#عيد_الغدير
.
.



فضـيلـةٌ للمـرتضـىٰ علـي
بصوتِ خيرُ الخلقِ تعتلي

مَن كُنتُ مولاه فهذا علي مولاه


***

محتار حيدر يا فضيله احچيهه
ويا خِصله ما فضّلّك ربك بيهه
المتصدق انته وانته المحچّي السيف
وانته العلىٰ الكوثر غداً ساقيهه


وليسَ لي في الوقتِ مُتَسَع
لقـُلتُ كيـفَ خـيـبـر انقـلـع

وكَفُكَ كيف للقوم ِ جسراً سوّاه


***


خيمه انته لل بالدنيه زايد ضيمه
يابو اللي ما ظلّتله بالطف خيمه
ابچفك يَعّلّي المصطفى يا كرار
لحد يا علي ما باست ايده الغيمه


كَفُكَ لليومِ فلا نزل
دينُ الإلهِ بسمك اكتمل

حُبُكَ معناهُ  ياسيدي  حُبُ الله


***


چفك يچف الدين ياهو ايوصفه
الفقره واصنام الكعبه بس اتعرفه
وبفراش طه منو اليگدر وينام
جيب الشجاع الـ اله اعيون وتغفه


عن كُلِ تعريف ٍ لك َ غني
قد نِمتَ نوماً يا علي هَني


قد كنت يا حيدر بهذا ولياً لله


***


عالي المقام وما وصلنه لفهمك
باب المدينه الكل تطب من علمك
ومادام هوه النبي اموصفك قرآن
لازم نگول البسمله ونحچي اسمك


قالَ النبي علي خيرُ بشر
مَن شكَ مِنكُم فيهِ قد كَفر


يوم المؤاخاةِ  اخٌ لي  إلهي آخاه



***


اول بشر منطي الشمس من نورك
والقبله والقرآن من جمهورك
ودستورك ولو انسأل عنه بيوم
زينب گلت مختصره كل دستورك


نهجُ علي اختارَ لهُ وَطن
ما شِئتَ قُل حُسين أو حَسن


نهجُ علي شهدٌ  لقلبي وحلّاهُ إبناه


***

سعد هادي الشمري

ابوذيات الغدير

***


علي وگلبـي بمحـبتـك
كم مليته
علي وبُـهـرج الدنـيـــه
كم مليته
علي والـديــن بسـمـك
كمليته
علي وعشگك عشگ الله ونبيه


*


ابصِله لاسمك شكو زينات
تمت
علي وحبك بوجـه الدهــر
تم موت
النعـمـه الگالـهــه القُــــرآن
تمت
علي بولايتك يابـو الحميـه

*


سعد هادي الشمري

حگهه العيون بدمعتي اتفيض
غايب ضوه شيباتك البيض

يا أبا عبدالله

///

لاگيت بالطف كل الرماح
بلكي اشم عطرك بيهه وارتاح
ما طلع صوتي اشكد هضم لاح
صارن مدامع كل الصياح

يا أبا عبدالله

///

خويه وجمالك وينه شو ضاع
اعيونك وموش اجروحك اوساع
حطيت چفي بچفك اوداع
شو منهه ظل اصبع على الگاع

يا أبا عبدالله

///

والصار باختك والله ما صار
من شفت راسك بالرمح دار
من النار شردت خويه الزغار
ظهريه سوده والشمس نار

يا أبا عبدالله

///

كل الرمل نحرك امدميه
هلگد تعافه الخنجر شبيه
حتى السِلم من جسمك ادريه
الما لاحه سيف الشمس تچويه

يا أبا عبدالله

///

هيه الخيام اشبيهه خطيح
لو فاگده لو ثكله واتصيح
برماحها (انحور المذابيح)
تهتز شجر متوسط الريح


يا أبا عبدالله

///

ولو تدري وجهك عنهه من غاب
اشوده برقيه افراگه واشجاب
خويه الشَعَر لازگ عالحجاب
جرح التراچي لهسه ما طاب

يا أبا عبدالله

///

الله ُ اكبر وين الاسلام
يغفه بمنيه الرايد ينام
السهم اشلِگه بالما كِمَل عام
صوت الدللو هد الخيام


يا أبا عبدالله

///

سعد هادي الشمري

@saadhadi83

#شهادة_الامام_الباقر_ع

قصيدة للإمام محمد الباقر عليه السلام

.....



