"أنتَ تعلمُ ولا أعلم، عبدُكَ الذي أسلَم وسَلّم، وأنتَ الله الأكرم، لا أخشى شيئًا وأنت معي، ولا أخاف ضياع شيءٍ كتبته لي ولو اجتمعت كل الدنيا لتأخذه مني، مُطمئنٌّ في معيتك، فلا تحرمني بتقصيري من رحمتك"

رمضان ⁩فرصتك لإحداث ثقب في دائرة المعاصي المحيطة بك، فرصتك للانعتاق من رِق الذنب المؤرق لك.

رمضان فرصتك للتغير، فخلاصك بإخلاصك.

" حاسة ربنا ما عايزني للدنيا ..! "

..


لي حكاية أربعة سنة بكتب في الGolden list بتاعتي كل سنة اول هدف أحفظ جزء عم ..

بتعدي السنة من بدايتها لنهايتها بحقق كل الأهداف الفيها ..

ما عدا اني أحفظ جزء عم !!

لأني ما بسعى فيه اساسًا

2023 بعد خلصت جامعة طوالي نزلت شغل كمتعاونة في مدرسة .. بحيث ازيد فرصتي في التوظيف ..

التعيين كان شهر ١ اتاجل لغاية نهاية رمضان

مع نهاية رمضان جات الحرب !!

قفلت المدرسة وفقدت فرصتي فأني أتوظف بعد كل الجهد الجبار و "الشطارة " والفلاحة بتاعتي ..

إعتبرتها إشارة لإني أبدا في المجال البحبهُ بعيدًا عن الأكاديميات

وفعلاً بديت بزنسس في مجال العناية بالشعر ♡

كان ماشي حلو وبادي يكبر ♡♡

وهووب مدني تسقط وأفقد الإمدادات البتجيني منها من مواد وغيره

خططي للمرة التانية تبوظ !

صحبتي رسلت لي تيسير ارح نحفظ قرآن

ودي ما اول مرة تفتح لي الموضوع !!

وفضلت ساعة تحكي لي عن البنات الاستغلوا فترة الحرب في حفظ القرآن ♡♡

كالعادة قولت ليها اوكي تمام وما اشتغلت بيها

تفكيري كلو كان في جهة معينة وساعية فيها هي بس !

لملمتا شمل نفسي وبديت لاين تاني في نفس المجال لكن أقل كُلفة ..

كوستي اتحاصرت والناس نزحت

وللمرة الثالثة خططتي تبوظ !

وبرضو تجي أختي تاني تفتح لي الموضوع ..

قولت ليها بكل برود امشوا انتوا انا " ما ماشة !"

وتدور حياتي وتلف وانا ساعية في جهه وربنا عايز لي جهه معينة انا ما عايزة امشيها ..

لسبب انا زاتي ما عارفة غير انه نفسي الامارة بالسوء كانت ماسكة الشفت بكلو .

وتاني صحبتي ترسل لي

" تيسير في مركز جنبنا ارح نمشي "

قولت ليها سمح وحماسي ما بتجاوز ال10% !

وسبحان الله

صحيت يوم لبست عبايتي ومشيت سجلت برااااي صحبتي المتفقة معاها وتشيل وتلز فيني زاتها ما مشت معاي وجات براها برضو!🤣

مشيت وانا والله ما قولت بستمر نهااااي ..

صحبتي نزلت معاي واهو نشجع بعض ♡♡

كل يوم شايلين مرايتنا ومصاحفنا و نطاقش نمشي ..

وكل ما ازاول منو ونفسي تلزني بلقى سبب جاريني من رجلي جايبني لغاية المركز !!

في يوم بتكلم مع صحبتي برا البلد

قالت لي اها اخباار شغلك شنو وحياتك كيف ؟

بضحكة كدة قولت ليها شكلو ربنا ما عايزني اعمل اي حاجة لدنيتي

الفترة دي شكلها فترة الأخرة بس حاساهو بقول لي .. تيسير ركزي في اخرتك شوية اسعي فيها شوية زي ما بتسعي لدنيتك .. اعملي لحياتك الجاية ♡

اليلة بكتب ليكم الكلام ده وانا أتممت حفظ جزء عمَّ بحمدلله وتوفيقه وحده ..

