مظلوم يبني يا علي
_____
ودعتك بغلاتي يبني يا اغله مني
من فارگت نسيمك شم الهوة فارگني
يالشيبت عدوك بيك الزمن شيبني
بس كلمة وحدة ظلت اه يبني واه يبني
احچيها والدمع يهلي ...مظلوم يبني يا علي
_____
امسح دما جراحك وعيني تعاين رسمك
اتحسر ابوجداني فدوة اروح لرسمك
ترضاها يغلاتي تبقه وحيده امك
من حرگتي ومصابي كل سا احن واضمك
الراح شيرده الي ... مظلوم يبني يا علي
_____
ياشبه جدك احمد حسرتك ما مثلها
من انظر لجمالك نظرتك ما أملها
امك على مصابك شيلة صبح شكلها
ودعت هيبة عمري بعدك تسلط ذلها
دم البوجهي منجلي ... مظلوم يبني يا علي
_____
وحسين سابح يمك بدمع الحزن اشوفة
وحده ولامناصر وتمردت الوفة
چان الگمر ايدينه وهسه بلا چفوفة
مكسور ظهرة عليكم ويعاتب بطفوفة
ويصيح حيهم يا هلي ... مظلوم يبني يا علي
_____
يالعلمت شبابك بهالتضحية علامة
كلمن يناصر حگه يتقلد بوسامه
بالخدمة والمجالس بيكم رفعنا هامة
هنياله مثل الأكبر گام ونصر إمامة
والراس بيكم يعتلي ... مظلوم يبني يا علي
_____
موقفك يبني الأكبر يدرس بمدارس
عالحگ نعاني ونثبت ونقدم الفوارس
خلهم يگولو علينه الصفوية وفارس
لاخر نفس عمرنا منعوف هالمجالس
والماقبل خل يولي ... مظلوم يبني يا علي
_____
مجيد عبد الرضا القريشي
خادم الاكبر

هوه هم يسوه العمر من دونك
منين اجيب عيون ويشوفونك
روحي ذوبها القهر .. يا امامي المنتظر
صحرة وبلاية مطر... من دونك
________
بالمجالس ادري تحضر من تقام
تنشر دموع المحبة والسلام
وعيني صلفة وغرگت بنص الحرام
منين اجيب عيون وتشوف الإمام


عين التشوفك تريد الفطرة .. مو على الآثام تگظي السهرة
وياها مايغيد الحچي .. ولاكثر هذا البچي
عالمذلة ترتچي ... من دونك
________
خنگة عمري دونك وماكو هوه
الشوگ ما خذني ولاينفع دوه
هيچ حظ عندي يا شيال اللوه
وربك بفد يوم يجمعنا سوه

حلم هذا مو صعب تحقيقة... بس تريد اليحمله ويطيقه
يريد ايمان وصبر .. تقبض الدين بجمر
دوم واگف منتظر .. من دونك
________
اقره چلمات العهد ويه السحر
وعيني تغرگ بالدمع چنها بحر
خلصت عمري شهر خلف الشهر
يمته اسمع صوت ابن فاطم ظهر

صيحة انطرها ودليلي صايم .. تبشر الناس بظهور القائم
عيوني تنظر عالسما .. كل نهار معلمة
لا لي لون ولادما .. من دونك
________
دوم جلماتك بگلبي تنعرض
احچي بيها عالملا طول وعرض
عجل الله فرجك صارت فرض
يملي قسطك والعدل هاي الارض

كلمة انطقها بدموع اعيوني ... كان الله بعونك انته وعوني
اني دمعاتي اسف .. وانته راياتك شرف
سيدي لوني انخطف .. من دونك
_________
يا سحابة غيث ونتاني مطرها
تسگي صحرة روحي ويورد عمرها
عندي لحظة شوفتك تدري شكبرها
ما اظن ارض وسما توسع أجرها


مثل دمع حسين اجر الشوفة .. يا صلاة الانبياء بالكوفة
لجيتك ادم وگف .. ونوح صلى بالنجف
وهود وي صالح هتف ..من دونك
_________
يافرج مكروب قابض دينه جمره
يا خضار اليحيي دنيا موت حمرة
شفافي من دعواتي الك يالمهدي صفرة
بالمجالس تنطرك وتريد نظرة


من تسولفلك تنگط ملوحة .. من دمع عيني ودليلي ونوحة
من نزل مني الدمع .. تذكرت ذاك الفزع
گلب زينب ينصدع ... من دونك
_______
مجيد عبد الرضا القريشي
٠٧٧٢٦٨٧٧٦٠٥

ذليت الماي وانته السگاي
لعين حسين ودمع سكينه ما همه الباطل
شال طفوف وساوه صفوف سيف ابو فاضل
انه السگاي
_______
صاحب نخوة وينگط غيره معروفة خصاله
ذل الماي وگوم الباطل ذل الچتاله
نور ونازل ضوة الحومة بوجهه اليتلالة
ياجيش اليبرزة بسيفه يجندل ابطالة
الكافل لو صاح تتلاوة رماح
أعظم موقف بانهار الطف سواه الكافل
________
يا شجعان السوت مثلك بهالدنيا نشوفة
ضحة بنفسه ونور العين وگطعها چفوفة
من يساجل تخرس كلها من الطف للكوفة
ردنا نوصفة وما وفينا گطرة بموصوفة

الضحهة العين و چفوف اثنين
وسط زنودة علگ جودة وعالعالو صايل
_________
لو دورت الدنيا وتبحث كل الوقعات
ما نلگه مثل مصيبتكم يا اهل الطيبات
نذكركم لليوم ونجري دموع واهات
ومن نذكر عباس وجودة تعله الرايات

دوم بذكراه لاماننساه
بلا عباس المجلس يبرد ويتيه الگايل
_______
صارت معجزتك عالماي وهناك تكون
شكد رادو يثنونك عنه لاميگدرون
ذليت الماي واعوانه وچان المضمون
يانفسي من بعد حسيني هوني ولتكون

شلون تشربين وضميان حسين
خط العباس اعله الشرعة عنوانه الكامل
________
واصل للعالم مضمونه غيرة ونوماس
حارت بيه حتى العدوان وكل هاي الناس
للخوة وللدين افعالك صارت مقياس
وبكل شارع صارت راية بسمك عباس

