يوم العملية عمه منعني اروح وياهم للعملية
يحسوني احب اتصدر واطلع روحي زينة بس اني مو قصدي هيج بس هو طبعي هشكل دائما احب اسعى واجهد واشتغل واساعد ما احب دور المتكتر والكاعد وماله علاقة بس بعد كل واحد يظن اللي يحلاله الله يعرفني ويجازيني بنيتي .

وكعدت بالبيت وشفت انو سالفة ايوب يصعد فوك صعبة وايوب من يشوفنا احنا فوك ما يرضى ينام جوا ما يرتاح اذا مو اني وعلوش يمه نفسيته ما ترتاح .. واني الغرفة الجوا اكرهه لإن نادية جانت بيها من اول مجابها .. فكمت طلعت فراش الجرباية اني وسرى وصعدته وجبت فراش جربايتي وفرشت فراش جديد ونظفت الغرفة ودرناها الاخشاب وفرشت زوالي جدد ونقلت الاحتاجة والاريده هنا .. لإن اني اصلا وضعي هنا مؤقت مستحيل اقبل ابقى ويا اهله بس وضعه جابرني وما بيدي حيلة

لليل طلعوه وجابوه من المستشفى وشالوه للغرفة الجوا ..
جان تعبان حيل .. اخذ علاجه ونام ما حس بعد .. اني كعدت اقرا واتناطح ويا كتابي لا فاهمني ولا فاهمته

كعد ثاني يوم هم عينه وهم راسه و هم وضع رجليه وهم خطار ما يكطع تروح جوكة تجي جوكة
ويا سلام ايوب لعبني حبل هلكد ما صيح غلط هان حتى فشار فشر
واني اسكت اسكت اسكت .. ما ارد اخاف تزيد حالته

بس الإنسان طاقة الضغوط اللي دا اعيشها من وضعه وامتحاناتي ووضع البيت ولعبان النفس والدوخة مال الحمل دا تكبر وتصير اكبر من طاقتي
مع هذا دا اجاهد حتى اصبر وتعدي ويكوم على حيله بسلامة

بالليل اجتني خالتي كالتلي : اصعدي نامي فوك خلي نادية هي تنام يم ايوب اليوم

-تنام يمه شنو هذا فراشي نزلته وحتى الزوالي مال غرفتي وفرشتها علمود ايوب لإن ميرتاح اذا مو يمنا

كالت : معليج انت امشي اخذي ابنج واصعدي وخلي مرته تنام يمه

-خاله ترا هو مريض يعني حتى مو مال تدور حقوق وهو بهالحال

-شعليج حقوق مو حقوق مرة تريد تنام بصف رجالها انت شعليج

-شعليه شنو غير رجلي ؟

-وهم رجلها

-لا والله ما حزرتي خالة ما اطلع وشتريدين تسوين سوي

-تتعاندين وياي

-لا جايتج ولا كاربتج حتى اتعاند وياج شو انت التجين عليه وتكولين اتعاند واذا تسميها عناده بكيفج اعتبريها مثل متردين لا اخليها تجي للغرفة ولا توصل يم رجلي ما اقبل

-اعلمج التتعاندين وياها منهي

عفتها ..شتريد تسوي خل تسوي
حجت ويا ايوب ايوب كام يصيح ويفشر ويغلط وبحال عدالة اني بيا حال هيج منكم هيج من اللي مكابلكم هيج من اللي جابكم

مو عيشة وياهم قهر

يوم الأحد .. جان لازم اداوم جامعة لإن عندي امتحان
وهو يعرف عندي امتحان وبدلت وطلعت ورحت زفتت خوش تزفيت بامتحاني ورجعت بأمان الله دا اصف سيارتي اريد انزل .. طلع عمي شافني دخل ..

اول ما فتت للبيت حجه عمي : وين جنتي ولج

باوعتله : هاي الولج عليه !؟

-جاوووبي لج
وزمخ

حجيت : لا حول ولا قوة الا بالله
عفتهم ودا امشي صاح ايوب: مكانج طايحة الحظ لتتجاهلين عمي

-هاي كلتها عمك لا عمي ولا ابويه وبعدين ما ملزمة انطي تقرير بطلعتي وجيتي لاحد وهذا اتفاقي وياك من اول مرجعتلك كتلي مبريه الذمة لا احاسبج على طلعة ولا على حق واذا انطيتك حق فمني واذا استرخصت منك بطلعة فمني بس مال اجي انطي تقرير العمك لا والله محد اله عليه

جان يلزمني عمي من راسي كال : انت ابالج ما اكدرلج امشي طلعي برا ساعة متكعدين هنا

حجه ايوب : فوتي لغرفتج وصووووتج ما اسمعه

صرخ عمي : لا شو ما تبقى وهالمرة ايوب تسكت وما تدخل محد كوه راسها غيرك الزمها بالقران ابتلي بيها امشي اطلعي برااااا لج

دفعني للباب كتله : البيت بيتي وبيت رجلي مو بيتك حتى تطردني منه وحتى اذا جان ابالي اطلع فما اريح كلب احد واطلع بكيفه وكاعدة ابيت رجلي الما يعجبه الله وياه

حجيتها لو تخبل كام يصيح ويغلط ووولح اليوم اليووم
وايوب يغلط وخالتي تضرب وتدفع .. اخذت ابني دا اريد ادخل للغرفة اللي جوا .. لكيتها مقفولة

عفتها وصعدت فوك خابر علي عليه كاله تعال اخذ اختك
علي كاله : مع احترامي الك عمي بس اختي يم رجلها مريض اذا ما يريدها هي تخابرني او هو يخابرني ويكلي اخذها ويدلل .. بيتها وبيت اهلي موجودين ما بحاجة بيت احد ..
علي مخبلة بالزايد

انهد على ايوب ويكله: لو عندك ذرة ناموس وحمية ما تخلي هالعايقة ابيتك واتطلكها

ايوب ما رد على كل صياح عمه وتجاوزه وغلطه .. بس روحه فارت من هالوضع لا يكدر يكوم لحيلا ويدير امره .. ولا يكدر يصبر ويسكت

طلع عمهم مغتاض من البيت
نزلت ورا شوية .. نادية مبتسمة فرحانة هيجت كل ذوله عليه
تكلي : بعد اشايفة مني لا ما هججتج بليلة ظلمة فلا اتسمى بأسمي

تجاهلها بس قهر
كدرت تهيج كل ذولة وتخليهم يدافعولها بتمسكنها وبواجيها واني بطرك روحي اشاكف هذا واشاعف ذاك ومحد جابرني اسكت غير وضع ايوب
اخ لو اعرف اتلوك واتمسكن جان مو هذا حالي.

دخلت للغرفة هو بيها
كال : ارتاحيتي من خليتيني بمواجهة ويا عمي ارتاحيتي من ذليتني وصغرتيني كبااااااله بتصرفج

اجاوبه هسه يكول تجادل اسكت هسه يكول تتجاهلني
فضلت اسكت افضل مما انطق وازيدها على روحي وعليه ..

كام يصيح شلون اتجاهله
مشي الكرسي وراي والزمني جرني ليجوا لزم براسي كال : انت ابالج ما اكدرلج ولج كعدت واستغليتني

-ايوب دكافي وخرررر

حجيتها وما احس الا يركع راسي بحافة الجرباية
كامت كصتي تجري دم وخرت من عنده ورحت للحمام نادية تباوع وتضحك متشمتة ... يتبع

_


#ذوالفقار_الحجي

((( )))

#الحلقة_٤٩

غسلت بس دموعي تجري .. صعدت الم الهدوم واتركه وامشي .. وشيصير خلي يصير لا هو لا اهله لا احد راضي عليه المن كاعدتلهم بحاجتهم اني .. اطلع ويطبهم طوب

الم ودموعي تجري ..
شلت غراضي كلهن .. وصحت على نبأ تصعدلي علوش .. جابتلياه
بدلتله وفتحت باب غرفتي اريد اطلع .. صفنت .. اترددت بين ضميري وعزة نفسي ضميري يكلي لا تعوفينه وهو اوت البارحة مسوي عملية وكلش تعبان اتحمله .. و عزة نفسي تكولي طز بالكل هو منو محترم حتى ابقاله

رحت ويا نفسي وكرامتها ووصلت للدرجة مستمرين تحريض ويحجون عليه وشلون شهر بقيت بالستشفى بين الزلم لا انرديت ولا استحيت ..نزلت ع الدرج هو عمه امه نادية كلهم بالهول .. من شافوني سكتوا .

هو صدت عينه بعيني ..
تنهد ودنك راسه يغمض ويحط ايده على وجهه .. ما حجه
تجاهلتهم وطلعت حجت خالتي : كلعة كون الله لا ردج .

ركبت سيارتي وطلعت .. وخابرت امي رحت للبيت الجديد
امي ونسرين تلكني وفرحانات بيه ويشوفني البيت بس بداخلي تعبانة ومضغوطة حيل ..

حجت امي : شبيها كصتج

لزمتها : لا هيج انركعت بالشباك

- انركعتي لو ركعوج

- ماكو فرق اثنينهن مركوعة

- شصاير

-سولفت الهن ..
نسرين كالت عزا وباقيتلهم شجابرج متكليلي غير اركعهم بمية نعال حشى السامع وامشي

- الجابرني ايوب
لا تكلولي وشنو يعني ايوب ..
اخذوا كلبي وحاجوه وكلوله شنو يعني ايوب وخلوه ما يهتم
ولضميري ما يتألم .. ما اكدر اعرف الديسوي كله من حالته النفسية وتعبه وقهره .. كمت ابجي

حجت امي : جا هسه عليمن تبجين ارتاحي هنا وخلي يولون

- هم فرحانين كلهم بطلعتي بس هوالمقهور

- جا من مقهور عليمن يكتلج علمود عمه

- لا من قلة حيلته ايوب ما يكتلني اقوى شي عنده يعبر عنه شد شعر وضرب راشدي بس يركع راسي بالحافة ويخلي الدم يجري من راسي هذا مو ايوب .

دا احجي دك تليفوني .. رقم غريب
رديت : الو
اجاني صوت ايوب : ها وين انت ؟

- يم اهلي

- شوكت ترجعين عندي موعد يم المعالج رايد السيارة

تنهدت : ما اعرف

- كومي جيبي ابنج وتعاي بسرعة يلا تعبان خلي اروح وارجع ارتاح تعبت

سكتت اخذت نفس كلت - تمام
سديت الخط من عنده كتلها : ماما خلي اروح






- يا وين تروحين مو طارديج

- منو يطردني من بيت رجلي .. هو الديخابرني يكولي ارجعي

- فوك ما كاتلينج وهاينينج وترجعين دطلعي لبيتج وانعلي ابوهم

- مو وكت كرامة وعزة نفس اتقوى عليه من يكوم لحيله اما هسه هو محتاجنا يمه ، يلا مع السلامة .

كمت طلعت والدرب الجابني رجعني
فتت للبيت .. عمه رايح خالتي امدده ع القنفة من شافتني كالت : شو رجعتي

مجاوبتها حطيت السويج يمه ما حجيت وياه
وهو اشر لعلوش يجي مشى له .. اخذه بحضنه كام يبوس بيه
مشيت للغرفة نادية متمددة ع الجرباية وع الموبايل .. تركتها واتجرعت المر وصعدت .. كمت اردد حسبي الله ونعم الوكيل

صعدت فوك فرشت بالكاع وطلعت الهيتر شكلته وكعدت
كعدت اقرا ودايخة وراسي مأذيني .. نزلت اسويلي استكان جاي دخلت نادية كالتلي : تعيبين عليه وصرتي مثلي تنطردين منا وترجعين منا
مجاوبتها
حجت .. مو تكولين ما ناقصج شي وعندج كلشي واني ما عندي شي
اخذي الكلشي وطلعي من حياتنا

باوعتلها : لا تحاولين تتمسكنين كبالي اسلوبج عرفته مو اني الدخلت حياتكم وحشرت روحي بيها .. انت .. ايام البايعة ايوب ومتنازلة بيه راحت صار ابو بيتي وابني ورجلي وحبيته راحتنا يمه وراحته بينا .. لعبي بكيفج واتحايلي ومكري وجيشي الكل .. ما راح العب وياج بس اعوفج لله هو يتولاج .

