يحسين وياك.. مانخلف موعدنه
نمشي وبحماك.. هيبتنه وقائدنه
مشايه وعلى حبك
لازم نوصل الگلبك
واحسينا
.........................

يابو الاكبر حبينه.. وبيك انجنينه
انته اعرف بينه .. يحبنه الاولي
ماكو بهل عالم مثلك.. انته وكل اهلك
والعافك يهلك.. يبن حيدر علي

نكصد بيوم اربعينك.. نمشي وتصد النه عينك
نضره ترزقنه بحنينك.. والعزم
بصايتك تنشد حزمنه.. وانت بالطافك تلمنه
بسمك انعلي هممنه.. ونلتزم

خدام كل يوم.. كل ساعه وكل لحضه
محضوض مبخوت.. بهاي الخدمه اليحضه
ردنه اكثر بعد قربك
لازم نوصل الگلبك
واحسينا
..........................

بدربك تمشي الوفايه.. رايه بصف رايه
وننطيك حجايه..يمهجة فاطمه
منعوفك لاوعيونك.. منخيب اضنونك
ونواسي اضعونك.. يرحمه امن السمه

نكتب اعله الرايه كلمه.. ياحسين الخدمه نعمه
الزاير اتحققله حلمه.. بنضرتك
الخادم اصبح لك نشيده.. خادم انه ومن عبيده
الامنيه عنده الوحيده.. زيارتك

وياك للموت.. تبقه ترف الرايه
أمواج أمواج.. يابحر المشايه
تطلبنه وله انطلبك
لازم نوصل الگلبك
واحسينا
..........................

موكب موكب شفناهه.. تعزب نلكاهه
الخدمه شمحلاهه.. يسر ماينعرف
موطنه وكل احدوده.. سفره وممدوده
الخدام جنوده.. ابد ماتنوصف

خدمتك ياالضامي تسوه .. انته المخليهه حلوه
صاحوا اسمك گلنه هوه.. بالعشك
انته تحجي وكلهه سكته.. انه احبن انته وانته
انته اول حب عرفته.. من صدك

ننساك هيهات.. ياسلطان العالم
خدام وملوك.. يم بابك تتزاحم
نتعنه مشي الدربك
لازم نوصل الگلبك
واحسينا
...........................

اليدخل يمك بالحضره.. يتجدد عمره
وتكتبه الزهره.. بسجلات الخدم
الزارك ومصفي النيه.. تنطي ذريه
يابو الحنيه.. وتزيده بالنِعم

ياهو مثلك عنده وادم.. خادم ويخدمله خادم
حسين ياسيد العوالم.. والنعم
مجنن انته الناس كلهه.. عافت الدنيه واهلهه
حسين يالمة شملهه.. ياشهم

احله الايام.. عشناهه بهل خدمه
شكراً لله.. رازقنه اكبر نعمه
بس انته السهل صعبك
لازم نوصل الگلبك
واحسينا
.........................

لا حر عنك يمنعنه. يالدربك جنه
مانبعد عنه.. مصابك بالگلب
وياك انضل للتالي.. بس انته الوالي
يحسين الغالي.. بدونك جن غرب

اي وحك بدر العشيره.. انته خيمتنه الجبيره
ياابونه الكله غيره.. ومرجله
احنه ابد ماعدنه غيرك.. دللتنه وهذا خيرك
بكل نفس نشتم عبيرك .. بكربله

طفك يحسين.. يلجمنه اعله مصابه
الذكرك مولاي.. تبجي عيون احبابك
يمضحي بدمه الربك
لازم نوصل الگلبك
واحسينا

محمد هادي العقابي

ابعين الدهر.. أجمل سفر
من كل ارض.. الى النحر
مشايه وفايه والرايه راية نصر
زوارك احرارك انصارك ابكل عصر
........................

نمشي.. الك يحسين
دربك.. ضوه الكل عين
انته.. ابونه الزين
بدونك.. نروح الوين

يضل حبنه الك انته.. يبو الروح الحنينه
تركنه الدنيه والبيهه.. وعلى دربك نوينه
وحك عينك عله الموعد.. يبو الاكبر اجينه

محسوبه كل خطوه بدربك

عن هل عشك.. مانفترك
گلب الخدم.. بسمك يدك
تدرينه بو سكينه حبينه حب مستمر
زوارك احرارك انصارك ابكل عصر
...............................

