قصائد الولاء في ملحمة كربلاء

Forwarded from قصائد الولاء في ملحمة كربلاء

لسان حال ليلى ام الاكبر وهي تودع ولدها

هيهات ابد انساك ٭٭ روحي تظل وياك
روحي تظل وياك ٭٭ هيهات ابد انساك

٭ ※ ٭ ※ ٭ ※ ٭ ※ ٭ ※ ٭ ※ ٭ ※ ٭ ※ ٭
يوليدي سباح القلب • بــُعدك تره يأذيني
خليني اشـمن منـحرك • يـمه الـولد خـليني
ريـحانه انـت بـدنيتي • بطولك اكحل عيني
ربيتك علـيك تعبت • مو انـت حلم سنيني

وداعك يهد الحيل ٭٭ ترضى دمعتي تسيل
لا تــبعد اتــرجاك ٭٭ هيهات ابد انساك

٭ ※ ٭ ※ ٭ ※ ٭ ※ ٭ ※ ٭ ※ ٭ ※ ٭ ※ ٭
شديت سـرجك عالمهر • وعليك زايد نوحي
وطلعت الارض المعركة • هديت يمه اسفوحي
انخه بالحسين وتـــــرد • بيدك تطيب أجروحي
لو مـــا اشوفن مبسمك • يايمه تطلع روحي

ارجع يضي العين ٭٭ سالم بجاه حسين
بيدك يـــرف لواك ٭٭ هيهات ابد انساك

٭ ※ ٭ ※ ٭ ※ ٭ ※ ٭ ※ ٭ ※ ٭ ※ ٭ ※ ٭
كاصد علي يم الخيم • يا يمه خل انشوفچ
لـو دمعة ابـلل شفتي • وتروه من اجروفچ
ظــلمة احــسها دنيتي • يا يمه من انعوفچ
ارجـع ورد لحومتي • ادري انا زايد خوفچ

زمزم وصيرن ماي ٭٭ تشرب يلب حشاي
لو بيدي اروح وياك ٭٭ هيهات ابد انساك
٭ ※ ٭ ※ ٭ ※ ٭ ※ ٭ ※ ٭ ※ ٭ ※ ٭ ※ ٭
يا يمه أصيرلك عذب • فدوه لك عافيتي
ســــالم ترد لمخيمك • تضوي يشمعه بيتي
انـت الهوه الاتنفسك • يالعايش انت بريتي
ملهوفه يمه الشوفتك • ضيف أكعد بثنيتي

يوليدي ظل هنا ٭٭ هذا انه الاتمنى
عريس انه اتمناك ٭٭ هيهات ابد انساك
٭ ※ ٭ ※ ٭ ※ ٭ ※ ٭ ※ ٭ ※ ٭ ※ ٭ ※ ٭
الاكبر اوداعه بـچي • اتشمه ويشم امــــه
متعلقه ليلى بالضنه • عالصدر حيل تضمه
انت شبيه المصطفى • ضلمه بغيابك ضلمه
أوداعـــك عليه كلف • لا تنـطـق ولا كـلمـه

كثرن عليه هواي ٭٭ ضيم وقهر دنياي
وين ويصح ملگاك ٭٭ هيهات ابد انساك

٭ ※ ٭ ※ ٭ ※ ٭ ※ ٭ ※ ٭ ※ ٭ ※ ٭ ※ ٭
محروس يـمـه بفاطمة ٭٭ ارجع علي يالغالي
حس گلبي ماترجع بعد ٭٭ صار الحزن منوالي
وتــــوذرك اشفار العدة ٭٭ مطروح اشوفه أكبالي
الدنيا من بعدك عدم ٭٭ بـــس طيفه يتروالي

يـا زيـنة الـشـبـان ٭٭ مو هذا وعدك جان
لو مر علي طرواك ٭٭ هيهات ابـد انساك
٭ ※ ٭ ※ ٭ ※ ٭ ※ ٭ ※ ٭ ※ ٭ ※ ٭ ※ ٭
الخادم غازي الساعدي

612 viewsالشاعر غازي الساعدي, 09:15