..

.

حليب ماعندي 😥

حليبي قليل 😓

الطفل مايشبع 😢

24 ساعة يريد يرضع 🙇🏼

🌼🌼🌼شلون نزيد الحليب ؟؟ 🌼🌼🌼

خلي نتفق على الاساسيات ✨

الحليب يتكون بالثدي اثناء الحمل يعني والام حامل اكو لبأ بقنوات الثدي

ومجرد يولد الطفل لازم نبدي "رحلة" التحفيز

لان قله او عدم التحفيز تخلي الجسم يفتهم انه ماكو طفل

وماكو طفل يعني

ماكو حاجه ننتج الحليب 😶

لذلك الرضاعة الطبيعية باول ساعه بعد ولادة الطفل مهمه جدا جدا

ومن الشائع ان الي تولد قيصري ماترضع راسا خطا خطا

رضعي باسرع وقت ممكن دون تاخير

ثاني شي مهم جدا هو وضع الطفل skin to skin يعني جلد ع جلد

تنزعين الطفل تبقي بالحفوظه وتخلي على جلدك على صدرك

ثالث شي الطفل لازم لازم يتعلم ياخذ الثدي بشكل صحيح وهذا الشي اسمه (التقام الثدي) اكو اطفال ترضع خطا وبالتالي مايوصل لها كميه حليب كافية ويتعب من المحاولة وينام وهو مو شبعان وره دقيقتين يكعد يريد يرضع وتظل الام تدور بحلقة مغلقة 😓

فلازم تتعلم الام شلون تخلي الطفل يرضع صح... بحثي باليوتيوب عن (طريقة الصحية للرضاعة الطبيعية وطريقة التقام الثدي)

باختصار الرضاعة ليست من الحلمة فقط ❌

رابع شي الاستمرارية بالارضاع بمعدل 8-10 مرات باليوم وكذلك اهمية التفريغ والتحفيز

يعني مو منا رضع وحسينا الصدر فرغ نقطع الرضاعة ونتجه للممه!!

لا لا هيج قتلنا التحفيز 🔪💔

لان هيج انتي فهمتي جسمك هاي الكميه كافيه لاتسوي بعد لان الطفل كمل وشبع

جسمك مايدري انتي كاعد تنطي ممه

الحل؟؟ 😢

من يفرغ الثدي ابقي رضعي حتى لو مابي هيج حتوصلين رسالة للجسم انه لازم يزيد الكميه لان الطفل ماشبع

✨(رضاعة الطفل من الثدي بعد افراغه يسموه تحفيز) ✨

وهذا لازم وحتمي وضروري ويصير هو تلقائيا باوقات طفرات النمو الي هي بعمر 3 ايام و9 ايام و3 اسابيع و6 اسابيع و3 شهور و6 شهور ...وغيرها

والي يصير بيها ان الطفل يصير كلساع يريد يرضع حتى يوصل ايعاز للجسم ان يبدي يزيد الكمية لان الطفل يحتاج كميه اكبر لان معدته كبرت والطفل كبر

وهنا اغلب الامهات تتجه للخطا وهو تترك التحفيز وتكول (مديشبعه) وتعوف التحفيز وتروح تنطي ممه وهنا ارجع اكول جسمك عمره محيزيد الكميه لان مانطيتي الرسالة المطلوبه

التحفيز ممكن يصير عن طريق استخدام المضخات

المضخه تساعد ان توصل هاي الرسالة لجسمك من تبقين تفرغين الثدي

وبالامكان استخدام الطريقة التالية

شفط مده ٢٠ دقيقة ثم راحة ١٠ دقائق

ثم شفط ١٠ دقيقة ثم راحة ١٠ دقائق

ثم شفط اخير لمده ١٠ دقائق

او تخلين الطفل يرضع من جهه اليمين مثلا وتسوين شفط من جهه اليسار

هيك طريقة يوصل للجسم رسالة ان هناك توأم ويصير عندك تحفيز مضاعف ✌🏻

اخر شي ننتبه للطعام والاعشاب والمنتجات المساعده على انتاج الحليب :

