الليله الگلب ينزاحن همومه
بميلاد اخت الرضا معصومه
فاطمه.. فاطمه.. فاطمه
.................

للرضا نبعث تهاني دايمه
انبارك بميلاد اخته فاطمه
الليله وجه الكون والدنيا ابتشر
وفرحت ويانه الأرض وهل السمه

بعيون اخوهه الفرحه مرسومه
بميلاد اخت الرضا معصومه
فاطمه.. فاطمه.. فاطمه

......................

باب للحاجه انفتح طول العمر
واليمد جفينه الها يبتشر
بنت الاجواد العفيفه ام الكرم
منهه اطلب حاجتك ماتعتذر

حاجاته تكضي الروحه ملجومه
بميلاد اخت الرضا معصومه
فاطمه.. فاطمه.. فاطمه

....................

الليله كون القم يسافر خاطرك
وبجمال الحضره كحل ناظرك
وهيه تعلم بالصدك نيته يزور
اتشوف گلبك ماتصد المضهرك

والخير كله الشاعت اعلومه
بميلاد اخت الرضا معصومه
فاطمه.. فاطمه.. فاطمه

......................

الليله عطر الفرحه بالمحفل يهب
ونورها مضوي الزمن ماينحجب
وبكريمة ال هاشم نفتخر
كون وبكل بيت اسمها ينكتب

گلب المحب افراحه من يومه
بميلاد اخت الرضا معصومه
فاطمه.. فاطمه.. فاطمه

.....................

موسى ابن جعفر فرح بيها فرح
عنده صارت فاطمه وصدره انشرح
مو بشر چنهه ملاك من السمه
وصوت حبه البنته بالرحمه صدح

وگلبه بمسرات وفرح دومه
بميلاد اخت الرضا معصومه
فاطمه.. فاطمه.. فاطمه



محمد هادي العقابي

واليتك.. يالرضا
حبيتك.. يالرضا
اتمنى اكون بحسن ظنك
رايد ضمان الخدمه منك
......................

يالرضا حبك وطن.. شوكي اوصل للصحن
للزياره گلبي حن .. ياعلي ياعلي
كحل عيني بشوفتك.. طالب انه مروتك
رايد اشتم عتبتك.. ياعلي ياعلي

مبروك بميلادك يااول عشك
يالضامن حبيتك ياحبي الصدك
گلبي بهاي الفرحه ضل بسمك يدك

يالغالي.. يالرضا
يالوالي.. يالرضا
فرحان گلبي شيحجي عنك
رايد ضمان الخدمه منك

......................

بالولاده استبشرت.. الك من گلبي صحت
شهدي يادنيا افرحت.. بالرضا بالرضا
اي وحك خير العمل.. هذا حبي امن الازل
خادم وكلي امل.. بالرضا بالرضا

بكل نسمه ايهب عطرك واشتمك هوه
نورك شع بالدنيا ولعيوني ضوه
بماي الحب من جودك دلالي ارتوه

بحساسي.. يالرضا
بنفاسي.. يالرضا
رحمة الباري انته لئنك
رايد ضمان الخدمه منك
......................

شهل جمال الهاشمي.. افتخر ليك انتمي
ياامامي وملهمي.. سيدي سيدي
صوتي دوه بالفضا.. آنه مجنون الرضا
ابن اميري المرتضى.. سيدي سيدي

فرحان ويتغنه الكون ابجيتك
شكراً لله ولطفه انطاني محبتك
هيئلي بمعروفك رزق ازيارتك

بعيوني.. يالرضا
بضنوني.. يالرضا
متفضل انته وهذا مَنك
رايد ضمان الخدمه منك
.........................

الموسى ابن جعفر ولد.. سطع نوره امن المهد
طالبي اباً وجد.. هاشمي هاشمي
ابن اسياد الأرض.. حبهم امن الله فرض
بجفه خيعونه اليكض.. هاشمي هاشمي

بيك احجي واتفاخر ياشمس الشموس
ادري بصحنك جنه وترتاح النفوس
اتباهه بذكر اسمك تاج اعله الرؤوس

ياهيبه.. يالرضا
والطيبه.. يالرضا
خل گلبي طير بقفص صحنك
رايد ضمان الخدمه منك


محمد هادي العقابي

السلام عليكم خدام الحسين ع

قناة خادم الحسين ع الشاعر حسين الساعي اشتركوا جزاكم الله خير 👇👇

https://www.tg-me.com/hossinalsaeii

ماكو ليله   تمر عليه
بلايه دمعه   ولااذيه

فاطمه  فاطمه آنه الزجيه
...............

اجروح گلبي هواي مايحصل مثلهه
الياوكت دمعاتي فوك الخد اهلهه
وعالجواد الليله ذابت روحي كلهه
ليش ولدي اتحلل الوادم چتلهه

شنهو ذنبي    لو ذنبهم
كلبي ذايب    آنه امهم

فاطمه    فاطمه    آنه الزجيه
.............. 

بدو بيه وضل اثر جف اعله خدي
والله ضلموني واحير منين ابدي
الحاربوني ووكفو اعله الباب ضدي
ضلعي ماكفه ويّردون اعله  ولدي 

سمموهم      ذبحوهم
ياحسرتي     مارعوهم

فاطمه     فاطمه      آنه الزجيه
..............

