،،،

موضوع إنك تنوم بدري وتصحى بدري دا فعلا موضوع ظابط وجميل في حالة إنك عندك حياة تعيشها، لكن إنسان ما عندك أي موضوع ولا حياة الصاحي ليها بدري شنو ..؟؟

« فاقدُ الشعورِ يُعطيه ،كأنه يخشى
أن يزيد أمثاله في هذا العالم. »💙



" الجملة دي صادفتني مرة، وحسيتها لمستني شديييد..
حسيت وقتها زي الزول لم ياخد ليو خبطة في دماغوا فجأة، ولقيت روحي برجع اتزكر اول مرة لم قررت اعمل قناة ف التلقرام تكون ك مدوّنة شخصية أكتب فيها احاسيسي واعبر فيها عن الحاجات ال كنت دايماً بترجمها بالكتابة من انا صغيرة ، زماان كان عندي دفتر كبير كدا مميز شدييد، وللان أنا ومحتفظة بيهو طبعاً، انتو عارفين انو لدرجة أني مدياهو إسم😂!! ايوة عدييل كده انا مسمياهو( كريم)، لانو دايما كان كريم معاي، كريم لانو دايما كان مستعد يسمعني، ويشيل خوفي ووجعي بين صفحاتو💙 بس دايماً كان نفسي (كريم) ده يكون بنيادم على أرض الواقع..

كنت كلما بضايق وبزعل بجري عليهو، كان زي" الملاذ "، كنت وحيدة بالجد. أنا بعد فترة طويلة شديد يداب فهمت مفهوم الأصحاب ده،
كنت بكتب فيهو الخواطر بتواريخها وأيامها، م فكرت في يوم أتخلص منو، و متأكدة انو ماف زول عارف عنو شي او عن مكانوا اللي مخبياهو فيهو.

أنا كُنت مترددة ومتخوّفة في البداية من فكرة أني أشارك مشاعري مع غيري، انا عمري م كنت بعرف اشكي أو احكي عن نفسي كتير، دايما زعلي كنت بخبيهو، و بتصنع القوة والقسوة بس عشان ضعفي م يظهر لزول، احساس الشفقة عمري ماحبيتو، يمكن لأني اصلا م اتعودت عليهو.

بس لم بقى الحلم واقع، وبقيت "صانعة محتوى " وبديت مشروع الكتابة بالجد وبقى عندي قناة و متابعين ، وأول اسم كان خطر في بالي للقناة حقتي هو (فضفضة)، لانو دي اكتر حاجة كنت محتاجاها بالجد، بس بعداك حسيت انو الفكرة بقت تقيلة..!
حسيت أنو منطقي جداً رفضي لفكرة طرح بوستات كئيبة تحكي عن حالي، لا حتقدم لي شي ولا حتنقص شي، بس كانت حتفرق مع" المتابع " و "القارئ " م كان ح يهون علي أني أكون سبب في أنو كلامي يأثر في انسان بدأ يتجاوز في حاجة كانت صعبة عليهو، وفجأة بسبب بوست _اتكتَب من غير وعي_ يرجع خمسين خطوة ورا..
م كنت حابة أضيف زعل على زعل زول، ولا تكون لي يد في شعور سيء يُخالج "قارئي" في لحظة.


لأنو انا كنت إنسانة فاقدة للاهتمام، للصُحبة وجبر الخاطر وحاجات كتيرة، لقيت أني عندي قدرة أقدم اي حاجة كنت فاقداها بزيادة، وبكل رضا كمان.
حقيقي عمري م بتمنى زول يمر ب تجاربي، ب الناس ال مريت بيهم، بالعلاقات الفاشلة، بأشباه الأصحاب، بالتنمر، الإحباط، الخذلان وعدم التقدير.

ودايماً، دام أني قادرة أقدم كلمة حلوة تجبر بالخاطر، وأقدم مساعدة واهتمام ح أفضل أقدم وأمنح بسخاء، وأنا عارفة الحاجات دي كلها بتزيد لي رصيدي.



وفعلاً المقولة دي كمان بتمثلني 100% :
« كُل نورٍ تتركه داخل أحدهم يُضيئُك. »✨


فابس يعني..
صح أنو لكل زول حريتو الشخصية، وكل صاحب قناة ليهو الحق ف أنو يحدد شكل قناتو ومحتاواهو، انت ك " متابع " مهما حياتك كانت كعبة و مهما كانت الأحزان المحاوطاك، حاول تفتش عن محتوى كويس يكون ليك مُعين عشان تتخلص من سلبياتك ، فتش عن أي حاجة ممكن تديك أمل وطاقة ..

احشر نفسك بين المتفائلين والإيجابيبن، وغذي روحك بنفسك، وفقدك ل حاجة معينة أو شعور معين، دا سبب كافي يخليك " انسان مُعطاء "، وتطبق نظرية :
« فاقد الشئ يعطي بكثرة. »💙

أبقو عافية بالله :)


#سلام_لقلبك.
#تنزيل_صابر.