💡السوائل

مثل الماء

العصير

الالبان

مي اللحم وغيرها

💡الطعام

مثل الشوفان

الجزر

المكسرات

الراشي

السمسم

الدبس

التمر

قيمر العرب

💡الاعشاب

مثل الحلبة

الينسون

حبه الحلوه

💡منتجات هي جاهزه لهذا الغرض

ميلكي ميكرز للامهات المرضعات (تاكليها مباشرة وهي تسوي المطلوب)

نسوي ملخص ونكول الخطوات كالاتي

1️⃣رضاعة باسرع وقت بعد الولادة

2️⃣وضع الطفل جلد على جلد

3️⃣التاكد من الالتقام الصحيح

4️⃣ رضاعة الطفل 8-10 مرات يوميا

5️⃣تحفيز الجسم بانتاج المزيد من الحليب

6️⃣مساعده الجسم بتناول المكملات او المنتجات الي تساعد على انتاج الحليب

7️⃣ الابتعاد عن الحليب الصناعي لان يخرب على جسمك الانتاج واذا صار ونطيتي حليب صناعي لازم تسحبين من الثدي بالمضخة بنفس الوقت حتى لايقل الانتاج عندك

واخر شي الموضوع ياخذ يوم الى يومين وييدي يزيد فطولي بالك

والرضاعة الطبيعية كنز لاتتنازلين عنه طالما تكدرين 👏🏻

د.اسماء البدري

الام الفاشلة؟؟
حسب رأيي معيار الفشل في الامومة هو التوقف عن المحاولة لتقديم الافضل
وانتي برأيك شلون الام تفشل بامومتها؟
.
.
.
.
د.اسماء

يا معوده خليهم على التلفزيون قابل شكو !
خليناهم و ما صار شي !!
شدعوه قابل شبيه التلفزيون كله اشياء تعليميه !
و سمعتي النصيحه و فتحتي التلفزيون و طلعتي اي قناه و بدا طفلك يتابع وياك و كملتي شغلك و عاش البيت و انت و زوجك و اللي نصحك بهدوء و سكينه !
بس مع الأسف اريد اكولك كم شغله تخص التلفزيون:
😒 اولها
الاطفال اللي يتفرجون مشاهد عنيفه بالتلفزيون يكونون اكثر عرضه انه يكونون عدوانين و يكونون يفضلون التلفزيون على العالم الخارجي و التفاعل
😒 وحده من الدراسات تكول انه الاطفال اللي يتفرجون على التلفزيون بعمر اقل من سنة و لمده ساعتين و اكثر يوميا يكونون عرضه لتاخر الكلام بنسبه تزيد عن السته أضعاف من الاطفال اللي ما يتفرجون على الشاشات !!!
☹ كل الدراسات تكول انه الاطفال اللي يتفرجون تلفزيون اكثر تصير عدهم مشاكل بالنوم اكثر
🤔 الاطفال بعمر المدرسه اللي عدهم مشاكل بالتركيز و الدراسه كانوا يتفرجون تلفزيون و شاشات اكثر
🙃 هل ممكن التلفزيون يسبب عنف ؟
الدراسات تكول انه ٢٠ بالميه من حالات العنف عند الاطفال تكون نتيجه عنف شافه الطفل بالتلفزيون او الموبايل و حب يقلدها !!
🥲 مشاكل التلفزيون ما توقف عند الأطفال فالمراهقين يكونون اقل ثقه بنفسهم نتيجه إعجابها بابطال الميديا او المؤثرين سواءا الوهميين مثل سوبر مان او الحقيقين من أبطال الشاشات
🥲 اتعسها هي زياده نسبه البدانه عند الأطفال اللي يتفرجون تلفزيون اكثر
التلفزيون هو حاله حال اي تقنيه جديده
اله اللي اله و عليه اللي عليه
الكثير من امهاتنا يكولون اصلا التلفزيون علم ابني يحجي
و هنا اكول اي ممكن
بس هذا الشي يعتمد على شنو يتفرج طفلك
وحده من الدراسات شافت انه الاطفال اللي يتفرجون على كارتونات معينه يتعلمون كلمات اكثر من اللي يشاهدون برامج من غير محتوى مفيد
امثله على البرامج المفيدة اللي شافوا انه تزيد اللغه :
حكايات جزيرة التنانين dragon tales
بلو كلوز blue clues
دورا Dora
ارثر Arthur
كاليفورد Clifford'
بس لما قارنوا البرامج هذه مع الكلام المباشر
شافوا انه اللي تكلموا معهم أهلهم عدهم كلمات اكثر و مشاكل لغة اقل !!!
تسأليني لعد شاسوي لا طلعه و لا تلفزيون
اجاوبك
اسألي جدك و جدتك كيف كان الاطفال يقضون اوقاتهم
د. سيف سمير البياتي اخصائي طب الاطفال

