بس انته الامل.. وگلبك منفجع من النوايب
بعيونك دمع.. وبروحك حزن جرحك يغايب

...................

الليل هاي الوادم تخلصه بنفاهه
ونته حته النوم لعيونك جفاهه
روحك ايضل التعب يركض وراهه
اجروحك انته ولابشر يعرف دواهه

كل ليل اليمر.. كبالك تنعرض كل المصايب
بعيونك دمع.. وبروحك حزن جرحك يغايب
......................

بالبقيع اكبور الك طاحت گببها
والحزن مرسوم يالمهدي بتربها
ننتضر يابن علي بسيفك تطبها
الدنيا وياكم فلا يخلص حربها

من ذاك الزمن.. عينك عالجره لهلك تراقب
بعيونك دمع.. وبروحك حزن جرحك يغايب
.......................

الدنيه مافرحت گلبك مره وحده
للفرح باب وتجي بوجهك تسده
انت ذاكه البلمصايب ذاب جبده
والدمع احمر اثر ضل اعله خده

اه بكل وكت.. يلجم بالگلب فگد الحبايب
بعيونك دمع.. وبروحك حزن جرحك يغايب
.......................

بگلبك ادري من تصير المغربيه
بصدرك ايموت النفس من الاذيه
محني ضهرك تگصد الباب الرزيه
وتوكف تنوح الكسر ضلع الزجيه

من كد الهضم.. دلالك صبح يالمهدي ذايب
بعيونك دمع.. وبروحك حزن جرحك يغايب
....................

منين ابدي وياك ياناعي المصيبه
حسين بالطف جثته ضلت سليبه
يجري دمه امن النحر لا والعجيبه
تاخذه الخيل بحوافرهه وتجيبه

وبحر الشمس.. ضل بلا دفن فوك الترايب
بعيونك دمع.. وبروحك حزن جرحك يغايب
.....................

نار باب الزهره كبرت نايباته
واعله زينب حركوا الخيمه الشماته
ووصلت الصادق يمهدي والبناته
داره حركوهه ويطفيهه بعباته

ويذكر عمّته ..من ضلت وحيده بلا كرايب
بعيونك دمع.. وبروحك حزن جرحك يغايب
.....................

بكل زمن عترة محمد حاربوهه
وانته شاهد يابو صالح مارعوهه
الغرقد گبور اهلك هناك اعتنوهه
مابقت گبه ومناره هدموهه

يايوم الوعد.. وترف رايتك يبن الاطايب
بعيونك دمع.. وبروحك حزن جرحك يغايب

محمد هادي العقابي

زاير بشوك وهيام.. اعتني الأرض البقيع
بسجل سادات الوجود.. الخطوه والله ماتضيع
لغله الاحباب.. والاطياب.. اروح زياره
گلبي مشتاك.. والفراك.. حركني بناره
......................

انه الگلبه تجوه
بحزن بيت النبوه
ويضل صوتي.. لحد موتي
الحياتي همه سلوه

عشت عمري بذكرهم
ولا اعصي أمرهم
ولانادم.. انه الخادم
دمعتي وخيري منهم

من اروح زياره يمهم يختلف حته الهوه
من عطرهم انه اشمن والله تربة نينوى

هذا الاحساس العجيب.. بروحي عايش من زمان
اكبر ويكبر معاي..وياهم أشعر بالأمان
هذا الاحساس.. يهل ناس.. اسمعوا اخباره
گلبي مشتاك.. والفراك.. حركني بناره
.......................

رسمت أبالي صوه
ضريح الهم وازوه
اطوفنه.. واشوفنه
يشع بالدنيه نوره

احبهم والله احبهم
ولازل عن دربهم
انه جروحي.. وكثر نوحي
الفكدهم والغربهم

الدمعه اجريهه عليهم من قريب ومن بعيد
دين عدهم هذا دمعي بغربتي باجر يفيد

ما اضل غادي وحيد.. اني متأكد اكول
بالگبر عيني تشوف.. تحضر الزهره البتول
وروحي هيهات.. بل آهات.. تضل محتاره
گلبي مشتاك.. والفراك.. حركني بناره
.........................

انه شما احجي بيهم
يرف گلبي عليهم
عشت عمري.. بفخر ودري
حياتي أبين اديهم

اجي بنية زياره
حلم عمري الغياره
كحل عيني.. ومُنه سنيني
اشوفلهم مناره

وبالصحن اوكف واسلم.. والدمع مني يصب
وادخل الحضره بلهفتي وشوكي ذاك البلگلب

واندب بصوتي واصيح.. شكراً الرب السماء
وعيني تنضر علجمال.. في ضريح الأولياء
حزني للدوم.. والهموم.. عليي مطاره
گلبي مشتاك.. والفراك.. حركني بناره
......................

