ንዑስ ገጣሚያን🥱

120 viewsዮቶር ዘራማ, 04:15

💵ጢጦስና ቴክላ👑
የማይጨርሱ ከሆነ አይጀምሩ ከጨረሱ ያጋሩ!

በተለያዩ ምክንያቶች መጽሐፍት ከማንበብ ርቄ ነበርና ከረዥም ጊዜ በኋላ ሰሞኑን በድንገት የገዛሁትን አዜብ በርሄ ያዘጋጀችውን ‹‹ዝክረ ቅዱሳት አንስት ዘተዋህዶ›› የተሰኘውን ቅጽ 1 መጽሐፍ እያነበብኩ ነበር፡፡ ይሄንን መጽሐፍ ገና የመጀመሪያ ምዕራፎች ላይ ብሆንም ከመጀመሪያዎቹ ምዕራፎች የቅድስት ቴክላን ታርክ ሳነብ ታርኳ በጣም መሰጠኝና ካነበብኩ በኋላ በአእምሮዬ ሳመላልስ አንድ ነገር ትዝ አለኝ ‹‹ፍያታዊ ዘየማን/ጢጦስ›› ፡፡ ምን ያገናኛቸዋል ትሉኝ ይሆናል እርግጥ አይገናኙም ግን ለምን ትዝ እንዳለኝ ልንገራችሁ፡፡ የሁለቱንም ሰዎች የነበሩበትን ሕይወት ስንመለከት በጭራሽ የማይገናኝ ጫፍና ጫፍ ያለ ሲሆን አንድ የሚያደርጋቸው ጥሪያቸውን የተጠቀሙበት አጋጣሚ ነው፡፡ በሰው ልጅ ሕይወት ውስጥ የመጨረሻው የውርደት/የድቀት ኑሮ የሚባለው ሽፍትና/ውንብድና ሲሆን የመጨረሻ ከፍ ያለ/የተከበረ ኑሮ የሚባለው ደግሞ ባለጠግነት ነው፡፡ እነዚህን ሁለቱን ኑሮ ደግሞ የምንመለከተው በነዚህ ሁለቱ ሰዎች ነው፡፡ ጢጦስ ሀገርን ያሰለቸ፣ ይሄ ቀረው የማይባልለት ሽፍታ፣ ሰዎን ሁሉ ያስቸገረ የመጨረሻ ወንበዴ ሲሆን ቴክላ ደግሞ ከባዕለፀጋ ቤተሰብ የተገኘች ይሄን አጣሁ የማትል፣ በድሎት ያደገች፣ በተመረጠ ት/ቤት የተማረች፣ ምንም የማይወጣላት መልከ መልካም የነበረች ናት፡፡ በዕድሜም ካየን ጢጦስ በዘመነ ሥጋዌ/ክርስቶስ/ የነበረ ሲሆን ቴክላ ደግሞ በዘመነ ሐዋሪያት የነበረች ናት፡፡ እናም እነዚህን ሁለቱን ያገናኘሁበትን ምክንያት ስነግራችሁ ጢጦስ ለሦስት ሰዓት ያህል ከክርስቶስ ጋራ ቆይቶ ለድኅነት ያበቃውን ሃይማኖት ያገኘ ሲሆን ቴክላ ደግሞ ሐዋሪያው ቅዱስ ጰውሎስ ሲያስተምር በመስኮት ተምራ ከአንስት ሰማዕታት ሊቀ ሰማዕታት ለመባል የበቃች ናት፡፡ እስቲ ታርካቸውን ቀንጨብ አድርጌ ላስቃኛችሁ፡፡ ጢጦስ ከይሁዳ እስከ ሰማሪያ ከገሊላ እስከ ቂሳሪያ የታወቀ ሽፍታ ሲሆን ዳክሪስ የተባለ የራሱ ቢጤ ጓደኛ ነበረው በትውልድ ከቤተ እስራኤል የነበረና በእድሜ ከክርስቶስ ልደት ቀደም ብሎ የነበረና ክርስቶስ ተወልዶ በሄሮድስ ምክንያት ወደ ግብጽ ሲሰደድ በሽፍትነት ሕይወት ውስጥ የነበረ መሆኑን የወንጌላት ትርጓሜና ተዓምረ ኢየሱስ በሚነግሩን መረዳት