- لا هههههههههههه تعوفني لله والله يا الله ..
اخذت كلاصي وصعدت

سمعت باب الكراج انضربت باوعت من فوك رجع هو وابن عمه
حتى مطالع بسيارتي رايح بسيارة ابن عمه
رجعت اكمل دراستي واقرا وعلوش جوا خابصهم ..وماخذ البيت طول بعرض .

لليل كلش تعبت ردت انزل اشوف ابني لكيته نايم على ايد ايوب .. ونادية كاعدة بالغرفة تسولف وياه .. تقربت اريد اخذه كال : اتركي بمكانه لا تعلعلينه

باوعت رحت اخذت ملحف بيه نايلون من جوا وفرشت بصف ايوب وحطيت مخدة صغيرة ونومت ابني بصف ايوب لزك .. وعفته وصعدت بدون ما احجي ويا ايوب

ثاني يوم جان ما عندي امتحان .. كعدت اقرا اليوم كله
بس روحي لعبانه وتعبانة ومدا اعرف شوكت تخلص هالفترة
يمكن متخلص ويمكن ابقى بسباق وحركان دم
على اللي ابطني ما اعتقد راح احل شي وراح ابقى بهالدوامة

ثاني يوم رحت امتحنت ورجعت ..
صعدتلي نبأ كالتلي : خالو يكول اريد اسبح

بدلت ونزلت لايوب اخذته للحمام سبحته من جتفه وجوا وحطيتله المرهم لجسمه وبدلتله .. شفته يحرك رجله يعدلها بس خفيف .. من ردت ارفعه من الكرسي مال الحمام وكفته ذب نفسه عليه كال : كعديني

حجيت : حاول تثبت رجليك

- ما اكدر كعديني راح اوكع واذيج

- لازمتك ثبت رجليك
رفع اديه لزم اكتافي واني مدنكة اباوع لرجليه يهتزن بقوة ميكدر يثبت بس ديستشعرن الوكفة تركته دفايق كام يصيح .. كعدته ع الكرسي المتحرك .. وطلعته للهول ودنيت الصوبة عليه ..






كام علي يدك على جتفي : ماما .. ايني عم

سحبه ايوب : جوعان يبابا سودة بوجهي محد ريكك

كمت سويت طماطة تكلا علوشي يحبها اغمسلة واوكله .. واني ممتغدية فسويت طماطة وزيدتها دهن والصوبة كبال ايوب صبيت جاي وحطيت الصمون ع الصوبة .. كمت اوكل ابني سحب الصمونة من النار كص منها .. رفعتله الطاوة .. ع الصوبة ونصيتها كام ياكل .. اخذ الجاي مالتي يشرب منه .. كاعد ناكل سمعت احد اجه رفعت حجابي دخل عمه كال : السلام عليكم

تعجب اني كاعدة وايوب يمي ..
استغرب يمكن يكول هاي مو طلعت يمتى رجعت شوكت تصالحت وكعدت ضل يباوع كاله : مرتاح

- الحمدلله عمي مرتاح

- هو انت هم الله كالب راحتك يا عمي .. من يوم يومك الله ذاب راحتك ويا المأذيك وتهد المشتريك ، اي شلونج غفران يمتى رجعتي

مجاوبته .. سويت نفسي ما اسمع اوكل بأبني
اجت نادية كالتله : هلا عمي شلونك شخبارك عمتي شلونها جان جبتها وياك والله من اشوفك ارتاح احس ابوي طاب علينا

-الله يحفظج يابه عمتج ملتهية اجيت لاجل ايوب

-متغدي لو اصبلك الاكل حار هستوني طابخته كلت كبل لا يكعدن خالتي والبنات نظفت البيت وغسلت الكراج والسطح وسويت شلون غده يلوك الحلكك اصبلك من راس الجدر عمي

-الله يسلمج متغدي .. بس اذا مسوية صبي لرجلج ليش مخليته ع الطماطة وهو مريض

-يا لو بيدي اعصرله مي عيوني بس كتله وما راد بعد شسوي عمي هذا حكم الله واني راضية ما طوله ساترني واكل واشرب بجاله كلشي فدوة

- والله يا عمي ظلمناج راضية باللكمة وغيرج شتحطله يتبطر .. الله يحفظج عمي، شتريدين بس خابريني

- الله يحفظك عمي بعد هي ما تنعرف اذا ما تعاشر من عاشرتوني عرفتوني احب الكل اني ما عندي حقد على احد كلبي طيب حتى لو حقي ضايع ومحرومة حتى اصير ام .. بس نكول الحمدلله والشكر المهم وجوهكم الطيبة .

للحظة صدكت وانقهرت لو ما اعرفها
اللواكة الها اصولها وفنها وللأسف ما اتقن هالأسلوب
الما احبه ما يبتسمله وجهي لو ينحط على ركبتي سيف والاحبه ما اعرف اصفط الحجي الحلو والبك.

لميت وكمت وديتهم ودا اصعد لكيتها صاعدة كبلي ..
صعدت للسطح اكو شمس دافية ردت اكعد بهدوء كلش تعبت منهم
باوعت السطح لا منظف ولا جايسه تنظيف من شهور .. هزيت ايدي وبقيت كاعدة شفت مطيرجي من ابعيد صاعد على سطحهم نزلت بسرعة .. وعمه بعده موجود يكله : اعدل عمي لا تغضب ربك لجل رضاية احد .. بت الناس هاي مو لعبة

ترا نادية وان جانت كبل مو خوش لجن اتعدلت وهساه شاريتك ورايدة رضاك خطية عمي ضالة خدامة ابيتك وانت داير عنها ومجلب بوحده لا تنكض ولا تنجرع اطها سويج وكللها روحي مرة ما تكعد ابيت حجينا ولج عمي رجلج ما يدري ما يصير تضلين بالمستشفى ردت سمعت احد ضالة ويا الدكاترة والممرضين ما تستحي .. مو هاي وياها كعدت ابيتها وسكتت لا طلعت لا مشت لا باب الحوش وصلت مدارية امك وكاعدة تتنطرك الا ذيج يعمي لا اخو يردها لا رجال لا عمام شنو من بنية ما تدري






مكدرت اتحمل نزلت كتله : تحجي بالله وبالدين وتحرض عليه واصلة يمك اني كاربة بيتك مأذيتك شو رجلي راضي وساكت وانت تحرض عليه

ايوب : امشي اصعدي لج

- لا ما اصعد وما اجامل وما اسكت .. وكت الذبوك هناك ورجعوا لبيوتهم اني ما كدرت .. ما كدرت انام بفراش الهنى وانت بفراش الموت .. لو اذبك بالمستشفى واجي يومية اسأل ها شلونه ما كام يا خطية وارجع اعيش حياتي وانت بين الحياة والموووت ما كدرت .. كتالك عدل ما ميت اتسجلت قضيتك ضد مجهول وراح دمك ودم المرحوم هدر بس ما كدرت .. شمدريني ما يلحكك شمدريني ما يتربصلك شمدريني ما يشتري ذمة احد بكم مليون ويكتلك ببزة ابرة وانت بمكانك صعببببة؟ ما كدرت اذبك بالمستشفى واروح مثل ما سوا غيري ما كدرت .. كل يوم اجيك كل يوم اراقب حالتك كل يوم اسأل عنك واحد واثنين وتلاثة واواصي وانطي وافتح عيون الكل ترا قائد ومهم ما ممكن تتهاون بصحته وخليتك على بال الكل ورجفت الكل بيك وبامن الحشد وجذبت ع الكل الحشد عنده عيون بكل مكان ويتربص لكتاله خاف واحد تسول له نفسه ويأذيك .. يكلك واكفة ويا الممرضين والدكاترة كله احجي ضميرك شفتها نزعت نقابها كدام احد ؟ فتحت عيونك شفتني مكحلة عيوني لو شفتني محمرة خدي لو نصي رايح ويا حيلك جني اني الميتة مو انت .. غيري شاف حياته وعاش ياكل ويشرب وخطية حزنان ..بس اني ما كدرررررت الزاد الما طب بطنك صمت عنه ونذرت ما ابطل صومي لحد ما تطلع وياي سالم ، ذهبي انطيته لخالي واخذت فلوسه ورق واشتريتك ما كلت معليه ما خابرت وكتلهم انطوني اني مالي علاقة اني مرة كل الردته اشوفك كدامي صاحي ما ردت شي ..

كلت لا عنده اخو ولا ابو ولا سند وشديت حزامي وعصرت روحي لحد ما انتهيت حتى ما تغمض عينك وتنشمر ومالك احد تالي اطلع اني المو زينة .. وغيري النام مرتاح احسن مني .. من اغم هيج دنيا التمدح المرتاح وتذم الشابع ضيم واغم روحي التحط روحها بناس ما مثمنتها ..

عمه انخرس ما فك حلكه
كتله : ما اكلك غير حسبي الله ونعم الوكيل تطعن بيه وانت تعرفني اني منين ومنو ابويه انت والله .

عفتهم وصعدت بس صدك فار دمي
كعدت اتحسب عليهم واحد واحد واگل لربي عليهم
واتمنى لو اكص كلبي واشمره وامشي وما اهتم ولا احن ولا افكر
بس ادري بروحي غمة وغبية وما يفيد وياية كلشي مثل بزون تحب خناكها .

داومت ثاني يوم .. الازدحامات الدنيا مكلوبة
تلعب ام روحك ما تدري تفوت للبيت تطلع روحك .. تطلع للشارع تنعل اليوم اللي انولدت بيه بهيج بلد لا شعبه يفتهم ولا حكومته بيها خير هسه الرئيس واستقال بعد كاطعين الشارع وماكو دوام ومزعطة مسمية روحها قوات مكافحة الدوام .. الجامعة اتصيح الما يمتحن صفر وذوله كاطعين علينا الطريق بس حتى ميداومون .. كومة شهداء وعوائل انهدمت بيوتها ومصدكة يصير تغيير ومن تكول يابه ما يصير لعبة سياسية منو بحالكم وينطيكم حق ارجعوا لبيوتكم خلي نداوم يكلك ها ذيل ها لوكي .






رجعت للبيت جيكت علاجه .. باوعت وضعه بدون ما احجي وياه وصعدت
هو هم ما يحجي .. ومشيت اغسل هدومي اني وابني وهدوم ايوب .. مريت لكيته بالكراج كاعد وحده ع الكرسي .. مشيت على كيفي لكيته صورة عنده لبلال يقرب بيها دموعه جرن ع التليفون مسحه بهدومه وكام يناشغ ويكلب بصوره ويزوم .. حضنته من ورا وحطيت راسي على جتفه .. فز شافني مد ايده يمسح عيونه حجيت : اترحمله لا تصعبها على روحك

حجه : اكو موقف للإمام الحسين من استشهدوا ولده وصحبانه كلهم كدام عينه وهو واكف لحد ما استشهد العباس صاح الأن انكسر ظهري .. هالحملة هاي كلش تمثلني بفراك بلال وفاة ابوي وصحباني كلهم ما اثرت بيه مثل ما سوا بيها فراك بلال .. لا الي اخ ولا صاحب اكلب بالصور الجنت بيها وياه احسد روحي اكول شكثر جنت قوي بوكتها واخيي بظهري ووياي يواسيني يضحكني يشيل عني نطلع نسولف، عده اخوه بس ما خاوه غيري جان يكلي مستعد افديك بروحي لحد ما سواها وعافني لوحدي عايش عيشة الميت بفكده .

