#بندريه_1442


زينب زينب .. ضمي  احـزانـج باجـر
زينب زينب .. يسحك صدري الحافر
تشوفين شلون يختي انـه يذبحوني
زينب زينب .. آه يمـصـاب الـعـاشـر 
ــــــــــــــــــــ ❁ ❁ ❁ ــــــــــــــــــــ
باجر بالخيل صدري انه يسحگونه
وبالـدم عبـاس غرگـانـات عيـونـه
وانتي تضلين وحدج وي العيله
وصيوانج هاذ ياخويه يحرگونه

نار وكفار .. وشيحميـــها الخّـدر
نار وكفار .. واطفــــالج تتـطشر
بالبر وتهيـم يازينب مرعوبــه
زينب زينب .. گلبج بالهم حـاير
ــــــــــــــــــــ ❁ ❁ ❁ ــــــــــــــــــــ
دنيه من الظيم تصبح باجر سوده
باجــر عباس مگـطـوعـات زنــوده
وسـكينه تصيح وين الكافل عمي
طايح عالراگ جفه ورايه وجـوده

باجـر عباس .. مــتـوذر بالهيــمه
باجـر عباس .. ما يرجع للخيــمه
عالشط مطروح مايگدر يتعذر
زينب زينب .. وبعباس اصاير
ــــــــــــــــــــ ❁ ❁ ❁ ــــــــــــــــــــ
بعبد الله ادوس باجر خيل  و تسحك
ضامي وعطشان من ادماه ضل يشهك
بنـحـره يصيبـوه مـا يطـونه أميـــه
لا بيـــهم زيــــن لامن كصـه التعـرك

باجر مذبوح .. عبد الله من المنحر
باجر مذبوح .. الأكـــبـر والاصـــغر
حتئ الاطفـــال يازيـــنب ماتسلم
زينب زينب .. واجب كون نصابر
ــــــــــــــــــــ ❁ ❁ ❁ ـــــــــــــــــــــ
باجــر نســـوان بالميــــدان يركضن
محتركه اخيـام فوك النـار يسحگن
وعيون اعداي جن اسهام او ترمي
ماضل حـماي باجــر غير اعبيجـن

نار ودخان .. واخيامـج محروگه
نار ودخان .. جم خيمه المسحوگه
لامن وليان يازينب تحميجن
زينب زينب .. حملج هم اتكاثر
ــــــــــــــــــــ ❁ ❁ ❁ ــــــــــــــــــــ
باجـر عريـس يـتحـنه بـدم نـحـــره
الاكبـر اوصــــال يتكطـع جـم وذره
تضل بالميدان جم جـثه يسحكوها
باجــــر عدنـان بالكـاع او مطشره

باجر عريس .. بالدم يحنـونه
باجر عريس .. بسيوف يزفونه
باجـر جم شاب ايذبحون احلامه
زينب زينب .. باجر كلشي يهاجر
ــــــــــــــــــــــــــــــــــــــــــــــــــــــــــــــــــــــــــــــ
الخـــــادم : محمد رحيم المشعلاوي

قـادم محـرم هالسنه اعلـينه
رغم الضروف الصعبه ضلينه
نحسب أحساب الرفعة الرايه
گالولي ماكـو هالسنه اقــرآيه
گلت المجالس هيه تحيـــنه
ــــــــــــــــــــــــــــــــــــــــــــــــــــــــــــــــــــــــــــــ
نحسبلك احساب ونـعـد ياسـيدي تـدري
ما اعرف اشهور السنه لن عودت عمـري
العاشورك احسب وانتظر علموني من زغري
كل عمري خادم بس الك واخدملك بگبري

من زغري متعود عله حسيني
ما حسبه يوم الما تهـل عيني
وجروحي موكب ناس مشايه
گالـولي ماكـو هالسنه قــرآيه
گلت المـجالس هيـــه تحيـنه
ــــــــــــــــــــــــــــــــــــــــــــــــــــــــــــــــــــــــــــــ
مخنوگه روحي اعله العَزه بس هوه يحيهه
هالدنـيه مـن غـير الطــم كـل طـعم مابـيهه
المخنوگه روحـه مـن الهوه الهـوه يمر ليهه
بس انـه ريحـت حضـرتك يحـيني طاريهه

