اشيعها... ضوه عيوني
اشيعها... عله امتوني
وبديّ احفر كبر عمتي
عله زينب تضل ونتي
..............

احجي ياناس... الكطع الانفاس
اني علي السجاد اضل حزين
تدمع العين... لخت الحسين
لاما اعوف دموعي والونين

أنه الكدامه عمته الكوم يسبوهه
وصاحو عله الناكه الهزله صعدوهه
بدرب ماينحمل للشام مشوهه

مشت عمتي ...وخذت روحي
مشت عمتي... دوه جروحي
كَسر گلبي والم علتي
على زينب تضل ونتي
................

تعذبت حيل... وشافت الويل
نمشي سوه ودرب السبي طويل
وناگت الشام... خلت الام
گلبي يميل الناگه من تميل

اليشاهد أهل بيته وهاي حالتهم
بين ازلام غربه وتجري دمعتهم
يضل طول العمر يبجي المصيبتهم

سبي زينب... انه الشفته
سبي زينب... الم عشته
حزن واضح يسالفتي
على زينب تضل ونتي
................

بحيره ضليت... والهه صديت
محنيه صلت والجرح جبير
حرك الخيام... وهضم الايتام
وحسين اخوهه مجمع بحصير

بليل اهدعش بالحومه اطلعت تفتر
تدور عله حسين وبالجثث تعثر
بعمر خمسين واعله التعب ماتكدر

گلب عدها...شكبر صبره
گلب عدها... نجوه بجمره
هظم بيها الرقيه اختي
على زينب تضل ونتي
...............

اخت الاحنان... بغربه واحزان
والشام ابد مايرحم الغريب
اعليها ويلاه... عاشت اباه
هواي الجروح وياجرح يطيب

اخت عباس جان بزوده حاميهه
خلوهه بخرابه وسكف مابيهه
والحارس غريب اليحرس اعليهه

جرح زينب... اخو ضامي
جرح زينب... گمر دامي
يضل همي ودمع قصتي
على زينب تضل ونتي
................

محاربه النوم... هواي الهموم
مره اعله زينب صارت الحياة
حان الفراك... والنفس ضاك
من ايدي راحت عمتي للممات

تمنت يحضر الكافل يشيعهه
وبتراب الكبر بيده يودعهه
سدت عينهه ومانشف مدمعهه

اصب دمعي... البجي زينب
اصب دمعي... وعليها انحب
تره جروحي وحزن صمتي
على زينب تضل ونتي


محمد هادي العقابي

زينب اذكروهه بنياحه
ماتت قهر مامستراحه
سلام الله عله الماعدهه خوان
...................

عاشت بالدلال بطول الايام
اميره بجال اهلهه بفيهم تنام
شافت من بعدهم كل الالام
تچوت بالجمر من نار الخيام

من غابو الوليان عنهه
كام الشمر يحدي بضعنهه
شتحمل والگلب بي تشب نيران
سلام الله عله الماعدهه خوان
..................

ويه اخوتهه ابد مادمعت العين
داير مايدور اعليهه الثنين
عشيره وياهه تمشي الكمر وحسين
خذوهه الكربله مو للدواوين

لا مادرو بالهاشميه
من طبت الديوان اميه
لهسه من الحبل بيديهه نيشان
سلام الله عله الماعدهه خوان
..................

مو بس مره ماتت زينب هواي
ماتت من مشه العباس للماي
كصدله حسين يحچي وياه بهداي
زينب منتضرتك ترجع وياي

رد الهه محني وتجري عينه
گلهه الكمر راح امن ادينه
قليله شما نسولف بيهه الاحزان
سلام الله عله الماعدهه خوان
..................

المنظر عله زينب والله ميلوك
من شدو اديهه وصعدت النوك
طرت قافلتهه بزحمت السوك
ومن المستحه ماصدت الفوك

بالحجر هل وادم ولوهه
وضلت تصد الراس اخوهه
اشفافه مفطره ومذبوح عطشان
سلام الله عله الماعدهه خوان
...................

درب اليسر مابي بس معانات
حار الرمل شبعت منه جويات
غريبه والمشو وياهه شمات
بخرابه ياهضيمه زينب تبات

ماغمضت عين بخرابه
وياهه الغرب مامش كرابه
وهيه ام الستر للستر عنوان
سلام الله عله الماعدهه خوان
...................

