#هذا_الصباح ❤️


قبل فترة وقبل ما أخلص جامعتي كمان إشتغلت ترينغ في شركة وكان شغلي مساعد إداري

المهم إن في الشركة دي كان شغال المحاسب ولد
والشغل كان مريح جداً وهو كان زول لطيف

ففي يوم قال لي يا إسراء تعالي أدربك على نظام سستم المحاسبة ما دام كدا كدا الشغل خفيف!

قلت ليه طوالي وكان فعلياً بدرب فيني

المهم إن حاليا وقبل كم يوم لما قدمت لوظيفة سألوني بتعرفي تشتغلي على نظام المحاسبة بعين قوية قلت أيوة!

وإتذكرتوا ودعيت ليهو جداً
ما لأنو عندي إحتمال أكسب وظيفة لا

اللحظة القلت فيها أيوة دي بالذات حسيت فيها بفخر رهيب!

وإن في يوم من الأيام أحس إنو هو كان إنسان ما عندو أي هدف من الحاجة دي غير يزيد لي معرفتي في الحياة!

انا صراحة ما متواصلة معاهو ابداً ولا عارفة شنو وضعوا حالياً بس أتمنى إنها تكون دعوة في وقتها.

المفيد من القصة دي
إن في ناس كتيرة بتكون عابرة أو هي عبارة عن مرحلة معينة في حياتك مرحلتهم دي فيها فايدة ليك لو إنت ما أخدتها حتندم عليها قدام!

وعشان كدا كل وحدة بتجي تستشيرني في اي موضوع بقول ليها أخدي الفايدة بس فتشيها بتلقيها

وإن بالرغم من إن الحياة كترت فيها النفوس السيئة
إلا إنو ربنا برسل ليك نفوس طيبة ما عشان إنت رهيب لا

عشان إنت ما تبقى ضمن قائمة النفوس السيئة

بديك إنذارات حلوة والله
الإنسان الأناني ربنا ما رسلوا ليك عشان يضرك
رسلوا ليك عشان إنت ما تبقى أناني

وعلى المثال دا قيس باقي الصفات!

الحياة حلوة لو عرفت تاخد جانبها الحلو

عشان على الأقل تكون إنت نسخة طيبة
بعد سنين طِوال لو جات في البال توصلك هبوب دعوة طيبة!

لأنو زي ما بقولوا الشينة بتقعد كمان الحِلو بقعد

إتخيلوا معاي إنو الإنسان دا هو حالياً ولا عندو أدنى فكرة عن إنو دعيت ليه!

بس سيرتوا الطيبة ونواياهُ الطيبة خلتني أتذكروا وأحشروا في دعوتي!

قبل فترة لما عملنا حملة النساء للنساء
قادرة أتذكر بالحرف لما قلت لي ملاذ ما مهم نكسب
المهم إنو تجينا دعوات حتى لو بعد زمن!

وفعلياً فخورين بإننا قدرنا نعمل منها كم حملة ندعم بيها كم بنوتة يفتحوا مشاريع خاصة في ظل الظروف دي!

المهم تكون نيتك إنك تكون نسمة خفيفة
مرت ولا ضرت!

لأنو الضرر مهما طالت السنين ما بتنسي ودعواتوا بتتجدد
إختار إنو تجديد دعواتك تكون في مصلحة صحيفتك ما ضدها.

وأتمنى ودا هدفي اصلاً من الحياة إنو قدر ما أقدر أقدم فايدة أقدمها من غير تردد خليهُ هدفك إنت كمان حتلقى فوائد كتيرة جاياك وداقة بابك حتى من الناس السيئة!

كل ما أشوف إنسان قادر يقدم خدمة مهما كانت بسيطة أو كبيرة بيكبر في نظري جداً
فساعدوا على قدر ما تقدروا وخلوها كروت ليكم تنفعكم في أوقات محتاجين ليها

على قدر ما تقدر كتر كروت المساعدة ..عشان ربنا ما بنساها
بختها ليك في يوم تحتاج ليهم❤️.


