" ከማረሚያ ወጥተዉ ወደ ቤታቸዉ ገብተዋል " - ቤተሰቦች

የቀድሞ የሀዋሳ ከተማ ከንቲባ ረዳት ፕሮፌሰር ፀጋዬ ቱኬ እና አብሯቸዉ ታስረዉ የነበሩት የቀድሞ የሀዋሳ ከተማ ልማትና ኮንስትራክሽን መምሪያ ምክትል ኃላፊ አቶ ታርኩ ታመነ ከማረሚያ ተለቀዉ ወደ ቤታቸው መግባታቸውን ቤተሰቦቻቸው ለቲክቫህ ኢትዮጵያ ተናግረዋል።

ላለፉት ሁለት ዓመታት ለሚጠጋ ጊዜ በእስር ላይ የቆዩትና ከሁለት ወራት በፊትም የሀዋሳ ከተማ ከፍተኛ ፍርድ ቤት በሁለት የክስ 13 ዓመት ፅኑ እስራት ዉሳኔ አስተላልፎባቸዉ የነበሩት የቀድሞ የሀዋሳ ከተማ ከንቲባ ረዳት ፕሮፌሰር ፀጋዬ ቱኬ ይግባኝ ጠይቀዉ ዛሬ በሲዳማ ክልል ጠቅላይ ፍርድ ቤት በነፃ መሰናበታቸውን ተከትሎ ከሀዋሳ ከተማ ማረሚያ ቤት ወጥተው ቤተሰቦቻቸውን ተቀላቅለዋል።

ረ/ፕሮፌሰር ፀጋዬ ከማረሚያ ቤት ወጥተዉ ወደ ቤታቸዉ ሲሄዱ በርከት ሰዎች በሞተር ሳይክሎችና በመኪና አጅቧቸዉ ደስታቸዉን ሲገልፁ ነበር።

ቲክቫህ ኢትዮጵያ
ሀዋሳ
#TikvahEthiopiaFamilyHawassa

@tikvahethiopia

“ ካሜራ ይዛ አንገቷን በመስኮት አውጥታ ነበር ”- የኮንታ ዞን ጸጥታ መምሪያ

በደቡብ ምዕራብ ኢትዮጵያ ክልል ኮንታ ዞን ዛሬ በደረሰ የመኪና አደጋ የዞኑ የመንግስት ኮሚዩኒኬሽን የካሜራ ባለሙያ ሕይወት መቀጠፉን ዞኑ ለቲክቫህ ኢትዮጵያ አረጋግጧል።

አንድ ዞኑ ጸጥታ መምሪያ አካል በሰጡን ቃል፣ “ አንዲት ካሜራ ማን ለመግስታዊ የሥራ ጉዳይ ከዞን ወደ ወረዳ እየሄደች በአጋጣሚ ቀረጻ ላይ እያለች መኪና ተገልብጦ ነው የሞተችው ” ብለዋል።

የአደጋው ምክንያት ምን እንደሆነና ከሟቿ ባሻገር ምን ያህል ሰዎች እንደተጎዱ ሲጠየቁ፣ “ የቴክኒክ ችግር ይመስለኛል። የመንገድ፣ የቦታ ችግር አይደለም። የቴክኒክ ችግር ሳይሆን አይቀርም የሚል ስጋት አለ። ሌላ ሰው ብዙ የተጎዳ የለም ” የሚል ምላሽ ሰጥተዋል።

“ ካሜራ ይዛ አንገቷን በመስኮት አውጥታ ነበር ” ብለው፣ አደጋው ዛሬ ከረፋዱ 4 ሰዓት ገደማ እንደደረሰም ለቲክቫህ ኢትዮጵያ ተናግረዋል።

የክልሉ ርዕሰ መስተዳድር ነጋሽ ዋጌሾ (ዶ/ር)፣ “ዛሬ ረፋድ እህታችን ወ/ሮ ቃልኪዳን መለሰ የኮንታ ዞን የመንግስት  ኮሚኒዩኬሽን የሚዲያ ባለሙያ ለመንግስት ሥራ በሚታደርገው ጉዞ በደረሳት ድንገተኛ  የመኪና  እደጋ  ሕይወቷ  አልፏል ” ሲሉ አስታውቀዋል።

“ አደጋው ሲያጋጥም በቅርብ ርቀት ለነበርን ሐዘኑ በጣም ጥልቅ ነው። ፈጣሪ ነፍሷን በአፀደ ገነት ያኑርልን ” ብለው ለሟች ቤተሰብ መጽናናትን ተመኝተዋል። “ በአደጋው የአካል ጉዳት ለደረሰባቸው የሥራ ባልደርቦቻችንም ፈጣሪ ፈጥንነው  እንዲያገግሙ ብርታቱን ይስጣችው ”ሲሉ በፌስቡክ ገጻቸው አስፍረዋል።