مد ايده لعينه يمس بس ايده ترجف وحجرته ترجف من يحجي
الشهكة تطلع بغصه : الله كريم ان الله اذا احب عبدا ابتلاه .. الله اذا حب انسان يغار عليه وياخذ من عنده اعز الناس حتى يختبره ويقربه مو يبتليكم ليدنيكم وربك ديدنيك منه

- جان استشهدت وما عشت مثل الميت وراهم واشوف صورهم شهداء واني كاعد بمكاني مقعد واسمي ذيل .. ردنا العز الشهادة وتاليها انكتبت علينا الذلة بهالكرسي

- ما تتسمى عند الله ذليل اجرك عظيم ويمكن اعظمهم انت بطريق حق وتتسمى عند الله صابر صبرت على الاذى في سبيله وشفت ابوك وصحبانك واخوك ييستشهدون وانت صابر وراضي وتحمد وتشكر يا كبر اجرك عند الله بقرانه يكول ( إنما يوفى الصابرون اجرهم من غير حساب ) كعدتك اللي تسميها ذلة ربك رايد ينقيك بيها من خطاياك وكل ما تزيد بصبرك كل ما زاد اجرك ..

انت مو ذيل وانت مو مثل ما ينعتك اي جاهل انت الشرف والغيرة بكل معانيها يكفي بعين الله وعباده الصالحين انت مقاتل قاتلت بشرف وجاهدت وصبرت لحد ما وصلت لحالك هذا .. طريق الحق صعب واللي يمشي بيه مكروه والله يكول اكثرهم للحق كارهون .. هذا نهج نبينا واسي نفسك بيه ربك يوصفه ويكول ولقد نعلم انه يضيق صدرك بما يقولون .. اذا انت كالوا عنك ذيل النبي كالوا عنه مجنون وساحر وكذاب وجاروا ما جاروا عليه وربك سلب منه امه وابوه وامتحنه بوفاة زوجته وعمه وانكسر وعانى وتعب لحد ما كال ( والله ما اوذي نبي بمثل ما اوذيت) وربك جازاه وانطاه منزلة اعظم نبي لصبره وثباته على طريق الحق وخلا شفيع الأمم .. ولكم في رسول الله اسوة حسنة .. شد على كلبك وكول مثل ما كال الإمام الحسين رب ان كان هذا يرضيك فخذ حتى ترضى .

تنهد وذب حسرة بحرگة
وكال : الحمدلله على كل حال

بست خده وكتله : اسويلك جاي تدفي معدتك بيه






- اي والله الله لا يصغرج

- من عيوني

مشيت سويتله جاي وكعدت يمه بالحوش ..بقيت اسولف وياه
واستغليت كعدته وجبت كتابي وحطيته ما دام برا وشمس ويباوع كام يشرحلي .. المادة ويدرسني .

طلعت خالتي هزت ايدها كالتله : يمه انت بيا حال وكاعد اتدرس بيها جاهل هي

باوع عليها وما رد مسترسل بالشرح اندمج طلع من مود الحزن البيه
علاوي يلعب كدامنا ونبأ طلعت تضاحكه وتلاعبه وسرى كعدت ونادية منتجية تباوع ظهرية وع الشمس كاعدين .. وهو مستمر يشرح قاطعته وكتله : ااالله هسه كون نوتيلا ووياها فراولة

صفن بوجهي : يا نوتيلا يا فراولة اني مصلوخ اشرح وانت عقلج ويا النوتيلا

-لا والله وياك شو ممدري هسه اجا على بالي شرط النوتيلا مايعة واطبب الفراولة اغمسها واكلها
رجفت يييي ... راح ابجي

ضل يباوع عليه ابتسم كاللها : خالو طبي جيبي محفظتي
طلعت خالتي كاللها : يمه ما تكدرين تلبسين عباتج وتتمشين تجيبلنا نووتيلا وفراولة

-نوتيلا وفراولة شتسوي بيهن

- غفران خطية مشتهيته

- يا فدوة مكطوع كلبك مشتهيته اتعنى وامشي علمود غفران مشتهية .. والله انت يا يمة مدري شلونك

- يمه المرة
لزمته غمزلته : يمعود عوفها ما بلازم

باوعلي : البسي عباتج وخلي ناخذ علاوي ما طول الجو حلو نروح للاسواق نجيب ونجي

خالتي : شنهي حامل وهيج كطعت روحك تجيبلها مشتهاتها تص

نادية كامت تباوع ..
كمت جبت عباتي واخذت علوش حطيته بحضن ايوب واخذته دفع نمشي بالشارع ورحنا السوبر مارركت يمه ابو المخضر .. انطى خمسة وعشرين وجاب ٤ علب نوتيلا ..ب٤ علب فراولة ..

ورجعنا وايوب يعلم بعلوش يكله : يا علييييي
علوش يرد ورا : ااااا اييييي
ويرجع يعلم بيا : يا عليييييييي
وذاك يرد .. كام يحضن بيه وويبوس

دخلنا البيت لكينا نادية مبوزة وخالتي معكده حاجبها
سويت حمام مائي وحطيت عبلة النوتيلا ووكفت اغسل الفراولة و هو بقى يمي يلعب ويا ابنه .. يضربه راشدي يصلخ وجهه واني من يمي افز واكله : لا ايييوووب مو هييج عليك الله

- معليج اضرب ابني اضرب

الكلب ولا يحس بالالم ييضحك من مل كلبه ويكل لابو : تعا تعا
ويصلخ ايوب راشدي ترس على وجه صرخ ايوب : لا يا ابن الزفرة ايدك من هسه ثكلة ولك
كام يحك بلحيته وصلخه الراشدي الثاني
هزيت ايدي: حتى لعبك انت وابنك الله كالبه






طلعت النوتيلا وحطيت الفراولة واكلت يا يمه حسيت كلبي ارتاح انطيت لأيوب اخذ وغمس كام يحجي ويا علوش : ايباااه طيب
انطيت لعلوش كام يقلد صوت ابوه ويفخم بالحجي : اااااه بيبب

ضليت اضحك عليهم وانتجيت ع الكاونتر مبتسمة واباوعلهم وكفت خالتي : غفراااان

باوعتلها : ها

- انت حامل

باوعت لأيوب ابتسمت : ليش

- جاي اسألج جاوبي

حجه ايوب : اي حامل

- وعليمن تضمين عليه

- مو وكت ايشر بحمل واحنا بحالة حزن

-مقدرة حزن لو اطردين عيون

-مو غلط وهالشي خاص بالنهاية اكيد الكل راح يعرف لما يتم على خير

دخلت نادية كالت : ايوب صارله شهرين من صار وياه حادث بعد منين حبلتي

صاح ايوب : كومي لج انعل ابوج لابو الخلفج شنو منين طاااايحة الحظ

جان تكله : حبلتها وتعوقت وعفتني اتحسر الجااااهل وانت بحالك هذا .. ليش كله غفران ليش اني لا

- امشي ولي مني لا ابتلي بيج بت الكلب تعوقت تعايريني ادبسزززز

-اني اريد طفل من حقي اصير ام ليش حارمتي حقيييي

لزم خاشوكة ع الميز ضربها بيها وكاللها : امشي بت *** ولييي

صعدت وخبصت الدنيا بالبواجي وخالتي تكله : حقها هم مرة وتريد جاهل
كام يتصايح ويا امه عفتها ومشيت عرفت متعدي ساعات واحنا متصافين لا ما يخلقن مشكلة ويكلبن الجو

ثاني يوم شفت باقر بالجامعة كال : شنو ليش مصعدين بيج عقوبة ؟

-منو مصعد ليش

-بالدوام غياب ٤ ايام

-اربعة ايام هو شوكت كابولنا دوام مو استثنونا بسبب الوضع

-شمدريني غير كاعد اسألج

خابرت على رحمن كتله ياخذلي اجازة مال امتحانات ما اكدر اداوم
شوية وخابرتي كال : انردت يكول الاستاذ ماكو اجايز ملغية

باوعت لباقر : شلون انت مداوم اذا ماكو اجايز !؟

- لا انطوني ٢٠ يوم علمود امتحاناتي






- لعد شو قدم رحمن يكول ماكو ملغية الاجازات

- معناها حاركين فلمج خابري الحجي

- يا حجي منهم زوجي

- اي يخابر على الحجي ابو نور

- هو لو مخلي حساب لأيوب يصعد اسمي عقوبة ! راح يردها مثلا اذا خابر ايوب جان ما صعدها من الأساس

- متعاركين

انشغل بالي مجاوبته
خابرت على ايوب .. كال هسه اخابر عمي اشوفه واحلها
عفتها على ايوب وكلت يحلها شو ثاني يوم ويخابرني رحمن كال : غفران صعدوا بيج كتاب فصل

تخبلت شنو فصل وينهي عقدي على اي اساس وليش !؟
الكتاب بعده ما صادر لهيئة الحشد الشعبي بسرعة اخذت رقم امن الحشد وطلب اسم الحجي القابلني وصلوني بيه سلمت عليه كال : امريني اختي

ذكرته بنفسي كال : اتذكرتج اهلا وسهلا بيج امر خدمة

-والله طالبتك

-ابشري عد عيناج كولي

-صاعد بيا كتاب فصل من الوظيفة واني ما مسوية شي حالي حال كل البنات بسبب الهجوم كالوا اكعدوا

- مبلغيكم تكعدون يعني

- اي والله محد من البنات دا تداوم بسبب المظاهرات وشغلنا الكتروني مستمرين نشتغل ع الايباد مكاطعين

- يعني ما منطين تحذير تنبيه عقوبة

- صعدوا عقوبة بدون تنبيه

- راح اخابرلج مكتب الحجي ابو مهدي الولد مناك يحلوها ما يقصرون

-اي والله اكون مننونة واسفة ازعجتك

-لا بالخدمة احنا اختي العزيزة على راسي

- سالم راسك بس يا ريت تردلي باقرب وقت

- خادم

-خادم ربك
نهيتها منه نص ساعة وكال : هاهية بالسليم الولد حلوها وانلغى كتب فصلج وتكدرين ترجعين لمقرج واذا تحتاجين شي بالخدمة

-شكرا جزيلا الله يحفظك ان شاءالله ما قصرت تسلم مشكور

-ادللي يابه

شو سديته من عنده لكيت ايوب خابصني خبص بالاتصالات
رديت كال : انت شمسوية شمخبصة عليمن متصلة ولج

- بامن الحشد

- يا امن الحشد انت متصلة بصاحبي طالبة منج يرجعج ؟






- مو صاحبك واحد يشتغل بالأمن

- يا مو صاحبي ولج حجي مؤيد صاحبي يعرفني خابرني يكلي حجي زوجتك اتصلت صايرة عدها مشكلة الحجي عمك مصعد بيها كتاب فصل اتصلت ولغيته

- ما ادري بيه صاحبك والله

- انت شلون تخابرين واحد من وراي يمشيلج امرج اني هنااااا شنو

- اخابر واحد شنو بس طلبت مساعدة واني كتلك على عقوبة عمك عاند وصعدها فصل

- دتعاي بس تعاي لا ما امسح البيت بيج ومحمد اليوم انهيج

ركبت ورجعت للبيت لكيته فاير دمه :

هد عليه وهو بعربانته جرني للكاع ولزمني من راسي : ولج اتفضحيني يم صحباني غفرااان تخابرين صاحبي يرجعج

- ما ادري بيه صاحبك هو حجي وكال من تحتاجين شي خابرينا
وحتى ما عندي رقمه والله رقم المكتب وحلوني بيه

- واني هنااااا شنوو ما فكرتي الحجاج كلهم صحباني وعرف ويدرون بيج زوجتي شلوووون تفشليني وياااااهم

انهد عليه دك كمت اصيح
واريد اوخر من عنده وهو لازم بيه .
انجريت حيل .. تعثرت العربانة وانكلب
تخبلت خالتي فزت واني دنكت عليه اشيله عدلته وهي تكتل بيه ... وهو لعب جوله ما خلا صياح فشار غلط وشنو الكدامه يشيل ويضرب

صعدت من عنده فوك
هو خابر على عمه يصيح وتعارك وياه ..
وسد الخط هجم البيت هجم وخالتي تذب ع النار حطب بحجيها
نادية واكفة يمه وتهدي بيه وتبوس بيه وتجر علمود يهدأ

كمت ابجي
ما ادري يعرفه جان ما خابرت
من شفت ايوب ما حلها عرفت عمه مخبث وياي وما ينزد بايوب وردت احلها وخابرت على جهة مو شخص خابرت على مكتبه حتى مو على رقمه ولا اعرف رقمه ..