دنيانه مجلس واحنه لطامه
هوه العمر زنجـيل والقــامه
وبالي ذكرك عايش اهوايه
گالولي ماكو هالسنه قرآيه
گلت المجــالس هيه تحيـنه
ــــــــــــــــــــــــــــــــــــــــــــــــــــــــــــــــــــــــــــــ
لو ما اسـوي موكـبي ولو ما اجـي الگبـرك
احسبني ميت هالسنه ماعندي من صبرك
انـه حـياتـي بمجلسك يا مضحـي ابعمرك
ما اوفي انه الحضرتك بس منتظر أجرك

يالمنطي كلشي الربك انطيني
لطمه اعله صدري ودمعي البعيني
احشرني وي انصارك ابهايه
گالولي ماكو هالسنه اقـرآيه
گليت ابمجالس هيـه تهديـنه
ــــــــــــــــــــــــــــــــــــــــــــــــــــــــــــــــــــــــــــــ
حبك نجاة من الغرق وانـته التنجيـــنه
وانـته السفينه الراسـيه بگلـوبنه وبـينه
عينك عليـنه سـيـدي بـس انـتـه واليـنه
ما نلجئ الغيــــرك ابــد ماعدنه تدرينه

ماعدنه غيرك يا ابو اليمه
المابيه محرم هوه ماشمه
وبگلبي الك مجلس ونعايه
گالولي ماكو هالسنه اقرايه
گلت المجالس هيـه تحينه
ــــــــــــــــــــــــــــــــــــــــــــــــــــــــــــــــــــــــــــــ
خـدامك احـنـه سيـدي ومانـكـدر ابـدونك
يالعلمتني اعله العشك صرت انه مجنونك
بس نضـرتك ياسيدي مـن فـدوه لعيـونك
انحـبك احـنه وماتـعـوف انـته اليـحبـونك

يالخدمتك علت مراتبــــنه
غير المجـالس ابد ماردنــه
لا مانعوفك سيدي احجـايه
گالولي ماكو هالسنه اقرآيه
گلت المجالس هيـه تحيــنه
ــــــــــــــــــــــــــــــــــــــــــــــــــــــــــــــــــــــــــــــ
الخادم محمد رحيم المشعلاوي

قادم محرم هالسنه علينا






محمد رحيم المشعلاوي

قادم محرم هالسنه اعلينه
رغم الضروف الصعبه ضلينه

قصيده-لعلي الاكبر ع


يا يمه رايح للحرب ادعيلي يمه وهلهلي
كليلي عفيه ابني البطل افزع عليهم ياعلي
راح امشي وادعيـلي
يا يمــــه هـوسيـــلي
افـــــزع عليـــهم ياعلي
ــــــــــــــــــــــ ❁ ❁ ❁ ــــــــــــــــــــــ
يايـمه ادعيلي بفخـر راح اهـجـم اعلـيهم وطـب
راح انصر الدين واجي ولو ما اجي هـاي الحرب
بس دعـوه مـن عـدج تـره اكلبلـج الحـومه كـلب
رايـح اطـر الجيـش انــه واصلـبلج اكبـاره صلب

واهــجــم انه وعمي
ويله الـكــرب يــمي
افـــــــزع عليـــهم ياعلي
ـــــــــــــ ❁ ❁ ❁ ـــــــــــــ
امـودع الله ياعـلـي وتـخـير اخـيـار الـزلم
انزل عليهم ورتجل ييني انه اعرفنك شهم
نازل علي بهيئه نـبي يايمه ما عـدهـم علم
جنك كـمر اربـع طعش نازل يـهوس بالعلم

ابنـي علـــي نــــــازل
وعـمــه ابو فــاظـــل
افــــــزع عليـــهم ياعلي
ــــــــــــــ ❁ ❁ ❁ ـــــــــــــــ
لمـن نـزل لاكـبر علـي أتفـاجئـت كـل الجـيم
كالـو عـلي لا لا عـلي لحيدر علي هاي الشيم
بس سحب سيفه اتذبحو وراس ابن غانم بالخيم
صاح انه الاكبر من علي دارس شجاعات وقيم