حزن خيم عليه
بقيع وغاضريه
اصب دمعي.. واضل انعي
عله اولاد الزجيه

مصايبهم جبيره
ولد شيخ العشيره
نحر دامي.. وجبد ضامي
وحرم الهم اسيره

والحسن ماانسه يومه ونعشه بسهام انرمه
وفوك هذا الصار كله وهسه گبته مهدمه

لجمه واهات وجروح.. وكلهن بوسط الدليل
واكبر اجروح ومصاب.. زينب ونوك الهزيل
شنهو الأسباب.. وابو ترب.. غريبه دياره
گلبي مشتاك.. والفراك.. حركني بناره
.......................

علي السجاد اشوفه
وتصد عيني الطفوفه
شكثر ينحب.. على زينب
والحبال بجفوفه

وعله الباقر رزايه
مشه بدرب السبايه
انجرح گلبه.. بدرب غربه
عذابه امن البدايه

وصادق العتره الشريفه بالمحن كضه العمر
وبيته مثل اخيام زينب هم لهب نار وجمر

شافوا انوع العذاب.. وياجرح منهم يطيب
صبوا ادموع العيون.. للبقه بالطف سليب
المهدي موجود.. تره يعود.. يجيب بشاره
گلبي مشتاك.. والفراك.. حركني بناره


محمد هادي العقابي

شهادة الحمزه بن عبد المطلب
عم الرسول صلى الله عليه وآله وسلم




تاريخ الحروب اعليك شاهد
سيفك عالركب مايخطي واحد
اسد الله ونبيه
يالمخوف المنيه
يسيد الشهداء
........................

ياعم النبي يمخوف الخوف.. بالميدان الأوحد
منو اليكرب الحدك لمن تصول.. اثر خليت عالخد
السيف بيمنتك ينزل عله الروس.. بدر كل حين تشهد
تحارب عله دينك ناس ضلام.. ويدعيلك محمد

يحزام النبي بكل شده حاضر
حربك جانت تصحي الضماير
تزلزلهه الوطيه
يالمخوف المنيه
يسيد الشهداء
.........................

الزلم مرعوبه منك ماتلاكيك.. تفر اكبال سيفك
من يبدي القتال بروس الاكبار.. تصطاد اعله كيفك
يالمرجف الرجال بحلم لو جيت.. ويمر بيهه طيفك
يتزاحم الخوف اباب الگلوب.. ومنهم خذت حيفك

يرجف جيشهم لو جابو اسمك
وشيال الرمح ماوصل يمك
يعم حامي الحميه
يالمخوف المنيه
يسيد الشهداء
.....................

بكل نكلت جدم تتراجف الكاع.. الموت أعلن حداده
تكتل لو نضرت بطارف العين.. شارتكم يساده
يالگلبك حزين وبس بالحروب.. يشعر بالسعاده
حجر سجيل جفك بالميادين.. ينزل عله القاده

منهو البيك مر وما تدمه
بس ذاك الصدك تدعيله امه
يفر من الاذيه
يالمخوف المنيه
يسيد الشهداء
.....................

لمعت سيفك امن ايشوفهه الجيش.. كلهه تصير سكته
راجل تمشي انته تصول وتجول.. اليشرد مالحكته
اليفر منك فرح وبوجهه تنشاف.. سوه ادموعه وضحكته
والخيال يتلبد وره الخيل.. من تكصدله انته

حته بخيلهم خليت خوفه
تشمره الصاعد اعليهه وتعوفه
يروح اليا نويه
يالمخوف المنيه
يسيد الشهداء
....................

غبار المعركه ينزل عله العين.. من ضربت يمينك
وتتلاطم أمواج ارماح وسهام.. من المعتنينك
الوصل يمك بحيله اكبالك يموت.. من تنضرله عينك
غيره ومرجله ونخوه وكرامات.. تنضح من جبينك

اسمك عالصدر يتعلك اوسام
ومصابك مانسينه بكل الايام
ينور ويشع ضيه
يالمخوف المنيه
يسيد الشهداء


محمد هادي العقابي

غمضت عيني وجرحي ماطاب
واثار دمعي فوك الثياب
يوميه گلبي بسهم ينصاب
.......................

انه الصادق انه المسلوبه عافيته
انه الفاكد بساعه كل اهل بيته
عشت بس عيشت الراحوا هله ياناس
يحس مخنوكه روحه ولاهوه بريته

هذا آنه حالي معذب هواي
وينخبط دمعي بشربة الماي
ماينحمل يفراك الاحباب
.....................