للجواد أتعنه بحزاني وأكصده
بهل فجيعه ابني لا مايضل وحده
ارد اشوفه شلون بالسم ذاب جبده
وعلى صطح الدار ضل ايواسي جده

صوته اسمعه     الريح جابه
ينادي يالطف      ومصابه

فاطمه     فاطمه        آنه الزجيه
...............

آخذ آلآمي وكسرتي بهل مسيه
وبهضم وبنوح انصبله العزيه 
محني ضهري وعالضلع خليت اديه
الزهره اني الليله برض الكاضميه

من وصلته    ماعرفته
وجهه ذابل    ابني شفته

فاطمه     فاطمه      آنه الزجيه 
................

كل نفس اتنفسه يلجمني صدري
ماتهنيت بحياتي وضاع عمري
الدنيه ماترحم ولا انصفني دهري
يمته من هاي المصايب يبره كسري

ياهضيمه    عالغوالي
وبفكدهم     هذا حالي

فاطمه      فاطمه       آنه الزجيه
................

ابد مامرتاحه روحي وناري تسعر
وللمجالس بالدمع والونه احضر
واليواسيني بدمعته گلبي ينسر
وافكد الخادم اذا عني تاخر


اني انضر      للخدمنه
واسمه يمي   وارضه عنه

فاطمه      فاطمه        آنه الزجيه




محمد هادي العقابي

يادمعه اتكفي.. اعليك ابجيها
اتمنه بموتك.. عيني اعميها 
ماتجازه بدمع العين
ياوراث عاشور حسين
ماتجازه
................... ........

سيد الحُب.. ومنك اطلب.. شويه خلي بگلبي من حبك للحسين
ارزقني همه.. وضهري حزمه.. براية العباس ذاكه المنطي جفين

ابابك جفوفي تدك.. رايد الخدمه الصدك
خلي روحي تحترك.. ابنار خيمه
يالجواد اتوسلك.. وانته باب امراد الك
تنطي للي يسألك.. لوكال ضيمه

ضيمي وحسراتي.. وكسر الخاطر
وعيونك كلها.. اليوم العاشر
وفقني اصبح خادم زين
ياوراث عاشور حسين
ماتجازه
............................

دمعي يجري.. وانه ادري.. مااسد فضلك لون اعميها عيني
بروحي جمره.. بگلبي كسره .. امصيبتك عاشور ثاني من تجيني

البس اثياب السواد.. واصرخ بصوت الحداد
مات ياناس الجواد.. وگلبه ضامي
فوك سطح ادياره نام.. والشمس مثل السهام
حاره وتجوي الإمام.. وجبده دامي

مايخلَص حزني.. ونار الامي
كاسرني مصابك.. كل ايامي
وعالراس الطم بالجفين
ياوراث عاشور حسين
ماتجازه
..............................

بيمن ابدي.. وجرحي يحدي.. يومك ايوديني لحسين وطفوفه
واكعد انحب.. آ يزينب.. كبالها حسين انذبح وخته تشوفه

والشمر من اعتنا.. جايب السيف واجا
نحره حزه من كفا.. وشال راسه
تفاخر بفعله ويصيح.. طايح الماضن يطيح
هذا بين ايدي ذبيح.. تشوفه ناسه

مايبرد جرحك.. الله يعينك
بدموعك تروي.. گلب حسينك
ضامي وگلبه انطر نصين
ياوراث عاشور حسين
ماتجازه
......................

بعز شبابك.. والمصابك.. تمشي وبگلبك يضل صوت الحزن اه
السم منيه.. كله اذيه.. وانته تتألم تنادي واحسيناه

شايف انواع العذاب.. وراسك اعله حسين شاب
اوساده سويت التراب.. بغربه وحدك
نعشك اتشيع اكيد.. حسين ضل بالطف وحيد
الخيل واثقال الحديد.. بصدر جدك

سديت اعيونك.. وبهم تنحب
اه اعله مصابج.. زينب زينب
ماتت مو مره ومرتين
ياوراث عاشور حسين
ماتجازه
.........................

للماتم.. جيت نادم.. وبذنوبي بمجلسك ابدي اعترافي
بيك احضه.. وعني ترضه.. اطلع وبعيوني دمعي وگلبي صافي

ما اردن للذنوب.. هذا ابد موخوش ثوب
قررت لازم اتوب.. امن المعاصي
واكف ابابك دخيل.. ماكو عندك مستحيل
خايف اجدامي تميل.. رايد خلاصي

خجلان اهوايه.. كبار اذنوبي
ومتفائل يمك.. يا محبوبي
صار اعليه هواي الدين
ياوراث عاشور حسين
ماتجازه


محمد هادي العقابي

طف كربله بروحك جرح
تواسي الحسين المنذبح
جوه الشمس والجثه مرميه
مثل الغريب الضل بله اميه
واجوادا
.................

بدنيه غربه ... يالجواد وانته رحمه
والله صعبه ... گلبك الوادم تلجمه

بدمعت العين تبجي لحسين
وقارنت يومه بمصابك
انته عطشان وهوه عطشان
وماسلب واحد ثيابك

مسموم وبجبدك الم
وگلبك ينوح اعله الخيم
هدمت حيلك بيهه علويه
مثل الغريب الضل بله اميه
واجوادا
.................