#إسراء_الخليفة.

#تحبو_نتونس؟❤️

مريضة خليجية معاها خطيبها .. جارحة اصبعا .. و انا بخيط في الأصبع المجروح و الخطيب موجود

انا شفت كمية حب في الربع ساعة دي ..

تكفيني انا زاتي كم شهر لي قدام ..

نحن ما عايشين !!

🤣🤣🤣

بداها لي من أنا السبب ..

كيييف يا عشاي السبب

قال لي هي اتجرحت في الملاهي و هي ما كانت عايزة تمشي و انا سقتها الملاهي عشان تتبسط و تغير جو ما قايلة بتتجرح

قالها و اتخنق بالعبرة

انا قلت يموت علي

هي يا ولدي لي الارادة و القسمة

نحن كمان قسمتنا خلتنا نعيش في الملاهي لاااااااايف .. يوماتي نحنا بشيلونا فوووووق و دل يدونا الواااطة

و هي تقوليه .. ما صار شي .. مكتوب

و هو يقول انا افديك

كمية فداية حضرتها الليلة.. تكفي قبيلة

و شغالة ليه خلاص نفسيتي مرة مو حلوة .. نرجع ديرتنا

و انا زي ماوكلي في الادغال .. اصلا ما من الصنف دة

الابرة دي تقول بتدخل في كبدي

هو يقول ليها اللي تامريين عليه

و يديها خنقة

ياهو الببكي

طول عمري بعرف البشر بتمرض ما قايلة الغزلان بتجيها حاجة

معقول لكن

و يشيل و يقول لي .. الجرح بيترك اثر

طبعا موقفي صعب قدام الأمم المتحدة

ما قادرة اصارحه .. خفته يقع

قالت ليه ما عليك حتى لو ترك اثر بنعالجه بالليزر

شوف نحن بعيدين كيف !

قلت ليها لازم تاخدي ابرة tetanus
toxoid

شبا لي في حلقي .. ضروري يا دكتورة تكفيييين

تكفا انت دة نحن مكفيين لينا تلاتين سنة ! دايرين ننقلب على وشنا ما قادرين

يعني بتتألم تاني ..

معليش قلت ليه للضرورة احكام ..

يسألني الله يوم المشهد العظيم

الابرة دي هو برك على ركبه عشان يدوها الابرة

اتذكرت يوم محمومة حمتي اربعين ضربت لي زول قلت اعيش دور البت

شبكني ليك هسي الحمى بتسوي ليك شنو و هن الدكاترة بمرضو و ما تعالجي روحك ساي

بلعت حسراتي و سكت قلت ليه خير زاد لي الحمة و الرجفة .. يزيد في الوجع شحدت ربي عليه..

عان ناس تكفين ديل ..

ودعتهن .. يشيلو و يدعو لي .. دكتورة عسى عمرج طويل

الغزال قالت لي .. انت سودانية؟؟

- مرّرررة احب السودانيين.

الله يخليك .. نحن زاتنا بنحبك .. لكن مارين بي أزمة هسي .. نفضى نتفرغ للحب ده

لأنه هسي نحن روحنا ما بنحبها .. !

بعيديييين نحن بعيدييين شديد

نحن يا قول الجوخ .. ما جينا لسة ..!

الله في !😔

-
" اللهم ألَّا يُصاب قلبي بوهن، أو يكسِر كرامتي طلبًا، أو أُشفِق على نفسي بعد ركضٍ طويل في طريقٍ خاطيء؛ اللهُم الصواب في كُل قرار، ونور البصيرة لكُل حاجة، والهُدى الذى لا يمسَّه ظُلمة ولا يعقبه أيّ ندم❤️ ."

اللهم صل وسلم على نبينا محمد وعلى اله وصحبه اجمعين

#هذا_الصباح❤️


- في مرة قرأت نقاش لواحدة على الانستا بتتساءل عن ..

انه ليه دايمًا لازم نحس بمشاعر ما حقتنا، ونعتمد أجوبة ما حقتنا، بس عشان المجتمع كله بقول دا وعشان
دا السائد المعروف!