انه اليبدي نهاري بدمعة عيوني
ويمرني الليل محد يعرف شلوني
حنين البيه تسمع ونته امن بعيد
وضيم الدنيا غيّر خاطري ولوني

مشلوع گلبي هواي مشلوع
وماعندي غير الحزن موضوع
كل الاحبهم عني غياب
...................

مو بيتي احترك كدامي جن خيمه
وسرح بالي اعله عمتي الركضت بهيمه
وصارت كربله اكبالي واشوف النار
وگلب زينب امفرفح من كثر ضيمه

وزينب گلبهه هوايه حساس
وصعبه عليهه ابلايه عباس
ياوسفه عمتي بوليت اجناب
.....................

جمعت اطفالي بس مخنوك بالعبره
الابو طبعه بناته يأمنن بكتره
وذكرت سكينه ساعة حرگة الخيمات
تبجي وعينهه العباس تنتظره

وتنشد عليهم وين ماوين
ولاخبر من عباس وحسين
وضل الدمع عالاهل سجاب
......................

تتلذذ الدنيه بهمي وجروحي
انه الملجوم گلبي وتسمع بنوحي
شفت من عدهه ضيم الأبد ماينشاف
جبيره جروحهه وعاشن وسط روحي

من كربله الحد حركة الدار
بكل لحضه گلبي يلتهب نار
بدار ال هاشم عاش المصاب
.....................

اوصيكم يخدامي اوصيكم
على حسين ابجو والآخر نفس بيكم
مضلوم وغريب ومنذبح عطشان
وتحضر امه بالمجلس تعزيكم

تعتني الزهره بگلب موجوع
ومخليه اديهه فوك الضلوع
توكف تنوح بعتبة الباب


محمد هادي العقابي

يالمهدي گلبك كله حرگه
ويه الفرح ما عنده ملگه
يومك حزين اعله الاهل صار
.....................

شايل ياحزن.. گلبك يالام
وبروحك جمر.. من نار الخيم
شاب وشيبت.. والحيل انهدم
ضهرك منحني.. جن قوس السهم

زادت اجروحك يمهدي بهل مسيه
هم الك دار احترك يبن الزجيه
الصادق ابيته اللهب ويصيح يحسين
منو الطفه بكربله خيمة رقيه

طفيت نيراني بعباتي
وامن الجوي سلمن بناتي
وعيالك بهيمه وبالخطار
....................

يوميه جرح.. وتشوف العجب
غصنك هل ذبل.. من كد التعب
حسينك منذبح.. والثوب انسلب
وزينب حايره.. بخيمتهه اللهب

وين گلبك ياخذك يم يامصيبه
شي اكيد تروح للجثته سليبه
يوم عاشر ينعرض وتشوف الخيول
بالحوافر تاخذ حسين وتجيبه

ومعصبه الخيل التسحگه
وبصدره ماتت تره الشهگه
والي يلمه بجسمه يحتار
.....................

ليلك بالسهر.. يخلص بالدمع
وبروحك ضعن.. حاير منفجع
بهيمه الوحده.. ذايب جن شمع
وونات الحرم.. اذنك تستمع

ضعن زينب يمشي لديار البعيده
والشمر يفتر عليهم سوطه بيده
وزينب تلم باليتامه خاف تنداس
الخيل كثره وخيلهم كلش عنيده

درب السبي خله اليتامه
فرفحت جن ذبحة حمامه
مجويه كل اجدام الازغار
........................

يشفه كل جرح.. بس جرح الگلب
مايشفه ابد.. يالمهدي صعب
وجروحك ضعن.. ودموعك تصب
بديوان الزلم.. زينبكم تطب

هاي لجمه وفاجعه كلش جبيره
بالحبل تنكاد يالمهدي الاميره
طبت الديوان وتصد ليهه العيون
وفرحت الشمات من شافوهه اسيره

ام الخدر والخجل كله
بالغربه والمدمع تهله
گلبك عليهه مشتعل نار
.......................

ما ترتاح ابد.. من جور الزمن
غايب والحزن.. صايرلك وطن
يالدمعك دمه.. عايش بالمحن
يوميه عزه.. ومحروم الوسن

عله الصادق نوحك ودمعك تسيله
للبقيع بحزن گلبك تعتنيله
رحل عن هل دنيه بس بجبد مسموم
تروحله ويم كبره تنعه اعله العقيله

ملجومه روحك يابو صالح
لحبابك بكل ديره رايح
بالغربه عايش ما الك دار


محمد هادي العقابي

الليله الگلب ينزاحن همومه
بميلاد اخت الرضا معصومه
فاطمه.. فاطمه.. فاطمه
.................