جرح خله بكلبهه الحزن والنوح
وماينفع دوه للكلبه مجروح
زينب بس جسد ضلت بلا روح
من شافت اخوهه حسين مذبوح

من يوم عاشر والاجلهه
تبجي وتون لمصاب اهلهه
رادت واحد امن اخوتهه دفان
سلام الله عله الماعدهه خوان

محمد هادي العقابي

اكصد يمهدي بهل رزيه
وهل الدمع بالكاظميه
اجنازه الكم غريبه بعازة متون
..................

يالحزنك يعيش اوياك كل يوم
جدك يابو صالح مات مسموم
الله يعين روحك شافت الضيم
گلبك عالاهل يوميه ملجوم

الفاكد احبابه يعيش غربه
وبس الله يدري بحال كلبه
تعال اوياك جيب ادموع العيون
اجنازه الكم غريبه بعازة متون
..........................

بسجن اظلم وجوه الكاع مسجون
لا نسمة هوه ولا ضي للعيون
عايش غربته الكاظم معانات
وياطوك الحديد مثكل المتون

والليل يخلص دمعه دمعه
الحسره شكبرهه الجوه ضلعه
لاخوان تفزعله ويحضرون
اجنازه الكم غريبه بعازة متون
.......................

مامرتاح ابد ومساهر الليل
وحياطين السجن جن حافر الخيل
على شوفت بناته بصدره حسرات
وفراك الاهل ماخله كل حيل

لا اهل يمه ولاعشيره
والوحشه بعيونه چبيره
الهضم والضيم ماخلن عليي لون
اجنازه الكم غريبه بعازة متون
.........................

امن الطاموره مل وشيب الراس
من الخنكه كوه ايجر الانفاس
باب الحاجه هذا بجفه كل خير
الشامت على بابه مخلي حراس

والشيعه منتظره علامه
بلكت يردلهه بسلامه
وكل يوم اليمر بيهم ينطرون
اجنازه الكم غريبه بعازة متون
........................

شايل گلب ينبض بس بالجروح
وعلى اوليده الرضا بكل مغرب اينوح
انحرم من شوفت ابنه وروحه تشتاك
وشيطيب الوجع لو چان بالروح

موجوع كلبه وظهره مايل
من الفركه لو من السلاسل
وين اولاد هاشم خل يشوفون
اجنازه الكم غريبه بعازة متون
..........................

باچر عالجسر موعد للدموع
والنبضات توكف جوه الضلوع
يمهدي احضر وشيعه بدمعة العين
الكاظم مات كلبه هواي مشلوع

يالمهدي الله يعينك بهاي
ويعظم الله اجرك يمولاي
گلبك منفطر هليله محزون
اجنازه الكم غريبه بعازة متون


محمد هادي العقابي

*تـاج الــــزلــم*
*مولد أبالفضل العباس(ع)*
---------------------
علىٰ منصة اليوتيوب :
https://youtu.be/cm80fc3d-Dk?si=NHpUhDxQPh-vnXax


▫️كلمات الشاعر :
*محمّد هادي العقابي*

▫️لحن و أداء :
*ألرادود محمّد العيداني*

▫️ألهندسة و التوزيع :
*سيد ميلاد الموسوي*

▫️التصوير والمونتاج :
*مـــيـــلاد روشــــــــن*
---------------------
شكر خاص :
عبدالرضا احمدي

إنتاج : شـعبان المُـعـظّم
عام 2024 م | 1445هـ.ق
أسعد الله أيامكم بالأعياد الشعبانيّة
نرجوا النشر محبةً لمحمّد و آل محمّد
🌸🌸🌸🌸🌸🌸

يروحي توجهي
لبو وجه البهي
حبيبي المنتظر
عشك ماينتهي
...................

هايه فرحتنه الجبيره.. مهدويه
گلبي كل أحلامه صارت ..مهدويه
ضلي بفراحج يروحي.. مهدويه

اليوم كل الخير اجانه المهدي جاي بهيبته
ونزلت الأملاك كلهه بالولاده اتلكته
الله لايحرمنه دنيا وآخره من شوفته
المهدي ابونه من زغرنه وكبرتنه امحبته

اغله صار امن الهوه.. ابن الحسن
بكل درب نور وضوه.. ابن الحسن

وجوب اسجد شكر
عليه هب عطر
حبيبي المنتظر
عشك ماينتهي
......................