سجلني شاهد يا دهر
واحچيلك اشسوّه النهر

ليل الذبح عشناه هضيمه
وصارت عبات الحره خيمه

من ليلنه انباگ الگمر

***


يا دهري انه ابن الوفه  السمّاني جدي الباقر
عمري اربع اسنين ولچن شيّبني يوم العاشر
خليني اسولف عالجره وبالطف اگول اشصاير
بعيني شفت عالتل رِكض جدم العقيله وعاثر


عُمر الطفوله ما عشت
وي صعدت الناگه متت

الطف دوريته بدمعة العين
من اولاد مسلم ضاعوا اثنين

الهُم بعد ما ظل اثر


***


سجلني شاهد يا دهر  واقره ابدموع الشاهد
انذبحت براءة گلبي من مچتوف شفت الوالد
ايمد رِدنه عالروس ابّچي ايسويلهن ظِل رايد
ولو أذّن اذان بسبي عالناگه اصد ليه ساجد


وعمتي رقيه اعله الهزل
امن انظرهه مچتوفه انكتل

ومن اسمع الكافل تندبه
بدموعي ارسم الهه جربه

مذبوحه بسهام القدر


***


يا دهري واحچيلك هضم ليلة الوحشه بزينب
شما يبتعد عنهه الگمر سوط الشمر يتگرّب
يم الفرات اتعاتبه گعدت ومدمع تشرب
التل شافهه تحني الظهر فوك الگمر واتحدَب


واتگله يا راعي العلم
بزينب دِفه جمر الخيم

زينب تحاچي الجربه بهداي
تطفه بشنو المحترگه بالماي

من جربته رادت خبر


***


يادهري واچفوفي اشكثر لاعبن شيب احسيني
يادهري ليش امشي بسبي وغافي الحبل بيديني
والناس من بعد الذبح جابت ادموع لعيني
خامس امام اسمي شعجب شو خارجي اتسميني


هذا انه شاهد عالجره
من خيّم جدي لمنحره

بالنار بينه اخيولهه اتطوف
المبيوگ ماي اعيونه شيشوف

متزاحمه بعيني الصور


***


مأساتي عاشر كربله واحچي بدمع مأساتي
وقرآني هذا المنذبح  واعله الهزل آياتي
رسمت عبادات السبي كل دمعه من دمعاتي
وللشام لاء لكل ظُلم  كتبت رفض خطواتي


لعبدالله عمي عشت الم
وما فارگ اعيوني السهم

و وي دمعة امي لخالي جسّام
كل ليله دمعه بناظري اتنام

والحزن للأكبر كُبَر


***

سعد هادي الشمري

@saadhadi83

#السلام_على_حميده_وابيها_مسلم_بن_عقيل
#حميده_بنت_مسلم
#بنت_سفير_الحسين_ع
..
..



مدمعهه ايتجاره بضعون الغياره
والمذبوح ابوهه يا قصر الاماره

هاي اول يتميمه وتنادي الظليمه



//


الچانت سنام العرب صارت بيد الانذال
ودم ثاني بالتاريخ بيهه انسفك للآل
بمسجدهه امس مطبور هامه حيدر انشال
و اليوم بقصرهه مسلم اتوسد بالاجال


الكوفه العَلَويه صارت أُمويه
تتباهه بحقدهه للعتره الزكيه

حكم الذل تقيمه


//


إقدِم ،، والـ إقدِم كُتب بيعه صفت لحسين
الوصفوه بماي العين صارو للحُكُم عين
برگابهم دين لعبيدالله وابذل وفوا الدين
وخانوا سفير حسين مسلم ساعة البين