ياحامي الدين يبن الطيبين
يا مضمون بكل العالم معروف وشامل
_______
مجيد عبد الرضا القريشي

شال الراية شال الراية... مسلم وحده بلاحماية
_______
نازلهم والراية بئيده
وهاشم صارت عنه بعيده
بس همه حسين وتاييده
ولهالموقف صار دماية
____
محد ظل وياه عوانه
خانوه الزمرة الخوانه
بس طوعة الواست احزانه
هي الطلعت عدها حچاية
_____
ابواغ الظالم نازلها
زمجر بالكوفة وزلزلها
وحده وكل هيبتهم ذلها
وراحو جابولة الرماية
_____
ولاخر لحظة الخيالة
تفر وخافت من خياله
ولاواحد يتجره گبالة
هيبة حيدر عنده وايه
______
شگد شدو بس ما گدروله
بكل شارع حفرة يحفروله
غدرا يالله الزمرة يطولة
غدارة وعادتهم هاية
_____
مسلم دگ اسفين الثورة
بئسم حسين وطايع امره
منه تعلم هذه العبرة
لتبيع الدين بچم داية
______
افهم زين ورتب امرك
محد يقبل باچر عذرك
لاتخون بعهدك وبسرك
وية الظالم ترفع راية
______
مجيد عبد الرضا القريشي

ثكلى الولد والخوان والناگة تعرج بيه
وتغير اسمي بهاليوم الزينب المسبية
ـــــــــــــــــــــــــــــــــــــــــــــــــ
انه الفگدت ابكربلا خمس اخوان
گلبي عليهم انچوه بالنيران
من اذكر امصاب الذبيح العطشان
بالحومة راسه مكطوع وماشربوه امية
ــــــــــــــــــــــــــــــــــــــــــــــــــــــ
وأعله الولد أهات ما تخمد دوم
لولد الحسين أولدي گلبي مهضوم
ولبن الحسن دمعي نزل بحر دموم
ولولاد مسلم آهات تلهب مثل جمرية
ـــــــــــــــــــــــــــــــــــــــــــــ
ومصاب البصوب النهر ما يشفة
كطعو نياطي ابيوم كطعو جفة
من مثله بوعوده تكفه اوفه
لو بيدي عيوني انطيه وانطيه اثنين ادية
ـــــــــــــــــــــــــــــــــــــــــــــــــــــــــ
تعمى النواظر عالمشه وخلاني
بسوط العده اتلوع واحزاني
احسين ما مثله يعوض ثاني
وشيعوض الكافل ذاك ومنهو ليرجعه ليه
_______
حال السبية بلا زلمها يا حال
مكسورة الخاطر جريح الدلال
حداي ضعني بعد اخوتي الچتال
وتباري جدامي الروس من فوگ السمهرية
________
جرحي چبير وما تجبره الايام
بهاي الارامل حايره والايتام
بس اليسرني شيعتي والخدام
نصبو مجالس احزان ومصيبتي مقرية
______
نصبو مجالسنا التاسو بينا
ولحسين كل طور النعي قارينا
اه اعله زينب واه يا والينا
نسمعها كل ليلة هنا بالنبرة العراگية
________
خادم سيدتي زينب
مجيد عبد الرضا القريشي
لاتنسونا بفضل دعاءكم

يا زينب يازينب يازينب يازينب
_______
زينب اخت راعي الزود زينب والنعم منها
مليت الفرح هينوب واحزانج فلا ملها
ديني وملتي انتي بحزانچ اكملها
ورداتچ على الطيبين بيت لبيت حاملها
_________
يخت حسين والعباس واللافض چبد مسموم
لسه الحسره بعيونچ مكسورة بگلب مالوم
بين خوان مچتولة بين الخيل ثكله تحوم
ونار خيام مسمومة وكل ساعه طفل ملچوم
__________
عمت عين الجفتها دموع بحزنچ ما يواسونچ
احنه بخير برض عراگ وانتي لشام يسبونچ
حتى من النعي اعله حسين ياحيف ويمنعونچ
لو ردتي تحاچي الروس بسياط ويضربونچ
________
يا حيف والف وسفة زينب للغرب تطلع
مجتوفة اعله هزل النوگ حمرة عيونها وتدمع
اريد انعي ليسرها اليوم واريد الماسمع يسمع
الطم واطبر اعله الراس ولخت حسين اتلوع
_________
انجمعت شيعتچ هاليوم ودمام الحزن زمجر
مثل نار الخيام الظه بهرش اگلوبنا توجر
عله الضعن السگاه الضيم ولعدوانها ميسر
اندگ الصدر ونصيح وا ويلاه يابو الاكبر
_______
يا زينب عهد وياچ وي مجره الدما يجري
اعلن ذكرچ بكل دار ادري بهالاسم اجري
يحضر بيه ادري اليوم المهدي المنتظر ادري
والزهرة تبارك بيه وتگظي حاجتي ونذري
________
مجيد عبد الرضا القريشي

مسلم شوفة بأرض الكوفة حي بعده ومامات
خالد فكرة وبكل عشرة ندميله الهامات
تاج المرقد شهد ... طاحوا هو الصعد
________
ياكلمة توصف موقفك كل النحو ما فاد الي
انصدمت اقلام الشعر وخلص حبرها من الملي
واحتارت اوزان الشعر بوصفك ياعشگي الاولي
ياوصف يوفي موقفك يا تربية حيدر علي

وشما اكتب عن هذا الحب ماتوفي الاقلام
يا دين وحق بيك اتالق كل شاعر والهام
باسمك گلبي نشد ... طاحوا هو الصعد
_______
رغم السدا بذاك العصر والي جره من اهل الغدر
ظليت ثابت وحدك فارس چبير ومقتدر
والگوم رادو ذلتك وما گدرو ابهذا الامر
وين الامارة والگصر وين ابن سعد وية الشمر

طبع الخاين الكم باين وتفضحه الايام
بكل موصوفة اليوم نشوفة بكل شارع هدام
خانو بالمعتقد ... طاحوا هو الصعد
________
كلمن يزورة بهالعصر شاهد على كل ما جره
وين اصبح الطر شفته بگبرة ولا واحد دره
ومسلم ذهب مثل الشمس تلاله گبته الطاهرة
وسطح القصر ذاك الظلم اثارة ظلت مسخرة

