Ilmiy yondashuv qishloq xo'jaligi rivoji demak

Bugun Sholichilik ilmiy-tadqiqot institutiga tashrif buyurib, sohada olib borilayotgan ilmiy izlanishlar va ularning real hayotdagi natijalari bilan yaqindan tanishdim.

Xususan, institut olimlari tomonidan sho‘rga va qurg‘oqchilikka chidamli yangi sholi navlarini yaratish, ularni amaliyotga tatbiq etish yo‘nalishidagi izlanishlar e’tiborga molik.

Bu kabi ilmiy yutuqlar nafaqat dalalarda hosildorlikni oshiradi, balki qishloq aholisi daromadini ko‘paytiradi, oziq-ovqat xavfsizligini mustahkamlashga xizmat qiladi.

Ta’kidlashim joizki, ilm-fan va amaliyot o‘rtasidagi uzviy bog‘liqlikni kuchaytirmasdan zamonaviy agrosohani tasavvur qilib bo‘lmaydi.

Shu bois, institut jamoasiga zamonaviy texnologiyalarni ishlab chiqarishga joriy etish, yosh mutaxassis va tadqiqotchilarni har tomonlama qo‘llab-quvvatlash masalalarida doimiy yordam ko‘rsatamiz.

Ishonchim komil, bugungi uchrashuv qishloq xo‘jaligida zamonaviy ilmiy yondashuvlarni keng tatbiq etish va amaliyot bilan ilm-fanni yanada yaqinlashtirish uchun muhim asos bo‘ladi.

Paxta dalalarida zamonaviy agrotexnologiyalar joriy etilmoqda

O‘zbekiston qishloq xo‘jaligida yuqori hosildorlik va mahsulot sifatini ta’minlash — bizning ustuvor vazifamiz. Shu maqsadda Toshkent viloyatiga amalga oshirgan ishchi tashrifim davomida O‘rta Chirchiq tumanidagi “Madorist Diamond” fermer xo‘jaligiga qarashli 30 gektar paxta dalasini ko‘zdan kechirdim.

Mazkur maydonda mahalliy “Ravnaq-2” navi asosida paxta yetishtirish jarayonlari zamonaviy agrotexnologik yondashuvlar asosida tashkil etilgan. Har bir gektarga belgilangan me’yorda ko‘chatlar ekilib, bugungi kunda ular sog‘lom va sifatli rivojlanmoqda.

Shuni alohida ta’kidlamoqchimanki, yuqori natijalarga erishishda zamonaviy agrotexnik tadbirlarni to‘liq bajarish muhim ahamiyat kasb etadi. Jumladan, qator oralariga ishlov berish, chopiq, sug‘orish va barg orqali qo‘shimcha oziqlantirish — bularning barchasi ilmiy asoslangan tavsiyalar asosida amalga oshirilmoqda.

Tajriba ko‘rsatmoqda: har qanday navning imkoniyatlarini to‘liq ro‘yobga chiqarish uchun unga to‘g‘ri va ilmiy asosda yondashish zarur. Ayniqsa, Paxtachilik kengashi olimlari tomonidan ishlab chiqilgan uslubiy qo‘llanmalarga qat’iy amal qilish natijasida hosildorlik va sifat keskin oshmoqda.

Mas’ullarga aniq topshiriq berdim: ishlarni tizimli olib borish, suv tejovchi texnologiyalarni keng joriy etish, barcha agrotexnik tadbirlarni belgilangan muddatlarda va sifatli bajarish shart. Faqat shunda biz raqobatbardosh, eksportbop paxta yetishtira olamiz.

Biz zamonaviy yondashuvlar orqali paxtachilikda samaradorlik va iqtisodiy natijalarni yangi bosqichga olib chiqamiz.

Zamonaviy kartoshkachilikda yangi bosqich

Toshkent viloyatiga tashrifim davomida O‘rta Chirchiq tumanidagi sabzavotchilik yo‘nalishidagi ilg‘or tajriba maydonlarini ko‘zdan kechirdim. Xususan, “Agrovir Solanuz” MChJga qarashli zamonaviy dala maydonida bo‘ldim.

Bu xo‘jalikning 1000 gektardan ortiq yer maydoniga ega ekani, eng muhimi, bu yerda suv tejovchi texnologiyalar to‘liq joriy etilgani tahsinga sazovor.

Ayni paytda mazkur maydonning 200 gektarida Gollandiyaning yuqori hosildor “Fantane” kartoshka navi yetishtirilmoqda. Mutaxassislarning hisob-kitobiga ko‘ra, bu navdan har bir gektardan kamida 30 tonna hosil olinishi kutilmoqda.

Bu esa yurtimiz oziq-ovqat xavfsizligini mustahkamlash, hudud iqtisodiy salohiyatini yanada oshirish uchun muhim poydevor bo‘ladi.

Dala sharoitida olib borilayotgan agrotexnik tadbirlarni ko‘zdan kechirar ekanman, yuqori hosildorlikka erishish uchun suv tejovchi zamonaviy texnologiyalarni kengroq joriy etish, mahalliy urug‘chilik bazasini yanada mustahkamlash bo‘yicha mutasaddilarga aniq topshiriqlar berdim.

Xorijiy navlar bilan bir qatorda, mahalliy seleksiya mahsulotlarini ko‘paytirish, ilg‘or agrotexnologiyalarni keng ommaga yetkazish va dehqonlar malakasini oshirish dolzarb vazifa bo‘lib qolmoqda.

Kartoshkachilik sohasini modernizatsiya qilish orqali biz nafaqat eksport salohiyatini kuchaytiramiz, balki ichki bozorimizni sifatli va arzon mahsulot bilan ta’minlash imkoniyatlarini kengaytiramiz.