يومك.. فلا ننسا
الزاير.. يجيب ويا
حزنه.. ودمع عينا
ورايه.. ترف فوگا

وحك حزنك عله اخيامك.. وحك دمع العقيله
وحك ضعنك واهل بيتك.. وابو الرايه الثگيله
نضيع احنه وتره بدونك.. فلا عدنه وسيله

خلينه خدام ابابك

طاعتنه الك.. انته وهلك
بيدك تره.. ايدور الفلك
يلوونه رادونه شافونه ماننكسر
زوارك احرارك انصارك ابكل عصر
..........................

عجبه.. المواكب هاي
تحيي.. اليجي مشاي
بيهه.. اليوزع ماي
اينادي.. هلا بالجاي

مواكبنه حسينيه.. الزاير يخدمونه
تره الخدمه ورثناهه.. ورث جدنه وابونه
ونورثهه ونوصلهه.. للاجيال اليجونه

ويوميه جن عدنه العاشر

الخدمه عزم.. بس للشهم
اليخدم صدك.. والملتزم
خدمتنه غايتنه ثورتنه يبن الطهر
زوارك احرارك انصارك ابكل عصر
...........................

نمشي.. الك احرار
نوصل.. الك زوار
بيدك.. عمرنه اندار
ثوره.. يبو الثوار

على نهجك على دربك.. ندوس اعله المنايه
ملاينك نجي البابك.. نشيل بجفنه رايه
رضاتك بس يبو اليمه.. وابد ماعدنه غايه

ابلا خدمه ماتسوه الدنيا

صاح الگلب.. هذا الدرب
درب العشك.. يروينه حُب
منعوفك انطوفك انشوفك انته الذخر
زوارك احرارك انصارك ابكل عصر
.............................

يمك.. حلم كل روح
عطرك.. عليهه ايفوح
لجلك.. عشكنه النوح
الغيرك.. فلا مسموح

بدايتنه نهاينته حُسين بكربلائك
الزمن خله يحاربنه.. نموت اعله ولائك
ضلام الدنيه بس انته.. تنورهه بضيائك

بالدنيه بس انته الهيبه

انته الهوه.. وحبك دوه
والكل گلب .. انته الضوه
نادينه تسمعنه مدمعنه بي نفتخر
زوارك احرارك انصارك ابكل عصر


محمد هادي العقابي

انجدد اجینه العهد فزعت ملایین
زوارك احنه واسمنه حشد الحسين

....................

رحلة عشك طويله.. انتانيهه ليله ليله
بنبض الگلب نحسب الك منعد بصابعنه
تنضر علينه عينك.. نتعنه بربعينك
لوما خدمتك والمشي يابو علي ضعنه

صوت نحجي امن الكلب.. صوت منعوف الدرب.. صوت وللحضره نطب.. مشايه نتعنه
وين عنك نفترك.. وين يااول عشك
وين يالحبك صدك.. صار احله من جنه

هذا عشكنه ويضل اعله الرگب دين
زوارك احنه واسمنه حشد الحسين
........................

انشوف المواكب كلهه.. متحزمه كل اهلهه
شيب وشباب بخدمتك منذوره لعيونك
كل زاير ايلاكونه.. بكل الهلا ايحيونه
يحسين والله الدنيه ابد ماتسوه من دونك

شوف حاربنه الزمن.. شوف ياأجمل وطن..
شوف نتحده المحن.. مادامك اويانه
دوم عنك مانزل.. دوم شما زاد الحمل
دوم نكثر مانقل.. بالشده تلكانه


واضح طريقك نضل للموت ماشين
زوارك احنه واسمنه حشد الحسين
................................

اول عشكنه انته.. الحَبك صدك يابخته
يالمالك اگلوب الخلك يحسين عالفطره
عابس صبح مجنونك.. من حگه شاف عيونك
الشافك اكيد ابلا جدل بيدك يحط عمره

صار كلمه وبس الك.. صار انته وكل هلك..
صار والعافك هلك.. يامهجة الزهره
عاش حبك للأبد.. عاش وبدمنه انوجد
عاش بينه ومابرد.. خدامك الثمره

هاي الزياره فلا تمحيهه السنين
زوارك احنه واسمنه حشد الحسين
..........................

