HAR KIM OʻZ ISHINI QILISHI KERAK!

Bir necha yil oldin Turkiyada bir dahriysifat odam masjid imomiga soʻz qotibdi: «Boshqa xalqlar Oyga uchib, yer boyliklaridan qanday foydalanishni qoyillatib, taraqqiyotga erishmoqda. Sizlar boʻlsa haliyam besh mahal masjidga qatnab, roʻza tutib, oʻralashib yuribsizlar».
Imom domla unga sokingina shunday debdi:
- Necha yoshga kirdingiz?
- 65 ga
- Namoz oʻqiysizmi?
- Yoʻq, shu paytgacha oʻqimadim, bundan keyin ham oʻqimasam kerak.
- Oyga chiqdingizmi yoki biror kashfiyot qildingizmi?
- Yoʻq, nimaydi?
- Biz namoz-u roʻza bilan band boʻlib oyga ucha olmagan boʻlsak, siz nima qilib yerda qolib ketdingiz?
- Ha, endi...
- Biz-ku namoz oʻqib, roʻza tutib hech yoʻq oʻzimizni, oilamizni tarbiya qildik, farzandlarimizni jamiyatga yaxshilik qiladigan kishilar etib yetishtirdik. Siz oʻzingiz nimani qoyillatdingiz? Biz qozonning bir tarafini koʻtarib turibmiz, narigi tomonini siz koʻtarishingiz kerak edi. Oʻzingiz koʻtarmagan taraf tushib ketib qolsa, nega bizni malomat qilasiz? Har kim oʻz ishini qilishi kerak-da, birodar!

Aslida poklik, ibodat hayotda eng muhim ish va bu, ayrimlar oʻylagandek, hayotdagi boshqa yumushlarga, taraqqqiyotga hech qanday xalal bermaydi, aksincha, yordam beradi, undiradi. Ammo ibodatdan yiroq kishilarga shayton oʻz ishlarini haspoʻslashga turli bahonalar topib berganidan ular har xil mantiqsiz gaplar aytib turishadi.

Muammo poklanishda ham emas, ibodat qilishda ham emas, balki undan boshqa kerakli ishlarni beparvo tashlab qoʻyishdadir. Allohning ibodatga oid buyrugʻiga amal qilish bilan birga, sababiyat qonuniyatiga ham rioya etish darkor.

Yana bir gap. Baʼzilar, shu tozalanishni oʻrgataverasizlar ensani qotirib, uning oʻrniga katta masalalarni gapirish kerak, deydi. Toʻgʻri, jiddiy masalalarni ham muhokama qilish darkor, biroq unday mavzularga hammaning ham ehtiyoji, qobiliyati boʻlmaydi, ammo tozalanishga hamma muhtoj va u hammaning qoʻlidan keladi. Mana bu jihatni ham unutmaslik kerak.

Xullas, har narsaga dinni, dindorni aybdor qilishga urunish dahriycha va noxolis yondashuv. Har bir ishning oʻz sababini joriy qilish, har kim oʻz ishini qilishi kerak. Oʻz vazifasini bajarmaganlar aybni boshqaga yuklamay, oʻz burchlarini ado etishlari lozim. Ana shunda hamma narsa maromiga keladi.

Hasanxon Yahyo Abdulmajid

@hasanhusayn