للرضا نبعث تهاني دايمه
انبارك بميلاد اخته فاطمه
الليله وجه الكون والدنيا ابتشر
وفرحت ويانه الأرض وهل السمه

بعيون اخوهه الفرحه مرسومه
بميلاد اخت الرضا معصومه
فاطمه.. فاطمه.. فاطمه

......................

باب للحاجه انفتح طول العمر
واليمد جفينه الها يبتشر
بنت الاجواد العفيفه ام الكرم
منهه اطلب حاجتك ماتعتذر

حاجاته تكضي الروحه ملجومه
بميلاد اخت الرضا معصومه
فاطمه.. فاطمه.. فاطمه

....................

الليله كون القم يسافر خاطرك
وبجمال الحضره كحل ناظرك
وهيه تعلم بالصدك نيته يزور
اتشوف گلبك ماتصد المضهرك

والخير كله الشاعت اعلومه
بميلاد اخت الرضا معصومه
فاطمه.. فاطمه.. فاطمه

......................

الليله عطر الفرحه بالمحفل يهب
ونورها مضوي الزمن ماينحجب
وبكريمة ال هاشم نفتخر
كون وبكل بيت اسمها ينكتب

گلب المحب افراحه من يومه
بميلاد اخت الرضا معصومه
فاطمه.. فاطمه.. فاطمه

.....................

موسى ابن جعفر فرح بيها فرح
عنده صارت فاطمه وصدره انشرح
مو بشر چنهه ملاك من السمه
وصوت حبه البنته بالرحمه صدح

وگلبه بمسرات وفرح دومه
بميلاد اخت الرضا معصومه
فاطمه.. فاطمه.. فاطمه



محمد هادي العقابي

واليتك.. يالرضا
حبيتك.. يالرضا
اتمنى اكون بحسن ظنك
رايد ضمان الخدمه منك
......................

يالرضا حبك وطن.. شوكي اوصل للصحن
للزياره گلبي حن .. ياعلي ياعلي
كحل عيني بشوفتك.. طالب انه مروتك
رايد اشتم عتبتك.. ياعلي ياعلي

مبروك بميلادك يااول عشك
يالضامن حبيتك ياحبي الصدك
گلبي بهاي الفرحه ضل بسمك يدك

يالغالي.. يالرضا
يالوالي.. يالرضا
فرحان گلبي شيحجي عنك
رايد ضمان الخدمه منك

......................

بالولاده استبشرت.. الك من گلبي صحت
شهدي يادنيا افرحت.. بالرضا بالرضا
اي وحك خير العمل.. هذا حبي امن الازل
خادم وكلي امل.. بالرضا بالرضا

بكل نسمه ايهب عطرك واشتمك هوه
نورك شع بالدنيا ولعيوني ضوه
بماي الحب من جودك دلالي ارتوه

بحساسي.. يالرضا
بنفاسي.. يالرضا
رحمة الباري انته لئنك
رايد ضمان الخدمه منك
......................

شهل جمال الهاشمي.. افتخر ليك انتمي
ياامامي وملهمي.. سيدي سيدي
صوتي دوه بالفضا.. آنه مجنون الرضا
ابن اميري المرتضى.. سيدي سيدي

فرحان ويتغنه الكون ابجيتك
شكراً لله ولطفه انطاني محبتك
هيئلي بمعروفك رزق ازيارتك

بعيوني.. يالرضا
بضنوني.. يالرضا
متفضل انته وهذا مَنك
رايد ضمان الخدمه منك
.........................

الموسى ابن جعفر ولد.. سطع نوره امن المهد
طالبي اباً وجد.. هاشمي هاشمي
ابن اسياد الأرض.. حبهم امن الله فرض
بجفه خيعونه اليكض.. هاشمي هاشمي

بيك احجي واتفاخر ياشمس الشموس
ادري بصحنك جنه وترتاح النفوس
اتباهه بذكر اسمك تاج اعله الرؤوس

ياهيبه.. يالرضا
والطيبه.. يالرضا
خل گلبي طير بقفص صحنك
رايد ضمان الخدمه منك


محمد هادي العقابي

السلام عليكم خدام الحسين ع

قناة خادم الحسين ع الشاعر حسين الساعي اشتركوا جزاكم الله خير 👇👇

https://www.tg-me.com/hossinalsaeii

ماكو ليله   تمر عليه
بلايه دمعه   ولااذيه

فاطمه  فاطمه آنه الزجيه
...............