اي زول تسأله من الشغل، القراية، اي شي في تفاصيل الحياة، بكون رده سلبي
وفيه نوع من عدم الرضا!
وانه تعبان وزهجان من الحالة دي!
في حين قالت انه هي عن نفسها لمن شخص يسالها بتقول الحمد لله وانها مبسوطة برغم التعب!
ولاحظت انه ردود الناس بعد كلامها طوالي بتتغير!
بدل ما كانت بتشكي من الشغل والتعب بقت ردودهم إيجابية!
وحتى لو إنت ما بتحب تحكي تفاصيل حياتك
لكن على الأقل "الحمد لله" اللي بتطلع منك تكون راضية،
لانه مع الوقت، لمن تاخذي شعور ما حقك، ببقى
بعد شوية جزء منك، وبدل ما كنت مستمتعة بالرحلة وشاكرة ربنا على نعمة الشغل والقراية وغيره برغم التعب، هـتبقى ساخطة وزهجانة وما راضية بالنعمة وقد تسلب منك في لحظة!

- وأنا بقرأ الكلام حسيت انه ما وقع لي
وانه فيه شي من المثالية..
لحد أمس سألتني بنوتة في الخاص نفس
السؤال عن نفس الموضوع!
ليه الجيل دا بقى بيأخذ الحزن أكبر من
حجمه؟
اي موقف داير يقيف فيه، وأي كلمة داير يقيف ويحزن عليها، بالرغم انه حقيقي
في مواقف ما بتستاهل.
وأنا هنا ما بتكلم أبدًا عن الحزن الحقيقي تجاه أمر جلل ولا التعب الحقيقي..
إنما عن الاستهلاك المفرط لشعور الحزن
والكل عاوز يزعل ويكتئب وينعزل..
بقى عندنا جيل بستهلك كلمات الحزن والمشاعر السلبية بافراط، واي شي ما راضي عنه، وما عاوزين اي ذرة تعب، وأي حاجة في الدنيا متعبة بتلقى الواحد طوالي متذمر وزهجان!
في حين اساس الدنيا هو الكدر والتعب ولو ما كانت كده ما كانت بقت دنيا، وحدها الخالية منه هي الجنة!

- أقرب مثال لينا هم ناس عزة..
هم بشر وبزعلوا وبتألموا زي زيك..
يوم شفنا واحد فيهم قال داير ينعزل ولا أصابه حزن شديد يوصله للاكتئاب؟
وأقرب من دا هي دكتورة آلاء النجار، الطبيبة، الأم اللي فقدت أولادها كلهم دفعة واحدة!
ما اعتقد في حزن أكبر من دا، ولا شعور مؤلم أكتر من دا، وأنا متأكدة انها حزينة شديد، لكنها مؤمنة، والمؤمن القوي لا تعطله الأحزان عن العمل، والمؤمن يعلم أن كل شي أعطاه الله له هو لله، ياخذه متى شاء ويعطي متى شاء..
هل تنازع الله في ملكه؟ فإنه له وإنا إليه راجعون.

- خلاصة القول..
إن الميديا والبيئة المحيطة والأفكار الغربية وما يفرضونه على هذا الجيل كله حتى لا تقوى شوكته، لأنك كلما حزنت واشتغلت بالدنيا أكتر، كلما كنت مستهلك أكتر، وكلما بعدت عن الغايات العظمى والأهداف العالية، وكلما بعدت عن الدين، وجدوا ثغرًا يدخلون منه إليك.
نتعلم انه ما أي موقف نقيف فيه، ونتعلم من تجاربنا الفاتت وما مر علينا من أشخاص ومواقف، ما أي شي يستاهل حزنك واستهلاكك لمشاعرك، لمن تتجاوز ما عشان الطرف الثاني، عشان نفسك، وإنو لو وقفت في كل صغيرة وكبيرة عمرك كله هـيضيع وإنت ما أنجزت شي، دي مهمة صعبة عارفة، بس المحاولة شرف لازم.
أعطي كل حاجة شعورها الحقيقي اللي إنت بتحس فيه، واعلم أن كل ما أنت فيه نعمة من الله لن تحصي ثناءها وشكرها ما حييت، والتعب اساس الدنيا، ماف مهرب منه، بدل التذمر منه، أنظر للجانب الممتلئ من الكأس، نعمة العمل والقراية وعدم الفراغ والسعي في الأرض، وإنك لو
نويت انها كله لله جاءتك منها الأجور والحسنات.

