و إن جا مجالك و استمروا بطاريك
قمت أتليها كنّ ماني بداري .

" يا وجوديّ و التوجّد ما فيه حيلة
أشهد إن بعض الغلا يعميّ البصاير "

من باب حفظ الكرامة
« ماجيتك يوم إنها ثقال معاسير
وشلون أجي يومها خفايف وهواين »

"والله إني ما اسفهلّ بونس غيرك .. لو عطوني
قصر في حي المصيف وقصر في حي العليّا"

غالي لكن خطاك ماهوب مقبول
‏وتهاونك بالعذر ماله شفاعة

ودخيل العيون اللي عليها الحلا جذاب
تشوف الولع فيه ولا تدري وش تاليه

أجي وكل من قبلي رماه الوقت للنسيّان
‏كأن الغِيد عثرات الخطايا وأنا التوبة

عداك اللوم والشرهه ولا يلحق مداك عتاب
مادام إنك تبي ترحل؟ — توكل لا تواسيني

" من يوم أخذك القدر وأنا على هوني
ما أعرف الأسبوع غير بـ ليلة الجمعة "

" ساعة مطيحك يوم هنت العشرة اللي ما تهون
ولا دمعة من دموعي .. لقيتك قدّها "

"خبل اللي يحسب ان الهقاوي ما تخيب
‏قد هقينا فـ الثريّا.. وطاحت فـ الثرى"

" أنت مثل اللي يقلّطني ولا يقهويني
الفعول شحاح لو إن الكلام مفوّه "

خالي من الناس وإن مرّوا خلاله ثقيل
‏ما يقبل إلا أنت تستولي - على خلوته

‏مافيه داعي تغلّى وأنت عارف غلاك
‏روحي معك ملّت الشكوى من إهمالها

‏إن ما لقيت أيّ عذر تقدّمه عن جفاك
‏أرسل : أحبك ،، أحبك : عذر بلحالها

عافك الخاطر ولا عاد بالقلب حسرات
‏ذيك المعزة أنت من ضيع قدرها

‏"حقّك ليا هبّت علي نود ذكراك
‏أرخي لها خاطر معزّب لضيفه"

ولو بيني وبينك مسافات وأمتار وبلاد
‏أحسك هنا – بين ضلعيني

يوم كان الكل سالي ومكتوف اليدين
‏كانت يدينك هي أبشر وش اللي قاصرك

من غلاك أشوف ذا الناس في عيني بلاش
‏وكل من جاني يوالف عجزت أوالفه