هذا الصاير لاتظل حاير كل ظالم ميدوم
لاتمجدله وتترحمله اخرتك مشؤوم
هذا من الله وعد ... طاحوا هو الصعد
______
مسلم لون طاريه اجه بالمجلس انده والنعم
واذكر معاه شيبة بخت مدمية بسيوف الظلم
واذكر بعد موقف رضا رب العرش ذاك الاسم
طوعة مره بس الصدگ تسوه ملايين الزلم

ماكو ريبة بس الشيبة هاني وطوعة وياه
ضحو دمهم لا ما همهم كل جيش العاداه
اختارو درب السعد ... طاحوا هو الصعد
________
لسان الحسين لكل عرب مسلم سفيره وحجته
صاح بكلامه الحيدري ياكوفه هذه رسالته
القيها الكم والكلام من الله سر كتابته
جنة تره حب الحسين والضده فأكد جنته

هد وقاتل وحده وساجل شعره بحب حسين
ثبت ثاية صارت اية شافتها كل عين
والينكرو عهد ... طاحوا هو الصعد
________
انطانا مسلم عبرته نمشي عليها بكل زمن
ما نرضخ لظالم ابد وافضح خططهم للعلن
ما نترك حسين الولي لو كل جثثنا تعلگن
ما انبيعه ابحجة وطن احسين معناه الوطن

حسين الثورة ومسلم عبرة بلياهم شتقود
تبقه بذلة واحنة نگله عود لرشدك عود
ظل العنا ابتعد ... طاحوا هو الصعد
_________
خادم خدام الحسين ع
مجيد عبد الرضا القريشي
نسالكم الدعاء

عدنا دمعة مو مثل كل الدموع
عدنا دمعة تحترگ مثل الشموع
هزت العرش المبين ... دمعة ايتام الحسين
عدنا دمعة
______
اول الدمعات نزلت نهرجاري ومو قليلة
بيها حرگت گلب يعتب بالهجر هدمو دليلة
هذا دمع بنوح غربة وي جمر عله تسيلة
فسر صخور الرواسي اه يا دمع العليلة

عالهجرها ظلت بوحشة تنوح
عالهجرها تحسب ايام وجروح
عالدرب مشبوحة عين ... دمعة ايتام الحسين
عدنا دمعة
______
ثاني دمعه جمرة چنها ذوبت گلب الحديدة
عليي بالكوفة هجرها تجذب النوح وتعيدة
اه يا دمع الزغيرة واه يا غربة حميدة
ذاب گلب الكون الها من تنادي بوي اريده
بوية بوية تنده وحمرة العيون
بوية بوية ريت لو يمك اكون
تصيح وينك بالحنين ... دمعة ايتام الحسين
عدنا دمعة
______
هاي ثالث دمعة هلت والنحيب يسيل ونه
راح صوب النهر عمها بجربته ولا جية منه
ظلت تنادي يعمه الگمر شو غاب عنا
عمة واعدني يجيني وگلي لتخافين سكنه
شو تأخر ادري ما يخلف وعد
شو تأخر خاف غدروه الاسد
عمه خاف گطعوله الادين ... دمعة ايتام الحسين
عدنا دمعة
______
ورابع دموع اليتامه كالدما عالوجنة تسجم
بچت الدنيا واهلها وبوريد الگلب تهدم
يا مصيبة الماكو منها الجرت لاولاد مسلم
ابتلاهم گلب قاسي حاقد ومنگوع بالسم
شگد بچوله ومارحم ابن الزنا
شگد بچولة عوف واحد خذني انا
ما رضا إلا الثنين ... دمعة ايتام الحسين
عدنا دمعة
______
واطول الدموع الجرتها برض شام وغاضرية
تنحب الروس لبچيها عالرماح السمهرية
خامس الدمعات قصة الك ترويها رقية
يوم شافت راس ابوها بالطشت صاير دمية
من وصلها شبگت الراس بقهر
من وصلها گامت تبوس النحر
وانگطع منها الانين ... دمعة ايتام الحسين
عدنا دمعة
______
وعدنا دمعة الذرفها شگد اجرها ماني قايس
الرواية عن محمد وال بيته والمدارس
دمعة تطفي كل جهنم للحضر هاي المجالس
هاي رحمة لشيعة احمد بالقصيدة أمر سادس
هاي دمعة بيها اجر شما تريد
هاي دمعة ترهب الوالو يزيد
تواسي مگطوع الوتين ... دمعة ايتام الحسين
عدنا دمعة
______
هالبرية وكل دمعها وما بقه هالكون ينحب
انجمعت بهمها وحزنها يا خلگ بعيون زينب
ياگلب مثلج حملها بحسرة اخوانه تعذب
من السبا وسوط الاعادي مألمه والظهر حدب
اه يزينب دمعچ بكل الدهور
اه يزينب يجري انهار وبحور
باقي ذكره لهالسنين ... دمعة ايتام الحسين
عدنا دمعة
______
خادم ايتام الحسين ع
مجيد عبد الرضا القريشي
نسالكم الدعاء

