ضاقت عليك الدنيا.؟
حاسي كل شيء مقفول في وشك..؟
نفسك تبكي وتشكي وتحكي وأنت ما فاهم أي شيء وما عارف أنت مالك...؟
عايز تقعد براك بعيد عن الناس وعن كل شيء....؟

بفتش عن زول تحكي لي وتفضفض معاهو؟

تعال معاي بقلبك أقول ليك :
" خليك عارف إنه كل الحصل دا عشان ترجع لي ربنا وتتقرب منه، وبعدين نحنا لي بنفتش في الناس عشان نحكي ليهم ونبكي ونفضفض
ومعانا رب الناس سبحانه وتعالى أقرب لينا من حبل الوريد يلي في الرقبة دا "

عشان ما أطول عليك وأوريك الحل الوصلته لي، لما بقيت في الحالة دي
إنه في نص الجوطه والناس والدنيا والشيطان ونفسي وكل ضغوطات الحياة جاهدت كل دا بعون الله وبعدت عن كل شيء بس ما كنت براي معاي ربنا سبحانه وتعالى
شلته الأبريق واتوضيت ووقفت صليت ومن قول الله أكبر أنا دموعي ما وقفت ولما أكون نازل أسجد ببكي زيادة وببكي وببكي وبشكي لي ربنا كأنه قدامه وبدعي لحدي ما خلصت صلاة واتمنيت ما تخلص بكمية الراحة والطمأنينة والسكينة والهدوء الحسيت بيه بعد خلصت صلاة
ف بقول ليك مهما كان الحالة الإنت فيها حــــلــــها الصلاة الصلاة الصلاة وأنه ترجع لي ربنا وتتقرب منه
والصلاة هي الصلة بين العبد وربه
وكلنا عباد ضعفاء فقيرين لله سبحانه وتعالى

إذا وصلت لي هنا قوم امشِي صلِّ وقابل ربك وابكي واحكي واشكي وأدعي وبإذنه تعالى كله ميسر ومقضي 💚

ف الأخير اتوكل على الله وخليك على يقين أن أمر المؤمن كله خير
والسلام عليكم ورحمة الله وبركاته.

#قوم_أمشي_صلِّ💚

كل الدنيا منذ خلقت إلى أن تُفنى ركعتي الفجر خيرُُ منها

- ابن عثيمين


|صلاة الفجر أثابكم آل صــلِّ💚

#الصلاة_خير_من_النوم
#قوم_أمشي_صلِّ💚

دقيقة ورا دقيقة وفجأة بقت ساعة يا صحبي...

غالبا انت عندك نفس مشكلتي؛ ماف بركة في الوقت والزمن بيضيع بدون فوائد تذكر، فالبوست دا لينا💚

يقول ابن الجوزي: "ينبغي للإنسان أن يعرف شرف زمانه وقدر وقته، فلا يضيع منه لحظة في غير قربة، ويقدم فيه الأفضل فالأفضل من القول والعمل، ولتكن نيته في الخير قائمة من غير فتور بما لا يعجز عنه البدن من العمل".
وقتك يا صحبي ما تجامل فيه، استثمره صاح، سر بركة الوقت في الطاعات؛ كلما بستثمر زمنك في طاعة الله وفعل الخيرات كلما حتلقى بركة في وقتك وإعانة من الله سبحانه وتعالى على إنجاز مهامك💚

إحنا كدا عرفنا ليه زمننا بيضيع، رايك شنو نبدا نستثمره صاح؟💚

#قوم_امشي_صلِّ💚

إنّ لأهل الفجر غنائمَ لا ينالُها نائمٌ

هنيئًا لكم يا أهل الفجر 💚


#الصلاة_خير_من_النوم
#قوم_أمشي_صلِّ💚

”ما يسرنا أنهم عندنا، ما يسرهم أنهم عندنا“
لاتقلق على الشهيد يارفيق
فهو بإذن الله عند الله تعالى في أعلى عليين مغفور الذنب وفرحاً بما هو فيه

يقول النبي ﷺ : ”ما يجدُ الشَّهيدُ من مسِّ القتلِ إلَّا كما يجدُ أحدُكُم من مَسِّ القرصةِ"
فلا ألم يصيبه ولا وجع يمسه وإنما يغفر له من أول قطر الدم ويُرى مقعده من الجنة، ويجار من عذاب القبر، ويأمن من الفزع الأكبر، ويوضع على رأسه تاج الوقار،
الياقوتة منها خير من الدنيا وما فيها، ويزوج من الحور العين، ويشفع في سبعين من أقاربه

