jinoyatlardan jabrlanganlarning aksariyat qismi Chirchiq shahrida yashovchi ayollar va Oliy ta’lim muassasalarining talabalari hisoblanadi.

Shu bois, Siz aziz yurtoshlarimizga murojaat yo‘llashni lozim deb topdim!
 
Telegram messendjeridagi kanal va guruhlar pul mablag‘larini ko‘paytirib berish to‘g‘risida haqiqatga to‘g‘ri kelmaydigan e’lonlar tarqatmoqda.
 
Firibgarlik sxemalariga ishonchlilik berish uchun ayrim holatlarda sun’iy intelekt texnologiyasidan foydalangan holda taniqli shaxslar nomlaridan ham foydalanilmoqda.
 

O‘zbekiston Respublikasi Jinoyat kodeksining 168-moddasi 3-qismi “g” bandida axborot tizimidan, shu jumladan axborot texnologiyalaridan foydalanib, aldash yoki ishonchni suiiste’mol qilish yo‘li bilan o‘zganing mulkini yoki o‘zganing mulkiga bo‘lgan huquqni qo‘lga kiritganlik uchun jinoiy javobgarlik belgilangan va ushbu jinoiy harakatlar uchun besh yildan sakkiz yilgacha ozodlikdan mahrum qilish jazosi nazarda tutilgan.

 
Shuningdek, O‘zbekiston Respublikasi Jinoyat kodeksining 169-moddasi 3-qismi “b” bandida axborot tizimiga kirib yoki undan foydalanib, o‘zganing mol-mulkini yashirin ravishda talon-toroj qilganlik uchun ham jinoiy javobgarlik belgilangan bo‘lib, ushbu jinoiy harakatlar uchun besh yildan sakkiz yilgacha ozodlikdan mahrum qilish jazosi nazarda tutilgan.
 
Hurmatli fuqarolar quyidagilarni yodda tuting.
 
Soxta qo‘ng‘iroqlardan ogoh bo‘ling!
 
“O‘zini huquqni muhofaza qiluvchi organ yoki bank xodimi” deb tanishtirgan shaxslarning shubhali qo‘ng‘iroq va ovozli xabarlariga ishonib, firibgarlar tuzog‘iga tushib qolmang!
 

Kartangizni Pin-kodini yodda tuting va hech kimga aytmang, eng muhimi bunday ma’lumotlarni kartaning orqa tomonida yoki ko‘rinadigan joylarda saqlamang!  
Aniq manzilga va sub’yektga ega bo‘lmagan zararli xabar va havolalardan saqlaning!

 
“Hurmatli foydalanuvchi, Siz sovrin yutib oldingiz” - bunday so‘zlarga aslo ishonmang!
 

Kartangizni amal qilish muddatini ko‘rsatish va “SMS” orqali kelgan tasdiqlash kodini yuborish haqidagi so‘rovlarni bajarishda ehtiyot bo‘ling!
Mamlakatimizda axborot xavfsizligi masalasiga davlat siyosati darajasida e’tibor qaratilib, kiberjinoyatlikka qarshi kurashishning yangi yondashuvlari amaliyotga joriy qilinmoqda.

 
Shunday ekan, Hurmatli Chirchiq shahar fuqarolari firibgarlik, o‘g‘rilik va boshqa shu kabi jinoyatlar qurboniga aylanib qolmang, turli hil aldovlarga ishonmasligingizni so‘rab qolamiz.  

💬 Telegram 🌐 Facebook
🌐 Instagram 🌎 Web-site