ربنا وفقني وحققت الهدف اللي بيتكتب كل سنة في اول اللستة وما بيتحقق ..!!

اترددتا في البداية أكتب الكلام وما بحب أحكي عن عباداتي أبدًا..بخاف من الرياء و الذي منه .

بس عسى ولعل البوست يصادف واحدة الدنيا بتتقفل ليها في وشها كل شوية وما قادرة تفهم تبدا من وين وتعمل شنو ؟

الرسالة واضحة بس ركزي فيها ♡

ربنا قفل ليك ابواب الدنيا عشان تشتغلي على ابواب الأخرة

خططك بتبوظ ..

عشان خطة ربنا ليك ما للحياة دي خالص

جهدك ده وسعيك ده وظفي للحياة التانية

الكاريير اللي مفروض تشتغلي عليه المرة دي مختلف ..

حانشتغل ونجاهد عشان حياتنا الحقيقية ..

عشان يوم القيامة ناخذ الجايزة ونصل للإستاندر الحقيقي

وننال رفعه ومكانه ومقام عظيم

"مع السفرة ؛ الكرام البررة "

عشان أهلنا يفخروا بينا وهم لابسين تاج الوقار 👑

ده وقت حفظ القرآن ♡

ده وقت الكاريير الحقيقي للحياة الحقيقية ..

والجائزة الأعظم على الإطلاق !♡

جنة عرضها السموات والأرض ♡🌷


#تيسير_أحمد.

-

"أدعوك يارب ان ترزقني أدب النعمة، ألّا أفخر بها على من فقدها، ولا أعلو بها على من يتمناها، ولا أنسى شكرك في كل حين؛ ربي لك الحمد على نعمٍ أزيد تقصيرًا في شكرها، فتزدني منها تفضلًا ورحمة❤️."

اللهم صل وسلم على نبينا محمد وعلى اله وصحبه اجمعين

> هذا المساء ❤️


عن فضل الذكر:

"*لا إله إلا أنتَ سُبحانك إني كنت من الظالمين🌸."*

ماشاءالله
اللهم بارِك !!

كل الناس اللي ربنا وفّقهم
يقولوا الدعاء ده = حياتهم اتيسّرت وأمورهم اتسهّلت بطريقة عجيبة ♡

-صحبتنا كانت مسافرة لزوجها عنده عملية مستعجلة وتأشيرتها
اتأخرت ما طلعت
ربنا وفّقها تقوله، وفي ٤٨ ساعة كانت سافرت!

قالت لينا
ركبت الطيارة وكل شوية أقول للبنوتة جنبي
صحي نحنا في الطيارة ولا أنا بحلم ؟ 😂

ووصلت لزوجها وحضرت العملية
وربنا شفاهُ وعافاه ..

-خالتو صحبة ماما
ولدها أسروهُ الدعامة وما عِرفوا مكانه وين!

ربنا وفقها تقوله وتدعي
بعد خمسة يوم الولد جاء راجع سالم الحمدلله .

-خالتو جارتنا كانت نفسها
تمشي الحج
بقت تكرّر الدعاء بيَقين إنه حتحِج السنة الجاية ..

وفعلاً
السنة اللي بعدها كانت مع تاني فوج يقوم من السودان!

دُعاء يونُس عليه السلام
ما دعا به شخص مكروب وهو مُوقنٌ
بالإجابة ،، إلا وفرّج الرحمن كربه ويسّر أمره واستجاب دعاءه .

..

"*لا إله إلاأنت سبحانك إني كنت من الظالمين، طَمئن قلبي وأرِح بالي واجبر خاطري، وبشّرني بما أرجو وأتمنى يارب❤️".*


#في_الختام..

ممكن نصلّ على الحبيب؟!🌸


- تيسير الصادق

صباح الخير❤️


من الليلة كلها يومين وتكون العشرة الأولى من رمضان "عشرة المغفرة" ودعتنا🥺.