بدارك انته... من لفت ليك المنيه
وبحسرته ... گلبك اعله الغاضريه

بدمعه وباه واجواداه
فزعت الدفنك الديره
ومن وره الخيل اه ياويل
حسين لمو بالحصيره

دفانه روحه امرمره
يبجي ويدور خنصره
من يوم عاشر روحه مجويه
مثل الغريب الضل بله اميه
واجواداه
...................

ماكو راحه... بالحزن عمرك كضيته
بالنياحه.... عله حسين وأهل بيته

لو شفت ماي تصيح مولاي
جدي عطشان وتخضب
وتذكر أيتام بطبت الشام
ووجنتك بالدمعه تشرب

ليلك يمر مابي هوه
مخنوك جن بنينوه
همك وحزنك عله المسبيه
مثل الغريب الضل بله اميه
واجواداه
......................

ياهضيمه... گلبك شيحمل مصابه
والعضيمه... زينب تنام بخرابه

بوليت الناس ماكو عباس
والشمر ضل ايتبسم
جاب الحبال ماكو كفال
والسبي زينب تحزم

الخلاهه بعيونه نضر
هشمو راسه اعله النهر
وعيونه لخته ضلت اربيه
مثل الغريب الضل بله اميه
واجواداه
.................

ياامامي.... حرورت السم خذت لونك
وانته ضامي.... والألم ذبل عيونك

بعز شبابك والمصابك
رايح ومابيك رجعه
وعلي الهادي ضل ينادي
بويه گلبي لاتفجعه

غمضت عينك ياامل
ودعت هل دنيا بعجل
كلبك رحيم وكله حنيه
مثل الغريب الضل بله اميه
واجوادا


محمد هادي العقابي

بسم الله الرحمن الرحيم
توكلت على الله ومحمد وال محمد ص

الهلال.

من شفت هلال مصابك هلن دمعات العين
................

هلال مصابك عيني تشوفه.. يحسين بروحي الملهوفه... اتذكر من جنت اوياك
نكعد خويه بوسط الخيمه.. وگلبك يمي يسولف ضيمه.. ومهيوبه بجالك وحماك

خلتني الدنيه بغربه من بعدك خويه حسين
من شفت هلال مصابك هلن دمعات العين

..................

ماخذ من عيني شجم سلوه .. هذا هلال فراك الخوه.. جاي وجايب حزنه ويا
جانت لمتنه شمحلاها.. بعد الخوه وين الگاها
ووجهك وين يصح ملگا

يبن امي زينب اني المنك حارمني البين
من شفت هلال مصابك هلن دمعات العين

..................

مايتوصف والله الشفته.. ياخويه وجسمك معرفته...من دورت بذاك الليل
تعبني فراكك مااكدر.. بين الموته امشي واتعثر
وشفتك متهشم بالخيل

فوك الغبره موذرينك جن يطلبونك دين
من شفت هلال مصابك هلن دمعات العين

.....................

شهر أحزانك غير لوني.. كبال الشامت تجري عيوني ...مسبيه وبجفوفي احبال
بعدك ماضلت كل خيمه.. من هيمه يودوني الهيمه.. ويحضر اتمنه الكفال

وعباسك مايسمعني طاح وطاحن جفين
من شفت هلال مصابك هلن دمعات العين

......................

يحسين وداعتكم صعبه.. زينب انه امشي اويه الغربه.. وكلمن سوطه بجفه ايلوح
ضعنك مكسور وضل وحده.. ياهو ايحاميله بهل شده.. گلبي امن العاشر مجروح

گلبك ملجوم اعليه انه اعرف گلبك زين
من شفت هلال مصابك هلن دمعات العين

.....................

ما تبرد ناري وماتطفه.. ياخويه وماانسه الوگفه
علتل وتصد ليه الناس
بذيج الضهريه ومحتاره.. والطف اتحير اخباره.. وضليت اني بلا عباس

صحت بصوتي وماتسمع امشي اخلافك لاوين
من شفت هلال مصابك هلن دمعات العين



محمد هادي العقابي

الليله الأولى الهلال.


دمع عيني... على زينب
على زينب... دمع عيني
...............

حزن روحي وكسر گلبي.. عله المكسور خاطرهه
انه المهدي واصدلهه.. غريبه ادير ناضرهه

اجه شهر المصيبه وبين اهلاله
الخله ادموع زينب عمتي هماله
متعوبه وگلبهه شصاير بحاله

يضل گلبي ... جمر يلهب
على زينب... دمع عيني
......................

انه العايش ألم وحدي.. ويوميه انلجم لجمه
وكل منضر يمر بيه.. بعيني ينطبع رسمه

يناس الله اكبر من سمع بيهه
كبل بت علي ياعلويه سابيهه
بشهر عاشور صارت كل بواجيهه

اصدلهه ... بگلب ينحب
على زينب... دمع عيني
....................

محرم هل وانه العبره.. تخنك صدري من ايهل
تجي الزهره بقميص حسين ومن السحك متهزل

ملطخ بالدمه وبنصه اكو حفره
اثر ذيج الخوافر نايم بصدره
تنشره بالسمه ام العزه الزهره

فكد اهلي.. عليي يصعب
على زينب.. دمع عيني
......................