البيــــــه من حيــــدر
يكـــابلــــني اليــــكدر
افـــــزع عليــهم ياعلي
ــــــــــــــ ❁ ❁ ❁ ـــــــــــــــ
هـوه بـكتـر عـمـه بكـتر زلــزلــو بيــهم كــربـلـه
لن صوت صاح من الخيم حيهم زلمـنه أو ياهله
صوت الحسين شد العزم وليـــلئ تنادي كايـــله
عفيـه ابني الاكبر من نزل خلـه الـزلـم متبـهـذله

ونـــادت عله الاكبــر
وشد عــزمه او كبــر
افـــزع عليـهم ياعـلي
ــــــــــــــ ❁ ❁ ❁ ـــــــــــــــ
الغيظ والغيره طفحت هلهولت امه من سمع
لمن سمعها امه هجـم طشـرهم ابئيده ورجع
صوب المخيم من كصد إيقبل امـه بيـه طبع
طشـرهم بسـيفه علي وجبيـرهم يمـه خضع

قبلـــها واسـتئـذن
صوت الحرب اذن
افــــزع عليعهم ياعلي
ــــــــــــــــــــــ ❁ ❁ ❁ ــــــــــــــــــــــــ
الخادم الحسيني
محمد رحيم المشعلاوي
ــــــــــــــــــــــــــــــــــــــــــــ

قصيدة-نزله- لشجــاعة-علي الاكبر
ــــــــــــــــــــــ

الخــــــيل غارت والـــزلم بذيــــــالها
علـــــي الاكـــــبر هـل فــــزع خيالها
ــــــــــــــــــــــ ❁ ❁ ❁ ــــــــــــــــــــــ
علـي الاكـــبر مـن فــزع وســط الحـــرب
جــن جـهـــنم جـاب نــار وضــل يــصـب
مــن الـعــله المــهره صلــب بيـهـم صلب
وصـاح ويـنـه الـكــال انـه خـــل يــطـب

حلــــف كال وعيـــــن عمي وجوده
الكرب ويـــــنه خـل يكـض حـدوده
الزلم فـــرت ماتشوف ضــلالها
علي الاكبـــر هـل فزع خيــالها
ــــــــــــــــــــــ ❁ ❁ ❁ ــــــــــــــــــــــ
بخــــوف واحدهم يشوفـــه ويرتـــــعـش
فازع اعلــيـــهم گــمـــــر اربــــــع طـعـش
مايــــهمـه خـــــوف ابــــدا لا عــــطــــش
جبـــــــيرهـم بـيـــده يحضــرله نـــــعــش

واليشـــــوفه يطــيح حيــله اگبــاله
هـاذه الاكـــبر مــــن علـي تـفـــصاله
الحــومه ضلــت ترتعـــش برجالها
علــي الاكــبر هـل فــــزع خيــالها
ــــــــــــــــــــــ ❁ ❁ ❁ ــــــــــــــــــــــ
يالله ياعـــمـي خــــل نـهـجـم ســـــوه
ونـادي الجـاســــم خــي يشـــع الضوه
وكـلــــه عــــد عــونــك يــارعــي الـوه
انـه ويـــاك او جاسـم مايمر حته الهوه

اليــــوم بالحــومه تبيـــن هالـــزلم
واليـلاكــي ســيوفنه رد مــن ثــلم
وال هــاشــــم مــن صــدك هنـيالــها
علــي الاكــــبر هـــل فـــزع خيــــالـها
ــــــــــــــــــــــ ❁ ❁ ❁ ــــــــــــــــــــــ
غـــــارو ولـــــن صـــــوت صاح من الخيم
يـصـــيح حيـــهم بخيـــلكم دوسو الجـيـم
لـــــنه صــوت حســـــين وزيــــد الشــــيم
ومـــــاكــــدر و تحـــزم و غـــــار بعلـــــم