الليله هاي احله الليالي.. فاطميه
والسعاده ابلا نهايه.. فاطميه
خادم وكل امنياتي.. فاطميه

الف مبروك الولاده انهني امنه فاطمه
والفرح بسم ابو صالح يوصل السابع سمه
انولد نور بدنيا صارت من ضلمهه مضلمه
شكراً بكد رحمة الله العلي حماي الحمه

المهدي صار ومن صلب.. علي علي
اوياي افرح يالتحب.. علي علي

الكمر خل يختفي
جماله يوسفي
حبيبي المنتظر
عشك ماينتهي
........................

انئدي للمهدي التحيه.. عسكريه
قائد واحنه جنوده.. عسكريه
ونبعث السامره فرحه.. عسكريه

غرد الطير بسمانه انولد راعي المرجله
وكل گلب للمهدي يهتف ياهلا ومية هله
العسكري ناده يشيعه وصوته بالحب اعتله
الليله كل محفل فرحته وصلوهه الكربله

هايه فرحه امن العمر.. للمنتظر
افرح افرح وابتشر.. للمنتظر

بلا حيره ووجل
اعيد المستهل
حبيبي المنتظر
عشك ماينتهي
.........................

الكمر ضم نوره وجماله.. بهل مسيه
انولد نور الهاشميه.. بهل مسيه
ابو صالح طل علينه.. بهل مسيه

والعجايب سبعه كلهن بالامام اتعجبن
تواعدن كلهن مشله هناك يم مهده التقن
صار اول عجبه بيهن ابن مولاي الحسن
المهدي خير المهدي نعمه المهدي المحلي الزمن

يسري حبه اويه الدمه.. نبض الگلب
يمته روحي اتكلمه.. نبض الگلب

اماني ودنيتي
اشوفه منيتي
حبيبي المنتظر
عشك ماينتهي
........................

يمته اشوف الرايه بيده.. حيدريه
بدولة الحب والعداله.. حيدريه
الناس متجمعه اعله حبه.. حيدريه

يمته يضهر للبريه ويضهر الحق والعدل
والكره الارضيه كلهه تصيح بسمه وتحتفل
أدعو وياي الضهوره والفرح خل يكتمل
بالفرج ادعي الامامك بالك السانك يمل

أسأل الله برحمته.. ربي الفرج
عجلنه بطلعته.. ربي الفرج

يجي شايل لوه
ويشك صدر الهوه
حبيبي المنتظر
عشك ماينتهي


محمد هادي العقابي

انتظر واحد يجيني.. ياهلي بيوم اربعيني
يمي اينوح
امن السياط الالمتني... دمعه منكم تشفي متني
الكله جروح
وينك... وينك... ياعباس
....................

شكد اراقب... يالحبايب.. وانتضر واحد يمر
اهلي كلهم... ماشفتهم.. ولادمع فوك الكبر
وينه اليجي ويوكف عليه
زينب تره الهسه سبيه
هذا حزني... وهذا وني.. وخاطري بي جم كسر

من مشيتوا الهسه اني... مارحم بيه زماني
ماتدرون
من طلع ضعن السبايه... امن الشمس حمره العبايه
ماضل لون
غربه... غربه... هاي الناس
وينك... وينك... ياعباس
...................

ماكو محمل.. واني أخجل... والدرب ماينحمل
يهلي انحب... انه زينب.. والسبي نوكه هزل
البعدو اهلها ومشو عنهه
سوط الشمر يضرب متنهه
والاميره... تصير أسيره.. وجفهه ينكاد بحبل

منهو يحمل هذا حملي... طشرو بالهيمه شملي
ازغار اكبار
گلبي يوكف ساعه ينبض.. ساعه امشي وساعه اركض
بروحي النار
همي... همي... ماينقاس
وينك... وينك... ياعباس
....................

بالمخاطر... وانه اكابر.. وعالحرم گلبي يرف
والخرابه... بلا كرابه.. والحرس وين الصلف
بعد الكمر حراسي غربه
يآال هاشم والله صعبه
شكد مشينه... ومالكينه.. من بعدكم كل عرف

روحي تنشدني عليكم... سلمتها ابين اديكم
يغله الناس
هسه محتاره اشاكلهه... يهلي ياهو اليفزعلهه
وشاب الراس
ضاكت... ضاكت... بصدري انفاس
وينك... وينك... ياعباس
...................

