للمؤنسات الغاليات

عارفة يا السمحة… الالتزام بالزي الشرعي اليوم ما ساهل، خصوصًا النقاب في عز الحر. لكن كل تعبك وصبرك ومجاهدة نفسك ما بتضيع عند ربنا 💚

لما تتحاشي اللبس الضيق، وتتجنبي مجالسة الرجال إلا في الضرورة، كل ده بيكون في ميزان حسناتك، لأنك صنتي نفسك، وحفظتي قلبك، وما بقيتي سبب في فتنة رجل بيك 🌿

ثقي دايمًا إن ربنا شايف كل مجهودك، وحيجازيك على صبرك وصلاحك.

#قوم_أمشي_صلِّ💚

صباح الخير جِدًا 💚

"وإن تعدوا نعمة الله لا تُحصوها"

نحن مرات بنغفل، بننشغل بالحاجات الحولينا وننسى النِعم العندنا!

احمد ربنا على كل صغيرة،
على إنك صحيت ولسه معاك وقت تتوب،
على إنك بتتنفس، على إنك قادر تمشي، على كباية الشاي على السقف القاعد فيه، والموية البتشرب فيها.

الحمدلله على كل حاجة بنملكها وما بننتبه ليها، على كل لحظة راحة بتمر علينا وننسى نردد فيها "الحمدلله".

احمد واشكر الله، و إتذكر إنه الشُكر يجّلب الزيادة💚

#قوم_أمشي_صلِّ💚

النبي قال: بدأ الإسلام غريبًا وسيعود غريبًا كما بدأ فطوبى للغرباء، قيل يا رسول الله من الغرباء؟ قال: الذين يصلحون إذا فسد الناس.

طوبى للغرباء؛ طوبى لمن جاهد وصبر؛ طوبى لمن آثر حب الله على ما يحب ويرضي من يحب ؛ طوبى لمن حافظ على الصلاه في المسجد في زمن تخلف فيه الكثير؛ طوبى لمن حافظ على غض البصر وعلى الستر في زمن تعرى فيه الكثير؛ طوبى لمن حرم نفسه عن هواها في زمن كثر فيه إتباع هوى النفس💚

هل تفتكر إنه ده كله على ربك قليل وربك بحاسب على مثقال ذره! ويضاعف لمن يشاء

إستعن بالله ولا تعجز كل جهاد بتجاهده لنفسك في أمر رغم إنك شايف إنه الأمر بقى عادي بأجره

#قوم_أمشي_صلّ💚

أتندس الصلاة..

صليتو العصر ولا لسه؟👀
أي رفيق صلّى يتفاعل مع الرسالة بـ "🫡"

"اللهم اجعل الصلاة لنا راحة من كل تعب، وملجأً من كل هم، وطريقًا للجنة يا رب 💚🤲🏻"


#قوم_أمشي_صلِّ💚

ما ينفع تقابل ربنا سُبحانه وتعالى بي أربع صلوات!
لازِم تتصرف وتعمل كُلّ الأسباب المُمكنة إنك تصحى تصلي الصبح وما ترضى بالوضع ده نهائي!..

= أعمل شنو؟!
- استعن بالله وأدعي ربنا يجعلك من أهل الفجر
- نوم بدري وماتساهر كتير
- اتوضى قبل النوم لأنها سُنة وأنوي لقيام الفجر
- أعمل منبه وخلي غيرك ينبهك ويصحيك

#الصلاة_خير_من_النوم
#قوم_أمشي_صلِّ💚

في زحمة الحياة وبريق الدنيا الخادع، بيحتاج القلب لتذكير يوقظه ويصحيه من غفلته، وإلى مجلسٍ يردّه إلى حقيقة نساها الكثيرون...

أن هذه الدنيا ظلّ زائل، ومتاع غرور،
وأنها دار عبور لا دار سرور
والموفَّق من جعلها طريقًا للجنة لا غايةً للحياة،
يقول الإمام ابن القيم رحمه الله: ”من عرف الدنيا لم يفرح لرخاءٍ، ولم يحزن لشقاءٍ، فإنها لا تبقى على حال.“

فكونوا حضوراً يارفاق، في مجلس خيرٍ نافع مع شيخنا العزيز حاطب محمد جزاه الله عنَّا خيراً💚

عنوان المجلس: وصايا للشباب - ظلّ زائل
🗓 اليوم: الخميس
١٧ ربيع الثاني ١٤٤٧هـ الموافق: ٩ أكتوبر ٢٠٢٥م
🕣 الميعاد: ٨:٣٠ م بتوقيت السودان،
٩:٣٠ م بتوقيت القاهرة ومكة المكرمة أحبُّ البقاع💚

جهزوا المنبهات وبلغوا الأحبة والأصحاب،
وخذوا من هذا المجلس زادًا لقلوبكم يذكّرك بأننا خلقنا لما هو أعظم من الدنيا💚

