استشهاد السيدة رقية ع


تعبانه هواي .. ومومال اركض بين الخيل
تعبانه هواي.. ويوم العاشر رايد حيل
ومن ذاك اليوم الهل يوم
گلب بنيتك ضل ملجوم
.....................

شلون اصبر.. والله صعبه.. افراكك بروحي شيحمله
وين رايح.. يالعفتني.. ابيين غربه وآنه طفله

بجاني يابويه الوكت. والناس تضرب بيه
يدرون بيه امدلله. وصاحوا عليي مسبيه
ومشوني بدروب الخطر. ورجلي بجمر مجويه

مجويه بنار .. وبروحي تشب نار اخيام
مجويه بنار.. بويه المجوي شلون اينام
وايأذيني حته النوم
گلب بنيتك ضل ملجوم
.........................

دمعي ينزل.. وبيك اسولف.. هسه ابوي ايرد عليه
ايحبني ادري.. واسمي عنده.. نبض گلبي يارقيه

شكد صحت بسمك بس ردت. بحضنك الدافي اتضمني
خلصني بويه امن الشمر. بالسوط ورم متني
باكو هديتك بويه الي. ويلا وجرحو اذني

والدم ايسيل.. اذن ونحر وجف مذبوح
والدم ايسيل.. من عيني وگلبي المجروح
انترست كاع الطف ادموم
گلب بنيتك ضل ملجوم
.......................

جابو النوك. ابلا هوادج. بيش الزم خاف اطيحن
بويه وينك. ماتجاوب. بسمك من الخوف اصيحن

شصار وكبل ليله چنت. يمك يبويه مأمنه
الوجوه مابيهه عرف. ياهو اليجي يخوفنه
الله يحرمه الاخرك. ومن شوفتك حارمنه

وجفوفي زغار.. من جابو يابويه حبال
وچفوفي زعار. والطف مايرحم اطفال
امر الله الصار ومقسوم
گلب بنيتك ضل ملجوم
........................

ضعن خايف. ناس غربه. يحدي من ديره اعله ديره
والشماته. اعلينه صاحو. هالضعن ماله عشيره

للكوفه طبينه بهظم. وبسوك طبوهه النوك
وأسال بزينب عمتي. فسريلي مفهوم السوك
كالتلي خوف ومستحه. وچف بحبلهم مخنوك

يابويه شلون.. يم زينب ملتمه الناس
يابويه شلون. الضيم الشفته يشيب الراس
محروم يلوذ بمحروم
گلب بنيتك ضل ملجوم
............................

العمر يكضي. هيج احسّن. وما خلص درب السبايا
من وصلنه. الشام كله. معيد بطيحة الرايه

نمت بخرابه من التعب. وكعدني عطر انفاسك
وراسك كبالي بالطشت. يتفايض بأحساسك
ولازم اموت بشبكتك. شمحلاهه شبگة راسك

اخر انفاس. تعبانه وخليني ارتاح
اخر انفاس. والصار بذمة الذباح
لا دنيا ولاضيم يدوم
گلب بنيتك ضل ملجوم


محمد هادي العقابي

‏مقطع صوتي من محمد هادي العقابي

استشهاد الامام الحسن المجتبى عليه السلام


يافكد الاخو مايرحم الحال
هذا اصعب سهم بالدنيه جتال

اخذ مني الحسن طبع الزمن ياخذ الغالي
..................

يهدل متن يكسر ضهر يعمي عيون
فكد الاخو ايغير الملامح واللون
ايشيب الراس وشيبه يوصل لجفون
لمن تشوف بكبره كام ايحفرون

نص عمري انتهه من رحت دفان
قليله شما اوصف بيه الاحزان

وعيوني البجن طبع الزمن ياخذ الغالي
..................

عشرت عمر كضيتهه واحله ايام
منالزغر وآنه لشوفت اعيونه احتام
بفراش واحد جنه خوان انام
راح واخذ من روحي كل الاحلام

ابنادم حته لو بالصبر يمتاز
يتضعضع كيانه بدفن العزاز

اخ امن الجفن طبع الزمن ياخذ الغالي
...................