اعداء الديانه خانوا كل امانه
ومنزل طوعه شاهد لاحداث الخيانه

يا عُظُم الجريمه


//


ما وصل ضعن حسين بعده وريح الاخطار
من كل كتر وياه تمشي مشية النار
ليش اعله ناگة بنت مسلم كل الانظار
صاحت حميده اسم الله گولوا بمسلم اشصار


بخد حسين شافت دمعة بحرگه سالت
ومثل الدمعه للگاع من الناگه طاحت

حست بالهضيمه


///


بنظرات الحسين انقرت آهات الاسلام
وظم بنت اخوه مسلم لگلبه وبالحزن هام
سألته نظراتك احچيلي بيهن اشضام
يا عمي ليش ابراسي تمسح مسح الايتام


يا هيبة حياتي ويا وِردي بصلاتي
مسلم ذكرى الافراح اشصار بذكرياتي ؟

بنته وبيه عليمه


///


اول دمع عالنوگ مدمعهه تسجّل
وخد الصحاري بحزن بت مسلم تبلل
التبچي لابوهه الدمع يكثر وابد ما قل
ويا دمع يكفي والسبط يقراله مقتل


حسين ايضمهه بيده والمدمع تزيده
اتخضَّب بيهه شيبه يا دمعة حميده

تلهب ، چنهه خيمه


//

سعد هادي الشمري

@saadhadi83

#عيد_الغدير
#ابوذيات
.
.

اعذره العقل لو هالشوگ
بي يَن
علي وهامت بحبك انس
بيَن 
من گـد مـا بچفـك رُفَــع 
بيّن

بياض ابطه النبي ورادك وصيّه


****


النَعَــم بس العَـلي تنگــال
مو لاه
و إله وصّه النبي وحاشاه
مو لاه
الچنت مـولاه گال اليــوم
مولاه

علي وتمت النعمه بهالقضيه


***

سعد هادي الشمري

@saadhadi83

قصيدة افراح الغدير

اداء الطيب اثير النجادي
كلمات سعد هادي الشمري
.
.


https://youtu.be/maw4Izpr2tw

#عيد_الغدير

قصيدة علي مولى 🏳
الرادود البحراني بهاء الساعي
الشاعر سعد هادي الشمري
.

https://youtu.be/ufIRbPjw9Uk

#عيد_الغدير

قصيدة / ولي ونعم الولي
الرادود / ابو محمد الموالي
الشاعر / سعد هادي الشمري
.

https://youtu.be/PTcjXlusOQg

#عيد_الغدير
ملا عمار السماوي
كلمات سعد هادي الشمري

إن شاء الله عند حِسن ظن جميع خدّام آل محمد "ع"

#عيد_الغدير
.
ذكرياتي
اداء الرادود حسام الموسوي
كلمات سعد هادي الشمري
.

https://youtu.be/QVQ5mIcErEo

#عيد_الغدير

#من_جنة_الله_في_ارضه_كربلاء
#بين_الحرمين ..

الرادود الموفق / مرتضى العطواني
كلمات / سعد هادي الشمري

السلام عليك يا سيد الشهداء
السلام عليك يا ابا عبد الله الحسين

#السلام_على_فاطمه_العليله
.
.

كل ما جفن نام    تاخذني الاحلام
ولكربله انروح     وادخل للخيام


***


انه يا ليل العليله  العشت الجروح
شما يمر النوم اعيش ابحلم مذبوح
ويه النجم والنسمه طيف اتسافر الروح
روحي للعافوني وحدي امتيمه اتروح


واشتَّم التراب           بخيام الاحباب
وروحي ويه الدموع   تتزايد آلام


***


يم مهد عبدالله اگعد وانه اخته
اشفه من كل مرض من اسمعهه هزته
ولا يفز عطشان كل ليلي سهرته
ما اريد انظر على اجفونه دمعته


وابروحي اباريه     وبالضحكه اناغيه
ابقه انه الوليه       نام الطفل نام


***


غافيه ارقيه وشفت مبتسمه چنهه
على وجه احسين اظنّه انسد جفنهه
و يم وسادتهه بقيت اقترب منهه
افتح الترچيه خاف اتحز اذنهه