لم شفت البوست ده من قناة (معينات )حمدت الله كتير السنة دي انو يسر لي من عنده أنوي بجديّة اختم الشهر ده 4 ختمات بإذن الله .

في حين انه اقصى ما انجزت في الرمضانات الفاتت كانت ختمتين في الشهر ،ووقتها كنت حاسة اني انجزت انجاز ما بعده إنجاز.

ختم القرآن بالنسبة لي كان حاجة كبيرة وصعبة و ما أخفي عليكم كنت بستغرب شديد وبتعجب من الناس البتختمه في اسبوع ، او 10 يوم أو العجب الناس البتختم كل 5 او 3 أيام!!

كنت بقول مستحيل يكون الكلام ده جد ، الا الناس دي تكون حافظة القرآن أصلاً ؛ عشان كدة الختمة يسيرة عندهم.

كنت بقنع نفسي بكدة .

بس اكتشفت انو الشغلة كلها إرادة حقيقة متبوعة بخطة مُمنهجة من التوفيق الإلهي👌🏻 .

والله زي ما بقول ليكم كدة .

كانت مجرد أحلام ، رغبات شديدة لكن الموضوع برضه كان صعب علي.


رمضان العام ده الحمد لله دخلته بنية صادقة اني أختم 4 ختمات ، ولله الفضل امس تمت أول ختمة لي(اللهم بارك)❤️.

الحاجة الكنت بشوفها زمان صعبة وبعيدة وبتاعة ناس معينين !
لقيت انو أي زول عادي بقدر يعملها.

- بشنو ؟!

بـ جهاد مع النفس
وصدق في النية .
توفير وقت ثاابت للتلاوة
وتقليل الفعاليات على الميديا او التلفزيون(لانه ماف شي مُضيعنا الا هي )
وتوفيق من ربنا..
الواحد بكدة بقدر في رمضان يختم اكتر من ختمة عادي .❤️

- طيب ليه أصلاً نكون مُصرين على الموضوع ؟!
- إشمعنا رمضان ؟!

عشان هو ده شهر القرآن !
عشان ماف ضمان السنة الجاية حتحضر رمضان !
عشان الأجر بيتضاعف في الشهر ده لـ 700 والى 1000 ضعف.
عشان في الايام العادية إذا كان الحرف الواحد بـ 10 حسنات ، في رمضان حيكون بكم ؟!
أكيد رقم خيالي ، أكيد الأجر أكبر مما يتصوره الواحد ويدركه❤️.


ديل إحنا المحتاجين والله
احنا المساكين الفقراء الى الله الطمعانين في رحمته ومغفرته
طمعانين في ملذّات كتيرة في الدنيا دي نفسنا تشتهيها وعشمانين في ربنا ينولنا ليها.
احنا المحتاجين نقدم لربنا الكتيير الكتير ما عشان يستجيب دعواتنا بس
لا !
عشان احنا اصلا لو عملنا شنو مقصرين في حقه قُصاد النعم الغرقانين فيها ،وفي نفس وقت غرقانين في ذنوب والخطايا .

سواء قريت من تلفون او من المُصحف
لسه رمضان باقي فيه زمن كتير
ألحق وكابس الزمن واختم مرة ومرتين واكتر لو بتقدر ماله ؟!
عندك زمن وعندك صحة وعافية المانع شنو ؟! 🥺
..

ربنا يتقبل مننا ومنكم ويعينا على طاعته وعبادته بأحسن شكل ✨.

و أسأل الله رمضان الجاي يوفقني اكون مع الناس البتختم كل 10 يوم ، لا بل كل 3 يوم!
و أصل مرحلة تبقى ختمة القرآن عندي زي شراب الموية❤️😭 ده حلم بالنسبة لي ، بس مدام النية في ..الله قادر ينولني ليه .

"العافية درجات"❤️


#تنزيل_صابر.

تاج الذِّكـر ♥️

بت خالة صحبتنا
كانت بتعانِـي من العين سنتين وشوية .

صحّتها إتدهوَرت وشعرها نزَل
وبقَت ما بتقدَر تتحرّك ولا تقوم من السرير!

