ABDUGʻAFFOR KARIMJONOVICH QIRG’IZBOYEV
FIDOKORONA MEHNATLARINGIZ UCHUN TASHAKKUR!

Hukumatning tegishli qaroriga ko‘ra Nizomiy nomidagi Toshkent davlat pedagogika universiteti rektori, tarix fanlari doktori, professor ABDUGʻAFFOR KARIMJONOVICH QIRGʻIZBOYEV Namangan davlat universiteti rektori lavozimiga tayinlandi.

Shu munosabat bilan universitetda fidoiy va jonkuyar rahbar, yuksak insoniy fazilatlar sohibi — Abdug‘affor Karimjonovich Qirg‘izboyevni hukumat topshirig‘iga ko‘ra yangi lavozimni egallashi uchun kuzatuv tadbiri bo‘lib o‘tdi.

A.Qirg‘izboyev Nizomiy nomidagi Toshkent davlat pedagogika institutini 1985-yili tamomlab, 1992-yildan 2005-yilgacha bo‘lgan davrda dekani o‘rinbosari, kasaba uyushmasi raisi o‘rinbosari, universitetning birinchi prorektori, 2005-yildan 2009-yilgacha Oliy va o‘rta maxsus ta’lim vazirligining o‘rta maxsus, kasb-hunar ta’limi markazi Ma’naviy-axloqiy tarbiya va sport bo‘limi boshlig‘i, 2010-yildan 2019-yilgacha ketma-ket ikki marotaba O‘zbekiston Respublikasi Oliy Majlisi Qonunchilik palatasi deputati hamda Fan, ta’lim, madaniyat va sport masalalari qo‘mitasi raisi, 2019-yildan 2021-yilgacha O‘zbekiston Respublikasi Vazirlar Mahkamasi Ma’naviyat va davlat tilini rivojlantirish masalalari departamentining mudiri lavozimlarida, 2021-yildan hozirga vaqtga qadar universitet rektori lavozimida faoliyat yuritdi.
A.Qirg’izboyev 2019-yilda Prezident qarori bilan “Mehnat shuhrati” ordeni bilan taqdirlangan.

A.Qirg‘izboyev universitet rektorligiga tayinlangan 2021-yildan universitet faoliyatini takomillashtirish bo‘yicha tinimsiz harakatda bo‘ldi. Ijtimoiy muhit yaxshi bo‘lmagan, kadrlar qo‘nimsizligi yuqori darajada bo‘lgan, yildan yilga milliy reytinglarda nufuzi tushib borayotgan, o‘quv auditoriyalari va talabalar turar joylariga o‘tkir ehtiyoji bor bo‘lgan universitetning faoliyatini takomillashtirishda universitet tarixida o‘chmas iz qoldira oldi.

A.Qirg‘izboyevning tashabbusi va universitet ilmiy-pedagogik jamoasining sa’y harakatlari bilan universitet qisqa muddatlarda o‘z mavqeini mustahkamladi. U boshchiligida respublikamizda pedagogika sohasining rivoji hamda universitet faoliyatini takomillashtirish yuzasidan ko‘plab takliflar ishlab chiqilib, davlat rahbari va hukumati hamda vazirliklarga kiritildi.

Natijada 2022-yilda Prezident farmoni bilan universitet pedagogika yo‘nalishi bo‘yicha o‘quv dasturlarni ishlab chiqishda yetakchi oliy ta’lim muassasasi etib belgilandi. Shu yili universitet faoliyatini takomillashtirish bo‘yicha Prezident qarori qabul qilindi. 2024-yilda esa yangidan qurilayotgan Yangi Toshkent hududidan universitet uchun 40 gektarlik maydonda zamonaviy kampus qurish uchun joy ajratildi.

Universitetda so‘nggi 3 yil ichida foydalanilmay turgan 3 ta o‘quv binolari kapital ta’mirdan chiqarilib, yangi o‘quv o‘rinlari yaratildi hamda 4 ta fakultet talabalari ushbu binolarga ko‘chirildi. Ilmiy salohiyat so‘nggi 3 yilda 38 % dan 62 % gacha oshirildi, universitet xalqaro tan olinganlik darajasi, ilmiy-tadqiqotlar rivoji, ta’lim sifati bo‘yicha Osiyo oliygohlari reytingi TOP-1000 taligiga kirgan 14 ta respublika OTM laridan biri, yagona pedagogika oliygohiga aylandi. GreenMetric xalqaro reyting agentligi reytingida qatnashgan 41 ta respublika OTMlari o‘rtasida 4-o‘rin, jahon miqyosida 353-o‘rin egalladi.

Universitetning 4 ta ta’lim dasturi respublika pedagogika oliygohlari ichida ilk bor xalqaro akkreditatsiya sertifikatiga ega bo‘ldi. Universitetda boshqaruv tizimini respublikada birinchi bo‘lib, ISO:21001:2018 xalqaro talablari asosida tashkil qilinishiga erishildi. Dunyoning TOP-1000 talikka kirgan xorijiy oliygohlar bilan ko‘plab qo‘shma ta’lim dasturlari yo‘lga qo‘yildi.
A.Qirg‘izboyev tajribali va adolatli rahbar, faol tashkilotchi, o‘ziga hamda hamkasblariga nisbatan o‘ta talabchan. O‘z kasbiy mahoratini oshirish ustida uzluksiz ishlaydigan, kamtarin mehnatsevar inson, yoshlarning g‘amxo‘r murabbiysi, Vatan ravnaqi, ta’lim sohasining rivoji yo‘lida tinimsiz mehnat qilayotgan jonkuyar shaxs.