شكراً يرب يومية ... خلاني كل ليلية
اقرالچ وانعالچ يا زينب المسبية
يا دمعة ايامي ... حققتي احلامي
________
سورة حمد صار الخدر منه تعلمنا نكبر مضايفنا والخدمة مبدئنا
واخلاص من عيني الدمع عالمنبر من انحب چن راكب بمركب واقره حزن زينب
خسران كلمن ما ركب معانه
ضيع الجنة وما حصد امانه
والماعرف نحر النزف ماله امان ولاشرف
واشكرهم الربوني ... بحب زينب الغذوني
يحچولي بمصيبتها ... ولمجلسچ ودوني
ياحجة امامي ... حققتي احلامي
________
من زغري لازم مجلسچ وامليهن عيوني والكل يسمعوني بيكم يواسوني
يوم وبعد يوم انعرف بكل مجلس القايم اسمي على الوادم
انه الچ خادم
اسمچ على لساني نزف حروفة
مثل دمه حسين برمل طفوفة
صوتي علا بين الملا وصارت حياتي كربلا
بيكم تميز امري ... منذور الكم عمري
ابكل مجلس من انخاكم .. اخذ مرادي واجري
ومن اذكر الضامي ... حققتي احلامي
________
نعيي وكلامي لحضرتچ من يوصل الشفة كوثر جرى بضفة بيه كل مرض يشفة
وبصدري لطمات الحزن ينبوع مي صافي فاضت على اچتافي حصن ودوه شافي
صورة محنة وطيب بين عيوني
‏اشما اطيح بضيج ما تعوفوني
‏كلمة وفة موعاطفة بيكم عبرت العاصفة
‏اكتب غلاچ بدمعي ... واعلة الجرالچ انعي
‏توجعتي واتالمتي ... وبيكم اطيب وجعي
‏بالكوفة لو شامي ... حققتي احلامي
________
يا مدرسة سيد الرسل خدرچ صبح مله لأصل الشرف عله
فوگ البشر كله
بيه نؤمن برغم الفتن چن علي واسراره ايحارب اشراره والخدر فقاره
الدارس قضيتچ اول بدفعاته
شيخ بصفاته معدل بجلماته
ثورة أمل ضد الجهل اتحارب العاف الخجل
المادرسوا مناهجچ ... صاروا مخازي اخلافچ
ابكل جامعة مفسدهم ... چي ما قرو اخلاقچ
صورة گلب دامي ... حققتي احلامي

________
صوت الخدم يمچ سجد والقاري بنغمه والي كتب كلمة صار بألف نعمة
يا درة من سيد الرسل يا حجته وسره بت فاطمة الزهرة القادت الثورة
شفنه صلابة حيدر بمحياها
وشفنا سماحة فاطمة بملگاها
انتي العلم وانتي الاسم لخدامچ انده والنعم
هاي الرواية ارويها ... من اولها التاليها
ما كوكرامة بدونچ ... والدنيا شلي بيها
ياديني واسلامي ... حققتي احلامي
________
خادم زينب ع
مجيد عبد الرضا القريشي

هاي الانصار ونسولف بيها... بكل المصار عالي طاريها
عالمنايا تولمت .... والسيوف تكلمت
هاي الانصار
_______
توجهو صوب المناية جنود حامي جارها
تقاتل العاند خيمها والتريد وجارها
محد يگابل عزمهم لو علت اشعارها
تصيح يازينب خيامچ دين والله اختارها

سيف البتار هلهل بيديهم ... ذولة الاشرار يمسح طاريهم
والعمايم تمتمت.... والسيوف تكلمت
هاي الانصار
_______
عهد للزهرة نيطينا وللبطل كرارهه
بهاي ابدا ماهو منا الراد ليل فرارهه
الزلم لو عرگت گصصها ما تغير حوارها
ربات حيدر واحنا الها الماترد جرارهه

علم الاسرار هالثابت بينا
بهاي الاصحار كل امانينا
والشهادة تقدمت .... والسيوف تكلمت
هاي الانصار
_______
بينت روح التفاني وانعرف مضمورها
وفرعت كل العمايم وانكشف مستورها
شالت اچفان بئيديها وحضرت كافورها
والسيوف بحد ايديهم برنو بشاجورها

واحدهم صاح وبراسه الغيرة
نگلبها اليوم كل هاي الديرة
صال والحومة عمت .... والسيوف تكلمت
هاي الانصار
_________
جبال سدينا المعارة ويلة اليلاگينه
يصير بعيون الزچية الذاد عن حسينه
عابس وجون وحبيب ومسلم موالينه
وهب والحر الرياحي وعاين ابن قينه

هزو الگاع يوم طبوها
وصوت الاسباع الزهرة واسوها
المنضلعها اتألمت .... والسيوف تكلمت
هاي الانصار
______
الدين لليوم بحسرته وعاطل بمعروفة
يدور الزين الينصره مجرحات حروفة
عدنا غدارة وغدرها جازي أهل الكوفة
والت ذيول النواصب علينه مد سيوفه

ليل ونهار لسانه سابينه
ويه كفار ايهاجم بينه
وبمجالسنا شمت .... والسيوف تكلمت
هاي الانصار
_________
حسين كل عام بوعدها انصار فدوة لعينك
ما تبدلها السنين ثابته من سنينك
بالمجالس والمعارك بالدمه مواسينك
يهود ونواصب غزتها و ظلو موالينك

لو ابنك ثار تامة رايتنا
باسم الانصار تحقق منيتنا
چفوف وعيون افتدت .... والسيوف تكلمت
هاي الانصار
_______
خادم انصار الحسين ع
مجيد عبد الرضا القريشي

من جاسم مشه نزلت دمعتي
يازين الشباب حيرة حيرتي
راحل للجراح... وتاركلي النياح
حيرة حيرتي
________
ياشمس أبعدت عني وترس عمري ظلامه
يا أية وفخر عمه طلع يفدي الامامه
ماخذ من حسن طبعه ونزل باخر وسامه
طلگ عرسه والدنيا مثل جده قيامه
لوعه لوعته تجرح بالصدر
خلاني بحزن كل ساعة انقهر
شوف عيوني راح ... وتاركلي النياح
حيرة حيرتي
______
من بعدك عمت عيني فلا نور الضواها
ظلمة صارت ايامي ولانجم بسماها
الام التفگد الغالي فلا تشتم هواها
تذبل ذبلة الشجرة الولا واحد رواها

وي حر النهار تذبل ورگتي
‏شما مر عني يوم تگرب موتتي
‏بفگدگ حملي طاح ... وتاركلي النياح
حيرة حيرتي
‏_______
‏ذخري من الحسن انته ضوة الحومة وشمسها
‏بهاي عيوني ربيتك عمت بعدك احسها
‏يا شمة هوى صدري الرحل عنها نفسها
‏حرگن ايدي شموعك ولا واحد لمسها

يا روحي شأكول من بعد الحبيب
بس غربة وذهول بس نوح ونحيب
ناعي حزني صاح ... وتاركلي النياح
حيرة حيرتي
_________
يا سلوى التسليني بعد فگدك يجاسم
يا ليل الغزة صبحي وغزة صبح الهواشم
منهو الشايل اخلاقك شباب وفكره عالم
ماخذ من علي شمرة يهابونه الضياغم