اجروح گلبي هواي مايحصل مثلهه
الياوكت دمعاتي فوك الخد اهلهه
وعالجواد الليله ذابت روحي كلهه
ليش ولدي اتحلل الوادم چتلهه

شنهو ذنبي    لو ذنبهم
كلبي ذايب    آنه امهم

فاطمه    فاطمه    آنه الزجيه
.............. 

بدو بيه وضل اثر جف اعله خدي
والله ضلموني واحير منين ابدي
الحاربوني ووكفو اعله الباب ضدي
ضلعي ماكفه ويّردون اعله  ولدي 

سمموهم      ذبحوهم
ياحسرتي     مارعوهم

فاطمه     فاطمه      آنه الزجيه
..............

للجواد أتعنه بحزاني وأكصده
بهل فجيعه ابني لا مايضل وحده
ارد اشوفه شلون بالسم ذاب جبده
وعلى صطح الدار ضل ايواسي جده

صوته اسمعه     الريح جابه
ينادي يالطف      ومصابه

فاطمه     فاطمه        آنه الزجيه
...............

آخذ آلآمي وكسرتي بهل مسيه
وبهضم وبنوح انصبله العزيه 
محني ضهري وعالضلع خليت اديه
الزهره اني الليله برض الكاضميه

من وصلته    ماعرفته
وجهه ذابل    ابني شفته

فاطمه     فاطمه      آنه الزجيه 
................

كل نفس اتنفسه يلجمني صدري
ماتهنيت بحياتي وضاع عمري
الدنيه ماترحم ولا انصفني دهري
يمته من هاي المصايب يبره كسري

ياهضيمه    عالغوالي
وبفكدهم     هذا حالي

فاطمه      فاطمه       آنه الزجيه
................

ابد مامرتاحه روحي وناري تسعر
وللمجالس بالدمع والونه احضر
واليواسيني بدمعته گلبي ينسر
وافكد الخادم اذا عني تاخر


اني انضر      للخدمنه
واسمه يمي   وارضه عنه

فاطمه      فاطمه        آنه الزجيه




محمد هادي العقابي

يادمعه اتكفي.. اعليك ابجيها
اتمنه بموتك.. عيني اعميها 
ماتجازه بدمع العين
ياوراث عاشور حسين
ماتجازه
................... ........

سيد الحُب.. ومنك اطلب.. شويه خلي بگلبي من حبك للحسين
ارزقني همه.. وضهري حزمه.. براية العباس ذاكه المنطي جفين

ابابك جفوفي تدك.. رايد الخدمه الصدك
خلي روحي تحترك.. ابنار خيمه
يالجواد اتوسلك.. وانته باب امراد الك
تنطي للي يسألك.. لوكال ضيمه

ضيمي وحسراتي.. وكسر الخاطر
وعيونك كلها.. اليوم العاشر
وفقني اصبح خادم زين
ياوراث عاشور حسين
ماتجازه
............................

دمعي يجري.. وانه ادري.. مااسد فضلك لون اعميها عيني
بروحي جمره.. بگلبي كسره .. امصيبتك عاشور ثاني من تجيني

البس اثياب السواد.. واصرخ بصوت الحداد
مات ياناس الجواد.. وگلبه ضامي
فوك سطح ادياره نام.. والشمس مثل السهام
حاره وتجوي الإمام.. وجبده دامي

مايخلَص حزني.. ونار الامي
كاسرني مصابك.. كل ايامي
وعالراس الطم بالجفين
ياوراث عاشور حسين
ماتجازه
..............................

بيمن ابدي.. وجرحي يحدي.. يومك ايوديني لحسين وطفوفه
واكعد انحب.. آ يزينب.. كبالها حسين انذبح وخته تشوفه

والشمر من اعتنا.. جايب السيف واجا
نحره حزه من كفا.. وشال راسه
تفاخر بفعله ويصيح.. طايح الماضن يطيح
هذا بين ايدي ذبيح.. تشوفه ناسه

مايبرد جرحك.. الله يعينك
بدموعك تروي.. گلب حسينك
ضامي وگلبه انطر نصين
ياوراث عاشور حسين
ماتجازه
......................

بعز شبابك.. والمصابك.. تمشي وبگلبك يضل صوت الحزن اه
السم منيه.. كله اذيه.. وانته تتألم تنادي واحسيناه

شايف انواع العذاب.. وراسك اعله حسين شاب
اوساده سويت التراب.. بغربه وحدك
نعشك اتشيع اكيد.. حسين ضل بالطف وحيد
الخيل واثقال الحديد.. بصدر جدك

سديت اعيونك.. وبهم تنحب
اه اعله مصابج.. زينب زينب
ماتت مو مره ومرتين
ياوراث عاشور حسين
ماتجازه
.........................