كل مراري... وحتضاري.. والهدم حيلي هدم
دخلوني... ومارعوني... بذاكه ديوان الزلم
كلهه شماته واعرفتهه
ووجوهم تضحك شفتهه
بصدري عبره... وگلبي جمره.. وثابت بروحي العزم

شكد بجيت انه بغربتي... بس ولا شافوا دمعتي
مني اتطيح
هيه شتفيد المدامع... وروس اخوتي اكبالي اباوع
دمهه ايسيح
دمعي... دمعي... كله احساس
وينك... وينك... ياعباس
....................

هذا حالي... والجرالي.. وفتره من بعد الجره
موتي اجاني... ومن خذاني.. روحي مشتاكه تره
صار اربعيني وما شفتكم
زينب تره اني متانيتكم
والله احبكم... وبدربكم.. روحي تبقه مناطره

كل الهموم العليه.... من تجون زياره إليه
كلها تهون
حسين لو شفته اجاني... والكفلني وما نساني
ايصيح ام عون
ذخري... ذخري... يانوماس
وينك... وينك... ياعباس

محمد هادي العقابي

* قصيدة أول گمر

https://youtu.be/YDgXXT7ad08?si=Th-TdRgV6qRlVB8g
* ألحان وأداء / الرادود نجاح الكعبي
* كلمات الشاعر / محمد هادي العقابي
ذكر ولادة الإمام الحسن المجتبي (ع) رمضان المبارك 1446 هـ

ماهمني جرحي وطبرتي...اذاني دمع ابنيتي
زينب تضل بلا علي...زادت صعوبه حالتي 

................

بويه زينب ضمي دمعج تره يئذي والدج
كلهه عندي بصفحه وحده ونتي صفحه لوحدج

مشغول بالي وفكري وياج
يابويه ضمي دموع عيناج
تدرين احن ابقه اعله ملكاج
تسكتين لوابجي اعله مبجاج

دمعج يزّيد بالالم.....بالطبره احس ينزل سهم
زينب يبويه تحملي.....زادت صعوبه حالتي

.................

مبينه من اوصاف وجهج بويه مكسوره كلب
ادري يازينب يألمج موقفي كبالج صعب

زينب يبويه لاتنوحين
حسره تره بكلبي تخلين
ماطيب المجروح الونين
اتأذين كلبي من تلوجين

الله اليصبرج عالجره....زينب يبنت الطاهره
انتي اعز وحده الي....زادت صعوبه حالتي
.................

بويه دارج بيهه اخوتج همه الج عون وسند
مااروح ابلا وصيه وهذا الج مني عهد

ماخلج تحيرين بالام
عباس اجيبه وصيري كدام
هوه كفيلج هوه خدام
يمسح الج اثار الجدام

عباس جنه حيدره....تبقين عنده مخدره
هذا الكفو ودللّي...زادت صعوبه حالتي
.................

عندي الج بويه وصيه تفيدج ادري بكربله
لومشو عنج اخوتج انتي اكفلي العايله

بويه انه هسه مصابي ويهون
بس انتي ينضربلج امتون
عالهزل وتصد ليج العيون
وعليج اخوتج مايردون

يبقه كفيلج عالنهر....وحسين مكطوع النحر
امر الله هذا تقبلي....زادت صعوبه حالتي
...................

بويه وكتي مارحمني وحيل اذاني الزمن
ومن كثر دمعي على امج احس بعيوني نعمن

رايدلي شوفه من الاحباب
مصاب امج الهلحظه ماطاب
يابويه ماهماني الصواب
بكد مااهم بدفعة الباب

عايش بدنيا مضلمه...مات الفرح وي فاطمه 
يابعد ابوج وكل هلي ...زادت صعوبه حالتي


محمد هادي العقابي

علي وبس انته الأمير
بعد مثلك مايصير
وداعاً يا أباالحسن
..................

علي من عالم الذر الله خالقنه الهواك
نحبك ياولينه وابد مانعشك سواك
مصابك بينه جمره يل رضا الباري رضاك
بحزن گلبه ودمعته الليله كل شيعي نعاك

يحيدر انته الحبيب
يضل جرحك مايطيب
دموع احبابك جرن
...................