يضل جرحي ودمع عيني.. بكل ليله التمر بيه
ولايبرد حزن گلبي.. اني العمته مسبيه

اميره وهاشميه بحبل جروهه
ومحملهه انسلب والخيمه حركوهه
شماته بلا اخو بالغربه خلوهه

انه الراسي.. بهضم شيب
على زينب.. دمع عيني
.......................

نحل حيلي وذبل غصني.. واعيش بدنيتي مكابر
اجه العاشر كرب ليه.. شيحمل شوغت العاشر

عذابي وهظم روحي وكل ألم بيه
من الطف انوح وابجي ليليه
الحزن ياناس والله خيم اعليه

انه بكل يوم.. يمر اتعب
على زينب.. دمع عيني


محمد هادي العقابي

للخدمه.


يالتريد بدنياك عز وكرامه
ماتفيدك والله غير الخدامه
الك افضل هويه
خدمة ابن الزجيه
.............

ايمامك المهدي أنه اسمع كلامي الينكال
لورايد اتعيش ابفخر وبخير وتغير الحال
مهيوب عمرك ينكضي وذكرك يضل للاجيال
غير الحسين بدنيتك لاتحط ثاني اعله البال

يعله شانك وتصير عندك هويه
لازم اتعيش هناك بالغاضريه

عدنه اكبر قضيه
خدمة ابن الزجيه
.................

نكران ذاتك كل وكت خليهه مابين الناس
ياشيعي وذكر هالفعل باجمل اجر من ينقاس
هلخدمة هاي بكل زمن تاج وتضل فوك الراس
بالخدمه جبريل ابتده وسلمهه بيد العباس

صارت بجف عباس هلخدمه رايه
وتنعكد بالصعبات الحل القضايه
بيهه غيره وحميه
خدمة ابن الزجيه
.................

يالتخدم بدرب العشك منك عطر خدمه ايفوح
لا تنسه روحك بالحجي الخدمه تريد المملوح
اصل الدرب هذا عدل وغير العدل مامسموح
بيد الحسين الخاتمه ومن يرفضك وين تروح

صفي نيتك وتعيش سيد زمانك
وكلبك ابيض خليه وينبض حنانك

ماتحب الاذيه
خدمة ابن الزجيه
................

للمذهب امراية وفه صير وردت منك عون
اعكس الصوره الواضحه والحجو خل ايبطلون
اعداء عدنه بكل وكت يالجعفري ويشوفون
تاج المذاهب مذهبك موسهله بيه ايطعنون

آنه اريد الخدام اتباهه بيهم
ما اسامح من راد يحجي عليهم

والعمل بين اديه
خدمة ابن الزجيه
.................

الخدمه تره كول وفعل والخادم بوجهه النور
وبيتي صبح هوه العزه وبالعزه ماريد اقصور
تسرون گلبي من اجي والمجلس الكا معمور
جم خادم بخادم شفت لحسين عمره ومنذور

بالفعل ياخدام رايد عهدكم
ايد وحده وارتاح لو شاهدتكم

احضر بكل عزيه
خدمة ابن الزجيه
................

بالخدمه ثبتلك جدم بالك تره بيوم اتميل
تتندم وتالي الندم بس الدمع يبقه ايسيل
حب وتسامح كل وكت گلبك بحنيته يشيل
لكل الخدم هذا الحجي ودعو الضهوري بتعجيل

ثاري عايش وياي وبگلبي جمره
وانتضر ذاك اليوم والسيف اشهره

واملي كل الوطيه
خدمة ابن الزجيه


محمد هادي العقابي

للخدمه




خدمتك نوماسي.. بيهه رافع راسي
......................

خدمتك هاي يمولاي امانه بركبتي
طول الايام والأعوام يرزقي ودمعتي
بدمعت العين يالحسين اعيش مصيبتي
بالعزائات والاهات اطلع حركتي

عطرت انفاسي.. بيهه رافع راسي
......................

الكل بدايات نهايات وانه بفي نعمتك
ورايد بهاي يوفاي النهايه بخدمتك
الساني كل يوم يمضلوم يسولف قصتك
شكد تمنيت عليي ريت تصدلي بنضرتك

تسوه اهلي وناسي.. بيهه رافع راسي
.......................

عايش اوياك بلياك فلا يسوه العمر
بصدري عنوان يعطشان لطمتي اعله الصدر
عاشك النوح والجروح وانه بهاي افتخر
ترخص الروح يمذبوح الك فدوه ونذر

خدمتك بحساسي.. بيهه رافع راسي
.......................

ما الي راي يبو الراي مطيع المنبرك
ياضوه العين والسنين دمعتي المنحرك
اسهر الليل يبو الحيل وانوح الخنصرك
بهاي الهموم اضل دوم لجمتي العاشرك

والعزم عباسي.. بيهه رافع راسي
.........................

امعطش الماي يالهواي ولاتعطش ابد
انته عنوان يسلطان ردت منك مدد
واني وياك يمحلاك اضل اعله العهد
بكبري ياريت تمنيت تجي بوكت الشدد

فضلك ولا ناسي.. بيهه رافع راسي

محمد هادي العقابي

ليلة العليله.

لاتخلوني وياكم اخذوني
يجرح عيوني سفركم يجرح عيوني
..............

لاتخلوني اضل بهذا حالي
لون رحتو تخيم اعليه الليالي
ويضل وسط العين بس دمعي يلالي
فاطمه انه العليله يالغوالي

امشي وياكم صعبه انساكم
بويه فركاكم اذيه يجرح عيوني
...............