للماتم.. جيت نادم.. وبذنوبي بمجلسك ابدي اعترافي
بيك احضه.. وعني ترضه.. اطلع وبعيوني دمعي وگلبي صافي

ما اردن للذنوب.. هذا ابد موخوش ثوب
قررت لازم اتوب.. امن المعاصي
واكف ابابك دخيل.. ماكو عندك مستحيل
خايف اجدامي تميل.. رايد خلاصي

خجلان اهوايه.. كبار اذنوبي
ومتفائل يمك.. يا محبوبي
صار اعليه هواي الدين
ياوراث عاشور حسين
ماتجازه


محمد هادي العقابي

طف كربله بروحك جرح
تواسي الحسين المنذبح
جوه الشمس والجثه مرميه
مثل الغريب الضل بله اميه
واجوادا
.................

بدنيه غربه ... يالجواد وانته رحمه
والله صعبه ... گلبك الوادم تلجمه

بدمعت العين تبجي لحسين
وقارنت يومه بمصابك
انته عطشان وهوه عطشان
وماسلب واحد ثيابك

مسموم وبجبدك الم
وگلبك ينوح اعله الخيم
هدمت حيلك بيهه علويه
مثل الغريب الضل بله اميه
واجوادا
.................

بدارك انته... من لفت ليك المنيه
وبحسرته ... گلبك اعله الغاضريه

بدمعه وباه واجواداه
فزعت الدفنك الديره
ومن وره الخيل اه ياويل
حسين لمو بالحصيره

دفانه روحه امرمره
يبجي ويدور خنصره
من يوم عاشر روحه مجويه
مثل الغريب الضل بله اميه
واجواداه
...................

ماكو راحه... بالحزن عمرك كضيته
بالنياحه.... عله حسين وأهل بيته

لو شفت ماي تصيح مولاي
جدي عطشان وتخضب
وتذكر أيتام بطبت الشام
ووجنتك بالدمعه تشرب

ليلك يمر مابي هوه
مخنوك جن بنينوه
همك وحزنك عله المسبيه
مثل الغريب الضل بله اميه
واجواداه
......................

ياهضيمه... گلبك شيحمل مصابه
والعضيمه... زينب تنام بخرابه

بوليت الناس ماكو عباس
والشمر ضل ايتبسم
جاب الحبال ماكو كفال
والسبي زينب تحزم

الخلاهه بعيونه نضر
هشمو راسه اعله النهر
وعيونه لخته ضلت اربيه
مثل الغريب الضل بله اميه
واجواداه
.................

ياامامي.... حرورت السم خذت لونك
وانته ضامي.... والألم ذبل عيونك

بعز شبابك والمصابك
رايح ومابيك رجعه
وعلي الهادي ضل ينادي
بويه گلبي لاتفجعه

غمضت عينك ياامل
ودعت هل دنيا بعجل
كلبك رحيم وكله حنيه
مثل الغريب الضل بله اميه
واجوادا


محمد هادي العقابي

بسم الله الرحمن الرحيم
توكلت على الله ومحمد وال محمد ص

الهلال.

من شفت هلال مصابك هلن دمعات العين
................

هلال مصابك عيني تشوفه.. يحسين بروحي الملهوفه... اتذكر من جنت اوياك
نكعد خويه بوسط الخيمه.. وگلبك يمي يسولف ضيمه.. ومهيوبه بجالك وحماك

خلتني الدنيه بغربه من بعدك خويه حسين
من شفت هلال مصابك هلن دمعات العين

..................

ماخذ من عيني شجم سلوه .. هذا هلال فراك الخوه.. جاي وجايب حزنه ويا
جانت لمتنه شمحلاها.. بعد الخوه وين الگاها
ووجهك وين يصح ملگا

يبن امي زينب اني المنك حارمني البين
من شفت هلال مصابك هلن دمعات العين

..................

مايتوصف والله الشفته.. ياخويه وجسمك معرفته...من دورت بذاك الليل
تعبني فراكك مااكدر.. بين الموته امشي واتعثر
وشفتك متهشم بالخيل

فوك الغبره موذرينك جن يطلبونك دين
من شفت هلال مصابك هلن دمعات العين

.....................

شهر أحزانك غير لوني.. كبال الشامت تجري عيوني ...مسبيه وبجفوفي احبال
بعدك ماضلت كل خيمه.. من هيمه يودوني الهيمه.. ويحضر اتمنه الكفال

وعباسك مايسمعني طاح وطاحن جفين
من شفت هلال مصابك هلن دمعات العين

......................