يارفيق صحيح أن صالح الجعفراوي غُدر به ونحسبه عند الله مع المرابطين والشهداء ولا نزكيه
فقد أدى ماعليه وقام على ثغر من ثغور الجهاد والرباط وتحامل الإبتلاء وصبر عليه فما ظنك بجزاء وثواب الله تعالى له
”فَرِحِينَ بِمَا آتَاهُمُ اللَّهُ مِن فَضْلِهِ وَيَسْتَبْشِرُونَ بِالَّذِينَ لَمْ يَلْحَقُوا بِهِم مِّنْ خَلْفِهِمْ أَلَّا خَوْفٌ عَلَيْهِمْ وَلَا هُمْ يَحْزَنُونَ“

والسلام على روحك وعلى الثرى من فوقك،
إنا لله وإنا إليه راجعون.

#قوم_أمشي_صلِّ💚

ليه بيحصل معاي كدا دايمًا؟
وليه أنا بالذات؟ 😔
أسئلة بنسألها في لحظات الضعف.. نحس إن الدنيا متكالبة علينا، وإنو مافي سبب يخلي الألم نصيبنا. لكن الحقيقة يا صديقي/صديقتي، كل حاجة بتحصل لينا ليها حكمة، حتى لو عجزنا نفهمها في اللحظة دي.

أحياناً ربنا بيدلنا على طريق الصبر عشان يقوينا، وأحياناً بيرفعنا به درجات، ويمكن نتطور ونكبر من جوة بطريقة ما نستوعبها إلا بعد سنين. الحياة ما وُجدت عشان تكون سهلة، وامتحاناتها جزء من الرحلة. ولما تسأل: “ليه أنا؟” تذكّر إن غيرك برضو بيسأل نفس السؤال في ظروف أصعب يمكن.

حتى القصص اللي جات في سورة الكهف بتورينا الحكمة دي بوضوح. سيدنا موسى لما مشى مع الخضر، ما كان فاهم ليه السفينة اتخرقت، وليه الغلام اتقتل، وليه الحيط اتبنى لأهل قرية بخلاء. من نظر موسى كانت مصايب وابتلاءات ما ليها معنى. لكن في الحقيقة كل موقف كان وراه رحمة مخفية وحكمة عظيمة: حماية، رحمة، وأجر مدخر.


الرضا بالقضاء والقدر ما معناتو استسلام، لكن معناتو قلب راضي، عارف إنو الخير في المكتوب حتى لو لبس ثوب الوجع. صدق إنو ربنا أعلم بمصلحتك، وإن كل دمعة وكل جرح ممكن يتحوّل يومًا ما لقوة ونور ودرس يخليك أعمق من قبل.

فخلي يقينك ثابت: اللي بيحصل ليك ما عشوائي، وما عبث.. ده ترتيب إلهي، وامتحان لروحك، عشان تطلع منو أقوى وأنقى


#قوم_أمشي_صلِّ💚

أول ساعة من اليوم، هي البتحدد ليك باقي يومك حيكون كيف

صحيت، صليت قيامك، وصلاة الفجر حاضر وقريت أذكارك ووردك اليومي
كتبت مهامك اليومية

مليت قلبك بالامتنان والتفاؤل
وبتأدي مهامك الدنيوية بنوايا مفيدة وجميلة

انت كدا شبه حققت السعادة في الدنيا، وصباح الخير 💚


#الصلاة_خير_من_النوم
#قوم_أمشي_صلِّ💚

متين حتقعد مع نفسك عشان تشوف البتعمل فيه دا برضي ربنا ولا
عدم صلاة و تقطيعها
استماعك للموسيقى و المجاهرة بيها
العلاقات المحرمة الإنت فيها
عدم برك لوالديك

﴿أَلَم يَأنِ لِلَّذينَ آمَنوا أَن تَخشَعَ قُلوبُهُم لِذِكرِ اللَّهِ وَما نَزَلَ مِنَ الحَقِّ وَلا يَكونوا كَالَّذينَ أوتُوا الكِتابَ مِن قَبلُ فَطالَ عَلَيهِمُ الأَمَدُ فَقَسَت قُلوبُهُم وَكَثيرٌ مِنهُم فاسِقونَ﴾ [الحديد: ١٦]

#قوم_أمشي_صلِّ 💚

النيّة هي العامل الممكن بسببه إنك تحوّل العادة لعبادة.