اعتزلت بغرفتي ما نزلت ولا وصلت
بالليل جان اكو قصف اكروباتنا اللي بالحشد انخبصت
كالوا امريكا قصفت مقرات الحشد

انشغلت بالأخبار ..
القصف بمنطقة القائم الدنيا انخبصت ..
ضحايا القصف ٣٢ مقاتل من الحشد الشعبي
اني منا مقهورة وصار هذا القصف .. نطيت من البجي
اباوع صور المقاتلين كلهم شباب .. شكد بيهم احلام شكم بيت انهدم بهالقصف .. واكفين ع الحدود يحمون البلد من الأرهاب تجي امريكا تقصفهم وتكتلهم بنص ارضنا !؟

اشتعل الحشد نار كلهم انتفضوا على هاي الحادثة
وصلت حدها صارلهم ٣ اشهر حاركين الشارع عليهم بحجة مظاهرات ومشغلين عملائهم ويصيحولهم ذيل وتبعي وميليشاوي تاليتها تجي امريكا بنفسها وتكتلهم بنص كاعنا ..






كلهم طلعوا من بيوتهم وانتفضوا
وصارت الكروبات تتراكع كلها تصيح اطلعوا نهجم ع السفارة ..
ولدنا كلهم طلعوا من بيوتهم وتوجهوا للخضراء واتجمعوا كلهم ع السفارة الأمريكية

المشكلة والقهر مو بالقصف الأمريكي
القهر بالعراقيين والكروبات اللي تحط صور الشهداء وتضحك عليهم وتكول الذيول صارو كباب .. وراح تجيك المارنيز .. وراح يسوونكم طرشي ويضحكون ويستهزئون ولا كأنما اللي قتلتهم امريكا عراقيين لازمين واجب بالحدود !!

نكران جميل بكل ما تحمله الكلمة من معنى
خصوصا من خيم ساحات الأعتصام اللي وفروا هالساحات للضحك والاستهزاء بشهداء الحشد ما كأنوا ذوله جانوا على حدودنا بعز البرد يدافعون عنا ! يصفون ويا امريكا على قتلها ولدنا اللي حموا ارضنا وعرضنا ويشجعون امريكا .. تقضي عليهم كلهم !

من بعد هذه الحادثة .. بيومين
جنا نايمين بالليل كالوا .. اكو قصف صار بالمطار
ما وصلت الاخبار وما عرفنا هذا القصف شنو سببه

لحد ساعات الفجر انخبصت كروباتنا وموبايلاتنا كالوا اكعدوا انهجمنا امريكا قصفت سيارة الحجي ابو مهدي

فزيت من فراشي مرعوبة اقرا الخبر
استشهاد الجنرال قاسم سليماني والقائد ابو مهدي المهندس
اني سمعت ابو مهدي مات لو باد حيلي نزلت اركض لكيت ايوب جوا يصرخ ويبجي كمت اصرخ : الحجي مات معقولة خاف الأخبار جذب ايوب صدك مااات
كمت اصرخ وابجي بلا وعي .. واضرب على وجهي
اتذكرت ضحكته ومسحته راسي وهو يكلي بنيتي الله يحفظج اني خادم
دا اريد استوعب هالإنسان صدك انقتل !؟ اتذكرت وكفته حنيته بساطته يكلمنا جنه ولده وبناته مو قائدنا والحشد مشدود برايته بجيت بجي ما باجيته بس باستشهاد ابويه
ايوب يبجي من كل حيله عليه .. ويصرخ

خابر عليه صلاح رد ايوب صلاح يصرخ ويبجي ويكله ولك ايوب ابونا راح
كاله : وين الولد هسه

كاله راح نتوجه للمطار
كاله مرلي

اجوا اخذوا ايوب وطلعوا
صبح الصبح العالم كله اهتز الهالخبر
مجلات عالمية وعربية تحجي بمقتل القائد والجنرال

انكسر حشد المرجعية بهالمقتل
وانكسرت المرجعية واعلنت الحداد ورفعت دعاء (اللهم نشكو اليك تشتت اهوائنا وكثرة عدونا وقلة عددنا )

بدت قصة القائد ابو مهدي من لحظة انطلاق الفتوى بعد ما تم قتل ١٧٠٠ شاب عراقي بمجزرة سبايكر بتكريت على ايد ثوار العشائر وارهاب د١عش .. اعلنت المرجعية الجهاد للدفاع عن العراق من الأرهاب .. طلعت الزلم من كل مكان من محافظات الوسط والجنوب ولبوا نداء المرجعية .. وكانوا حشود غفيرة وصل عددهم ٣ ملايين مقاتل بيومين .. عدد كبير وهائل والفتوى نالت اهدافها والناس لبت بس المهمة الصعبة شلون تجمع هاي الناس شلون تدربهم منين تسلحهم شلون توجهم بالحرب ضد عدوا عنده كل الامكانيات للحرب !؟ فتصدى لهاي الجموع القائد ابو مهدي المهندس واتصل بالجنرال قاسم سليماني وطلب منه الدعم حتى يأسس منظومة لهالجموع ويسلحهم وما يبقيهم عرضة ضعيفة للموت امام داعش .. عن لسان زعيم المقاومة اللبنانية السيد حسن نصر الله ان قاسم سليماني نزل عنده الساعة ب٢ بالليل كاله المرجعية بالعراق اعلمت الجهاد الأن اريد منك ١٢٠ قائد عسكري من امهر واقوى قادة المقاومة اللبنانية حتى يدربون وينطون خبرتهم ويديرون الحرب ويدفعون عن العراق واهله ومقدساته .. وبنفس الليلة اصطحب اكثر من ٦٠ قائد عسكري من امهر قادة المقاومة اللبنانية وقدمهم للقائد ابو مهدي المهندس حتى يوزعهم بمعسكرات لتدريب الشباب وفتح خزينة الحرس الثوري ومد القائد بشتى انواع الأسلحة .. قاد هذه الحشود واتبناهم واتبنى عوائلهم وجمع المواكب الحسينية لمساعدتهم برزقهم لإعانة عوائلهم في وقت كان العراق يمر بأزمة تقشف ما يملك المال والحيش العراقي لا يملك السلاح بأمر من امريكا .. شكل القائد ابو مهدي المهندس من هذه الحشود اللي طلعت تجاهد جيش سماه ( الحشد الشعبي ) وراح يسند الجيش العراقي ودخلوا ساحات القتال وصاروا يحررون الاراضي وتخليص الأهالي من ايدين الارهاب لحد ما رجعوا كل شبر من ارض العراق باعلان النصر بفضله وفضل الجنرال لحد ما اطلقت عليهم المرجعية الدينية بالنجف اسم ( قادة النصر على داعش )






من بعد ما نالت امريكا مرادها وقتلت قائد الحشد الشعبي
انتهت تقريبا المظاهرات وانتهى سيناريو اريد وطن وراحت ضحية هاللعبة الاف العوائل اللي صدكت راح يصير تغيير وانتهت بخسارة اكثر من ٧٠٠ عراقي بتشرين يسوى امريكا واهلها .

وحتى المرجعية من بعدهم الغت خطبة الجمعة واغلقت بابها عن النصيحة والارشاد عن شعب ما يسمع وحكومة ما تشبع .

كلش انقهرنا بموتت الحجي ابو مهدي ..
وايوب التهى رغم وضعه حضر جنازة الشهيد بالنجف ..
وحتى من رجع يمكن عشرة ايام لا اني ولا هو مستوعبين خسارة الحجي
مجان بالنسبة النا قائد بالحشد يختلف التنظيم والعمل والالفة كأنما عائلة وروح وحدة وهو صاحب البيت والكل ولده، فموته جان صدمه التهينا بيها عن مشاكلنا .

من بعد حادثة موتت الحجي لاحظت ايوب
كام يكدر يوكف من يثبت اديه على شي .. ما يوكع ويثبت رجليه ..
بس ما يمشي .. فاخذ العكازات وصار يعتمد عليهم اكثر من العربانة رغم صعوبة وكفته ع العكازات بس مل من وضعه كام يحاول ويا روحه حتى يكوم

الحادث الصار ما غير من وضعنا
لا اني احجي وياه ولا هو يحجي وياي بس ما عايفته ولا هو يرضى نمشي .. وكل ما اريد اخطي الخطوة اتراجع واكول ايوب يستاهل وخطية مهما يسوي يبقى وضعه وحالته النفسية تحكمه

بس نادية وخالتي حادات سنونهن عليه .. هسه نادية افتهمت موضوعها وحقها تغار خالتي مدا اشوف مبرر لكرها وحقدها عليه لإن حبلت هو ابن ايوب اذا ابطني او بطن غيري .. المفروض تفرح لابنها مو تحقد عليه لإن حبلانة ونادية لا

ويومية تشكي وضعها وتشكي حالها
رغم اني تاركتها لايوب ومعتزلتهم فوك وهي جاي تنام يمه يعني هاجرني ما هاجرها .. وبعدها تشكي حالها وتصيح هاجرها عايفها .. اتعجب من خالتي مرات صدك اشك مسحورة ونادية مسويتلها شي لان وضعها صدك غريب ..

ايوب مجان موجود رايح ويا علي لكورس التدريب الفيزيائي
نزلت من فوك .. دخلت للمطبخ نادية واكفة وعلوش فاتح الكاونتر مطشر الفصولية وواكف يجر بيده ويشمر دا اريد اروحله هي ما منتبهتلي اندارتله وتكفخه كفخه على راسه وتكله : والله كتلتني انت دوووولي
وضربته من قوة ضربتها الطفل انضرب اباب الكاونتر ووكع بالكاع يصرخ

شهكت : الله لا ينطيج العافية ليش هيج تضربين ابني

-شسويتله عيني شسويتله بس وخرته

-هاااي وخرتي ولج كبال عيني كفختي بكد ايدج هو حتى تضربي

- دولي مني لا ابتلي بيج انت وابنج

حجتها ونكثت عليه المي من السلا البيدها
فزينا اني وابني وكام يبجي وهي مندارة جريت التختة وطكيتها بظهرها وكتلها : اشوفج نوبة اللخ اتلزمين ابني طايحة الحظ






شو خالتي هدت عليه : ولج انت اتضربين من طايحة الحظ
ما احس الا تسطرني راشدي

دفعتها مني وكتلها : دوخري

شو هاي جريني مثل المتحمل عليه وحطيني هي ونادية ولزمني كتل
وروحي خالتي جيبي الصوندا واتوليني اريد اجر روحي منها اصرخ اصيح سرى تجر نبأ .. نادية تكفخ بيه من صفحة وخالتي

وكعني بين رجليهن ونادية رفسات وتصيح الساقطة اخلص منج اني لووو لا شايفة روحج علينا مالج رداد
وتريد ترفسني ابطني واني مقوقعة روحي واصرخ

جرتني سرى من بين اديهن كوا كمت ابجي
خابرت ايوب كتله: انعل ابو اللي تضل عنك واذا ما تطلكني اليوم لا احرك البيت باللي بيه ما اريدك بالعافية عليهن خل ياخذنك مااااا اريدك

سديته من عنده ولميت جنطتي وكمت الم غراضي
سمعت السيارة جوا .. باوعت ايوب صرف علي حتى لا ياخذني ودخل بالعربانة للبيت وصاح سرى تساعده دخل ..