يحسين وداعتكم صعبه.. زينب انه امشي اويه الغربه.. وكلمن سوطه بجفه ايلوح
ضعنك مكسور وضل وحده.. ياهو ايحاميله بهل شده.. گلبي امن العاشر مجروح

گلبك ملجوم اعليه انه اعرف گلبك زين
من شفت هلال مصابك هلن دمعات العين

.....................

ما تبرد ناري وماتطفه.. ياخويه وماانسه الوگفه
علتل وتصد ليه الناس
بذيج الضهريه ومحتاره.. والطف اتحير اخباره.. وضليت اني بلا عباس

صحت بصوتي وماتسمع امشي اخلافك لاوين
من شفت هلال مصابك هلن دمعات العين



محمد هادي العقابي

الليله الأولى الهلال.


دمع عيني... على زينب
على زينب... دمع عيني
...............

حزن روحي وكسر گلبي.. عله المكسور خاطرهه
انه المهدي واصدلهه.. غريبه ادير ناضرهه

اجه شهر المصيبه وبين اهلاله
الخله ادموع زينب عمتي هماله
متعوبه وگلبهه شصاير بحاله

يضل گلبي ... جمر يلهب
على زينب... دمع عيني
......................

انه العايش ألم وحدي.. ويوميه انلجم لجمه
وكل منضر يمر بيه.. بعيني ينطبع رسمه

يناس الله اكبر من سمع بيهه
كبل بت علي ياعلويه سابيهه
بشهر عاشور صارت كل بواجيهه

اصدلهه ... بگلب ينحب
على زينب... دمع عيني
....................

محرم هل وانه العبره.. تخنك صدري من ايهل
تجي الزهره بقميص حسين ومن السحك متهزل

ملطخ بالدمه وبنصه اكو حفره
اثر ذيج الخوافر نايم بصدره
تنشره بالسمه ام العزه الزهره

فكد اهلي.. عليي يصعب
على زينب.. دمع عيني
......................

يضل جرحي ودمع عيني.. بكل ليله التمر بيه
ولايبرد حزن گلبي.. اني العمته مسبيه

اميره وهاشميه بحبل جروهه
ومحملهه انسلب والخيمه حركوهه
شماته بلا اخو بالغربه خلوهه

انه الراسي.. بهضم شيب
على زينب.. دمع عيني
.......................

نحل حيلي وذبل غصني.. واعيش بدنيتي مكابر
اجه العاشر كرب ليه.. شيحمل شوغت العاشر

عذابي وهظم روحي وكل ألم بيه
من الطف انوح وابجي ليليه
الحزن ياناس والله خيم اعليه

انه بكل يوم.. يمر اتعب
على زينب.. دمع عيني


محمد هادي العقابي

للخدمه.


يالتريد بدنياك عز وكرامه
ماتفيدك والله غير الخدامه
الك افضل هويه
خدمة ابن الزجيه
.............

ايمامك المهدي أنه اسمع كلامي الينكال
لورايد اتعيش ابفخر وبخير وتغير الحال
مهيوب عمرك ينكضي وذكرك يضل للاجيال
غير الحسين بدنيتك لاتحط ثاني اعله البال

يعله شانك وتصير عندك هويه
لازم اتعيش هناك بالغاضريه

عدنه اكبر قضيه
خدمة ابن الزجيه
.................

نكران ذاتك كل وكت خليهه مابين الناس
ياشيعي وذكر هالفعل باجمل اجر من ينقاس
هلخدمة هاي بكل زمن تاج وتضل فوك الراس
بالخدمه جبريل ابتده وسلمهه بيد العباس

صارت بجف عباس هلخدمه رايه
وتنعكد بالصعبات الحل القضايه
بيهه غيره وحميه
خدمة ابن الزجيه
.................

يالتخدم بدرب العشك منك عطر خدمه ايفوح
لا تنسه روحك بالحجي الخدمه تريد المملوح
اصل الدرب هذا عدل وغير العدل مامسموح
بيد الحسين الخاتمه ومن يرفضك وين تروح

صفي نيتك وتعيش سيد زمانك
وكلبك ابيض خليه وينبض حنانك

ماتحب الاذيه
خدمة ابن الزجيه
................

للمذهب امراية وفه صير وردت منك عون
اعكس الصوره الواضحه والحجو خل ايبطلون
اعداء عدنه بكل وكت يالجعفري ويشوفون
تاج المذاهب مذهبك موسهله بيه ايطعنون

آنه اريد الخدام اتباهه بيهم
ما اسامح من راد يحجي عليهم

والعمل بين اديه
خدمة ابن الزجيه
.................