أمها قالت ليها كَرّري تاج الذِّكر مع الدعاء

اللهم بارِك
إستمرّت فيهُ أسبوعين وكم يوم، حالتها اتحسنت
شديد وبقَت تتحرّك الحمدلله ♡

..

قريبتنا قالت لي:
مما الدكتور قال لينا ما عندكم فُرصة للإنجاب
حِزنتَ جدًا
وزوجي بقى في حالة إكتئاب!

سبحان الله صادَفني بوست عن تاج الذّكر
وبِقيت
أقولُه كل يوم مع الصدقة والدعاء .

ما مَرّوا ٣ شهور
إلا وربنا رزقني
وبِقيت حامل بي بِتّي الكبيرة الـحمدلله 🥹

فاللهمّ اجعل آخر صبري جبراً يروي ثغور فؤادي، أن تهَبني خيرًا ممّا يحوي دعائي، فترزقني ما يُسعِد قلبي في الدنيا وتجعل في الآخرة مُستقرّي الجنة.

ممكن نصلّ على الحبيب! ♥️


#تيسير_الصادق

" اللَّهُمَّ استُرْ عَوْرَاتي "

بنقولها يوميًا في الأذكار، عمرك سألت نفسك يعني ايه ؟!

يعني : " يارب استرني في كل شئ محبش يتكشف "

- من عورات الأخلاق :

يطلع مني رد فعل وحش يصدم الناس فيا و أنزل من نظرهم
يطلع مني لفظ مش كويس ، يطلع مني خٌلق وحش بحاول أصلح نفسي فيه.

- من عورات الجسد :

تسترني ميظهرش مني حاجة استحي منها .

- من عورات القدرات :

متحطش في مهمة و قدرتي تبقى اقل منها ، أو اغلط غلطة تضيع مني كتير في شغلي او أي مهمة في يومي مطلوبة مني .

- من عورات الأسرار :

اسرار في حياتي محبش حد يعرفها استرني فيها .

دول بعض المعاني، لكن الستر معانيه أكتر و أوسع ..

ذكر مهم و كلنا محتاجينه جدًا يوميًا، إن ميطلعش مننا غير كل خير، و علشان أنت ضعيف جدًا إنك تستر نفسك فـ محتاج تستعين بالله ليل نهار يوصلك للحال ده .
#مفاتيح_السكينة

مني محسن

2025/3/1 رمضان
2025/3/30 عيد الفطر

2025/6/5 وقفة عرفات
2025/6/6 عيد الاضحى

اللهم بلغنا هذا الايام المباركة لا فاقدين ولا مفقودين

قبل فترة قاعد بتونس مع واحد من أصحابي
وفي نص الونسة كده
قمنا جبنا موضوع الزواج

قال لي انت عارف أنا هسي مقبل على زواج
وداير لي وحدة متدينة وسمحة
وحافظة لكتاب الله
وما عندها علاقة مع رجال من بعيد ولا من قريب

قلت ليهو الله ينور عليك يا أخوي
كلامك ده طيب شديد
لكن هل انت التزمت وحفظت كتاب الله ده؟
وماعندك علاقة بالبنات لا من قريب ولا من بعيد؟

قال لي والله الموضوع ده لسه
لكن ان شاء الله بعد الزواج بعالجه!

وحقيقة دي نصيحة مهمة للشباب
ولمن هو مقبل على الزواج!

لمن تجي وتختار شريكة حياتك
اختار مواصفات
تكون قريبة ليك انت وما أعلى منك
مد كراعك على قدر لحافك
وذلك لما تقتضيه القوامة!

ولأن القوامة هي سيادة وقيادة
فالسيد والقائد
لزم عليه أن يكون أعلى وأفقه!

وأعرف كثير من الأخوات الفاضلات
انتكسن بسبب سوء الإختيار!
فاخترن رجال أقل منهن في الدين!

عشان كده لمن تجي تتقدم
أطلب مواصفات تناسبك
عشان ما تضيع بنات الناس معاك
وتنتكس بسببك وتكون مسؤول عنها أمام الله!