اني نزلت كال : وين

-عساني لجهنم ما اكعد ولا اصبرلك سااااعة وحدة والله

-لا تصيحين واحترمي نفسج واكعدي

هي منو التحترمن نفسها ترا كافي كافي مليت منكمممم كافي
كمت ادفع بيه سطرني راشدي

لزمت خدي : وانت فوكاهم تكمل انت تضربني يا ايوب هسه تجيب الشيخ وتطلكني ما اطلع منا لا ما اتحيب الشيخ وتطلكني يلا

-انجبي وصمي حلكج خلي افتهممم

- ما تفتهمممم اني ما ابقالك بعد ما اريدك هاي وكفت على طولك بالعافية ما اريد مجازات بس انطوووني روحي طلكنيييي

اندار لسرى كاللها : شصاير

-تعاركت هي وامي ونادية وامي ونادية كتلنها

- عليمن

-والله ما ادري عليمن اني فزيت على صوت صياحها

كامت خالتي تصيح : اطب عليها الكاها تكتل بنادية ومن احاجيها تدفعني وتكلي ولي مني ولج ياهي التولي اني

صرخت : انت مرة شكبرج اشكدج ما تستحين من الله تجذبين

صرخ : طايحة الحظ احتررررررمي نفسج

- ماااا احترم لا احترم امك ولا احترم مرتك ولا اريد احترمك اني وحدة مو محتررررمة عوووفوني جزعتونيييي طلكنييي

- ما تحترمين منو شو تعاي لهنا

حرك عكازته واجا ديريد يهد عليه جلب بشعري كتله : عوفني وخر مني






- ما تحترمين منو ولج

- وخر مني
جريت روحي منه وكمت ابجي ودكيت رجل كتله اليوم الا اتطلكني

- كصي الشر واصعدي اكعدي

- ما اروح البيت الانكتل منك ومن امك ومرتك والله ما اكعد

- على شنو انكتلتي

- عينك عينك تكفخ بابني وتضربه وتركعه بالكونتر وتنكر ما ضاربته وهي والله كبال عيني ضربته

صاحت نادية : الله لا ينطيج والله هيج على كيف دفعته وكع معبالي راح يوكع ليش تتبلين عليه حرام عليج ولج كافي اشيلين خطيتي هسه اني شمسويتلج ابيش مأذيتج

- مساعة ترفسين بيه تريدين ترفسيني ابطني اتمسكني كدامه للصبح وخلي يطبطبلج لا اريده ولا اريدج انطوني طلاكي يلا

-صعدي غفران

-ما اصعد هسه تدز شيخ وتكعده كبالي يطلكني خاف بعدين تطلعلك زاغورة وتكول باطل ما اريده يبطل اعتقني وعوفني اولي يلا

طول الهوسة خالتي تفتر وتصيح وتحرضه واني احجي ونادية تبجي
وتشوفه بظهرها عود اني كاتلتها وجذب ماكو اي حمار كاللها : افتهمت وخري

اني لميت غراضي اخذت ابني اريد عباتي ماكو باوعتها كاعد عليها مشيتلا : كوم انطيني عباتي

- اكعدي

- ما اريد مشكور انطيني عباتي يلا

- ما تروحين

- ما اريدك كوووة هي يا اخي حس ما اريدك

- اي لا تريدين يطبج مرض اني هم ما اريدج اني اللي جزعت منج ومن سوالفج على سالفتج الاخيرة ما تسولف ولا تنبلع

-اي صلوات على محمد لعد طلكني

-اي يجرالج هسه اطلكج بعد وشرط شيخ
جر التليفون من عنده خابر على الشيخ وخابر على عمه كاله : عمي بعد ما نتراهم اني وياها جزعت منها وانعل ابوها لابو الخلفها لابو اليوم اللي اتعرفت بيه عليها ما اريدها عمي جيب الشيخ خلي اطلك

دفعته : لا تغلط على ابويه افتهمت لا تغلططططط

-ما غالط وخري ايدج واكعدي يلا مو تريدين الطلاك يجرالج خليتي اخلص منج

حجت خالتي حيل وابو زايد يوم عيد اليطلكج واخلص منج بس حامل خاف صدك ما يصير

حجيت : يرمي يمين الطلاك ويطلك ومن يصير الطفل يوكع الطلاك بيناتنا لا تخافين

ايوب : هاهية يجرالج يا طايحة الحظ

- لا تغلط كافي اتحملتكم اصلا زايدك مني اتحملت كل هالفترة لا تغلط

دفعته : ما غالط اني لا تمدين ايدج لا اكسرها

كعدت واني احجي: بيئة منافقين ما الوك الكم اخلص منكم ارتاح مكابلتكم صار شهر وروحي طالعة عليمن ومنو اليسوى

فوك ما انضرب وانكتل انوب اني اليسطرني راشدي ويغلط عليه

حجه : هسه مو راح يجي الشيخ بعد هاللغوة هاي ليش ترا راسي مسطور

-ابني اليه ما انطيكياه وحتى البطني اليه افتهمت

-الج كلهم الج بس فكيني الله يفك عقلج

- والا اكعد ابسمايا وحدي وبس توصل ابلغ عليك
خابر اخوية يلا خل يجي يشهد الطلاق مو بس تصرفه

ما جاوبني مشى علاوي ليما لزم برجليه كاله : فكر حظك يبويه امك مخبلة

- خليني مخبلة ولا عاقلة مثلكم ومثل امثالكم

- اعلمج امثالنا شلونها بسيطة

بقيت كاعدة انتظر بس ايدي تحكني رفعت ردن قميصي ايدي زركه من الصوندا كتله : باوع باوع يتمسكنن اني الكتالتهن طلعلي بجسمهن اثر مثل البي هنا مسوياته بيه

امك ما كأني حامل منك حاقدة عليه كانما حبلانة من الشارع

صاح : لا تخربطييين الصمي واسكتي كافي مو تريديييين اطلاك اصبريلج دقيقتين بدون ما تحجين تكدرين

سكتت
رجعت حجيت : الله يخلصني منكم

تنهد : لا حول ولا قوة الا بالله
اندكت الباب اجا عمه كام يستفسر كاله : طايحة حظ جزعت منها وبعد ما اتحملها

كاله : كله صوجك انت الكويت راسها انت الخليتها تستهر

- بسيطة

احا الشيخ وصلاح موجود .. دخلوا بالأستقبال ..
حجه الشيخ حتى يصلح كاله : شيخنا رحمة الوالديك فكني وخلصني من هالمشاكل الجبنها الروحي

صاح عمي على خالتي اني لبست عباتي وحطيت نقابي على وجهي من الشيخ ودخلت وخالتي .. اشرلي ايوب اكعد يمه
كعدت ع القنفة وراه وهو على طرف القنفة بس من حسيتها صدك كامت دموعي تجري شكد طلع حقير رغم مل السويته وياه ما صار بعينه بدال ما يعاقب امه ومرته يعاقبني اني ... شكد كرهته

كمت بس اجر بخشمي من البجي وهو بصفي داير وجهه عني

وعمه يحجي : ابتلى والله ابتلى الله يعينه على ما بلاه

الشيخ : الحمدلله على كل حال والله يكتب اللي بيه الخير حائض بنتي

حجه ايوب : لا العفو شيخ هذه زوجتي ام ابني اني رايد ارمي يمين الطلاق على زوجتي الثانية اسمها نادية بنت كميلة وميحتاج تحضر ارمي يمين الطلاك وخلي العم ياخذها من البيت

دمعتي جمدت بمكانها من سمعت الكاله
وخالتي شهكت : يممممممه ...... يتبع

__

#ذوالفقار_الحجي

((()))

الحلقة_ ٥٠

شهكت خالتي : يممممه عزا العزاني كون شلوووون اطلك مرتك ايوووب

حجه ابو نور : ابني انت جاي تلعب علينا لو شنو من رخصت الشيخ بس خلي نحجي

- لا عمي من رخصتك انت اني من خابرتك اقصد زوجتي الثانية ونحجي بعدين الشيخ كاعد ما يصير الحجي زحمة نخلص ونحجي

خالتي : شنحجي وانت اتريد اتطلك المرة بلا ذنب وتهد هالعرمة هاي ؟ ولك يمه انت شجرالك

خزراها وكاللها : صلاح اخذ الوالدة جوا

وعمه يكله : لا تتسرع ابني

- ما متسرع ولا عصبي ولا ومرتاح والمرة على طهارة شيخ ردد الصيغة وخلي العم وابن العمه يشهدون الله يحفظك شيخنا

كامت خالتي تصيح وتكله : تكسر بخت بنية يتيمة حتى ترضي مرتك ما تخاف من حوبتها عد الله

ندسني ايوب واشرلي اطلع .. كمت وصلاح كام لخالتي يجرها حتى يطلعها .. نادية بالهول لازمة التليفون وحاطة رجل على رجل .. طلعت وجهه مبتسم ومتشمته .. نزلت النقاب من وجهي طلعت خالتي وصلا ما طلع جيف نادية كاعدة بس سد الباب وراها

ونادية تباوعلي بضحكة وتكلي : ها

حجت خالتي لنادية : كومي ولج راح يطلكج جايب الشيخ على طلاكج يخايبة

الضحكة راحت من وجهه وفزت : طلاكي شنو طلاكيش

- ولج طلع جايب الشيخ يطلكج ومكعد هالجلبه هاي حتى يرضيها بطلاكج ولج طبي ولحكي نفسج تعزيتي وتخزيتي يمعزاية بحظج وابختج يغفران

ركضت نادية جرت حجابها وتريد تفتح بالباب قافله صلاح ورا خالتي
كامت تدك وتبجي: ايوب افتح الباب ايوووب ..

ركضت رادت تركض من باب المطبخ كامت تصيح عليها خالتي حتى تاخذ العباية ما اتطب عليهم مفرعة اخذت العباية ، سرى واكفة لازمة علي ندستني : عود صدك راح يطلكها

باوعت لوجه سرى ضحكت مديت اديه لأبني وقرب من اذنها : مدري اخوج مسوي بينا مقلب

-يعني ما يطلكها

-والله ما ادري بس لو رايد ميطلك يجيب شيخ وعمه وصلاح

ضحكت : يعني صدك راح يطلكها

-محد يعرف براس اخوج شكو ننتظر ونشوف

ضحكت ندستها واني اضحك خالتي مفرفحة شافتنا نضحك
لزمت شحاطاتها اثنياتهم وكامت تضرب بينا صعدنا ع الدرج اثنيناتنا وكعدنا ..وصوت نادية وصياحها بالكراج وعمي ابو نور يحجي وياها

انداريت لغرفة البنات نبأ تأشرلنا
ندست سرى تباوعلها .. من ورا بيبيتها تهز جتف وركبة
ضحكت سرى وضمت وجهه بعباتي .. وكاعدات على باية الدرج

ادخلت نادية للهول مفرفحة الشيخ طلع وتكل لخالتي : شفتي ابنج خالة شسوا بيااااا شفتي شلون كسر بختي شفتي شلوووون ظلمني اليوم محد يخلصها من اديه والله ابرد كلبي بيها

التفت للدرج .. تريد تهد عليه
جريت ابني وكمت بسرعة وسرى وكفت كبالها .. وهي تجر بسرى وتصرخ وفاتحة عيونها ولو بدها تاكلني : ام الدييييين ام الطييين وين تروحين من بختي وانت الطلكتيني وكسرتي بختي اليوم اشرب من دمج والله

- لا طالبة منه يطلكج ولا سعيت بطلاكج فديوم كل مرة من اتعب منج اكله طلكني ما مرة كتله طلكها جنت اكولج اطلعي من عدنا بكرامتج انت الما طلعتي !