اني بعيوني شفت بويه خواتي
للسفر يتحضرن واني امنياتي
وياكم امشي بغيركم شلي بحياتي
وهم مثلهن حضرت روحي وعباتي

اني متحضره وخبر منتضره
ابقه منكسره وهجركم يجرح عيوني
.................

وين اروحن من بعدكم يالحبايب
گلبي مايتحمل افراك ومصايب
يعني اذا ما امشي اضلن للنوايب
من بعدكم بويه نور البيت غايب

منهو يسمعني لوكثر وني
لاتحيرني و وداعك يجرح عيوني
...............

من يمرني الليل ما اكدر انامه
گلبي خايف ماتردون بسلامه
راح احوم بغيبتك مثل الحمامه
وهل زمن يابويه ماترحم سّهامه

يعني اضل وحدي ودمعتي بخدي
بالهضم ابدي وحزنكم يجرح عيوني
................

من بعدكم بويه مااحمل غربتي
خايفه ايطول السفر وبقه بحسرتي
روحو بويه وراح اضل اني بهضمتي
وانتضر جفك يجي اينشف دمعتي

عايشه ايامي ونته كدامي
ماتت احلامي ورحيلك يجرح عيوني
.................

كلشي ماضل عندي بالدنيه امن اهلنه
بويه تمشي وتاخذ وياك المحنه
گلبي بغيابك فلا واحد يئمنه
بعد هيهات الوكت يجمع شملنه

من تجي اخبارك انجوي بنارك
ماترد دارك وذكرك يجرح عيوني

محمد هادي العقابي

ليلة العليله ع.


سافر ضعنهم.. ياروحي احبابج.. وشيحمل امصابج.. سافر ضعنهم
طول هجرهم.. ماادري عنهم.. راح انتضرهم
...........................

بدمعت عيوني.. ابجي لهلي وناسي.. وتختنك انفاسي.. يا كسرتي
راحوا الجانو..للگلب نبضاته.. وللوجه ضحكاته
ياغربتي
دارهم خاللي.. بالهضم جواني.. وصار بيت احزني
ياحسرتي
فاطمه اني.. انخطف وجهي ولوني.. من يگلي شلوني
ياهضمتي

مجروحه اني.. وجروحي تاذيني.. ياهو اليداويني.. مجروحه اني
عيني الصورهم.. ماادري عنهم.. راح انتضرهم
...................

وين ابو الغير.. كلبي هسه ايريده.. ايخلي ايدي بئيده.. مايجيني
الكمر عمي.. كون اشوف اعيونه.. أسأل اني شلونه .. من حنيني
يمي شيجيبه.. الشوك ياكل بيه.. وين ابو الحنيه.. يعتنيني
برايته الخضره.. ايضمني بين احضانه.. الشوفته لهفانه.. والله عيني

عباس اعرفه.. دمه وسره بدمي.. وبروحه شال اسمي.. عباس اعرفه
شيرد كمرهم.. ماادري عنهم.. راح انتضرهم
.......................

خذو عبد الله.. ومشت كل ضحكاته.. وراحت امناغاته.. من اديه
مهده كدامي.. بدمعي لوهزيته.. خالي من جوريته.. هاي اذيه
صورته بعيني.. ياحلات عيونه.. مدلل ايسمونه.. الهاشميه
طير من جنه.. امن النده هواي اترف.. عبد مايتوصف.. بالبريه

مشتاكه اشوفه.. وبحضني انومنه.. ليش انحرم منه.. مشتاكه اشوفه
اني بذكرهم.. ماادري عنهم.. راح انتضرهم
.................

شصاير بحالي.. من بعد خواني.. هل زمن اذاني.. من خذاهم
عمري ضيعته..ماكو شمعه بداري.. ضلمه ليلي نهاري.. من جفاهم
كل امل عندي.. مات وسط عيوني.. وگلبي من عافوني.. مانساهم
ياصبر ينفع.. وهمه جانوا صبري.. وهل زمن ماادري.. حارباهم

بعدوا عليه.. ومكسوره بجفاهم.. شيرده ملگاهم.. بعدوا عليه
عيني الدربهم .. ماادري عنهم.. راح انتضرهم
..........................

اسهر بحزني.. وبهضم اتذكر.. هنا اخوي الاكبر.. يمي كاعد
وتنزل دموعي.. يمي جانو كلهم.. وهسه ماضل منهم.. حته واحد
احله ايامي.. من اطب اعليهم.. علحنان البيهم.. گلبي شاهد
بالبشر ماكو.. مثل گلبي وضيمه.. راحوا أهل الشيمه.. كلبي فاكد

شيرد شملهم.. احجي بدمع عيني.. جانو ضوه سنيني.. شيرد شملهم
حزني الغربهم .. ماادري عنهم.. راح انتضرهم
........................