الخدمه تره كول وفعل والخادم بوجهه النور
وبيتي صبح هوه العزه وبالعزه ماريد اقصور
تسرون گلبي من اجي والمجلس الكا معمور
جم خادم بخادم شفت لحسين عمره ومنذور

بالفعل ياخدام رايد عهدكم
ايد وحده وارتاح لو شاهدتكم

احضر بكل عزيه
خدمة ابن الزجيه
................

بالخدمه ثبتلك جدم بالك تره بيوم اتميل
تتندم وتالي الندم بس الدمع يبقه ايسيل
حب وتسامح كل وكت گلبك بحنيته يشيل
لكل الخدم هذا الحجي ودعو الضهوري بتعجيل

ثاري عايش وياي وبگلبي جمره
وانتضر ذاك اليوم والسيف اشهره

واملي كل الوطيه
خدمة ابن الزجيه


محمد هادي العقابي

للخدمه




خدمتك نوماسي.. بيهه رافع راسي
......................

خدمتك هاي يمولاي امانه بركبتي
طول الايام والأعوام يرزقي ودمعتي
بدمعت العين يالحسين اعيش مصيبتي
بالعزائات والاهات اطلع حركتي

عطرت انفاسي.. بيهه رافع راسي
......................

الكل بدايات نهايات وانه بفي نعمتك
ورايد بهاي يوفاي النهايه بخدمتك
الساني كل يوم يمضلوم يسولف قصتك
شكد تمنيت عليي ريت تصدلي بنضرتك

تسوه اهلي وناسي.. بيهه رافع راسي
.......................

عايش اوياك بلياك فلا يسوه العمر
بصدري عنوان يعطشان لطمتي اعله الصدر
عاشك النوح والجروح وانه بهاي افتخر
ترخص الروح يمذبوح الك فدوه ونذر

خدمتك بحساسي.. بيهه رافع راسي
.......................

ما الي راي يبو الراي مطيع المنبرك
ياضوه العين والسنين دمعتي المنحرك
اسهر الليل يبو الحيل وانوح الخنصرك
بهاي الهموم اضل دوم لجمتي العاشرك

والعزم عباسي.. بيهه رافع راسي
.........................

امعطش الماي يالهواي ولاتعطش ابد
انته عنوان يسلطان ردت منك مدد
واني وياك يمحلاك اضل اعله العهد
بكبري ياريت تمنيت تجي بوكت الشدد

فضلك ولا ناسي.. بيهه رافع راسي

محمد هادي العقابي

ليلة العليله.

لاتخلوني وياكم اخذوني
يجرح عيوني سفركم يجرح عيوني
..............

لاتخلوني اضل بهذا حالي
لون رحتو تخيم اعليه الليالي
ويضل وسط العين بس دمعي يلالي
فاطمه انه العليله يالغوالي

امشي وياكم صعبه انساكم
بويه فركاكم اذيه يجرح عيوني
...............

اني بعيوني شفت بويه خواتي
للسفر يتحضرن واني امنياتي
وياكم امشي بغيركم شلي بحياتي
وهم مثلهن حضرت روحي وعباتي

اني متحضره وخبر منتضره
ابقه منكسره وهجركم يجرح عيوني
.................

وين اروحن من بعدكم يالحبايب
گلبي مايتحمل افراك ومصايب
يعني اذا ما امشي اضلن للنوايب
من بعدكم بويه نور البيت غايب

منهو يسمعني لوكثر وني
لاتحيرني و وداعك يجرح عيوني
...............

من يمرني الليل ما اكدر انامه
گلبي خايف ماتردون بسلامه
راح احوم بغيبتك مثل الحمامه
وهل زمن يابويه ماترحم سّهامه

يعني اضل وحدي ودمعتي بخدي
بالهضم ابدي وحزنكم يجرح عيوني
................

من بعدكم بويه مااحمل غربتي
خايفه ايطول السفر وبقه بحسرتي
روحو بويه وراح اضل اني بهضمتي
وانتضر جفك يجي اينشف دمعتي

عايشه ايامي ونته كدامي
ماتت احلامي ورحيلك يجرح عيوني
.................

كلشي ماضل عندي بالدنيه امن اهلنه
بويه تمشي وتاخذ وياك المحنه
گلبي بغيابك فلا واحد يئمنه
بعد هيهات الوكت يجمع شملنه

من تجي اخبارك انجوي بنارك
ماترد دارك وذكرك يجرح عيوني

محمد هادي العقابي