السلف كان بستمثمروا حياتهم لدرجة إنهم حتى نومهم بيحتسبوا فيه النيّة، وإنت بتعمل كم عمل حسَن في يومك ؟
درّب نفسك إنها تحاول تلقى أجر من أصغر الأمور... مثلًا مثلًا: ما تقتل النملة عشان ما تقطع تسبيحها!

والكثيييير لسه، بس إنت احتسب الأجر: {وما يفعلوا من خيرٍ فلن يكفروه واللّٰه عليمٌ بالمتقين}. 💚

#قوم_أمشي_صلِّ💚

في مرة لقاني واحد في التيكتوك سأل عن؛
ماهو معنى الراحة بالنسبة ليك؟

فكانت الإجابات كتيرة، لكن في واحد من التعليقات اللفتت إنتباهي قال إن راحته بتكون بمصلاية وكتاب قرآن بس،
في الوقت اللي كتيرين غيره وصفوا الراحة بطرق مختلفة من چيم لقروش وغيره
لكن هو كان راحته في مصلاية وكتاب القرآن💚

وعليه أسأل نفسك يا عزيزي، هل الإتصال مع الله يوميا عن طريق العبادة ذي الصلاة والدعاء دائماً بديك إحساس انه ربنا قريب مجيب ولالا؟!
بالنسبة لي أنا فالراحة بتكون في الدعاء؛
لأني بستشعر قرب ربنا مني وإنه معاي وسامعني وعالم
بالبمر به فمن يقدر علي💚

وروني في التعليقات، كيف بتلقوا راحتكم وتستشعروا تواصلكم مع الله؟!

#قوم_أمشي_صلِّ💚

سر سعادة يومك ببدأ من صباحك ✨
تحب تعرف كيف؟ 🤔

هل قمت وصليت الفجر حاضر؟

هل برّيت بوالديك وطيّبت خاطرهم؟

هل سلمت على الناس، سواء البتعرفهم أو الما بتعرفهم بصدر رحب وابتسامة جميلة؟

صدقني يا صاحبي، لو بديت يومك بالحاجات البسيطة دي ح تلقى يومك كلو سعاااادة و بركة💚

#قوم_أمشي_صلِّ💚

يا رفيق!
المؤمن لا ييأس من نفسه ابداً🫶🏽

مهما عملت معاصي أمس وقبله وقبله اتذكر انو باب التوبة مفتوح وتقدر ترجع وتصلِّح من نفسك وتبدأ من جديد تاني ، عارف!

الشيطان بصغّر ليك المعصية شديد وأول من تقع فيها يقعد يقنعك انو دي حاجة كبيرة شديد وربنا م ح يغفر ليك وو ، ده كلو ليه؟ عشان تيأس ؛عشان اليأس متنافي مع الإيمان وبتوافق مع الكفر( إِنَّهُ لَا يَيْأَسُ مِن رَّوْحِ اللَّهِ إِلَّا الْقَوْمُ الْكَافِرُونَ)

ف هو عايزك تيأس! اها يغلبك الشيطان؟ نهائي والله، إنت كده عارف عدوك ! ف اوع يغلبك!

قوم وارجع وابدأ طالما في نفس يبقى الفُرصة في وتقدر تبدأ وترجع هسى🫶🏽

#قوم_أمشي_صلِّ💚

ما لا يرضي الله لن يرضيك.
كيف يعني 🙂؟
ببساطة كدا: العلاقة الإنت أو الإنتي فيها دي ما بترضي ربنا، فأكيد ما حترضيك في نهايتها.

كيف برضو؟ عايز شرح أكتر؟
طيب، ما حترضيك بمعنى إنها ممكن توجعك بإنو تتفرق قلوبكم عن بعض، ودا أكيد ما برضيك و حتدخل في حالة بتاعت حزن و يأس و حاجات كتيرة شديد.
ولو قصدك في نهاية الموضوع إنكم تكونوا مع بعض بالحلال...

عارف في حديث عن حذيفة بن اليمان رضي الله عنه:
(... ولا يحْمِلَنَّكم استبطاءُ الرِّزقِ أن تأخذوهُ بمعصيةِ اللهِ، فإنَّ اللهَ لا يُنالُ ما عندَه إلا بطاعتِه)
رواه الإمام أحمد والترمذي.

باختصار شديد: ما تقول لي إنك/ي خايف/ة يكون لغيرك، عشان كدا ما حنخلي بعض، فالبنعمل فيهو دا ما برضي ربنا، ونهايتو ما حترضينا.