حايره اسئلمن.. عن ابوي أسبابه .. ليش طال غيابه.. ومااجاني
بلهفه ياروحي.. ردت ويا امشي.. ويبس دمعي برمشي.. وماخذاني
ضلي ملجومه.. الدنيه غربه بدونه.. كون اشوف عيونه.. المانساني
هذا مرسالي.. وي نسيم العالي.. ايخبر ابو الغالي.. ابقه اتاني

لآخر حياتي.. حسين الشغل بالي.. اتنطر الغالي.. لآخر حياتي
هاي انه بتهم .. ماادري عنهم.. راح انتضرهم


محمد هادي العقابي

ليلة العليله ع



سفرة عمري انتظر.. لكن ماسافرت
وهل دمع العين
واركضت اعله الضعن.. ومن كل گلبي صحت
ماشين الوين
يتعب حالي
وماضل غالي
........................

كلمن كبل ليله ايكول.. اداريج اني بعيوني
وتالي بدمعتي ضليت.. وكلهم اهلي عافوني

بدموعي وكسرت گلبي
اعثر من امشي بدربي
وادعي دخيلك ياربي
يجون
وحشه الدنيا بلياهم
وگلبي مفارك عيناهم
مشتاكه اتلاكه وياهم
يجون

حيلي إنشد للتعب.. من عافوني اخوتي
عذبني الليل
إبدل العله السفر.. صارت بي بلوتي
فركاهم ويل
تحير بالي
وماضل غالي
...................

شلون ابلا عيون حسين.. هاي الدنيه اكضيها
من ضعنه طلع لليوم.. سكته وهيمه احس بيها

متعلمه انضر لعيونه
وما اعرف هسه شلونه
شصار بگلبه وبضعونه
ابوي
ابنيته وجنت اغفه بحضنه
وعطر اثيابه ولا منه
أشعر بحضانه الجنه
ابوي

ذبّل غصني الهجر.. افراكه ولاينحمل
اصبر جم دوب
اغياب الوالد صعب.. مر ويكتل كتل
ويذوب اگلوب
مايحلالي
وما ضل غالي
......................

گلب عندي اعله كد عمري.. زغير وصعبه يتحمل
واحس امن النبض كل يوم.. عليهم گلبي ضل يذبل

تعبانه ويهضم حالي
والشاغل فكري وبالي
خوفي اعله حسين الغلي
يموت
شيوصل ليه اخباره
والگلبي يخمد ناره
الخوفي ولاترهم جاره
يموت

كلشي اكبالي انرسم.. سيف ورمح وسهم
وحافر للخيل
وگلبي ايكول الضعن.. بلاماي ولاخيم
وماضل بي حيل
انطر دلالي
وما ضل غالي
.......................

كل ماعيني شافت ماي.. ابوي ايصير كدامي
بثوابه اشرب ودمعي ايطيح.. واحس بي منذبح ضامي

ابيتي وهب ريح غيابه
واشتم بي عطر مصابه
يمكن مسلوبه ثيابه
حسين
بليل احلم ماطر فجره
وشفت انه اخيول العشره
كلهن داسن عله صدره
حسين

من دم تبجي السمه.. يمكن راسه برمح
وجسمه اعله الكاع
وثكلت ايدي وكلت.. وبيا ايد الجرح
وخنصر جف ضاع
يتراوالي
وما ضل غالي
......................

عشت بضنوني واحلامي.. وما فاركني دمع العين
واجه من كربله المرسال.. يفاطم مات ابوج حسين

واركض رحت اعله الحجره
بمصلاته اشتم عطره
عايفلي بس هل ذكره
ويروح
الدنيا اخلافه ولاتسوه
راحت أيامه الحلوه
خلاني اغيابه اتلوه
ويروح

آنه الحيلي انهدم.. وشيب راسي الخبر
مذبوح حسين
ومو بس ضهري انحنه.. گلبي هواي انكسر
وتبجيله العين
فكد الوالي
وما ضل غالي


محمد هادي العقابي

ليلة ام البنين


ياساكن روحي.. يانزف جروحي
فدوه لعينك انه او ولدي
.................

كلب الوالده يحسين. بي عاطفه وحنيه
غيابك من رحت لليوم. يبني مبين اعليه
دعاء السفر بالدمعات. اقرا إلك ليليه
يل بعدك انه تمنيت. يوكف كل نبض بيه

مخليني الوحدي.. ودموعي بخدي
فدوه لعينك انه او ولدي
...................

عالباب العمر خلصان. بدون ايامك الحلوه
بلا وجهك يبعد امك. عيوني يبني ماتسوه
يحيلي وراح مني الحيل. بيمن بعدك اتگوه
اموتن من يجيني الليل. ومن الفركه اتلوه

ياراحة عمري. ياروحي وذخري
فدوه لعينك انه او ولدي
...................

تنشدني العليله اعليك. ما اعرف شحاجيهه
اكلهه ان شا الله يردون. وترد البواچيهه
وندعي ربي يحفظكم. من كربله وطاريهه
يالماخذ گلبهه وياك. بدمعتهه تخليهه

وحشتنه بدونك. وفراك عيونك
فدوه لعينك انه او ولدي
....................

عفتنه عيون سهرانات. من الدمعه ذبلانه
ولدارك نطب ونصيح. وين العاشو ويانه
اذكر من كلتلك وين. رايح ها يمولانه
تجاوب والدمع بالعين. يمه الدنيا خلصانه

بحسره تحاچيني. بنظره تبچيني
فدوه لعينك انه او ولدي
..................