(امي جانت تدزني اتاكد اخويه الصغير ديتنفس لو لا
لان من جان صغير ينام فد 5 ساعات جره وحده.. فكل ساعة تكلي روحي شوفي ديتنفس لو لا واني اجي اخلي اصبعي واشوف اكو هوه ديطلع من خشمه واروح اكللها)

هذا التعليق جان بكروب ديحجون عن الاختلاف بين الاطفال وان اكو اطفال تنام كلش هواي

شوكت قريته؟
جانت بنتي صغيرة عمرها حوالي شهرين والليل مسهرتني والنهار ترضع وتغفه ربع ساعه باحسن الاحوال وترجع تكعد تبجي

من قريته ماكدرت امنع نفسي من المقارنه
وطكيت بچي 🙈

المقارنة شي سئ جدا جدا يخليك مو بس تكرهين حالتك... يخليك هم تحقدين على النعمه بدل ان تفرحين بيها

ومن اجى زوجي وحجيت له ظل صافن عليه وكال كل عقلج ؟ 🤣

همزين مارزلني زيادة

المهم رباط السالفة ابد لاتقارنين دائما ابحثي عن حال طفلك ووضع طفلك بعيد عن المقارنات

ومانكدر ننكر اطفال قبل مالهم حس وامهاتنا الغالبية جانت اول 5 شهور بعد الولادة ماتحس بالطفل لان يكضيها نوم
اما حاليا؟؟! هههههه لاتعليق

.
.
.
د.اسماء البدري

الترامبولين
كل الاباء و الامهات يسألون عن الأفضل لاطفالهم
و قسم من الاهالي عدهم مساحه متروكه بالبيت
فيفكرون يجيبون ترامبولين و يخلوها بيها
هذا البوست يناقش الترامبولين ككل
الترامبولين هو لعبه القفاز
و بيها الطفل يقفز على سطح مستوي
طيب شنو فوائد الترامبولين؟
1. الترامبولين و القفز عليه أكثر لعبه تصرف طاقه
لذلك لصحه افضل و لرشاقه اكثر استخدم الترامبولين
دراسه من ناسا تكول انه 10 دقايق ترامبولين تعادل 30 دقيقه ركض
لذلك اذا طفلك عنده زياده وزن
اجه وقت الترامبولين
2. يحسن الترامبولين من وظيفه التوازن و التوافق الحركي
3. فائده خاصه للترامبولين لاطفال التوحد و اللي عدهم مشاكل نفسيه فهي مثل ما كلت بنقطه رقم 2 تحسن التوافق الحركي و تحسن الوظائف الحسيه
تحسن التعلم و الادراك
4. تحسن التعليم
بوحده من الدراسات شافوا انه الطفل يتعلم اسرع و هو يقفز على الترامبولين مثل تعليمه الحروف و الأرقام و جدول الضرب
5. تحسن النوم
و هذه شبه منتهين منها و ما يحتاجلها دراسه
بس بدراسه المانيه شافوا انه مستوى النوم يتحسن اذا الطفل مارس الرياضه على الترامبولين
6. تحسن من التواصل الاجتماعي بين الاطفال
فيلعبون سويه
و ينتظرون دورهم
❤ نجي للعمر اللي مسموح بيه الاطفال يلعبون بالترامبولين
الاكاديميه الامريكيه لطب الأطفال تكول الترامبولين ممنوع على الأطفال اللي أعمارهم اقل من 6 سنوات
🌸 الترامبولين هي لعبه حالها حال الالعاب بيها فوائد و بيها مساويء
الحسنات كتبناها فوك
نجي للمساويء
😥 آلاف الاطفال الامريكان يراجعون المستشفى سنويا نتيجه الاصابه بلعبه الترامبولين
😥 الاصابات تتراوح بين سقوط من علو او مجرد شد عضلي او خدوش بسيطه إلى كسور بالعظام او اصابات بالدماغ و أحيانا تسبب خلل دائم بالاعصاب و حتى الوفاه
هذه هي المساويء
طيب شون نقلل المساويء
1. ما يلعب الطفل بالترامبولين بلا اشراف من شخص بالغ
2. ما يقفز على الترامبولين اكثر من طفل واحد بكل مره
3. كل اجرائات الحمايه لازم تناخذ بالحسبان مثل تغطيه السبرنكات و جدار جانبي للترامبولين
4. الشقلبه و الحركات البهلوانيه ممنوعه منعا باتا على الترامبولين
❤ اخر توصيه من الأكاديمية الامريكيه لطب الأطفال توصي بأن لا تشترون ترامبولين بالبيت
اذا مصر على شراء ترامبولين احرص على تطبيق الاربعه نقاط للوقايه التامه
د. سيف سمير البياتي اخصائي طب الاطفال

لتتصورون مثل المسلسلات 😅😅

الرضاعة الطبيعية عملية معقدة لتتصورون مثل المسلسلات حيجي الطفل تحطوه عالثدي راسا يتعلم والحياة سعيدة وهاهية🙃

يحتاج انتوا تتعلمون والطفل يتعلم👍🏻

لانه الطفل من يجي ميعرف يلتقم لحد مايتعلم راح تتعبون شوية

مثل سياقة السيارة اول شي صعبة وراها تصير عملية تلقائية متفكرون بيها

اضافة الى انه الثدي نفسه مثل المكينة واكفة صارلها سنين فيحتاجلها تدريب

فضروري البنات الحوامل قبل الولادة ترطبون الثدي والحلمة

❤️❤️❤️❤️

نقطة ثانية الرضاعة من الممة عملية اقرب للمص

الرضاعة من الثدي عملية اقرب للمضغ

فاذا الطفل اول ما جا للدنيا وبعده مامضبط المضغ واجي انطيه ممة راح يتخيل انه هاي هي الحركة الوحيدة اللي يكدر يسويها بحلكه

فلما يجي البريست راح يمص مراح يمضغ وبالتالي ندخل بارتباك الحلمة

🚙🚙🚙

سامعين بالساعة الذهبية ؟

اول ما ينولد الطفل باول ساعة يكدر مباشرة يرضع من الثدي ويكون يعرف كلش زين وراها ينسى فلاحظوا انه استغلال هاي الساعة ضروري كللش حت يخزن عملية الرضاعة فلا تستهينون بيها

🌸🌸🌸

الرضاعة عملية يتدخل بيها الدماغ ، الثدي يرسل ايعازات للدماغ زود الحليب فيزود الحليب

فكلما الطفل مص اكثر حت لو ميطلع حليب كلما الدماغ استلم ايعاز وزود الحليب

💓💓💓💓

اللي يصير انه بطفرة النمو الطفل يبدي يرضع هواية هواية وهاي فطرته حت يزود حليب الام لانه هو ديكبر فيريد كمية الحليب تزيد

فلما يمر الطفل بطفرة النمو خليه يرضع لحد ما الحليب يزيد بس اللي ديصير انه تحسين انه هذا مدايشبع فتدخلين ممة فتنلاص الوضعية ،

فانتظري واصبري خلي الثدي وجسم الطفل هم يتفاهمون اكو علاقة بينهم انتي طلعي نفسج وطلعي امج وعمتج همين 🤣🤣🤣

تكدرين تساعدين جسمك وتاكلين منتجات تساعد جسمك ان يزود الحليب حتى تمر هاي المرحلة بسلام وبدون ماتتجهين للحليب الصناعي

المنتجات مثل ملكي ميكرز milky maker's طعمها طيب وتشبعك وماتسمنك مثل الاكل الهواي وانوب تتصير عندك كآبه من تشوفين وزنك زاد 🤭

🌹🌹🌹🌹

حاولي تمشين يوميا حتى لو نص ساعه حتى تنشطين عميلة الايض بجسمك وتره الرضاعة الطبعية هم تحرق سعرات ...