يالراسي انرفع ساعة صولتك
وبعيني تلوح ظلت صورتك
كاشخ بالسلاح ... وتاركلي النياح
حيرة حيرتي
______
عبرة للشباب انته وفه بدينه وعهودة
وكسرة عمك البعدك ذبل حيله ويه عوده
شاب اللي اقتده نهجك ثبت عالحگ وجوده
واللي خالف اطباعك نصر غرب ويهودا

فرق من السما بين الجاهدو
وبين الخالفو دين وعاندو
صوته كالنباح ... وتاركلي النياح
حيرة حيرتي
______
الدنيا لارحم بيها توالي أهل الدناءة
وتنكر فضل الي يجاهد والي ضحه بدماءه
تضد اليقره بالمجلس توالي أهل البذاءة
شمتو حتى بالضحة شكثر عدهم جراءة

ونگلهم يواش كافيكم غرور
يوم المهدي حان وگربنا الظهور
دمكم نهره ساح ... وتاركلي النياح
حيرة حيرتي
_________
خادم القاسم ع
مجيد عبد الرضا القريشي

‏

ابليل السحر تسأل بالگمر اشلونه الگمر گلي
طب للمشرعة وچفه گطعه عالغالي دسولفلي
ضحه بروحه لحسين... تسأل أم البنين
ابليل السحر
________
ما شايفة النوم من يوم ما راح الگمر
يالعالي بسماك ارجاك يامضوي السحر
هم شفت عباس والطاس مرو عالنهر
لحسين ادريه يرويه شما چان الخطر
الگلب مالوم مهضوم هاليوم بكدر
ما شفنا راحات اهات من غدرة عمر

ادريه ماشرب من ماي وكتب بعده يانفس هوني
بلسان الغضب لولد ام الحطب كاتب ما تگدروني
لو گطعوله چفين .... تسأل أم البنين
ابليل السحر
__________
بالولد وصيت وحچيت كلماتي بدمع
كلكم تحامون تغدون فدوة للورع
ولو لاحت خيام ظلام وهد ذاك الفزع
اسهام تجلون يا عون كل هذا الجمع
لحسين اسرار اكثار ما تهوي الجشع
يا اولادي بس لا ويلاه بس لاينفجع

وحگ من نورك واحسن مظهرك گالوا يمه عد عينچ
لو ردتي خبر صدي للگمر وهو خلي يحچيلچ
بيهم لاتوصين .... تسأل أم البنين
ابليل السحر
__________
وحاچيت عباس بأحساس حد ريجي يبس
احسين مولاي ابهاي بس كلوله بس
لاتگله ياخوي يابوي حد اخر نفس
من توگع ابطال تنگال هالكلمة احس
المايفدي مولاه من اعداه عگاله ينكس
من بعدك بخيل ياويل صدره يرفس

من توفي العهد لو جسمك برد يحتاج الاخو خية
ناديه بونين خوية ياحسين ذيچ الساعة مرضية
من يتوادع اثنين .... تسأل أم البنين
ابليل السحر
__________
خبرني ما يكون اتهون لحسين الولد
ولزينب ائلوف بطفوف لو أكدر الد
مستحية وبچيت مشيت اربع من اعد
بس كافي عباس فراس جيش ومن يهد
عندي الكمر كون يوفون ويخوانه يسد
عن ذيچ الخيام مانام ايروح ويرد

محله صولته لأخته الربته ويداريها بعيونه
ما ينطي الخيم ولايوگع علم لو زنده يگطعونه
يشبه فارس حنين .... تسأل أم البنين
ابليل السحر
_________
يا مدور الايام يالضام طف ولوعته
خبرني بالحال والبال طالت حسبته
اعيال الحسين زينين والمي شربته
عبد الله ويلاه بس لا نبلة ضربته
وحسين لو صار واحتار وحدة بغربته
معناها الخيل بالويل سحگوا جثته

ولد ام البغي وده تلغي هالعترة ومعانيها
جمعت كل حقد كل زاني وجلد وليومك تعاديها
وتبقى احزانه سنين .... تسأل أم البنين
ابليل السحر
_______
خادم ام البنين ع
مجيد عبد الرضا القريشي

‏

رفعو الرايات ... علو القرايات
ابتده عاشور يالتحب حسين
______
اشكبرها هناك فاطم من تشكرك
بين كل الخلگ ا نعمة من تذكرك
لخدمة الطيبين بالله خلي برك
هيبة من عدهم تنال ويعله سرك
وصدگ بكل عام ... تشكر الخدام
اعلينه ظلها يدور يالتحب حسين
______
حيهم اصحابي واخوتي يالله حيهم
وينه اليقيم العزية بهذا حيهم
ابتده شهر المحرم رد عليهم
المانسو احسين ذوله ولد أبيهم

والذي انسمعه. . يعارض الدمعه
طاح بالمحضور يالتحب حسين
______
هذا عاشور التغرب بيه الحسين
وانچتل عالغبرة ضامي وچبدة نصين
وها بعد ماريد اعلمك لطم الايدين
صعبة ما تكدر تواسي الضحى چفين
تسوى كل الناس ... خدمة العباس
والخدم مأجور يالتحب حسين
______
ابتدي وعمر المجلس الله يرعاك
تعينك الزهرة وابوها وفاطمة وياك
كلهم ينظرون دمعك حتى الاملاك
بالحشر هم نجاتي وذخري هناك
اليذكر الاطهار... ماتمسه النار
وبالگبر مسرور يالتحب حسين
______
نعمه ياخدمة محرم والله نعمه
رحمه من الله علينه والله رحمه
اليقره مجلس للغريب ومن يخدمه
فاطمة بدفتر شكرها تخلي اسمه
بدفتر الخدمة... من صبح اسمه
ناجح ومشهور يالتحب حسين
______
ألف هنيالة التولم للخدامة
ومانسه ذكر الزچية وذكر امامه
هذا من الله كسب كل احترامه
وبين كل هذا الملا ثبت علامه
الزمن مادار.... تبقه إلك اثار
عاللسن مذكور يالتحب حسين
______
تدري بهاي الخدامة خير دائم
ترضي الله وترضي طه وترضي فاطم
وتثبت اركان الامامة للهواشم
بدمعتك الله اليسهل فرج قائم
لدمعتي التدي... ينظر لمهدي
ويظهر المنصور يالتحب حسين
______
خادم خدام الحسين ع
مجيد عبد الرضا القريشي
نسالكم الدعاء

