المواضيع المابتتحسم مهما طالت جرجرتها ومطتها لابد يجي يوم وتنتهي .. والقرار الانت دايما بتتهرب منو لابد يجي يوم وتتجبر تاخدو ف ما تأخر اي شي لبكره واستعجل واقلب الصفحه او اشرطها عديل ماهو كلو في سبيل انك تكون مُرتاح ، مُباح ! .

‏طول ما ربنا عارف الي بقلبك انت م ملزم تبرر .

‏محمود طه قال "انا كنت بحكي ليك عن هزايمي ما من باب الفضفضه ، انا كان قصدي انك ما تهزميني" وبصراحه دي اكتر عباره لاقتني وصفت الخذلان.

‏أي علاقه انتهت بسبب إنك بادلت انسان نفس تصرفاتو ما عليها ندم أبدا .

حب للبتكلم معاهو مرة في الشهر وما بنسأل عن بعض كتير بس علاقتنا بتفضل قوية واول ما نتقابل بنتونس بالساعات .. يشهد الله انت احلى معرفة .

‏الحاجه الإنت خسرتها الفترة الفاتت دي ربنا هو المُسبب الأسباب عشان تخسرها ؛ لأنو هو شايف إنك تستاهل الأحسن ، شايف إنو الحاجه دي لو وجودها كان إستمر كانت ممكن تدمر حياتك ، يمكن الحاجه دي خسارتها مكسب ، يمكن لي قدام شويه تقول الحمدلله يارب إنك بعدتني عنها
ف اتفائلو .

غالبًا الإنسان بعد ما بيمر بوقعة نفسية صعبة وتقيلة على روحو ، بيقيف مع نَفْسو ويحاسبها بقسوة ، وبيتوجع لما يفتكر خذلانو لذاتو .. وتقليلو من قيمتو ، و ليه و كيف سمح لناس مايستحقوا إنهم يأزوه بيتألم ايوه !
بس بيطلع من المرحلة دي عارف قيمة نَفْسو كويس ، دايرتو المُقرَّبة أصغر بس حقيقية ، ومتصالح مع عيوبو ، و ما مُستعد يسمح لأي زول يقلل من قيمتو أو يحسسو إنه ما كفايه .

ريما عباس

فكره تقبل الشخص بعيوبو اليومين دي صعبة جدآ ، لأن كل واحد مستحمل عيوب نفسه بالعافية ، دا لو كان معترف اصلا بعيوبو ،، ف ياريت يا نقبل بعض يا نستعوض ربنا في بعض .


انا عن نفسي عيوبي اليومين دي أكتر من مميزاتي ، لدرجة ان مواقفي الحلوة ما تشفع ولا تصبر اي بني ادم علي انا معترفة .. دا لو في شخص اصلا يعني افتكر الحلو !
ف انا بحترم اي شخص ح ياخد الخطوة دي ويستغني عني لإني أستحق .

و بقيت م عارفة انا بعمل كدا ب قصد إني أبعد الناس عني وانا الاتغيرت ولا الناس ال ظهرت على حقيقتها،؟؟ ... بس غالبًا الاتنين مع بعض عشان بقيت دايما حاسة اني ما عايزة ناس حولييني ولا عايزة اتعامل مع شخص جديد لان الناس فعلا بقت مؤذيه ، بقيت بفضل الوحدة لأنها احلى بكتير من الناس المذيفة المؤذية ال بي وشين . . . .

ريما عباس

‏ساعات المعاملة بالمثل بتبقى أحسن من العتاب .

نفسك اهم ..
اخيرا فهمت معنى الكلام ده ..

طول عمري امي بتقول لي ماتخلي شي في الدنيا يجي عليك،نفسك اهم ! ..
دايما كنت بشوفها مهتمه بنفسها حتى وهي مشغوله بالبيت .. ماف مره قالت خلاص اعمل الحاجه دي لنفسي بعدين ، لا دايما بتعرف تستفيد من كل دقيقه شغاله فيها لصالحها ..
ومع اني دايما شايفه الحاجه دي فيها بس ما كنت مركزه فيها قدر ما ركزت الليله وده السبب الخلاني اكتب البوست ده ..
كنا عايزين نخبز كعك ف من الصباح انا سلفا كنت منضفه امس البيت كلو للمطبخ ده بس طبعا امي الله يديها العافيه رجعتو لي خرابه زي ماكان😂.. ف كنت بغسل في جبال العدة دي وبرتب وكده .. ف امي جات قالت لي بعد غسلت العده انو يلا امشي سرحي شعرك واعملي كريمك حتى تعالي ماتخلي شي يجي فوقك يابت نفسك اهم ..
وهي نفسها عملت كده حتى جاتني .. ف قلت والله بجد نحنا مابنعمل كده ليه ؟
انا دايما كان لما يكون عندي شي شغاله فيهو بختو فوق لنفسي وبعملو حتى بعداك اشوف نفسي وين .. وكلامي ده ماقصدي بيهو الاهتمام الخارجي بس لا حتى الداخلي حتى في اي شي بخصك ..نفسك اهم !