اذكر جنت اكعد بصفه ومرتاح
كلمت الخويه المنه عطر وفواح
انه الحسين اعله الحسن بيه جراح
هذا ابو محمد نبض كلبي وهل راح

تبقه لكل بشر كلمة التنكال
وهوه كل كلامه تارس البال

وكلبي هل حزن طبع الزمن ياخذ الغالي
...................

ضلمت دنياي وطفه بعيني النور
وصورة اخوي الحسن بعيوني اتدور
اليوم المحنه نامت بحضن اكبور
اتمنيته هذا اليوم يصبح عاشور

وفوكانه سوه ايهيلون التراب
المافاكد محب ليلوم الاحباب

مامرني الوسن طبع الزمن ياخذ الغالي
..................

هذا الحسن ياناس جبده المسموم
المعزب الخطاره مابيه ايكوم
ذاك الشجاع البلحرايب معلوم
بغيابه الله ايعيني بهذا اليوم

شلون اصبر ونشف دمعة العين
راح الحسن يبقه بنوحه الحسين

شتحمل محن طبع الزمن ياخذ الغالي
.................

متئذيه روحي بأيدي دافنلي احساس
ماكو اليشبهه ولابشر بي يبقاس
بغيابه صدري كوه جر الانفاس
شلون ابقه وحدي وباجر بخيل انداس

نعشه وماخلص ومترس اسهام
شلون انه الحوافر تسحن اعضام

لوصدري انسحن طبع الزمن ياخذ الغالي


محمد هادي العقابي

احتضر وحسين اشوفه ... حاير ايضل بالغرب
مني احفظ هل وصيه...يابو فاضل بالگلب
حسين يوم اطفوفه
وحده لتعوفه
....................

انه الحسن يابو الفضل اسمع كلامي بنوحك
فكد الاخوه ماينحمل بگلبك يخلي جروحك
بغيابي الك اول سهم من الزمان ايلوحك
نعشي يخويه لو طلع تتمنه تطلع روحك

شايل بروحي اذيه.. وراح اروحن للأبد
تسري نيران بدليلي.. وجبدي ياخويه انمرد
شوفني آخر شوفه
وحده لتعوفه
..................

سامع انه من والدي ومن جدي هذا مصابي
خويه وكرب مني الأجل والموت هل دك بابي
انته وحسين بدفنتي تمشون يغله احباني
وتوسدوني بحفرتي وينهال فوكي ترابي

كلبي يم حسين يبقه... ومنضره اتخيله
جاي اشوف ايده اعله ضهره.. يضل غريب بكربله
بقصته المعروفه
وحده لتعوفه
...................

عباس خويه الكربله من تمشي ويه اضعونك
مهيوبه كل القافله والرايه فوك امتونك
زينب امانه بركبتك اختك تحير بدونك
لاتنسه هاي ام الخدر خليهه بين عيونك

مدلله زينب اميره.. لايمر بيهه الألم
يابو فاضل اني أريدك.. انته حارس عالخيم
خدر زينب طوفه
وحده لتعوفه
..................

شهر المحرم من يهل بالعاشر امن ايامه
يكسر حسين امن الهضم وعينه تضل لخيامه
وينضر أولاده ووخوته امذبحه كدامه
براس الحسين امن الضرب لاماتضل اعمامه

كلها تفتر اعله نحره.. الجدي باسه بدمعته
والشماته هواي خويه... ويفرحون بذبحته
بروحك الملهوفه
وحده لتعوفه
......................

ايطيح الحسين اعله الارض وتخيل انته النمظر
وثنعش طبره ينطبر ويسيل دم المنحر
ضنوة الزهره بلا رحم بسيوفهم يتوذر
بحر الشمس جسمه يضل فوك الرمال معفر

عله صدره الخيل تلعب... عشره خياله الترض
وجسمه من كد الحوافر... ينفرش فوك الارض
ودمه يصبح حوفه
وحده لتعوفه
...................