وانتي من النوع الي يسمن لو يضعف اثناء الرضاعه؟

اني اضعف اصير جلد وعظم وروح 👻

د.اسماء البدري

🙇🏼هو لازم ارضع طبيعي؟؟🤔🤔
اني بيتي وحدي واحس ما ادبرها 🤔🤔🤔
اخاف ادخل كآبة لان بصعوبه يرضع واستسهل الممه😑

🙋🏻‍♀️اي لازم ! هذا رزق من رب العالمين لطفلج والج هم
وبالنسبه للطفل لتتخيلين الطفل يعرف يرضع وحده بدون مجهود بالبدايه وخاصه مدام انطيتي ممه اكيد الرضاعه حتكون اصعب ولهالسبب ينصحون باول فتره مننطي ممه
اني ام صارلي ٨ شهور و١٠ ايام اكسكلوزف بريست فيدنك
احلى شي بالدنيا هي الرضاعه والتواصل الرهيب الي يصير بينج وبين الطفل احلى شي بالدنيا من يرضع منج ويباوعلج بنضرات مليانه حب وامتنان بسبب هالنضرات وهالشعور شايله هم من تكبر شلون افطمهة حتاذه يمكن بكدها
حته متدخلين بدبرشن رضعي طبيعي لان علميا الي يرضعون طبيعي الدبرشن يكون كلش اقل عدهم بسبب المشاعر العظيمه الي تصير
الرضاعه الطبيعيه قرار واراده اذا انتي تريدين صدك حتكدرين
اني باول يوم بالمستشفى رادو ممه لان وضعي صعب ومقبلت وكتلهم جيبوها اني ارضعها
ولادتي جانت مأساوية والم الخياط لحد هسه ممتعالج ولحد هسه اراجع علموده وانتي تخيلي شون جان الوضع اول يوم
اول رضعه النه جانت حرفيا حرب ٣ ساعات متواصله اني وامي نحاول وهي تبجي ومدتعرف وهي جتي كلش ناعمه حرفيا صدري ميكفي بحلكهة اصلا وبقيت احاول وماما ترزلني تكلي خياطج حينفتح وكافي وخلي ننطيهة ممه واني مصررة حرفيا ابجي من الالم وبقيت احاول وماانسه فرحتي وشعوري من عرفت ترضع وره ٣ ساعات محاوله وبقينه اول كم يوم كل رضعه هي متندل ومتعرف ونرجع نحاول لحد متعلمت وجنت حته من تغفه ابقيهة ع صدري من اشوفهة شكد مرتاحه ومامنه ورجعت لبيتي كلهم كلولي محتبدريها بس صدرج دخلي حليب لان اني بيتي وحدي ورجلي شغله من ٧ الصبح ل ١١ بالليل وحته جمعه وسبت يداوم اوفه يوم واحد بالاسبوع وبس
بس دبرتها وكدرت وارضع واطبخ وانظف وعادي
وللمعلومات اني انسانه ناعمه وضعيفه كلش وره مولدت ب٣ شهور اني وزني ٥٢ يعني مو انسانه قويه وعندي قدره مفرطه
بنتي بعمر شهرين عدهة خلع ولادي ولبست مسند وحرفيا جانت وضعيه الرضاعه شبه مستحيله لان مااسيطر ارضعهة وهي مسند ورجلهة مفتوحه وجربت كل الطرق والوسائل وجان تعب مو طبيعي ماانساه مستحيل بس هم استمريت
وهم صرت انزلاق وكلولي عوفي وبطلي رضاعه طبيعيه وبقيت مستمره
مدا امدح بروحي لو اتباهة بنفسي بس كتبتلج كل هالحجي حته تعرفين انتي تكدرين اذا تنوين صدك وتريدين هالشي صدك حتكدرين تسوي وهذا اعظم شي تسوي لطفلج صدكيني هذا رزقه ورب العالمين انطانه هاي النعمه حته همه يرتاحون ويامنون وياخذون حب كافي ومشاعر وامان ميتعوض

