Нәўбеттеги көшпели семинар Нөкис районында шөлкемлестирилди

Әдеттегидей Өзбекстан мусылманлары басқармасы тәрепинен имам-хатиблер жумысларын нәтийжели шөлкемлестириў, мәҳәллелерди үйрениў, халық пенен тығыз байланыста болыў бойынша турақлы түрде өткерилип келинген көшпели семинар бүгин дин ислери бойынша комитет пенен биргеликте Қарақалпақстан мусылманлары қазыяты қазысы Бахрамаддин Разов басшылығында Нөкис районында шөлкемлестирилди. Онда Нөкис районындағы 3 мешит ҳәм 13 мәҳәллеси үйренилди. Имам-хатиблер мәкан пуқаралары жыйыны баслықлары, ҳажылар менен бирге 100 шаңараққа кирип, олардың ҳал-жағдайларынан хабар алды, жасаў шараятлары менен жақыннан танысты. Имам-хатиблер 10 категорияға тийисли 100 шаңараққа руўхый-ағартыўшылық, үгит-нәсият ҳәм әмелий жәрдем илажларын алып барды.
Атап айтсақ, ажырым жағасына келип қалған, жәнжелли 5 шаңарақ үйренилип, оларға «Шаңарақтың мүқәддеслиги, Перзент тәғрбиясы» мазмунында нәсиятлар берилди. Тынышсызлық себеплерин сапластырыў, аразласқанларды жарастырыў илажлары көрилди;
- 57 кем тәмийинленген шаңараққа қәўендерлер көмеги менен азық-аўқат өнимлеринен материаллық жәрдемлер көрсетилди. Олардың арасынан жәрдемге мүтәж шаңарақларға материаллық жақтан турақлы жәрдемлер бериў ислери режелестирилди.
- ишкиликке берилген 2 пуқарадан хабар алынып, бул иллеттиң динимизде қатты қараланыўы, барлық жаманлықлардың себепшиси екенлиги түсиндирилип, саламат турмыс тәризине қайтыў бойынша усыныслар берилди.
- нәгиран ҳәм наўқас пуқаралар жасайтуғын 35 шаңарақларға кирип, олардан кеўил соралды, емлениў ҳәм дәри-дәрмақ ушын материаллық жәрдемлер көрсетиў режелестирилди.
- Сапар даўамында өмир тәжрийбесине ийе, көпти көрген, жасы үлкен, нураныйлар ҳалынан хабар алынып, елимиздиң тынышлығы, халқымыздың абаданлығын тилеп дуўалары алынды.
Имам-хатиблер өзлерине бириктирилген мешитлерде песин намазын оқып, жыйналған қәўимге, «Тынышлық бахты, шүкиршилик, илим алыў пазийлети, жат идеялар тәсиринен сақланыў, миссионерлик ҳәрекетлериниң унамсыз ақыбетлери» сыяқлы әҳмийетли темаларда баянатлар жасады.
Илаж соңында әмелге асырылған жумыслар талқыланып, Нөкис районындағы мешитлердиң жумысларын еле де раўажландырыў ушын көрсетпе ҳәм усыныслар берилди.

Қарақалпақстан мусылманлары қазыяты.

Бизди социаллық тармақларда бақлап барың!

🥺Телеграм| 🤪Facebook| 🛍Instagram| 😍Youtube

🧐 Интернет сайтымыз: paziylet.uz