شجان ابالج يبدل بيته وابنه بنزوة مثلج .. يبعد ابنه ويهجم بيته ويبقيج ؟ ماكو رجال عاقل يسويها ولا اكو مرة محترمة وعدها كرامة وعزة نفس ترضى على روحها اللي انت رضيتي .. انت الجبتي لروحج ورضيتي تخلين روحج متعة ونزوة وحشرتي نفسج برجال متزوج حسبالج من رضيتي بحركاتج راح يبيع بيته ويشتريج لا يا حبيبتي يشبع منج ويشمرج ويحفظ بيته ..

تجر بسرى وتكللها (دوخري مني خلي الزمها ولج وخري) وسرى تكللها ( هسه شنو دوخري قابل هي مطلكتج )

كل ساقي سيسقى بما سقى ..
مثل ما دخلتي عليه من هالباب تضحكين وتقهريني اكلي زادج بيدج .. واطلعي منه بقهرج ..

اني بطرانة وواكفة ع الدرج اشمر حكم من فوك وخالتي مفرفحة وهي فايرة جرت سرى وصعدتلي تريد تلزمني وتصيح ( تعاي الداااايحة تعاااي) .. خليت وشردت

.. انفتحت الباب .. فتحها صلاح ركضت سرى تطب جوا وصلاح دار وجهه وصاح عليها .. عافتني ونزلت بسرعة .. اني نزلت وراها .. بس حطيت رجلي بالكاع علاوي ابني زحلك روحه مني وركض للاستقبال شاف ابوه كاعد .. نزعت عباتي حطيتها ع الدرجولحكته ورجعت كعدت بمكاني .. ايوب كاعد على طرف التخم واني كعدت وشلت رجلية من التخم ورجعت ورا ايوب .. وعلاوي بين رجليه واكف خايف من الصوت .

نادية واكفة تصيح وتبجي وتكله : شسويتلك بيش قصرت وياك كلي ليش جازيتني هيج كليييي

هو ساكت ميجاوبها بس يلزم بعلي ويريد يشيلع على رجله
دخل عمي كاللهم : كافي صياح شهرتنا اكعدوا خل نفتهم بهدوء شكو وشنو الاسباب اكعدوا

كالتله نادية : عمي ترضاها كسرني واني يتيمة ومالي بهالدنيا غيرة ارضى يحطني خدامة عنده بس لا يطلكني والله ما اريد شي بس خلي يبقيني يمه

حجه ايوب : لمي ملابسج وخلي العم ياخذج لامج

ابو نور : ما راح تطلع بدون ما نعرف الاسباب ايوب

- جان عرفت الاسباب من خابرتك وكتلك رايد اطلك رضيتلي من كتلك اريد اطلك حسبالك غفران بسبب مشكلتك وياها ما دورت مصلحتي ما نصحتي ما كتلي بيتك ابنك ردت تخلص منها بس لإن انت ما راضي عليها مو لإن بيتي يهمك فشنو فايدة الاسباب اذا مصلحتي ما تهم !؟

- ولو جانت مصلحتك ما تهمني شعندي متعني وجاي عليك وعايف شغلي ؟ شو ما تستحي انت ولك كافي تسمم عقلك هالسز هاي حتى على عمك و اهلك ايووووب

- عمي انت بمثابة والدي بس اني اعرف مصلحتي وين واني اعرف منهو المسمم عقل منو .. ماكو داعي كل يوم تجون تكلولي طلعت اجت راحت مشت حجت اني ادري بكل خطوة تخطيها مرتي واعرف شلون احكم عائلتي .. ولا الها داعي تحطولي مقارنات وهاي صايينتك وهاي عايفتك اني اعرف منو الصانت ومنو العافت .. امر بيتي الي لحد يدخل بيه وهسه قررت وقراري ما مسموح لاحد يناقشه .. لما اتزوجت نادية ما اجيتك ولا اجيت لاي احد حتى من اريد اطلكها اخذ راي احد ..

علوش ضايقه بالحجي .. ايوب يحجي وهو يتسلق ويلعب ناوشنياه وهو يكمل كلامه: مشكور وجزاك الف خير من جيتلي وشهدت وتم الطلاك بس الحد لهنا .. مو نكران ولا اتصغار حاشى انت فوك راسي بس يا عمي مثل ما اني ما اعرف اسرار بيتك بيتي هم ما تعرف اسراره ولا تعرف اللي اني اعرفه حتى اخذت هذا القرار

اني جريت عصير راني مشمور ع القنفة ما مفتوح انطيته لعلوش حتى يلتهي بيه حجت خالتي : شنهو التعرفه خاينتك طالعة عن شورك شسوت المرة

- وهي لو خاينتني اخليها تمشي بحالها لا ما اجلدها وادفنـ ها بكاعها بس اني مو غشيم واعرف الجاي يصير هي استغلت ضعفي وحالتي وحرضت عمي ودخلته بمشاكلنا وانت السبب واني من ما اكدر ارد على عمي واحترمه ملت على غفران وطلعت قهري بيها بس اني مو غشيم وادري الجاي يدور ويصير شنو من قبل لا اجيبج لهذا البيت شكتلج اني احجي !؟

ما جاوبت !؟ بس تبجي وتناشغ
حجه .. كتلج مرتي وابني ما توصليلهم ولا تنطخين بيهم كتلج هذا الحجي لو لا ؟ ومن قبل لا اجيبج من اول ما تزوجت ششرطت عليج مو غفران ما توصليها ولا تغوريها وكتيلي اختي وما اغثها ولا اذيها !؟ شسويتي !؟ صنتي عهدج حتى ابقيج اني كتلج فد يوم ما اريدها لو رايد اخلص منها لو دوم اكلج عوفيها تحاشيها اتجاهلها اتحمليها !؟

حسبالج غشيم وما ادري من تمشي وتسمعيها الا اهجج الا اطلكج !؟ تعوقت يا بت الناس بس ما انطرشت وربج كعدني حتى اسمع حجيج وتحريضج لامي وعمي عليها .. غفران ام ابني نادية تحرضيني على ام ابني شرايده تهج وابني يعيش بعيد عني واهجم بيتي حتى انت ترضين !؟

ما فد يوم غفران اجت فتنتلي عليج ما فد يوم اجتني وكالتلي هيج وهيج سوت لو هيج كالتلي لو هيج غورتني .. تضم بكلبها وما حجت لاحد عليج ولا حاولت تحرض احد كل اليطلع بيدها تمد سجادتها وتشكي امرها لربها .. انت شسويتي !؟ منو بقيتي وما حرضتي سممتي البيت كله وما ضل حجر على حجر بهذا البيت بس منو فتنتج وكلامج تحجين براس امي وامي تجور عليها ولج صاحيلج اني واسمع تحريضج حتى على اختي وبنت اختي اللي الله ذابها عدي لا اهل ولا عزوة وبنية مسكينة وانت حاطة كورج وياها وتنترين وتزمخين بيها من امي ما موجودة حسبالج اني نايم وما ادري ولج سكتتلج على كل سوالفج واكول يتيمة وما اظلم واتحمل وشلت صبر ايوب بكلبي بطلتي ؟ ناشبتي غفران الا تكابليني وتكعدين وهجت عفران وعافت الغرفة الج وكابلتيني رضيتي ؟ بطلتي منها لو الرايح والجاي تحجيلا غفران دايحة غفران ما تحترم غفران محد يردها ؟ ولج يا بنتي كافي ارحمي نفسج من نفسيتج اعدلي نفسج ربي نفسج السم البداخلج ع الناس بطلي .. اني هنا حدي ما مستعد اخسر بيتي مرة ثانية علمود زواج كتبته بالسر وغلطت غلطة عمري واعلنته وهاهية روحي

- وين اروح اني ما اكدر بدونك والله اموت من افارك ايوب روحي بيك والله اصيرلك خدامه

- ما رايد خدامة ولا ارضى احطلي مرة خدامه واظلمها وصبرت وانطيتج فرص هواي تعدلين من نفسج وما عدلتي .. شجابرج وشحاليج بعيشتي !؟
مو انت تكولي اني معوق مو بعد ما اخلف مو اني ظالم مو اني مو عادل.. يا عمي روحي شوفي حياتج ليش خالتني ظالمج روحي عمي محاللة واموهبة شوفي اللي اليناسبج وخلفي وسويلج عائلة وشتريدين سوي .. روحي.

وهاي كدام الكل ما مسموح لأي احد يكلي شنو اللازم اسوي وشنهو الصح ولا مسموح لأي بشر حتى امي تدخل وتكلي وليش ترضى لغفران وليش تروح وليش تجي اني مو صغير حتى يجي احد يكلي مرتك استهترت مرتك طغت مرتي شأني وحدي ما مسموح لأي حد يكلي مرتك .. وكت التغلط ما اقصر وياها واعرف شلون افرك حلكها بس من يجي احد يكلي مرتك ما مسموح لاخوتها اني مكاومهم وما رضيتلهم اجي لغير اهلها ارضى ..

كلمن يحط روحه بعائلته ومشكورين ما محتاج نصيحة احد وهالكلام الج يمه حطي عينج ببناتج وشيلي روحج من غفران عسى ما تجين وتشوفين هدومي وهدوم ابني خايسات والدود ملتم عليهن احجي وكليلي يمه اغسل هدومة واهدوم ابنك لا تجيبين طاريها اتركوا اني وياها نتصافى اكتلها تكتلني نتذابح نتناحر سمهمكم الراحة عدنا عقول ونحلها بيناتنا .. الموضوع زاد عن حده لا تستغلون شلل رجليه وحالتي هاي وتزيدوها اكثر ما امركم اترجاكم وانتم اهلي

ابو نور : وشلنا علاقة بيك .. هاي حياتك احنا من نحجي غير يهمنا امرك وانت وليدنا ومتأذي ونحجي بس ما طول جلمتنا ثكيلة عليك حرام بالحرم فلا الي دخل بيكم بعد ولو زعلت مرتك هاي بعد كل لاهلها لاحد يخابرني ولحد يحطني حلال لمشاكلكم ما طول عدكم عقول تحلون امركم بيها هاهية

- الله يحفظك عمي واني اسف اذا تحسست لو تصايقت انت عمي وتاح راسي وبمكان ابوي

- لا وليدي انت مشاكل النسوان ما ناخذ بيها بس هو بعد كالوها اليحط روحه بين المرة والرجال ما يطلع غير يسواد الوجه مالي غرض بيك بويه شتريد تسوي سوي .. المطلوب مني شنهو اخذ نادية اوديها لامها بالخدمة كومي بوية اوديج لاهلج

-ما اروح ما اطلع من بيتي ولا اهد بيتي والله ما اروح وشيريد يسوي خل يسوي

دار وجهه عنه ما رد عليها وعلوش كاتل روحه يريد يفتح العصير
باوعله ايوب وجر العصير من ايده يفتحه علوش تزحلك ووكفله كام ايوب يشرب بيه .

وحجه ويا صلاح : بلا امر عليك خوية ساعدني اكعد على الكرسي
كامله صلاح وابو نور يحجي ويا خالتي ويكللها : قنعيها وجيبيها اني راح انتظر برا .