ቲክቫህ ኢትዮጵያ
አዲስ አበባ
#TikvahEthiopiaFamilyAA

@tikvahethiopia

#Tigray

" የተደፈረው ግዛትና ተፈናቃዮች በሰላማዊ መንገድ ለመመለስ የሚደረገው ሁሉን አይነት ጥረት ካልተሳካ  ዝም ብሎ የሚተው እንዳልሆነ ሊታወቅ ይገባል " - አቶ አማኒኤል አሰፋ

በሺህዎች የሚቆጠሩ ተሳታፊዎች የተገኙበት ተፈናቃዮች ወደ ቄያቸው እንዲመለሱ የሚጠይቅ " ይበቃል ! " በሚል መሪ ቃል የተዘጋጀ ሰላማዊ ሰልፍ በመቐለ ተካሂደዋል።

ዛሬ ሰኔ 13/2017 ዓ.ም ለሦስተኛ ቀን የተካሄደው ሰላማዊ ሰልፍ በክልሉ ጊዜያዊ አስተዳደር ውሳኔ መሰረት የመንግስት ሠራተኞች ስራቸውን በማቆም የታደሙበት ነው። 

በሰልፉ ማጠቃለያ በጦርነቱ ምክንያት የተፈናቀሉ ዜጎች ወደ ቀያቸው እንዲመለሱ የሚጠይቁ በርካታ መልእክቶች ተደምጠውበታል።

በሰልፉ መልእክት ያስተላለፉት የክልሉ ጊዚያዊ አስተዳደር ምክትል ፕሬዜዳንት አቶ አማኒኤል አሰፋ " የተደፈረው ግዛትና ተፈናቃዮች በሰላማዊ መንገድ ለመመለስ የሚደረገው ሁሉን አይነት ጥረት ካልተሳካ  ዝም ብሎ የሚተው እንዳልሆነ ሊታወቅ ይገባል " ብለዋል።

" ከተፈረመ ሦስት ዓመት ሊሞላ ወራት የቀሩት የፕሪቶሪያ የሰላም ስምምነት ተኩስ ከማቆም በዘለለ የተፈናቃዮች ደህንነት ማረጋገጥ አቅቶታል " ሲሉ ተደምጠዋል።

" የትግራይ ህዝብ ሉአላዊ ግዛቱ ተቀምቶ ፣ ከቄዩ ተፈናቅሎ ተሰዶ በማያቋርጥ መከራ ተዘፍቆ ይገኛል " ያሉት ምክትል ፕሬዜዳንቱ  " የፌደራል መንግስት በጦርነት ያላሳካው ድል በፕሪቶሪያ ውል ስምምነት ስም የተከፋፈለች ትግራይ እንድትኖር የዲሞግራፊ ለውጥ ለመቀየር እየተጠቀመበት ነው " ሲሉ ተደምጠዋል።

" የፌደራል መንግስት ለሰላም ዋጋ ሰጥቶ እንዲሰራ ደጋሜ ጥሪ እናቀርባለን " ያሉት አቶ አማኒኤል " የምዕራብ ትግራይ ተፈናቃዮች የኩርድ ህዝቦች ዕጣ ፈንታ እንዲደርሳቸው የሚፈቅድ ትክክለኛ ያልሆነ ተግባር መቆም አለበት " ሲሉ ተናግረዋል።

ዛሬ በመቐለ ሮማናት አደባባይ የሦስት ቀናት ማጠቃለያ ሰላማዊ ሰልፍ ፦
- የጊዚያዊ አስተዳደሩ የካቢኔ አባላት
- የሁሉም የሃይማኖት ተቋማት አመራርና ምእመናንና ምእመናት 
- የሚድያ ባለሙያዎች በሺዎች የሚቆጠሩ የመንግስት ሰራተኞች
- ተማሪዎች
- መምህራንና ሌሎች የህብረተሰብ ክፍሎች መገኘታቸው ተነግሯል።

የፌዴራል መንግሥት ሁሉም ተፈናቃዮች ወደ ቄያቸው እንዲመለሱ ፅና ፍላጎ እንዳለው በተደጋጋሚ መግለጹ አይዘነጋም።

የቀድሞ የጊዜያዊ አስተዳደሩ ፕሬዝዳንት አቶ ጌታቸው ረዳም አሁን ላይ በትግራይ ትርምስ እንዲፈጠር እየሰራ ያለው የህወሓት አንጃ ተፈናቃዮችን ለፖለቲካ ፍጆታ በመጠቀም ተፈናቃዮች ወደ ቄያቸው እንዳይመለሱ እየሰራ መሆኑን አስገንዝበው ነበር።

የኢፌዴሪ ጠቅላይ ሚኒስትር ዐቢይ አሕመድ (ዶ/ር) ከትላንት በስቲያ ከፖለቲካ ፓርቲዎች ጋር ውይይት ባደረጉበት ወቅት የትግራይ ተፈናቃዮችን ጉዳይ አንስተው ነበር።