ما تشوف عيوني بس هذولة الناس
الخدم لحسينه ولخدم عباس
_____
ما اريد الشوف بس لحسين يحلالة النظر
احله من طعم العسل تعب الخدامة والسهر
لو أظل بخدمته عمري إلى حين القدر
ما املن خدمته عندي فلا يكفي الشهر

هتف گلبي وقره حبي ونظر عيني بچالة
منو مثلة وجب وصله وملا الدنيا جماله
من اخدمه بروحي ينظف الاحساس
_______
ما عرفت الدين لولا حسين الله منعرف
چا هلك هالكون من سنين والنور انخسف
ولولا جود الماي گلب الناس ماحن ونظف
ولولا زينب ما بقه بهالدنيا شي من الشرف

بمواقفهم مناقبهم جره الكون و نظامه
‏وعلى حبهم نعاهدهم فلا نعوف الخدامه
‏عالعهد وياهم ولمشيب الراس
‏_______
‏صار حب حسين وي الروح الله منزله
‏ابرحم امي واصيحن يا مصيبة كربله
‏مولدي صار لخدمته وروحي باسمه مدلله
‏هو صار اهلي وملاذي والوطن والعايلة
‏
اليگف ضده فمد أهله وفگد كلشي بحياته
هوه الفتنة وخسر جنة وتلاشت امنياته
خاسر بدنياته اليتبع الانجاس
________
ظلمة هاي الدنيا كلها وبدماكم نورت
من نزل دمع الحسين الصحرة كلها وردت
ومن بده لطم المجالس والاصوات تولمت
هاجر دياري الوباء وشدة اعراضه اختفت

بكثر دمعي ارتوى نبعي ورحل عنه جفافة
اعله طاريكم واساميكم رحمنا الله بلطافه
انتو خير النازل وانتوا اطهر ساس
_______
عيوني غير الخدمة هذه لاتگر ولاتشوف
خدمة حسين واخيه الي گضو برض الطفوف
ضحو وعانو لجلنا وشافو المر والحتوف
حتى دين الله يتعلى بدمعته ولطم الچفوف

معالينا وموالينا خدم لبن الرسالة
اصد عنه وابعدنه عن عيوني محاله
ولا وله يبعدوني زمرة الوساس
__________
مجيد عبد الرضا القريشي
نزلة سريعه
‏
‏

ما اجوني ما اجوني .. وبهجرهم عذبوني
ليل السهر طفة النظر يهالناس
ماظل دوه ولاشم هوه بالانفاس
عذبوني
_______
يكتل هواي الهجر من اسولف ماتظل بعيوني ادموع
بنار غربة الينتظر عينه تذبل عالدرب وي شمس الطلوع
متانية وماكو امل واقنع بروحي وراهم هلبت رجوع
مالي بالدنيا ثمر والوجه شاحب ولابيه عافية ونوع

والعليلة والعليلة بسكرة الغربة ذليلة
زغيرة عمر من هالامر شاب الراس
ماظل دوه ولاشم هوه بالانفاس
عذبوني
______
وي طيور الراحله كل كلامي صار هلبت عندي جنحان
يالتعودين لهلچ بلچن وياچ ارتحل واوصل للحنان
يم ابوي وعمتي املي منهم النظر واحضن بالاخوان
لون عبد الله اشوف يغدي كل وادي الطفوف أشجار وجنان
من اشوفة من اشوفة بيدي نحر الدم أروفة
‏وامليلة مي من العلگمي والعباس
‏ماظل دوه ولاشم هوه بالانفاس
عذبوني
‏_________
‏
‏صاب جسمي علتين المرض والشوگ يذبل لو تعناه
‏گاعدة ابيت القدر وانتظر عزي يجيني اليشفي ملگاه
‏مگابلة درب الحزن واقره ابطور العراقي اه ويلاه
‏عن هلي ماكو خبر من يغيب انهاري تخلص روحي وياه
‏كل مسية كل مسية مگابلة درب العزية
‏ما ظل امل بعد الاهل ماكو احساس
‏ماظل دوه ولاشم هوه بالانفاس
عذبوني
‏_______
‏
‏شلي بالدنيا بعد فراگهم مثل المرض ويگطع احشاي
‏زغيرة عافوني الاهل تلهج اشفافي حزن للرايح وجاي
‏بلچي من عدهم خبر وهلبت لصوبي الضعن يحديه حداي
‏داري وحشه وانتظر من بعد هذا الصبر يرجعون وياي
‏ والله حيره والله حيره منهو اليواسي الزغيره
‏وكت العصر چن الصدر خيل انداس
‏ماظل دوه ولاشم هوه بالانفاس
عذبوني
________

‏افز كل ساعة اعله طيف اكعد ونده يحيف گبالي لاحو
‏بيه مابيه اگوم وانظر لذاك الطريق البيه راحوا
‏طيفي گلي ايسي ومن خبرهم ايسي دوم هناك طاحو
‏لزمت ظهري وهامتي اعله ابوي وعمتي واطفال ناحوا
‏
وعالشريعة عالشريعة يطيحن چفوف الگطيعة
‏يم النهر طايح گمر يمه الطاس
‏ماظل دوه ولاشم هوه بالانفاس
عذبوني
________
هواي سابيني القلق ظني ايگلي عليه ماتردون
ايگلي اهلچ بالخطر محاصرة بأرض النوايب واليغدرون
وعنهم الماي انمنع واليجيب الماي بچفوفة يگطعون
اه يخواتي الزغار واه يا عبدالله لمن ما يشربون

يا حسافة يا حسافة تذبل زهور الترافة
هذا الملا بلامرجلة ولانوماس
‏ماظل دوه ولاشم هوه بالانفاس
عذبوني
________
خادم عليلة الحسين ع
مجيد عبد الرضا القريشي
نسالكم الدعاء
‏

ابو ذيات لزينب ع

هنا چانت خيم وهنا حرم چان
وهسه الجمر يچويهن حر مچان
الله يلعنه ويحرمه ال حرمچن
من حسين واولاده واخيه
_____
تهدله دموع عينه من نخه المات
والوذ بيا قبيلة من اخي مات
يعباس اسلبوها منا خيمات
اطفي بنارها وتجوي بديه

