#GERD🇪🇹

ዶናልድ ትራምፕ ?

ከዚህ ቀደም በነበራቸው የፕሬዝዳንትነት ስልጣን ዘመን " ግብፅ ግድቡን (የታላቁ የኢትዮጵያ ህዳሴ ግድብን) ልታፈነዳው ትችላለች ፤ ግብፅ ግድቡን ታፈነዳዋለች ፤ ኢትዮጵያ ስምምነት ላይ እንድትደርስ ብሞክርም ጥላ ወጥታለች በዚህ ምክንያት ብዙ እርዳታ አቋርጠንባቸዋል " ሲሉ የነበሩት የአሜሪካው ፕሬዚዳንት ዶናልድ ትራምፕ አሁን ደግሞ ግድቡ ሊመረቅ ሲቃረብ " ግድቡን ፋይናንስ ያደረግነው እኛ ነን " ማለት ጀምረዋል።

ትራምፕ ለመጀመሪያ ጊዜ ፕሬዚዳንት ሆነው አሜሪካን በመሩበት የስልጣን ጊዜ በህዳሴው ግድብ ጉዳይ " ኢትዮጵያና ግብፅ ስምምነት ላይ እንዲደርሱ አድርጌ ነበር። ኢትዮጵያ ግን ስምምነቱን ጥላ ወጣች። ያን ግን ማድረግ አልነበረባቸውም። ትልቅ ስህተት ነው የሰሩት። በዚህም ብዙ እርዳታ አቋርጠንባቸዋል። ለስምምነቱ ተገዢ እስካልሆኑ ድረስ ያን ገንዘብ መቼም አያገኙትም " ብለው ነበር።

" ውሃ ወደ ናይል ወንዝ እንዳይፈስ የሚያቆም ግድብ ገነቡ፤ ግብጽ በዚህ ብትበሳጭ መኮነን የለባትም። ስምምቱን አፍርሰዋል (ኢትዮጵያን) ።ግብጽ በዚህ ሁኔታ መኖር አትችልም። ልታፈነዳው ግብጽ ትችላለች፤ ግብጽ ግድቡን ታፈነዳዋለች " የሚል ንግግርም ተናግረው ነበር።

እኚሁ እራሳቸው ፕሬዚዳንት አሁን ደግሞ " ግድቡን ፋይናንስ አድርገናል " የሚል ነገር ይዘው መጥተዋል።

ፕሬዝደንቱ ትላንት ለሊት በትሩዝ የማህበራዊ ትስስር ገጻቸው ላይ አንድ ፅሁፍ አጋርተው ነበር።

አጠቃላይ ፅሁፉ በተለያዩ ሀገራት ሰላም ስለማስፈን ስለሰሯቸው ስራዎች የሚያትትና ለሰሯቸው ስራዎች ግን የኖቤል የሰላም ተሸላሚ መሆን እንዳልቻሉ በመግለጽ የሚያማርር ነው።

በዚህ ፅሁፋቸው " በግብፅ እና በኢትዮጵያ መካከል ሰላም እንዲፀና አድርጊያለሁ ፤ ግን የኖቤል የሰላም ሽልማት አልተሰጠኝም " ብለዋል።

የግብፅ እና ኢትዮጵያን ጉዳይ ያነሱትም በቀጥታ ከታላቁ ህዳሴ ግድብ ጋር በተያያዘ ሲሆን ትራምፕ " ኢትዮጵያ እየገነባችው ያለው ግዙፍ ግድብ በጅልነት በአሜሪካ ፋይናንስ የተደረገ ነው ፤ ይኸው ግድብ ወደ ናይል የሚፈሰው ውሀ በከፍተኛ ደረጃ እንዲቀንስ የሚያደርግ ነው " ብለዋል።

