استهلاك الإنترنت في الإصدار الحديث من محاكي الطيران Microsoft Flight Simulator 2024 قد يصل إلى 180 ميجابت في الثانية ✈️

شركة مايكروسوفت عملت تحديث ضخم على محاكي الطيران الخاص بيها في النسخة الحديثة، وقللت من حجم المحاكي نفسه اللي كان بيصل إلى 400 جيجابايت، واستبدلت المساحة دي بتعزيز تقنيات المحاكاة بشكل فعلي أثناء تجربة الطيران.

التحديث ده بيتطلب استهلاك ضخم للإنترنت خصوصا في الأماكن الحضرية وأثناء تفعيل أعلى جودة للجرافيكس، في المقابل تم خفض حجم المحاكي لحدود 50 جيجابايت فقط.

المعدل ده من الاستهلاك يعني إن اللعبة هتستهلك حوالي 81 جيجابايت بيانات لكل ساعة طيران!

موقع ProtonMail اللي كان بيستخدمه مستر روبوت في إرسال واستقبال الإيميلات بشكل آمن تماما 🛡

تعتبر خدمة ProtonMail واحدة من أفضل الخدمات لعمل بريد إلكتروني آمن ومجاني في خطوات بسيطة بدون رقم موبايل.

أهم ميزة في الخدمة إنها بتوفر لك إيميل مشفر تماما ولا يمكن من خلاله تعقبك أو معرفة أي معلومات عنك.

ده مقال بسيط عن الخدمة وكيفية عمل إيميل باستخدامها بسهولة 👇
http://bit.ly/30RQHYD

الأسبوع الماضي وزارة العدل الأمريكية أعلنت عن اعتقال أحمد صلاح يوسف عمر (22 سنة)، علاء صلاح يوسف عمر (27 سنة) على خلفية إدارتهم لجروب الاختراق المعروف باسم أنونيموس سودان Anonymous Sudan.

بيان الاتهام ذكر مسئولية الجروب عن أكثر من 35 ألف هجوم حجب خدمة DDoS ضد عشرات من كبرى الشركات زي مايكروسوفت و OpenAI، وكذلك هيئات حكومية زي البنتاجون | FBI | ووزارة العدل نفسها.

جزء من هجمات الأخوين حسب بيان الاتهام كان بيتحرك من نشاط حراكي، زي شنّ هجمات حجب خدمة ضد مستشفيات أمريكية وتعطيل أنظمتها بالكامل بعد الهجوم الصهيوني على مستشفيات غزة، بالإضافة للهجوم على نظام إنذارات الصواريخ وتعطيله في فلسطين المحتلة.

علاء بيواجه تهم عقوبتها السجن 5 سنوات، وأحمد بيواجه تهم عقوبتها السجن مدى الحياة، ويبدو إنه بسبب تصريحات كتبها على جروب التليجرام بعد الهجوم على مستشفيات أمريكية واللي تم اعتبارها تنفيذ هجمات إلكترونية بنية القتل.

الأخوين اتقبض عليهم، لكن من غير المعروف مكانهم تحديدا، ويبدو إنهم في دولة مختلفة حاليا، ولم يتم ترحيلهم للولايات المتحدة حتى الآن.

لبدء تقديم إنترنت بسرعة 1 جيجابت في الثانية؛ شركة SpaceX قدمت طلب لزيادة عدد أقمارها الاصطناعي اللي بتدور حول الأرض ليصل إلى 30 ألف قمر 🛰

الشركة كانت حصلت على تصريح لإطلاق 7,500 قمر فقط، تم إرسال 6,000 قمر منهم حتى الآن.

الشركة أيضا طلبت إذن بخفض مدار الأقمار لمدى 340 إلى 365 كيلومتر فقط بغرض خفض معدل التأخير لأقل من 20 ملي ثانية.

قبل 4 سنوات فقط كان عدد الأقمار الاصطناعية في مدار الأرض 2,200 قمر فقط. النهاردة عددهم تخطى 14,000 قمر.

مسئول الاتحاد الدولي للاتصالات قال إنهم حتى الآن تلقوا طلبات لإطلاق 1.7 مليون قمر صناعي!

من أسبوعين كدة تم اعتقال هاكر برازيلي مشهور اسمه USDoD كان مسئول عن اختراقات ضخمة منها InfraGard التابعة للإف بي آي، شركة CrowdStrike واحدة من أكبر شركات الأمن السيبراني، قاعدة بيانات National Public Data اللي كان فيها 2 مليار سجل عن مئات الملايين من مواطني الولايات المتحدة.. واختراقات أخرى..

المهم دي صورة لجهاز الكمبيوتر بتاعه..

ده الماوس الوايرلس الـ Type-C الجديد من شركة آبل Magic Mouse اللي سعره 100$..