حالة صعبة وخل اكون اكثر صريح
ما اردن للخيام ويمها اطيح
اخجل بهالحالة اشوف عيالي
بلا ايدين وجودي من مي خالي
حالة صعبة
________
چان الهم وجهي ضي وراح ادية چان مي وشربتهم
عندي قصة وية العيال الدرب صحرة لو جبال ما عفتهم
الجو برد لو جان صيف صدري الهم كالمضيف دللتهم
وهسه لو ارجع شگول لالي ايد ولاطول بيش المهم
اعله سكنه لو وكع شوفي شگول
ولرقية الدمع من عيني يطول

فوگ سهمي دمع عيني يلالي
بلا ايدين وجودي من مي خالي
حالة صعبة
________
شلون اذاني الزمان وحدي ابهذا المكان وانده حسين
خوية ليه ماتجي نظرة وحده ارتجي وشوفة الزين
لون گربت موتتي خوية خلني بوگعتي بلاية چفين
وصيتي لزينب امر گلها ياخوية العذر فاض المعين

بهذا عمري ردته اجيبه للخيام
بس يخيتي خانت بوعدي السهام
بگد وعودي دمعي مني سالي
بلا ايدين وجودي من مي خالي
حالة صعبة
________
خوية ماينفعلي حل بفيض جودي موتي حل وفاض عمري
تطشرت مثل الچفوف عيالك بوادي الطفوف اني ادري
نهر اليرافگ حقير ويمنع ألمي عن زغير شلون يجري
بكلبي حسره والف اه وسلمت امري لاله وهو اجري

والكلافة من انظر شفافك صفر
شكثر بيها من العطش جرح وفطر
مثل خشبة نار تلظي اگبالي
بلا ايدين وجودي من مي خالي
حالة صعبة
________
خوية عهدي وياك دوم روحي ما تشرب لزوم علمتها
حتى لو يوم المعاد وجابو الكوثر مراد ما جستها
هناك وبگلبي جروح وسكنة گبالي تلوح لو شفتها
وعدي ما انساه دوم اخره ودنيا اصوم واعدتها

ريت بعيوني يظل سهم العمه
ولا اشوف واحد المنكم ضمه
ما اريد الماي خوية الغالي
بلا ايدين وجودي من مي خالي
حالة صعبة
________
اقترب وكت الوداع خوية ياحلو الطباع من اسافر
تبقه روحي اعله الخيم تدور وتعاني الالم من تناظر
سهام تحركها بحقد وزينب تدور لبد ماكو ناصر
وانته واگع عالتراب وصدرك ابلاية ثياب يدوسه حافر

وروحي تلهب مثل نيران الخيام
بيش اردن عنها نيران السهام
ويذبح براسك شفت چتالي
بلا ايدين وجودي من مي خالي
حالة صعبة
________
بس حكمته والله شاء من بعد هذا البلاء مانساجل
صرت أية للعباد وباب ابواب المراد ابو فاضل
لو قسم يمي بحسين ولو ذكر ام البنين بالمحافل
ولو ذكر زينب يمر اشفي علاته شكثر والمشاكل

وبالمجالس من نخاني ودمعه صب
والينادي ياحسين شكثر احب
والذكر زينب احضره بحالي

بلا ايدين وجودي من مي خالي
حالة صعبة
________
خادم ابي الفضل العباس عليه السلام
مجيد عبد الرضا القريشي

طاحو كلهم هو الباقي ما وگع ما وگع
رجعو عن حسين وهو ما رجع ما رجع
مسلم لليوم بكوفان .. وحدة يحارب بالشيطان
ماوگع
_______
لا تستغرب خل نحچيلك هالوقعة مو بس دمعات
بيها العبرة الي حذفوها من القرءان من الايات
مسلم شاهد عليي خانو وتبعو اسرائيليات
هم الغروا أهل الكوفة بالمال وبالتخويفات

زمرة سفيان القربتهم للحكم للحكم
ال يهود من ال الزهرة تنتقم تنتقم
والشيعة ما الها كيان .. وحدة يحارب بالشيطان
ماوگع
_______
نفس الموقف نفس الغدرة مسلم هم نشوفه اليوم
وحدة يقاتل وبلا ناصر التم عليه المشئوم
حب الدنيا وحب المال وكيد الناصب هم معلوم
يلعب بينا ويودينا للسنو ذاك المرسوم

رسموه لمسلم هالزمرة الاثمة
وچم شيبة التارس دمها العاصمة
وفرحت ساعتها العميان .. وحدة يحارب بالشيطان
ماوگع
______
كل الطايح گالو رايح وتشمت بيه گلوب الناس
بس ماشايف مثلك فارس صولاتك مثل العباس
كلهم طاحو وانت الباقي لليوم تحارب وسواس
گبتك جنة ومن نتعنة الها نرفع بيك الراس
نتعلم منك كل زينه من نزور
واعله الناصب نعلن ثورة بالثغور
وحشدك تارس كل مچان .. وحدة يحارب بالشيطان
ماوگع
_______

ياتربات الوالي وحجته اثاره بكل فتنه نشوف
عليي خانوعليي هادوا شاهر للمعروف سيوف
صاح بصوته يهل الكوفة حسين محاصر برض بطفوف
بس الشايب ثار وطوعة وعالساتر نصرو معروف

دم الشيبة يبقه يحاسب بالظلم
وطوعة بس هية المحسوبة عالزلم
خلت بگصصهم نيشان .. وحدة يحارب بالشيطان
ماوگع
______
هذا الدين يريد الصادق والكاذب لاما يراد
يريد الطلگ هذه الدنيا ويتبع ماراد الاشهاد
وقصة مسلم وية الكوفة اليوم علينا تنعاد
كسرو شوكة هاي الشيعة وتبعوا سفياني الاوغاد
الله يساعد گلب المهدي لو ظهر
من هالمله يخلص صدره من القهر
تعوفة وتتبع امريكان .. وحدة يحارب بالشيطان
ماوگع
_________
والي رايد ينصر مسلم وياخذ من فضل الله جنان
خل يتوضه بدمع المجلس يحصد من الله الرضوان
خل يعاهد ذالك المهدي ويصبر عالهم والنيران
وهاي الكلمة ما ينساها كلا كلا للشيطان