انطاني ايوب العصير والقبق وتلزم بصلاح حتى يكعد ع الكراسي
شاله واني كمت اخذت علوش واني امشي باوعت لخالتي تحجي وتقنع بيها وهي عيونها دم مترضى تكوم .. فزت تكللها : باعي باعي شلون تباوعلي خالة تتشمت بيه

كامت خالتي تصيح : الله لا ينطيج كون ام سلعوم الله يطلع حوبة هالمسكينة بيج حسبالج ربحتي وربج ما تربحين ما طولج ظالمة

عفتهم وطلعت من الغرفة علوش زحلك روحه من عندي ونزل
رحت للغرفة صلاح ديكعد ايوب ع الجرباية سلم عليه وطلع كعدت على طرف الجرباية زمخ : شعندج كاعدة

-شكو

-مو تريدين تروحين لاهلج مو صالج ساعة تصيحين طلكني
يحجيها بننتره وعو عصبي بس يخفي صحكته

كتله : يا حرام ياهو الجايب سيرة الطلاك ابغض الحلال واني عندي طفل اصلا حامل ميصير شنو هالحجي مو عيب
حجيتها والضحكة بوجهي اريد اوخرها بس مدا اسيطر على براغي وجهي كتله : يتهيئلك

-اني يتهيألي !؟

-طبعا يمكن حتى اذنك ضربت كمت متسمع زين

-من اكولج صايرة بربو* ما ترضين

ابتسمت وكمت من مكاني سديت الباب وقفلته ونزعت حجابي .. لزم هدومة : اسمعي لج لا عبالج معوق وما ادافع عن نفسي اهم شي شرفي الا الشرف

فرعت حواجبي بضحكة وتقربت من عنده
ومددت نفسي على طوله وحطيت راسي على صدره حاوطني بأديه وحجه : انت ما عندج كرامة ؟

-شلونها هاي الكرامة !؟ شخص لو مجس لو شنو مشايفتها انت شايفها

-وياج ؟ لا والله ما شايفها
اطردين بيه وتصيحين طلكني واني مچلب بيج يا كرامة بطيخ انعل ابوها

ضحكت وحشرت وجهي بركبته .. اشتم بيه وايدي تتلمسه .. بودي انمزج وياه .. بعد وجهي من ركبته وباوعلي : راضية

- وانت تحجي وياهم واني وعلوش كاعدين وراك محسيتك رجال بكد ما حسيتك سور داير مدايري محاوطني اني وابني ومحافظ علينا .. حسيتك جبل واني وراك ما اخاف من احد ابد ..

-واني شساند ظهري ومقويني لو ما انت وراي ؟ مو وراء كل رجل عظيم امرأة .. عظيمة بعفتها وقوتها وصبرها تواسي وتسنده وتشيل عنه وتحفظ بيته .. من ما ابعدج مو خبث ولا بنيتي اذيج واخليج تتحملين بس اني بدونكم ينكسر ظهري محد بقالي بهالدنيا غيركم

وامي ..
امي راح تتأذى بطلاكي لنادية راح تأذيج
صح مو امج امي ولا واجبج تباريها بس .... قاطعته

- لتخاف مثل ما جنت متحملتها اتحملها مو لخاطرها ولا حتى ارضيك بس الدنيا صغيرة والدنيا تريد والأخرة تريد مثل ما عدها ولد عندي ولد ويمكن الله يذبني وما يبقالي غير ابني ساعتها اصير بمكان امك واحتاج احد يتحملني نبينا يكول (احب لغيرك ما تحب لنفسك واكره له ما تكره لها) راح اعاملها باللي ارضاه لنفسي وراح اباريها لوجه الله تعالى هو اللي يستحق نرضي اذا ارضيها لخاطرك راح امثل كدامك ووراك انهرها بس الله حاضر بكل وقت وراح اتحملها حتى انال رضاه

سحب وجهي باسني بشفايفي وحضني حيل
اندكت الباب ... صوت نادية كال : افتحيلها الباب

كمت من مكاني فتحت الباب بعدتني ودخلت وكفت كدامه كالتله : ايوب اكدر احجي وياك لوحدنا

- الطلاك وقع نادية والخلوة الشرعية صارت حرام والكلام بعد ما يفيد البيناتنا انطوى .. من اخذتج ما اتفقنا على مهر وحطيت مليون كرقم بس راح اخليهن مليونين تاخذيهن بيدج هسه .. وغرفتج توصلج لحد بيت امج وتتنصب .. وذهبج الج .. والله يوفقج بحياتج

- ايوب اني ما اريد ذني كلهن
كامت تناشغ .. خليني خدامة صغيرة الك ولاهلك ما احجي والله

مشيت وكعدت مقابيله على طرف الجرباية هو يباوعلي ساكت .. وهي مستمرة تبجي وتشهك بالبجي كاللها : اذا خلصتي خلي العم يوصلج لا تخلي ينتظر اكثر عيب

- ليش جاي تسوي وياي هيج اني شسويت

- ما عشتي على حب الله .. كلت يمكن بطلت الحيلة وتابت وخلي انطيها فرصة بس دخلتي هالبيت حتى تهدمين ما تبنين واني ما رايد اهدم بيتي مو لغفران نادية سرى ونبأ بيش مأذياتج ؟ ليش يكرهنج ؟ سألتي نفسج ليش يكرهنج ؟

ضرب على رجلي كال :صيحي نبأ
كمت صحت نبأ وسرى وخالتي واكفة وحاطة ايدها على خدها وحيل مقهورة كاللها : خالو ليش ما تحبين نادية ؟
كامت تباوع كاللها : احجي خالو اني وياج لتخافين
- خالو دائما تصيح عليه من محد ماكو وكله تحرض بيبي عليه

حجت سرى : والله اني نفس الشي وصلت مرحلة كمت اكره امي هلكد ما شتكول نادية امي تمشي وراها وتصيح علينا .

حجه : نكول غفران ضرتج هالبنات بيش مأذياتج نادية ؟ تجين تكليلي سرى حطت حمرة وطلعت تتخشخش حتى ما تشوفها وخالتي تكللها اطلعي كبلي حتى لا يشوفج ايوب امي ما تريدني اشوف تجين تكليلي ليش !؟ امي جاي تكو* لخواتي لو رايدتني اتعارك ويا امي لو اكتل اختي لو شتريدين !؟

اصبر اكول تتغير تنعدل تصلح نفسها بس مال توصل بيج لأبني ! تعرفين كل هالعالم بجفه وابني علي بجفه وكتلج لا تتجرئين عليه امه ما ارضالها تصيح بيه لو تكمزه تجين انت تضربين علي ! بيش مأذيج شسوالج !؟ الحقد الشايلته على اهل بيتي شنو سببه !؟

- والله اعدلهن والله ما اتقرب من احد بعد وما عليه باحد ..
كامت تناشغ

كتلها : ترا طولتيها وعرضتيها رجال ميريدج كافي .. كومي ولي واطلعي منا شلزكتي

باوعت لأيوب ساكتلي .. كمت من مكاني وكتلها : مو اتطلكتي مو اتحرمتي على رجلي بعد واكفة كباله شتريدين يلا يلا

دفعتني : معليج انت اني رايده احجي وياه

- لا ما تحجين رجلي تعبان ويريد ينام يلا

كمت ادفع بيها وهي تبجي بقوة .. لزمت بخالتي تتوسلها
خالتي كالتلها : جا من تفتنين عليه وعلى بتي يم ابني ما كتي خالتي .. انت وياه مالي غرض بيكم

عافتها ومشت ..
كمت اتعارك وياها .. ابو نور رايح لإن جرجرتها وما رضت تروح
خابر ايوب على امها تجي تاخذها .. طبت امها تعلعل بصوتها بنص البيت وتصيح : يا ايوب رايدتها بصحتك وبعافيتك كون هالنومة نومة وما تكوم ولا تشوف العافية بعمرك

خالتي سمعت دعاويها على ايوب وهي طلعت مفرعة تركض عليها تكللها : دعاويج على ابني من انعل اهلجن لابو عشيرتجن

وتلازمت ويا امها واني وسرى نجر بخالتي .. شو عافت خالتي وهدت عليه تكلي : ولج ام الطين اطلكت بتي من وراج ولج ام السحورة اطلكييييين بتي

خلتي هدت عليها لزمتها من راسها تجر بيها واني ملختها ودفعتها من عندي واغلط عليها واطرد بيه وهي تفشر فشار مينلبس عليه ثوب عليه وعلى نجلاء خالتي لزمت الجزامة وتولتها بالقنادر طلعتها ودفعت نادية وراها .. وسدينا الباب .. ما سكتت .. كامت بالشارع اصيح وتفشر .. خالتي لبست عبايتها وطلعت .. رجال جيرانه واكف كالتله : خالة ابني زلمة مريض ويعايرنه بمرضه وما يريدها طلكاها ..

كام الرجال يصيح على ام نادية الترست الفرع فشار وصياح بالعرض .. احنا واكفين ورا الباب مفرفحين والزم بعلي ابني يريد يطلع .. لزمته ودخلت جوا ايوب يصيح كتله : طردناها راحت

بس هي ما راحت تعمدت توكف بنص الفرع وتفرش عليه بالأسم وعلى نجلاء وسرى .. طلعت حجية جيران ايوب لزمتهن وكالتلهن : عمت عين الدنيا التخلي حجي ابو عرب وهالبيت الطيب تدخله هيج نسوان خالة استحي اخجلي تفشرين هيج فشار بالمنطقة مو عيب منا زلم ما يصير

خالتي تكللها : فكر حظه خية كال يتيمة واكسب بيها اجر بس بذرة الحرام ما يغزر وياها الحلال ..

كامت امها تصيح ونادية تكللها : اني بزرة الحرام شوفي بناتج اشون واحجي عليه مو زين مني جنت حاملتكم وحاملة خيستكم وخيسة بناتج

كامت خالتي تغلط عليها وتطردهن من الباب وامها تفشر

كالتلهن الحجية : جا هسه الزلمة طلك بتج وكفتج هنا شنهي بعد مو عيب اخذي البنية وروحن من تصيحن هيج وتفشرن شنهو راح نكول هو المو زين لو الله يساعده شلون تحملجن .. امشن منا عيب

الرجال وكفلهن تكسي وصعدهن التكسي غصب وطردهن من المنطقة ..
خالتي جابت الحجية ودخلتها للاستقبال .. تسولفلها دكايك نادية بايوب وشلون هجمت بيته وخلته يطلك مرته وفرقته عن ابنه وكوه رجع مرته وابنه وهسه لازمة ابنه وكاتلته .. اباوع لخالتي من تسولف ولا جنها هي الجانت تكتلني ويا نادية كبل شوية .. عفية بشر يتلون بلحظة

سويت جاي وجبته للحجية
كالتلها خالتي : هاي مرته الاولى
كالتلها : يا ياهو الما يعرف ام علي .. مرت الحجي نشوفها من تروح وتجي شلون مرة شلون اخلاق عبايتها على راسها وعينها بالكاع هم سمعنا حسها فد يوم .. هي موظفة لو طالبة ؟

كالتلها خالتي : موظفة وطالبة هندسة نفط

- يا ايوب مو جان بالنفط كبل

- اي جا هو الخلاها تصير مهندسة نفط يريدها مثله تصير

- الله فكج منها خالة .. خلصتي الله يعينج

خالتي تكللها : بلوة ابتلينا يخية طركاعة ما ينحملن

تركت الحجية ودخلت لايوب ضايج حيل بسبب الصار وعمايل ام نادية ..
انطيته علاجه وكتله : جان من الاول تحسب حساب لهذا اليوم لو اختلفت ويا نادية وامها بهالوضع شراح تسوي غير تفشر على عرضك بالشارع .. ناقص الشرف دائما تكون عنده عقدة الشرف يطعن الناس بيها وغلطتك ناسبت الناقص شرف .. الما يغلط ما يتعلم بهالدنيا نبقى للشيب نوكع ونتعلم مو نهاية الدنيا المهم .. هالموضوع ما بيه رجعه ومينعاد

ثاني يوم ..
خابر على ابن عمه وصاه يجيب ابو اخشاب
وطلب من سرى ونبأ يلمن غراضها كلهن ويطلعنها
جبنا لفة مال علاليك مال زبالة وسرى ونبأ لمن كل ملابسها وغراضها متقربت ولا دخلت خفت اشوف شي يغثني من سوالفها وملاعيبها .. للعصر اجا صلاح جايب ابو اخشاب فتح الغرفة وحملها هي وغراضها وايوب انطاه مليونين يسلمهن النادية .