حبكم يضل وسط الگلب ياخويه ما انساكم
آخر لقاء بدنيتي هل يوم إليه وياكم
وبروحي مو هين ابد مثل الجمر فركاكم
وصيت جاسم بالشدد تلكونه عد عيناكم

واصل السم الجبدتي... وبالطشت الفظ دمه
راح اروح بهذا حالي... واشكي لمي فاطمه
بدمعتي المذروفه
وحده لتعوفه


محمد هادي العقابي

أنه الزهره... وبلوعت مصابي
فكد ابني... زيدلي عذابي
.............

شجاها الناس خلتني أهل دمعه وانه البضعه
عله خدي بعد آثار للصفعه
يطيب شلون ضلعلي وانه بس انعه صعب وضعه
لجموا گلبي ياهو الي يجي ايفجعه

اضل انعى... بدمعات انتحابي
فكد ابني... زيدلي عذابي
.................

الحسن هل يوم طاح وكثرن الأمي بجفن دامي
اصدله وهوه فتشت عيني وايامي
اشوفه ايلوج واني انهدمت احلامي الولد ضامي
السم حار ودليله ايذوب كدامي

عليي ردو... هم اندفع بابي
فكد ابني... زيدلي عذابي
...................

حضرت اهناك من حطو طشت يمه وخذت شمه
وتكطع كلبي من حزنه وكثر همه
الولد صعبه لون طاح وتشوفه امه النضر يعمه
إذا كدامها وتعاين الدمه

الحسن شفته... وبدموعي جوابي
فكد ابني... زيدلي عذابي
..................

طبك عينا ابين احبابه وإخوانه وشفت انه
زينب فوكه تنحب اخته لهفانه
يخويه تصيح اكعد احجي ويانه الحزن جانه
يبو ملگه الحلو من اتلگانه

اجيت الهم... من فركت غيابي
فكد ابني... زيدلي عذابي
...................

طلع نعشه ورموا بسهام اشوفنهم ولاجنهم
ميت بالنعش بس ماخلص منهم
وره التابوت اخوته وينسمع ونهم مشه عنهم
موت ابني الحسن ياناس كاسرهم

بهضم روحي... وايام اغترابي
فكد ابني... زيدلي عذابي
.................

تحوم الروح يمه وهالوا اترابه وعله غيابه
الهواشم كلهه حزنانه عله صوابه
بدمع العين رشوا كبره احبابه ولهابه
نار اكلوبهن للحسن ومصابه

انه بهمي... وللمحشر خطابي
فكد ابني... زيدلي عذابي



محمد هادي العقابي

المصابك يالحسن مانشفت عيوني
عليك أمن الدمع يمه نخطف لوني
..................

نخطف لوني يلون امك يفرحتهه
تعال وشوف روحي شكبر حسرتهه
يومك زيد بروحي مصيبتهه

مثل اليوم ذاكه البيه عصروني
عليك أمن الدمع يمه نخطف لوني
................

مكسورة ضلع ماينجبر ضلعي
يوميه عله واحد يهل دمعي
يبني مايطمنك لو شفت وضعي

فوك الهظم كل ساعه يجرحوني
عليك أمن الدمع يمه نخطف لوني
.....................

الك يمه سوالف ضلت ابالي
يافتشة عيون امك يدلالي
بيك الناس يبني شيبت حالي

سهام النعش من صابوك صابوني
عليك أمن الدمع يمه نخطف لوني
.................

بمصابك اني اجيت ويعتلي وني
وطشتك من نضرته حيره حيرني
شفت جبدك بنصه وصحت آ يبني

تره الاذوك كبلك اني اذوني
عليك أمن الدمع يمه نخطف لوني
................

ياجرح الاعوفه وياجرح ابدي
وليليه الدمع نايم عله خدي
بمصابك يالحسن والله انمرد جبدي

ردو يمه إليه اردود كسروني
عليك أمن الدمع يمه نخطف لوني
...................

طلع نعشك ييمه وزادت احزاني
عليك الدهر انعى بحركه خلاني
مضلومه وزماني هواي بجاني

إليه بكل وكت ناس اليعادوني
عليك أمن الدمع يمه نخطف لوني
..................