التعليق من أحد الامهات في احد الكروبات استاذنتها انشر وقبلت،
وكلامها صحيح مليار بالمية
الموضوع قرار ... واصرار
مدام ماكو سبب طبي يمنع
فهو يمك الموضوع كليا اذا قررتي وآمني بقرارك حتحاربين كل الدنيا وتتغلبين على كل الصعوبات وتلكين لكل المشاكل حلول
اما اذا مااقتنعتي حتلكين الف سبب وسبب والف تبرير وعذر

فا ارجع اكلج الموضوع بيدك وهو قرارك
(مدام ماكو سبب طبي يمنع)

د.اسماء البدري

انسيها
حياتك وانتي عروسه
حياتك وانتي سنكل
من يصير عندك اطفال

انسيها
خصوصا
خصوصا
اذا ماعندك احد يساعدك بالاطفال
يعني مثلا

ماكو تنامين من تنعسين ❌
تنامين وقت ينام الطفل فقط

ماكو شوكت مايعجبك تاخذين شاور ❌
تاخذين شاور من زوجك يم الطفل او نايم

ماكو شوكت ماعجبك تطلعين ❌
لان لازم الطفل وياك ومو كل مكان يرهم بي اطفال

ماكو هواياتك خصوصا اذا تحبين الرسم او الاشياء الناعمه
لان هنا الطفل حيلزم كلشي

ماكو تطبخين وجبات ام 3 و4 ساعات
الطبخ ركض بركض لان الطفل بين رجليك

ماكو بيت مرتب 24 ساعه
لان منا تعزلين منا كلشي يطشر

ماكو تخابرين وتسولفين فد ساعتين و3
لان ال5 دقائق تحدث بيها الف كارثه

ماكو تخلين مكياجك على الميز بكل اريحيه
لازم تخفي وتضمي وتتعاملين وياه مثل المخدرات الممنوعه

ماكو خصوصيه
حتى الحمام ، اذا اضطريتي تدخلين حيبقى الطفل واكف بالباب يبجي او تستلمين للامر الواقع وتدخلي وياك

ماكو نوم ليل متصل
خصوصا اذا يتمرض

ماكو تصفنين ويه نفسك
لان حتبقى حواسك تتابع الطفل وكلساع يحاول يتواصل وياك

حتى الصلاه
حتصير 70% منها قضاء لان الطفل يفاجك بالمفاجئات وماتخلص احتياجته

ليش دا اكتب هالكلام؟
حتى الي ما مستعدة تتنازل عن هاي الأمور نصيحه لاتخلفين لان وجود هذا الطفل واصرارك على متابعه حياتك السابقه هو مجرد ظلم لا اكثر
(في حال ماعندك احد يعاونك)
وفي حال انتي مستعده للتنازل حتى لاتنصدمين بعدين وتتكيفين مع حياتك الجديده وتسوين تسهيلات وترتيبات تتناسب مع القادم
واذكرج

حياتك السابقة انسيها 😁

د.اسماء

لاتطولين رضاعة طفلك 🤷🏼

🖍️لاتطوليها وتنطي رضاعة اول 3 شهور اذا متردين المادة البيضاء بدماغة تتطور
واذا ترديها تتطور ويحصل ذكاء قوي رضعي اول 3 شهور ولاتركيها 👍🏼

🖍️لاتطوليها وتنطي رضاعة اول 6 شهور اذا متردين تحمي من التهابات الجهاز الهضمي
واذا تردين تحمي من الالتهابات بالجهاز الهضمي رضعي اول 6 شهور ولا تركيها 👍🏼

🖍️لا تطوليها وتنطي رضاعة لعمر السنه اذا متردين تحمي من امراض البدانة والسكري
واذا تردين تحمي رضعي ولاتقطعيها قبل عمر السنة 👍🏼

