شركة مايكروسوفت رفعت حجم باقة الـVPN المجاني لمتصفح Edge من 1 جيجابايت إلى 5 جيجابايت شهريا.
المتصفح موجود فيه أداة VPN افتراضية من شركة Cloudflare بدون حاجة لإضافات خارجية.
الخدمة حاليا ما زالت غير متاحة في النسخة الأساسية، ولكن تقدر تستخدمها من نسخة Edge Canary.

آبل أصبحت أول شركة عامة تصل لقيمة سوقية 3 تريليون دولار 💰💰
الشركة كانت وصلت لنفس الرقم في يناير 2022 لكن فشلت في الإغلاق على نفس المستوى.
السهم تجاوز بالأمس السعر المطلوب للوصول لقيمة سوقية 3 ترليون دولار بعد ما تجاوز 190.73$ ونجح في الإغلاق على سعر أعلى.
سهم آبل حقق ربح +49% منذ بداية العام.

امبارح شركة تويتر بدأت تخفي محتوى الموقع عن أي شخص مش مسجل دخول.. بمعنى إنك مش هتقدر تشوف محتوى الموقع إلا لو عندك حساب..
النهاردة ظهرت مشاكل جديدة في الموقع والمحتوى مش بيظهر للمستخدمين وبيتم عرض رسالة إن تم الوصول "للحد اليومي"..
إيلون ماسك بعدها نشر عن قيود جديدة لمشاهدة المحتوى على الموقع:
الحسابات الجديدة الغير موثقة 300 منشور في اليوم
الحسابات الغير موثقة 600 منشور في اليوم
الحسابات الموثقة 6000 منشور في اليوم
بعد كدة قال إن الحدود دي هيتم زيادتها لـ 400 - 800 - 8000 على الترتيب.
ماسك بيلوم على شركات الذكاء الاصطناعي اللي بتعمل زحف برمجي على الموقع لاستخراج محتوى منه "Data Scraping" لتدريب النماذج بتاعتهم.
➖➖➖➖➖➖➖➖➖➖➖➖➖➖
مواقع التواصل بتستخدم ميزة التمرير اللا نهائي، وبتصرف ملايين لتحسين خوارزميات المحتوى بتاعتهم عشان المستخدم يفضل في الموقع لأطول فترة ممكنة.. والمعتوه ده عايز يطفش المستخدمين منه 🙂

هسمحلك تشوف 300 بوست في اليوم
400
500
هو بينقط في فرح ولا إيه؟

الحكم على شخص بالسجن 6 سنوات بعد ما سرق 23 مليون دولار من يوتيوب.
الشخص استغل ضعف الرقابة في نظام حقوق الملكية على الموقع، وقدم مطالبات مزيفة بإنه صاحب حقوق ملكية أغاني وألحان على اليوتيوب، بالرغم من إنها بتكون متاحة على المشاع أو لم يتم تفعيل الربح عليها.
في حالة الفوز بحقوق ملكية فيديو بيتم بشكل تلقائي إرسال أرباح جميع نسخ الفيديو الموجودة على اليوتيوب للشخص اللي فاز في المنازعة.
على مدار 5 سنوات نجح الشخص ده في تأسيس شركة MediaMuv وتوظيف 8 أشخاص لمساعدته على الفوز بحقوق ملكية 50 ألف أغنية بالتحايل على يوتيوب، وربح 23 مليون دولار.
في النهاية تم اكتشاف احتياله من دائرة الإيرادات الداخلية IRS وتوجيه تهم ليه منها التآمر والاحتيال الإلكتروني وغسيل الأموال، وتم الحكم عليه بالسجن 6 سنوات.

وظيفة المبرمجين البشر هتنتهي خلال 5 سنوات 👀
عماد مستاك المدير التنفيذي لشركة Stability AI (الشركة المسئولة عن Stable Diffusion أكبر نموذج ذكاء اصطناعي مفتوح المصدر لإنشاء المحتوى المرئي) قال في مقابلة إنه بيتوقع انتهاء عصر المبرمجين البشر خلال 5 سنوات.
عماد استشهد بموقع بمستودع البرمجيات الشير Github وقال إن نسبة 41% من الأكواد الموجودة عليه حاليا هي من إنتاج أدوات الذكاء الاصطناعي.
➖➖➖➖➖➖➖➖➖➖➖➖
رأي شخصي: تصريح مبالغ فيه.