اول امس تقريبا رسلت لي بت بتسألني كيف تقدر ماتتأثر بمشاكل الناس ، لأنها بتحس انهاا لو مازعلت لزعلهم كأنها بتخونهم عديل او ماحاسه بيهم يعني ! مع انو الحزن البتمارس فيهو ده بيأذي فيها اصلا ! ..
يعني جد لازم عشان اكون مهتم بالقدامي وحاسي بمعاناتو اني ازعل زيو ؟

نحنا ببساطة اتعودنا انو كل شي في الدنيا دي عادي جدا يجي قبلنا ونحنا في اخر الرف لو ماكنا برا اصلا !

حب النفس ده ماكلام ويتقال ولا فعل واحد تعملو وكده خلاص اسمك بتحب نفسك لا هو اسلوب حياة ..تتعلم تعمل حاجات معينه ماكنت بتعملها زمان ..تتعلم تشوف نفسك وين وتعمل البناسبك انت ما البناسب الناس ..حقيقي يعني هي خطوات !

انا كنت مابحب احرج حد لو طلب مني شي حتى لو انا ماقادره عليهو بعملو عشان مايزعل مع اني انا البكون مضايقه ومامرتاحه اصلا ..
لقيت اني بتصرفي ده قبلت على نفسي حاجات مازلت بعاني منها للأن بس عشان ماقلت لا من الاول .. وبراكم حتلاحظو للحاجه دي ،الزول البتنازل كتير حرفيا بيبقى مداس للناس والبتعملو ليهم عن طيب خاطر وكرم اخلاق منك حيبقى مع الزمن حق مكتسب وصعب جدا تبطل الكنت بتعملو ليهم لأنهم وقتها حيشوفوك كعب ومتغير وبلاب بلاب بلاب ..
بس ماف اي مشكله ،رجع حقوقك من جديد وشوف انت واقف وين بالضبط .. وحلل تصرفاتك مع الناس واسأل نفسك قبل اي تصرف هل انا فعلا عايز اعمل كده ولا بس عشان ما ازعل فلان !

خليك فاهم انك مامجبور ابدا تعمل شي انت ماعايزو .. قول لا ببساطة بس حتى في رفضك ده خلي اسلوبك يكون حلو ، خليك محترم وتعاملك يشهد بيهو كل الناس ..
وللحديث بقية اكيد ..

-نفسك اهم .
#lena

كان العتاب عشان تتصلح ، ما عشان تمشي يا رفيق .

بقيت راضي لدرجه اني لو فقدت اي شي في حياتي ما اظن اني ممكن ازعل تاني .. انا شفت الامر من كده ف الباقي كلو مهما كان حيكون عادي .. عادي جدا

احيانا احنا بنبعد م عشان يعرفو قيمتنا , بنبعد في اللحظة اللي احنا اكتشفنا فيها قيمتنا .

‏دايمآ بنقابل الشخص الصح في الوقت الغلط وبنقابل الشخص الغلط في الوقت الصح
المشكلة ما في فرق التوقيت ولا في افتراضية الصح والغلط أحيانآ بتكون المعضلة في توهانا والأوقات الصعبة البنمر بيها بنكون فيها م عاوزين نعرف الصح من الغلط و لا عندنا الرغبة في تقيّم اذا كان فعلا الشخص ده ‏هو صالح وجدير بقلبنا فعلا و لا لا .. في الحالة دي بنكون محتاجين لاعادة تقيّم نفسنا ونطلع من موجة التوهان العاشينها في الأول عشان الصورة تكون واضحة قدامنا لأننا مجرد مانفوق ممكن نعرف نحسن الإختيار .
وحتى الاختيار بقى صعب جدا في الوقت الحالي
ف ابقو عشره ع نفسكم 💜 .

لأولل مره فعلا احس اني طاقتي خِلصت وماعندي حتي القُدره على اني اتناقش مع أي بني أدم .

‏انا خدت قرارين ريحوني جداً مؤخراً و هما إني م ناوي أحاول مع شخص مرتين في حاجة ، و لا ناوي أثبت ل شخص إني عكس الصورة .

نرجع ونقول الجرح الما بتقدر تلملمو ماا تفتحو .

تصبحو على خير 💜

(الأنانية💔)

بعرف واحد زميلي كان مرتبط بي بت و كانو بيحبو بعض شديد 💜 و بدون سابق انذار عرفت انهم انفصلو ،، استغربت شديد لدرجة انى مشيت سالتو عن السبب قال لي "كانت انانيه في مشاعرها" .. حسيت انو الجملة دي وراها لغز او سر بس م حبيت ادخل فى تفاصيل .. عدّي اليوم وانا بحاول أترجم الجملة دي .. سألت ناس عن مفهوم الانانية بالنسبة لهم وشنو المواقف اللي حسو فيها بالانانية واتصدمت من الاجابات والمواقف .