- أخيرًا..
لا مثالية في تجاوزك المواقف، في تقييمك الصحيح لمشاعرك، ما يحتاج أكثر وما يحتاج أقل، في وعيك وإدراكك، في تقديرك للنعم، في الرضا عن حالك واحوالك، في السعي والتعب، إن كانت كلها لله، فقد حزت الدنيا والآخرة،
وأن كل شيء في هذه الدنيا لله، يأخذه متى شاء ويعطي متى شاء، فهل تنازع الله في ملكه؟❤️.


#زكية_عاطف

تقرأ اقتباسًا ما، فيقبض قلبك، أنت لا تصدق أن أحدهم كان يشعر بذات ما تشعر به، أن أحدهم استطاع أن يكتب قلبك العميق في سطرين، وأن ثمة أحد ما يشاركك دهشاتك الصغيرة وتفاصيلك الخفية🤎.

هذه القناة أرشيف خاص لبعض الخواطر، جزء من كتاباتي، وإقتباسات مُنسقة مع ما أجمعه من لقطات مما أشاهده💻 ✨

فرصة ذهبية لاااا تفوت😍✨

تم البدء حالياً في رفع بعض المحاضرات التنويرية المجانية من كورس #يلا_نزبط_الأوبس.

على القناة الخاصة 👇🏻

" بصمة طبيبة" 🩷

على الرابط:

https://www.tg-me.com/tanzeelmedicine/11


سااارع بالإشتراك واستمتع بالتجربة 😌

وانتظر بقية الفعاليات القادمة💌🎉

مساء الخير🌷
#تحبو_نتونس؟!


للبنات ..♥️

- ما تقيفي في نقطة وحدة وتركزي عليها في كل حاجة..

- وما تدقي الباب الما إتفتح ليك مرتين.

- والدعوات ما تخليها تجاه حاجة معينة

- ما تقرري تشتغلي حاجة معينة وتقيفي عليها ختي معاها خيار تاني وخيارين وتلاتة وفي الأخر حتشيليهم كلهم مع بعض!

- ما تحددي حاجة وتعتبري انو خلاص بعافر قصادها بس حددي حاجتك وإستخدمي حاجات غيرها توصلك ليها.

عندي صحبتي كانت منى عينها تشتغل في الكويت فجأة سافرت السعودية وإشتغلت سألتها طيب والكويت ؟
"قالت لي بلم في قروش من شغلي عشان أقدر أمشي الكويت أشترت عقد عمل وأسي شغالة في الكويت الحمدلله."

فـ نصيحتي ليك ما تقيفي تجاه حاجة معينة منتظراها تجي هي وبس جاهدي عليها بكل خيار يتوفر قدامك وإستعملي حاجات كتيرة عشان ما تنجزي حاجة وحدة تكوني شملتي معاك كم حاجة في نفس الوقت.

ولما قلبك يكون عاوز يعمل حاجة أعمليها عشان لو مشيتي تمشي من غير ندم أعملي كل حاجة وكل خطوة عشان نفسك!

وأول ما تكوني حقيقية بتقدمي كل حاجة بطبيعتك حتلقي القاعدة دي ساعدتك في كل حاجة حولك وبتقابلي الحقيقة في كل مكان.

إشتغلي ما عشان زي ما بقولوا لو طلع راجلك كعب تضمني مستقبلك
بتشتغلي عشان نفسك تطوريها ، تنظميها ، تنفعيهاوتختاري ليها راجل ينفعها.