أمير المؤمنين وطايح ودمك خضاب
الأرض والسمه حزنت ياعلي بهذا المصاب
وحك دمعة حسينك بعدك انشوف العذاب
يخيمتنه الجبيره يصعب اعلينه الغياب

تروح ودمك يسيل
يتامه وانته الكفيل
نضل بعدك للمحن
..................

يحامي الدين انته وانته دين الله القويم
علي وماعدنه غيرك ياسراط المستقيم
عله مصابك ينوح ويجرن عيونه اليتيم
وداعك هزهز الدنيه يبو گلب الرحيم

قسم وبرب السماء
الك نبقه اعله الولاء
ولا نهتم للزمن
.....................

هاي الليله بيهه شكد حزن صاب العباد
يحيدر شيعتك وسط الگلب نصبو حداد
اجيناك بهضمنه ياعلي وثوب السواد
ألم بينه وحكك والألم هل ليله زاد

يحيدر انته الأمان
خذت وياك الحنان
يبعدك عنه الجفن
.....................

يضل طول العمر يابا الحسن هذا النداء
علي وهل صوت هذا نردده بعزم الولاء
يحلال الشدد بالشده نرخصها الدماء
ابونه وعلمتنه عالشجاعه وعالاباء

نعوفك هذا محال
يهيبة كل الرجال
فخر يااجمل وطن
......................

املنه المنتضر والرايه بيده وذوالفقار
يجي ويشوفنه بگلوبنه مشتعله نار
ولدك احنه وانصاره وسوه نطلبله ثار
يحيدر عاليضدك كل وكت هل دمنه حار

ولينه ونعمه الولي
وكفو منك ياعلي
اليحبك گلبه حزن


محمد هادي العقابي

دنية غدر.. بيهه شكثر.. شفنه الألم يابا الحسن
ضلعي انكسر.. ونته انطبر..راسك يمن انته الوطن
كافي تعال وخل نرد سوه
بالدنيه ادري ايخنكك الهوه
.................

يصب دمعي عله مصابك  يحيدر فاطمه اني
خلص عمرك يصب دمعك  عليه وصعبه تنساني
تعال اهنانه انتضرك  اباب الجنه تلكاني
تسولفلي حزن گلبك  وسولفلك عله احزاني

ياحيدره.. تدري تره.. كسر الضلع ماينجبر
موقف صعب.. عشنه بغرب.. وي وادم اتحب الغدر
من الألم دلالك انجوه
بالدنيه ادري ايخنكك الهوه
....................

سهر ليلك اخذ حيلك  تعال ارتاح من همك
بيوم الطحت هل ضلام  تشفو من نزف دمك
كافي امن الجروح هواي  شيتحمل بعد جسمك
غمض عينك انت وشوف  تلكه فاطمه يمك

كافي الهجر.. وانه انتظر.. مشتاكه لعيونك علي
ذاك الحزن.. خل يندفن.. لو شفتك الهم ينجلي
يابا الحسن حضرت الك دوه
بالدنيه ادري ايخنكك الهوه
...................

زمان البي عشت وياك تساعدني وتداريني
تعب دنياي كله ايروح  يحيدر من تحاجيني
تناديني ام حسن والصوت احسه بگلبي يرويني
وتفاركنه وخذاني الموت  وانته بروحي وبعيني

عشرت صدك.. من تختنك.. ياحيدره اني اختنك
لابيه ارد.. من البعد... بس گلبي وي گلبك يدك
بالجنه اشوفك يمي ياضوه
بالدنيه ادري ايخنكك الهوه
....................

تعال اشتم هواك هنا  وخلي ايطيبن اجروحك
انت انسان يابو حسين الوادم كثرت نوحك
تسولف همك اعله البير  من كد الهضم روحك
غدر بيك الزمن ياحيف  وسيف الضالم ايلوحك

انت الأمير.. المايحير.. ومخضب اللحيه بدمه
يابو الفقير.. جرحك جبير.. وينزف يحماي الحمه
من المصايب ضهرك التوه
بالدنيه ادري ايخنكك الهوه
........................