وبهدوة الليل      من تصهل الخيل
اتفز روحي واتروح  يم صدر الايمام



***


من اكول الخيم ليش النار تلهب
وشما صحت يا گمر هاشم تبچي زينب
ليش يمهه الماي بس ما ترضه تشرب
ومثل تَل اليم خيمهه الظهر حدّب


ولو گلت يحسين     اتصير الخيم عين
والفاتحه الريح        تقره اعله الاسلام


***


الطيف اسأله امن امشي لجروحي البعيده
ليش ليليه الدموع ابخد حميده
وليش زين العابدين انجرح جِيده
سكينه مو حنه بديهه وشو وحيده


و رمله تون ليش       و وسط الخيم جيش
يمهه الحسن جاي     شصار اعله جسام


***

سعد هادي الشمري

@saadhadi83

#كل_عين_باكية_يوم_القيامة_
#إلا_عين_بكت_على_مصاب_الحسين

.
.

على امصاب اغفن ويندهچن امصاب
اشيسكّـتچـن وطاري حسين ينجــاب

**

هــا يعيـون ذوبــن نــار واشمـوع
وغيــر حـسين لتفتحـلّي موضوع
اذا مـا يطمـع النـورس بالــدمــوع

ادگ عالشـوف الچَـن لـون الغراب

**

اريد بدمعـي عالخـد ما يظـل راي
مثـل ركضـة ارقيـة موش بهــداي
اتراب وماي اصلچن وابچن الماي

اريدن عالحسيــن اتردن اتــراب

**

أحِــب كلماتچـن موقـف وعنـــــوان
حچيچن صدگ، معليچن بالـ اللسان
گالـوا ماكــو نـــــار بغيــر دخــــــان

وانه التَــل الشِـعَــل بالگـلب عطّاب


**

الفَله ابوجناتي ويطش دمعي ياريت
يـبـيــوت الدمــع زينــب ابلا بيــــت
انه شما صـــار اذان واله اتـوضيــت

نِـحِــت للي جمـر خيمتـهه محـراب


**

ما خـلّـص الطـف لليـوم، مـن قام
وبدمعچــن خَـل يِـرد لرمله جسام
بيچن لسـّـه ماي وضاميه اخيام؟!

ابدمعچن تطفه كل خيمات ابو تراب

**

عـاشــــــــور النـوايب ما تـرك حيـــل
من اذان الظُـهُــر بيه ابتــده الليــــــل
الحرم بالخيم بس اتشوف اجت خيل

تِـســـد اعيونـــهه لن ما يصــــح باب

**

كــــل ايــامچــن خـلّـنــــهـه للآل
الحزن مو موسم، اعله العُمُر تفصال
اريــدن عالهــلال اتطلعــن اهـــلال

ومحــرم من تهلّن يبــدي لو غــاب

**

سعد هادي الشمري
@saadhadi83

#السلام_على_زينب_الحوراء
#سيدة_العفة_وجبل_الصبر
.
.

الغُـفـه بالنظـر سـهمـه شلـون  ..
يمعون
النظر ، واجروحه بس الموت  ..
يمعون
مشـيـت وصـوت مـن النـهــر  ..
يم عون

صاح العذر  عَ الما صح بديه

.
.

سعد هادي الشمري
@saadhadi83

#السلام_على_علي_الاكبر
.
.
.
صـوت الجـرح كبّـر
خَـل ينــزل الكـوثـر
هالليله عطشان انذبَح
بالطـف علي الأكبـر

***

تتعالى صرخات الجرح
ليلة علي ليلة ذبح
ليش العذب صاير ملح .. وامجرّح اشفافه

والبِسمه متمدد نهر
ليش الضمه بگلبه كُبر
قرآن شاف اعله النحر .. والخنجر اتعافه


الچان الذِكر ذاته
ذبحوهن آياته
نحر ابن الحسين انفتح
والتَم جرح خيبر


***


ليلة علي وحّدهه طف
جرحه اول اجروح الشرف
واول نحر للحق نزف .. واول ضوه يسافر

ومن بده المنحر يرتفع
فوگ الرمح ناح الشرع
ومو ماي "زمزم" طگ دمع .. للبچّه ابن هاجر