حســين صال وبيــده هد عليـــها
وبيــده ضل يخبـــطها ويصفيــها
وصـاح صوت الحومه مدري شمالها
علــي الاكــــبر هــــل فزع خيــالها
ــــــــــــــــــــــ ❁ ❁ ❁ ــــــــــــــــــــــ
وصـــوت مــن زيــــنـب يـنـادي الــشبــان
ونـعــم ياگــبـر يعـمه يافـخر كـل عـدنـان
وشعل الشمعات بيدك راس خيط الميدان
وأمـــن الصـيـوان امـن جبل سد الصيوان

والگــرب للخيـمه ويــــله الشافـها
حتــــه روحــه هـم اضـنن عافـها
زيــــنب انه المانشـــاف اخيــــالها
علي الاكــــبر هــل فـزع خيــــالها
ــــــــــــــــــــــ ❁ ❁ ❁ ــــــــــــــــــــــ
الخادم الحسيني
(محمد رحيم المشعلاوي)

#اشتياق_العليله

گلبي يتعـذب بالبعد وانـه انـتظركم
مشتاگه روحي يالاهل ماحن گلبكم

 ــــــــــــــــــ ❃ ❃ ❃ ــــــــــــــــ

من رحتو لليوم الگلب ماشاف راحـه
الگلب ما يحـمل بعد كثرت جـــراحـه
الـيـل خـلصـته اون هـم ومنــــــاحـه
افـراكـم مـا ينحـمل هـاي الصـراحـه

الدنيه وحـشه وجن گبر صارت بعدكم
مشـتاگـه روحـي يالاهـل ما حن گلبكم
 
 ــــــــــــــــــ ❃ ❃ ❃ ــــــــــــــــ

صارت حياتي مضلمه وحشه وخليه
لـن ابوراكـم ماكو مـن  يسئـل عليـه
يوميـه أگعد وانتضر يحسيني جيه
من يومكـم حتئ الهـوه ما مار بـيه

الروح مو عدي تره روحي انـه عدكم
مشــتاگه روحـي يالاهل ماحـن گلبكم

 ــــــــــــــــــ ❃ ❃ ❃ ــــــــــــــــ

جنت احس بالدنيه طعم من جنتو يمي
وهسه الجدم يثـكل علي مانگلّه جدمي
ما همني كـل هـاذ العلل بس انـتو همي
وكل ماشفت فارس يجي كلت انه عمي

وبالي ماضل شي بعد ضل بس ذكركم
مشتـاگه روحـي يالاهل ماحــن گلبـكم

 ــــــــــــــــــ ❃ ❃ ❃ ــــــــــــــــ

مليت روحي من الصبر والصبر ملني
معقوله مـن رحتـو بعد محـد ذكـرني
عبد الله ماحـن وبـچـه ليه وفـگـدني
ورقـيـه ماسـألت علي مـن فارگتــني

مو سهله أساكم تـره تدروني أحبكم
مشتـاگه روحي يالاهل ماحن گلبكم

 ــــــــــــــــــ ❃ ❃ ❃ ــــــــــــــــ

يوميه الغروب اختنك وابچي اعله حالي
وبالي ذكراكـم يجـي غـالـي اويـه غـــالي
واشـتـاك والدمـعـه بگـت عالـخـد تـلالـي
مـن بالـي ما رحـتو أبـد دوم اعـله بـالـي

مشتـاگـه اشتم مو هوه اشتم عطركم
مشتـاگـه روحـي يالاهل ماحن گلبكم

 ــــــــــــــــــ ❃ ❃ ❃ ــــــــــــــــ

مليت الدموع وصرت چن حال يعگوب
لارد عليـه يـوسـفي لا وده الـي ثــــوب
من الفجر ابگـه انتظر حد وگت الغروب
هاي انه صارت حالتي والنــوم مسلوب

كل لحضه اناظر وارتقب يرجع ضعنكم
مشتــاگه روحـي يالاهل ماحــن گلبكم

 ــــــــــــــــــ ❃ ❃ ❃ ــــــــــــــــ
              الخـــادم
        محمد رحيم المشعلاوي