گلب امك الزهره ماكو احن منه
كل مجلس عليك بدمعي اتعنه
ايدي اعله الضلع ومعاشره الونه

لجموني بمصابك مايداووني
عليك أمن الدمع يمه نخطف لوني


محمد هادي العقابي

الاخو حزام الضهر
مشه وضهري انكسر
من عينه يحرمني الدهر
امن اديه.. راح امن اديه
...................

ونفتح باب الحزن.. ودمعه ضلت بالجفن
للاخو گلبي يحن.. كون اشوفه
بروحي شيعت الحسن.. ودفنت بيدي وطن
الهيبه ياناس اندفن.. شلون اعوفه

گلبي يوجعني بغيابه امن الألم ذاب الگلب
وصار دربي للمكابر راد رايح بالدرب
الفاتحه اقراهه يمه ودمعة عيوني تصب

العشت ويا سوه
انحرم شم الهوه
الجان بحياتي أجمل ضوه
امن اديه.. راح امن اديه
......................

امن الوكت دمعي يصب.. ماخذ عزاز الگلب فراك التحبه صعب.. من تودعه
الدنيه ماترحم احد .. لااخو ايضل لاولد
ايروح منك للأبد.. بلايه رجعه

مصابنه يختلف والله احنه ضنوة فاطمه
نعش اخوي اكبال عيني شفته بسهام انرمه
الوادم اعلينه شجاهه والذبحنه محزمه

وبعد هذا الجرح
يجي طف الذبح
والحسن يمي مايصح
امن اديه.. راح امن اديه
......................

محني ضهري امن الألم.. زلمه اخوي وماسلم
حسين انه وگلبي انلجم.. شلون زينب
تشوفني من انذبح.. وراسي ينشال برمح
وجرح نايم علجرح.. والله تتعب

كربله تخليني دامي بلا غسل وبلا جفن
ومايضل ضعن الهواشم ينسبي كل الضعن
وعله مصابي اني ادري بگبره وينوح الحسن

انه بولية غرب
اطيح امن الضرب
وشم الهوه يصبح صعب
امن اديه.. راح امن اديه
......................

من بعد ما انولي.. وعيني لخيامي وهلي
وني صوته يعتلي.. وتثكل ايدي
اه من ذاك الضهر.. ايخلي بيه شجم كسر
والشمر اه الشمر.. ايحز وريدي

الساني يابس من ضماي وگلبي ميجيسه البرد
والحوافر فوك صدري تلعب تروح وترد
جروحي الف وتسع ميه اليا جرح زينب تصد

يضربوني بحجر
ويخلي بوجهي اثر
وزينب تصيح امن القهر
امن اديه.. راح امن اديه
........................

الدمع من زينب يهل.. اه ياثكل الحمل
كبالهه ايطش الشمل.. بالصحاري
هاشميه مدلله.. حايره تضل بلفله
بين غربه بكربله.. وبين ناري

نار فركاي وحشتي ونار تلهب بالخيم
وحافيه تلم باليتامه والجمر جوه الجدم
والألم مو من سبيهه من يشتموهه الألم

المصايب تستمر
وبدايتهه اليسر
آ ياضعن ام الخدر
امن اديه.. راح امن اديه


محمد هادي العقابي

وفاية يحسين | الرادود سيد أحمد شبّر
https://youtube.com/watch?v=5vxpukxtZek&feature=shared

طيبك يضل بروحي تذكار
يابويه موحش عكبك الدار
حلم العمر راح وياك
مشتاكه حيل العيناك.... يابويه
.......................

حنان الدنيه كله انشال من عيني
غيابك يلجم بروحي وياذيني
يبويه شلون تخلص بعدك سنيني
اليا هم ياحزن گلبك يخليني

محتاره بنتك فاطمه هواي
حرمتني منك بويه دنياي
شلون اصبر ابلا ملكاك
مشتاكه حيل العيناك.... يابويه
...................

بعد الابو شلون بحال البنيه
المتعوده اعله ابوهه وتكعد بفيه
جنت وياي شمعه وتضوي ليليه
وصرت هسه اليتيمه وماكو حنيه

عايف گلب بجفاك مجروح
وكل ساعه بعدك تطلع الروح
ماينحمل مر فركاك
مشتاكه حيل العيناك.... يابويه
....................