وحده صحبتي قالت " انا كنت متفوقة ف الجامعه .. و في اخر سنة حصلت مشاكل كتير بسبب رفض اهلي للولد البحبو .. بس انا كملت معاهو واتحديتهم لاني كنت مؤمنة جدآ انه بيحبني وانا فعلآ كنت بحبو .. بس بسبب المشاكل دي ما عرفتا اركز في الامتحانات ولما النتيجة ظهرت اكتشفت اني رسبتا ف مواد كتيره .. يومها قعدت ابكي واتصلت بالولد دا احكي ليهو .. اتصلت كتير و هو ما رد علي و بعد اكتر من 40 مكالمة رد و قبل ما اتكلم قال لي " انا بلعب بلايستيشن مع اصحابي اول ما اخلص هتصل بيكي..وقفل " .. استغربت شديد انو حتي م سألني عن النتيجة مع انو عارف اني ماشه اشوف النتيجه .. دخلت اوضتي ابكي وحرفيآ بقيت منهارة شديد .. المهم اتصلت بيهو وريتو اني مضايقه من الحصل .. قال لي بالنص "عايني انا اصلآ مخنوق الفتره دي .. انا فالطريق لي بورسودان هقعد اسبوع لما ارجع نشوف حل للموضوع دا " .. غصب عني سألتو مخنوق من شنو .. رد بكل جدية " عادي .. هنزل شغل الاسبوع الجاي ولسة ما اتمتعتا بالاجازة " .. قولتا ليهو " لا انت بتهظر اكيد .. اكيد بتهظر انا بموت وانت مضايق علشان م استفدتا من الاجازة " .. قفلت الخط في وشو و انا م مقتنعة و لا مصدقة .. اخدت منوم من صدمتي والكابوس البعيشو .. اول ما صحيت فتحت الانستقرام بتاعو وفعلآ لقيتو نشر صور وهو ف كورنيش ف بورسودان .. اتصلت بيهو وقولتا ليهو " انت بجد ف بورسودان .. ؟ " .. قالي اي و م عايز اتكلم في اي مشكلة .. انا بغير جو قبل ما انزل الشغل "
يعني بعد ما هو م حاسس بي الحاجات العملتها عشانو واتحديت اهلي و بعد م كسرني قدام اهلي لا وكمان ماشي يغير جو ولا حتى سائل ف نتيجتي وكسره الخاطر العملها لي 💔
يومها بس اتاكدت قدر شنو هو اناني ما بيفكر غير في نفسو و مصلحتو و حياتو هو بس و اخدت قرار اني هبعد ولو كان البعُد دا هيكلفني حياتي .. اهون من اني اعيش مع انسان م بيحس واناني ..

وواحد كمان زميلي قال لي " انا يوم اتشاكلتا مع ابوي وطلعت وخليت البيت يومها ما كان في جيبي غير 15 جنية .. المهم اتصلت بالبت الكنتا بحبها وحكيت ليها كل الحصل وكل ظروفي .. قعدت تهون عليا شوية فحسيت انو في حاجة غلط او داسه عني شئ .. قولتا ليها " انتي مخبية عني حاجة " قالت لي " لا " .. اصريت انو في حاجة المهم قالت لي " م ينفع تستلف قروش من اي واحد من اصحابك .. و تجي معاي بكرة السينما .. اصحابي كلهم ماشين مع المرتبطين بيهم و انا م عايزة امشي براي " .. استغربت من رد فعلها المهم قولتا ليها حاضر وقفلت الخط .. افتكر بعد المكالمة كسرت الخاطر .. و قطعت علاقتي بيها تمامآ .. لانها ببساطة انسانة ما بتفكر غير في نفسها ومظهرها قدام اصحابها 💔

الشاعر هشام الجخ في وحده من قصايدو قال " مش عدل تبقي في ترف وانا بطفح الكوتة .. ما ياما نقسمهم واخذة قصاد واخذة .. ياما لامواخدة توتة يا حدوتة " .

الشخص الاناني في العلاقة دا العن شخص ممكن تتعامل معاه .. ما بيشوف نفسو غلطان و لو اعترف بي غلطو هيكون عندو تبرير لي كل غلطة .. م بيعترف ابدآ بأي عذر لو زول قصّر في حقو .. وعنده مليون مبرر لتقصيرو واهمالو .. شايف نفسو الوحيد الإتوجع و تعب ف الدنيا وان ماف زول غيرو بيستحق الاهتمام او الحب .. لو بتموت قدامو وهو ايدو بتوجعو .. هيضايق انك م جمبو وحيعاتبك و م بيفكر حتي في انك بتموت .. ابعدوا عن الناس دي شكلها حلو من بعيد بس لما بتقربو منهم بتشوفو الانانية الفي طبعهم .. ابعد قبل ما تكتشف انك مسجون مع انسان م بيفكر غير في نفسو بس .. في حياتو هو بس..في همومو هو بس..أبعدوا ولو هتعيشو حياتكم كلها من غير حب دا اهون مليون مرة من انكم تعيشوها مع انسان بيستنفذ كل طاقتكم ومشاعركم 💔 .