مولاتي زينب سلام الله عليها

تكول

ياهــو المثلي بالوادم جـــرع ضيـم
نهـر مو من دمه باهلي جره اعضام
عفيـه وبالحـزن گلبي جـــرع ضـام
حـــمل طفيــن مـــن الغاظريـــــــه

محمد المشعلاوي

وين رايح گلي بعدك  ياهـو اليـه
شلون اودعك وانته رايح للمنيه

حكي من اعتب عليـك .. علي يبني
روحي يمه ابين اديـك .. علي يبني
علي يبني   …   علي يبني
ــــــــــــــــــــــــــــــــــــــــــــــــــــــــــــــــــــــــــــــ
ياعلي يايـمه تـدري   بحـالتي لـمـن تـغـيب
لحضه من يغيب رسمك گلبي يايمه يشيب
يـمه ليـلـي ما انامه  مكابله الهم والنحـيب
هسه رايح للمنيه الموت هم قسمه ونصيب

ياعلي ادعيت العلي سالم يردك
بلا گلب تدريني يمه گلبي عندك
يمته ترجع يالحبيب .. علي يبني
انته لجروحي الطبيب .. علي يبني
علي يبني  …   علي يبني
ــــــــــــــــــــــــــــــــــــــــــــــــــــــــــــــــــــــــــــــ
يبني من لحضة وداعك  باقيه احسبلك ثواني
احجي وي روحي اكول منين اجيباً علي ثاني
وانـه ما مـرتاح گلـبي سـاعـت ابـني الودعــاني
مره اكـولً ها يجـيـني ومـره اكـولً هـا نسـاني 

ياشبيـه المصطفى  يبني يغالي
ارجـع اوفرحني يـرباي  ودلالي
طولت يبني بمغيبك .. علي يبني
تـالـي اموذر نصيبك .. علي يبني
علي يبني   …   علي يبني
ــــــــــــــــــــــــــــــــــــــــــــــــــــــــــــــــــــــــــــــ
ارتقب وادعي واتـاني  وامشي بالخـيمه ورد
وعيني عالميدان يبني بالكي اشوفك من ترد
راح ابوك اويبجي ردلي وكـالي ابنـج مـا يرد
وسفـه الـف ياحـيف يمـه هيـج ذبـلان الـورد

كوم ورجـع يمه فدوه اغديلك
هذا ابوك الوحده ضل يبجيلك
وحده ابوك وكوم حضره .. علي يبني
بفگد اخييه انكسر ضهره .. علي يبني
علي يبني  …  علي يبني
ــــــــــــــــــــــــــــــــــــــــــــــــــــــــــــــــــــــــــــــ
ما مصدكه تروح عني بالحضه شو جنك عفتني
الهــوه بغيـابك يغــالي لا چـهـبته ولا چـــــهبني
واكـفه ابـاب المخـيـم  يبــني واومي ما شفتني
يمته ترجعلي وشوفك كمت احشـم يبنـي يبني
 
كون أدري تروح ما ترجع عليه
اله خلـي تصير موتتنه ســويه
روحي متعوده لحنانك .. علي يبني
بالله شي سده مكــانك .. علي يبني
علي يبني   …  علي يبني
ــــــــــــــــــــــــــــــــــــــــــــــــــــــــــــــــــــــــــــــ
يالغيـور شلون بعدك  ترضئ يمه امشي سبيه
وبعدك اعيون الاجانب  بالنضـر تشبح علــــيه
جنـه انه اويـاك يبـني  حـته ممشـانه ســويـه
هسه راح امشي بغيابك مجتفه بـين ال اميه

يالجنت دم بوريدي يمه تمشي
لوغمضت الكاك كاعد جوه رمشي
شيحمل افراكك يالاكبر .. علي يبني
شما تجيها الروح تكصر .. علي يبني
علي يبني   ...   علي يبني
ــــــــــــــــــــــــــــــــــــــــــــــــــــــــــــــــــــــــــــــ
الخـــادم :محمد رحيم المشعلاوي