جبيره اجروح گلبي ولادوه الينفع
وحزن الدنيه كله بروحي يتجمع
رحت وادري برحيلك مابعد ترجع
وضلت فاطمه بالحسره والمدمع

لهفان گلبي اعليك لهفان
وصارت حياتي بيت الاحزان
مهضومه روحي بلياك
مشتاكه حيل العيناك.... يابويه
.....................

رسول الله وعليك الروح محزونه
يبويه ووجهي بعدك منخطف لونه
صعب جثمانك كبالي يشيعونه
الابو تحني الضهر يافركت عيونه

من عندي رايح يغله الاعزاز
وگلبي مشه اويه النعش جناز
يالغالي وشلون انساك
مشتاكه حيل العيناك.... يابويه
......................

الزمن حاربني بيك بأول اصوابه
وبده من گلبي ياخذ ناسه واحبابه
اودعك والدموع اعليك سجابه
الابو بالروح ابد مايبرد مصابه

وتوصي بيه بآخر أنفاس
يالتدري ماترحمني هل ناس
اذاني بويه الاذاك
مشتاكه حيل العيناك.... يابويه
....................

بعدني بعازتك يابويه وعيونك
صرت حدر الترايب ونخطف لونك
اني فاطمه متعوبه من دونك
يأذوني الكبل جانو يأذونك

انحرم منك بويه شبساع
مشلوع گلبي بهذا الوداع
طول العمر راح انعاك
مشتاكه حيل العيناك.... يابويه


محمد هادي العقابي

ابين اگلوبهم جرحك توسد
شيعوض غيابك يامحمد
محتارين الاثنين
حيدر وام الحسين
....................

جرح يلجم جرح وارواح مشتاكه
وعلي بدمعه كتب مابعد نتلاكه
ضل ايصيح آ ياخوي وفراكه
وبعدك لحضه طعم الراحه ماضاكه

جان ايعرفك وتعرف بگلبه
المايلكه اليفهمه ايعيش غربه
والعاشو غربتين
حيدر وام الحسين
........................

طبع الموت من ياخذ شخص غالي
ذكره ايصير ينسونه الاهل تالي
بس الزهره تبجي ايام وليالي
يالمدللهه مثلك مايصح والي

ماتنساك وتنوح اعله فكدك
بنت للحزن بيت الزهره بعدك
وكلمن دمعه بالعين
حيدر وام الحسين
.....................

من غمضت عيونك ونته بحضانه
علي يبسن بموتك شفته ولسانه
ضل اينادي هاي الدنيا خلصانه
وسابع جار يسمع نوحه وحزانه

يعينه الله علي بساعة مماتك
بگلبه اتمنه دفنك من غلاتك
نزفن ليك جرحين
حيدر وام الحسين
......................

شالك بالنعش حيدر عله امتونه
وضل ويه الزجيه تسولف عيونه
الزهره تنادي ريضو يالتشيعونه
ادفنو گلبي ويا من تدفنونه

البت ابلا ابوهه شلون بيهه
وياهو البعد عينه يحن عليهه
مفطورات گلبين
حيدر وام الحسين
.........................

يا اخر نبي ايهيلون بترابك
والزهره وعلي اينوحون لمصابك
عله ام حسين باجر يندفع بابك
ودمعها اينكط ابلوعه عله اترابك

هاي الجنت دوم اتوصي بيها
بالتوديع شالتلك اديها
ونصبولك عزائين
حيدر وام الحسين


محمد هادي العقابي

استشهاد الامام الحسن العسكري ع


احنه خدامه وبالگلب حب الحسن
احنه خدامه وهوه للخادم وطن
.................

نوصل اعتابه ونزوره. هذا شريان الگلب
راحه نفسيه وجدمنه. مايمل من هل درب
الهوه يتغير نحسه. يم ضريحه من نطب
اله ولهله الحب حقيقي. الغيرهم ماعدنه حب

ايلمنه كدامه ونترس بحبه الصحن
احنه خدامه وهوه للخادم وطن

......................