🖍️لاتطولين الرضاعة للسنتين اذا متردين تحمي من النزلات المعوية ومتردين تتحسن السلوكات الاجتماعية
وطوليها للسنتين اذا تردين تنطي مناعة متكاملة لكل شي يتعرض اله خلال هاي السنة واذا تردين تنطي امان كامل يخلي ينطلق اجتماعيا وسلوكيا بدون مشاكل القلق والتوتر

الرضاعة الطبيعية كنز 👌🏻

د.اسماء البدري

هل تعلم ان الاطفال الذين يتمتعون بالاحضان والتواصل الجسدي المستمر مع الوالدين اقل عرضة للامراض؟؟؟
لان افراز هرمون الحب (الاوكسيتوكسين ) يقوي المناعة 😍
.
.
.
.
د.اسماء

17 شغله لازم تعرفيها قبل ما تولدين طفلك
١. من العادي و الطبيعي انه طفلك يفقد وزنه
تقريبا ١٠ بالمئه من وزنه راح يختفي و يرجع لوزن الولاده بعمر ٧ الى ١٠ ايام
هذا لا يعني ابدا انه رضاعته قليله
٢. الاطفال يبجون هوايه
يبجون لان حاره
لان بارده
لا مربوطين زايد
لان يريد كماط
لان ضاج من الكماط
لان حفاظته مو نظيفه
لان عنده مغص
لان جوعان
لان لان لان لان
هذا هو العادي
٣. صوت التنفس مالته غريب و بيه صوت
مره يتنفس سريع مره بطيء مره كلش سريع و مره يوكف شويه و يكمل
هو هذا العادي
٤. ما يحتاجون اكثر من المعتاد
يعني اغلب وقتهم يكضوه بالنوم
ابدا لا تبالغين بالامومه
كلشي يتم بهدوء و رويه
٥. من الطبيعي انه يتقيا
و لا تركزين بنوع القي الا اذا كان اصفر او بيه دم او اسود
احيانا يكون اصفر لان حليب الام يكون اصفر اللي هو اللبا " الصمغه"
٦. القشره اللي تصير بالراس تحدث و تحدث كثيرا و خصوصا بالموسم القادم و هي لا تعني شيء و لا تحتاج علاج في اغلب الحالات
٧. مالك علاقه بالصور مال اطفال اللي انزلهم
كلهم حلوين و نازكين
من العادي جدا انه وجههم يبقى اصفر
و بعدين ينترس حبوب بسبب هرموناتك
عادي هو وحده يروح بال ٣ اشهر إلى ٦ اشهر
٨. من الطبيعي جدا انه الشعر مالته يتساقط و بالاخص اللي خلف راسه بسبب الاحتكاك اللي يصير ويه الوساده
٩. تحضري لكميات الخروج المو طبيعيه
من الطبيعي انه اول ايام يكون عدد مرات الخروج ٦ الى ٨ مرات
و بالاخص عند اللي يرضعون طبيعي
وراها تقل شويه شويه
و نتجه نحو الامساك
١٠. ما يحتاج تدفئه اكثر من اللازم و لا اغطيه اعتبريه بشر عادي يحب الجو اللطيف المعتدل
لا تخليه بعيدا عن كل وسائل التبريد بالاخص الصيف جاي حبابه و اليوم استلمت اول حاله جفاف ناتج عن وضع الطفل بمكان حار
١١. اعرفي شلون طفلك كاعد ياخذ كفايته من الحليب
و الطريقه سهله
اولا الوزن بالمتابعه مع طبيبك
ثانيا كثره عدد مرات الخروج
ثالثا ٤ حفاظات و اكثر مملوءه بالادرار
١٢. هم اقوى مما تظنين
لا تخافين ما راح ينكسر اذا شلتيه
احملي بكل رفق
و اغسليه عادي بالحمام
دائما اسندي راسه و رقبته
١٣. اليافوخ وجد لحمايه الطفل
لا تخافين انه تلمسيه او تغسلين الشعر اللي فوكاه
الدماغ مو جواه راسا اطمئني
١٤. انت ابدا ما كاعد تدللين طفلك اذا شلتيه و ما عليك بتعليقات فلانه و فلانه انه انت دللتي طفلك
او راح تعوديه ع الحضن
كلاوات و مالها اي اساس من الصحه
١٥. تحضري للانتقاد و حتى السخريه
ابنج ضعيف
ابنج سمين
ابنج ما حلو
هاي شنو ما توكليه
هاي شنو شو اسمر
هاي شنو شو اسود
عادي عادي
ابتسمي و انسي الموضوع و لا كانه سمعتي
انت احسن ام لطفلك
بالاخص اذا رضعتي طبيعي
١٦. قطرات فيتامين دي
و قطرات البروبايوتك
و قطرات كوليف
و قطرات السيمثكون وجدت لراحتك حضريها فهي امينه جدا و بدون اعراض جانبيه تقريبا
١٧ . من زمان ما منزل هيجي بوست بايقاع سريع
فلا تنسيني من دعائك و تعليقك هنا حتى غيرك تشوف البوست
د. سيف سمير البياتي
اخصائي طب الاطفال