إيه ضه 😂😂😂😂😂😂😂😂

في تحديث غريب لسياسة الخصوصية بتاعتها، شركت جوجل قررت تمنح نفسها الحق لجمع أي معلومات متوفرة على الإنترنت واستخدامها لتدريب أدوات الذكاء الاصطناعي؟
الشركة قالت إنها "تحتفظ بالحق في جمع كل ما تنشره عبر الإنترنت لبناء أدوات الذكاء الاصطناعي الخاصة بها"!؟
جوجل لم تحدد منتجاتها فقط، ولكن الكلام كان على الويب المفتوح بالكامل!!
هل ده قانوني أصلا؟
كون إنك بتنشر حاجة على الويب، ده مش معناه إنك منحت الحق لاستخدام الحاجة دي، خصوصا لو لغرض تجاري، وبالأخص لو نشرتها على شيء غير مملوك للشركة.
نفس القصة دي حاليا مرفوع على مايكروسوفت قضية بسببها، لأنها دربت أداة Copilot على أكواد المبرمجين مفتوحة المصدر، بدون إذن ولا رخصة من أصحابها.
الـ AI خلى الشركات تتجنن، وشره جمع البيانات هيتحول لمستوى مخيف!

أول علاج لإعادة نمو الأسنان في العالم يتجه نحو التجارب السريرية في اليابان 🦷🦷🦷
من المعروف إن الإنسان بيكون عنده مرحلتين لنمو الأسنان، وهي الأسنان اللبنية واللي بتتساقط بعد كدة عشان يحل مكانها الأسنان الدائمة.
فقدان الأسنان الدائمة لا يمكن تعويضه، وبيتم اللجوء لحلول زي التركيبات أو زراعة أسنان صناعية، لكن من فترة وفريق بحثي ياباني بيشتغل على محاولة لإيجاد طريقة لمرحلة ثالثة من نمو الأسنان.
بسبب اضطراب وراثي نادر معروف باسم Anodontia بعض الأشخاص بيعانوا من غياب خلقي لبعض أو جميع الأسنان الدائمة. الفريق البحثي اكتشفوا إن فيه جين معين في الفئران غيابه بيسمح بنمو لعدد أسنان أكثر، وإن الجين ده بينتج بروتين اسمه USAG-1 وإن منع عمل البروتين ده هيسمح بنمو مزيد من الأسنان.
الفريق الياباني نجح في تطوير مضاد بيمنع عمل البروتين، وتجاربهم عام 2021 على فئران بعدد أسنان منخفضة نجحت في توليد أسنان جديدة باستخدام المضاد بعدد وصل لسبع أسنان.
من وقتها بدأ الفريق يطور مضاد مناسب للاستخدام البشري، والتجارب السريرية هتبدأ من العام القادم إن شاء الله.

تطبيق Threads نجح في الوصول لـ10 مليون مستخدم بعد 7 ساعات فقط من إطلاقه 📈
شركة Meta النهاردة أطلقت تطبيق Threads المنافس لتويتر، ودي معلومات سريعة عن التطبيق:
▪️ التطبيق متاح لجميع دول العالم ما عدا أوروبا
▪️ مفيش وسيلة لتعديل المحتوى بعد نشره
▪️ مفيش وسيلة متاحة لمعرفة الحسابات اللي بتابعها
▪️ مفيش نسخة ويب من الموقع، فقط تطبيق للأندرويد وiOS
▪️ مفيش وسيلة لعرض محتوى من الحسابات اللي بتتابعها فقط
▪️ مفيش وسوم (هاشتاج) ومفيش وسيلة لتبديل الحسابات داخل التطبيق
▪️ لو ربطت حساب Threads بحساب انستجرام، مفيش وسيلة لحذف حسابك إلا بحذف حسابك على انستجرام (حركة صايعة لزيادة عدد المشتركين بشكل مستمر).

مارك مستخدمش حسابه على تويتر من 2012
امبارح بس نشر الصورة دي بعد الإعلان عن إطلاق تطبيق Threads المنافس لتويتر..
كلاحة مفيش بعدها كلاحة

موقع Criminal IP من المواقع اللي لازم تكون عارفها وبتستخدمها 👌
▪️ تقدر من خلاله تعمل فحص للآيبي وتعرف كل المعلومات عنه.
▪️ تقدر تستخدمه للبحث عن ثغرات في المواقع (مفيد في الـBug Hunting).
▪️ تقدر تستخدمه لفحص آيبيهات أجهزة المنزل الذكية للتحقق من وجود ثغرات.
▪️ بيعرض نوع الآي بي والشركة التابعة ليها والموقع الجغرافي على خرائط جوجل.
▪️ بيدعم فحص الروابط بالذكاء الاصطناعي واكتشاف مواقع التصيد والاحتيال.
▪️ بيوفر إضافة للمتصفح لفحص الروابط مباشرة قبل الدخول إليها.
▪️ تقدر تستخدمه بشكل مجاني وبيدعم اللغة العربية
ده مقال مراجعة للموقع وكيفية استخدامه بالتفصيل 👇
https://bit.ly/3NFCy9c

أحدث نماذج توليد الصور من تطوير شركة Stable Diffusion اتسرب من ساعات 👀
نموذج XL v0.9 هو أقرب نموذج مجاني لتوليد الصور بنفس جودة Midjourney V5.2.
الواجهة الوحيدة اللي بتشغله بدون مشاكل حاليا هي واجهة ComfyUI.