القوامة مسؤولية وتكليف وتشريف
فتهيأ وكن أهلاً لها🤍

#فريد_نور

ياخوانَّا أنا الليلة اكتشفت إني قاعدة اعمل حاجة ممكن تغتّس حجري في آخر جهنم -والعياذ بالله- لو ما تُبتا مِنَّها!!

الأيام دي مع السهر البحصل في رمضان، لما نصحى للسحور بكون نعسانة نعاس مبالغ فيو
بتسحّر سريع وبرجع أنوم تاني، وعادةً بكون زابطة منبّهي قبل وقت الشروق بي مسافة بَس تخليني اتوَضّا وأصلي الفجر، طق بلقى الشمس خلاص شرقت!!

أها امبارح بسمع في سورة النساء بصوت شيخ نورين عليهِ رحمة الله، لغاية ما وصلتا معاهو آية، حسيت نفسي أول مرة اسمعا في حياتي ونزلت عليّ كالصّاعقة!!
قال الله تعالى في سورة النساء:
*"إِنَّ المُنافِقينَ يُخادِعونَ اللَّهَ وَهُوَ خادِعُهُم وَإِذا قاموا إِلَى الصَّلاةِ قاموا كُسالى يُراءونَ النّاسَ وَلا يَذكُرونَ اللَّهَ إِلّا قَليلًا"*

اللي هو ديل نحنا البنعمل الحركة دي بالضّبط!
نأخر الصلاة عن مواعيدها كده لغاية ما زمن الفريضة يطلع نقعد نكابس في الوضو ونصلْي بي اسرع ما يمكن عشان نمشي نشوف دايرين نعمل شنو في الحياة دي!!

المشكلة ما هنا
المشكلة ربنا بعد ما وصف الناس البعملو الحركة دي بي إنهم *(منافقين)*، تعاين كده تلقاهم هم بذكرو ربنا بَس ما بذكروه إلا قليلا، يعني في ذكر
طيب ونحنا؟؟ اللي بنصلي سريع وبنقوم من المصلاية على السرير ومن السرير على التلفون ومن التلفون يحلّنا الله، حَبّة ذكر بالغلط ساي ماف
نحنا كده ما اكعب من المنافقين ديل عديل!

والأدهى والأَمَر لمَّن تواصِل باقي الآيات
حا تلقى إنو المنافقين البعملو كده ديل مصيرهم شنو؟
واصل معاي في نفس الوجه كده بعد آيتين يصف فيهم باقي حال المنافقين،
ربنا قال:
*"إِنَّ المُنافِقينَ فِي الدَّركِ الأَسفَلِ مِنَ النّارِ وَلَن تَجِدَ لَهُم نَصيرًا"*

تخَيّل يا إنسان هذا الكم الهائل من الناس الحوليك وبحبوك ديل
ولا نفر فيهم، ولا ربع زول زاتو
ما بحلّك يوم القيامة! .. "وَلَن تَجِدَ لَهُمْ نَصيرًا" ..!!

لكن لأنه سبحان الله، ربنا سبقت رحمتهُ عذابُه
فقال لينا:
*"إِلَّا الَّذينَ تابوا وَأَصلَحوا وَاعتَصَموا بِاللَّهِ وَأَخلَصوا دينَهُم لِلَّهِ فَأُولئِكَ مَعَ المُؤمِنينَ وَسَوفَ يُؤتِ اللَّهُ المُؤمِنينَ أَجرًا عَظيمًا"*
يعني
-تتوب
-‏تصلح حالك مع ربنا
-‏تعتصم بالله
-‏تخلص دينك ليهو عز وجل
انتا كده مع المؤمنين= "وَسَوفَ يُؤتِ اللَّهُ المُؤمِنينَ أَجرًا عَظيمًا"

فياخوانَّا نحنا في شهر عظيم ومبارك قاعدين نلقّط.

#نُقل

فأطيبُ ما في الدّنيا معرفة اللّٰه،
وأطيبُ ما في الآخرة النّظر إليهِ سُبحانه.