ما زالت فتحة شحن الماوس موجودة في أغبى مكان ممكن تتصمم فيه أسفل الماوس، عشان متقدرش تستخدمه وهو بيشحن، ولازم تقلب الماوس على ضهره عشان ترضعه قصدي تشحنه..

آبل بتعمل التصميم ده كدة بقالها سنين..

فريق حملة المرشحة في الانتخابات الأمريكية كامالا هاريس عملوا خريطة في لعبة Fortnite كنوع من الترويج والوصول لشريحة الجيمرز والناخبين الشباب.

زي عندنا كدة..

25% من الكود البرمجي اللي بتنتجه شركة جوجل دلوقتي بيتم كتابته بواسطة الذكاء الاصطناعي 🤖

ده مؤشر مهم على:
1. اتجاه صناعة البرمجة في السنوات القادمة مع تطور قدرات الذكاء الاصطناعي، واعتماد الشركات عليه، مقابل تسريح آلاف المطورين من أكبر شركات التقنية زي جوجل & مايكروسوفت.

2. سبب التجربة السيئة اللي أصبحت كتير من منتجات جوجل بتقدمها مؤخرا وأولها محرك البحث.

شركة جوجل أعلنت عن اكتشاف الذكاء الاصطناعي لثغرة أمنية من نوع 0-Day للمرة الأولى 🤖

جوجل عاملة مشروع مشترك بين فريق Project Zero اللي بيضم مجموعة من أفضل الباحثين في مجال أمن المعلومات، وبين فريق DeepMind اللي بيضم مجموعة من أفضل الباحثين في مجال الذكاء الاصطناعي لتطوير نموذج ذكاء اصطناعي اسمه Big Sleep قادر على اكتشاف الثغرات الأمنية.

النموذج ده قدر يكتشف ثغرة أمنية من نوع Stack Buffer Underflow تصنيفها Zero-Day في محرك قواعد البيانات الشهير SQLite، ودي بتعتبر من أخطر أنواع الثغرات الأمنية، عشان تكون دي أول مرة يكتشف فيها نموذج AI ثغرة من النوع ده.

آجهزة آيفون بأحدث إصدار iOS 18 بقت بتعمل إعادة تشغيل تلقائي لنفسها بشكل غامض!

في تقرير مسرب من بعض المعامل الجنائية الرقمية في أمريكا، اشتكى المحللين فيها من قيام أجهزة الآيفون اللي من المفترض هتخضع لتحليل جنائي رقمي بسبب ارتباطها بقضايا بإعادة تشغيل نفسها تلقائيا بشكل غريب لأول مرة يحصل!

المحليين خمنوا إن ممكن تكون شركة آبل قدمت تحديث غير معلن في الإصدار رقم 18 من نظام iOS، من خلال أجهزة الآيفون بتتواصل مع بعضها، وخلال التواصل ده لو جهاز اكتشف جهاز تاني شغال وتم فصله عن شبكة الاتصالات لمدة 24 ساعة بيبعتله أمر بإعادة التشغيل.

إيه المشكلة في إعادة التشغيل؟
المشكلة للمحللين إن لو الآيفون شغال في وضع [After First Unlock (AFU)] يعني تم فتح القفل بتاعه مرة على واحدة على الأقل، ده بيسهل عليهم الدخول للموبايل، لكن لو الموبايل فقد الوضع ده بإعادة التشغيل [Before First Unlock (BFU)] بيكون من شبه المستحيل الدخول للموبايل.

الأغرب في القصة دي إن فيه موبايل حصله إعادة تشغيل بالرغم من وجوده داخل Faraday Box، وده صندوق بيعزل المؤثرات الكهرومغناطيسية والخارجية، عشان يمنع أي محاولة للتواصل من الخارج مع الجهاز!!!

بسبب العقوبات والحظر المفروض عليها من الحصول على معظم تقنيات والشرائح الخاصة بالهاردوير؛ شركة هواوي نجحت في تطوير نوع جديد من وسائط التخزين اسمه Magneto-Electric Disk (MED).

كل وسيط تخزين بيكون موجود فيه SSD معاه نظام شرايط خاص بيه وبكرات ومحركات ورؤوس قراءة وكتابة. البيانات اللي بتتكتب على الـ MED بتتخزن أول حاجة على الـ SSD عشان تبقى متاحة بسرعة، وبعد كده بتتنقل بشكل متتابع للشريط الداخلي للتخزين.

حسب الشركة فالنوع ده بيستهلك حوالي 10% من الطاقة اللي بيستهلكها هارد HDD عادي، وبيوفر سرعة نقل بيانات تصل إلى 8 جيجابايت في الثانية.

أول إصدار من الوسيط ده هيكون بحجم 72 تيرابايت.