#قوم_أمشي_صلِّ💚

سلامٌ على خان يونس .. سلامٌ على دير البلح .. سلام على الشجاعية.. سلامٌ على جباليا .. سلامٌ على غزَّة🔻

إتفاق يلوح في الآفاق وليتم وقف إطلاق النار

تكبيرات وتهليلات، أفراح بُشريات واستبشارات
رغم عظيم الإبتلاء صبرتم ورغم القصف والتهجير ثبتم
ورغم الخذلان منَّا نُصرتم وانتصرتم،

هذا هو وعد الله لعباده، هذا هو نصر الله لجُنده
"إِن تَنصُرُوا اللَّهَ يَنصُرْكُمْ"
وقد كان فالحـمد لله قد نصرهم🔻

سلام عليكم يا أهل غزة درة تاج المسلمين
سلام على أرض الرجال وريح الصحابة وثغور الرباط
سلام على الملثمين ومن تقدمهم من الشهداء الطيبين

والحال أكبر من الكلام.

#قوم_أمشي_صلِّ💚

بسمِ اللهِ نبتدئ وبِهِ نستعين..

مجلس "وصايا للشباب"
مع الشيخ حاطب محمد حفِظهُ الله💚.

رابط المجلس:
https://www.tg-me.com/Gom9li?livestream


نافذة التعليقات⤵️💚:

#قوم_أمشي_صلِّ💚

كثرت مخالطه البشر والأنس بهم وتعليق القلب بهم يجلب الضيق في أخر الأمر ولو إجتمعت كل ملذات الدنيا
عكس الأنس بالله والخلوه بذكر الله وقراءة القرآن فيها راحه ولو إجتمعت كل إبتلاءات الدنيا

جرب تصلي الفجر في المسجد وتجلس جلسه الضحى تذكر فيها الله وقلبك حاضر مع كل ذكر وشوف كميه الراحه والرضا والسكينه والأنس بالله وذكر الله

وما تنسونا من الدعوات💚

#الصلاة_خير_من_النوم
#قوم_امشي_صلّ💚

يا بهيّة!💚🌸

ورد في الحديث "ألَا وإنَّ في الجَسَدِ مُضْغَةً: إذَا صَلَحَتْ صَلَحَ الجَسَدُ كُلُّهُ، وإذَا فَسَدَتْ فَسَدَ الجَسَدُ كُلُّهُ، ألَا وهي القَلْبُ".

ومن أعظم مُفسدات القلوب التعلُّق.!

ف خلينا نتلاقى ونتكلم عن التعلُّق ومآلاته وكيف نعالِج الحاجة دي 💚

نلتقي مساء اليوم في مجلس طيّب بعنوان {التعلُّق ومآلاته} للنساء فقط

🗓️اليوم ١٠/أكتوبر/٢٠٢٥م
⏰الساعة : الثامنة مساءً بتوقيف السودان، والتاسعة بتوقيت مكة المكرمة ومصر💚.

مع المعلمة:نمارق محمد
جزاها الله خير الجزاء💚.

على قناة قوم صلِّ للنساء فقط⤵️:
https://www.tg-me.com/+0nzY4TRUkvwxNTBk

#قوم_امشي_صلِّ💚

السلام عليكم أل صـل الكرام💚
الجمعة دي فرصة كبيرة لينا، ربنا قال:
“وإذا سألك عبادي عني فإني قريب أجيب دعوة الداع إذا دعان” [البقرة: 186]

خلونا نتحدى نفسنا الجمعة دي بالدعاء..
كل زول يرفع إيديه ويدعي من قلبه: لنفسه، لأهله، لبلدنا، ولإخوانا المستضعفين وللأمة كلها💚
يمكن تكون ساعة استجابة ويغير الله بيها حالنا لأحسن.

وأعلموا أن لاخيبات مع الدعاء فإما كان لكم مجابٌ وإما مدفوع به عنكم بلاءٌ وإما مُدخر لكم للآخرة أجر وحسنات بإذن الله،
اللهم تقبل منا ومنكم صالح الدعوات💚

#تحدي_الجمعة_الأسبوع_الثاني_والعشرون
#قوم_أمشي_صلِّ💚

عارف إنه دين الإسلام الدين الوحيد اللي فيهُ لقاء مع ربنا سُبحانه وتعالى خمس مرات في اليوم! وأكتر 💚

طيب عارف إنه وحدة من فوائد الصّلاة تعليمك الإنضباط ! واللي تقريباً أنت محتاجه في كل شيء في حياتك..💚

طيب طيب عارف إنه الصلاة أفضل وسيلة لتنظيم يومك وحياتك!!💚

وأخيراً خليك عارف أن من صَلُحَت صلاته صَلُحَت حياته🤗💚

؛عشان كدا💚⬇️

#قوم_أمشي_صلِّ💚

الليلـة كُنـتَ قاعـدة أفكـر في ناس ربنا فاتـح ليهـم أبـواب التوفيـق بطريقـة غريبـة، مثلًا:
نـاس بتلقـى أمورهـم ماشيـة، رزقهـم واسـع، حتى في أصعـب الظـروف بيطلعـوا منها واقفيـن.