يالعايف وراك اعزاز   انته بحالهم اعرف
حزنهم من رحت عنهم  ياحيدر ابد ماخف
تعال وياي ساعدني  حيل ايريد يوم الطف
واني مكسره اضلوعي  وحزني ابيش يتوصف

ايصر اللقاء.. في كربلاء.. مايشفه ابد هذا الجرح
عينك تشوف. ذيج الألوف. وراس الذبيح اعله الرمح
احزانك واحزاني نينوه
بالدنيه ادري ايخنكك الهوه


محمد هادي العقابي

يجري دمعه... وصوته ينعه
بالسمه سيد البشر   مصيبه مصيبه
....................

الليله محمد بالدمع واحزانه بالسماء
ينعى عليّ المرتضى وناصب إله العزاء

حيدر الكرار طبرو هامه
ونطبر دين الله كل اسلامه
طايح المايوم طاح الثامنه

واليتامه... بالسلامه
تندعيله امن الخطر   مصيبه مصيبه
...................

كل الملائك والرسل مفجوعه بالمصاب
بدم الامامه مخضبه لحية ابو تراب

سال دم الهامه غطه عيونه
امن الالم حيدر تغير لونه
اعياله مجموعين ويودعونه

والسمه تنوح... تشوفه مطروح
اه يافارس مضر  مصيبه مصيبه
..................

ارض وسمه بهذا الخبر كلها أعلنت حداد
ناس ابدمع ناس بهضم ناس ارتدت سواد

الدنيه حزنانه وتنوح شبيهه
راح ميزان العدله البيهه
والرعيه أتريد إليداريهه

الدنيه كلهه... راح املهه
وگبره هليله انحفر  مصيبه مصيبه
...................

ام الحسن ويه الرسول وبالهضم تنوح
بعده الأثر فوك الوجن ماطابن الجروح

زيدو كسرة ضلعهه الليله
وبدمع من دم علي تبجيله
شافهه المختار وانهد حيله

من حزنهه... يعله ونهه
راس واليهه نطبر    مصيبه مصيبه
..................

ايشيعونه مو للمكبره ايشيعونه للجنان
هليله ياناس اندفن بالدنيه كل حنان

الجنه ماشافت مثل هل حاله
كلهه متحضره لستقباله
والدموع اعله الوجن هماله

منهو يكدر... يحمل اكثر
فرگته تحني الضهر   مصيبه مصيبه
....................

دار الوصي خير العمل ضلمه اصبحت وراه
حيدر علي نوره انطفه وماحصلوا دواه

وزينب تنوح ودمعهه بعينهه
والحسن وحسين مثل اونينهه
كلمة البويه علي مودعينهه

صار الوداع... وكل حلم ضاع
منه ما شبعوا نضر   مصيبه مصيبه


محمد هادي العقابي

ماانسه ذاكه الصبح.. طر گلبي صابه برمح
متعني جايب جرح... ماله طبيب ايداوي
.................

جرح الهجر عرفته.. بعيوني حين الشفته
يبس الحيدر شفته ... واني تغير لوني
جاب الحزن وجاني.. بلادمعه ماخلاني
يم والدي بجاني.. وشيضمه دمع عيوني

يحاجيني ابوي بدمع عينه
حجي مخنوك مابيني وبينه
ضل الألم ياكل بيه ياناس
ابدال اسوالفه اسمع ونينه

انضر علي مو علي.. وحيله مشه الاولي
بس عينه تنضر الي.. ماله طبيب ايداوي
......................

ذكره وتضل جديده.. ويوميه جرحه اعيده
العام موبعيده... من طب عليه بدمه
ماانسه ذاك المنضر.. وي روحي ضل يتكرر
مسندينه اخوتي ويعثر.. وكوه يطلع الكلمه

هواي الصور بس وحده اعله بالي
كبالي ايلوج اشوفه العندي غالي
ابوي اعله الوساده ولونه مخطوف
أسأله ومايجاوب عن سؤالي

شلونك اكله بحزن... مايهز حته الجفن
موطبعه لاكن يون.. ماله طبيب ايداوي
.......................

مكسوره أكعد يمه .. جرحه كلف ويلجمه
وتلجمني شوفت دمه .. يعصر بگلبي صوابه
ايسيل الدمه امن الهامه ... وماكو اعله راسه عمامه
مايهده من الامه ... ضماد الجرح عصابه

موقف اخذ روحي الله اكبر
معصب راس ابوي ووجهه اصفر
يدير عيونه بيني وبين عباس
اكو بگلبه حجي امن اصوابه اخطر

بكربله يدري انهضم... ومن اخوتي انحرم
اصوابه جازي العظم... ماله طبيب ايداوي
.................