البلخيّم تدعيله
غرگت دمع ليله
ردلهه منحور الفرح
والمنحر اتطبّر


***


مكسور گلب ابن النبي
ولون السمه بلون العبي
انفتح باب اعله السبي .. من گطعوا جثته

ويا موقف احسين الصعُب
لخيمة علي ايصد، ما يطـُب
ايحط ايده وين اعله الکلب .. لو فوگ خاصرته


واتعنه اله بدمعه
ايشم بي وايودعه
وابطوله مَد طوله، وجِرَح
گلب النبي وحيدر


***


مخنوگه نسمات الهوه
الليله مذبوح الضوه
الاكبر بالسيوف ارتوه .. واعله الفله اتوزع

متغيّره اوصاف السمه
ابلا غيم بس امغيّمه
حتى الشمس من فاطمه .. مستحيه ما تطلع


وما ضوّت اي نجمه
خجلانه من امه
دم علي الليله من انسفح
الكون اله اتكدّر


***


والما شرب گطره،  وفه
بعده على الدنيه العفه
اينزّلّه جده المصطفى .. الكوثر من الجنه

الفوگ الرمح منحر يظُل
والگلبه أحر من الرمُل
العالدنيه ظَل صاحب فضُل .. واتعلِمَت منّه


لازم نضحيله
ليلة علي الليله
يبقه علي الصح والاصح
ما مثله يتكرر

***

سعد هادي الشمري

@saadhadi83

بعينك سهم من شفتك
يا ثالث اعيون اختك

اغلَه من الاثنين
عند اخت الحسين

يابو فاضل

***

ها يجرح اخته ودواهه
وثالث اعيوني وضواهه   .. ومايهه انته

صوره الك سكنت عيوني
تطلع من اطبگ جفوني  ..  وابچي سكته


بعد ما طاحت خيمنه بنار اميه
شارده من السوط اجيت و زرگه اديه
جيت وارماد الخيم طاغي عليه
وگلبي احر من رمل طف الغاضريه


غافي السهم بالچانت
وين انه ادوُر اندارت

طفّه السهم عين

***

جيتك امشي ودربي ونه  
تنگل اجدامي المحنه   ..  واعتنيتك

زينب العندك وديعه     
عطر خوّه اعله الشريعه  ..   دوريتك


شفتك امحني الجروف ابفيض دمك
ومثل طيحة بيرغك طحت انه يمك
بصوت حرّك روجة المي صحت بسمك
ماكو چفينك يخوي امنين اشمك


زينب يخوهه اتگلك
من يا مچان اتقبلك

واتقبلك منين


***

حيرتني يابو فاضل 
نهر غيره وطيبه شايل   ..   وانته ضامي

ماشربت الماي، خوّه 
وگلت روحي اتروح فدوه  ..   لروح امامي



اثر فوگ الماي ميظل لليغَرفه
وانته بس العالنهر ظل اثر چفه
الگمر تهتز صورته اعله المي اعرفه
وانته هزيت الفرات ابيوم طفه


فگدك سَبينه اثاره
ودمع المخيم ناره

مشتعله نارين


***


يلي ما مر بيك خوفك 
شوفي اذا مابيه اشوفك  ..  شنهو نفعه

الچنت شايلهه انته بيهن 
بلا ضواهن تصد ليهن   ..  حگهه تنعه


يل حلاة الدنيه مرسومه بجفونك
انته اول ضامي والجود ابمتونك
بكثر ما شايل محبه ويعرفونك
سهم جابولك وخليته ابعيونك


ليش اعله جفنك غافي
حيل السهم متعافي

يبقه الدمع دين


***


ها يخو الما ظل اخو الهه
التمشي چانت وانته ظلهه   ..  استوحدوهه

الدرب تمشيه عثره عثره
وشابچه اعله الراس عشره  ..  الانته اخوهه


چنت وانته وياي دنيه، وهسه وحدي
چان چفك يحدي هسه السوط يحدي
اجروحك اتحاچيني وانه الدمع رَدّي
اتگلي يابت علي للشام استعدي