እንችላለን፡፡ በነዚህ መጽሐፍት እንደተጻፈልን እመቤታቸን፣ ዮሴፍና ሰሎሜ ጌታችንን ይዘው ከገሊላ ተነስተው ወደ ግብጽ ሲሰደዱ ከአንድ በረሃ/ጫካ/ ሲደርሱ እነዚህ ሁለቱ ሽፍቶች ለስድስት ቀናት ያህል ሲፈልጓቸው ከርመው በሰባተኛው ቀን አግኝቷቸው ያላቸውን ልብስና ጫማ ቀምቷቸው ከሄዱ በኋላ በጢጦስ አሳሳቢነት የዘረፏቸውን ንብረት መልሶላቸዋል፡፡ ንብረት መመለሱ ብቻ ሳይሆን ጢጦስ ጌታችንን በትክሻው ተሸክሞት መንገድ እንደሸኘው፣ በመንገድም ሲሄድ ሰይፉ ተሰብሮበት ወደነበረበት እንደመለሰለትና ጢጦስም ይሄንን ተዓምር አይቶ ከነቢያት አንዱ ይሆናል ቢሎ እንደተገረመ ይነገርለታል፡፡ ይሄ ብቻ ሳይሆን ስለማሪያም እንተእፍረት/ባለሽቶዋ ማሪያም/ አንድ መምህር በጌታችን እግር ላይ ያፈሰሰችው ባለ 300 ዲናር አልባስጥሮስ የተባለ ውዱ ሽቶ ከየትመጣነት ሲናገር ጢጦስ ክርስቶስን ተሸክሞት መንገድ ሸኝቶት ከተመለሰ በኋላ ክርስቶስን ተሸክሞበት የነበረ ትከሻ መዓዛው ቢያውደው ያንን ላቦት ጨምቆ በቢልቃት አኑሮት እንደነበረና በቤተመንግሥት ውስጥ ብቻ የሚገኝ የነበረና ኋላ ለክርስቶስ ለራሱ የቀረበ እንደሆነ ሰምቼው ነበር፡፡ በሉቃስ 23፣42 ላይ ‹‹ዛሬ ከኔ ጋር በገነት ትኖራለህ›› የተባለው ቃልም የተገኘው በዚህን ጊዜ የተሰጠው ቃልኪዳን እንደሆነ ይነገርለታል፡፡ ቴክላ ደግሞ በተናሷ እሲያ ኒቆምዲያ በሚትባል ከተማ ከአህዛብ ወገን ተወልዳ ያደገች ሲትሆን በውበት፣ በዝና፣ በሃብት ይሄ ቀረሽ የማትባልና በሁሉም ዘንድ ተወዳጅና ተፈላጊ ወጣት ነበረች፡፡ በከተማው አለ ለሚባል ሰውም ለጋብቻ ተሰጥታ ነበር፡፡ ነገር ግን የቴክላን ሕይወት የቀየረው አንድ ነገር ተፈጠረ ይሄውም ሐዋሪያው ቅዱስ ጳውሎስ በ45 ዓ.ም የመጀመሪያውን ጉዞ ወደ ታናሷ ኢሲያ ባደረገ ጊዜ ኢቆንያ ውስጥ ስፋሮስ በተባለ ቤት ሲያስተምር ቴክላ በወላጆችዋ ቤት ውስጥ ሆና በመስኮት በኩል ተደብቃ የሐዋሪያውን ቅዱስ ጳውሎስ ትምህርት ትማር ነበር፡፡ በዚህ በመስኮት ትምህርት ተለውጣ ለጋብቻ የገባችውን ቃል አፍርሳ በድንግልና ለመኖር በመወሰን ሐዋሪያ ቅዱስ ጳውሎስን ተከተለች ይሄን በማድረጓ ከወላጅ እናቷ ሳይቀር ለሌሎች ሴቶች መቀጣጫ እንዲትሆን በቁሟ እንዲትቃጠል ተደርጋለች ግን እግዚአብሔር ከሰማይ ዶፍ አዝንቦ አትርፏታል፡፡ ራቁቷን ለአናብስት ቢትሰጥ ከሰማይ እሳት ከበባት፣ በግንጥና በእባብ ጉድጓድ ቢትጣል እግዚአብሔር በተዓምር አወጣት፣ በሶሪያ ሳለች ወንጌልን በመስበኳ ሕሙማንን በመፈወሷ ሰዎች ሊገሏት ቢያሳድዷት ተራራ ለሁለት ተከፍሎ አሻግሯታል (ያ ቦታ እስካሁን የቅድስት ቴክላ መሿለኪያ ተብሎ አለ) ብዙ ገቢረ ተዓምራት በማድረጓም የሕሙማን እናት እየተባለችም ትጠራለችና ገነ በመጀመሪያዎቹ የሐዋሪያት ዘመን ራሷን የክርስቶስ ሙሽራ አድርጋ በማጨት ስለመንግሥተ ሰማያት ስትል በቅንዓተ ክርስትና ከሀገር ወደ ሀገር እየተሰደደች በደረሰችበት ወንጌል እየሰበከች ብዙ ክርስቲያንን ማፍራት ችላለች ብዙ ተጋድሎንም አድርጋለች፡፡ በቤተክርስቲያናችን በመጽሐፈ ስንኪሳር ሃምሌ 25 ትታሰባለች፡፡ እናም ለዚህ ሁሉ ክብር ያበቃት ምንድነው ብዬ ብጠይቅ መልሱ በመስኮት የተማረችው የሐዋሪያው ቅዱስ ጳውሎስ ትምህርት ነው፡፡ ይሄንኑ ጥያቄ ደግሞ ራሴን ስጠይቅ ለስንት ዘመን በመስኮት ያይደለ በበር በኩል ገብቼ፣ በተደላደለ ወንበር ተቀምጬ የቅዱስ ጳውሎስን ትምህረት ብቻ ያይደለ የራሱ የባለቤቱን የክርስቶስን ትምህርት በማቴዎስን ወንጌል፣ በዮሐንስን ወንጌል፣ … እያልኩ ተማርኩ.. ግን የትስደረስኩ? ስል የትም ያልደረስኩ፣ እንደ ወንበዴው ጢጦስ በመቅደሱ ቆሜ ‹‹አቤቱ በመንግስትህ በመጣህ ጊዜ አስበኝ›› ለማለት እንኳ ያልበቃሁ፤ ጭራሹኑ በመቅደሱ ሞቼ ቀስቃሽ የሚፈልግ ሆኜ ራሴን አገኘሁ፡፡ ይሄንኑ ጥያቄ ይሄንን ለምታነበው ለንተ/ላንቺ ላቅርብ፡፡ ጢጦስ ሽፍታ ነበር የዳዊትን መዝሙር አለነበበም፣ የኢሳይያስን ትንቢት አልሰማም ፣ የነቢያት ትንቢት አልደረሰውም ነገር ግን ለሦስት ሰዓት ያህል ብቻ ከክርስቶስ ጋር ቆይቶ ከአዳም ቀድሞ ገነት የምታስገባውን ሃይማኖት ያዘ፤ አንተስ ስንት ዘመን ከክርስቶስ ጋር ቆየህ? ክርስቶስን መቼ አግኝቼው እንዳትለኝ ከፍያታዊ ዘየማን ጎን በመስቀል የነበረ ክርስቶስ ዛሬም በየቀኑ በቤተመቅደስ ከአጠገብህ አለ አታስተውለው ይሆናል እንጂ አንተም በየቀኑ እንደሱ ‹‹ተዘከረነ እግዝኦ..›› እያልክ በየቀኑ ትጮሃለክ .. እሱስ አምላክነቱ ቢገባው አምኖ ጮሀ…. አንተ ግን በእውነት ገብቶህና አምነህ ነው የምትጮሀው ወይስ እንደኔ የልማድ ሆኖብህ ነው? ይሀው እኔ ስንት ዘመን ጮኩ ግን የልማድ እንጂ በምግባር የተገለጠ ስላልሆነ ወደ ውጪ እንጂ ወደ ውስጥ ያስገባሁት የለም::

201 viewsዮቶር ዘራማ, edited 20:43