حدا منكم كان متخيّل بيوم نشوف هالتحف الفنيّة والعلمية بمكتبة بنص دمشق؟ 🔡

-

عناوين كتب الدكتور سامي عامري بتذكّرني ب مسوخ الكفّار العرب 🤓

أطفال سذّج بفكروا حالهم لقطوا ثغرة بالإسلام وهنن ما بيعرفوا الطيخ من البطيخ!

وضحّكني من قلبي بإحدى المرات ال دادا يلي كان من كللل عقله عم يدّعي وجود أخطاء لغوية بالقرآن 😃

ياا زلمة، مش لهالدرجة الإبداع دبحتنا 🤣

صباح الخير صباح السعي 🪟

〰️ شغلتين حابة أحتفظ فيهن من الأسبوع الماضي قبل ما تشرق شمس السبت الجميل:

⏺️حدث رائع!
في صديقة من صديقات القناة مميّزة جدًا، متعلّمة ومثقّفة وصاحبة حضور وشخصية مُلفِتة، منّ الله عز وجل عليها بنقلة نوعيّة: حجاب شرعي (كانت غير محجبة) والتزام وإعادة توجيه البوصلة نحو الآخرة.

من منصّتي المتواضعة حابّة قلها ألف ألف مبارك! إنتي بطلة، واللهِ بطلة، وأنا ما عندي ربع القوة يلي عندك.. كل شي عم تواجهيه من صعوبات بالبيئة وتكشُّف للناس يلي حولك هو محض تمحيص من الله عز وجل.
وأنا حكيت مرة إنه مستحيل الإنسان يتغير وتبقى بيئته نفسها حتى لو تغيّر للأحسن!
يلي حواليكي ما رح يتحمّلوا يشوفوكي عم ترتقي وهنن لسا مكبّلين بقيودهم الطينية.

اللهَ أسأل لك التوفيق والثبات والقبول وأن يبدلك رفاقًا خيرًا من رفاقك وبيئةً خيرًا من بيئتك، وانشراحًا في صدرك وقوة من عنده سبحانه 🪻

⏺️النقطة التانية هي فكرة خطيرة جدًا جدًا لازم ينتبه لها كلّ طالب جامعي، وهي: علمنة العلوم

علمنة العلوم هي على قولة الغربيين (إخراج الدين من المختبرات) وعلى قولة جماعتنا: (أنا عم أحكي بغضّ النظر عن رأي الدين بالموضوع)

شاب شعر راسي وقت سمعت هالحكي بالجامعة!

كيف يعني بغضّ النظر عن رأي الدين بالموضوع؟ ما فهمتها هي!
جملة بتحسّسك إنه الدين شيء هامشي، حكمة بهي المسألة مو مهمّ، والدين لا يدخل إلى الجامعة والمختبر والمشفى .. إلخ

للأمانة الموضوع مو جديد بس هي أول مرة بصير معي حدث فجّ لهالدرجة..
علمنة العلوم بلشت من لما استوردنا نظام التعليم الغربي البعيد كل البعد عن ثقافتنا وديننا، عملنا بإيدنا مصانع بتخرّج طلّاب مفصولين عن السّماء وغرقانين بالأرض.
من لما انفصلت كلية الشريعة وصارت "تخصُّص" منفصل، من لما طالب الاقتصاد بيدرس الرّبا على إنه (شيء لازم) لاقتصاد العالم من دون ما حدا يذكّره إنه حرب من الله ورسوله.. من لما مااا حدا يجيب سيرة نظريات الاقتصاد الإسلامي يلي كانت سارية بالعالم الإسلامي طوال القرون الماضية وحققت نتائج هائلة.. وطبعا الأمثلة لا عدّ لها ولا حصر، كل واحد يطبّق على فرعه.
بس كنت مفكّرة إنه كلية الطبّ كلية عملية تطبيقية نجت من هي العلمنة، لحتى إجى موقف صحّاني!

〰️ ما في شي بالدنيا اسمه: بغضّ النظر عن الدين! تمام؟
بغضّ النظر عنك وعن علمك وفرعك وأبحاثك عادي ما بتخرب الدنيا، بس (بغضّ النظر عن الدين) هون بتخرب الدنيا والآخرة.
لازم نستوعب كتير منيح إنه العِلم قاصر عن وضع معايير أخلاقية تسيّر حياة الناس.. قد يعطيك حلول عملية فعلًا، بس نتائج هي الحلول على اختلاف الأصعدة ممكن ما يعطيك ياها، وهون أنت بحاجة لوحي.

〰️ أي حدا بده يخالفني ف رح قله شغلة وحدة بس: أنت نفسك فيك جزء غيبي ما بتعرفه ولا بتلقطه، جيب هدا الجزء وارصده واعرف تتعامل معه بعدين تعى حاكيني وحاججني إنك مكتشف كلّ أسرار الكون وبتعرف تسيّر الحياة بدون وحي.

-

وإشراقة بتحبّك والله! 📖

ادعموا سيرين وشجّعوها وباركولها (المباركة خاصة بالبنات ")) 🌸

ورجوها إنها مو لحالها وإنه هاد الطريق مليااان ناس تقيّة وظريفة وفرفوشة ومتعلّمة ومتحضّرة 📖

أحسن ألف مرة من النماذج المعفّنة يلي ما وقفت تهاجمها بعد كلّ ادعاءات (الحرية الشخصية) بس لإنها اختارت ربّها وآخرتها ☝

لحظة إدراك..

وقت سجلت بهندسة الأجيال ما كنت بعرف ولا بنت مسجّلة فيها، وكنت لما أعرف أنه في بنت من دمشق حسّ لاقيت كنز ❤️

اليوم - ما شاء الله - فقط فقط صديقات إشراقة يلي مسجلين بدبلوم هندسة الأجيال بالعشرات! وما حدا ممكن يقدّر فرحتي وقت أسمع جملة (عرفت الأكاديمية عن طريقك) ..!

انتو يا بنات عم تتعلموا أعظم علم ممكن تتعلمه فتاة مسلمة، ألف الحمد لله إنه رب العالمين يسّر لي ولكن هي الفرصة.. وفخورة فيكن أكتر مما بتتصوروا 👍

-

صباح الإنجازات 🎈❤️

اللهمّ تقبّل منا وخلّقنا بأخلاق سورة النور!

المادة الأولى من الاختبارات النهائية: تمّ 🆗