دمعه اعله خده نازل... ويصيح يابو فاضل
عباس انته الكافل.. زينب امانه بأيدك
حط ايدك بأديهه.. وبعيونك تخليهه
هاذا الزمن ياذيهه.. انته الكفيل تريدك

ياراعي الامانه هايه زينب
بوجودك مااريد اسمعهه تنحب
عليهه هواي خايف ياابو الجود
لون عنها غبت زينبك تتعب

بيه يوصي الگمر.. لو عال بيه الدهر
ذبل عيونه السهر.. ماله طبيب ايداوي
......................

شفت الحسين بدمعه.. والحسن لازم ضلعه
حاروا اخوتي بوضعه.. مسموم سيف الصابه
البلحرب ثابت عزمه.. ومارجف من كل زلمه
عياله عليه ملتمه... طايح وسط محرابه

الدنيه الدارت بحيدر عليي هم
تدير وتحرك اعليه المخيم
احير ابين غربه وولية اجناب
وصدر حسين كدامي ايتهشم

واليسر دربه صعب.. والناس كلها غرب
ياخلك جرح الگلب.. ماله طبيب ايداوي


محمد هادي العقابي

قصيدة | ماظل صبر
الرادود | مرتضى الخفاجي
الشاعر | محمد هادي العقابي


https://youtu.be/9KNNnnRaboo?si=068uJLhKqiQfoNdX

اكتبهه بدمع عيني.. رساله وبلگلب جمره
بحزني وشوكي والامي.. اواسي فاطمه الزهره
فلا تخلص مآسيهه
بقيع الغربه ياذيهه
.....................

ليش المصايب والهضم يم الزجيه التمن
مخفي كبرهه وبالكبر مامستراحه امن الون

شعدهه الدنيه ويه الزهره كل يوم ايمر تلجم بيهه
ماخلتهه تشوف الراحه تهضمهه وحيل تبجيهه

ماخلت ولّد عدهه وگلبهه اعليهم اتفطر
بس المهدي بالغربه.. ويصب الدمع احمر
تحب الي يواسيهه
بقيع الغربه ياذيهه
.......................

فتشة عيون أمه الحسن ماخلص هدموا كبره
اليشتاكله جان النبي ويبوسه إله بثغره

تتعناله وتنحب أمه ترش كبره بدمع الحنيه
ماطابت كسرتهه الهسه توصل يمه بس محنيه

مكسورت ضلع يصعب... عليهه الهوه التشتمه
من تشهك نفس بالاه... ضلعهه تسنده وتلزمه
المصايب صبت اعليهه
بقيع الغربه ياذيهه
.......................

يم علي السجاد بدمع توكف تصد الناضر
تدريه ملوع بالحزن من ذاك يوم العاشر

جمره وتسعر لاماتطفه هذا ابن حسين ودفانه
فوك همومه وكَسرة گلبه هدموا فوكاه كل بنيانه

بهاي الحاله وتشاهد.. وتنعى بحسره وتنادي
ولدي ذوله ياهل ناس.. واني بضعة الهادي
منو اليسمع نواعيهه
بقيع الغربه ياذيهه
.......................

تخلي اديهه اعله الكبر للباقر تضل تنحب
حاضر هناك بكربله وبعيونه شايف زينب

تدري جروحه لاميطيبن من شاهد زينب يسبوهه
بسوك الكوفه أبين الوادم اخت العباس ايمشوهه

لاهوه البرد حزنه... ولاهيه الكطع ونهه
وسهام الزمن كل يوم... بگلب الزهره لاحنهه
الحزن مالحضه ناسيهه
بقيع الغربه ياذيهه
..................

تشعل شمع يم الكبر للصادق ومحتاره
وتشوف ركضت عيلته ساعت الحركوا داره

ايطفي ويبجي ويذكر عمته من حركوا فوكاهه الخيمه
وعلوياته ابيته ايركضن وزينب تركض وسط الهيمه

مايبجي عله عياله ضل يبجي البواجيهم
زينب واليتامه هناك جوه الجمر رجليهم
تجر النفس مابيهه
بقيع الغربه ياذيهه
.....................