وعشان اصلاً رؤية النساء الناجحات منظر يسر الخاطر
أبقي منهن!♥️

وما تحجمي جزء من حياتك على حاجة محددة خلي كل حاجة مفتوحة نسبة لأقدار ربنا اللي ممكن ما تتوافق مع تحجيمكش

ونحن موجودين عشان هدف كل ما هدفك يفشل تختاري هدف تاني ما عايشة انتي ساي من غير هدف
إختاري هدفك وأصنعي ليهو طرق كتيرة وأي فرصة تتاح قدامك فيها إحتمال واحد في المية توصلك لهدفك إستخدميها.

وأنشلي نفسك كدا وختيها في محيط البزنس الونسة والضحك ملحوقة.

وقربي من ربنا عشان هو وكيلك ونصيرك
ونقي الناس الحولك البِرضو ربنا ما تنقي إنسان ربنا ما راضي عنو عشان حيغطس حجرك!

وأهم حاجة ما تقيفي في مكانك ابداً ابداً إتحركي وإتحركي عشرة خطوات ما خطوة.

وقدر ما تنجحي أسعي إنك تنجحي أكتر وأكتر عشان النجاح سلسلة ما عندها أخر ما تقيفي في مكان واحد أطمعي إنك دايماً تمشي لي قدام.

وخلي عندك قاعدة إنو بعد التعب برتاح وأصلاً حترتاحي شوفي كل حاجة توصلك للراحة وأمشي فيها العمر بنعاش مرة وحدة نقعد نقضيها فشلت وبكا شهرين ولا انسان طلع كعب وبكا تاني شهرين لشنوو؟

واتجاوزي كتير
او عودي روحك على التجاوز
اتجاوزي الكلام ، النقاشات الهايفة ، سفاسف المواضيع ، صُحبة بتجيب مشاكل ، علاقات ما منها نكهة

واعرفي انو اي موضوع بخص شخص تاني أخد منك فترة اكتر من ساعة
ف الموضوع دا فيهو خسارة ليك
الدنيا ما فيها زمن كتير عشان تضيعي ساعات على مهاترات ودراما

ف دا ما يشتغل وينجز دا يحب نفسو أول حاجة لأنو الطريق دا عاوز قوة وحب ذات كبير تبكي وانتي بتشتغلي يعني شنو وتنسي البكا بعد شوية وتكوني انجزتي.

اتواصلي مع نفسك كل فترة اتأكدي من إنها ماشة صح او محتاجة تصحيح مسار
وأنفعيها الى ان تبقي انسان ما فاضي لي فتافيت المواضيع
وفي الفرغة ما يلقوك وفي الشينة ما يذكروك

وادوار الضحية ليها ناسها ما تبقي منهم.

ومنظر الناس اللي بيقولوا ضربوني ، نبزوني ، شاكلوني
منظر ما حلو ابداً
واصلاً اصلاً الموضوع دا ممكن يلمس نقطة الستر ونحن كلنا يا الله مستورين!

والايام دي مركز في مخي سؤال فادني شديد ونفعني جداً
" شبابك فيما أفنيتهُ "
اسألوا نفسكم كل يوم نفس السؤال كأنوا أخر يوم ليكم
حتتبسطوا بالاجابة!

وعلى الأقل نحن لسة عندنا خيار إننا نعدل الإجابة

وشكراً♥️ .


#إسراء_الخليفة.
@fadfadah98

سبحان الله !

حال الإنسان موضع تأمل دايماً

شوفو أبسط مثال

لم بتتحدّف علينا المصايب .. بنهلع ، بنحزن ، بنخاف ونشيل هم كيف حنعدي منها ؟

وممكن حتى ما نشوف انها حتعدي

مع انه ما أول كارثة!
ولا حتكون الأخيرة

بس كل مرة بنعيشها كأول مرة

كانه بيحصل لينا refresh مش updated.

بالتدريج نبدأ نفقد المنطق
ونبطل نتصبّر
ويقلّ بصيص الأمل

بل ممكن نفقده خالص !
قصاد حجم المصيبة او المأساة الكارثية وغير المُتوقعة .