@Mohammed_almassl

#نزله
لمولاي اباالفضل العباس

رايح انـه عالجيش وارد اشفي غليلي
وارجع شــايل المـاي ياخـويه بشليلي

الحـومه زغيـره .. وزينب جبيـره
    اخو زيـــنب .. اخو زيــنب
 ــــــــــــــــــ ❃ ❃ ❃ ــــــــــــــــ 
يختي رمشت عين رايح هسه راجع
راح جـيب المـــاي بيـدي للمضاجــع
واله خلي الجـيش يم الجربه راكــع
خـل يسمعني الجـهلنـي لـو مسامـع

فارس آل عدنان وحسيني أطيعه
لو تملكلي دنيـاي ما اكـدر أبيـــعه
حسيني هوه ديره .. وزينب جبيره
     اخـــو زيــنب ..اخـــو زيــنب
 ــــــــــــــــــ ❃ ❃ ❃ ــــــــــــــــ
بگلبي انه احساس عالي وغيره شايل
الهـوه لو مر اعله زيـنب عنـدي عـايـل
جــــبل انــه وهم سمعتو جبــل مـايل
والنسب معـروف هيــبه بالحــمـــايـل

هاشم بالوغه احيود معروفه واصيله
وفازع ليكم اليوم من ارجال الثجيله
     شيخ العشيره .. وزينب جبيره
     اخــو زيــنب .. اخـــو زيــنب
 ــــــــــــــــــ ❃ ❃ ❃ ــــــــــــــــ
گلبي حس بعطش زينب عندي احساس
وصحت زينب خويه ابشـري انـه عباس
الـه اجيـب النهـر ليــج اگبــال هـالنـاس
ولو رفـض يخـتي يجـيلـج الـه يـنداس

الشط ما يضل غاد للخيـمه ارد اجيبه
ماي الشط يجي اهنا لعيــون الحبيبه
ويمشي بمسيره .. وزينب جبيـره
اخــو زيــنب .. اخـــو زيـــنب
 ــــــــــــــــــ ❃ ❃ ❃ ــــــــــــــــ
ما اهـم لاجـيـوش انــه وانـتي تـدريـن
دارس افـنــون المـعـارك بـــدر وحـنـين
فـارس وسبـع الكنـاطـر واخـو الحسـين
بخزره وحده الجيش هسه يصير نصين

بعيني اظرب اسهــام للـرايد يـقــاتل
الخدرج انه حمــاي من زغري مقاتل
فعالي جثيــره .. وزينب جبيـره
   اخـــو زينب .. اخــو زينب
 ــــــــــــــــــ ❃ ❃ ❃ ــــــــــــــــ
آنـه ملك المـوت نازل هيئـتي هـــاي
حـتئ عـزرائــــيل  تـايـه مـنـه الـراي
كالي اوكف يابوفاضل صارو اهـواي
خل اجيب املاك تحسب موته وياي

يحـسب يخطأ ويعيد ما يلحـك عليه
احضن بيهم احضون واشمرهم بديه
  لعيون الاميــره .. وزيـــنب جبيره
    اخــــو زيــنب .. اخـــو زينب
ــــــــــــــــــ ❃ ❃ ❃ ــــــــــــــــ
آنه نـــازل عالمـعـارئ بيمنـتـي سـيف
حروره بـيه ونار تلهب تجوي الصيف
حطب راح اشعلهم انه واكرم الضيف
ما أجــامل انه بيــهم واخـذ الحيــف

وينه الكال انه فلان خل يبرزلي وينه
رايح آنـه للـمـاي خــل يحسب سنينه
سنينه الاخيره .. وزيــنب جبيره
   أخــو زيـنب .. أخــو زيـنب
ــــــــــــــــــ ❃ ❃ ❃ ــــــــــــــــ
الخادم :محمد رحيم المشعلاوي