" የተፈናቀሉ ሰዎች መመለስ በሚመለከት 100% ዝግጁ ነን እኛ  100% ፤ ነበርን ነን ፤ ራያ እኮ መልሰናል ፤ ራያ ተመልሰዋል የተፈናቀሉ ሰዎች ወልቃይትም እንደዛ አይነት ፍላጎት ነው ያለን። ከጊዜያዊ መንግሥቱ ጋር እየተነጋገርን ነው በእኛ በኩል እነኚያ ዜጎች ለፖለቲካ ፍጆታ መጠቀሚያ ሳይሆኑ ቦታቸው ቢመለሱ ከማንም በላይ ኢትዮጵያ ታተርፋለች " ብለዋል።

" በእኛ በኩል አንዴ አይደለም 10 ጊዜ እቅድ ያወጣነው ፤ የትግራይ ጉዳይ ብዙ የማይገደን ፣ የማያሳስበን አይመሳላችሁ " ሲሉ ገልጸዋል።

" ያስጨነቀንን ጉዳይ በግልጽ እንድታውቁት ግን ትንሽ ዘመን ተቀይሯል የዛሬ 4 አመት 5 አመት የነበረን የውጊያ አቅም የነበረን ቴክኖሎጂ እና ዛሬ ትንሽ ይለያያል። በተቻለ መጠን maximum ውጊያ ብናስቀር ይሻላል ለምን ? እንደምታውቁት በባለፈው ውጊያ ያኔም ተናግሪያለሁ ከትግራይ ወጣቶች ከትግራይ እናቶች በላይ የተጎዳ ሰው የለም ፤ የሚያስገድሉ ሰዎች ይፎክራሉ አስገዳዮች ይፎክራሉ ሟቾች ግን ጉዳዩን ሳያውቁ ይጠፋሉ ያ እንዳይፈጠር ነው maximum ትዕግስት የምናደርገው " ብለዋል።

" ትግራይ ውስጥ ሊመጣ የሚገባው ልማት ፤ ሊሰራ የሚገባው ስራ በበቂ ተሰርቷል ብለን አናምንም እንጂ የሚደረጉ ሙከራዎች unconstitutional ልምምዶች እንዳሉ ስለማናውቅ አይደለም በደምብ ነው የምናየው " ሲሉ ገልጸዋል።

ቲክቫህ ኢትዮጵያ
መቐለ
አዲስ አበባ
#TikvahEthiopiaFamilyMekelle
#TikvahEthiopiaFamilyAA

@tikvahethiopia

" የእድሜ ልክ እስራት ተፈርዶባቸዋል ! "

በደቡብ ኢትዮጵያ ክልል ወላይታ ዞን ሶዶ ከተማ የ8 ዓመቷ ልጅ ላይ የግብረ ስጋ ድፍረት በመፈጸምና በመግደል የተጠረጠሩ ግለሰቦች የግብረስጋ ድፍረት ወእና ግድያ ወንጀል መዝገብ ተከፍቶባቸዉ በሰውና በህክምና ማስረጃ በመረጋገጡ የቅጣት ዉሳኔ እንደተላለፈባቸው የሶዶ ከተማ ፖሊስ አዛዥ ም/ኮማንደር ሀብታሙ አስፋዉ ለቲክቫህ ኢትዮጵያ አሰረድተዋል።

ዳዊት ሻንቆ እና ታምራት ኦሳ የተባሉ ሁለት ግለሰቦች በሶዶ ከተማ ' ፋና ዎንባ ' ተብሎ ከሚጠራዉ አከባቢ ሰኔ 16/ 2016 ዓ/ም የ8 ዓመት ልጅን ከቤት አታለው ወደ ጫካ በመውሰድ የግብረ ስጋ ድፍረት ወንጀል ከፈጸሙ በኋላ ወዲያዉኑ ሕይወቷ ያልፋል።

በዚህም ጊዜ እራሷን ያጠፋች ለማስመሰል በአከባቢዉ በሚገኝ አንድ ኦና ቤት በማስገባት አስክሬኗን በማንጠልጠል ከአከባቢው መሠወራቸው በፖሊስ ምርመራ መረጋገጡን አዛዡ ገልፀዋል።

የወንጀል ድርጊቱ ጥቆማ የደረሰዉ የሶዶ ከተማ ፖሊስ ግለሰቦቹን በጠንካራ ክትትል ይይዛቸዋል።

የምርመራ መዝገብ በማደራጀት ለዐቃቤ ሕግ ያቀርባል።

ጉዳያን የተከታተለው የወላይታ ዞን ከፍተኛው ፍርድ ቤት ግለሰቦቹን በእድሜ ልክ ፅኑ እስራት እንዲቀጡ መወሰኑን ም/ኮማንደር ሀብታሙ አስፋዉ ለቲክቫህ ኢትዮጵያ ተናግረዋል።

ቲክቫህ ኢትዮጵያ
ሀዋሳ
#TikvahEthiopiaFamilyHawassa

@tikvahEthiopia