شايف من تطيح بجف أغانيك فجر تفاح
شايف من تبوس
الرجفة طيرة ماي..
تنام وتختمر طاووس بجفوفي
وتفز وبنهدك النعسان
تلمع دوخة المفتاح
آخ شكد بعيدة دوخة المفتاح
عيونك رجفة التفاح
نهدك عصافير بليل
أصابيعك بشعري دوخة الحيطان
من تمطر سؤال تراب
من تنشف بأصابيعي حنين كتاب.
.
.
.
ستار محمد

إلى الحاضر بيننا دائما وابدا 

...............

موفق شاعر الغيمة العراقية
كلمته المطر
من يغني حزن الكاع
مراية عشب حرية
موفق ملح سباح الأغاني البيض
أصابيعه كلايد خضر
بين ضحكات
الفخاتي
شاعر بلون النهر
بخيالي رغبة مطر.
.
.
.
ستار محمد