-ابن تيمية.

بوست كاتبتو أم في وحدة من القروبات (في الفيسبوك ) عجبني فحبيت اشاركم بيه ❤️.
..

بتقول:
لما تجيني في بيتي واولادك يبكوا كتير ويكون عايزين يشيلوا من الحلاوه كم مره وانتي تمنعيهم وانا اكون ساكته وما اعلق على الموضوع او ما اقول ليك لا لا خليهو يشيلوا
دا ما بعني اني بخيله او كعبه لا والله....
انا ام زيك وعارفه انتي بتجاهدي قدر شنو عشان تربيهم وعشان تعلميهم الصاح والغلط ماعشان مجامله اخرب ليك طبع اولادك.. لاني لو في مكانك ما ح ارضى اولادي يشيلوا من الشياله ويخمجوا.. اكيد ما بعجبني الموضوع عشان كده ما برضاها ليك...
لما اجيك في بيتك واولادي يكونوا يلعبوا مع اولادك واولادك يجروا يدخلوا غرفة النوم وانا امنع اولادي يدخلوا معاهم دا ما بعني اني كعبه وماتقولي لي لا عادي ما اطفال.. لا ما عادي لازم اعلم اولادي انو عيب ندخل غرف نوم الناس..
والاطفال بتعلموا من هم صغار عشان كده ما ح اجاملك واخلي اولادي يعملوا كده تحت مسمى ديل ما اطفال...
ربنا بسألني من الاطفال ديل ولازم اربيهم صاح..
ياجماعه مانجامل على حساب اولادنا
لما امنع طفلي يشرب وراك من الكبايه ماتزعلي بس انا عايزه اعلم اطفالي على حاجه معينه...
ياجماعه دا ما بعني اننا كعبييين بس نحنا قدام مسئوليه صعبه لا تتحمل المجامله
اذا بديت اجامل ح اعلمهم الخمج.. ح اهد حاجات كتييييره..
ماتجامليني علي حساب اولادك وانا ما بجاملك على حساب اولادي...
المجامله هي الحتخرب كل البنبي فيهو وديل امانه في رقبتنا...

انا ما بجامل على حساب اولادي❤️

إيلاف مختار.

تعالو احكي ليكم حاجة ..❤️


قبل كم شهر مشيت نزلت في بيت واحدة من بنات أهلنا لمدة يوم فقامت جابت لَي جلبابين اختار منهم واحد عشان ألبسو

كان فيهم واحد حلو شديد ما شاء الله، وحسيتو اتفَصّل لَي عديل🤣
لبستو وبقيت بتفرج على روحي في المراية وأول مرة أحس إني عايزة أقول لي زول" لبستك دي حلوة فيني اديني ليها!"

بقيت اردد في نفسي لغاية الصباح:
"ولا تَمُدَنَّ عينيكَ إلى ما مَتَّعنا بهِ أزواجًا منهم".


تاني يوم طلعتَ ليها جلبابها ده وشكرتها ومشيت أهلي وخلاص نسيت القصة كلها🤣

قبل 3 أسابيع تقريبًا لاقاني فستان حلو شديد في محل، وما كان عندي سعرو
فلما اعتذرت من صاحبة المحل، قالت لي عاجبك؟
قلتَ ليها أيوا
فقامت جابت كيس من الدرج ختت فيو الفستان وقالت لي اسمك منو؟
قلتَ ليها صفِيَّة مصطفى
فقامت كتبت اسمي في الكيس وقالت لي ح اخليو ليك في الريسبشن، متى ما جبتي حقو تعالي شيليو

عدت فترة ورقدنا مستشفى وما لقيت طريقة امشي تاني

قبل أيام عديت بي شارع المحل وأول ما دخلت البت عرفتني وطلّعت لي الكيس

لغاية هنا الموقف عادي
الما عادي
إني لمن لبست الفستان انتبهت لي إنو التشكيلة الفيو هي نفسها الكان عجبتني في جلباب بت أهلي داك
بس تشكيلة وقَصَّة الفستان كانت أحلى عشرة مرات من الجلباب!