አወዛጋቢው ፕሬዚዳንት በተለያየ ጊዜ ምንም ማስረጃ የሌላቸውና ተጨባጭ ያልሆኑ መረጃዎችን በማቅረብ ይታወቃሉ።

ታላቁ የኢትዮጵያ ህዳሴ ግድብ ከመነሻው ጀምሮ ሙሉ በሙሉ በሚባል ደረጃ በኢትዮጵያውያን ላብና ሃብት የደም ዋጋ ተከፍሎበት ጭምር በህዝብ መዋጮ፣ መንግሥት በሚመድበው በጀት የተገነባ እንደሆነ የዓለም ህዝብ የሚያውቀው ነው።

ይልቅም ግብፅ ግድቡን ለማስቆም በኢትዮጵያ ሰላም እንዳይኖር በምትሰራው ስራ፣ በምትሸርበው ሴራና ሀሰተኛ ውንጀላ እንዲሁም በገንዘብ ጭምር የአሜሪካ ባለስልጣናትን በመደደል ኢትዮጵያ ላይ ጫና እንዲፈጠር ስታደርግ ቆይቷል።

ለዚህም ዋና ማሳያ ከወራት በፊት የ11 ዓመታት እስር የተፈረደባቸው የዶናልድ ትራምፕ ሀገር ሰው የአሜሪካው ባለልስጣንና ተፅእኖ ፈጣሪው ሴናተር ቦብ ሜንዴዝ ናቸው።

ሰውየው ኢትዮጵያ ላይ ጫና እንዲደረግ ከግብፅ ጉቦ ሲበሉ ፤ የግብፅን ጥቅም ለማስከበር ከግብፅ ብዙ ብር ሲቀበሉ እንደነበር ተረጋግጦና በሌሎችም የሙስና ወንጀሎች የ11 ዓመታት እስር በሀገራቸው ፍርድ ቤት ተፈርዶባቸው ነበር።

ሜኔንዴዝ የአሜሪካ ህግ አውጪ ምክር ቤት ውስጥ የሰሩ ፤ በፈረንጆቹ 2020 ላይ በታላቁ የኢትዮጵያ ህዳሴ ግድብ ግንባታ የሶስትዮሽ ድርድር (ኢትዮጵያ፣ ግብፅ ፣ ሱዳን) ላይ በንቃት እንዲሳተፉ የተደረጉ ሰው ናቸው።

በወቅቱም ኢትዮጵያ ላይ ከፍተኛ ጫና ሲያሳድሩ ነበር። ይህን ያደረጉትም ከግብጽ ባለስልጣናት ከፍተኛ መጠን ያለው ገንዘብ ጉቦ ከተቀበሉ በኋላ ነው።

የሶስትዮሽ ድርድሩ ወደ አሜሪካ ዋሽንግተን እንዲሄድ ያደረጉት ደግሞ በወቅቱ በመጀመሪያው የፕሬዝዳንት ስልጣን ዘመናቸው ላይ የነበሩት ዶናልድ ትራምፕ ናቸው።

በዋሸንግተን በተደረጉት ተከታታይ የሶስትዮሽ ድርድር ላይ ኢትዮጵያ በጫና ወደ ስምምነት እንድትመጣ ግፊት ሲደረግ እንደነበር እና ኢትዮጵያ ስምምነቱን " አልፈርምም " በሚል አቋም መጽናቷ የሚታወቅ ነው።

የታላቁ የኢትዮጵያ ህዳሴ ግድብ በመስከረም ወር ይመረቃል ተብሎ ይጠበቃል።

NB. ከላይ የተያያዘው ቪድዮ ዶናልድ ትራምፕ በመጀመሪያው የስልጣን ዘመናቸው ስለግድቡ ሲናገሩት የነበረ ነው ፤ " ግብፅ ግድቡን ታፈነዳዋለች " እያሉ። ቪድዮው ለታሪክ ጭምር ተሰንዶ የሚቀመጥ ነው።

ቲክቫህ ኢትዮጵያ
አዲስ አበባ
#TikvahEthiopiaFamilyAA

@tikvahethiopia