سلم عالمهدي وعد نفسك للظهور
مسلم يفرح من كل گلبه بالسرور
ما طاح الي عنده اعوان .. وحدة يحارب بالشيطان
ماوگع
__________
مجيد عبد الرضا القريشي
خادم مسلم

صعبة هاي صعبة هاي
حين شفت حسين نايم عالترايب
صعبة هاي صعبة هاي
مصيبة عظمى مو مثل كل المصايب
مو مثل هالناس چانت نومته
مسلب ومذبوح سحگو جثته
صعبة هاي
________
والله منظر يومه چن يوم القيامة
ذبل عيون النبوة والامامة
انظر لزلمي ولا واحد سلامة
اصفگ الايدين وبصدري الملامه
ولون الدما گبال العين ... ومطشرة ضلوع حسين
اطي الوجه اني لوين ... غريبة والطم الهامة

وين اروح /وين اروح ولا ولي الانزل عليه ولاعشيرة
وين اروح / وين اروح الأسر يبرالها الچانت اميرة
هذا حال البيه خانت امته
مسلب ومذبوح سحگو جثته
صعبة هاي
_________
زينب انه مرافگ الحسرات عمري
بالنوايب والمصايب دوم دهري
شحچي عالعاشر إذا مكسور ظهري
منهو مثل ملوعة والنار تجري
طف كربلا الشيبني ... لاظل اخو ولا ابني
بسوطه الشمر يضربني ... ويشمت بخوتي وقهري
والعيال /والعيال مشردة بصحرة والم بخوفي بيها
والعيال / والعيال من سنابك خيلهم احمي عليها
شحچي عالعدوان والي سوته
مسلب ومذبوح سحگو جثته
صعبة هاي
_______
يموت كلمن عاين ألصاير عليه
مچتلت خوان والنوبة سبية
وي چفوف الكافل انشلن ايدية
واني أصبحن ياعلي حامي الحمية
واعله النحر راح الحيل ... انده وأصيح اليا ويل
ولمن سحگ حافر خيل ... سحگ عمر البقه بيه
يا كفيل / ياكفيل انده وما شوف بس صيحة شماته
يا كفيل / يا كفيل وين عباس الكفل ضعنه وخواته
عالنهر مذبوح فاضت جربته
مسلب ومذبوح سحگو جثته
صعبة هاي
______
الحرمة من تفگد وليها وشبديها
زمرة اللاغيرة تتجاسر عليها
شترجى من ولية عرب لا نخوة بيها
حرمة وبأربع حبال مگيديها
نگطة وخله منها الراس ... وتشيطنت هاي الناس
وينك صحت ياعباس ... تغيث الطاح واليها

يالگمر /يالگمر انده وياناس صوتي ما سعفني
يالگمر /يالگمر سوالف الشمات بعدك عذبني
بگلبي حسرة لجيته ولشوفته

مسلب ومذبوح سحگو جثته
صعبة هاي
_________
مثل مطرة غيث على الحومه تشوفه
دمه كل مكان مزروع بطفوفه
الطير ووحوش الأرض ظلت تطوفه
عنه دفعوني وأصبحت ما اعوفه


واسمع بچي عرش الله ...يندب اله اه و اه
مجلس حزن صار وياه ... نحيبه يزلزل الكوفه

الزهرة بيه / الزهرة بيه تنحب وتلطم وجهها اه يبني
الزهرة بيه / الزهرة بيه نزلت الحومه وظهرها عليه محني
تنادي اه يحسين يبني وغربته

مسلب ومذبوح سحگو جثته
صعبة هاي
_________

مجيد عبد الرضا القريشي
خادم زينب ع

شگد حبيناه... حب صافي ومابيه كل لوله
شگد حبيناه ... روحوا لحسين وگلوله
حبه صفه ... ابگلبي وفه
شگد حبيناه
________
ملك كل عمري وايامي ساكن بالگلب والعين
لحمي ودمي وعظامي وجسمي يصيح كله حسين
يانور وثابت بهالروح شمحله بروحي حب الزين
والله الماعرف حبك خل يسئل أبيه منين

حبك والله .. عرفني الطيبه ومعناها
حبك والله ... ما ذل للدنيا وبلواها
من اعرفه ... ابگلبي وفه
شگد حبيناه
________
أنه لو سولفت باسمه عطر بأنفاسي اشمنه
اسم باشرف لحن اقراه اعيده وما املنه
حسينا واه حسينا دوم ابكل مجلس أردنه
لو اسمع ذكر لحسين ابعد الصين اله اتعنه

والله اتعناه .. لو قامو مجلس وفاية
والله اتعناه .. وراية عباس بيمنايه
حگ موعفه ... ابگلبي وفه
شگد حبيناه
________
على دين الله والتوحيد واركانه وعلى الفطرة
هويناك وقفلنا الباب وعفنا العالم بأسره
العالم مامله عيني رغم ما واسع شكبره
لچن انته مليت گلوب موكب صار للزهرة

گلبي وحشاه .. رادود وخادم يقراله
گلبي وحشاه.. داس الحافر والخيالة
ابدمعك غفه ... ابگلبي وفه
شگد حبيناه
________
سلاما ياحسين الثار ثارك بالگلب نايم
انوحن ليه كل يومي والعن كل بغي وظالم
احر من الجمر گلبي لطلعة سيدي هايم
عجل عجل ينادي ليل انهار عالقائم

شگد تانيناه.. عالموعد ذبلانه عيوني
شگد تانيناه .. شمات هواي يلموني
روحي اسفه ... ابگلبي وفه
شگد حبيناه
________
الحمد لله عرفنه حسين نقره ونلهج بئسمه
الرضع من أمه حب حسين بدنيا لاتظن يضمه
هو الخير هو الزاد خلانا بألف نعمه
نرفع راس بين الناس من حسين والخدمة

واعباساه .. من انده ما تصبر روحي
واعباساه .. الطم راسي وفوگ جروحي
اسمه شفه ... ابگلبي وفه
شگد حبيناه
________
مجيد عبد الرضا القريشي