رب الجمال اختارك.. ومحد يعرف اسرارك
الله خلق كل الأرض والحب على مودك
يالمنطي لله دمك.. وفوك العرش خط اسمك
ضامن الجنه الشيعتك يابو علي بزودك

راح نمشي الحضرتك.. راح نشتم تربتك..
راح نرفع رايتك.. والعالم ايشاهد
غيم من نمشي نحس.. غيم ونغطي الشمس..
غيم.. لا ماينحبس.. صار العدد زايد

شوفت ضريحك نكحل بيهه كل عين
زوارك احنه واسمنه حشد الحسين
...............................

هل دنيه كلهه سكته.. لو ما خدمتك انته
بصدورنه لمصيبتك ماتبرد الجمره
بصدرك بعدهه اسهامك.. وتدلل بخدامك
ياملك كل هذا الوجود ارزقنه بالنضره

هاي كلمه امن الخدم.. هاي دنيانه وهم..
هاي من غيرك عدم .. مابيهه كل راحه
صاح بسمك كل بشر.. صاح يمحلي الدهر
صاح يااعظم فخر..وجهك ومصباحه

يارحمة الله تعيش اويانه كل حين
زوارك احنه واسمنه حشد الحسين



محمد هادي العقابي

المصابك يالحسن مانشفت عيوني
عليك أمن الدمع يمه نخطف لوني
..................

نخطف لوني يلون امك يفرحتهه
تعال وشوف روحي شكبر حسرتهه
يومك زيد بروحي مصيبتهه

مثل اليوم ذاكه البيه عصروني
عليك أمن الدمع يمه نخطف لوني
................

مكسورة ضلع ماينجبر ضلعي
يوميه عله واحد يهل دمعي
يبني مايطمنك لو شفت وضعي

فوك الهظم كل ساعه يجرحوني
عليك أمن الدمع يمه نخطف لوني
.....................

الك يمه سوالف ضلت ابالي
يافتشة عيون امك يدلالي
بيك الناس يبني شيبت حالي

سهام النعش من صابوك صابوني
عليك أمن الدمع يمه نخطف لوني
.................

بمصابك اني اجيت ويعتلي وني
وطشتك من نضرته حيره حيرني
شفت جبدك بنصه وصحت آ يبني

تره الاذوك كبلك اني اذوني
عليك أمن الدمع يمه نخطف لوني
................

ياجرح الاعوفه وياجرح ابدي
وليليه الدمع نايم عله خدي
بمصابك يالحسن والله انمرد جبدي

ردو يمه إليه اردود كسروني
عليك أمن الدمع يمه نخطف لوني
...................

طلع نعشك ييمه وزادت احزاني
عليك الدهر انعى بحركه خلاني
مضلومه وزماني هواي بجاني

إليه بكل وكت ناس اليعادوني
عليك أمن الدمع يمه نخطف لوني
..................

گلب امك الزهره ماكو احن منه
كل مجلس عليك بدمعي اتعنه
ايدي اعله الضلع ومعاشره الونه

لجموني بمصابك مايداووني
عليك أمن الدمع يمه نخطف لوني


محمد هادي العقابي

اختك يالحسن .. ياروحي.. وجروحي
عنك سولفن
........................

حاربتني الناس خويه ابلا سبب اذوني
تدري يبن امي بمصابك يالحسن جرحوني
الليل هذا ايمر عليه ودمعتي بعيوني
انه زينب ياهضيمه منك ايحرموني

ضل بيه الام.. بغيابك.. بمصابك
يلجمني الزمن
..................

شلون اقنع روحي تصبر وانه اشوف بعيني
بالطشت دمك يخويه الموقف ايبجيني
سممو جبدك يغالي تموت وتخليني
صار يومك مثل جمره وبالگلب يجويني

ياحزن الگلب.. من ترحل.. شتحمل
بعدك يامحن
........................

حسين مخنوك بعبرته. محني ظهره وحاير
وصبح مكسور اعله فكدك. كلبه وي الخاطر
صاح ياريحة ابونه . ودم جره من الناظر
بعازتك يحزام ظهري. ردتك انه لباچر

يافگد الاخو.. شيتوصف.. وانته اعرف
يالگلبك احن
...................