انه الوصيت ولدي اعليك. كلمن يفزع بنحره
والينكطع نحره يصيح. فدوه لضنوة للزهره
انه ام البنين وكون. اجازي حسيني والعشره
يا ابا الفضل كون يصير. نحرك عالرمح كمره

يربع اولادي. كل احنه اننادي
فدوه لعينك انه او ولدي

محمد هادي العقابي

ليلة الانصار


منطينك احجايه
نكتب عله الرايه
وفايه يحسين
...................

يحسين منعوفك ابد. وداعت ايام العشره
وكربله تشهد عالزلم. كلمن يسولف نحره
نزرعلك ارض الطف وفه. ومن دمنه تصبح حمره
حراس نسهر للصبح. وتنام بنت الزهره

يبقه الخدر عالي
يرخصله كل غالي
هذا الوعد دين
وفايه يحسين
......................

من يوصل احدود الخيم. ويوصل اتراب اعتابك
انشمر عمايمنه بزعل. ونهوس احنه ابابك
يشهد علينه سيدي. وكت الصلا محرابك
وصدورنه الصارت درع. ياسهم مر وصابك

يحسين تدرينه
بس انته والينه
والصاحب الزين
وفايه يحسين
.......................

باجر يطر فجر الذبح.. وتشهد علينه الحومه
محلاهه موتتنه سوه.. لا موش كلمن يومه
الشافك ولو مره بعمر.. ينجن إلك من يومه
شحاجيت عابس بالخيم.. وبالعشك شك اهدومه

يانعمة النعمه
حبك يبو اليمه
ماعدنه رايين
وفايه يحسين
...........................

هاي المناحر فدوه الك. من دمنه خل تتحنه
ماردنه جنه ولااجر.. يحسين انته الجنه
بيومك وطفك نفتخر. يابو علي وآمنه
تنطي الخلود الخادمك. مولانه وبلا منه

انته التضل قائد
واعله الزلم شاهد
ياكرت العين
وفايه يحسين
......................

شدة الحيل اعله الحرب.. مثل اليشد احزامه واحدنه من يزعل الك.. ياهوه اليضل كدامه
سبعين الفهم بس عدد.. ومنزلين الهامه
راية ابو فاضل ترف.. وانصارك احنه ازلامه

تبقه انت حادينه
وعايش تضل بينه
بسوح الميادين
وفايه يحسين



محمد هادي العقابي

ليلة مسلم ع.


ماجاملت.. وتكاملت.. واضح يقينك
أعظم درس.. تنطني النفس.. عاشت يمينك
يمسلم طيحتك تسوه
لحسين العمر فدوه .... عاشت يمينك
.......................

يانبي الكوفه بزمانك والرساله بأيدك
عدل دربك جان واضح والخلك متريدك

صاحب حلم.. كلك علم.. بيك العزم..
يالهيبه
راعي الحمل.. لاماتمل.. جمع الشمل
والطيبه

وبكل دهر.. اسمك فخر.. راعي الامانه
انته العذب.. لاماتحب.. أهل الخيانه
أصيل وصاحب امروه
لحسين العمر فدوه... عاشت يمينك
.......................

بلغت والخير قصدك والأمل بعيونك
الكتبو وودو رسايل كلهم ايضدونك

منهم ردت.. وتاملت..بس ماشفت
انصارك
من بايعو.. وتخاذلو.. ماانصفو
افكارك

اسمك عله.. وبالمرجله.. هل دنيه تشهد
جفك مثل.. ابه الفضل.. سطراته عالخد
ابن عمه وكفو وتكوه
لحسين العمر فدوه... عاشت يمينك
.......................

كام سيفك هوه يحجي ماتتعب السانك
نزل فوك الركب غاضب وشتعل بركانك

مثل الولي.. عمك علي.. ماتنولي
بالحومه
مخوف الزلم.. والله ونعم.. اصلك شهم
بعلومه

جفك حمل.. سيف الزعل.. يابو الحميه
طيح زلم.. يابو زلم.. فوك الوطيه
زندك بيهم شسوه
لحسين العمر فدوه.... عاشت يمينك
........................

انته عنوان المراجل والكرامه افعالك
عله هذا الحب يمسلم من ألف هنيالك

نيتك ضوه.. وتشتم هوه.. من نينوه
امن الغالي
حسينك صدك.. بي محترك.. عشكك عشك
للتالي

بوكت الحرب.. صاح الكلب.. هذا انه ديني
تحمل الم.. من كل سهم.. طبعك حسيني
بالحب أصبحت قدوه
لحسين العمر فدوه... عاشت يمينك
.......................

الكوفه ضجت بالعساكر وانته تجدح عينك
ضربه وحده لليكصدك ما تثني ايمينك

خذت الارض.. طول بعرض.. سيفك فرض عالهامه
وتزلزلت.. متحملت.. جسمك وثكل اجدامه

سيفك صمد .. وكت الشدد.. يبن الهواشم
جيش ارتعب.. يرعد غظب.. بيدك الصارم
يطيح الكابله ويهوه
لحسين العمر فدوه... عاشت يمينك
.......................

عالقصر آخر محطه جانت بخطواتك
وباذان الزمن ضلت تنسمع كلماتك

كلشي شفت.. تعلم جنت.. من سلمت
لحسينك
هل مدمعه.. بهل فاجعه.. بروحه نعه
لسنينك

فوك القصر.. هيبه وذخر.. يابو حميده
هذا النصر.. طول العمر.. يهتف نشيده
گلبك رفض يتروه
لحسين العمر فدوه.... عاشت يمينك



محمد هادي العقابي

ليلة مسلم ع





صوره بنص عيني
مرسومه بيهه احله الايام
وينك يابويه
ضليت اشوفك بس بالاحلام
ليليه انكسر
موكافي امن الهجر
............................