ابو المهدي مانعوفه   وفتخرنه بخدمته
وعتنينه بثوب الأسود. مانسينه مصيبته
السوه موكب واللطمله. والمشه لزيارته
بنضرة الام الحنينه. الزهره امنه شملته

نحيي ايامه بكل وكت وبكل زمن
احنه خدامه وهوه للخادم وطن

..................

العسكري واجب علينه. حبه من الله وفرض
هذا حيدر علي جده. وهمه اسياد الارض
كلمن يعادينه صحنه. مايهمنه اليعترض
نحارب الدنيه اعله موده. ونهتف بلاء الرفض

الهاي العمامه نوكف بوجه المحن
احنه خدامه وهوه للخادم وطن

.....................

نوره يتجدد علينه. وعميه عينه المانضر
رحمة الله ونوره ساطع. والگلب يمه ستقر
الوسيله لله هوه. وياخذ امراده الحضر
العسكري بمجلس عزائه. يحضر ابنه المنتضر

نرفع الهامه وبسمه نتحده الفتن
احنه خدامه وهوه للخادم وطن

.....................

تبقه سامره بوجوده. عايشه بفي نعمته
وراية الحق والسلامه. ترفرف اعله كبته
الحسن من الله صارت . بالگلوب محبته
الله رازقنه بمحبته. ولامتنه رحمته

الخادم احلامه ينضر ادموعه الجرن
احنه خدامه وهوه للخادم وطن

.......................

عظم الله اجرك يمهدي. دافن بايدك وطن
والدك مسموم جبده. وگلبك تلجمه المحن
الوداع بصوت صحنه. وداعت الله يالحسن
يومه عاش ويانه دمعه. والعيون اعليه بجن

صرنه ايتامه وياهو من گلبه احن
احنه خدامه وهوه للخادم وطن


محمد هادي العقابي

استشهاد الامام الحسن العسكري ع


احنه خدامه وبالگلب حب الحسن
احنه خدامه وهوه للخادم وطن
.................

نوصل اعتابه ونزوره. هذا شريان الگلب
راحه نفسيه وجدمنه. مايمل من هل درب
الهوه يتغير نحسه. يم ضريحه من نطب
اله ولهله الحب حقيقي. الغيرهم ماعدنه حب

ايلمنه كدامه ونترس بحبه الصحن
احنه خدامه وهوه للخادم وطن

......................

ابو المهدي مانعوفه   وفتخرنه بخدمته
وعتنينه بثوب الأسود. مانسينه مصيبته
السوه موكب واللطمله. والمشه لزيارته
بنضرة الام الحنينه. الزهره امنه شملته

نحيي ايامه بكل وكت وبكل زمن
احنه خدامه وهوه للخادم وطن

..................

العسكري واجب علينه. حبه من الله وفرض
هذا حيدر علي جده. وهمه اسياد الارض
كلمن يعادينه صحنه. مايهمنه اليعترض
نحارب الدنيه اعله موده. ونهتف بلاء الرفض

الهاي العمامه نوكف بوجه المحن
احنه خدامه وهوه للخادم وطن

.....................

نوره يتجدد علينه. وعميه عينه المانضر
رحمة الله ونوره ساطع. والگلب يمه ستقر
الوسيله لله هوه. وياخذ امراده الحضر
العسكري بمجلس عزائه. يحضر ابنه المنتضر

نرفع الهامه وبسمه نتحده الفتن
احنه خدامه وهوه للخادم وطن

.....................

تبقه سامره بوجوده. عايشه بفي نعمته
وراية الحق والسلامه. ترفرف اعله كبته
الحسن من الله صارت . بالگلوب محبته
الله رازقنه بمحبته. ولامتنه رحمته

الخادم احلامه ينضر ادموعه الجرن
احنه خدامه وهوه للخادم وطن

.......................

عظم الله اجرك يمهدي. دافن بايدك وطن
والدك مسموم جبده. وگلبك تلجمه المحن
الوداع بصوت صحنه. وداعت الله يالحسن
يومه عاش ويانه دمعه. والعيون اعليه بجن

صرنه ايتامه وياهو من گلبه احن
احنه خدامه وهوه للخادم وطن


محمد هادي العقابي