ما قدرتَ أمسك نفسي من سؤال: شنو السـر؟ هل هو فعلًا شطـارة؟ ولا في حاجة أعمق بتحـرك الأمـور من ورا الستـار؟🫣

سُبحـان اللـه، إتذكرت موقف حصل لي قبل كم سنة، وقتـها كنت في ضيق شديد، كل حاجة بتتعسر، حتى الحاجات البسيطة بتتعقد، رغم إني كُنت شايفة الطريق قدامي!
جيت يوم، بدون سبب واضح، مشيت لأمي، قبَّلت يدها، وقُلت ليها:
«أرضـي عني و ادعـي لي يا أمـي، دعواتـك دي عاملة زي مصبـاح علاء الدين، أي حـاجة بعدها بتتسهـل»
دعوة واحدة منها، في جوف الليل، فتحت لي باب ما كنت شايفاه رغم إنه قدامي، الأمور بدأت تتيسر، خطوة خطوة، بدون ما أعمل شي جديد، بس دعوة من قلب راضي💚.

تابع معاي التعليقات ⤵️ 💚

#قوم_أمشي_صلِّ💚

ضاقت عليك الدنيا.؟
حاسي كل شيء مقفول في وشك..؟
نفسك تبكي وتشكي وتحكي وأنت ما فاهم أي شيء وما عارف أنت مالك...؟
عايز تقعد براك بعيد عن الناس وعن كل شيء....؟

بفتش عن زول تحكي لي وتفضفض معاهو؟

تعال معاي بقلبك أقول ليك :
" خليك عارف إنه كل الحصل دا عشان ترجع لي ربنا وتتقرب منه، وبعدين نحنا لي بنفتش في الناس عشان نحكي ليهم ونبكي ونفضفض
ومعانا رب الناس سبحانه وتعالى أقرب لينا من حبل الوريد يلي في الرقبة دا "

عشان ما أطول عليك وأوريك الحل الوصلته لي، لما بقيت في الحالة دي
إنه في نص الجوطه والناس والدنيا والشيطان ونفسي وكل ضغوطات الحياة جاهدت كل دا بعون الله وبعدت عن كل شيء بس ما كنت براي معاي ربنا سبحانه وتعالى
شلته الأبريق واتوضيت ووقفت صليت ومن قول الله أكبر أنا دموعي ما وقفت ولما أكون نازل أسجد ببكي زيادة وببكي وببكي وبشكي لي ربنا كأنه قدامه وبدعي لحدي ما خلصت صلاة واتمنيت ما تخلص بكمية الراحة والطمأنينة والسكينة والهدوء الحسيت بيه بعد خلصت صلاة
ف بقول ليك مهما كان الحالة الإنت فيها حــــلــــها الصلاة الصلاة الصلاة وأنه ترجع لي ربنا وتتقرب منه
والصلاة هي الصلة بين العبد وربه
وكلنا عباد ضعفاء فقيرين لله سبحانه وتعالى

إذا وصلت لي هنا قوم امشِي صلِّ وقابل ربك وابكي واحكي واشكي وأدعي وبإذنه تعالى كله ميسر ومقضي 💚

ف الأخير اتوكل على الله وخليك على يقين أن أمر المؤمن كله خير
والسلام عليكم ورحمة الله وبركاته.

#قوم_أمشي_صلِّ💚

كل الدنيا منذ خلقت إلى أن تُفنى ركعتي الفجر خيرُُ منها

- ابن عثيمين


|صلاة الفجر أثابكم آل صــلِّ💚

#الصلاة_خير_من_النوم
#قوم_أمشي_صلِّ💚

دقيقة ورا دقيقة وفجأة بقت ساعة يا صحبي...

غالبا انت عندك نفس مشكلتي؛ ماف بركة في الوقت والزمن بيضيع بدون فوائد تذكر، فالبوست دا لينا💚

يقول ابن الجوزي: "ينبغي للإنسان أن يعرف شرف زمانه وقدر وقته، فلا يضيع منه لحظة في غير قربة، ويقدم فيه الأفضل فالأفضل من القول والعمل، ولتكن نيته في الخير قائمة من غير فتور بما لا يعجز عنه البدن من العمل".
وقتك يا صحبي ما تجامل فيه، استثمره صاح، سر بركة الوقت في الطاعات؛ كلما بستثمر زمنك في طاعة الله وفعل الخيرات كلما حتلقى بركة في وقتك وإعانة من الله سبحانه وتعالى على إنجاز مهامك💚

إحنا كدا عرفنا ليه زمننا بيضيع، رايك شنو نبدا نستثمره صاح؟💚

#قوم_امشي_صلِّ💚