بدمعتي.. ونحيبي.. اصد لدروبك ومهضومه اتاني
واكولن.. يحبني.. ابوي شعطله بس لانساني

وينك يبويه ابنيتك وشتاكيت
تلكاني جن خيط الشمع لورديت
حركتني نيران الهجر وتأذيت

عايفني ورايح
وماادري بيك شصار ماصار
شكد اسأل عنك
يابو حميده وماكو اخبار
بدموعي انتضر
موكافي امن الهجر
.............................

بغيابك.. شسولف.. يريتك لاتشوف الصار بيه
اموتن.. يمسلم.. يبويه من تصير المغربيه

اني واخوتي والحزن وسط الدار
كل لحضه لمجانك نحن ونندار
ازغار ولجن صفناتنه مال اكبار

بيتك بغيابك
صاير مناحه وصوت موجوع
نبجي بكل خطوه
بللنه كاعه بكثر الدموع
تلاثتنه ننعصر
موكافي امن الهجر
..........................

طلعنه.. ومشينه.. خذانه حسين عمي ويه الضعون
بمسيري.. اعاين.. كلمن عدهه ابو اويانه يمشون

الماعدهه ابو مكسوره تبقه بكل حين
اختل وره الناگه وأهل دمع العين
خاف ابجي خاف يشوفني عمي حسين

ماريده ايصدلي
ويشوف وجهي ذابل اهواي
ولو صاح اعليه
اتعنه وغسل وجهي بالماي
ونيراني تستعر
موكافي امن الهجر
..........................

شفتهم.. ينوحون.. واسمع بالضعن كلمت هضيمه
واجاني.. الحسين.. وعله راسي مسح مسحت يتيمه

بعيونه دمعه ومختنك صدره هواي
كلالي ياعمي مصيرج وياي
راح العله راسج كبل جان افياي

احجي ومااكدر
ميت لساني والگلب صاح
عينج متشوفه
راح الدلال اويه الابو راح
شلون اكضي هل عمر
موكافي امن الهجر
............................

غريبه.. اصيرن.. عكب عينك يبوي الدللتني
يوجهي .. تغير.. وماتعرفني لو هسه شفتني

كل الضعن واساني ويهل دمعات
ايعزوني وانه بگلبي شوغه ولجمات
الله اليصبرج والدج مسلم مات

كمت امشي واعثر
بويه برحيلك ميت الحيل
اوداعك اذاني
نجم الضهر شفته وشفت ويل
ماينفع كل صبر
موكافي امن الهجر
.........................

مصيبه.. وداعك.. بعد هيهات وياك الملاگه
يبويه.. ويروحي.. الابو يحني الضهر يكسر افراگه

الموت ماخله امل حته ارجاك
ايامي ذيح الحلوه راحت وياك
يابويه روحي انساهه بس ماانساك

يابو الحنيه
ودعتك الله وگلبي مجروح
هاي اخر كلمه
اتمنه بعدك تطلع الروح
واتوسد بالگبر
موكافي امن الهجر

محمد هادي العقابي

ليلة العباس


اويلاه يابه الفضل
اويلاه يابه الفضل
...............

زينب وحشم ياكمر اويلاه يابه الفضل
عايف اخيتك بالخطر اويلاه يابه الفضل
ومن العدو ماكو مفر اويلاه يابه الفضل
وسياطهم ماتنحمل اويلاه يابه الفضل

...............

بعيوني مايطلع صبح اويلاه يابه الفضل
ياخويه شبدي بيا جرح اويلاه يابه الفضل
راسك انضره اعله الرمح اويلاه يابه الفضل
ودموعي عالخوه تهل اويلاه يابه الفضل

...............

ياخويه ماضلت خيم اويلاه يابه الفضل
صارت جمر يجوي الجدم اويلاه يابه الفضل
الحك يشيال العلم اويلاه يابه الفضل
جابو إلي النوك الهزل اويلاه يابه الفضل

...............

ماترضه زينب تنضرب اويلاه يابه الفضل
لو تمشي لديار الغرب اويلاه يابه الفضل
ماينحمل هذا الدرب اويلاه يابه الفضل
ينضرب بي حته الطفل اويلاه يابه الفضل

................

زادت عليّ خويه المحن اويلاه يابه الفضل
كلهم شماته اويه الضعن اويلاه يابه الفضل
اكلوب الفواطم فرفحن اويلاه يابه الفضل
عنك احير امن انسئل اويلاه يابه الفضل

................

عفتك على الغبره ورحت اويلاه يابه الفضل
مشوني عالناگه وطحت اويلاه يابه الفضل
بسمك يخويه شكت صحت اويلاه يابه الفضل
من خوتك لا ما امل اويلاه يابه الفضل

.................

كلشي انتهه وراح العمر اويلاه يابه الفضل
وكليبي احسن بي جمر اويلاه يابه الفضل
اسمع كلام امن الشمر اويلاه يابه الفضل
يرميني بي مثل النبل اويلاه يابه الفضل


محمد هادي العقابي