حسيت كأنو ربنا بقول لي ..
لما ما تمدّي عينك وتتمني حاجة زول، ح اعوّضك أحسن منها وأجبر بي خاطرك!

"ولا تَتَمَنَّوا ما فَضَّلَ اللهُ بهِ بعضَكُم على بعض"✨

في ظل انتشار فيديوهات وحياة الناس على مواقع التواصل
ح نتمنى كتير إنو يكون عندنا زي ما عندهم، واننا نعيش زي ما هم عايشين
وإنو ليه هم عندهم ونحنا لأ!!

ولكن بالمُقَابِل
تجربة رُقَادنا في مستشفى الكلى، علَّمتني إني ما أعاين للمافي والما عندي، والأحسن مني
بل أحمد ربنا إني ما في مكان العيَّانين ديل، وإنو ربنا رزقني جسد مُعَافَى ونفس طيِّبَة، وحياة هادِئة دون قلق المصير أو الخوف من المجهول بسبب سوء الحال!

الحمدلله على العندنا قبل المافِيش
والحمدلله على طيب الخاطِر بما رزقنا الله وأكرمنا بهِ
الحمدلله حمدَ عبدٍ عرفَ فشَكَر

خِتَامًا:

"وَلا تَمُدَّنَّ عَينَيكَ إِلى ما مَتَّعنا بِهِ أَزواجًا مِنهُم زَهرَةَ الحَياةِ الدُّنيا لِنَفتِنَهُم فيهِ وَرِزقُ رَبِّكَ خَيرٌ وأبقى."


_ورِزقُ رَبِّكَ؟!
=خيرٌ وأبقَى❤️


#صفية_مصطفى.
#قصص_حقيقية.

الرضا إنك تكون عندك يقيــن كبير بإن هو ده الخيــر ليــك وتكون مُسَلَّم لأقدار اللَّه.

قَالَ ﷺ: (إِنَّ عِظَمَ الجَزَاءِ مَعَ عِظَمِ البَلاَءِ، وَإِنَّ اللَّهَ إِذَا أَحَبَّ قَوْمًا ابْتَلاَهُمْ، فَمَنْ رَضِيَ فَلَهُ الرِّضَا، وَمَنْ سَخِطَ فَلَهُ السَّخَطُ).

﴿ وَأَلْقَيْتُ عَلَيْكَ مَحَبَّةً مِنِّي ﴾

جاء في تفسير الآية الكريمة:

"أي جعلتُ ملاحةً في عينيكَ ، لا يراكَ أحدٌ إلّا أحبّك."

سبحان الله🥺!

فاللهم اجعلنا ممّن ألقيتَ عليهم محبّتك ، فجعلتَ لهم قَبولًا في الأرض والسماء✨.

رسالة مهمة جدًا لكل بنت!!

- إوعى تفتحى كاميرا لأى شاب على الإنترنت مهما كان
- إوعى ترسلي صور خاصة لأي شاب حتى لو قريبك
- إوعى شاب يستعطفك ويستدرجك بالكلام فى شات
- إوعى تأمنى وتثقي في شاب مادخلش البيت من بابه

كوني واعية الرجل الحقيقي هيدخل بيتكم من بابه أو هيبعد لأنه بيتق الله!
غير كدا بيضحك عليكى هيصورك ويذلّك ويفضحك فى كل مكان، صدقيني الموضوع صعب جدًا بنات بسببه بتعيش ندمانة طوال حياتها

بيوصل لي رسايل تقطع القلب وأصعب مما تتخيلي فصوني نفسك لأنك غالية.. إنتي غالية بدينك وحياءك وآنوثتك.

-
" اللهم اجعلني ممن كان سعيه موصولًا بالخير،
مباركًا بالأثر، مليئًا بالجبر ، ومِمن أصلحت قلبهُ و يسرت أمرهُ وسترت عيبهُ وغفرت ذنبهُ ، لا إله إلا
انت سبحانك إني كنت من الظالمين❤️ ".

اللهم صل وسلم على نبينا محمد وعلى اله وصحبه اجمعين.