بعكازه تتوجه وتجي لم البنين الحره
ودكلهه عباسج وفه وقدم عيونه ونحره

هذا الغالي ونور عيوني بالمحشر ارفع جفينه
الشالن جوده ودافع بيهن عن خيامه وعن حسينه

تجيهه بدمعة الفاكد... مشتاگه ويه مشتاگه
وبارض البقيع ايصير... نوح ودمعه الملاگه
مهضومه وتحاجيهه
بقيع الغربه ياذيهه


محمد هادي العقابي

سبحان رب الخلاك ساكن احساسي وبالي
...................

حبيتك وربي اعله حبك شاهد
وسط الگلب ماعندي غيرك واحد
وي حزنك اني امن الزغر متعاهد

ياعلي السجاد وياك عهد الحزن يحلالي
...................

زاير اجيك وگلبي يعرف دربه
واتمنه عيني تشوف فوكك گبه
يوكف ابابك گلبي يعلن حبه

ومن إيدك الايدك هاي انته التغير احوالي
...................

سبحان رب العرش رب التكوين
سواك من نور القدس مو من طين
من الراكعين الحامدين الطيبين

استحمد الله المعبود حبك سكن دلالي
..................

يالماكو غير الله اليدير التدبير
وانطاك بالطف سيدي دور اجبير
بعد الحسين بجفك الدنيا اتصير

ربك ترك امر الشام بيدك وصرت العالي
....................

ماريده عمري ينگضي بلا ذكرك
عبدك انه وخدامك وتحت امرك
هنيالي لو شمن اترابت كبرك

وانحب واصيحن ويلاه ودمعتي بعيني اتلالي
...................

زين العباد واسمك انخط باللوح
مالك مناره بعين الاحباب تلوح
مكتوب بيها هذا شبل المذبوح

واتمنه عندك شباج تنشد عليه آمالي


محمد هادي العقابي

بس انته الامل.. وگلبك منفجع من النوايب
بعيونك دمع.. وبروحك حزن جرحك يغايب

...................

الليل هاي الوادم تخلصه بنفاهه
ونته حته النوم لعيونك جفاهه
روحك ايضل التعب يركض وراهه
اجروحك انته ولابشر يعرف دواهه

كل ليل اليمر.. كبالك تنعرض كل المصايب
بعيونك دمع.. وبروحك حزن جرحك يغايب
......................

بالبقيع اكبور الك طاحت گببها
والحزن مرسوم يالمهدي بتربها
ننتضر يابن علي بسيفك تطبها
الدنيا وياكم فلا يخلص حربها

من ذاك الزمن.. عينك عالجره لهلك تراقب
بعيونك دمع.. وبروحك حزن جرحك يغايب
.......................

الدنيه مافرحت گلبك مره وحده
للفرح باب وتجي بوجهك تسده
انت ذاكه البلمصايب ذاب جبده
والدمع احمر اثر ضل اعله خده

اه بكل وكت.. يلجم بالگلب فگد الحبايب
بعيونك دمع.. وبروحك حزن جرحك يغايب
.......................

بگلبك ادري من تصير المغربيه
بصدرك ايموت النفس من الاذيه
محني ضهرك تگصد الباب الرزيه
وتوكف تنوح الكسر ضلع الزجيه

من كد الهضم.. دلالك صبح يالمهدي ذايب
بعيونك دمع.. وبروحك حزن جرحك يغايب
....................

منين ابدي وياك ياناعي المصيبه
حسين بالطف جثته ضلت سليبه
يجري دمه امن النحر لا والعجيبه
تاخذه الخيل بحوافرهه وتجيبه

وبحر الشمس.. ضل بلا دفن فوك الترايب
بعيونك دمع.. وبروحك حزن جرحك يغايب
.....................

نار باب الزهره كبرت نايباته
واعله زينب حركوا الخيمه الشماته
ووصلت الصادق يمهدي والبناته
داره حركوهه ويطفيهه بعباته

ويذكر عمّته ..من ضلت وحيده بلا كرايب
بعيونك دمع.. وبروحك حزن جرحك يغايب
.....................

بكل زمن عترة محمد حاربوهه
وانته شاهد يابو صالح مارعوهه
الغرقد گبور اهلك هناك اعتنوهه
مابقت گبه ومناره هدموهه

يايوم الوعد.. وترف رايتك يبن الاطايب
بعيونك دمع.. وبروحك حزن جرحك يغايب

محمد هادي العقابي