باچر حزن يتلاگه
دمعي ويه دمع الناگه

نبچي اعله چفين


***

سعد هادي الشمري

@saadhadi83

چَـف للشـدايد وطـن
جسّام شبل الحســن
خـلّه الجَمَـل يا زمــن
تنعاد يوم العاشر


***


الخَط شاربه خَط سوّه
ابحَـد الخيّـم واتـگـوّه
وابـليـل زينـب ضـــوّه      ..  والسيف چان الشاهد


جـسّـام ما يتـوصّـــــه
من عمه يطلب رخصه
الطف شافه اجمل فرصه   ..  يشرح اشسوه الوالد


جاسم بطف كربله الفرصه استغلهه
بسيفه راد ايعيد قصة الجَمَل كلهه
وكربلاء بكل فخر جسّام گلهه
مشكله ارگاب الكفر وبسيفي حلهه


سيف الحسن ما نزل
من بَطَل صار لبَطَل
وبچفه حرب الجمل
ينقل هناك شصاير


***


جـابـتـلـه أُمـه اعمـامــه
ودرع الزكي وصمصامه
وگفـَت ابوسـط اخيامـه    ...  گالتله حَل ميعادك


يُـمّـه الحسن وصاني
ودرعه امانه انطـاني
ما رادك لشـي ثانـــي        ...   والدك للطف رادك


وگف جاسم بالخيم وايحاچي امه
ايگلهه نحري للسبط منذور دمه
يطمأن خلي الحسن ليزيد همّه
آنه كل اسنيني فدوه لأبو اليمه


تشهَـد عَلـَيْ كـربلـه
منـذور نـحـري الـه
موقـف ولا ابـدَّلَــه
لو سحگ صدري الحافر


***


جاسـم اربـاة الكافـل
من تشتد الظلمه يهِل
لو گـال يابـو فـاضـل    ..  جرف النهر يتفطر


الفرسان من يگصدهه
وي شسع نعله يشدهه
يتعب الراد ايعدهه     ..  روس العده التتگنطر


طُفَت لمعة سيفه لن بالدم تحنه
وما يِرد بگرابه گد ما دم يثخنه
الشِمر جيشه اتراجع وگال انكسرنه
برز جاسم كلّه بس احنه ابوحدنه


واليـشبـه المُجتبـى
يعني الذكر صاحِبه
والرايـــد ايـجـرّبــه
للأجل يعني ايسافر


***


جــسّــام كـُــل احـلامـــه
يظل عالي صوت اسلامه
ابنـصـرة حسيــن ايمامـه    ..  شد رايته ويه الاكبر


غيـرة ابـوه سولفــهه
وكـربـله بـدم شرفّـهه
حنّـه اخـذ من طفـهه       ..   وقصد العرس يتوذر


العرس فكرة اتحققت لا مو خرافه
والرماح امفصّله اثياب لزفافه
الحنه، چف الاجل دم واتراب دافه
واگباله زفوه للجنان حسين شافه


والنحره مثل الشمس
ينذبح يوم العرس
جسّام يومه درِس
عاش بگلب كل ثائر



***


العاگِـر جَـمـل كُـل فتـنـه
زوده انحچه بسيف ابنه
سيّــد شــبــاب الـجـنّــه    ..   عايش بغيرة جاسم


وابن الحسن چان الهه
غِــيـرة ابـــوه مَـثّـلـهه
والـمـعـركـــه گـاللـــهه      ..   ما ينثني الـ مِن هاشم


العلى احضان الغيره يربه ايموت غيره
العِطَش، واعله المي وجه لا ما يديره
الگال كل اجروحي تزغر،  والچبيره
اشلون اظل سالم والحسين ابحصيره


رمله امي وبهالدمه
تفتخر يم فاطمه
وينكسر گلب السمه
اتشوف الجسد متناثر


***

سعد هادي الشمري

@saadhadi83