ونخت دائماً في بالنا:
"من ترك شيئاً لله عوضه الله خيراً منه" 💚

#قوم_أمشي_صلِّ💚

صباحك مختلف يا مؤمن💚

صليت الصبح حاضر و شهدت ليك الملائكة بعد ما قريت وردك فيا سعدك💚

اتحصنت بالأذكار فأبشر بحصنك المنيع، وأبشر بطمأنينة و سعادة ترافق يومك بإذن الله 💚


#الصلاة_خير_من_النوم
#قوم_أمشي_صلِّ💚

عارف يا رفيق! من الحاجات اللي بتمحو السيئات وتطمئن القلب وحثّنا عليها النبيّ ﷺ؛ الإكثار من ذكر الله💚.

والإكثار من الذكر أجره كتييير شديييد وم هيّن!
قال رسول الله ﷺ : ”ألا أنبِّئُكُم بخيرِ أعمالِكُم ، وأزكاها عندَ مليكِكُم ، وأرفعِها في درجاتِكُم وخيرٌ لَكُم مِن إنفاقِ الذَّهبِ والورِقِ ، وخيرٌ لَكُم من أن تلقَوا عدوَّكُم فتضرِبوا أعناقَهُم ويضربوا أعناقَكُم ؟ قالوا : بلَى . قالَ : ذِكْرُ اللَّهِ تَعالى قالَ معاذُ بنُ جبلٍ : ما شَيءٌ أنجى مِن عذابِ اللَّهِ من ذِكْرِ اللَّهِ“💚..

وما كده وبس! الذكر بقوّي البدن والقلب ويطرد الشيطان وببعد الهم والحزن، وسبب لمحبة الله سُبحانه وتعالى..
والذكر بيسّر الصعب ويخفف المشاق!

عمل يسير وثواب كتير،💚
نحن مُحتاجييين لذكر الله كتير شديد؛ فـ اكثِر من ذكر الله يا رفيق!

#قوم_أمشي_صلِّ💚

اقفز💚

وهي وصية والد الشيخ علي الطنطاوي له يوقظه بها كل يوم لصلاة الفجر فيقول له:

"اقفز قفزًا، قم إلى لصلاة فالصلاة خير من النوم"

#الصلاة_خير_من_النوم
#قوم_أمشي_صلِّ💚

"خَيْرُ يَومٍ طَلَعَتْ عليه الشَّمْسُ يَوْمُ الجُمُعَةِ"

وفي يوم الجمعة يا رفيق عايزين نقول ليك ما تنسى 🥰💚:
- سنن الجمعة.
- الصلاة على النبي ﷺ
- قراءة سورة الكهف
• الدعاء ساعة الإستجابة

#قوم_أمشي_صلِّ💚

السلام عليكم ورحمة الله وبركاته،

آل صــلِّ متذكرين تحدياتنا ليوم الجُمعة صح!؟
ولا الدنيا شغلتكم والشيطان أنساكم التسابق في الخير،
لاسمح الله🤔

تحدينا للجُمعة دي هو إن كل أحد منكم يكتب لنا "بإذن الله💚" في خانة التعليقات، نحنا حنرسل له تحدي يسير لكن أجره عظيم وثواب كبير بإذن الله💚

قبلتوا التحدي؟!
طيب منتظرنكم في آخر اليوم؛
عشان نشوف منو الأكمل التحدي وربح البيع، ومنو الكان شيطانه أقوى منه وغلبه👀

#تحدي_الجمعة_الأسبوع_الثالث_والعشرون
#قوم_أمشي_صلِّ💚

📌ضروري انك تحضر الفيديو دا


#قوم_أمشي_صلِّ 💚

ما حِيلةُ القَلبِ المُعبَّأ بِالأسى؟
=‏أنْ يَبتغي قُرآنَ رَبّي مُؤنسا💚.

أتانا مجلس النور والسكينة مع البهيّات ويجمعنا القرآن💚

ندعوكنّ إلى مجلس تلاوة ونُرحب بكنّ لنستمع سويًا
بصوتٍ يبعث الطمأنينة مع القارئة : تسابيح عبدالله، بارك الله فيها💚.

نتشرف بحضوركن لتكونوا جزءًا من هذا الأُنس

📍 المكان: مجالس قوم امشِي صلِّ للنساء
الساعة الثامنة مساءً بتوقيت السودان.

الرابط في أول تعليق⤵️💚

📌للنساء فقط كل الترحاب بكن!

#قوم_امشي_صلِّ💚