@Mohammed_almassl

كلمن كــتب لحسين يتجــازه منذور
يكتبله بيت يصير بالجنه اله اقصور

#محمد_المشعلاوي

#عبدالله_الرضيع_ع

غاب الفـرح لمـن غـبت  عبـد الله يـمـه
والدنيه بعيوني صفت  ياوليدي ضلمه
زغير بعدك عالذبح
أشعنده وياك الرمح .. عبد الله يمه
ــــــــــــــــــــــــــــــــ
يا وليدي ياجـرح الصبه يالـمارحت عـن بالي 
ويـاك ما جـنت افترك و شـكد سَهرت ألـيـالي
عبد الله يالطبعك تـرف وغيـرك ولا  يحـلالي
من جــاك يايمه السهم بالرگـبه ضل  ايـــلالي 

ادعي اعله نبلة حرمله ... خلت دموعي هامله
لو ادري هيج ما أجي ... ولا شوف عملة كربله

من الله لا ينطي السهم   يمه اعله فعله
عطشان مــــاي وحرمله  يـرويك نـــبله
يمـه ياوجـه الصبـح
أشعنده وياك الرمح .. عبدالله يمه
ـــــــــــــــــــــــــــــــ
يالسالب عيوني الهجـر  والنـوم ما مـر بيــه
لو غمضت لحظه الرمـش طيفك يسير اعليه
مكطوع من عندي الهوه مختنكه حيل الريه
مـن كتـر فارگتك أنـه ومن كتـر هـم مسـبيه

مسبيه وي وادم غرب .. فاركتك بموقف صعب
راسك عالرماح انرفـع ..  يايمه واعيوني تصب

كل شوغه من جاك السهم  مو بيك بيه
تمنيت گبـلك مـن شفـت  كـون المـنـيه
يزغير وجبير الجرح
اشعنده وياك الرمـح  .. عبدالله يمه
ـــــــــــــــــــــــــــــــ
يحسين عطشان الولد  للحومه اخذه وشربه
بالـجــن بگـه بيهم فرد  والطفـل يكسـر گلبـه
ردالـي بـس ابـياوكـت  بحـسين بانـت رهــبه
بثنيـن أديـــه ابنه انقتل  صعبه ياوادم صعبه

وديته ابيض من ضمه ..
 بس من رجع لون الدمه
احمر صبح لون الكطن ..
 من لونه صابغهه السمه

ردالي مصبوغ الكطـن  مـن لون الدموم
الماراد يجرحني بخبر  رد حـمره الهدوم
سابح رجع بالدم سبح
اشعنده ويـاك  الـرمـح
ــــــــــــــــــــــــــــــــــــ
من شدة الموقف صبغ لون السمه وصار احمر 
وحسين نـــاده ابياذنب   للـطفـل حـزو  منحر
اشكد صبر عنده الولي بس ما حمل هل منضر
عبد الله غـركــان ابدمه  وزينب تـكـله اتـصـبر

ياخويه شتحمل بعد .. مذبوح شوفيه الولد
ذنبه طلب ماي الشرب .. دمه اعله نحره تجمد

عبد الله يا ازغـر فـده  لـربـي هديته
من صابه المثلث كسر گلبي ابجـيته
ياوسفه ياوجه السمح
اشـعنـده ويــاك الرمـح .. عبد الله يمه
ــــــــــــــــــــــــــــــــــ
ماشـبعَت العيـن بنـضر  منـك يـبعد أعيـونـي
وكل ما أصد اعله الرمح  أركضلك أو ردونـي
يالبعدك ابعمر الـورد  غيـرت شكلي او لـونـي
كلمن نضر عن حالتي  شيشوف بـيه شلونـي

هوه شبعد يسوه العمر .. خلصت حياتي بالهجر
شضلي بعد من دنيتي .. مذبوح يا خيط الفجر

ست اشهر وراسه برمح   شمسوي ياناس
علمني عالضحكه ومشه  تاليته بس راس
البسمه بعدك ما تصح
اشعنده وياك  الرمــح
ــــــــــــــــــــــــــــــــــــــــــــــــــــــــــــــــــــــــــــــ
الخادم :محمد رحيم المشعلاوي

غاب الفرح لمن غبت عبدالله يمه
كلمات محمد رحيم المشعلاوي