شركة Alphabet (جوجل) بتواجه أزمة وجودية حاليا بتهدد بتفككها 👨‍⚖️

في قضية بقالها فترة بين وزارة العدل الأمريكية وشركة ألفابت، الشركة الأم لجوجل بسبب ممارسات الشركة الاحتكارية.

تقارير تم نشرها امبارح عن نية وزارة العدل إجبار جوجل على بيع متصفح كروم، متصفح الإنترنت الأكثر استخداما على الإطلاق.

كمان ممكن يتم إجبار جوجل على فصل نظام الأندرويد عن متجر جوجل بلاي ومحرك البحث الخاص بيها، بحيث منتجات جوجل موجودة إجباريا على نظام الأندرويد زي ما هو حاليا.

وزارة العدل عايزة كمان تفرض على جوجل مشاركة بيانات البحث والتكنولوجيا مع الشركات الأخرى لتحسين المنافسة في السوق.

الهدف من الخطوات دي هو تقليل سيطرة جوجل، خصوصا إنها بتستخدم معظم المنتجات المنتجات دي لجمع بيانات عن المستخدمين والاعتماد عليها في خدمات البحث بتاعتها والذكاء الاصطناعي، وده بيخلي المنافسين يلاقوا صعوبة في المنافسة.
ده ممكن يفتح فرص لشركات تانية زي Bing & DuckDuckGO لكن جوجل بترد إن الخطوات دي "متطرفة" وبتقول إنها هتضر المستخدمين والمطورين.

سعر البتكوين يصل إلى 97,000$ ويتخطى الفضة وشركة أرامكو ويصبح سابع أغلى الأصول من حيث القيمة السوقية 💣

شركة Meta أعلنت عن ميزة قادمة لتطبيق واتساب هتسمح للمستخدم بتحويل الرسائل الصوتية لنصوص يقدر يقراها عشان لو في مكان مش هيقدر يسمع فيه كويس أو لو رسالة جاية من واحد مزعج 🙉

الشركة قالت إن عملية تفريغ المحتوى الصوتي هتكون على جهاز المستخدم، بحيث إن واتساب مش هيكون عنده الصلاحية للوصول للرسائل دي 👈👉

الميزة هيبدأ إرسالها للمستخدمين في الأسابيع القادمة، هتكون غير مفعلة بشكل افتراضي، ولازم تفعلها يدويا لو عايز تستخدمها، وحاليا مش بتدعم إلا اللغة الإنجليزية، الروسية، والإسبانية، والبرتغالية والهندية، وهيتم إضافة المزيد من اللغات في الفترة القادمة.

أفضل من شرح مفهوم الكلاود ❤️

البرلمان الاسترالي النهاردة أقر مشروع قانون يحظر استخدام وسائل التواصل الاجتماعي على "الأطفال" تحت سن 16 سنة.

الهدف من القانون هو الحفاظ على الصحة العقلية، وتقليل الآثار الضارة لمواقع التواصل عليهم.

القانون جعل مسئولية تنفيذ القرار ده على مواقع التواصل نفسها، من غير ما يحدد آليات التطبيق. كمان مش هيكون فيه عقوبة على الأطفال اللي بينتهكوا القانون ولا آبائهم، ولكن العقوبة هتكون غرامة مالية ضخمة على مواقع التواصل نفسها.

ناس كتير بتستخدم VPN عشان تخفي الآي بي بتاعها وموقعها الجغرافي، وده استخدام صحيح "إلى حدٍ ما".

تقنية الفي بي إن بتقدر تشفر اتصالك بالإنترنت، لكن في طرق ممكن المواقع تعرف بيها موقعك الجغرافي بدقة حتى وانت مشغل VPN.

المتصفح بتاعك بيخزن عنك معلومات كتير، من ضمن المعلومات دي موقعك الجغرافي والمنطقة الزمنية الموجود فيها (UTC +2 مثلا في مصر) وكمان لغة المتصفح وأمور أخرى.


ممكن أي موقع يعرف المعلومات دي من المتصفح من خلال استخدام بعض الفانكشنز في لغة جافا سكريبت، زي مثلا Intl.DateTimeFormat().resolvedOptions().timeZone واللي بتكشف المنطقة الزمنية اللي انت موجود فيها (Africa/Cairo) على سبيل المثال.

في طرق ممكن تستخدمها لتزييف المعلومات دي أسهلها استخدام إضافة Vytal ودي إضافة مفتوحة المصدر ومتوفرة لمتصفحات كروميوم.. تقدر من تحملها للمتصفح وتخليها تعمل مزامنة للبيانات دي مع عنوان الفي بي إن اللي بتستخدمه، بحيث تخفي معلوماتك الحقيقية وتظهر البيانات دي على المتصفح مطابقة لمعلومات المكان اللي انت متصل بيه عبر الـVPN.