فـ نتخبط في الظلام

نتوه

ونغرق في دوامة اليأس الشيطانية -لانها من فعل الشيطان أصلاً-

ورغم ده

يجينا المَدد والعون من فوق ..

فنصبر ، ونعدي ..

زي كل مرة

شحذ إلهي عجيب لقدرات الصبر عندنا

خُطط إلهية مُحكمة لا تشوبها شائبة

بتخطيط مسبق وحكمة لا مثيل لها

مصيبة ورا مصيبة
ضيق ورا ضيق

ويكاد أحياناً ما تكون في أي فترات إستراحة ، او قابات للتنفيس

من ضيق لضيق لمّ الواحد يحسّ انه حيفضل كدة طول عمره

" طوول عمره؟! "

ههه .. نظرتنا ضيقة شديد صح ؟!

والله دايما كدة .

من أقل موية بنسيح .

ما بنعرف نعاين للصورة كاملة

بنفتكر انه كِبرنا ،نضجنا و وعِينا ..

بس لا ، لسا ضعيفين.

ودايما موجهين نظرتنا لحتة محدودة

عشان كدة كان الربّ الحليم -ربنا- دايماً حاضر

بيمدّنا بعونه ومدّده ، وبيخلق العسر على مقاسنا تماماً .

بيزيد شدته صح كل ليفل
لازم يحصل upgrading

بس بيتناسب دايماً مع حجم قدرتنا على الإحتمال.
definitely!

بلا شك .

لانه ربنا المؤمنين بيهو ؟
حليييم وحكيم لا يمكن يوجهّنا لهلاكنا .

كله دايما لخير ، لمصلحتنا .

احنا دوناً عن كل الخلائق.. مُخيرين

بإرادتنا الحرة نختار نؤمن ونصدق بأنه دايماً في أمل ، مهما إتعسرت.

وبإرادتنا بنفقد الأمل ، ونجزع ..

او بنفتكر اننا فقدناه ، لكن يظل بلا شك في أشدّ أوقات يأسنا خيط ضئيل ،رفيع ،غير مرئي من الأمل .. بربنا

والخيط ده كان سبب نجاتنا في كل مرة .

"انه لا ييأس من رَوح الله الا القوم الكافرون."


ونعم بالله♡.


فـ هذا تذكيرٌ لنفسي الضعيفة

انه مهما بلغ العسر مبلغه ؟!
لابدّ لليسر يوم .

وما دام في قوة إلهية عادلة-جداً- بتتحكم بالكون ؟

فكله حيسوقني دايماً للخير ..حتى لو وعيته متأخر.

المهم أنو كل وجع بيعدي علي بيديني درس

وكل درس بتعلمه بالتجربة عمري ما ح انساه

وكل حاجة عمري م ح انساها قاعدة تبني|تشيّد جواي كينونة مهما بدت ملامحها غير واضحة ، غير مفهومة، متخلبطة و هشّة حالياً ؟

إلا أنو في نهاية المطاف
دي كينونتي أنا
تفرّدي الخاص وبصمتي الخالصة في الكون ده

و حيجي يوم اكون قادرة فيه اشوف الصورة كاملة لأول مرة

وأبقى فخورة بالنتيجة النهائية مهما كانت .

_على ثقة بذلك_
وعلى أمل ♡゙.

#على_الهامش

" يارب ظلّك .. الظلّ المُمتد الذي لا ينقطع ونورك، النور الذي لا ينكسر ، امنحنا أمانك، الأمان الذي لا يُفاجئه الخوف أبدًا♥️."



- على آخر الليل.
- تنزيل صابر .