القاسم يقبل چفوفك. ومنهدم كل حيله
وفوك صدرك خله راسه. وانته ماتحچيله
ورمله صاحت وي ابونه. هاي اخر ليله
الحمل طايح يبو محمد. ياهو اليتچيله

عشنه بهل حزن..وانه اختك.. عله بختك
ودموعي الجرن
........................

تموت وتضل ذكرياتي تخنك ابانفاسي
ومن اصد بيتك يبيتي ينلجم احساسي
سوالفك ضحكتك رسمك طابعات براسي
ياجبير اخوان گلبي  وعزوتي ونوماسي

رايح للكبر ... ياروحي  ... وضل نوحي
حارمني الوسن
.......................

خلاف عينك خويه مدري ياهو اليبارينه
مدري انت مدري حيدر علي المودعينه
سلف شايل من مجانه وكف تره ادواوينه
يالحسن موتك شبيه بحيدره والينه

يالتشبه علي ... شكد صعبه ... نضل غربه
واحنه اهل الوطن


محمد هادي العقابي

استشهاد السيدة رقية ع


تعبانه هواي .. ومومال اركض بين الخيل
تعبانه هواي.. ويوم العاشر رايد حيل
ومن ذاك اليوم الهل يوم
گلب بنيتك ضل ملجوم
.....................

شلون اصبر.. والله صعبه.. افراكك بروحي شيحمله
وين رايح.. يالعفتني.. ابيين غربه وآنه طفله

بجاني يابويه الوكت. والناس تضرب بيه
يدرون بيه امدلله. وصاحوا عليي مسبيه
ومشوني بدروب الخطر. ورجلي بجمر مجويه

مجويه بنار .. وبروحي تشب نار اخيام
مجويه بنار.. بويه المجوي شلون اينام
وايأذيني حته النوم
گلب بنيتك ضل ملجوم
.........................

دمعي ينزل.. وبيك اسولف.. هسه ابوي ايرد عليه
ايحبني ادري.. واسمي عنده.. نبض گلبي يارقيه

شكد صحت بسمك بس ردت. بحضنك الدافي اتضمني
خلصني بويه امن الشمر. بالسوط ورم متني
باكو هديتك بويه الي. ويلا وجرحو اذني

والدم ايسيل.. اذن ونحر وجف مذبوح
والدم ايسيل.. من عيني وگلبي المجروح
انترست كاع الطف ادموم
گلب بنيتك ضل ملجوم
.......................

جابو النوك. ابلا هوادج. بيش الزم خاف اطيحن
بويه وينك. ماتجاوب. بسمك من الخوف اصيحن

شصار وكبل ليله چنت. يمك يبويه مأمنه
الوجوه مابيهه عرف. ياهو اليجي يخوفنه
الله يحرمه الاخرك. ومن شوفتك حارمنه

وجفوفي زغار.. من جابو يابويه حبال
وچفوفي زعار. والطف مايرحم اطفال
امر الله الصار ومقسوم
گلب بنيتك ضل ملجوم
........................

ضعن خايف. ناس غربه. يحدي من ديره اعله ديره
والشماته. اعلينه صاحو. هالضعن ماله عشيره

للكوفه طبينه بهظم. وبسوك طبوهه النوك
وأسال بزينب عمتي. فسريلي مفهوم السوك
كالتلي خوف ومستحه. وچف بحبلهم مخنوك

يابويه شلون.. يم زينب ملتمه الناس
يابويه شلون. الضيم الشفته يشيب الراس
محروم يلوذ بمحروم
گلب بنيتك ضل ملجوم
............................

العمر يكضي. هيج احسّن. وما خلص درب السبايا
من وصلنه. الشام كله. معيد بطيحة الرايه

نمت بخرابه من التعب. وكعدني عطر انفاسك
وراسك كبالي بالطشت. يتفايض بأحساسك
ولازم اموت بشبكتك. شمحلاهه شبگة راسك

اخر انفاس. تعبانه وخليني ارتاح
اخر انفاس. والصار بذمة الذباح
لا دنيا ولاضيم يدوم
گلب بنيتك ضل ملجوم


محمد هادي العقابي