بعد 24 ساعة من إطلاقه نجح تطبيق Threads في جمع +30 مليون مشترك نشروا +95 مليون بوست 🚀
على جانب آخر إيلون ماسك بعت خطاب بيهدد شركة Meta بمقاضاتها بسبب "خطفها" موظفي تويتر (اللي إيلون نفسه طردهم أول ما اشترى تويتر)، وسرقة الأسرار التجارية والملكية الفكرية بشكل غير قانوني 🙂

مشتري حبوب اتواصل مع فلاح كندي لشراء كتان بسعر 17 دولار للبوشل (معيار قياس)..
المشتري بعت رسالة بالطلب وبعت صورة لعقد شراء وطلب التأكيد من الفلاح الكندي..
الفلاح الكندي رد على الرسالة بالإيموجي ده 👍
يوم التسليم الفلاح مبعتش حاجة للمشتري، وسعر الكتان زاد..
المشتري رفع قضية على الفلاح اللي قال إن الإيموجي ده 👍 معناه إنه استلم الرسالة مش الموافقة..
القاضي رفض وقال إن الإيموجي ده 👍 يفي بمتطلبات توقيع العقد..
الفلاح اتحكم عليه بدفع 82 ألف دولار بسبب خرق العقد وعدم تسليم الكتان.
اتعلم استخدام الإيموجيز ومتبقاش زي صديقنا الفلاح 👍

الحكومة الفرنسية مررت مشروع قانون هيسمح للشرطة باختراق المواطنين المشتبه فيهم إلكترونيا وتفعيل الكاميرا والميكروفون للتجسس عليهم وعمل تسجيلات صوت وصورة ليهم، وتفعيل الجي بي إس للتجسس على موقعهم الجغرافي!
ويقولك حرية وديموقراطية وبتاع..
الحمد لله على نعمة مصر 😌

قطاع الحوسبة الكمومية في شركة جوجل نشر بحث عن آخر تطورات الحاسوب الكمومي للشركة، وقالوا إنه وصل لقدرة عمل عمليات حسابية (بشكل فوري) بتستغرق 47 سنة لحسابها على أقوى حاسوب فائق موجود حاليا وهو حاسوب Frontier الأمريكي.
الباحثين ذكروا كذلك إن الحاسوب الحالي قدرته 70 بت كمومي (qubit)، وده بيجعله أقوى 241 مليون مرة من الإصدار السابق اللي كانت قوته 53 qubit 😯
تطور الحواسيب الكمومية يعتبر خطر مباشر على خوارزميات التشفير المستخدمة حاليا، بغض النظر عن مدى قوتها، لأن كسرها هيكون أسهل مع استمرار تطور الحواسيب الكمومية 🚨

تطبيق Threads تجاوز 100 مليون مستخدم بعد 5 أيام فقط من إطلاقه 📈
شات جي بي تي استغرق شهرين للوصول لـ100 مليون مستخدم، فلو تجاهلنا سهولة التسجيل باستخدام حساب انستجرام مباشرة؛ يصبح Threads أسرع منتج يصل لرقم 100 مليون مستخدم 🥇

عروض أمازون برايم بدأت 🛍
▪️ لو عندك حاجة حابب تشتريها من أمازون فده أفضل وقت مناسب للشراء.
في منتجات عليها عروض حقيقية، وفي منتجات بتتباع بنفس سعرها السابق أو أعلى وعاملين عليها خصم وهمي.. فلازم تكون عارف سعر السلعة خلال الفترة اللي فاتت.
▪️ كعادة المواقع المصرية فيه مشاكل في الاشتراك في العروض وتفعيل الخصم على المنتجات، اللي هو المفروض من الكوبون ده MC200.
▪️ ممكن تستفيد بخصم (200 جنيه) بدون الكوبون لما تدخل لصفحة المنتج وتضغط على "استبدال" وبعد كدة تضغط على "اشتر الآن".. يفضل تضغط بعدها على " إضافة بطاقة ائتمان" عشان تتنقل لصفحة الدفع وتتأكد إن الخصم اتفعل.
▪️ حاول تشتري كل حاجة محتاجها في طلب واحد.
▪️ طبعا لازم تكون مشترك في خدمة برايم للاستفادة من العروض (شهر مجاني بعد كدة 29ج شهريا اشتراك).
▪️ موقع أمازون العالمي متاح عليه عروض ممتازة.. لو حابب تشتري حاجة مش موجودة هنا وتقدر تدفع بالجنيه. (خلي بالك عشان معظم البنوك بتخصم عمولة بتوصل لـ10%).
▪️ بلاش تشتري حاجة انت مش محتاجها لمجرد إن عليها خصم.

بعد 30 سنة من التطوير؛ حصة نظام لينكس من أنظمة تشغيل الحواسيب المكتبية تجاوزت 3% للمرة الأولى 🙂
لينكس كنظام تشغيل للكمبيوتر من أكتر الحاجات اللي مش واخدة حقها في المجال..