جمعيه اطفال السرطان

الدعم الانساني
طفل بعمر ال ٧ سنوات
-سرطان في الدم

اتحدد ليه ١٢ جرعه كيماوي
اوضاع الاسره تعبانه للغايه وابوه ملازموا لان الام متوفيه

باقي من اجمالي مبلغ الجرعات
400 الف

اللي مستعد يساعد يرسل حتى بدون إشعار نحنا حنتابع الحاله

بنك الخرطوم
2155179
باسم ريم محمد

ماي كاشي 400249357

يقول ﷺ:
(ما نقص مالٌ من صدقةٍ)

للاستفسارات على هذا المعرف
@Reema35_a

باقي فقط
١٨٠ من اجمالي الحوجه

#هذا_الصباح❤️

من سنتين اتعلمت إني كل ما أقع ف مشكلة أفضل أقول: " لا إله إلا أنت سبحانك إني كنت من الظالمين ".

بطريقة ما كانت المشكلة بتتحل ، وقتها كنت بفتكر سيدنا يونس و هو ف بطن الحوت لو أنا كنت مكانه هل كنت ح ابقي متأكدة إن دي النهاية ؟ بس همن سنتين اتعلمت إني كل ما أقع ف مشكلة أفضل أقول
" لا إله إلا أنت سبحانك إني كنت من الظالمين "..

بطريقة ما كانت المشكلة بتتحل ، وقتها كنت بفتكر سيدنا يونس و هو ف بطن الحوت لو أنا كنت مكانه هل كنت ح ابقي متأكدة إن دي النهاية ؟ هو كان واثق إنو المحنة هتعدي.

السنه دي أنا بتعلم حاجة جديدة، أنو كل ما الإحباط يوصل لقلبي وأحس أن الدنيا بتقفل خلاص أفتكر قوله تعالي ف سورة الصافات :
" فما ظنكم برب العالمين" ..

فتبدأ الدنيا تنور من تاني.

حتي لو ماجات الحاجة اللي كنت بتمناها بس بقيت عارفة ومتأكدة إن وراها خير جاي كتييير ❤️.

#ريما_عباس
#يومياتي_العزيزة.

صباح الخير ❤️


في لحظة تعب شديد بتكون شايف بسسسس راحتك في حاجة واحدة محددة..

تاني كل الأبواب بتكون مفتوحة لكن إنت ما دايراها.

والباب الوحيد الإنت شايف راحتك فيه بكون مقفول..

رغم إنك منطقيا عندك مفتاحه ، لكن نهائي ما بتقدر تدخله !

في اللحظة دي بس تعرف إنه ربنا مُبتليك عشان تفك التعلق بالباب دا .

أبواب ربنا كتيرة وخزائنه ملئى وسبل الراحة كتيرة .. بس إنت متعلق بي باب واحد ومن تربية الله للمؤمن يبتليه لما يتعلق.

الحاجة دي أنا عشتها بي نفسي في الحرب ، لأني كنت شايفة الراحة بس في إني أرجع بيتنا.

فـ سبحان الله حتى بعد الخرطوم بقت آمنة ، ربنا ما يسر لي الرجعة رغم إني قادرة أرجع منطقيا ..بس خالص ما اتسهلت .

هنا عرفت إني تعلقت وربنا بيأدب فيني.

وعرفت إني في رسالة من الوضع الأنا فيه لسة ما استوعبتها ،وفي دروس لسة ما اتعلمتها وفي رزق لي ولي الحوليني في اجتماعنا هنا .. بس م كنت مُدركاه

لقيت الحل في تمام العبودية والتسليم لله عز وجل .

لقيت خطئي أنا إني كنت راسمة شكل معين للفرج..

ودا فيه تعدي على الله عز وجل
اللي هو ربنا يرزقك ويفتح ليك أبواب ونِعم كتيرة وإنت بدل تحمد وتستشعر النعم تقول ليه " لا يا ربنا أنا دا كله ما دايره منك أنا بس داير الحاجة الفلانية!"

..

أنا متأكدة البوست دا ح يجي لي جزء منكم في وقته وأسأل الله أن ينفع به ويتقبله مني.

أنا تعبت وأخذت وقت لغاية ما استوعبت الدرس
وجيت أديكم الخلاصة عسى أن تكون اختصارا لدروبكم .

وربنا يرزقنا الرضا والتسليم ويعلمنا حسن الظن واليقين ❤️.


#آلاء_العوض.