فتحتي عينك بعد العمليه
و هوسه و هلاهل
و من بعيد تسمعين صوت ناصي
و كومه اصوات و هوسه
و يبدون الحبايب
امك : خطيه صغيروني شكدوته لان ما اكلتي بالحمل
عمتك: شو هذا ما حلو ما يشبه لا ابوه و لا عماته مدري عليمن طالع
حماتك: يلا جيبوا مي و شكر خلي نسوي قنداغ و يصير اوكي
مره عمك : لا قنداغ شنو همج انتن خلي ننطيه حليب صناعي يلا روح ابو جود جيب مميه ( اكيد يسموه جود )
ابو جود: هسه اروح اجيب احسن حليب و احسن مميه ( طبعا يجيب مميه ام الألفين اللي قياساتها غلط )
هنا و بعد هذا المشهد راح يبين تعبي وياك بهاي السنين
هنا لازم تكولين لا بس اسمحولي
انطوني ابني
شيلي طفلك
و خليه جلده على جلدك
و ابدي انطي حب و رضاعه و خلي يساعدوك
الحليب ما راح ينزل بوري
كل اللي ينزل من الجهتين هي ٥ سيسي
و استمري من جهه لجهه حوليه
هو راح ينزل
هذه يسموها الساعه الذهبيه
هي اول ساعه بعد الولاده
اذا رضعتيه احتماليه انه ترضعيه بعمر سنه راح تزيد
هذه اول رضعات هي اول لقاح اله
تصرفي صح
مالك علاقه باللي يكولوه
عادي راح تسمعين حليبك اصفر حليبك خفيف حليبك ما يشبع كولي اي و كملي رضاعه طبيعي
طفلك يستحق
كلهم بالاخير راح يروحون لبيوتهم
و تبقين انت و هذا الصغير الجديد
استمري طفلك يستحق
د. سيف سمير البياتي
اخصائي طب الاطفال

.

.

احرص كل الحرص من تختار اكل لطفلك انه يكون بيه حديد
او غني بالحديد
او مدعم بالحديد
و ان يكون بعيد عن الحليب لان الحليب بيه كالسيوم و الكالسيوم يتعارض ويه امتصاص الحديد
احرص على اضافه اللحم مبكرا للطعام و خلطه مع الطعام
حتى قريت مقالات لأطباء اطفال أمريكان يكولون بيها انه اول اكله لازم تدخل لمعده الطفل هي اللحم
مبكرا اقصد بحدود ٤ إلى ٦ اشهر
الحديد موجود بالعديد من الاكلات عدا اللحم ( بس يبقى هو اغناهم )
يا عراقيات وجوه اولادنا صفر من كثر الحليب بعد السنه و قله التنويع الغذائي
يا عراقيات مهتمات بالكالسيوم و مقدساته و عايفات الحديد و الزنك و البروتين و البروبايوتك
مهتمات بالسكريات اكثر من كلشي
و الامانه اللي هي طفلك صارت مدمنه سكريات اكثر من كلشي بالدنيا
انتبهولنا لمساله التنويع الغذائي و تدعيم الحديد بغذاء الطفل
الحديد اولا و بعدين يجي الكالسيون المقدس
التنوع الغذائي مهم
د. سيف سمير البياتي اخصائي طب الاطفال

.