Chorvachilikni rivojlantirish — oilaning farovonligi va oziq-ovqat xavfsizligining kafolatidir

Toshkent viloyatidagi safarim yakunida Chinoz tumanidagi “Yulduz” fermer xo‘jaligiga tashrif buyurib, u yerda amalga oshirilayotgan ishlar bilan bevosita tanishdim.

Mazkur xo‘jalik 10 gektar maydonni egallagan bo‘lib, bu yerda 1980 bosh zotli qoramol, jumladan, “Golshtin” va “Estonskiy Krasniy” zotlari parvarish qilinmoqda. Ularning 650 boshi aynan sut yo‘nalishiga ixtisoslashtirilgan.

Hozirgi yoz mavsumida har bir sog‘in sigirdan kunlik 23-25 litr sut olinmoqda. Albatta, kuz-qish mavsumida bu ko‘rsatkichni 28-30 litrgacha yetkazish rejalashtirilgan.

Xo‘jalik rahbarlari bilan suhbat chog‘ida mahsuldorlik va zot sifatini oshirish uchun sun’iy urug‘lantirish texnologiyasining keng joriy etilgani meni quvontirdi. Bu, albatta, zamonaviy chorvachilikda samaradorlikni oshirishning asosiy vositalaridan biri hisoblanadi.

Biz bugun ishlab chiqarilayotgan har bir mahsulot — go‘sht, sut yoki boshqa chorvachilik mahsulotlari — import o‘rnini bosishi, aholi dasturxonini to‘ldirishi va ichki bozorda narxlar barqarorligini ta’minlashi kerak.

Ayniqsa, qishloq joylarida chorvachilikni rivojlantirish orqali minglab fuqarolarimiz uchun barqaror ish o‘rinlari va doimiy daromad manbasi yaratishimiz mumkin.

Shu bois, men chorvachilik sohasida ilg‘or tajribalarni keng joriy etish, chorva mollarini ilmiy asoslangan ratsion asosida to‘g‘ri oziqlantirish, zamonaviy yem bazasini shakllantirish hamda mahsuldorlikka ta’sir qiluvchi omillarni chuqur o‘rganish zarurligini ta’kidlab o‘tdim.

Axir, chorva — bu oila barakasi. Hovlisida sog‘in sigiri bor har bir xonadonning dasturxoni to‘kin, daromadi esa barqaror bo‘ladi.

Shu maqsadda biz barcha choralarni ko‘ramiz va chorvachilik tarmog‘ini yanada rivojlantirish uchun qo‘llab-quvvatlashni davom ettiramiz.

Agrar sohada texnika ta’minotini kuchaytirish bo‘yicha ustuvor vazifalar belgilandi

Bugun mamlakatimiz agrar sohasini jadal rivojlantirish, qishloq xo‘jaligi texnika ta’minotini zamon talablari darajasiga olib chiqish, sohaga zamonaviy texnologiyalarni keng joriy etish masalalariga bag‘ishlangan navbatdagi yig‘ilishni o‘tkazdim.

Yig‘ilish davomida mamlakatimizda qishloq xo‘jaligi texnik bazasini zamonaviylashtirish borasida amalga oshirilayotgan ishlar, erishilgan natijalar, mavjud muammolar va ularni bartaraf etish bo‘yicha ustuvor vazifalarni atroflicha muhokama qildik.

So‘nggi yillarda fermer xo‘jaliklari va klasterlar tomonidan zamonaviy, resurs tejovchi texnika va agregatlarning xarid qilinishi hisobiga texnika parki sezilarli darajada yangilanmoqda.

Bu holat ekin maydonlarini tayyorlash, urug‘ sepish, parvarishlash va hosilni yig‘ib-terib olish jarayonlarining samaradorligini oshirishga xizmat qilmoqda. Aynan shu islohotlar tufayli agrotexnik tadbirlarni o‘z vaqtida va yuqori sifatda bajarish imkoniyatlari ancha kengaydi.

Biroq, ayrim hududlarda hali ham texnika vositalari ta’minoti yetarli emasligi, mavjud texnikalarning eskirgani sababli mexanizatsiyalash darajasi kutilgan natijalarga to‘liq erishishga imkon bermayotgani aniq ko‘rsatib o‘tildi.

Shu munosabat bilan soha mutasaddilariga belgilangan rejalarni sifatli bajarish, xalqaro hamkorlikni kuchaytirish, zamonaviy texnikani hududlarga yetkazish, eskirgan texnikani yangilash va ta’minot holatini doimiy tahlil qilish vazifasini yukladim.

Zero, bu yo‘nalishdagi ishlarimiz mamlakatimiz qishloq xo‘jaligini yangi bosqichga olib chiqadi, oziq-ovqat xavfsizligini mustahkamlashga va xalqimiz farovonligini yanada oshirishga xizmat qiladi.