السيارة كاعد تحمل دخلت نجلاء للبيت كالت : خايبات تعالن شنو هالاخبار الجديدة صدك طلكها ؟

سرى تهوس : هاي فرحتنا الحبيرة فرحت كل العشيرة
هلا هلا هلا

كمنا نضحك .. ونجلاء كعدت ويا امها وسرى تستفسر على الصار وهن يسولفن .. شالوا غراضها كلها .. صعدنا غسلنا الغرفة الفوك كلها وغسلنا الحمام والفوك كله نظفناه .. ونزلنا الجوا شلنا الفراشات ودرنا القنفات وفرشنا غير زوالي وسرى تحجي : والأن اخذت الأشجار والحشائش تنمو ثانية واخذت الاسماك تملئ مياه البحر لقد انتعشت الأرض وأمتلئت بالحياة من جديد

كام يضحك ايوب ونجلاء تكله : صدك ايوب عليك الله شعجب سويتها انت بذيج العركة وعملتها ما طلكت شعجب هسه طلكت

- بعد شفت هيج لازم اتصرف

سرى : مو كعد بالبيت وكابلنا وشاف معاناتنا جان ما كاعدلها .. بس انت لو تشوفين من راد يطلك وخابر عمي و صلاح والشيخ وعلى اساس راح يطلك غفران واني ارجف وخايفة وادعي الله يهدي الوضع تالي سواها علينا فرة خالد ابن الوليد وطلك نادية

كمنا نضحك حجه : جا من اكول راح اطلك نادية شيخلصني غير تموع اذاني ابجيها وامي تحجي وعمي يصف وياهن كلت تعال احجي واصرف حجي حتى تقنعهم عليمن اختصرتها على روحي وكلت على غفران سهلة خليها عاد بس هي تكمز باذاني تاليها ترضى .

كمت اباوعله صفح .. ابتسم وكاللها : صدك يمه ما طول كاعدين انت والبنات خلي ابالج الطابق الفوك راح ابني واعزل بيه عن البيت

فزت خالتي : تعزل المممممن ؟ تكصم بيتي تطي نصه لمرتك

- انطي نصه لمرتي شنو !؟ مسجله باسمها غير اني اكعد بيه

- والبيت كله الك تكصم بيتي على يا مال حتى غفران ترضى

- لا حتى ارتاح انت تكرهين غفران وما تريديها شسويلج بعد هم طاخ وطيخ ..

- لا والله لا تحجيها ما اطي ترضى تعيش بغرفتها ترضى ما ترضى الله وياها ومحمد وعلي

كاللها : اذا الله وياها زين اجرلها بيت قريب وانتقل اني وعائلتي واخذي بيتج

ثغبت : وتعوووووفني علمود مرة يأيوب ؟ تهد امك علمود مرررررتك

- يمه تراها مو سالفة هاي حرنا وياج اقسم البيت ما ترضين اطلع منج ما ترضين شتريدين بعد مالها غير اثنين لو اقسم البيت لو اقسم روحي واكص بالطول نص الج ونص الغفران .. ما صايرة .. ما ترضين اطلع وما ترضين اعزل وما تريدين مرتي على اعصابي متحمل المشاكل .. سالفة مرتك طلعت مرتك كالت مرتك اشتغلت اني جزعت ..

- وياهي التضل النا !؟ خواتك ما يكعدن هن والظهر وذرة الساني يطيح يلا يلمن غرفتهن ياهو اليضل النا لخطارنا ..

- جا يمه انت ما تردينها وما تحبينها اتريدينها للخدمة احجي حك الله !؟ بناتج انت علمتيهن على النوم باجر عكبة من يتزوجن هم هذا حالهن لو هم يرجعلي مطلكات ! هم حسي بيا اني هم تعبت عندي ولد وجاي الثاني بالطريق ورايد استقر وارتاح اريد مرتي تلبس اخذ راحتي ويا عائلتي

- وما تاخذ راحتك الا تعزل !؟ ياهو العدنا ما تلبس منو اللازمها .. بس

- لا بس ولا هم يحزنون الحل يمج لو اعزل الفوك .. لو اطلع بيت وحدي وعود امرلكم يومية وبعد بكيفج

خلا ومشى عربانته وطلع ..
اندارتلي : وزيتي بأذنه حتى يكصملج البيت

- ابنج رايد مصلحته شعندي اكعد ابيتج واني عندي بيت !؟ خو بيتي مأثث وكامل بس حجه هالحجي هذا حتى خاف تصير مشكلة ما اكله اريد ارجع اعيش بالبيت الاشتريته وحالي حالج سمعت الكاله لا حاجيلي بيه ولا مفاتحني ولا ادري

- يا كلابهم اي والله عدي بيت يامن تعب يامن شكى يامن على الحاضر لكى .. اني اربي واتعب وتاليتج تجيني يم حلك الملزك عدي بيت ... وتريد تاخذ ابني وياها

- هذا الأتمناه للأمانة لإن اني بين وظيفتي وجامعتي واثنين اطفال ما راح اكدر اشيل مسؤلية عيال .. بس هم ما ارضى ايوب يتركج انت امه لهذا اني ساكتة وراضية باللي هو يقرره ..

نجلاء : جامعتج شبقالها سنة وتتخرجين

- وليش اوكف على بكلوريوس؟ اني طموحي دكتوراه وناوية اخلص جامعة اقدم ماستر .. وله على شنو كاعد ادرس وكاتلة روحي شو تعيين ومتعينة اني رايدة طموحي وطموحي دكتوراه بالهندسة .

- اي منو لازمج ادرسي بس ما عدنا شي وتعزلين شو هو البيت بطرك امي وسرى وبيتي بيش مضايقاتج

- محد مضايق احد القصة قصة واجبات ومسؤلية .. تعال اذا يوم عندي امتحان ومنظفت البيت شوفي خالتي شتسوي وشتحجي .. اتريد ايوب ايوب ابنها ويفكر بيها كبل ليفكر بينا بس الوضع ما يرهم يرجع كما كان لازم يتغير، خصوصا بعد الصار الإمام علي يكول الوفاء لأهل الغدر غدر عند الله .. وخالتي ما انصفتني يوم اللي ايوب اتزوج عليه .. لحد البارحة هي ونادية تكابلن عليه وكتلني رغم كتلها كتلت علوش .. صفت ويا نادية حقدا بيه .. شمسويتلها وهلكد حاقدة

حجت : ما تنحبين كل وكتج ميبسة خشمج وما راضية وما عاجبج واليحجي وياج ما تجاوبي

- ما طالبة منج اتحبيني بس الاحترام واجب .. الفراغ مو مثل المليان نادية فارغتلج وما عدها شي ... اني بين ضغوط امتحاناتي وجامعتي لضغوط شغلي لايوب وعصبيته ومزاجيته لابنه وحركته والفرة الواحد مو انسان الي .. واني هذا طبعي من اضوج ما يعجبني احجي ويا احد لو اجاوب احد مثل ما كل بشر عنده عيوب اني هذا عيبي بعد ما تحبيني ما جابرتج بس ما اقبل احد يقلل احترامه ويايا كائن من يكون كلنا من طين مثل ما انت بشر وتطلبين الاحترام اني هم بشر

ما رضن بكلامي وسالفة ايوب يعزل البيت ..
تركتهن وكمت للمطبخ .. افتريت ورجعت لايوب لازم تليفونه يباوع بيه شال راسه : ها هم ما عاجبج !؟

ابتسمت : شنو الما عاجبني ؟

- عزال فوك

- لا انسب شي بس عندك فلوس تعزل

-شكد جوا ايدج !؟

- طرك راتب هالشهر

- ليش وين صرفتيهن !؟

- جانن عندي ٥ ملايين صرفتهن بالمستشفى ونقصت حطيت ذهبي عد خالي وانطاني ١٤ الف دولار .. كلهن خلصن بالمستشفى .. وراتبي مال الشهر الفات صرفت منه علاج وكملت قسط الجامعة مال امتحانات .. وبقالي بس راتب هالشهر

- يعني شكد مجموع الصرفتي بالمستشفى ؟

- المهم انت بخير الباقي يتعوض .. عندي باقيلي من ذهبي عقد و ملاوي .. يجيبن ٥ ملايين

- اتركيهن اني ادبرها .. ابيع الجمسي .. واعزل الفوك ونضل على السبورتج لحد ما الله يوفقنا واشتريلي سيارة.

- فرغني سايق عندك هم سيارتي وهم اني
باوعلي ضحكت .. كمت بست خده وكتله : ما طولك تشم الهوى الفلوس والسيارة واهلها كلها جوا رجلك .

-الله يحفظج ابويه شدة ان شاءلله وتكضي .

من بعدها وكل صلاح صلح السيارة وباعها .. وراح تنخى الولد جماعته اللي وياه بالولده كاللهم : يولد رايدلي خلفة زين كون يشتغل شغل عدل عندي الطابق الفوك رايد ابني ومحتاج همتكم وياي .. الكرسي قعدني والحيل مو بالايد .. همتكم وياي شباب

كالوله : حجينا الذهب غير تأمر ..
واحد كاله اخوي يشتغل خلفة هو يطلعلك ..
والشباب كلهم طلعوله عمال بلا ما قبلوا يجيب عامل واحد .. فرغنا البيت الجو وانحبسنا بالاستقبال .. وهو كاعد بالهول وهم مسوين المطبخ معبر يصعدون وينزلون من عنده ..

طلع غرفتنا القديمة انطاها لواحد من الولد غرفته تعبانة ..
صبغوا غرفتنا وسوولها ديكور ورق حائط والغرفة اللي جانت بيها نادية اسس عليها وسواها مطبخ وطبكوها .. والصالة مال الدرج اسسوها وسووها سانويش وعزلوها عن البيت الجوا ونزلة الدرج صار باب ينفتح وينزل من عنده للبيت .. وغرفة صغيرة على اساس غرفة البنات اهله قافليها مسويها مخزن سابقا بوقت ابوه جان تاركها للاسلحة لما صار الحشد واستلموا الاسلحة وبعده الحشد ما جانت اله مقرات وقواعد فوزعوا بالبيوت عتاد وذخيرة فابو ايوب جان قافلها مسويها مخزن .. فارغة ففتحوها وصبغوها وغيروا ديكور الحمام كله نكروا السيراميك القديم وسووها سيراميك جديد سادة واسسو مكان الغسالة والحمام الغربي والجاكوزي والشاور .. كلبوا الحمام ع البطانة .. وطلعوا شباب جماعته نظفوا الطابق وغسلوه غسلة تمام

من قبلها اني مختارة شكل الكاونتر سواه ايوب تفصال فكمل البيت والكاونتر بعده مكامل .. بس كمل غرفتي انطاني مجموعة غرف هم المحل يصير لابن عم واحد وياه .. كالي اختاري اختاريت غرفة تركية عجبتني .. وانطاهم فلوس راحوا جابوله الغرفة ..

واحنا ملتهين بهوسة البيت
الجو ملتهي بأخبار بفايروس اسمه ( كورونا ) انتشر سابقا بالصين واكتشفوا حالات ببقية الدول ومنظمة الصحة العالمية كاعد تحذر من فايروس خطير يهدد العالم اجمع .. بس بعدها الناس مماخذة الموضوع بشكل جدي وومهتمين ذاك الأهتمام القوي .

نصبوا الغرفة مال النوم مالتي .. كالي اصعدي شوفيها ..
صعدت غرفتي صارت ما تنعرف شهكت عيوني بجمالها : ما شاءالله اللهم صل على محمد وآل محمد
افتر بيت متكامل غرفة نوم الي وغرفة صغيرة مال كعدة وصالة جبيرة ومطبخ وحمام .. اكو راحة نفسية كلش عميقة حسيتها من داخلي واني اباوع زوايا بيتي .. صح فوك عيال وطابق ثاني بس حسيت نفسي ملكة وصارتلي مملكة خاصة وراح استقر .. هنا غرفتي اجيبلي مرجوحة نفر هاي اللي تنحط بالغرفة واحط فروة وكوشة واسويلي مكتبة هنا واحط كل الكتب اسويها زاوية للقراءة بغرفتي .. وهنا غرفة علوش اعلمه عليها واترسها العاب ..